4. மேகி⁴யவக்³கோ³

1. மேகி⁴யஸுத்தவண்ணனா

31. மேகி⁴யவக்³க³ஸ்ஸ பட²மே சாலிகாயந்தி ஏவம் நாமகே நக³ரே. தஸ்ஸ கிர நக³ரஸ்ஸ த்³வாரட்டா²னம் முஞ்சித்வா ஸமந்ததோ சலபங்கம் ஹோதி, தம் சலபங்கம் நிஸ்ஸாய டி²தத்தா ஓலோகேந்தானம் சலமானம் விய உபட்டா²தி, தஸ்மா ‘‘சாலிகா’’தி வுச்சதி. சாலிகே பப்³ப³தேதி தஸ்ஸ நக³ரஸ்ஸ அவிதூ³ரே ஏகோ பப்³ப³தோ, ஸோபி ஸப்³ப³ஸேதத்தா காலபக்க²உபோஸதே² ஓலோகேந்தானம் சலமானோ விய உபட்டா²தி, தஸ்மா ‘‘சாலிகபப்³ப³தோ’’தி ஸங்க²ம் க³தோ. தத்த² ப⁴க³வதோ மஹந்தம் விஹாரம் காரயிம்ஸு, ப⁴க³வா ததா³ தம் நக³ரம் கோ³சரகா³மம் கத்வா தஸ்மிம் சாலிகபப்³ப³தமஹாவிஹாரே விஹரதி. தேன வுத்தம் – ‘‘சாலிகாயம் விஹரதி சாலிகே பப்³ப³தே’’தி. மேகி⁴யோதி தஸ்ஸ தே²ரஸ்ஸ நாமம். உபட்டா²கோ ஹோதீதி பரிசாரகோ ஹோதி. ப⁴க³வதோ ஹி பட²மபோ³தி⁴யம் உபட்டா²கா அனிப³த்³தா⁴ அஹேஸும், ஏகதா³ நாக³ஸமாலோ, ஏகதா³ நாகி³தோ, ஏகதா³ உபவானோ, ஏகதா³ ஸுனக்க²த்தோ, ததா³பி மேகி⁴யத்தே²ரோவ உபட்டா²கோ. தேனாஹ – ‘‘தேன கோ² பன ஸமயேன ஆயஸ்மா மேகி⁴யோ ப⁴க³வதோ உபட்டா²கோ ஹோதீ’’தி.

ஜந்துகா³மந்தி ஏவம் நாமகம் தஸ்ஸேவ விஹாரஸ்ஸ அபரம் கோ³சரகா³மம். ‘‘ஜத்துகா³ம’’ந்திபி பாடோ². கிமிகாளாயாதி காளகிமீனம் ப³ஹுலதாய ‘‘கிமிகாளா’’தி லத்³த⁴னாமாய நதி³யா. ஜங்க⁴விஹாரந்தி சிரனிஸஜ்ஜாய ஜங்கா⁴ஸு உப்பன்னகிலமத²வினோத³னத்த²ம் விசரணம். பாஸாதி³கந்தி அவிரளருக்க²தாய ஸினித்³த⁴பத்ததாய ச பஸ்ஸந்தானம் பஸாத³மாவஹதீதி பாஸாதி³கம். ஸந்த³ச்சா²யதாய மனுஞ்ஞபூ⁴மிபா⁴க³தாய ச மனுஞ்ஞம். அந்தோ பவிட்டா²னம் பீதிஸோமனஸ்ஸஜனனட்டே²ன சித்தம் ரமேதீதி ரமணீயம். அலந்தி பரியத்தம், யுத்தந்திபி அத்தோ². பதா⁴னத்தி²கஸ்ஸாதி யோகே³ன பா⁴வனாய அத்தி²கஸ்ஸ. பதா⁴னாயாதி ஸமணத⁴ம்மகரணாய. ஆக³ச்சே²ய்யாஹந்தி ஆக³ச்சே²ய்யம் அஹம். தே²ரேன கிர புப்³பே³ தம் டா²னம் அனுபடிபாடியா பஞ்ச ஜாதிஸதானி ரஞ்ஞா ஏவ ஸதா அனுபூ⁴தம் உய்யானம் அஹோஸி, தேனஸ்ஸ தி³ட்ட²மத்தேயேவ தத்த² விஹரிதும் சித்தம் நமி. ஆக³மேஹி தாவாதி ஸத்தா² தே²ரஸ்ஸ வசனம் ஸுத்வா உபதா⁴ரேந்தோ ‘‘ந தாவஸ்ஸ ஞாணம் பரிபாகம் க³த’’ந்தி ஞத்வா படிக்கி²பந்தோ ஏவமாஹ. ஏககம்ஹி தாவாதி இத³ம் பனஸ்ஸ ‘‘ஏவமயம் க³ந்த்வாபி கம்மே அனிப்ப²ஜ்ஜமானே நிராஸங்கோ ஹுத்வா பேமவஸேன புன ஆக³ச்சி²ஸ்ஸதீ’’தி சித்தமத்³த³வஜனனத்த²ம் ஆஹ. யாவ அஞ்ஞோபி கோசி பி⁴க்கு² ஆக³ச்ச²தீதி அஞ்ஞோ கோசி பி⁴க்கு² மம ஸந்திகம் யாவ ஆக³ச்ச²தி, தாவ ஆக³மேஹீதி அத்தோ². ‘‘கோசி பி⁴க்கு² தி³ஸ்ஸதீ’’திபி பாடோ². ‘‘ஆக³ச்ச²தூ’’திபி பட²ந்தி, ததா² ‘‘தி³ஸ்ஸதூ’’தி.

நத்தி² கிஞ்சி உத்தரி கரணீயந்தி சதூஸு ஸச்சேஸு சதூஹி மக்³கே³ஹி பரிஞ்ஞாதீ³னம் ஸோளஸன்னம் கிச்சானம் கதத்தா, அபி⁴ஸம்போ³தி⁴யா வா அதி⁴க³தத்தா ததோ அஞ்ஞம் உத்தரி கரணீயம் நாம நத்தி². நத்தி² கதஸ்ஸ வா பதிசயோதி கதஸ்ஸ வா புன பதிசயோபி நத்தி². ந ஹி பா⁴விதமக்³கோ³ புன பா⁴வீயதி, பஹீனகிலேஸானம் வா புன பஹானேன கிச்சம் அத்தி². அத்தி² கதஸ்ஸ பதிசயோதி மய்ஹம் ஸந்தானே நிப்பா²தி³தஸ்ஸ ஸீலாதி³த⁴ம்மஸ்ஸ அரியமக்³க³ஸ்ஸ அனதி⁴க³தத்தா தத³த்த²ம் புன வட்³ட⁴னஸங்கா²தோ பதிசயோ அத்தி², இச்சி²தப்³போ³தி அத்தோ². பதா⁴னந்தி கோ² மேகி⁴ய வத³மானம் கிந்தி வதே³ய்யாமாதி ‘‘ஸமணத⁴ம்மம் கரோமீ’’தி தம் வத³மானம் மயம் அஞ்ஞம் கிம் நாம வதே³ய்யாம?

தி³வாவிஹாரம் நிஸீதீ³தி தி³வாவிஹாரத்தா²ய நிஸீதி³. நிஸின்னோ ச யஸ்மிம் மங்க³லஸிலாபட்டே புப்³பே³ அனுபடிபாடியா பஞ்ச ஜாதிஸதானி ராஜா ஹுத்வா உய்யானகீளம் கீளந்தோ விவித⁴னாடகபரிவாரோ நிஸின்னபுப்³போ³, தஸ்மிம்யேவ டா²னே நிஸீதி³. அத²ஸ்ஸ நிஸின்னகாலதோ பட்டா²ய ஸமணபா⁴வோ விக³தோ விய அஹோஸி, ராஜவேஸம் க³ஹேத்வா நாடகபரிவாரபரிவுதோ ஸேதச்ச²த்தஸ்ஸ ஹேட்டா² மஹாரஹே பல்லங்கே நிஸின்னோ விய ஜாதோ. அத²ஸ்ஸ தம் ஸம்பத்திம் அஸ்ஸாத³யதோ காமவிதக்கோ உத³பாதி³. ஸோ தஸ்மிம்யேவ க²ணே ஸஹோட்³ட⁴ம் க³ஹிதே த்³வே சோரே ஆனேத்வா புரதோ ட²பிதே விய அத்³த³ஸ. தேஸு ஏகஸ்ஸ வத⁴ம் ஆணாபனவஸேன ப்³யாபாத³விதக்கோ உப்பஜ்ஜி, ஏகஸ்ஸ ப³ந்த⁴னம் ஆணாபனவஸேன விஹிம்ஸாவிதக்கோ, ஏவம் ஸோ லதாஜாலேன ருக்கோ² விய மது⁴மக்கி²காஹி மது⁴கா⁴தகோ விய ச அகுஸலவிதக்கேஹி பரிக்கி²த்தோ ஸம்பரிகிண்ணோ அஹோஸி. தம் ஸந்தா⁴ய ‘‘அத² கோ² ஆயஸ்மதோ மேகி⁴யஸ்ஸா’’திஆதி³ வுத்தம்.

அச்ச²ரியம் வத போ⁴தி க³ரஹணச்ச²ரியம் நாம கிரேதம் யதா² ஆயஸ்மா ஆனந்தோ³ ப⁴க³வதோ வலியக³த்தம் தி³ஸ்வா அவோச ‘‘அச்ச²ரியம், ப⁴ந்தே, அப்³பு⁴தம், ப⁴ந்தே’’தி (ஸம். நி. 5.511). அபரே பன ‘‘தஸ்மிம் ஸமயே புப்ப²ப²லபல்லவாதீ³ஸு லோப⁴வஸேன காமவிதக்கோ, க²ரஸ்ஸரானம் பக்கி²ஆதீ³னம் ஸத்³த³ஸ்ஸவனேன ப்³யாபாத³விதக்கோ, லேட்³டு³ஆதீ³ஹி தேஸம் படிபா³ஹனாதி⁴ப்பாயேன விஹிம்ஸாவிதக்கோ, ‘இதே⁴வாஹம் வஸேய்ய’ந்தி தத்த² ஸாபேக்க²தாவஸேன காமவிதக்கோ, வனசரகே தத்த² தத்த² தி³ஸ்வா தேஸு சித்தது³ப்³ப⁴னேன ப்³யாபாத³விதக்கோ, தேஸம் விஹேட²னாதி⁴ப்பாயேன விஹிம்ஸாவிதக்கோ தஸ்ஸ உப்பஜ்ஜீ’’திபி வத³ந்தி. யதா² வா ததா² வா தஸ்ஸ மிச்சா²விதக்குப்பத்தியேவ அச்ச²ரியகாரணம். அன்வாஸத்தாதி அனுலக்³கா³ வோகிண்ணா. அத்தனி க³ரும்ஹி ச ஏகத்தேபி ப³ஹுவசனம் தி³ஸ்ஸதி. ‘‘அனுஸந்தோ’’திபி பாடோ².

யேன ப⁴க³வா தேனுபஸங்கமீதி ஏவம் மிச்சா²விதக்கேஹி ஸம்பரிகிண்ணோ கம்மட்டா²னஸப்பாயம் காதும் அஸக்கோந்தோ ‘‘இத³ம் வத தி³ஸ்வா தீ³க⁴த³ஸ்ஸீ ப⁴க³வா படிஸேதே⁴ஸீ’’தி ஸல்லக்கே²த்வா ‘‘இமம் காரணம் த³ஸப³லஸ்ஸ ஆரோசேஸ்ஸாமீ’’தி நிஸின்னாஸனதோ வுட்டா²ய யேன ப⁴க³வா தேனுபஸங்கமி. உபஸங்கமித்வா ச ‘‘இத⁴ மய்ஹம், ப⁴ந்தே’’திஆதி³னா அத்தனோ பவத்திம் ஆரோசேஸி.

தத்த² யேபு⁴ய்யேனாதி ப³ஹுலம் அபி⁴க்க²ணம். பாபகாதி லாமகா. அகுஸலாதி அகோஸல்லஸம்பூ⁴தா. து³க்³க³திஸம்பாபனட்டே²ன வா பாபகா, குஸலபடிபக்க²தாய அகுஸலா. விதக்கேதி ஊஹதி ஆரம்மணம் சித்தம் அபி⁴னிரோபேதீதி விதக்கோ, காமஸஹக³தோ விதக்கோ காமவிதக்கோ, கிலேஸகாமஸம்பயுத்தோ வத்து²காமாரம்மணோ விதக்கோதி அத்தோ². ப்³யாபாத³ஸஹக³தோ விதக்கோ ப்³யாபாத³விதக்கோ. விஹிம்ஸாஸஹக³தோ விதக்கோ விஹிம்ஸாவிதக்கோ. தேஸு காமானம் அபி⁴னந்த³னவஸேன பவத்தோ நேக்க²ம்மபடிபக்கோ² காமவிதக்கோ, ‘‘இமே ஸத்தா ஹஞ்ஞந்து வா வினஸ்ஸந்து வா மா வா அஹேஸு’’ந்தி ஸத்தேஸு ஸம்பது³ஸ்ஸனவஸேன பவத்தோ மேத்தாபடிபக்கோ² ப்³யாபாத³விதக்கோ, பாணிலேட்³டு³த³ண்டா³தீ³ஹி ஸத்தானம் விஹேடே²துகாமதாவஸேன பவத்தோ கருணாபடிபக்கோ² விஹிம்ஸாவிதக்கோ.

கஸ்மா பனஸ்ஸ ப⁴க³வா தத்த² க³மனம் அனுஜானி? ‘‘அனனுஞ்ஞாதோபி சாயம் மம் ஓஹாய க³ச்சி²ஸ்ஸதேவ, ‘பரிசாரகாமதாய மஞ்ஞே ப⁴க³வா க³ந்தும் ந தே³தீ’தி சஸ்ஸ ஸியா அஞ்ஞத²த்தம். தத³ஸ்ஸ தீ³க⁴ரத்தம் அஹிதாய து³க்கா²ய ஸம்வத்தேய்யா’’தி அனுஜானி.

ஏவம் தஸ்மிம் அத்தனோ பவத்திம் ஆரோசேத்வா நிஸின்னே அத²ஸ்ஸ ப⁴க³வா ஸப்பாயம் த⁴ம்மம் தே³ஸேந்தோ ‘‘அபரிபக்காய, மேகி⁴ய, சேதோவிமுத்தியா’’திஆதி³மாஹ. தத்த² அபரிபக்காயாதி பரிபாகம் அப்பத்தாய. சேதோவிமுத்தியாதி கிலேஸேஹி சேதஸோ விமுத்தியா. புப்³ப³பா⁴கே³ ஹி தத³ங்க³வஸேன சேவ விக்க²ம்ப⁴னவஸேன ச கிலேஸேஹி சேதஸோ விமுத்தி ஹோதி, அபரபா⁴கே³ ஸமுச்சே²த³வஸேன சேவ படிபஸ்ஸத்³தி⁴வஸேன ச. ஸாயம் விமுத்தி ஹேட்டா² வித்தா²ரதோ கதி²தாவ, தஸ்மா தத்த² வுத்தனயேன வேதி³தப்³பா³. தத்த² விமுத்திபரிபாசனீயேஹி த⁴ம்மேஹி ஆஸயே பரிபாசிதே பபோ³தி⁴தே விபஸ்ஸனாய மக்³க³க³ப்³ப⁴ம் க³ண்ஹந்தியா பரிபாகம் க³ச்ச²ந்தியா சேதோவிமுத்தி பரிபக்கா நாம ஹோதி, தத³பா⁴வே அபரிபக்கா.

கதமே பன விமுத்திபரிபாசனீயா த⁴ம்மா? ஸத்³தி⁴ந்த்³ரியாதீ³னம் விஸுத்³தி⁴கரணவஸேன பன்னரஸ த⁴ம்மா வேதி³தப்³பா³. வுத்தஞ்ஹேதம் –

‘‘அஸ்ஸத்³தே⁴ புக்³க³லே பரிவஜ்ஜயதோ, ஸத்³தே⁴ புக்³க³லே ஸேவதோ ப⁴ஜதோ பயிருபாஸதோ, பஸாத³னீயே ஸுத்தந்தே பச்சவேக்க²தோ – இமேஹி தீஹாகாரேஹி ஸத்³தி⁴ந்த்³ரியம் விஸுஜ்ஜ²தி.

‘‘குஸீதே புக்³க³லே பரிவஜ்ஜயதோ, ஆரத்³த⁴வீரியே புக்³க³லே ஸேவதோ ப⁴ஜதோ பயிருபாஸதோ, ஸம்மப்பதா⁴னே பச்சவேக்க²தோ – இமேஹி தீஹாகாரேஹி வீரியிந்த்³ரியம் விஸுஜ்ஜ²தி.

‘‘முட்ட²ஸ்ஸதீ புக்³க³லே பரிவஜ்ஜயதோ, உபட்டி²தஸ்ஸதீ புக்³க³லே ஸேவதோ ப⁴ஜதோ பயிருபாஸதோ, ஸதிபட்டா²னே பச்சவேக்க²தோ – இமேஹி தீஹாகாரேஹி ஸதிந்த்³ரியம் விஸுஜ்ஜ²தி.

‘‘அஸமாஹிதே புக்³க³லே பரிவஜ்ஜயதோ, ஸமாஹிதே புக்³க³லே ஸேவதோ ப⁴ஜதோ பயிருபாஸதோ, ஜா²னவிமோக்கே² பச்சவேக்க²தோ – இமேஹி தீஹாகாரேஹி ஸமாதி⁴ந்த்³ரியம் விஸுஜ்ஜ²தி.

‘‘து³ப்பஞ்ஞே புக்³க³லே பரிவஜ்ஜயதோ, பஞ்ஞவந்தே புக்³க³லே ஸேவதோ ப⁴ஜதோ பயிருபாஸதோ, க³ம்பீ⁴ரஞாணசரியம் பச்சவேக்க²தோ – இமேஹி தீஹாகாரேஹி பஞ்ஞிந்த்³ரியம் விஸுஜ்ஜ²தி.

‘‘இதி இமே பஞ்ச புக்³க³லே பரிவஜ்ஜயதோ, பஞ்ச புக்³க³லே ஸேவதோ ப⁴ஜதோ பயிருபாஸதோ, பஞ்ச ஸுத்தந்தே பச்சவேக்க²தோ – இமேஹி பன்னரஸஹி ஆகாரேஹி, இமானி பஞ்சிந்த்³ரியானி விஸுஜ்ஜ²ந்தீ’’தி (படி. ம. 1.185).

அபரேபி பன்னரஸ த⁴ம்மா விமுத்திபரிபாசனீயா – ஸத்³தா⁴பஞ்சமானி இந்த்³ரியானி, அனிச்சஸஞ்ஞா து³க்க²ஸஞ்ஞா அனத்தஸஞ்ஞா பஹானஸஞ்ஞா விராக³ஸஞ்ஞாதி இமா பஞ்ச நிப்³பே³த⁴பா⁴கி³யா ஸஞ்ஞா, கல்யாணமித்ததா ஸீலஸம்வரோ அபி⁴ஸல்லேக²தா வீரியாரம்போ⁴ நிப்³பே³தி⁴கபஞ்ஞாதி. தேஸு வினேய்யத³மனகுஸலோ ஸத்தா² வினேய்யஸ்ஸ மேகி⁴யத்தே²ரஸ்ஸ அஜ்ஜா²ஸயவஸேன இத⁴ கல்யாணமித்ததாத³யோ விமுத்திபரிபாசனீயே த⁴ம்மே த³ஸ்ஸேந்தோ ‘‘பஞ்ச த⁴ம்மா பரிபாகாய ஸம்வத்தந்தீ’’தி வத்வா தே வித்தா²ரேந்தோ ‘‘இத⁴, மேகி⁴ய, பி⁴க்கு² கல்யாணமித்தோ ஹோதீ’’திஆதி³மாஹ.

தத்த² கல்யாணமித்தோதி கல்யாணோ ப⁴த்³தோ³ ஸுந்த³ரோ மித்தோ ஏதஸ்ஸாதி கல்யாணமித்தோ. யஸ்ஸ ஸீலாதி³கு³ணஸம்பன்னோ ‘‘அக⁴ஸ்ஸ கா⁴தா, ஹிதஸ்ஸ விதா⁴தா’’தி ஏவம் ஸப்³பா³காரேன உபகாரோ மித்தோ ஹோதி, ஸோ புக்³க³லோ கல்யாணமித்தோவ. யதா²வுத்தேஹி கல்யாணபுக்³க³லேஹேவ ஸப்³பி³ரியாபதே²ஸு ஸஹ அயதி பவத்ததி, ந வினா தேஹீதி கல்யாணஸஹாயோ.கல்யாணபுக்³க³லேஸு ஏவ சித்தேன சேவ காயேன ச நின்னபோணபப்³பா⁴ரபா⁴வேன பவத்ததீதி கல்யாணஸம்பவங்கோ. பத³த்தயேன கல்யாணமித்தஸம்ஸக்³கே³ ஆத³ரம் உப்பாதே³தி.

தத்ரித³ம் கல்யாணமித்தலக்க²ணம் – இத⁴ கல்யாணமித்தோ ஸத்³தா⁴ஸம்பன்னோ ஹோதி ஸீலஸம்பன்னோ ஸுதஸம்பன்னோ சாக³ஸம்பன்னோ வீரியஸம்பன்னோ ஸதிஸம்பன்னோ ஸமாதி⁴ஸம்பன்னோ பஞ்ஞாஸம்பன்னோ. தத்த² ஸத்³தா⁴ஸம்பத்தியா ஸத்³த³ஹதி ததா²க³தஸ்ஸ போ³தி⁴ம் கம்மப²லஞ்ச, தேன ஸம்மாஸம்போ³தி⁴ஹேதுபூ⁴தம் ஸத்தேஸு ஹிதேஸிதம் ந பரிச்சஜதி. ஸீலஸம்பத்தியா ஸப்³ரஹ்மசாரீனம் பியோ ஹோதி மனாபோ க³ரு பா⁴வனீயோ சோத³கோ பாபக³ரஹீ வத்தா வசனக்க²மோ, ஸுதஸம்பத்தியா ஸச்சபடிச்சஸமுப்பாதா³தி³படிஸம்யுத்தானம் க³ம்பீ⁴ரானம் கதா²னம் கத்தா ஹோதி, சாக³ஸம்பத்தியா அப்பிச்சோ² ஹோதி ஸந்துட்டோ² பவிவித்தோ அஸம்ஸட்டோ², வீரியஸம்பத்தியா ஆரத்³த⁴வீரியோ ஹோதி ஸத்தானம் ஹிதப்படிபத்தியா, ஸதிஸம்பத்தியா உபட்டி²தஸ்ஸதி ஹோதி, ஸமாதி⁴ஸம்பத்தியா அவிக்கி²த்தோ ஹோதி ஸமாஹிதசித்தோ, பஞ்ஞாஸம்பத்தியா அவிபரீதம் ஜானாதி. ஸோ ஸதியா குஸலானம் த⁴ம்மானம் க³தியோ ஸமன்வேஸமானோ பஞ்ஞாய ஸத்தானம் ஹிதாஹிதம் யதா²பூ⁴தம் ஜானித்வா, ஸமாதி⁴னா தத்த² ஏகக்³க³சித்தோ ஹுத்வா, வீரியேன ஸத்தே அஹிதா நிஸேதே⁴த்வா ஹிதே நியோஜேதி. தேனாஹ –

‘‘பியோ க³ரு பா⁴வனீயோ, வத்தா ச வசனக்க²மோ;

க³ம்பீ⁴ரஞ்ச கத²ம் கத்தா, நோ சட்டா²னே நியோஜயே’’தி. (அ. நி. 7.37);

அயம் பட²மோ த⁴ம்மோ பரிபாகாய ஸம்வத்ததீதி, அயம் கல்யாணமித்ததாஸங்கா²தோ ப்³ரஹ்மசரியவாஸஸ்ஸ ஆதி³பா⁴வதோ, ஸப்³பே³ஸஞ்ச குஸலானம் த⁴ம்மானம் ப³ஹுகாரதாய பதா⁴னபா⁴வதோ ச இமேஸு பஞ்சஸு த⁴ம்மேஸு ஆதி³தோ வுத்தத்தா பட²மோ அனவஜ்ஜத⁴ம்மோ அவிஸுத்³தா⁴னம் ஸத்³தா⁴தீ³னம் விஸுத்³தி⁴கரணவஸேன சேதோவிமுத்தியா பரிபாகாய ஸம்வத்ததி. ஏத்த² ச கல்யாணமித்தஸ்ஸ ப³ஹுகாரதா பதா⁴னதா ச ‘‘உபட்³ட⁴மித³ம், ப⁴ந்தே, ப்³ரஹ்மசரியஸ்ஸ யதி³த³ம் கல்யாணமித்ததா’’தி வத³ந்தம் த⁴ம்மப⁴ண்டா³கா³ரிகம், ‘‘மா ஹேவம், ஆனந்தா³’’தி த்³விக்க²த்தும் படிஸேதே⁴த்வா, ‘‘ஸகலமேவ ஹித³ம், ஆனந்த³, ப்³ரஹ்மசரியம், யதி³த³ம் கல்யாணமித்ததா கல்யாணஸஹாயதா’’திஆதி³ஸுத்தபதே³ஹி (ஸம். நி. 1.129; 5.2) வேதி³தப்³பா³.

புன சபரந்தி புன ச அபரம் த⁴ம்மஜாதம். ஸீலவாதி ஏத்த² கேனட்டே²ன ஸீலம்? ஸீலனட்டே²ன ஸீலம். கிமித³ம் ஸீலனம் நாம? ஸமாதா⁴னம், காயகம்மாதீ³னம் ஸுஸீல்யவஸேன அவிப்பகிண்ணதாதி அத்தோ². அத² வா உபதா⁴ரணம், ஜா²னாதி³குஸலானம் த⁴ம்மானம் பதிட்டா²னவஸேன ஆதா⁴ரபா⁴வோதி அத்தோ². தஸ்மா ஸீலேதி ஸீலதீதி வா ஸீலம். அயம் தாவ ஸத்³த³லக்க²ணனயேன ஸீலத்தோ². அபரே பன ‘‘ஸிரட்டோ² ஸீதலட்டோ² ஸீலட்டோ² ஸம்வரட்டோ²’’தி நிருத்தினயேன அத்த²ம் வண்ணேந்தி. தயித³ம் பாரிபூரிதோ அதிஸயதோ வா ஸீலம் அஸ்ஸ அத்தீ²தி ஸீலவா, ஸீலஸம்பன்னோதி அத்தோ².

யதா² ச ஸீலவா ஹோதி ஸீலஸம்பன்னோ, தம் த³ஸ்ஸேதும் ‘‘பாதிமோக்க²ஸம்வரஸம்வுதோ’’திஆதி³மாஹ. தத்த² பாதிமோக்க²ந்தி ஸிக்கா²பத³ஸீலம். தஞ்ஹி யோ நம் பாதி ரக்க²தி, தம் மோக்கே²தி மோசேதி ஆபாயிகாதீ³ஹி து³க்கே²ஹீதி பாதிமோக்க²ம். ஸம்வரணம் ஸம்வரோ, காயவாசாஹி அவீதிக்கமோ. பாதிமோக்க²மேவ ஸம்வரோ பாதிமோக்க²ஸம்வரோ, தேன ஸம்வுதோ பிஹிதகாயவாசோதி பாதிமோக்க²ஸம்வரஸம்வுதோ, இத³மஸ்ஸ தஸ்மிம் ஸீலே பதிட்டி²தபா⁴வபரிதீ³பனம். விஹரதீதி தத³னுரூபவிஹாரஸமங்கி³பா⁴வபரிதீ³பனம். ஆசாரகோ³சரஸம்பன்னோதி ஹேட்டா² பாதிமோக்க²ஸம்வரஸ்ஸ, உபரி விஸேஸானம் யோக³ஸ்ஸ ச உபகாரகத⁴ம்மபரிதீ³பனம். அணுமத்தேஸு வஜ்ஜேஸு ப⁴யத³ஸ்ஸாவீதி பாதிமோக்க²ஸீலதோ அசவனத⁴ம்மதாபரிதீ³பனம். ஸமாதா³யாதி ஸிக்கா²பதா³னம் அனவஸேஸதோ ஆதா³னபரிதீ³பனம். ஸிக்க²தீதி ஸிக்கா²ய ஸமங்கி³பா⁴வபரிதீ³பனம். ஸிக்கா²பதே³ஸூதி ஸிக்கி²தப்³ப³த⁴ம்மபரிதீ³பனம்.

அபரோ நயோ – கிலேஸானம் ப³லவபா⁴வதோ, பாபகிரியாய ஸுகரபா⁴வதோ, புஞ்ஞகிரியாய ச து³க்கரபா⁴வதோ ப³ஹுக்க²த்தும் அபாயேஸு பதனஸீலோதி பாதீ, புது²ஜ்ஜனோ. அனிச்சதாய வா ப⁴வாதீ³ஸு கம்மவேக³க்கி²த்தோ க⁴டீயந்தம் விய அனவட்டா²னேன பரிப்³ப⁴மனதோ க³மனஸீலோதி பாதீ, மரணவஸேன வா தம்ஹி தம்ஹி ஸத்தனிகாயே அத்தபா⁴வஸ்ஸ பதனஸீலோதி வா பாதீ, ஸத்தஸந்தானோ சித்தமேவ வா. தம் பாதினம் ஸம்ஸாரது³க்க²தோ மோக்கே²தீதி பாதிமோக்க²ம். சித்தஸ்ஸ ஹி விமோக்கே²ன ஸத்தோ ‘‘விமுத்தோ’’தி வுச்சதி. வுத்தஞ்ஹி ‘‘சித்தவோதா³னா ஸத்தா விஸுஜ்ஜ²ந்தீ’’தி (ஸம். நி. 3.100), ‘‘அனுபாதா³ய ஆஸவேஹி சித்தம் விமுத்த’’ந்தி (மஹாவ. 28) ச.

அத² வா அவிஜ்ஜாதி³ஹேதுனா ஸம்ஸாரே பததி க³ச்ச²தி பவத்ததீதி பாதி, ‘‘அவிஜ்ஜானீவரணானம் ஸத்தானம் தண்ஹாஸம்யோஜனானம் ஸந்தா⁴வதம் ஸம்ஸரத’’ந்தி (ஸம். நி. 2.124) ஹி வுத்தம். தஸ்ஸ பாதினோ ஸத்தஸ்ஸ தண்ஹாதி³ஸம்கிலேஸத்தயதோ மோக்கோ² ஏதேனாதி பாதிமோக்கோ², ‘‘கண்டே²காலோ’’திஆதீ³னம் விய ஸமாஸஸித்³தி⁴ வேதி³தப்³பா³.

அத² வா பாதேதி வினிபாதேதி து³க்கே²ஹீதி பாதி, சித்தம். வுத்தஞ்ஹி ‘‘சித்தேன நிய்யதீ லோகோ, சித்தேன பரிகஸ்ஸதீ’’தி (ஸம். நி. 1.62). தஸ்ஸ பாதினோ மோக்கோ² ஏதேனாதி பாதிமோக்கோ². பததி வா ஏதேன அபாயது³க்கே² ஸம்ஸாரது³க்கே² சாதி பாதி, தண்ஹாதி³ஸம்கிலேஸா. வுத்தஞ்ஹி – ‘‘தண்ஹா ஜனேதி புரிஸம் (ஸம். நி. 1.55-57), தண்ஹாது³தியோ புரிஸோ’’தி (இதிவு. 15, 105) சாதி³. ததோ பாதிதோ மோக்கோ²தி பாதிமோக்கோ².

அத² வா பததி ஏத்தா²தி பாதி, ச² அஜ்ஜ²த்திகபா³ஹிரானி ஆயதனானி. வுத்தஞ்ஹி – ‘‘ச²ஸு லோகோ ஸமுப்பன்னோ, ச²ஸு குப்³ப³தி ஸந்த²வ’’ந்தி (ஸு. நி. 171). ததோ ச² அஜ்ஜ²த்திகபா³ஹிராயதனஸங்கா²தபாதிதோ மோக்கோ²தி பாதிமோக்கோ². அத² வா பாதோ வினிபாதோ அஸ்ஸ அத்தீ²தி பாதீ, ஸம்ஸாரோ. ததோ மோக்கோ²தி பாதிமோக்கோ².

அத² வா ஸப்³ப³லோகாதி⁴பதிபா⁴வதோ த⁴ம்மிஸ்ஸரோ ப⁴க³வா பதீதி வுச்சதி, முச்சதி ஏதேனாதி மோக்கோ². பதினோ மோக்கோ² தேன பஞ்ஞத்தத்தாதி பதிமோக்கோ², பதிமோக்கோ² ஏவ பாதிமோக்கோ². ஸப்³ப³கு³ணானம் வா தம்மூலபா⁴வதோ உத்தமட்டே²ன பதி ச, ஸோ யதா²வுத்தட்டே²ன மோக்கோ² சாதி பதிமோக்கோ², பதிமோக்கோ² ஏவ பாதிமோக்கோ². ததா² ஹி வுத்தம் ‘‘பாதிமோக்க²ந்திஆதி³மேதம் முக²மேத’’ந்தி வித்தா²ரோ.

அத² வா பஇதி பகாரே, அதீதி அச்சந்தத்தே² நிபாதோ, தஸ்மா பகாரேஹி அச்சந்தம் மோக்கே²தீதி பாதிமோக்க²ம். இத³ஞ்ஹி ஸீலம் ஸயம் தத³ங்க³வஸேன, ஸமாதி⁴ஸஹிதம் பஞ்ஞாஸஹிதஞ்ச விக்க²ம்ப⁴னவஸேன ஸமுச்சே²த³வஸேன ச அச்சந்தம் மோக்கே²தி மோசேதீதி பாதிமோக்க²ம். பதி மோக்கோ²தி வா பதிமோக்கோ², தம்ஹா தம்ஹா வீதிக்கமதோ³ஸதோ பச்சேகம் மோக்கோ²தி அத்தோ². பதிமோக்கோ² ஏவ பாதிமோக்கோ². மோக்கோ²தி வா நிப்³பா³னம், தஸ்ஸ மோக்க²ஸ்ஸ படிபி³ம்ப³பூ⁴தோதி பதிமோக்கோ². ஸீலஸம்வரோ ஹி ஸூரியஸ்ஸ அருணுக்³க³மனம் விய நிப்³பா³னஸ்ஸ உத³யபூ⁴தோ தப்படிபா⁴கோ³ ச யதா²ரஹம் ஸம்கிலேஸனிப்³பா³பனதோ. பதிமோக்கோ² ஏவ பாதிமோக்கோ². பதிவத்ததி மோக்கே²தி து³க்க²ந்தி வா பதிமோக்க²ம், பதிமோக்க²மேவ பாதிமோக்க²ந்தி ஏவம் தாவேத்த² பாதிமோக்க²ஸத்³த³ஸ்ஸ அத்தோ² வேதி³தப்³போ³.

ஸம்வரதி பித³ஹதி ஏதேனாதி ஸம்வரோ, பாதிமோக்க²மேவ ஸம்வரோ பாதிமோக்க²ஸம்வரோ. அத்த²தோ பன ததோ ததோ வீதிக்கமிதப்³ப³தோ விரதியோ சேதனா ச. தேன பாதிமோக்க²ஸம்வரேன உபேதோ ஸமன்னாக³தோ பாதிமோக்க²ஸம்வரஸம்வுதோதி வுத்தோ. வுத்தஞ்ஹேதம் விப⁴ங்கே³ –

‘‘இமினா பாதிமோக்க²ஸம்வரேன உபேதோ ஹோதி ஸமுபேதோ உபாக³தோ ஸமுபாக³தோ உபபன்னோ ஸமுபபன்னோ ஸமன்னாக³தோ, தேன வுச்சதி பாதிமோக்க²ஸம்வரஸம்வுதோ’’தி (விப⁴. 511).

விஹரதீதி இரியாபத²விஹாரேன விஹரதி இரீயதி வத்ததி.

ஆசாரகோ³சரஸம்பன்னோதி வேளுதா³னாதி³மிச்சா²ஜீவஸ்ஸ காயபாக³ப்³பி⁴யாதீ³னஞ்ச அகரணேன ஸப்³ப³ஸோ அனாசாரம் வஜ்ஜேத்வா ‘‘காயிகோ அவீதிக்கமோ வாசஸிகோ அவீதிக்கமோ காயிகவாசஸிகோ அவீதிக்கமோ’’தி ஏவம் வுத்தபி⁴க்கு²ஸாருப்பஆசாரஸம்பத்தியா, வேஸியாதி³அகோ³சரம் வஜ்ஜேத்வா பிண்ட³பாதாதி³அத்த²ம் உபஸங்கமிதும் யுத்தட்டா²னஸங்கா²தேன கோ³சரேன ச ஸம்பன்னத்தா ஆசாரகோ³சரஸம்பன்னோ.

அபிச யோ பி⁴க்கு² ஸத்த²ரி ஸகா³ரவோ ஸப்பதிஸ்ஸோ ஸப்³ரஹ்மசாரீஸு ஸகா³ரவோ ஸப்பதிஸ்ஸோ ஹிரோத்தப்பஸம்பன்னோ ஸுனிவத்தோ² ஸுபாருதோ பாஸாதி³கேன அபி⁴க்கந்தேன படிக்கந்தேன ஆலோகிதேன விலோகிதேன ஸமிஞ்ஜிதேன பஸாரிதேன இரியாபத²ஸம்பன்னோ இந்த்³ரியேஸு கு³த்தத்³வாரோ போ⁴ஜனே மத்தஞ்ஞூ ஜாக³ரியமனுயுத்தோ ஸதிஸம்பஜஞ்ஞேன ஸமன்னாக³தோ அப்பிச்சோ² ஸந்துட்டோ² பவிவித்தோ அஸம்ஸட்டோ² ஆபி⁴ஸமாசாரிகேஸு ஸக்கச்சகாரீ க³ருசித்தீகாரப³ஹுலோ விஹரதி, அயம் வுச்சதி ஆசாரஸம்பன்னோ.

கோ³சரோ பன உபனிஸ்ஸயகோ³சரோ ஆரக்க²கோ³சரோ உபனிப³ந்த⁴கோ³சரோதி திவிதோ⁴. தத்த² யோ த³ஸகதா²வத்து²கு³ணஸமன்னாக³தோ வுத்தலக்க²ணோ கல்யாணமித்தோ, யம் நிஸ்ஸாய அஸுதம் ஸுணாதி, ஸுதம் பரியோதா³பேதி, கங்க²ம் விதரதி, தி³ட்டி²ம் உஜும் கரோதி, சித்தம் பஸாதே³தி, யஞ்ச அனுஸிக்க²ந்தோ ஸத்³தா⁴ய வட்³ட⁴தி, ஸீலேன, ஸுதேன, சாகே³ன, பஞ்ஞாய வட்³ட⁴தி, அயம் வுச்சதி உபனிஸ்ஸயகோ³சரோ.

யோ பி⁴க்கு² அந்தரக⁴ரம் பவிட்டோ² வீதி²ம் படிபன்னோ ஓக்கி²த்தசக்கு² யுக³மத்தத³ஸ்ஸாவீ சக்கு²ந்த்³ரியஸம்வுதோவ க³ச்ச²தி, ந ஹத்தி²ம் ஓலோகேந்தோ, ந அஸ்ஸம், ந ரத²ம், ந பத்திம், ந இத்தி²ம், ந புரிஸம் ஓலோகேந்தோ, ந உத்³த⁴ம் ஓலோகேந்தோ, ந அதோ⁴ ஓலோகேந்தோ, ந தி³ஸாவிதி³ஸம் பேக்க²மானோ க³ச்ச²தி, அயம் ஆரக்க²கோ³சரோ.

உபனிப³ந்த⁴கோ³சரோ பன சத்தாரோ ஸதிபட்டா²னா, யத்த² பி⁴க்கு² அத்தனோ சித்தம் உபனிப³ந்த⁴தி, வுத்தஞ்ஹேதம் ப⁴க³வதா –

‘‘கோ ச, பி⁴க்க²வே, பி⁴க்கு²னோ கோ³சரோ ஸகோ பேத்திகோ விஸயோ, யதி³த³ம் சத்தாரோ ஸதிபட்டா²னா’’தி (ஸம். நி. 5.372).

தத்த² உபனிஸ்ஸயகோ³சரஸ்ஸ புப்³பே³ வுத்தத்தா இதரேஸம் வஸேனேத்த² கோ³சரோ வேதி³தப்³போ³. இதி யதா²வுத்தாய ஆசாரஸம்பத்தியா, இமாய ச கோ³சரஸம்பத்தியா ஸமன்னாக³தத்தா ஆசாரகோ³சரஸம்பன்னோ.

அணுமத்தேஸு வஜ்ஜேஸு ப⁴யத³ஸ்ஸாவீதி அப்பமத்தகத்தா அணுப்பமாணேஸு அஸ்ஸதியா அஸஞ்சிச்ச ஆபன்னஸேகி²யஅகுஸலசித்துப்பாதா³தி³பே⁴தே³ஸு வஜ்ஜேஸு ப⁴யத³ஸ்ஸனஸீலோ. யோ ஹி பி⁴க்கு² பரமாணுமத்தம் வஜ்ஜம் அட்ட²ஸட்டி²யோஜனபமாணாதி⁴கயோஜனஸதஸஹஸ்ஸுப்³பே³த⁴ஸினேருபப்³ப³தராஜஸதி³ஸம் கத்வா பஸ்ஸதி, யோபி ஸப்³ப³லஹுகம் து³ப்³பா⁴ஸிதமத்தம் பாராஜிகஸதி³ஸம் கத்வா பஸ்ஸதி, அயம்பி அணுமத்தேஸு வஜ்ஜேஸு ப⁴யத³ஸ்ஸாவீ நாம. ஸமாதா³ய ஸிக்க²தி ஸிக்கா²பதே³ஸூதி யம்கிஞ்சி ஸிக்கா²பதே³ஸு ஸிக்கி²தப்³ப³ம், தம் ஸப்³பே³ன ஸப்³ப³ம் ஸப்³ப³தா² ஸப்³ப³ம் அனவஸேஸம் ஸம்மா ஆதி³யித்வா ஸிக்க²தி, பவத்ததி பரிபூரேதீதி அத்தோ².

அபி⁴ஸல்லேகி²காதி அதிவிய கிலேஸானம் ஸல்லேக²னீ, தேஸம் தனுபா⁴வாய பஹானாய யுத்தரூபா. சேதோவிவரணஸப்பாயாதி சேதஸோ படிச்சா²த³கானம் நீவரணானம் தூ³ரீபா⁴வகரணேன சேதோவிவரணஸங்கா²தானம் ஸமத²விபஸ்ஸனானம் ஸப்பாயா, ஸமத²விபஸ்ஸனாசித்தஸ்ஸேவ வா விவரணாய பாகடீகரணாய வா ஸப்பாயா உபகாரிகாதி சேதோவிவரணஸப்பாயா.

இதா³னி யேன நிப்³பி³தா³தி³ஆவஹனேன அயம் கதா² அபி⁴ஸல்லேகி²கா சேதோவிவரணஸப்பாயா ச நாம ஹோதி, தம் த³ஸ்ஸேதும் ‘‘ஏகந்தனிப்³பி³தா³யா’’திஆதி³ வுத்தம். தத்த² ஏகந்தனிப்³பி³தா³யாதி ஏகம்ஸேனேவ வட்டது³க்க²தோ நிப்³பி³ந்த³னத்தா²ய. விராகா³ய நிரோதா⁴யாதி தஸ்ஸேவ விரஜ்ஜனத்தா²ய ச நிருஜ்ஜ²னத்தா²ய ச. உபஸமாயாதி ஸப்³ப³கிலேஸூபஸமாய. அபி⁴ஞ்ஞாயாதி ஸப்³ப³ஸ்ஸாபி அபி⁴ஞ்ஞேய்யஸ்ஸ அபி⁴ஜானனாய. ஸம்போ³தா⁴யாதி சதுமக்³க³ஸம்போ³தா⁴ய. நிப்³பா³னாயாதி அனுபாதி³ஸேஸனிப்³பா³னாய. ஏதேஸு ஹி ஆதி³தோ தீஹி பதே³ஹி விபஸ்ஸனா வுத்தா, த்³வீஹி மக்³கோ³, த்³வீஹி நிப்³பா³னம் வுத்தம். ஸமத²விபஸ்ஸனா ஆதி³ம் கத்வா நிப்³பா³னபரியோஸானோ அயம் ஸப்³போ³ உத்தரிமனுஸ்ஸத⁴ம்மோ த³ஸகதா²வத்து²லாபி⁴னோ ஸிஜ்ஜ²தீதி த³ஸ்ஸேதி.

இதா³னி தம் கத²ம் விப⁴ஜித்வா த³ஸ்ஸேந்தோ ‘‘அப்பிச்ச²கதா²’’திஆதி³மாஹ. தத்த² அப்பிச்சோ²தி ந இச்சோ², தஸ்ஸ கதா² அப்பிச்ச²கதா², அப்பிச்ச²பா⁴வப்படிஸம்யுத்தா கதா² வா அப்பிச்ச²கதா². ஏத்த² ச அத்ரிச்சோ² பாபிச்சோ² மஹிச்சோ² அப்பிச்சோ²தி இச்சா²வஸேன சத்தாரோ புக்³க³லா. தேஸு அத்தனா யதா²லத்³தே⁴ன லாபே⁴ன அதித்தோ உபரூபரி லாப⁴ம் இச்ச²ந்தோ அத்ரிச்சோ² நாம. யம் ஸந்தா⁴ய வுத்தம் –

‘‘சதுப்³பி⁴ அட்ட²ஜ்ஜ²க³மா, அட்ட²பி⁴ சாபி ஸோளஸ;

ஸோளஸபி⁴ ச த்³வத்திம்ஸ, அத்ரிச்ச²ம் சக்கமாஸதோ³;

இச்சா²ஹதஸ்ஸ போஸஸ்ஸ, சக்கம் ப⁴மதி மத்த²கே’’தி. (ஜா. 1.5.103);

‘‘அத்ரிச்சா² அதிலோபே⁴ன, அதிலோப⁴மதே³ன சா’’தி ச. (ஜா. 1.2.168);

லாப⁴ஸக்காரஸிலோகனிகாமயதாய அஸந்தகு³ணஸம்பா⁴வனாதி⁴ப்பாயோ பாபிச்சோ². யம் ஸந்தா⁴ய வுத்தம் –

‘‘தத்த² கதமா குஹனா? லாப⁴ஸக்காரஸிலோகஸன்னிஸ்ஸிதஸ்ஸ பாபிச்ச²ஸ்ஸ இச்சா²பகதஸ்ஸ பச்சயப்படிஸேவனஸங்கா²தேன வா ஸாமந்தஜப்பிதேன வா இரியாபத²ஸ்ஸ வா அட²பனா’’திஆதி³ (விப⁴. 861).

ஸந்தகு³ணஸம்பா⁴வனாதி⁴ப்பாயோ படிக்³க³ஹணே அமத்தஞ்ஞூ மஹிச்சோ². யம் ஸந்தா⁴ய வுத்தம் –

‘‘இதே⁴கச்சோ ஸத்³தோ⁴ ஸமானோ ‘ஸத்³தோ⁴தி மம் ஜனோ ஜானாதூ’தி இச்ச²தி, ஸீலவா ஸமானோ ‘ஸீலவாதி மம் ஜனோ ஜானாதூ’தி இச்ச²தீ’’திஆதி³ (விப⁴. 851).

து³த்தப்பியதாய ஹிஸ்ஸ விஜாதமாதாபி சித்தம் க³ஹேதும் ந ஸக்கோதி. தேனேதம் வுச்சதி –

‘‘அக்³கி³க்க²ந்தோ⁴ ஸமுத்³தோ³ ச, மஹிச்சோ² சாபி புக்³க³லோ;

ஸகடேஹி பச்சயே தே³ந்து, தயோபேதே அதப்பியா’’தி.

ஏதே பன அத்ரிச்ச²தாத³யோ தோ³ஸே ஆரகா பரிவஜ்ஜேத்வா ஸந்தகு³ணனிகூ³ஹனாதி⁴ப்பாயோ படிக்³க³ஹணே ச மத்தஞ்ஞூ அப்பிச்சோ². ஸோ அத்தனி விஜ்ஜமானம்பி கு³ணம் படிச்சா²தே³துகாமதாய ஸத்³தோ⁴ ஸமானோ ‘‘ஸத்³தோ⁴தி மம் ஜனோ ஜானாதூ’’தி ந இச்ச²தி, ஸீலவா, ப³ஹுஸ்ஸுதோ, பவிவித்தோ, ஆரத்³த⁴வீரியோ, உபட்டி²தஸ்ஸதி, ஸமாஹிதோ, பஞ்ஞவா ஸமானோ ‘‘பஞ்ஞவாதி மம் ஜனோ ஜானாதூ’’தி ந இச்ச²தி.

ஸ்வாயம் பச்சயப்பிச்சோ² து⁴தங்க³ப்பிச்சோ² பரியத்திஅப்பிச்சோ² அதி⁴க³மப்பிச்சோ²தி சதுப்³பி³தோ⁴. தத்த² சதூஸு பச்சயேஸு அப்பிச்சோ² பச்சயதா³யகம் தே³ய்யத⁴ம்மம் அத்தனோ தா²மஞ்ச ஓலோகேத்வா ஸசேபி ஹி தே³ய்யத⁴ம்மோ ப³ஹு ஹோதி, தா³யகோ அப்பம் தா³துகாமோ, தா³யகஸ்ஸ வஸேன அப்பமேவ க³ண்ஹாதி. தே³ய்யத⁴ம்மோ சே அப்போ, தா³யகோ ப³ஹும் தா³துகாமோ, தே³ய்யத⁴ம்மஸ்ஸ வஸேன அப்பமேவ க³ண்ஹாதி. தே³ய்யத⁴ம்மோபி சே ப³ஹு, தா³யகோபி ப³ஹும் தா³துகாமோ, அத்தனோ தா²மம் ஞத்வா பமாணயுத்தமேவ க³ண்ஹாதி. ஏவரூபோ ஹி பி⁴க்கு² அனுப்பன்னம் லாப⁴ம் உப்பாதே³தி, உப்பன்னம் லாப⁴ம் தா²வரம் கரோதி, தா³யகானம் சித்தம் ஆராதே⁴தி. து⁴தங்க³ஸமாதா³னஸ்ஸ பன அத்தனி அத்தி²பா⁴வம் ந ஜானாபேதுகாமோ து⁴தங்க³ப்பிச்சோ². யோ அத்தனோ ப³ஹுஸ்ஸுதபா⁴வம் ஜானாபேதும் ந இச்ச²தி, அயம் பரியத்திஅப்பிச்சோ². யோ பன ஸோதாபன்னாதீ³ஸு அஞ்ஞதரோ ஹுத்வா ஸப்³ரஹ்மசாரீனம்பி அத்தனோ ஸோதாபன்னாதி³பா⁴வம் ஜானாபேதும் ந இச்ச²தி, அயம் அதி⁴க³மப்பிச்சோ². ஏவமேதேஸம் அப்பிச்சா²னம் யா அப்பிச்ச²தா, தஸ்ஸா ஸத்³தி⁴ம் ஸந்த³ஸ்ஸனாதி³விதி⁴னா அனேகாகாரவோகாரஆனிஸம்ஸவிபா⁴வனவஸேன, தப்படிபக்க²ஸ்ஸ அத்ரிச்சா²தி³பே⁴த³ஸ்ஸ இச்சா²சாரஸ்ஸ ஆதீ³னவவிபா⁴வனவஸேன ச பவத்தா கதா² அப்பிச்ச²கதா².

ஸந்துட்டி²கதா²தி ஏத்த² ஸந்துட்டீ²தி ஸகேன அத்தனா லத்³தே⁴ன துட்டி² ஸந்துட்டி². அத² வா விஸமம் பச்சயிச்ச²ம் பஹாய ஸமம் துட்டி², ஸந்துட்டி². ஸந்தேன வா விஜ்ஜமானேன துட்டி² ஸந்துட்டி². வுத்தஞ்சேதம் –

‘‘அதீதம் நானுஸோசந்தோ, நப்பஜப்பமனாக³தம்;

பச்சுப்பன்னேன யாபேந்தோ, ஸந்துட்டோ²தி பவுச்சதீ’’தி.

ஸம்மா வா ஞாயேன ப⁴க³வதா அனுஞ்ஞாதவிதி⁴னா பச்சயேஹி துட்டி² ஸந்துட்டி². அத்த²தோ இதரீதரபச்சயஸந்தோஸோ, ஸோ த்³வாத³ஸவிதோ⁴ ஹோதி. கத²ம்? சீவரே யதா²லாப⁴ஸந்தோஸோ, யதா²ப³லஸந்தோஸோ, யதா²ஸாருப்பஸந்தோஸோதி திவிதோ⁴, ஏவம் பிண்ட³பாதாதீ³ஸு.

தத்ராயம் பபே⁴த³வண்ணனா – இத⁴ பி⁴க்கு² சீவரம் லப⁴தி ஸுந்த³ரம் வா அஸுந்த³ரம் வா, ஸோ தேனேவ யாபேதி, அஞ்ஞம் ந பத்தே²தி, லப⁴ந்தோபி ந க³ண்ஹாதி, அயமஸ்ஸ சீவரே யதா²லாப⁴ஸந்தோஸோ. அத² பன பகதிது³ப்³ப³லோ வா ஹோதி ஆபா³த⁴ஜராபி⁴பூ⁴தோ வா, க³ரும் சீவரம் பாருபந்தோ கிலமதி, ஸோ ஸபா⁴கே³ன பி⁴க்கு²னா ஸத்³தி⁴ம் தம் பரிவத்தேத்வா லஹுகேன யாபேந்தோபி ஸந்துட்டோ²வ ஹோதி, அயமஸ்ஸ சீவரே யதா²ப³லஸந்தோஸோ. அபரோ பட்டசீவராதீ³னம் அஞ்ஞதரம் மஹக்³க⁴சீவரம் லபி⁴த்வா ‘‘இத³ம் தே²ரானம் சிரபப்³ப³ஜிதானம், இத³ம் ப³ஹுஸ்ஸுதானம் அனுரூபம், இத³ம் கி³லானானம் து³ப்³ப³லானம், இத³ம் அப்பலாபீ⁴னம் வா ஹோதூ’’தி தேஸம் த³த்வா அத்தனா ஸங்காரகூடாதி³தோ நந்தகானி உச்சினித்வா ஸங்கா⁴டிம் கத்வா தேஸம் வா புராணசீவரானி க³ஹேத்வா தா⁴ரேந்தோபி ஸந்துட்டோ²வ ஹோதி, அயமஸ்ஸ சீவரே யதா²ஸாருப்பஸந்தோஸோ.

இத⁴ பன பி⁴க்கு² பிண்ட³பாதம் லப⁴தி லூக²ம் வா பணீதம் வா, ஸோ தேனேவ யாபேதி, அஞ்ஞம் ந பத்தே²தி, லப⁴ந்தோபி ந க³ண்ஹாதி, அயமஸ்ஸ பிண்ட³பாதே யதா²லாப⁴ஸந்தோஸோ. அத² பன ஆபா³தி⁴கோ ஹோதி, லூக²ம் பகதிவிருத்³த⁴ம் வா ப்³யாதி⁴விருத்³த⁴ம் வா பிண்ட³பாதம் பு⁴ஞ்ஜித்வா கா³ள்ஹம் ரோகா³தங்கம் பாபுணாதி, ஸோ ஸபா⁴க³ஸ்ஸ பி⁴க்கு²னோ த³த்வா தஸ்ஸ ஹத்த²தோ ஸப்பாயபோ⁴ஜனம் பு⁴ஞ்ஜித்வா ஸமணத⁴ம்மம் கரோந்தோபி ஸந்துட்டோ²வ ஹோதி, அயமஸ்ஸ பிண்ட³பாதே யதா²ப³லஸந்தோஸோ. அபரோ பி⁴க்கு² பணீதம் பிண்ட³பாதம் லப⁴தி, ஸோ ‘‘அயம் பிண்ட³பாதோ சிரபப்³ப³ஜிதாதீ³னம் அனுரூபோ’’தி சீவரம் விய தேஸம் த³த்வா, தேஸம் வா ஸந்தகம் க³ஹேத்வா, அத்தனா பிண்டா³ய சரித்வா, மிஸ்ஸகாஹாரம் வா பரிபு⁴ஞ்ஜந்தோபி ஸந்துட்டோ²வ ஹோதி. அயமஸ்ஸ பிண்ட³பாதே யதா²ஸாருப்பஸந்தோஸோ.

இத⁴ பன பி⁴க்கு²னோ ஸேனாஸனம் பாபுணாதி மனாபம் வா அமனாபம் வா அந்தமஸோ திணகுடிகாபி திணஸந்தா²ரகம்பி, ஸோ தேனேவ ஸந்துஸ்ஸதி, புன அஞ்ஞம் ஸுந்த³ரதரம் வா பாபுணாதி, தம் ந க³ண்ஹாதி, அயமஸ்ஸ ஸேனாஸனே யதா²லாப⁴ஸந்தோஸோ. அத² பன ஆபா³தி⁴கோ ஹோதி து³ப்³ப³லோ வா, ஸோ ப்³யாதி⁴விருத்³த⁴ம் வா பகதிவிருத்³த⁴ம் வா ஸேனாஸனம் லப⁴தி, யத்த²ஸ்ஸ வஸதோ அபா²ஸு ஹோதி, ஸோ தம் ஸபா⁴க³ஸ்ஸ பி⁴க்கு²னோ த³த்வா தஸ்ஸ ஸந்தகே ஸப்பாயஸேனாஸனே வஸித்வா ஸமணத⁴ம்மம் கரோந்தோபி ஸந்துட்டோ²வ ஹோதி, அயமஸ்ஸ ஸேனாஸனே யதா²ப³லஸந்தோஸோ. அபரோ ஸுந்த³ரம் ஸேனாஸனம் பத்தம்பி ந ஸம்படிச்ச²தி ‘‘பணீதஸேனாஸனம் பமாத³ட்டா²ன’’ந்தி, மஹாபுஞ்ஞதாய வா லேணமண்ட³பகூடாகா³ராதீ³னி பணீதஸேனாஸனானி லப⁴தி, ஸோ தானி சீவராதீ³னி விய சிரபப்³ப³ஜிதாதீ³னம் த³த்வா யத்த² கத்த²சி வஸந்தோபி ஸந்துட்டோ²வ ஹோதி, அயமஸ்ஸ ஸேனாஸனே யதா²ஸாருப்பஸந்தோஸோ.

இத⁴ பன பி⁴க்கு² பே⁴ஸஜ்ஜம் லப⁴தி லூக²ம் வா பணீதம் வா, ஸோ தேனேவ துஸ்ஸதி, அஞ்ஞம் ந பத்தே²தி, லப⁴ந்தோபி ந க³ண்ஹாதி, அயமஸ்ஸ கி³லானபச்சயே யதா²லாப⁴ஸந்தோஸோ. அத² பன தேலேன அத்தி²கோ பா²ணிதம் லப⁴தி, ஸோ தம் ஸபா⁴க³ஸ்ஸ பி⁴க்கு²னோ த³த்வா, தஸ்ஸ ஹத்த²தோ தேலம் க³ஹேத்வா, பே⁴ஸஜ்ஜம் கத்வா ஸமணத⁴ம்மம் கரோந்தோபி ஸந்துட்டோ²வ ஹோதி, அயமஸ்ஸ கி³லானபச்சயே யதா²ப³லஸந்தோஸோ. அபரோ மஹாபுஞ்ஞோ ப³ஹும் தேலமது⁴பா²ணிதாதி³பணீதபே⁴ஸஜ்ஜம் லப⁴தி, ஸோ தம் சீவராதீ³னி விய சிரபப்³ப³ஜிதாதீ³னம் த³த்வா தேஸம் ஆப⁴தேன யேன கேனசி பே⁴ஸஜ்ஜம் கரோந்தோபி ஸந்துட்டோ²வ ஹோதி. யோ பன ஏகஸ்மிம் பா⁴ஜனே முத்தஹரீதகம், ஏகஸ்மிம் சதுமது⁴ரம் ட²பேத்வா ‘‘க³ண்ஹத², ப⁴ந்தே, யதி³ச்ச²ஸீ’’தி வுச்சமானோ ஸசஸ்ஸ தேஸு அஞ்ஞதரேனபி ரோகோ³ வூபஸம்மதி, ‘‘முத்தஹரீதகம் நாம பு³த்³தா⁴தீ³ஹி வண்ணிதம், பூதிமுத்தபே⁴ஸஜ்ஜம் நிஸ்ஸாய பப்³ப³ஜ்ஜா, தத்த² தே யாவஜீவம் உஸ்ஸாஹோ கரணீயோ’’தி (மஹாவ. 128) வசனமனுஸ்ஸரந்தோ சதுமது⁴ரம் படிக்கி²பித்வா முத்தஹரீதகேன பே⁴ஸஜ்ஜம் கரோந்தோ பரமஸந்துட்டோ²வ ஹோதி, அயமஸ்ஸ கி³லானபச்சயே யதா²ஸாருப்பஸந்தோஸோ.

ஸோ ஏவம்பபே⁴தோ³ ஸப்³போ³பி ஸந்தோஸோ ஸந்துட்டீ²தி பவுச்சதி. தேன வுத்தம் ‘‘அத்த²தோ இதரீதரபச்சயஸந்தோஸோ’’தி. இதரீதரஸந்துட்டி²யா ஸத்³தி⁴ம் ஸந்த³ஸ்ஸனாதி³விதி⁴னா ஆனிஸம்ஸவிபா⁴வனவஸேன, தப்படிபக்க²ஸ்ஸ அத்ரிச்ச²தாதி³பே⁴த³ஸ்ஸ இச்சா²பகதத்தஸ்ஸ ஆதீ³னவவிபா⁴வனவஸேன ச பவத்தா கதா² ஸந்துட்டி²கதா². இதோ பராஸுபி கதா²ஸு ஏஸேவ நயோ, விஸேஸமத்தமேவ வக்கா²ம.

பவிவேககதா²தி ஏத்த² காயவிவேகோ சித்தவிவேகோ உபதி⁴விவேகோதி தயோ விவேகா. தேஸு ஏகோ க³ச்ச²தி, ஏகோ திட்ட²தி, ஏகோ நிஸீத³தி, ஏகோ ஸேய்யம் கப்பேதி, ஏகோ கா³மம் பிண்டா³ய பவிஸதி, ஏகோ படிக்கமதி, ஏகோ அபி⁴க்கமதி, ஏகோ சங்கமம் அதி⁴ட்டா²தி, ஏகோ சரதி, ஏகோ விஹரதீதி ஏவம் ஸப்³பி³ரியாபதே²ஸு ஸப்³ப³கிச்சேஸு க³ணஸங்க³ணிகம் பஹாய விவித்தவாஸோ காயவிவேகோ நாம. அட்ட² ஸமாபத்தியோ பன சித்தவிவேகோ நாம. நிப்³பா³னம் உபதி⁴விவேகோ நாம. வுத்தஞ்ஹேதம் –

‘‘காயவிவேகோ ச விவேகட்ட²காயானம் நேக்க²ம்மாபி⁴ரதானம், சித்தவிவேகோ ச பரிஸுத்³த⁴சித்தானம் பரமவோதா³னப்பத்தானம், உபதி⁴விவேகோ ச நிருபதீ⁴னம் புக்³க³லானம் விஸங்கா²ரக³தான’’ந்தி (மஹானி. 57).

விவேகோயேவ பவிவேகோ, பவிவேகப்படிஸம்யுத்தா கதா² பவிவேககதா².

அஸம்ஸக்³க³கதா²தி ஏத்த² ஸவனஸம்ஸக்³கோ³ த³ஸ்ஸனஸம்ஸக்³கோ³ ஸமுல்லபனஸம்ஸக்³கோ³ ஸம்போ⁴க³ஸம்ஸக்³கோ³ காயஸம்ஸக்³கோ³தி பஞ்ச ஸம்ஸக்³கா³. தேஸு இதே⁴கச்சோ பி⁴க்கு² ஸுணாதி ‘‘அஸுகஸ்மிம் கா³மே வா நிக³மே வா இத்தீ² அபி⁴ரூபா த³ஸ்ஸனீயா பாஸாதி³கா பரமாய வண்ணபோக்க²ரதாய ஸமன்னாக³தா’’தி, ஸோ தம் ஸுத்வா ஸம்ஸீத³தி விஸீத³தி, ந ஸக்கோதி ப்³ரஹ்மசரியம் ஸந்தா⁴ரேதும், ஸிக்க²ம் பச்சக்கா²ய ஹீனாயாவத்ததி, ஏவம் விஸபா⁴கா³ரம்மணஸவனேன உப்பன்னகிலேஸஸந்த²வோ ஸவனஸம்ஸக்³கோ³ நாம. ந ஹேவ கோ² பி⁴க்கு² ஸுணாதி, அபிச கோ² ஸாமம் பஸ்ஸதி இத்தி²ம் அபி⁴ரூபம் த³ஸ்ஸனீயம் பாஸாதி³கம் பரமாய வண்ணபோக்க²ரதாய ஸமன்னாக³தம், ஸோ தம் தி³ஸ்வா ஸம்ஸீத³தி விஸீத³தி, ந ஸக்கோதி ப்³ரஹ்மசரியம் ஸந்தா⁴ரேதும், ஸிக்க²ம் பச்சக்கா²ய ஹீனாயாவத்ததி, ஏவம் விஸபா⁴கா³ரம்மணத³ஸ்ஸனேன உப்பன்னகிலேஸஸந்த²வோ த³ஸ்ஸனஸம்ஸக்³கோ³ நாம. தி³ஸ்வா பன அஞ்ஞமஞ்ஞம் ஆலாபஸல்லாபவஸேன உப்பன்னோ கிலேஸஸந்த²வோ ஸமுல்லபனஸம்ஸக்³கோ³ நாம. ஸஹஜக்³க⁴னாதீ³னிபி ஏதேனேவ ஸங்க³ண்ஹாதி. அத்தனோ பன ஸந்தகம் யம்கிஞ்சி மாதுகா³மஸ்ஸ த³த்வா வா அத³த்வா வா தேன தி³ன்னஸ்ஸ வனப⁴ங்கி³யாதி³னோ பரிபோ⁴க³வஸேன உப்பன்னகிலேஸஸந்த²வோ ஸம்போ⁴க³ஸம்ஸக்³கோ³ நாம. மாதுகா³மஸ்ஸ ஹத்த²க்³கா³ஹாதி³வஸேன உப்பன்னகிலேஸஸந்த²வோ காயஸம்ஸக்³கோ³ நாம. யோபி சேஸ –

‘‘கி³ஹீஹி ஸம்ஸட்டோ² விஹரதி அனனுலோமிகேன ஸம்ஸக்³கே³ன ஸஹஸோகீ ஸஹனந்தீ³ ஸுகி²தேஸு ஸுகி²தோ, து³க்கி²தேஸு து³க்கி²தோ, உப்பன்னேஸு கிச்சகரணீயேஸு அத்தனா உய்யோக³ம் ஆபஜ்ஜதீ’’தி (ஸம். நி. 3.3; மஹானி. 164) –

ஏவம் வுத்தோ அனனுலோமிகோ கி³ஹிஸம்ஸக்³கோ³, யோ ச ஸப்³ரஹ்மசாரீஹிபி கிலேஸுப்பத்திஹேதுபூ⁴தோ ஸம்ஸக்³கோ³, தம் ஸப்³ப³ம் பஹாய ய்வாயம் ஸம்ஸாரே தி²ரதரம் ஸம்வேக³ம், ஸங்கா²ரேஸு திப்³ப³ம் ப⁴யஸஞ்ஞம், ஸரீரே படிகூலஸஞ்ஞம், ஸப்³பா³குஸலேஸு ஜிகு³ச்சா²புப்³ப³ங்க³மம் ஹிரோத்தப்பம், ஸப்³ப³கிரியாஸு ஸதிஸம்பஜஞ்ஞந்தி ஸப்³ப³ம் பச்சுபட்ட²பேத்வா கமலத³லே ஜலபி³ந்து³ விய ஸப்³ப³த்த² அலக்³க³பா⁴வோ, அயம் ஸப்³ப³ஸம்ஸக்³க³ப்படிபக்க²தாய அஸம்ஸக்³கோ³. தப்படிஸம்யுத்தா கதா² அஸம்ஸக்³க³கதா².

வீரியாரம்ப⁴கதா²தி ஏத்த² வீரஸ்ஸ பா⁴வோ, கம்மந்தி வா வீரியம், விதி⁴னா ஈரயிதப்³ப³ம் பவத்தேதப்³ப³ந்தி வா வீரியம், வீரியஞ்ச தம் அகுஸலானம் த⁴ம்மானம் பஹானாய குஸலானம் த⁴ம்மானம் உபஸம்பதா³ய ஆரம்ப⁴னம் வீரியாரம்போ⁴. ஸ்வாயம் காயிகோ சேதஸிகோ சாதி து³விதோ⁴, ஆரம்ப⁴தா⁴து, நிக்கமதா⁴து, பரக்கமதா⁴து சாதி திவிதோ⁴; ஸம்மப்பதா⁴னவஸேன சதுப்³பி³தோ⁴. ஸோ ஸப்³போ³பி யோ பி⁴க்கு² க³மனே உப்பன்னம் கிலேஸம் டா²னம் பாபுணிதும் ந தே³தி; டா²னே உப்பன்னம் நிஸஜ்ஜம், நிஸஜ்ஜாய உப்பன்னம் ஸயனம் பாபுணிதும் ந தே³தி, தத்த² தத்தே²வ அஜபதே³ன த³ண்டே³ன கண்ஹஸப்பம் உப்பீளேத்வா க³ண்ஹந்தோ விய, திகி²ணேன அஸினா அமித்தம் கீ³வாய பஹரந்தோ விய ச ஸீஸம் உக்கி²பிதும் அத³த்வா வீரியப³லேன நிக்³க³ண்ஹாதி, தஸ்ஸேவம் ஆரத்³த⁴வீரியஸ்ஸ வஸேன வேதி³தப்³போ³. தப்படிஸம்யுத்தா கதா² வீரியாரம்ப⁴கதா².

ஸீலகதா²தீ³ஸு து³வித⁴ம் ஸீலம் லோகியம் லோகுத்தரஞ்ச. தத்த² லோகியம் பாதிமோக்க²ஸம்வராதி³ சதுபாரிஸுத்³தி⁴ஸீலம், லோகுத்தரம் மக்³க³ஸீலம் ப²லஸீலஞ்ச. ததா² விபஸ்ஸனாய பாத³கபூ⁴தா ஸஹ உபசாரேன அட்ட² ஸமாபத்தியோ லோகியோ ஸமாதி⁴, மக்³க³ஸம்பயுத்தோ பனேத்த² லோகுத்தரோ ஸமாதி⁴ நாம. ததா² பஞ்ஞாபி லோகியா ஸுதமயா சிந்தாமயா ஜா²னஸம்பயுத்தா விபஸ்ஸனாஞாணஞ்ச. விஸேஸதோ பனேத்த² விபஸ்ஸனாபஞ்ஞா க³ஹேதப்³பா³, லோகுத்தரா மக்³க³பஞ்ஞா ப²லபஞ்ஞா ச. விமுத்தீபி அரியப²லவிமுத்தி நிப்³பா³னஞ்ச. அபரே பன தத³ங்க³விக்க²ம்ப⁴னஸமுச்சே²த³விமுத்தீனம்பி வஸேனேத்த² அத்த²ம் வண்ணேந்தி. விமுத்திஞாணத³ஸ்ஸனம்பி ஏகூனவீஸதிவித⁴ம் பச்சவேக்க²ணஞாணம். இதி இமேஸம் ஸீலாதீ³னம் ஸத்³தி⁴ம் ஸந்த³ஸ்ஸனாதி³விதி⁴னா அனேகாகாரவோகாரஆனிஸம்ஸவிபா⁴வனவஸேன சேவ தப்படிபக்கா²னம் து³ஸ்ஸீல்யாதீ³னம் ஆதீ³னவவிபா⁴வனவஸேன ச பவத்தா கதா², தப்படிஸம்யுத்தா கதா² வா ஸீலாதி³கதா² நாம.

ஏத்த² ச ‘‘அத்தனா ச அப்பிச்சோ² ஹோதி, அப்பிச்ச²கத²ஞ்ச பரேஸம் கத்தா’’தி (ம. நி. 1.252; அ. நி. 10.70) ‘‘ஸந்துட்டோ² ஹோதி இதரீதரேன சீவரேன, இதரீதரசீவரஸந்துட்டி²யா ச வண்ணவாதீ³’’தி (ஸம். நி. 2.144; சூளனி. க²க்³க³விஸாணஸுத்தனித்³தே³ஸ 128) ச ஆதி³வசனதோ ஸயஞ்ச அப்பிச்ச²தாதி³கு³ணஸமன்னாக³தேன பரேஸம்பி தத³த்தா²ய ஹிதஜ்ஜா²ஸயேன பவத்தேதப்³பா³ ததா²ரூபீ கதா², யா இத⁴ அபி⁴ஸல்லேகி²காதி³பா⁴வேன விஸேஸேத்வா வுத்தா அப்பிச்ச²கதா²தீ³தி வேதி³தப்³பா³. காரகஸ்ஸேவ ஹி கதா² விஸேஸதோ அதி⁴ப்பேதத்த²ஸாதி⁴னீ. ததா² ஹி வக்க²தி ‘‘கல்யாணமித்தஸ்ஸேதம், மேகி⁴ய, பி⁴க்கு²னோ பாடிகங்க²ம்…பே. … அகஸிரலாபீ⁴’’தி.

ஏவரூபாயாதி ஈதி³ஸாய, யதா²வுத்தாய. நிகாமலாபீ⁴தி யதி²ச்சி²தலாபீ⁴ யதா²ருசிலாபீ⁴, ஸப்³ப³காலம் இமா கதா² ஸோதும் விசாரேதுஞ்ச யதா²ஸுக²ம் லப⁴ந்தோ. அகிச்ச²லாபீ⁴தி நித்³து³க்க²லாபீ⁴. அகஸிரலாபீ⁴தி விபுலலாபீ⁴.

ஆரத்³த⁴வீரியோதி பக்³க³ஹிதவீரியோ. அகுஸலானம் த⁴ம்மானம் பஹானாயாதி அகோஸல்லஸம்பூ⁴தட்டே²ன அகுஸலானம் பாபத⁴ம்மானம் பஜஹனத்தா²ய. குஸலானம் த⁴ம்மானந்தி குச்சி²தானம் ஸலனாதி³அத்தே²ன அனவஜ்ஜட்டே²ன ச குஸலானம் ஸஹவிபஸ்ஸனானம் மக்³க³ப²லத⁴ம்மானம். உபஸம்பதா³யாதி ஸம்பாத³னாய, அத்தனோ ஸந்தானே உப்பாத³னாய. தா²மவாதி உஸ்ஸோள்ஹிஸங்கா²தேன வீரியதா²மேன ஸமன்னாக³தோ. த³ள்ஹபரக்கமோதி தி²ரபரக்கமோ அஸிதி²லவீரியோ. அனிக்கி²த்தது⁴ரோதி அனோரோஹிதது⁴ரோ அனோஸக்கிதவீரியோ.

பஞ்ஞவாதி விபஸ்ஸனாபஞ்ஞாய பஞ்ஞவா. உத³யத்த²கா³மினியாதி பஞ்சன்னம் க²ந்தா⁴னம் உத³யஞ்ச வயஞ்ச படிவிஜ்ஜ²ந்தியா. அரியாயாதி விக்க²ம்ப⁴னவஸேன கிலேஸேஹி ஆரகா தூ³ரே டி²தாய நித்³தோ³ஸாய. நிப்³பே³தி⁴காயாதி நிப்³பே³த⁴பா⁴கி³யாய. ஸம்மா து³க்க²க்க²யகா³மினியாதி வட்டது³க்க²ஸ்ஸ கே²பனதோ ‘‘து³க்க²க்க²யோ’’தி லத்³த⁴னாமம் அரியமக்³க³ம் ஸம்மா ஹேதுனா ஞாயேன க³ச்ச²ந்தியா.

இமேஸு ச பன பஞ்சஸு த⁴ம்மேஸு ஸீலம் வீரியம் பஞ்ஞா ச யோகி³னோ அஜ்ஜ²த்திகம் அங்க³ம், இதரத்³வயம் பா³ஹிரம் அங்க³ம். ததா²பி கல்யாணமித்தஸன்னிஸ்ஸயேனேவ ஸேஸம் சதுப்³பி³த⁴ம் இஜ்ஜ²தி, கல்யாணமித்தஸ்ஸேவேத்த² ப³ஹூபகாரதம் த³ஸ்ஸேந்தோ ஸத்தா² ‘‘கல்யாணமித்தஸ்ஸேதம், மேகி⁴ய, பி⁴க்கு²னோ பாடிகங்க²’’ந்திஆதி³னா தே³ஸனம் வட்³டே⁴தி. தத்த² பாடிகங்க²ந்தி ஏகம்ஸேன இச்சி²தப்³ப³ம், அவஸ்ஸம்பா⁴வீதி அத்தோ². யந்தி கிரியாபராமஸனம். இத³ம் வுத்தம் ஹோதி – ‘‘ஸீலவா ப⁴விஸ்ஸதீ’’தி ஏத்த² யதே³தம் கல்யாணமித்தஸ்ஸ பி⁴க்கு²னோ ஸீலவந்ததாய ப⁴வனம் ஸீலஸம்பன்னத்தம், தஸ்ஸ பி⁴க்கு²னோ ஸீலஸம்பன்னத்தா ஏதம் தஸ்ஸ பாடிகங்க²ம், அவஸ்ஸம்பா⁴வீ ஏகம்ஸேனேவ தஸ்ஸ தத்த² நியோஜனதோதி அதி⁴ப்பாயோ. பாதிமோக்க²ஸம்வரஸம்வுதோ விஹரிஸ்ஸதீதிஆதீ³ஸுபி ஏஸேவ நயோ.

ஏவம் ப⁴க³வா ஸதே³வகே லோகே உத்தமகல்யாணமித்தஸங்கா²தஸ்ஸ அத்தனோ வசனம் அனாதி³யித்வா தம் வனஸண்ட³ம் பவிஸித்வா தாதி³ஸம் விப்பகாரம் பத்தஸ்ஸ ஆயஸ்மதோ மேகி⁴யஸ்ஸ கல்யாணமித்ததாதி³னா ஸகலம் ஸாஸனஸம்பத்திம் த³ஸ்ஸேத்வா, இதா³னிஸ்ஸ தத்த² ஆத³ரஜாதஸ்ஸ புப்³பே³ யேஹி காமவிதக்காதீ³ஹி உபத்³து³தத்தா கம்மட்டா²னம் ந ஸம்பஜ்ஜி, தஸ்ஸ தேஸம் உஜுவிபச்சனீகபூ⁴தத்தா ச பா⁴வனானயம் பகாஸேத்வா, ததோ பரம் அரஹத்தஸ்ஸ கம்மட்டா²னம் ஆசிக்க²ந்தோ, ‘‘தேன ச பன, மேகி⁴ய, பி⁴க்கு²னா இமேஸு பஞ்சஸு த⁴ம்மேஸு பதிட்டா²ய சத்தாரோ த⁴ம்மா உத்தரி பா⁴வேதப்³பா³’’திஆதி³மாஹ. தத்த² தேனாதி ஏவம் கல்யாணமித்தஸன்னிஸ்ஸயேன யதா²வுத்தஸீலாதி³கு³ணஸமன்னாக³தேன. தேனேவாஹ ‘‘இமேஸு பஞ்சஸு த⁴ம்மேஸு பதிட்டா²யா’’தி. உத்தரீதி ஆரத்³த⁴தருணவிபஸ்ஸனஸ்ஸ ராகா³தி³பரிஸ்ஸயா சே உப்பஜ்ஜேய்யும், தேஸம் விஸோத⁴னத்த²ம் ததோ உத்³த⁴ம் சத்தாரோ த⁴ம்மா பா⁴வேதப்³பா³ உப்பாதே³தப்³பா³ வட்³டே⁴தப்³பா³ ச.

அஸுபா⁴தி ஏகாத³ஸஸு அஸுப⁴கம்மட்டா²னேஸு யதா²ரஹம் யத்த² கத்த²சி அஸுப⁴பா⁴வனா. ராக³ஸ்ஸ பஹானாயாதி காமராக³ஸ்ஸ பஜஹனத்தா²ய. அயமத்தோ² ஸாலிலாயகோபமாய விபா⁴வேதப்³போ³ – ஏகோ ஹி புரிஸோ அஸிதம் க³ஹேத்வா கோடிதோ பட்டா²ய ஸாலிகே²த்தே ஸாலியோ லாயதி, அத²ஸ்ஸ வதிம் பி⁴ந்தி³த்வா கா³வோ பவிஸிம்ஸு. ஸோ அஸிதம் ட²பேத்வா, யட்டி²ம் ஆதா³ய, தேனேவ மக்³கே³ன கா³வோ நீஹரித்வா, வதிம் பாகதிகம் கத்வா, புன அஸிதம் க³ஹேத்வா ஸாலியோ லாயி. தத்த² ஸாலிகே²த்தம் விய பு³த்³த⁴ஸாஸனம் த³ட்ட²ப்³ப³ம், ஸாலிலாயகோ விய யோகா³வசரோ, அஸிதம் விய பஞ்ஞா, லாயனகாலோ விய விபஸ்ஸனாய கம்மகரணகாலோ, யட்டி² விய அஸுப⁴கம்மட்டா²னம், வதி விய ஸம்வரோ, வதிம் பி⁴ந்தி³த்வா கா³வீனம் பவிஸனம் விய ஸஹஸா அப்படிஸங்கா²ய பமாத³ம் ஆக³ம்ம ராக³ஸ்ஸ உப்பஜ்ஜனம், அஸிதம் ட²பேத்வா, யட்டி²ம் ஆதா³ய, பவிட்ட²மக்³கே³னேவ கா³வோ நீஹரித்வா, வதிம் படிபாகதிகம் கத்வா, புன டி²தட்டா²னதோ பட்டா²ய ஸாலிலாயனம் விய அஸுப⁴கம்மட்டா²னேன ராக³ம் விக்க²ம்பே⁴த்வா, புன விபஸ்ஸனாய கம்மகரணகாலோதி இத³மேத்த² உபமாஸம்ஸந்த³னம். ஏவம்பூ⁴தம் பா⁴வனாவிதி⁴ம் ஸந்தா⁴ய வுத்தம் ‘‘அஸுபா⁴ பா⁴வேதப்³பா³ ராக³ஸ்ஸ பஹானாயா’’தி.

மேத்தாதி மேத்தாகம்மட்டா²னம். ப்³யாபாத³ஸ்ஸ பஹானாயாதி வுத்தனயேனேவ உப்பன்னகோபஸ்ஸ பஜஹனத்தா²ய. ஆனாபானஸ்ஸதீதி ஸோளஸவத்து²கா ஆனாபானஸ்ஸதி. விதக்குபச்சே²தா³யாதி வுத்தனயேனேவ உப்பன்னானம் விதக்கானம் உபச்சே²த³னத்தா²ய. அஸ்மிமானஸமுக்³கா⁴தாயாதி அஸ்மீதி உப்பஜ்ஜனகஸ்ஸ நவவித⁴ஸ்ஸ மானஸ்ஸ ஸமுச்சே²த³னத்தா²ய. அனிச்சஸஞ்ஞினோதி ஹுத்வா அபா⁴வதோ உத³யப்³ப³யவந்ததோ பப⁴ங்கு³தோ தாவகாலிகதோ நிச்சப்படிபக்க²தோ ச ‘‘ஸப்³பே³ ஸங்கா²ரா அனிச்சா’’தி (த⁴. ப. 277; சூளனி. ஹேமகமாணவபுச்சா²னித்³தே³ஸ 56) பவத்தஅனிச்சானுபஸ்ஸனாவஸேன அனிச்சஸஞ்ஞினோ. அனத்தஸஞ்ஞா ஸண்டா²தீதி அஸாரகதோ அவஸவத்தனதோ பரதோ ரித்ததோ துச்ச²தோ ஸுஞ்ஞதோ ச ‘‘ஸப்³பே³ த⁴ம்மா அனத்தா’’தி (த⁴. ப. 279; சூளனி. ஹேமகமாணவபுச்சா²னித்³தே³ஸ 56) ஏவம் பவத்தா அனத்தானுபஸ்ஸனாஸங்கா²தா அனத்தஸஞ்ஞா சித்தே ஸண்ட²ஹதி, அதித³ள்ஹம் பதிட்டா²தி. அனிச்சலக்க²ணே ஹி தி³ட்டே² அனத்தலக்க²ணம் தி³ட்ட²மேவ ஹோதி. தீஸு ஹி லக்க²ணேஸு ஏகஸ்மிம் தி³ட்டே² இதரத்³வயம் தி³ட்ட²மேவ ஹோதி. தேன வுத்தம் – ‘‘அனிச்சஸஞ்ஞினோ ஹி, மேகி⁴ய, அனத்தஸஞ்ஞா ஸண்டா²தீ’’தி. அனத்தலக்க²ணே தி³ட்டே² அஸ்மீதி உப்பஜ்ஜனகமானோ ஸுப்பஜஹோவ ஹோதீதி ஆஹ – ‘‘அனத்தஸஞ்ஞீ அஸ்மிமானஸமுக்³கா⁴தம் பாபுணாதீ’’தி தி³ட்டே²வ த⁴ம்மே நிப்³பா³னந்தி தி³ட்டே²யேவ த⁴ம்மே இமஸ்மிம்யேவ அத்தபா⁴வே அபச்சயபரினிப்³பா³னம் பாபுணாதி. அயமேத்த² ஸங்கே²போ, வித்தா²ரதோ பன அஸுபா⁴தி³பா⁴வனானயோ விஸுத்³தி⁴மக்³கே³ (விஸுத்³தி⁴. 1.102) வுத்தனயேன க³ஹேதப்³போ³.

ஏதமத்த²ம் விதி³த்வாதி ஏதம் ஆயஸ்மதோ மேகி⁴யஸ்ஸ மிச்சா²விதக்கசோரேஹி குஸலப⁴ண்டு³பச்சே²த³ஸங்கா²தம் அத்த²ம் ஜானித்வா. இமம் உதா³னந்தி இமம் காமவிதக்காதீ³னம் அவினோத³னே வினோத³னே ச ஆதீ³னவானிஸம்ஸதீ³பகம் உதா³னம் உதா³னேஸி.

தத்த² கு²த்³தா³தி ஹீனா லாமகா. விதக்காதி காமவிதக்காத³யோ தயோ பாபவிதக்கா. தே ஹி ஸப்³ப³விதக்கேஹி பதிகிட்ட²தாய இத⁴ கு²த்³தா³தி வுத்தா ‘‘ந ச கு²த்³த³மாசரே’’திஆதீ³ஸு (கு². பா. 9.3; ஸு. நி. 145) விய. ஸுகு²மாதி ஞாதிவிதக்காத³யோ அதி⁴ப்பேதா. ஞாதிவிதக்கோ ஜனபத³விதக்கோ அமராவிதக்கோ பரானுத்³த³யதாய படிஸம்யுத்தோ விதக்கோ லாப⁴ஸக்காரஸிலோகபடிஸம்யுத்தோ விதக்கோ அனவஞ்ஞத்திபடிஸம்யுத்தோ விதக்கோதி ஏதே ஹி விதக்கா காமவிதக்காத³யோ விய தா³ருணா ந ஹோந்தீதி அனோளாரிகஸபா⁴வதாய ஸுகு²மாதி வுத்தா. அனுக³தாதி சித்தேன அனுவத்திதா. விதக்கே ஹி உப்பஜ்ஜமானே சித்தம் தத³னுக³தமேவ ஹோதி தஸ்ஸ ஆரம்மணாபி⁴னிரோபனதோ. ‘‘அனுக்³க³தா’’திபி பாளி, அனுஉட்டி²தாதி அத்தோ². மனஸோ உப்பிலாவாதி சேதஸோ உப்பிலாவிதத்தகரா.

ஏதே அவித்³வா மனஸோ விதக்கேதி ஏதே காமவிதக்காதி³கே மனோவிதக்கே அஸ்ஸாதா³தீ³னவனிஸ்ஸரணதோ ஞாததீரணபஹானபரிஞ்ஞாஹி யதா²பூ⁴தம் அஜானந்தோ. ஹுரா ஹுரம் தா⁴வதி ப⁴ந்தசித்தோதி அப்பஹீனமிச்சா²விதக்கத்தா அனவட்டி²தசித்தோ ‘‘கதா³சி ரூபே, கதா³சி ஸத்³தே³’’திஆதி³னா தஸ்மிம் தஸ்மிம் ஆரம்மணே அஸ்ஸாதா³தி³வஸேன அபராபரம் தா⁴வதி பரிப்³ப⁴மதி. அத² வா ஹுரா ஹுரம் தா⁴வதி ப⁴ந்தசித்தோதி அபரிஞ்ஞாதவிதக்கத்தா தன்னிமித்தானம் அவிஜ்ஜாதண்ஹானம் வஸேன பரிப்³ப⁴மனமானஸோ இத⁴லோகதோ பரலோகம் ஆதா³னனிக்கே²பேஹி அபராபரம் தா⁴வதி ஸம்ஸரதீதி அத்தோ².

ஏதே ச வித்³வா மனஸோ விதக்கேதி ஏதே யதா²வுத்தப்பபே⁴தே³ காமவிதக்காதி³கே மனோவிதக்கே அஸ்ஸாதா³தி³தோ யதா²பூ⁴தம் ஜானந்தோ. ஆதாபியோதி வீரியவா. ஸம்வரதீதி பித³ஹதி. ஸதிமாதி ஸதிஸம்பன்னோ. அனுக்³க³தேதி து³ல்லப⁴வஸேன அனுப்பன்னே. இத³ம் வுத்தம் ஹோதி – ஏதே வுத்தப்பகாரே காமவிதக்காதி³கே மனோவிதக்கே சித்தஸ்ஸ உப்பிலாவிதஹேதுதாய மனஸோ உப்பிலாவே வித்³வா விபஸ்ஸனாபஞ்ஞாஸஹிதாய மக்³க³பஞ்ஞாய ஸம்மதே³வ ஜானந்தோ, தஸ்ஸ ஸஹாயபூ⁴தானம் ஸம்மாவாயாமஸதீனம் அத்தி²தாய ஆதாபியோ ஸதிமா தே அரியமக்³க³பா⁴வனாய ஆயதிம் உப்பத்திரஹே அனுக்³க³தே அனுப்பன்னே ஏவ மக்³க³க்க²ணே ஸம்வரதி, ஞாணஸம்வரவஸேன பித³ஹதி, ஆக³மனபத²ம் பச்சி²ந்த³தி, ஏவம்பூ⁴தோ ச சதுஸச்சப்பபோ³தே⁴ன பு³த்³தோ⁴ அரியஸாவகோ அரஹத்தாதி⁴க³மேன அஸேஸம், அனவஸேஸம் ஏதே காமவிதக்காதி³கே பஜஹாஸி ஸமுச்சி²ந்தீ³தி. ஏத்தா²பி ‘‘அனுக³தே’’திபி பட²ந்தி. தஸ்ஸத்தோ² ஹேட்டா² வுத்தோயேவ.

பட²மஸுத்தவண்ணனா நிட்டி²தா.

2. உத்³த⁴தஸுத்தவண்ணனா

32. து³தியே குஸினாராயந்தி குஸினாராயம் நாம மல்லராஜூனம் நக³ரே. உபவத்தனே மல்லானம் ஸாலவனேதி யதா² ஹி அனுராத⁴புரஸ்ஸ தூ²பாராமோ, ஏவம் குஸினாராய உய்யானம் த³க்கி²ணபச்சி²மதி³ஸாய ஹோதி. யதா² தூ²பாராமதோ த³க்கி²ணத்³வாரேன நக³ரபவிஸனமக்³கோ³ பாசீனமுகோ² க³ந்த்வா உத்தரேன நிவத்ததி, ஏவம் உய்யானதோ ஸாலபந்தி பாசீனமுகா² க³ந்த்வா உத்தரேன நிவத்தா, தஸ்மா ‘‘உபவத்தன’’ந்தி வுச்சதி. தஸ்மிம் உபவத்தனே மல்லராஜூனம் ஸாலவனே. அரஞ்ஞகுடிகாயந்தி ஸாலபந்தியா அவிதூ³ரே ருக்க²க³ச்ச²ஸஞ்ச²ன்னட்டா²னே கதா குடிகா, தம் ஸந்தா⁴ய வுத்தம் ‘‘அரஞ்ஞகுடிகாயம் விஹரதீ’’தி. தே பன பி⁴க்கூ² படிஸங்கா²னவிரஹிதா ஓஸ்ஸட்ட²வீரியா பமத்தவிஹாரினோ, தேன வுத்தம் ‘‘உத்³த⁴தா’’திஆதி³.

தத்த² உத்³த⁴ச்சப³ஹுலத்தா அவூபஸந்தசித்ததாய உத்³த⁴தா. துச்ச²பா⁴வேன மானோ நளோ வியாதி நளோ, மானஸங்கா²தோ உக்³க³தோ நளோ ஏதேஸந்தி உன்னளா, உக்³க³ததுச்ச²மானாதி அத்தோ². பத்தசீவரமண்ட³னாதி³சாபல்லேன ஸமன்னாக³தத்தா ப³ஹுகதாய வா சபலா. ப²ருஸவாசதாய முகே²ன க²ராதி முக²ரா. திரச்சா²னகதா²ப³ஹுலதாய விகிண்ணா ப்³யாகுலா வாசா ஏதேஸந்தி விகிண்ணவாசா. முட்டா² நட்டா² ஸதி ஏதேஸந்தி முட்ட²ஸ்ஸதினோ, ஸதிவிரஹிதா பமாத³விஹாரினோதி அத்தோ². ஸப்³பே³ன ஸப்³ப³ம் ஸம்பஜஞ்ஞாபா⁴வதோ அஸம்பஜானா. க³த்³தூ³ஹனமத்தம்பி காலம் சித்தஸமாதா⁴னஸ்ஸ அபா⁴வதோ ந ஸமாஹிதாதி அஸமாஹிதா. லோலஸபா⁴வத்தா ப⁴ந்தமிக³ஸப்படிபா⁴க³தாய விப்³ப⁴ந்தசித்தா. மனச்ச²ட்டா²னம் இந்த்³ரியானம் அஸம்வரணதோ அஸஞ்ஞதிந்த்³ரியதாய பாகதிந்த்³ரியா.

ஏதமத்த²ம் விதி³த்வாதி ஏதம் தேஸம் பி⁴க்கூ²னம் உத்³த⁴ச்சாதி³வஸேன பமாத³விஹாரம் ஜானித்வா. இமம் உதா³னந்தி இமம் பமாத³விஹாரே அப்பமாத³விஹாரே ச யதா²க்கமம் ஆதீ³னவானிஸம்ஸவிபா⁴வனம் உதா³னம் உதா³னேஸி.

தத்த² அரக்கி²தேனாதி ஸதிஆரக்கா²பா⁴வேன அகு³த்தேன. காயேனாதி ச²விஞ்ஞாணகாயேன சக்கு²விஞ்ஞாணேன ஹி ரூபம் தி³ஸ்வா தத்த² நிமித்தானுப்³யஞ்ஜனக்³க³ஹணவஸேன அபி⁴ஜ்ஜா²தி³பவத்திதோ விஞ்ஞாணத்³வாரஸ்ஸ ஸதியா அரக்கி²தபா⁴வதோ. ஸோதவிஞ்ஞாணாதீ³ஸுபி ஏஸேவ நயோ. ஏவம் ச²விஞ்ஞாணகாயஸ்ஸ அரக்கி²தபா⁴வம் ஸந்தா⁴யாஹ ‘‘அரக்கி²தேன காயேனா’’தி. கேசி பன ‘‘காயேனா’’தி அத்த²ம் வத³ந்தி, தேஸம்பி வுத்தனயேனேவ அத்த²யோஜனாய ஸதி யுஜ்ஜேய்ய. அபரே பன ‘‘அரக்கி²தேன சித்தேனா’’தி பட²ந்தி, தேஸம்பி வுத்தனயோ ஏவ அத்தோ². மிச்சா²தி³ட்டி²ஹதேனாதி ஸஸ்ஸதாதி³மிச்சா²பி⁴னிவேஸதூ³ஸிதேன. தி²னமித்³தா⁴பி⁴பூ⁴தேனாதி சித்தஸ்ஸ அகல்யதாலக்க²ணேன தி²னேன காயஸ்ஸ அகல்யதாலக்க²ணேன மித்³தே⁴ன ச அஜ்ஜோ²த்த²டேன, தேன காயேன சித்தேனாதி வா ஸம்ப³ந்தோ⁴. வஸம் மாரஸ்ஸ க³ச்ச²தீதி கிலேஸமாராதி³கஸ்ஸ ஸப்³ப³ஸ்ஸபி மாரஸ்ஸ வஸம் யதா²காமகரணீயதம் உபக³ச்ச²தி, தேஸம் விஸயம் நாதிக்கமதீதி அத்தோ².

இமாய ஹி கா³தா²ய ப⁴க³வா யே ஸதிஆரக்கா²பா⁴வேன ஸப்³ப³ஸோ அரக்கி²தசித்தா, யோனிஸோமனஸிகாரஸ்ஸ ஹேதுபூ⁴தாய பஞ்ஞாய அபா⁴வதோ அயோனிஸோ உம்முஜ்ஜனேன நிச்சந்திஆதி³னா விபரியேஸகா³ஹினோ, ததோ ஏவ குஸலகிரியாய வீரியாரம்பா⁴பா⁴வதோ கோஸஜ்ஜாபி⁴பூ⁴தா ஸம்ஸாரவட்டதோ ஸீஸம் ந உக்கி²பிஸ்ஸந்தீதி தேஸம் பி⁴க்கூ²னம் பமாத³விஹாரக³ரஹாமுகே²ன வட்டம் த³ஸ்ஸேத்வா இதா³னி விவட்டம் த³ஸ்ஸேதும், ‘‘தஸ்மா ரக்கி²தசித்தஸ்ஸா’’தி து³தியகா³த²மாஹ.

தத்த² தஸ்மா ரக்கி²தசித்தஸ்ஸாதி யஸ்மா அரக்கி²தசித்தோ மாரஸ்ஸ யதா²காமகரணீயோ ஹுத்வா ஸம்ஸாரேயேவ ஹோதி, தஸ்மா ஸதிஸம்வரேன மனச்ச²ட்டா²னம் இந்த்³ரியானம் ரக்க²ணேன பித³ஹனேன ரக்கி²தசித்தோ அஸ்ஸ. சித்தே ஹி ரக்கி²தே சக்கா²தி³இந்த்³ரியானி ரக்கி²தானேவ ஹோந்தீதி. ஸம்மாஸங்கப்பகோ³சரோதி யஸ்மா மிச்சா²ஸங்கப்பகோ³சரோ ததா² ததா² அயோனிஸோ விதக்கேத்வா நானாவிதா⁴னி மிச்சா²த³ஸ்ஸனானி க³ண்ஹந்தோ மிச்சா²தி³ட்டி²ஹதேன சித்தேன மாரஸ்ஸ யதா²காமகரணீயோ ஹோதி, தஸ்மா யோனிஸோமனஸிகாரேன கம்மம் கரோந்தோ நேக்க²ம்மஸங்கப்பாதி³ஸம்மாஸங்கப்பகோ³சரோ அஸ்ஸ, ஜா²னாதி³ஸம்பயுத்தம் ஸம்மாஸங்கப்பமேவ அத்தனோ சித்தஸ்ஸ பவத்திட்டா²னம் கரேய்ய. ஸம்மாதி³ட்டி²புரேக்கா²ரோதி ஸம்மாஸங்கப்பகோ³சரதாய விதூ⁴தமிச்சா²த³ஸ்ஸனோ புரேதரம்யேவ கம்மஸ்ஸகதாலக்க²ணம், ததோ யதா²பூ⁴தஞாணலக்க²ணஞ்ச ஸம்மாதி³ட்டி²ம் புரதோ கத்வா புப்³பே³ வுத்தனயேனேவ ஸீலஸமாதீ⁴ஸு யுத்தோ பயுத்தோ விபஸ்ஸனம் ஆரபி⁴த்வா ஸங்கா²ரே ஸம்மஸந்தோ ஞத்வான உத³யப்³ப³யம் பஞ்சஸு உபாதா³னக்க²ந்தே⁴ஸு ஸமபஞ்ஞாஸாய ஆகாரேஹி உப்பாத³னிரோத⁴ம் வவத்த²பேத்வா உத³யப்³ப³யஞாணமதி⁴க³ந்த்வா ததோ பரம் ப⁴ங்கா³னுபஸ்ஸனாதி³வஸேன விபஸ்ஸனம் உஸ்ஸுக்காபேத்வா அனுக்கமேன அரியமக்³க³ம் க³ண்ஹந்தோ அக்³க³மக்³கே³ன, தி²னமித்³தா⁴பி⁴பூ⁴ பி⁴க்கு² ஸப்³பா³ து³க்³க³தியோ ஜஹேதி, ஏவம் ஸோ ஹேட்டி²மமக்³க³வஜ்ஜா²னம் கிலேஸானம் பட²மமேவ பஹீனத்தா தி³ட்டி²விப்பயுத்தலோப⁴ஸஹக³தசித்துப்பாதே³ஸு உப்பஜ்ஜனகதி²னமித்³தா⁴னம் அதி⁴க³தேன அரஹத்தமக்³கே³ன ஸமுச்சி²ந்த³னதோ ததே³கட்டா²னம் மானாதீ³னம்பி பஹீனத்தா ஸப்³ப³ஸோ பி⁴ன்னகிலேஸோ கீ²ணாஸவோ பி⁴க்கு² திவித⁴து³க்க²தாயோகே³ன து³க்³க³திஸங்கா²தா ஸப்³பா³பி க³தியோ உச்சி²ன்னப⁴வமூலத்தா ஜஹே, பஜஹேய்ய. தாஸம் பரபா⁴கே³ நிப்³பா³னே பதிட்டே²ய்யாதி அத்தோ².

து³தியஸுத்தவண்ணனா நிட்டி²தா.

3. கோ³பாலகஸுத்தவண்ணனா

33. ததியே கோஸலேஸூதி கோஸலா நாம ஜானபதி³னோ ராஜகுமாரா, தேஸம் நிவாஸோ ஏகோபி ஜனபதோ³ ‘‘கோஸலா’’த்வேவ வுச்சதி, தேஸு கோஸலேஸு ஜனபதே³. சாரிகம் சரதீதி அதுரிதசாரிகாவஸேன ஜனபத³சாரிகம் சரதி. மஹதாதி கு³ணமஹத்தேனபி மஹதா, அபரிச்சி²ன்னஸங்க்²யத்தா ஸங்க்²யாமஹத்தேனபி மஹதா. பி⁴க்கு²ஸங்கே⁴னாதி தி³ட்டி²ஸீலஸாமஞ்ஞஸம்ஹதேன ஸமணக³ணேன. ஸத்³தி⁴ந்தி ஏகதோ. மக்³கா³ ஓக்கம்மாதி மக்³க³தோ அபக்கமித்வா. அஞ்ஞதரம் ருக்க²மூலந்தி க⁴னபத்தஸாகா²விடபஸம்பன்னஸ்ஸ ஸந்த³ச்சா²யஸ்ஸ மஹதோ ருக்க²ஸ்ஸ ஸமீபஸங்கா²தம் மூலம்.

அஞ்ஞதரோ கோ³பாலகோதி ஏகோ கோ³க³ணரக்க²கோ, நாமேன பன நந்தோ³ நாம. ஸோ கிர அட்³டோ⁴ மஹத்³த⁴னோ மஹாபோ⁴கோ³, யதா² கேணியோ ஜடிலோ பப்³ப³ஜ்ஜாவஸேன, ஏவம் அனாத²பிண்டி³கஸ்ஸ கோ³யூத²ம் ரக்க²ந்தோ கோ³பாலகத்தேன ராஜபீளம் அபஹரந்தோ அத்தனோ குடும்ப³ம் ரக்க²தி. ஸோ காலேன காலம் பஞ்ச கோ³ரஸே க³ஹேத்வா, மஹாஸேட்டி²ஸ்ஸ ஸந்திகம் ஆக³ந்த்வா நிய்யாதேத்வா ஸத்து² ஸந்திகம் க³ந்த்வா, ஸத்தா²ரம் பஸ்ஸதி, த⁴ம்மம் ஸுணாதி, அத்தனோ வஸனட்டா²னம் ஆக³மனத்தா²ய ஸத்தா²ரம் யாசதி. ஸத்தா² தஸ்ஸேவ ஞாணபரிபாகம் ஆக³மயமானோ அக³ந்த்வா, அபரபா⁴கே³ மஹதா பி⁴க்கு²ஸங்கே⁴ன பரிவுதோ ஜனபத³சாரிகம் சரந்தோ, ‘‘இதா³னிஸ்ஸ ஞாணம் பரிபக்க’’ந்தி ஞத்வா தஸ்ஸ வஸனட்டா²னஸ்ஸ அவிதூ³ரே மக்³கா³ ஓக்கம்ம அஞ்ஞதரஸ்மிம் ருக்க²மூலே நிஸீதி³ தஸ்ஸ ஆக³மனம் ஆக³மயமானோ. நந்தோ³பி கோ² ‘‘ஸத்தா² கிர ஜனபத³சாரிகம் சரந்தோ இதோ ஆக³ச்ச²தீ’’தி ஸுத்வா, ஹட்ட²துட்டோ² வேகே³ன க³ந்த்வா, ஸத்தா²ரம் உபஸங்கமித்வா வந்தி³த்வா கதபடிஸந்தா²ரோ ஏகமந்தம் நிஸீதி³, அத²ஸ்ஸ ப⁴க³வா த⁴ம்மம் தே³ஸேஸி. ஸோ ஸோதாபத்திப²லே பதிட்ட²ஹித்வா ப⁴க³வந்தம் நிமந்தேத்வா ஸத்தாஹம் பாயாஸதா³னமதா³ஸி, ஸத்தமே தி³வஸே ப⁴க³வா அனுமோத³னம் கத்வா பக்காமி. தேன வுத்தம் – ‘‘ஏகமந்தம் நிஸின்னம் கோ² தம் கோ³பாலகம் ப⁴க³வா த⁴ம்மியா கதா²ய ஸந்த³ஸ்ஸேஸி…பே… உட்டா²யாஸனா பக்காமீ’’தி.

தத்த² ஸந்த³ஸ்ஸேஸீதி ‘‘இமே த⁴ம்மா குஸலா, இமே த⁴ம்மா அகுஸலா’’திஆதி³னா குஸலாதி³த⁴ம்மே கம்மவிபாகே இத⁴லோகபரலோகே பச்சக்க²தோ த³ஸ்ஸேந்தோ அனுபுப்³பி³கதா²வஸானே சத்தாரி அரியஸச்சானி ஸம்மா த³ஸ்ஸேஸி. ஸமாத³பேஸீதி ‘‘ஸச்சாதி⁴க³மாய இமே நாம த⁴ம்மா அத்தனி உப்பாதே³தப்³பா³’’தி ஸீலாதி³த⁴ம்மே ஸம்மா க³ண்ஹாபேத்வா தேஸு தம் பதிட்ட²பேஸி. ஸமுத்தேஜேஸீதி தே த⁴ம்மா ஸமாதி³ன்னா அனுக்கமேன பா⁴வியமானா நிப்³பே³த⁴பா⁴கி³யா ஹுத்வா திக்க²விஸதா³ யதா² கி²ப்பம் அரியமக்³க³ம் ஆவஹந்தி, ததா² ஸம்மா உத்தேஜேஸி ஸம்மதே³வ தேஜேஸி. ஸம்பஹம்ஸேஸீதி பா⁴வனாய புப்³பே³னாபரம் விஸேஸபா⁴வத³ஸ்ஸனேன சித்தஸ்ஸ பமோதா³பனவஸேன ஸுட்டு² பஹம்ஸேஸி. அபிசேத்த² ஸாவஜ்ஜானவஜ்ஜத⁴ம்மேஸு து³க்கா²தீ³ஸு ச ஸம்மோஹவினோத³னேன ஸந்த³ஸ்ஸனம், ஸம்மாபடிபத்தியம் பமாதா³பனோத³னேன ஸமாத³பனம், சித்தஸ்ஸாலஸியாபத்திவினோத³னேன ஸமுத்தேஜனம், ஸம்மாபடிபத்திஸித்³தி⁴யா ஸம்பஹம்ஸனம் வேதி³தப்³ப³ம். ஏவம் ஸோ ப⁴க³வதோ ஸாமுக்கம்ஸிகாய த⁴ம்மதே³ஸனாய ஸோதாபத்திப²லே பதிட்ட²ஹி. அதி⁴வாஸேஸீதி தேன தி³ட்ட²ஸச்சேன ‘‘அதி⁴வாஸேது மே, ப⁴ந்தே ப⁴க³வா’’திஆதி³னா நிமந்திதோ காயங்க³வாசங்க³ம் அசோபேந்தோ சித்தேனேவ அதி⁴வாஸேஸி ஸாதி³யி. தேனேவாஹ ‘‘துண்ஹீபா⁴வேனா’’தி.

அப்போத³கபாயாஸந்தி நிருத³கபாயாஸம். படியாதா³பேத்வாதி ஸம்பாதே³த்வா ஸஜ்ஜேத்வா. நவஞ்ச ஸப்பிந்தி நவனீதம் க³ஹேத்வா தாவதே³வ விலீனம் மண்ட³ஸப்பிஞ்ச படியாதா³பேத்வா. ஸஹத்தா²தி ஆத³ரஜாதோ ஸஹத்தே²னேவ பரிவிஸந்தோ. ஸந்தப்பேஸீதி படியத்தம் போ⁴ஜனம் போ⁴ஜேஸி. ஸம்பவாரேஸீதி ‘‘அலம் அல’’ந்தி வாசாய படிக்கி²பாபேஸி. பு⁴த்தாவிந்தி கதப⁴த்தகிச்சம். ஓனீதபத்தபாணிந்தி பத்ததோ அபனீதபாணிம், ‘‘தோ⁴தபத்தபாணி’’ந்திபி பாடோ², தோ⁴தபத்தஹத்த²ந்தி அத்தோ². நீசந்தி அனுச்சம் ஆஸனம் க³ஹேத்வா ஆஸனேயேவ நிஸீத³னம் அரியதே³ஸவாஸீனம் சாரித்தம், ஸோ பன ஸத்து² ஸந்திகே உபசாரவஸேன பஞ்ஞத்தஸ்ஸ தா³ருப²லகாஸனஸ்ஸ ஸமீபே நிஸீதி³. த⁴ம்மியா கதா²யாதிஆதி³ ஸத்தமே தி³வஸே கதம் அனுமோத³னம் ஸந்தா⁴ய வுத்தம். ஸோ கிர ஸத்தாஹம் ப⁴க³வந்தம் பி⁴க்கு²ஸங்க⁴ஞ்ச தத்த² வஸாபேத்வா மஹாதா³னம் பவத்தேஸி. ஸத்தமே பன தி³வஸே அப்போத³கபாயாஸதா³னம் அதா³ஸி. ஸத்தா² தஸ்ஸ தஸ்மிம் அத்தபா⁴வே உபரிமக்³க³த்தா²ய ஞாணபரிபாகாபா⁴வதோ அனுமோத³னமேவ கத்வா பக்காமி.

ஸீமந்தரிகாயாதி ஸீமந்தரே, தஸ்ஸ கா³மஸ்ஸ அந்தரம். கா³மவாஸினோ கிர ஏகம் தளாகம் நிஸ்ஸாய தேன ஸத்³தி⁴ம் கலஹம் அகம்ஸு. ஸோ தே அபி⁴ப⁴வித்வா தம் தளாகம் க³ண்ஹி. தேன ப³த்³தா⁴கா⁴தோ ஏகோ புரிஸோ தம் ஸத்து² பத்தம் க³ஹேத்வா தூ³ரம் அனுக³ந்த்வா ‘‘நிவத்தாஹி உபாஸகா’’தி வுத்தே ப⁴க³வந்தம் வந்தி³த்வா பத³க்கி²ணம் கத்வா பி⁴க்கு²ஸங்க⁴ஸ்ஸ ச அஞ்ஜலிம் கத்வா யாவ த³ஸ்ஸனூபசாரஸமதிக்கமா த³ஸனக²ஸமோதா⁴னஸமுஜ்ஜலம் அஞ்ஜலிம் ஸிரஸி பக்³க³ய்ஹ படினிவத்தித்வா த்³வின்னம் கா³மானம் அந்தரே அரஞ்ஞப்பதே³ஸே ஏககம் க³ச்ச²ந்தம் ஸரேன விஜ்ஜி²த்வா மாரேஸி. தேன வுத்தம் அசிரபக்கந்தஸ்ஸ…பே… வோரோபேஸீ’’தி. கேனசிதே³வ கரணீயேன ஓஹீயித்வா பச்சா² க³ச்ச²ந்தா பி⁴க்கூ² தம் ததா² மதம் தி³ஸ்வா ப⁴க³வதோ தமத்த²ம் ஆரோசேஸும், தம் ஸந்தா⁴ய வுத்தம் ‘‘அத² கோ² ஸம்ப³ஹுலா பி⁴க்கூ²’’திஆதி³.

ஏதமத்த²ம் விதி³த்வாதி யஸ்மா தி³ட்டி²ஸம்பன்னம் அரியஸாவகம் நந்த³ம் மாரேந்தேன புரிஸேன ஆனந்தரியகம்மம் ப³ஹுலம் அபுஞ்ஞம் பஸுதம், தஸ்மா யம் சோரேஹி ச வேரீஹி ச கத்தப்³ப³ம், ததோபி கோ⁴ரதரம் இமேஸம் ஸத்தானம் மிச்சா²பணிஹிதம் சித்தம் கரோதீதி இமமத்த²ம் ஜானித்வா தத³த்த²தீ³பனம் இமம் உதா³னம் உதா³னேஸி.

தத்த² தி³ஸோ தி³ஸந்தி தூ³ஸகோ தூ³ஸனீயம் சோரோ சோரம், தி³ஸ்வாதி வசனஸேஸோ. யம் தம் கயிராதி யம் தஸ்ஸ அனயப்³யஸனம் கரேய்ய, து³தியபதே³பி ஏஸேவ நயோ. இத³ம் வுத்தம் ஹோதி – ஏகோ ஏகஸ்ஸ மித்தது³ப்³பீ⁴ சோரோ புத்ததா³ரகே²த்தவத்து²கோ³மஹிம்ஸாதீ³ஸு அபரஜ்ஜ²ந்தோ யஸ்ஸ அபரஜ்ஜ²தி, தம்பி ததே²வ அத்தனி அபரஜ்ஜ²ந்தம் சோரம் தி³ஸ்வா, வேரீ வா பன கேனசிதே³வ காரணேன ப³த்³த⁴வேரம் வேரிம் தி³ஸ்வா அத்தனோ கக்க²ளதாய தா³ருணதாய யம் தஸ்ஸ அனயப்³யஸனம் கரேய்ய, புத்ததா³ரம் வா பீளேய்ய, கே²த்தாதீ³னி வா நாஸேய்ய, ஜீவிதா வா வோரோபேய்ய, த³ஸஸு அகுஸலகம்மபதே²ஸு மிச்சா²ட²பிதத்தா மிச்சா²பணிஹிதம் சித்தம் பாபியோ நம் ததோ கரே, நம் புரிஸம் பாபதரம் ததோ கரேய்ய. வுத்தப்பகாரோ ஹி தி³ஸோ வா வேரீ வா தி³ஸஸ்ஸ வா வேரினோ வா இமஸ்மிம்யேவ அத்தபா⁴வே து³க்க²ம் வா உப்பாதே³ய்ய, ஜீவிதக்க²யம் வா கரேய்ய. இத³ம் பன அகுஸலகம்மபதே²ஸு மிச்சா²ட²பிதம் சித்தம் தி³ட்டே²வ த⁴ம்மே அனயப்³யஸனம் பாபேதி, அத்தபா⁴வஸதஸஹஸ்ஸேஸுபி சதூஸு அபாயேஸு கி²பித்வா ஸீஸமஸ்ஸ உக்கி²பிதும் ந தே³தீதி.

ததியஸுத்தவண்ணனா நிட்டி²தா.

4. யக்க²பஹாரஸுத்தவண்ணனா

34. சதுத்தே² கபோதகந்த³ராயந்தி ஏவம்னாமகே விஹாரே. தஸ்மிம் கிர பப்³ப³தகந்த³ரே புப்³பே³ ப³ஹூ கபோதா வஸிம்ஸு, தேன ஸா பப்³ப³தகந்த³ரா ‘‘கபோதகந்த³ரா’’தி வுச்சதி. அபரபா⁴கே³ தத்த² கதவிஹாரோபி ‘‘கபோதகந்த³ரா’’த்வேவ பஞ்ஞாயித்த². தேன வுத்தம் – ‘‘கபோதகந்த³ராயந்தி ஏவம்னாமகே விஹாரே’’தி. ஜுண்ஹாய ரத்தியாதி ஸுக்கபக்க²ரத்தியம். நவோரோபிதேஹி கேஸேஹீதி அசிரஓஹாரிதேஹி கேஸேஹி, இத்த²ம்பூ⁴தலக்க²ணே சேதம் கரணவசனம். அப்³போ⁴காஸேதி யத்த² உபரிச்ச²த³னம் பரிக்கே²போ வா நத்தி², தாதி³ஸே ஆகாஸங்க³ணே.

தத்த² ஆயஸ்மா ஸாரிபுத்தோ ஸுவண்ணவண்ணோ, ஆயஸ்மா மஹாமோக்³க³ல்லானோ நீலுப்பலவண்ணோ. உபோ⁴பி பன தே மஹாதே²ரா உதி³ச்சப்³ராஹ்மணஜச்சா கப்பானம் ஸதஸஹஸ்ஸாதி⁴கம் ஏகம் அஸங்க்²யேய்யம் அபி⁴னீஹாரஸம்பன்னா ச²ளபி⁴ஞ்ஞாபடிஸம்பி⁴தா³ப்பத்தா மஹாகீ²ணாஸவா ஸமாபத்திலாபி⁴னோ ஸத்தஸட்டி²யா ஸாவகபாரமிஞாணானம் மத்த²கப்பத்தா ஏதம் கபோதகந்த³ரவிஹாரம் உபஸோப⁴யந்தா ஏகம் கனககு³ஹம் பவிட்டா² த்³வே ஸீஹா விய, ஏகம் விஜம்ப⁴னபூ⁴மிம் ஓதிண்ணா த்³வே ப்³யக்³கா⁴ விய, ஏகம் ஸுபுப்பி²தஸாலவனம் பவிட்டா² த்³வே ச²த்³த³ந்தனாக³ராஜானோ விய, ஏகம் ஸிம்ப³லிவனம் பவிட்டா² த்³வே ஸுபண்ணராஜானோ விய, ஏகம் நரவாஹனயானம் அபி⁴ருள்ஹா த்³வே வேஸ்ஸவணா விய, ஏகம் பண்டு³கம்ப³லஸிலாஸனம் அபி⁴னிஸின்னா த்³வே ஸக்கா விய, ஏகவிமானப்³ப⁴ந்தரக³தா த்³வே மஹாப்³ரஹ்மானோ விய, ஏகஸ்மிம் க³க³னட்டா²னே டி²தானி த்³வே சந்த³மண்ட³லானி விய, த்³வே ஸூரியமண்ட³லானி விய ச விரோசிம்ஸு. தேஸு ஆயஸ்மா மஹாமோக்³க³ல்லானோ துண்ஹீ நிஸீதி³, ஆயஸ்மா பன ஸாரிபுத்தோ ஸமாபஜ்ஜி. தேன வுத்தம் – ‘‘அஞ்ஞதரம் ஸமாதி⁴ம் ஸமாபஜ்ஜித்வா’’தி.

தத்த² அஞ்ஞதரம் ஸமாதி⁴ந்தி உபேக்கா²ப்³ரஹ்மவிஹாரஸமாபத்திம். கேசி ‘‘ஸஞ்ஞாவேத³யிதனிரோத⁴ஸமாபத்தி’’ந்தி வத³ந்தி, அபரே பனாஹு ‘‘ஆருப்பபாத³கம் ப²லஸமாபத்தி’’ந்தி. இமா ஏவ ஹி திஸ்ஸோ காயரக்க²ணஸமத்தா² ஸமாபத்தியோ. தத்த² நிரோத⁴ஸமாபத்தியா ஸமாதி⁴பரியாயஸம்ப⁴வோ ஹேட்டா² வுத்தோவ, பச்சி²மம்யேவ பன ஆசரியா வண்ணேந்தி. உத்தராய தி³ஸாய த³க்கி²ணம் தி³ஸம் க³ச்ச²ந்தீதி உத்தராய தி³ஸாய யக்க²ஸமாக³மம் க³ந்த்வா அத்தனோ ப⁴வனம் க³ந்தும் த³க்கி²ணம் தி³ஸம் க³ச்ச²ந்தி. படிபா⁴தி மந்தி உபட்டா²தி மம. மந்தி ஹி படிஸத்³த³யோகே³ன ஸாமிஅத்தே² உபயோக³வசனம், இமஸ்ஸ ஸீஸே பஹாரம் தா³தும் சித்தம் மே உப்பஜ்ஜதீதி அத்தோ². ஸோ கிர புரிமஜாதியம் தே²ரே ப³த்³தா⁴கா⁴தோ, தேனஸ்ஸ தே²ரம் தி³ஸ்வா பது³ட்ட²சித்தஸ்ஸ ஏவம் அஹோஸி. இதரோ பன ஸப்பஞ்ஞஜாதிகோ, தஸ்மா தம் படிஸேதே⁴ந்தோ ‘‘அலம் ஸம்மா’’திஆதி³மாஹ. தத்த² மா ஆஸாதே³ஸீதி மா க⁴ட்டேஸி, மா பஹாரம் தே³ஹீதி வுத்தம் ஹோதி. உளாரோதி உளாரேஹி உத்தமேஹி ஸீலாதி³கு³ணேஹி ஸமன்னாக³தோ.

அனாதி³யித்வாதி ஆத³ரம் அகத்வா, தஸ்ஸ வசனம் அக்³க³ஹேத்வா. யஸ்மா பன தஸ்ஸ வசனம் அக்³க³ண்ஹந்தோ தம் அனாதி³யந்தோ நாம ஹோதி, தஸ்மா வுத்தம் – ‘‘தம் யக்க²ம் அனாதி³யித்வா’’தி. ஸீஸே பஹாரம் அதா³ஸீதி ஸப்³ப³தா²மேன உஸ்ஸாஹம் ஜனேத்வா ஆகாஸே டி²தோவ ஸீஸே க²டகம் அதா³ஸி, முத்³த⁴னி முட்டி²கா⁴தம் அகாஸீதி அத்தோ². தாவ மஹாதி தா²மமஹத்தேன தத்தகம் மஹந்தோ பஹாரோ அஹோஸி. தேன பஹாரேனாதி தேன பஹாரேன கரணபூ⁴தேன. ஸத்தரதனந்தி பமாணமஜ்ஜி²மஸ்ஸ புரிஸஸ்ஸ ரதனேன ஸத்தரதனம். நாக³ந்தி ஹத்தி²னாக³ம். ஓஸாதே³ய்யாதி பத²வியம் ஓஸீதா³பேய்ய நிமுஜ்ஜாபேய்ய. ‘‘ஓஸாரேய்யா’’திபி பாடோ², சுண்ணவிசுண்ணம் கரேய்யாதி அத்தோ². அட்³ட⁴ட்ட²மரதனந்தி அட்³டே⁴ன அட்ட²ன்னம் பூரணானி அட்³ட⁴ட்ட²மானி, அட்³ட⁴ட்ட²மானி ரதனானி பமாணம் ஏதஸ்ஸாதி அட்³ட⁴ட்ட²மரதனோ, தம் அட்³ட⁴ட்ட²மரதனம். மஹந்தம் பப்³ப³தகூடந்தி கேலாஸகூடப்பமாணம் விபுலம் கி³ரிகூடம். பதா³லேய்யாதி ஸகலிகாகாரேன பி⁴ந்தே³ய்ய. அபி ஓஸாதே³ய்ய, அபி பதா³லேய்யாதி ஸம்ப³ந்தோ⁴.

தாவதே³வ சஸ்ஸ ஸரீரே மஹாபரிளாஹோ உப்பஜ்ஜி, ஸோ வேத³னாதுரோ ஆகாஸே டா²தும் அஸக்கோந்தோ பூ⁴மியம் பதி, தங்க²ணஞ்ஞேவ அட்ட²ஸட்டி²ஸஹஸ்ஸாதி⁴கயோஜனஸதஸஹஸ்ஸுப்³பே³த⁴ம் ஸினேரும்பி பப்³ப³தராஜானம் ஸந்தா⁴ரேந்தீ சதுனஹுதாதி⁴கத்³வியோஜனஸதஸஹஸ்ஸப³ஹலா மஹாபத²வீ தம் பாபஸத்தம் தா⁴ரேதும் அஸக்கோந்தீ விய விவரமதா³ஸி. அவீசிதோ ஜாலா உட்ட²ஹித்வா கந்த³ந்தம்யேவ தம் க³ண்ஹிம்ஸு, ஸோ கந்த³ந்தோ விப்பலபந்தோ பதி. தேன வுத்தம் – ‘‘அத² ச பன ஸோ யக்கோ² ‘ட³ய்ஹாமி ட³ய்ஹாமீ’தி வத்வா தத்தே²வ மஹானிரயம் அபதாஸீதி. தத்த² அபதாஸீதி அபதி.

கிம் பன ஸோ யக்க²த்தபா⁴வேனேவ நிரயம் உபக³ச்சீ²தி? ந உபக³ச்சி², யஞ்ஹேத்த² தி³ட்ட²த⁴ம்மவேத³னீயம் பாபகம்மம் அஹோஸி, தஸ்ஸ ப³லேன யக்க²த்தபா⁴வே மஹந்தம் து³க்க²ம் அனுப⁴வி. யம் பன உபபஜ்ஜவேத³னீயம் ஆனந்தரியகம்மம், தேன சுதிஅனந்தரம் நிரயே உப்பஜ்ஜீதி. தே²ரஸ்ஸ பன ஸமாபத்திப³லேன உபத்த²ம்பி⁴தஸரீரஸ்ஸ ந கோசி விகாரோ அஹோஸி. ஸமாபத்திதோ அவுட்டி²தகாலே ஹி தம் யக்கோ² பஹரி, ததா² பஹரந்தம் தி³ப்³ப³சக்கு²னா தி³ஸ்வா ஆயஸ்மா மஹாமோக்³க³ல்லானோ த⁴ம்மஸேனாபதிம் உபஸங்கமி, உபஸங்கமனஸமகாலமேவ ச த⁴ம்மஸேனாபதி ஸமாபத்திதோ உட்டா²ஸி. அத² நம் மஹாமோக்³க³ல்லானோ ஸரீரவுத்திம் புச்சி², ஸோபிஸ்ஸ ப்³யாகாஸி, தேன வுத்தம் – ‘‘அத்³த³ஸா கோ² ஆயஸ்மா மஹாமோக்³க³ல்லானோ…பே… அபி ச மே ஸீஸம் தோ²கம் து³க்க²’’ந்தி.

தத்த² தோ²கம் து³க்க²ந்தி தோ²கம் அப்பமத்தகம் மது⁴ரகஜாதம் விய மே ஸீஸம் து³க்கி²தம், து³க்க²ப்பத்தந்தி அத்தோ². து³க்கா²தி⁴ட்டா²னஞ்ஹி ஸீஸம் து³க்க²ந்தி வுத்தம். ‘‘ஸீஸே தோ²கம் து³க்க²’’ந்திபி பாடோ². கத²ம் பன ஸமாபத்திப³லேன ஸரீரே உபத்த²ம்பி⁴தே தே²ரஸ்ஸ ஸீஸே தோ²கம்பி து³க்க²ம் அஹோஸீதி? அசிரேனேவ வுட்டி²தத்தா. அந்தோஸமாபத்தியம் அபஞ்ஞாயமானது³க்க²ஞ்ஹி காயனிஸ்ஸிதத்தா நித்³த³ம் உபக³தஸ்ஸ மகஸாதி³ஜனிதம் விய படிபு³த்³த⁴ஸ்ஸ தோ²கம் பஞ்ஞாயித்த².

‘‘மஹாப³லேன யக்கே²ன ததா² ஸப்³பு³ஸ்ஸாஹேன பஹடே ஸரீரேபி விகாரோ நாம நத்தீ²’’தி அச்ச²ரியப்³பு⁴தசித்தஜாதேன ஆயஸ்மதா மஹாமோக்³க³ல்லானேன ‘‘அச்ச²ரியம், ஆவுஸோ ஸாரிபுத்தா’’திஆதி³னா த⁴ம்மஸேனாபதினோ மஹானுபா⁴வதாய விபா⁴விதாய ஸோபிஸ்ஸ ‘அச்ச²ரியம், ஆவுஸோ மோக்³க³ல்லானா’’திஆதி³னா இத்³தா⁴னுபா⁴வமஹந்ததாபகாஸனாபதே³ஸேன அத்தனோ இஸ்ஸாமச்ச²ரியாஹங்காராதி³மலானம் ஸுப்பஹீனதம் தீ³பேதி. பம்ஸுபிஸாசகம்பி ந பஸ்ஸாமாதி ஸங்காரகூடாதீ³ஸு விசரணககு²த்³த³கபேதம்பி ந பஸ்ஸாம. இதி அதி⁴க³மப்பிச்சா²னம் அக்³க³பூ⁴தோ மஹாதே²ரோ தஸ்மிம் காலே அனாவஜ்ஜனேன தேஸம் அத³ஸ்ஸனம் ஸந்தா⁴ய வத³தி. தேனேவாஹ ‘‘ஏதரஹீ’’தி.

ப⁴க³வா பன வேளுவனே டி²தோ உபி⁴ன்னம் அக்³க³ஸாவகானம் இமம் கதா²ஸல்லாபம் தி³ப்³ப³ஸோதேன அஸ்ஸோஸி. தேன வுத்தம் – ‘‘அஸ்ஸோஸி கோ² ப⁴க³வா’’திஆதி³, தம் வுத்தத்த²மேவ.

ஏதமத்த²ம் விதி³த்வாதி ஏதம் ஆயஸ்மதோ ஸாரிபுத்தஸ்ஸ ஸமாபத்திப³லூபக³தம் இத்³தா⁴னுபா⁴வமஹந்ததம் விதி³த்வா. இமம் உதா³னந்தி தஸ்ஸேவ தாதி³பா⁴வப்பத்திதீ³பகம் இமம் உதா³னம் உதா³னேஸி.

தத்த² யஸ்ஸ ஸேலூபமம் சித்தம், டி²தம் நானுபகம்பதீதி யஸ்ஸ கீ²ணாஸவஸ்ஸ சித்தம் ஏகக்³க⁴னஸிலாமயபப்³ப³தூபமம் ஸப்³பே³ஸம் இஞ்ஜனானம் அபா⁴வதோ வஸீபா⁴வப்பத்தியாவ டி²தம் ஸப்³பே³ஹிபி லோகத⁴ம்மேஹி நானுபகம்பதி ந பவேத⁴தி. இதா³னிஸ்ஸ அகம்பனாகாரம் ஸத்³தி⁴ம் காரணேன த³ஸ்ஸேதும் ‘‘விரத்த’’ந்திஆதி³ வுத்தம். தத்த² விரத்தம் ரஜனீயேஸூதி விராக³ஸங்கா²தேன அரியமக்³கே³ன ரஜனீயேஸு ராகு³ப்பத்திஹேதுபூ⁴தேஸு ஸப்³பே³ஸு தேபூ⁴மகத⁴ம்மேஸு விரத்தம், தத்த² ஸப்³ப³ஸோ ஸமுச்சி²ன்னராக³ந்தி அத்தோ². கோபனேய்யேதி படிக⁴ட்டா²னீயே ஸப்³ப³ஸ்மிம்பி ஆகா⁴தவத்து²ஸ்மிம் ந குப்பதி ந து³ஸ்ஸதி ந விகாரம் ஆபஜ்ஜதி. யஸ்ஸேவம் பா⁴விதம் சித்தந்தி யஸ்ஸ யதா²வுத்தஸ்ஸ அரியபுக்³க³லஸ்ஸ சித்தம் ஏவம் வுத்தனயேன தாதி³பா⁴வாவஹனபா⁴வேன பா⁴விதம். குதோ தம் து³க்க²மேஸ்ஸதீதி தம் உத்தமபுக்³க³லம் குதோ ஸத்ததோ ஸங்கா²ரதோ வா து³க்க²ம் உபக³மிஸ்ஸதி, ந தாதி³ஸஸ்ஸ து³க்க²ம் அத்தீ²தி அத்தோ².

சதுத்த²ஸுத்தவண்ணனா நிட்டி²தா.

5. நாக³ஸுத்தவண்ணனா

35. பஞ்சமே கோஸம்பி³யந்தி குஸும்பே³ன நாம இஸினா வஸிதட்டா²னே மாபிதத்தா ‘‘கோஸம்பீ³’’தி ஏவம்லத்³த⁴னாமகே நக³ரே. கோ⁴ஸிதாராமேதி கோ⁴ஸிதஸேட்டி²னா காரிதே ஆராமே. ப⁴க³வா ஆகிண்ணோ விஹரதீதி ப⁴க³வா ஸம்பா³த⁴ப்பத்தோ விஹரதி. கிம் பன ப⁴க³வதோ ஸம்பா³தோ⁴ அத்தி², ஸம்ஸக்³கோ³ வாதி? நத்தி². ந ஹி கோசி ப⁴க³வந்தம் அனிச்சா²ய உபஸங்கமிதும் ஸக்கோதி. து³ராஸதா³ ஹி பு³த்³தா⁴ ப⁴க³வந்தோ ஸப்³ப³த்த² ச அனுபலித்தத்தா. ஹிதேஸிதாய பன ஸத்தேஸு அனுகம்பம் உபாதா³ய ‘‘முத்தோ மோசேஸ்ஸாமீ’’தி படிஞ்ஞானுரூபம் சதுரோக⁴னித்த²ரணத்த²ம் அட்ட²ன்னம் பரிஸானம் அத்தனோ ஸந்திகம் காலேன காலம் உபஸங்கமனம் அதி⁴வாஸேதி, ஸயஞ்ச மஹாகருணாஸமுஸ்ஸாஹிதோ காலஞ்ஞூ ஹுத்வா தத்த² உபஸங்கமதி, இத³ம் ஸப்³ப³பு³த்³தா⁴னம் ஆசிண்ணம், அயமித⁴ ஆகிண்ணவிஹாரோதி அதி⁴ப்பேதோ.

இத⁴ பன கோஸம்பி³கானம் பி⁴க்கூ²னம் கலஹஜாதானம் ஸத்தா² தீ³கீ⁴திஸ்ஸ கோஸலரஞ்ஞோ வத்து²ம் ஆஹரித்வா, ‘‘ந ஹி வேரேன வேரானி, ஸம்மந்தீத⁴ குதா³சன’’ந்திஆதி³னா (த⁴. ப. 5; ம. நி. 3.237; மஹாவ. 464) ஓவாத³ம் அதா³ஸி, தம் தி³வஸம் தேஸம் கலஹம் கரோந்தானம்யேவ ரத்தி விபா⁴தா. து³தியதி³வஸேபி ப⁴க³வா தமேவ வத்து²ம் கதே²ஸி, தம் தி³வஸம்பி தேஸம் கலஹம் கரோந்தானம்யேவ ரத்தி விபா⁴தா. ததியதி³வஸேபி ப⁴க³வா தமேவ வத்து²ம் கதே²ஸி, அத²ஞ்ஞதரோ பி⁴க்கு² ப⁴க³வந்தம் ஏவமாஹ – ‘‘அப்போஸ்ஸுக்கோ, ப⁴ந்தே ப⁴க³வா, தி³ட்ட²த⁴ம்மஸுக²விஹாரமனுயுத்தோ விஹரது, மயமேதேன ப⁴ண்ட³னேன கலஹேன விக்³க³ஹேன விவாதே³ன பஞ்ஞாயிஸ்ஸாமா’’தி. ஸத்தா² ‘‘பரியாதி³ன்னசித்தா கோ² இமே மோக⁴புரிஸா ந தா³னிமே ஸக்கா ஸஞ்ஞாபேதும், நத்தி² சேத்த² ஸஞ்ஞாபேதப்³பா³, யம்னூனாஹம் ஏகசாரிகவாஸம் வஸேய்யம், ஏவம் இமே பி⁴க்கூ² கலஹதோ ஓரமிஸ்ஸந்தீ’’தி சிந்தேஸி. ஏவம் தேஹி கலஹகாரகேஹி பி⁴க்கூ²ஹி ஸத்³தி⁴ம் ஏகவிஹாரே வாஸம் வினேதப்³பா³பா⁴வதோ உபாஸகாதீ³ஹி உபஸங்கமனஞ்ச ஆகிண்ணவிஹாரம் கத்வா வுத்தம் – ‘‘தேன கோ² பன ஸமயேன ப⁴க³வா ஆகிண்ணோ விஹரதீ’’திஆதி³.

தத்த² து³க்க²ந்தி ந ஸுக²ம், அனாராதி⁴தசித்ததாய ந இட்ட²ந்தி அத்தோ². தேனேவாஹ ‘‘ந பா²ஸு விஹராமீ’’தி. வூபகட்டோ²தி பவிவேகட்டோ² தூ³ரீபூ⁴தோ. ததா² சிந்தேத்வாவ ப⁴க³வா பாதோவ ஸரீரப்படிஜக்³க³னம் கத்வா கோஸம்பி³யம் பிண்டா³ய சரித்வா கஞ்சி அனாமந்தேத்வா ஏகோ அது³தியோ க³ந்த்வா கோஸலரட்டே² பாலிலேய்யகே வனஸண்டே³ ப⁴த்³த³ஸாலமூலே விஹாஸி. தேன வுத்தம் – ‘‘அத² கோ² ப⁴க³வா புப்³ப³ண்ஹஸமயம்…பே… ப⁴த்³த³ஸாலமூலே’’தி. தத்த² ஸாமந்தி ஸயம். ஸம்ஸாமேத்வாதி படிஸாமேத்வா. பத்தசீவரமாதா³யாதி ஏத்தா²பி ஸாமந்தி பத³ம் ஆனேத்வா யோஜேதப்³ப³ம். உபட்டா²கேதி கோஸம்பி³னக³ரவாஸினோ கோ⁴ஸிதஸேட்டி²ஆதி³கே உபட்டா²கே, விஹாரே ச அக்³கு³பட்டா²கம் ஆயஸ்மந்தம் ஆனந்த³ம் அனாமந்தேத்வா.

ஏவம் க³தே ஸத்த²ரி பஞ்சஸதா பி⁴க்கூ² ஆயஸ்மந்தம் ஆனந்த³ம் ஆஹம்ஸு – ‘‘ஆவுஸோ ஆனந்த³, ஸத்தா² ஏககோவ க³தோ, மயம் அனுப³ந்தி⁴ஸ்ஸாமா’’தி. ‘‘ஆவுஸோ, யதா³ ப⁴க³வா ஸாமம் ஸேனாஸனம் ஸம்ஸாமேத்வா பத்தசீவரமாதா³ய அனாமந்தேத்வா உபட்டா²கே ச அனபலோகேத்வா பி⁴க்கு²ஸங்க⁴ம் அது³தியோ க³ச்ச²தி, ததா³ ஏகசாரம் சரிதும் ப⁴க³வதோ அஜ்ஜா²ஸயோ, ஸாவகேன நாம ஸத்து² அஜ்ஜா²ஸயானுரூபம் படிபஜ்ஜிதப்³ப³ம், தஸ்மா ந இமேஸு தி³வஸேஸு ப⁴க³வா அனுக³ந்தப்³போ³’’தி நிவாரேஸி, ஸயம்பி நானுக³ச்சி².

அனுபுப்³பே³னாதி அனுக்கமேன, கா³மனிக³மபடிபாடியா சாரிகம் சரமானோ ‘‘ஏகசாரவாஸம் தாவ வஸமானம் பி⁴க்கு²ம் பஸ்ஸிஸ்ஸாமீ’’தி பா³லகலோணகாரகா³மம் க³ந்த்வா தத்த² ப⁴கு³த்தே²ரஸ்ஸ ஸகலம் பச்சா²ப⁴த்தஞ்சேவ தியாமஞ்ச ரத்திம் ஏகசாரவாஸே ஆனிஸம்ஸம் கதே²த்வா புனதி³வஸே தேன பச்சா²ஸமணேன பிண்டா³ய சரித்வா தம் தத்தே²வ நிவத்தேத்வா ‘‘ஸமக்³க³வாஸம் வஸமானே தயோ குலபுத்தே பஸ்ஸிஸ்ஸாமீ’’தி பாசீனவம்ஸமிக³தா³யம் க³ந்த்வா தேஸம்பி ஸகலரத்திம் ஸமக்³க³வாஸே ஆனிஸம்ஸம் கதே²த்வா தேபி தத்தே²வ நிவத்தேத்வா ஏககோவ பாலிலேய்யகா³மம் ஸம்பத்தோ. பாலிலேய்யகா³மவாஸினோ பச்சுக்³க³ந்த்வா ப⁴க³வதோ தா³னம் த³த்வா பாலிலேய்யகா³மஸ்ஸ அவிதூ³ரே ரக்கி²தவனஸண்டோ³ நாம அத்தி², தத்த² ப⁴க³வதோ பண்ணஸாலம் கத்வா ‘‘ஏத்த² ப⁴க³வா வஸதூ’’தி யாசித்வா வாஸயிம்ஸு. ப⁴த்³த³ஸாலோதி பன தத்தே²கோ மனாபோ ப⁴த்³த³கோ ஸாலருக்கோ², ப⁴க³வா தம் கா³மம் உபனிஸ்ஸாய வனஸண்டே³ பண்ணஸாலஸமீபே தஸ்மிம் ருக்க²மூலே விஹாஸி. தேன வுத்தம் – ‘‘பாலிலேய்யகே விஹரதி ரக்கி²தவனஸண்டே³ ப⁴த்³த³ஸாலமூலே’’தி.

ஹத்தி²னாகோ³தி மஹாஹத்தீ² யூத²பதி. ஹத்தி²கலபே⁴ஹீதி ஹத்தி²போதகேஹி. ஹத்தி²ச்சா²பேஹீதி கீ²ரூபகே³ஹி த³ஹரஹத்தி²போதகேஹி, யே ‘‘பி⁴ங்கா’’திபி வுச்சந்தி. சி²ன்னக்³கா³னீதி புரதோ புரதோ க³ச்ச²ந்தேஹி தேஹி ஹத்தி²ஆதீ³ஹி சி²ன்னக்³கா³னி கா²தி³தாவஸேஸானி கா²ணுஸதி³ஸானி கா²த³தி. ஓப⁴க்³கோ³ப⁴க்³க³ந்தி தேன ஹத்தி²னாகே³ன உச்சட்டா²னதோ ப⁴ஞ்ஜித்வா ப⁴ஞ்ஜித்வா பாதிதம். அஸ்ஸ ஸாகா²ப⁴ங்க³ந்தி ஏதஸ்ஸ ஸந்தகம் ஸாகா²ப⁴ங்க³ம் தே கா²த³ந்தி. ஆவிலானீதி தேஹி பட²மதரம் ஓதரித்வா பிவந்தேஹி ஆலுளிதத்தா ஆவிலானி கத்³த³மமிஸ்ஸானி பானீயானி பிவதி. ஓகா³ஹாதி தித்த²தோ. ‘‘ஓகா³ஹ’’ந்திபி பாளி. அஸ்ஸாதி ஹத்தி²னாக³ஸ்ஸ. உபனிக⁴ம்ஸந்தியோதி க⁴ட்டேந்தியோ, உபனிக⁴ம்ஸியமானோபி அத்தனோ உளாரபா⁴வேன ந குஜ்ஜ²தி, தேன தா தம் க⁴ம்ஸந்தியேவ. யூதா²தி ஹத்தி²க⁴டா.

யேன ப⁴க³வா தேனுபஸங்கமீதி ஸோ கிர ஹத்தி²னாகோ³ யூத²வாஸே உக்கண்டி²தோ தம் வனஸண்ட³ம் பவிட்டோ² தத்த² ப⁴க³வந்தம் தி³ஸ்வா க⁴டஸஹஸ்ஸேன நிப்³பா³பிதஸந்தாபோ விய நிப்³பு³தோ ஹுத்வா பஸன்னசித்தோ ப⁴க³வதோ ஸந்திகே அட்டா²ஸி, ததோ பட்டா²ய வத்தஸீஸே ட²த்வா ப⁴த்³த³ஸாலஸ்ஸ பண்ணஸாலாய ச ஸமந்ததோ அப்பஹரிதகம் கத்வா ஸாகா²ப⁴ங்கே³ஹி ஸம்மஜ்ஜதி, ப⁴க³வதோ முக²தோ⁴வனம் தே³தி, ந்ஹானோத³கம் ஆஹரதி, த³ந்தகட்ட²ம் தே³தி, அரஞ்ஞதோ மது⁴ரானி ப²லானி ஆஹரித்வா ஸத்து² உபனேதி, ஸத்தா² தானி பரிபு⁴ஞ்ஜதி. தேன வுத்தம் – ‘‘தத்ர ஸுத³ம் ஸோ ஹத்தி²னாகோ³ யஸ்மிம் பதே³ஸே ப⁴க³வா விஹரதி, தம் பதே³ஸம் அப்பஹரிதஞ்ச கரோதி, ஸோண்டா³ய ப⁴க³வதோ பானீயம் பரிபோ⁴ஜனீயம் உபட்டா²பேதீ’’தி. ஸோண்டா³ய தா³ரூனி ஆஹரித்வா அஞ்ஞமஞ்ஞம் க⁴ம்ஸித்வா அக்³கி³ம் உட்டா²பேத்வா தா³ரூனி ஜாலாபேத்வா தத்த² பாஸாணக²ண்டா³னி தாபேத்வா தானி த³ண்ட³கேஹி பவட்டேத்வா ஸோண்டி³யம் கி²பித்வா உத³கஸ்ஸ தத்தபா⁴வம் ஞத்வா ப⁴க³வதோ ஸந்திகம் உபக³ந்த்வா திட்ட²தி, ப⁴க³வா ‘‘ஹத்தி²னாகோ³ மம ந்ஹானம் இச்ச²தீ’’தி தத்த² க³ந்த்வா ந்ஹானகிச்சம் கரோதி, பானீயேபி ஏஸேவ நயோ. தஸ்மிம் பன ஸீதலே ஸஞ்ஜாதே உபஸங்கமதி, தம் ஸந்தா⁴ய வுத்தம் – ‘‘ஸோண்டா³ய ப⁴க³வதோ பானீயம் பரிபோ⁴ஜனீயம் உபட்டா²பேதீ’’தி.

அத² கோ² ப⁴க³வதோ ரஹோக³தஸ்ஸாதிஆதி³ உபி⁴ன்னம் மஹானாகா³னம் விவேகஸுக²பச்சவேக்க²ணத³ஸ்ஸனம், தம் வுத்தத்த²மேவ. அத்தனோ ச பவிவேகம் விதி³த்வாதி கேஹிசி அனாகிண்ணபா⁴வலத்³த⁴ம் காயவிவேகம் ஜானித்வா, இதரே பன விவேகா ப⁴க³வதோ ஸப்³ப³காலம் விஜ்ஜந்தியேவ.

இமம் உதா³னந்தி இமம் அத்தனோ ஹத்தி²னாக³ஸ்ஸ ச பவிவேகாபி⁴ரதியா ஸமானஜ்ஜா²ஸயபா⁴வதீ³பனம் உதா³னம் உதா³னேஸி.

தத்தா²யம் ஸங்கே²பத்தோ² – ஏதம் ஈஸாத³ந்தஸ்ஸ ரத²ஈஸாஸதி³ஸத³ந்தஸ்ஸ ஹத்தி²னாக³ஸ்ஸ சித்தம் நாகே³ன பு³த்³த⁴னாக³ஸ்ஸ சித்தேன ஸமேதி ஸம்ஸந்த³தி. கத²ம் ஸமேதி சே? யதே³கோ ரமதீ வனே யஸ்மா பு³த்³த⁴னாகோ³ ‘‘அஹம் கோ² புப்³பே³ ஆகிண்ணோ விஹாஸி’’ந்தி புரிமம் ஆகிண்ணவிஹாரம் ஜிகு³ச்சி²த்வா விவேகம் உபப்³ரூஹயமானோ இதா³னி யதா² ஏகோ அது³தியோ வனே அரஞ்ஞே ரமதி அபி⁴ரமதி, ஏவம் அயம்பி ஹத்தி²னாகோ³ புப்³பே³ அத்தனோ ஹத்தி²ஆதீ³ஹி ஆகிண்ணவிஹாரம் ஜிகு³ச்சி²த்வா விவேகம் உபப்³ரூஹயமானோ இதா³னி ஏகோ அஸஹாயோ வனே அரஞ்ஞே ரமதி அபி⁴ரமதி. தஸ்மாஸ்ஸ சித்தம் நாகே³ன ஸமேதி தஸ்ஸ சித்தேன ஸமேதீதி கத்வா ஏகீபா⁴வரதியா ஏகஸதி³ஸம் ஹோதீதி அத்தோ².

பஞ்சமஸுத்தவண்ணனா நிட்டி²தா.

6. பிண்டோ³லஸுத்தவண்ணனா

36. ச²ட்டே² பிண்டோ³லபா⁴ரத்³வாஜோதி பிண்ட³ம் உலமானோ பரியேஸமானோ பப்³ப³ஜிதோதி பிண்டோ³லோ. ஸோ கிர பரிஜிண்ணபோ⁴கோ³ ப்³ராஹ்மணோ ஹுத்வா மஹந்தம் பி⁴க்கு²ஸங்க⁴ஸ்ஸ லாப⁴ஸக்காரம் தி³ஸ்வா பிண்ட³த்தா²ய நிக்க²மித்வா பப்³ப³ஜிதோ. ஸோ மஹந்தம் கபல்லம் ‘‘பத்த’’ந்தி க³ஹேத்வா சரதி, கபல்லபூரம் யாகு³ம் பிவதி, ப⁴த்தம் பு⁴ஞ்ஜதி, பூவக²ஜ்ஜகஞ்ச கா²த³தி. அத²ஸ்ஸ மஹக்³க⁴ஸபா⁴வம் ஸத்து² ஆரோசேஸும். ஸத்தா² தஸ்ஸ பத்தத்த²விகம் நானுஜானி, ஹேட்டா²மஞ்சே பத்தம் நிக்குஜ்ஜித்வா ட²பேதி, ஸோ ட²பேந்தோபி க⁴ம்ஸேந்தோவ பணாமேத்வா ட²பேதி, க³ண்ஹந்தோபி க⁴ம்ஸேந்தோவ ஆகட்³டி⁴த்வா க³ண்ஹாதி. தம் க³ச்ச²ந்தே க³ச்ச²ந்தே காலே க⁴ம்ஸனேன பரிக்கீ²ணம், நாளிகோத³னமத்தஸ்ஸேவ க³ண்ஹனகம் ஜாதம். ததோ ஸத்து² ஆரோசேஸும், அத²ஸ்ஸ ஸத்தா² பத்தத்த²விகம் அனுஜானி. தே²ரோ அபரேன ஸமயேன இந்த்³ரியபா⁴வனம் பா⁴வேந்தோ அக்³க³ப²லே அரஹத்தே பதிட்டா²ஸி. இதி ஸோ புப்³பே³ ஸவிஸேஸம் பிண்ட³த்தா²ய உலதீதி பிண்டோ³லோ, கோ³த்தேன பன பா⁴ரத்³வாஜோதி உப⁴யம் ஏகதோ கத்வா ‘‘பிண்டோ³லபா⁴ரத்³வாஜோ’’தி வுச்சதி.

ஆரஞ்ஞகோதி கா³மந்தஸேனாஸனபடிக்கி²பனேன அரஞ்ஞே நிவாஸோ அஸ்ஸாதி ஆரஞ்ஞகோ, ஆரஞ்ஞகது⁴தங்க³ம் ஸமாதா³ய வத்தந்தஸ்ஸேதம் நாமம். ததா² பி⁴க்கா²ஸங்கா²தானம் ஆமிஸபிண்டா³னம் பாதோ பிண்ட³பாதோ, பரேஹி தி³ன்னானம் பிண்டா³னம் பத்தே நிபதனந்தி அத்தோ². பிண்ட³பாதம் உஞ்ச²தி தம் தம் குலம் உபஸங்கமந்தோ க³வேஸதீதி பிண்ட³பாதிகோ, பிண்டா³ய வா பதிதும் சரிதும் வதமேதஸ்ஸாதி பிண்ட³பாதீ, பிண்ட³பாதீயேவ பிண்ட³பாதிகோ. ஸங்காரகூடாதீ³ஸு பம்ஸூனம் உபரி டி²தத்தா அப்³பு⁴க்³க³தட்டே²ன பம்ஸுகூலம் வியாதி பம்ஸுகூலம், பம்ஸு விய வா குச்சி²தபா⁴வம் உலதி க³ச்ச²தீதி பம்ஸுகூலம், பம்ஸுகூலஸ்ஸ தா⁴ரணம் பம்ஸுகூலம், தம் ஸீலம் ஏதஸ்ஸாதி பம்ஸுகூலிகோ. ஸங்கா⁴டிஉத்தராஸங்க³அந்தரவாஸகஸங்கா²தானி தீணி சீவரானி திசீவரம், திசீவரஸ்ஸ தா⁴ரணம் திசீவரம், தம் ஸீலம் ஏதஸ்ஸாதி தேசீவரிகோ. அப்பிச்சோ²திஆதீ³னம் பதா³னம் அத்தோ² ஹேட்டா² வுத்தோயேவ.

து⁴தவாதோ³தி து⁴தோ வுச்சதி து⁴தகிலேஸோ புக்³க³லோ, கிலேஸது⁴னனகத⁴ம்மோ வா. தத்த² அத்தி² து⁴தோ, ந து⁴தவாதோ³, அத்தி² ந து⁴தோ, து⁴தவாதோ³, அத்தி² நேவ து⁴தோ, ந து⁴தவாதோ³, அத்தி² து⁴தோ சேவ, து⁴தவாதோ³ சாதி இத³ம் சதுக்கம் வேதி³தப்³ப³ம். தேஸு யோ ஸயம் து⁴தத⁴ம்மே ஸமாதா³ய வத்ததி, ந பரம் தத³த்தா²ய ஸமாத³பேதி, அயம் பட²மோ. யோ பன ஸயம் ந து⁴தத⁴ம்மே ஸமாதா³ய வத்ததி, பரம் ஸமாத³பேதி, அயம் து³தியோ. யோ உப⁴யரஹிதோ, அயம் ததியோ. யோ பன உப⁴யஸம்பன்னோ, அயம் சதுத்தோ². ஏவரூபோ ச ஆயஸ்மா பிண்டோ³லபா⁴ரத்³வாஜோதி. தேன வுத்தம் ‘‘து⁴தவாதோ³’’தி. ஏகதே³ஸஸரூபேகஸேஸவஸேன ஹி அயம் நித்³தே³ஸோ யதா² தம் ‘‘நாமரூப’’ந்தி.

அதி⁴சித்தமனுயுத்தோதி ஏத்த² அட்ட²ஸமாபத்திஸம்பயோக³தோ அரஹத்தப²லஸமாபத்திஸம்பயோக³தோ வா சித்தஸ்ஸ அதி⁴சித்தபா⁴வோ வேதி³தப்³போ³, இத⁴ பன ‘‘அரஹத்தப²லசித்த’’ந்தி வத³ந்தி. தம்தம்ஸமாபத்தீஸு ஸமாதி⁴ ஏவ அதி⁴சித்தம், இத⁴ பன அரஹத்தப²லஸமாதி⁴ வேதி³தப்³போ³. கேசி பன ‘‘அதி⁴சித்தமனுயுத்தேன, பி⁴க்க²வே, பி⁴க்கு²னா காலேன காலம் தீணி நிமித்தானி மனஸி காதப்³பா³னீதி ஏதஸ்மிம் அதி⁴சித்தஸுத்தே (அ. நி. 3.103) விய ஸமத²விபஸ்ஸனாசித்தம் அதி⁴சித்தந்தி இதா⁴தி⁴ப்பேத’’ந்தி வத³ந்தி, தம் ந ஸுந்த³ரம். புரிமோயேவத்தோ² க³ஹேதப்³போ³.

ஏதமத்த²ம் விதி³த்வாதி ஏதம் ஆயஸ்மதோ பிண்டோ³லபா⁴ரத்³வாஜஸ்ஸ அதி⁴ட்டா²னபரிக்கா²ரஸம்பதா³ஸம்பன்னம் அதி⁴சித்தானுயோக³ஸங்கா²தம் அத்த²ம் ஸப்³பா³காரதோ விதி³த்வா. ஏவம் ‘‘அதி⁴சித்தானுயோகோ³ மம ஸாஸனானுட்டா²ன’’ந்தி தீ³பேந்தோ இமம் உதா³னம் உதா³னேஸி.

தத்த² அனூபவாதோ³தி வாசாய கஸ்ஸசிபி அனுபவத³னம். அனூபகா⁴தோதி காயேன கஸ்ஸசி உபகா⁴தாகரணம். பாதிமோக்கே²தி ஏத்த² பாதிமோக்க²பத³ஸ்ஸ அத்தோ² ஹேட்டா² நானப்பகாரேஹி வுத்தோ, தஸ்மிம் பாதிமோக்கே². ஸத்தன்னம் ஆபத்திக்க²ந்தா⁴னம் அவீதிக்கமலக்க²ணோ ஸம்வரோ. மத்தஞ்ஞுதாதி படிக்³க³ஹணபரிபோ⁴க³வஸேன பமாணஞ்ஞுதா. பந்தஞ்ச ஸயனாஸனந்தி விவித்தம் ஸங்க⁴ட்டனவிரஹிதம் ஸேனாஸனம். அதி⁴சித்தே ச ஆயோகோ³தி அட்ட²ன்னம் ஸமாபத்தீனம் அதி⁴க³மாய பா⁴வனானுயோகோ³.

அபரோ நயோ – அனூபவாதோ³தி கஸ்ஸசிபி உபருஜ்ஜ²னவசனஸ்ஸ அவத³னம். தேன ஸப்³ப³ம்பி வாசஸிகம் ஸீலம் ஸங்க³ண்ஹாதி. அனூபகா⁴தோதி காயேன கஸ்ஸசி உபகா⁴தஸ்ஸ பரவிஹேட²னஸ்ஸ அகரணம். தேன ஸப்³ப³ம்பி காயிகம் ஸீலம் ஸங்க³ண்ஹாதி. யாதி³ஸம் பனித³ம் உப⁴யம் பு³த்³தா⁴னம் ஸாஸனந்தோக³த⁴ம் ஹோதி, தம் த³ஸ்ஸேதும் – ‘‘பாதிமோக்கே² ச ஸம்வரோ’’தி வுத்தம். சஸத்³தோ³ நிபாதமத்தம். பாதிமோக்கே² ச ஸம்வரோதி பாதிமோக்க²ஸம்வரபூ⁴தோ அனூபவாதோ³ அனூபகா⁴தோ சாதி அத்தோ².

அத² வா பாதிமோக்கே²தி அதி⁴கரணே பு⁴ம்மம். பாதிமோக்கே² நிஸ்ஸயபூ⁴தே ஸம்வரோ. கோ பன ஸோதி? அனூபவாதோ³ அனூபகா⁴தோ. உபஸம்பத³வேலாயஞ்ஹி அவிஸேஸேன பாதிமோக்க²ஸீலம் ஸமாதி³ன்னம் நாம ஹோதி, தஸ்மிம் பாதிமோக்கே² டி²தஸ்ஸ ததோ பரம் உபவாதூ³பகா⁴தானம் அகரணவஸேன ஸம்வரோ, ஸோ அனூபவாதோ³ அனூபகா⁴தோ சாதி வுத்தோ.

அத² வா பாதிமோக்கே²தி நிப்பா²தே³தப்³பே³ பு⁴ம்மம் யதா² ‘‘சேதஸோ அவூபஸமோ அயோனிஸோமனஸிகாரபத³ட்டா²ன’’ந்தி (ஸம். நி. 5.232). தேன பாதிமோக்கே²ன ஸாதே⁴தப்³போ³ அனூபவாதோ³ அனூபகா⁴தோ, பாதிமோக்க²ஸம்வரஸங்க³ஹிதோ அனூபவாதோ³ அனூபகா⁴தோஇச்சேவ அத்தோ². ஸம்வரோதி இமினா பன ஸதிஸம்வரோ, ஞாணஸம்வரோ, க²ந்திஸம்வரோ, வீரியஸம்வரோதி இமேஸம் சதுன்னம் ஸம்வரானம் க³ஹணம், பாதிமோக்க²ஸாத⁴னம் இத³ம் ஸம்வரசதுக்கம்.

மத்தஞ்ஞுதா ச ப⁴த்தஸ்மிந்தி பரியேஸனபடிக்³க³ஹணபரிபோ⁴க³விஸ்ஸஜ்ஜனானம் வஸேன போ⁴ஜனே பமாணஞ்ஞுதா. பந்தஞ்ச ஸயனாஸனந்தி பா⁴வனானுகூலம் அரஞ்ஞருக்க²மூலாதி³விவித்தஸேனாஸனம். அதி⁴சித்தே ச ஆயோகோ³தி ஸப்³ப³சித்தானம் அதி⁴கத்தா உத்தமத்தா அதி⁴சித்தஸங்கா²தே அரஹத்தப²லசித்தே ஸாதே⁴தப்³பே³ தஸ்ஸ நிப்பா²த³னத்த²ம் ஸமத²விபஸ்ஸனாபா⁴வனாவஸேன ஆயோகோ³. ஏதம் பு³த்³தா⁴ன ஸாஸனந்தி ஏதம் பரஸ்ஸ அனூபவத³னம், அனூபகா⁴தனம், பாதிமோக்க²ஸம்வரோ, பரியேஸனபடிக்³க³ஹணாதீ³ஸு மத்தஞ்ஞுதா, விவித்தவாஸோ, யதா²வுத்தஅதி⁴சித்தானுயோகோ³ ச பு³த்³தா⁴னம் ஸாஸனம் ஓவாதோ³ அனுஸிட்டீ²தி அத்தோ². ஏவம் இமாய கா³தா²ய திஸ்ஸோ ஸிக்கா² கதி²தாதி வேதி³தப்³பா³.

ச²ட்ட²ஸுத்தவண்ணனா நிட்டி²தா.

7. ஸாரிபுத்தஸுத்தவண்ணனா

37. ஸத்தமே அபுப்³ப³ம் நத்தி². கா³தா²ய அதி⁴சேதஸோதி அதி⁴சித்தவதோ, ஸப்³ப³சித்தானம் அதி⁴கேன அரஹத்தப²லசித்தேன ஸமன்னாக³தஸ்ஸாதி அத்தோ². அப்பமஜ்ஜதோதி ந பமஜ்ஜதோ, அப்பமாதே³ன அனவஜ்ஜத⁴ம்மேஸு ஸாதச்சகிரியாய ஸமன்னாக³தஸ்ஸாதி வுத்தம் ஹோதி. முனினோதி ‘‘யோ முனாதி உபோ⁴ லோகே, முனி தேன பவுச்சதீ’’தி (த⁴. ப. 269; சூளனி. மேத்தகூ³மாணவபுச்சா²னித்³தே³ஸ 21) ஏவம் உப⁴யலோகமுனனேன மோனம் வுச்சதி ஞாணம், தேன அரஹத்தப²லஞாணஸங்கா²தேன ஞாணேன ஸமன்னாக³தத்தா வா கீ²ணாஸவோ முனி நாம, தஸ்ஸ முனினோ. மோனபதே²ஸு ஸிக்க²தோதி அரஹத்தஞாணஸங்கா²தஸ்ஸ மோனஸ்ஸ பதே²ஸு ஸத்ததிம்ஸபோ³தி⁴பக்கி²யத⁴ம்மேஸு தீஸு வா ஸிக்கா²ஸு ஸிக்க²தோ. இத³ஞ்ச புப்³ப³பா⁴க³ப்படிபத³ம் க³ஹேத்வா வுத்தம். பரினிட்டி²தஸிக்கோ² ஹி அரஹா, தஸ்மா ஏவம் ஸிக்க²தோ, இமாய ஸிக்கா²ய முனிபா⁴வம் பத்தஸ்ஸ முனினோதி ஏவமேத்த² அத்தோ² த³ட்ட²ப்³போ³. யஸ்மா ச ஏததே³வ, தஸ்மா ஹேட்டி²மமக்³க³ப²லசித்தானம் வஸேன அதி⁴சேதஸோ, சதுஸச்சஸம்போ³த⁴படிபத்தியம் அப்பமாத³வஸேன அப்பமஜ்ஜதோ, மக்³க³ஞாணஸமன்னாக³மேன முனினோதி ஏவமேதேஸம் திண்ணம் பதா³னம் அத்தோ² யுஜ்ஜதியேவ. அத² வா ‘‘அப்பமஜ்ஜதோ ஸிக்க²தோ’’தி பதா³னம் ஹேதுஅத்த²தா த³ட்ட²ப்³பா³ அப்பமஜ்ஜனஹேது ஸிக்க²னஹேது ச அதி⁴சேதஸோதி.

ஸோகா ந ப⁴வந்தி தாதி³னோதி தாதி³ஸஸ்ஸ கீ²ணாஸவமுனினோ அப்³ப⁴ந்தரே இட்ட²வியோகா³தி³வத்து²கா ஸோகா சித்தஸந்தாபா ந ஹோந்தி. அத² வா தாதி³னோதி தாதி³லக்க²ணஸமன்னாக³தஸ்ஸ ஏவரூபஸ்ஸ முனினோ ஸோகா ந ப⁴வந்தீதி அயமேத்த² அத்தோ². உபஸந்தஸ்ஸாதி ராகா³தீ³னம் அச்சந்தூபஸமேன உபஸந்தஸ்ஸ. ஸதா³ ஸதீமதோதி ஸதிவேபுல்லப்பத்தியா நிச்சகாலம் ஸதியா அவிரஹிதஸ்ஸ.

ஏத்த² ச ‘‘அதி⁴சேதஸோ’’தி இமினா அதி⁴சித்தஸிக்கா², ‘‘அப்பமஜ்ஜதோ’’தி ஏதேன அதி⁴ஸீலஸிக்கா², ‘‘முனினோ மோனபதே²ஸு ஸிக்க²தோ’’தி ஏதேஹி அதி⁴பஞ்ஞாஸிக்கா². ‘‘முனினோ’’தி வா ஏதேன அதி⁴பஞ்ஞாஸிக்கா², ‘‘மோனபதே²ஸு ஸிக்க²தோ’’தி ஏதேன தாஸம் லோகுத்தரஸிக்கா²னம் புப்³ப³பா⁴க³படிபதா³, ‘‘ஸோகா ந ப⁴வந்தீ’’திஆதீ³ஹி ஸிக்கா²பாரிபூரியா ஆனிஸம்ஸோ பகாஸிதோதி வேதி³தப்³ப³ம். ஸேஸம் வுத்தனயமேவ.

ஸத்தமஸுத்தவண்ணனா நிட்டி²தா.

8. ஸுந்த³ரீஸுத்தவண்ணனா

38. அட்ட²மே ஸக்கதோதிஆதீ³னம் பதா³னம் அத்தோ² ஹேட்டா² வண்ணிதோயேவ. அஸஹமானாதி ந ஸஹமானா, உஸூயந்தாதி அத்தோ². பி⁴க்கு²ஸங்க⁴ஸ்ஸ ச ஸக்காரம் அஸஹமானாதி ஸம்ப³ந்தோ⁴.