6. பிண்டோ³லஸுத்தவண்ணனா

36. ச²ட்டே² பிண்டோ³லபா⁴ரத்³வாஜோதி பிண்ட³ம் உலமானோ பரியேஸமானோ பப்³ப³ஜிதோதி பிண்டோ³லோ. ஸோ கிர பரிஜிண்ணபோ⁴கோ³ ப்³ராஹ்மணோ ஹுத்வா மஹந்தம் பி⁴க்கு²ஸங்க⁴ஸ்ஸ லாப⁴ஸக்காரம் தி³ஸ்வா பிண்ட³த்தா²ய நிக்க²மித்வா பப்³ப³ஜிதோ. ஸோ மஹந்தம் கபல்லம் ‘‘பத்த’’ந்தி க³ஹேத்வா சரதி, கபல்லபூரம் யாகு³ம் பிவதி, ப⁴த்தம் பு⁴ஞ்ஜதி, பூவக²ஜ்ஜகஞ்ச கா²த³தி. அத²ஸ்ஸ மஹக்³க⁴ஸபா⁴வம் ஸத்து² ஆரோசேஸும். ஸத்தா² தஸ்ஸ பத்தத்த²விகம் நானுஜானி, ஹேட்டா²மஞ்சே பத்தம் நிக்குஜ்ஜித்வா ட²பேதி, ஸோ ட²பேந்தோபி க⁴ம்ஸேந்தோவ பணாமேத்வா ட²பேதி, க³ண்ஹந்தோபி க⁴ம்ஸேந்தோவ ஆகட்³டி⁴த்வா க³ண்ஹாதி. தம் க³ச்ச²ந்தே க³ச்ச²ந்தே காலே க⁴ம்ஸனேன பரிக்கீ²ணம், நாளிகோத³னமத்தஸ்ஸேவ க³ண்ஹனகம் ஜாதம். ததோ ஸத்து² ஆரோசேஸும், அத²ஸ்ஸ ஸத்தா² பத்தத்த²விகம் அனுஜானி. தே²ரோ அபரேன ஸமயேன இந்த்³ரியபா⁴வனம் பா⁴வேந்தோ அக்³க³ப²லே அரஹத்தே பதிட்டா²ஸி. இதி ஸோ புப்³பே³ ஸவிஸேஸம் பிண்ட³த்தா²ய உலதீதி பிண்டோ³லோ, கோ³த்தேன பன பா⁴ரத்³வாஜோதி உப⁴யம் ஏகதோ கத்வா ‘‘பிண்டோ³லபா⁴ரத்³வாஜோ’’தி வுச்சதி.

ஆரஞ்ஞகோதி கா³மந்தஸேனாஸனபடிக்கி²பனேன அரஞ்ஞே நிவாஸோ அஸ்ஸாதி ஆரஞ்ஞகோ, ஆரஞ்ஞகது⁴தங்க³ம் ஸமாதா³ய வத்தந்தஸ்ஸேதம் நாமம். ததா² பி⁴க்கா²ஸங்கா²தானம் ஆமிஸபிண்டா³னம் பாதோ பிண்ட³பாதோ, பரேஹி தி³ன்னானம் பிண்டா³னம் பத்தே நிபதனந்தி அத்தோ². பிண்ட³பாதம் உஞ்ச²தி தம் தம் குலம் உபஸங்கமந்தோ க³வேஸதீதி பிண்ட³பாதிகோ, பிண்டா³ய வா பதிதும் சரிதும் வதமேதஸ்ஸாதி பிண்ட³பாதீ, பிண்ட³பாதீயேவ பிண்ட³பாதிகோ. ஸங்காரகூடாதீ³ஸு பம்ஸூனம் உபரி டி²தத்தா அப்³பு⁴க்³க³தட்டே²ன பம்ஸுகூலம் வியாதி பம்ஸுகூலம், பம்ஸு விய வா குச்சி²தபா⁴வம் உலதி க³ச்ச²தீதி பம்ஸுகூலம், பம்ஸுகூலஸ்ஸ தா⁴ரணம் பம்ஸுகூலம், தம் ஸீலம் ஏதஸ்ஸாதி பம்ஸுகூலிகோ. ஸங்கா⁴டிஉத்தராஸங்க³அந்தரவாஸகஸங்கா²தானி தீணி சீவரானி திசீவரம், திசீவரஸ்ஸ தா⁴ரணம் திசீவரம், தம் ஸீலம் ஏதஸ்ஸாதி தேசீவரிகோ. அப்பிச்சோ²திஆதீ³னம் பதா³னம் அத்தோ² ஹேட்டா² வுத்தோயேவ.

து⁴தவாதோ³தி து⁴தோ வுச்சதி து⁴தகிலேஸோ புக்³க³லோ, கிலேஸது⁴னனகத⁴ம்மோ வா. தத்த² அத்தி² து⁴தோ, ந து⁴தவாதோ³, அத்தி² ந து⁴தோ, து⁴தவாதோ³, அத்தி² நேவ து⁴தோ, ந து⁴தவாதோ³, அத்தி² து⁴தோ சேவ, து⁴தவாதோ³ சாதி இத³ம் சதுக்கம் வேதி³தப்³ப³ம். தேஸு யோ ஸயம் து⁴தத⁴ம்மே ஸமாதா³ய வத்ததி, ந பரம் தத³த்தா²ய ஸமாத³பேதி, அயம் பட²மோ. யோ பன ஸயம் ந து⁴தத⁴ம்மே ஸமாதா³ய வத்ததி, பரம் ஸமாத³பேதி, அயம் து³தியோ. யோ உப⁴யரஹிதோ, அயம் ததியோ. யோ பன உப⁴யஸம்பன்னோ, அயம் சதுத்தோ². ஏவரூபோ ச ஆயஸ்மா பிண்டோ³லபா⁴ரத்³வாஜோதி. தேன வுத்தம் ‘‘து⁴தவாதோ³’’தி. ஏகதே³ஸஸரூபேகஸேஸவஸேன ஹி அயம் நித்³தே³ஸோ யதா² தம் ‘‘நாமரூப’’ந்தி.

அதி⁴சித்தமனுயுத்தோதி ஏத்த² அட்ட²ஸமாபத்திஸம்பயோக³தோ அரஹத்தப²லஸமாபத்திஸம்பயோக³தோ வா சித்தஸ்ஸ அதி⁴சித்தபா⁴வோ வேதி³தப்³போ³, இத⁴ பன ‘‘அரஹத்தப²லசித்த’’ந்தி வத³ந்தி. தம்தம்ஸமாபத்தீஸு ஸமாதி⁴ ஏவ அதி⁴சித்தம், இத⁴ பன அரஹத்தப²லஸமாதி⁴ வேதி³தப்³போ³. கேசி பன ‘‘அதி⁴சித்தமனுயுத்தேன, பி⁴க்க²வே, பி⁴க்கு²னா காலேன காலம் தீணி நிமித்தானி மனஸி காதப்³பா³னீதி ஏதஸ்மிம் அதி⁴சித்தஸுத்தே (அ. நி. 3.103) விய ஸமத²விபஸ்ஸனாசித்தம் அதி⁴சித்தந்தி இதா⁴தி⁴ப்பேத’’ந்தி வத³ந்தி, தம் ந ஸுந்த³ரம். புரிமோயேவத்தோ² க³ஹேதப்³போ³.

ஏதமத்த²ம் விதி³த்வாதி ஏதம் ஆயஸ்மதோ பிண்டோ³லபா⁴ரத்³வாஜஸ்ஸ அதி⁴ட்டா²னபரிக்கா²ரஸம்பதா³ஸம்பன்னம் அதி⁴சித்தானுயோக³ஸங்கா²தம் அத்த²ம் ஸப்³பா³காரதோ விதி³த்வா. ஏவம் ‘‘அதி⁴சித்தானுயோகோ³ மம ஸாஸனானுட்டா²ன’’ந்தி தீ³பேந்தோ இமம் உதா³னம் உதா³னேஸி.

தத்த² அனூபவாதோ³தி வாசாய கஸ்ஸசிபி அனுபவத³னம். அனூபகா⁴தோதி காயேன கஸ்ஸசி உபகா⁴தாகரணம். பாதிமோக்கே²தி ஏத்த² பாதிமோக்க²பத³ஸ்ஸ அத்தோ² ஹேட்டா² நானப்பகாரேஹி வுத்தோ, தஸ்மிம் பாதிமோக்கே². ஸத்தன்னம் ஆபத்திக்க²ந்தா⁴னம் அவீதிக்கமலக்க²ணோ ஸம்வரோ. மத்தஞ்ஞுதாதி படிக்³க³ஹணபரிபோ⁴க³வஸேன பமாணஞ்ஞுதா. பந்தஞ்ச ஸயனாஸனந்தி விவித்தம் ஸங்க⁴ட்டனவிரஹிதம் ஸேனாஸனம். அதி⁴சித்தே ச ஆயோகோ³தி அட்ட²ன்னம் ஸமாபத்தீனம் அதி⁴க³மாய பா⁴வனானுயோகோ³.

அபரோ நயோ – அனூபவாதோ³தி கஸ்ஸசிபி உபருஜ்ஜ²னவசனஸ்ஸ அவத³னம். தேன ஸப்³ப³ம்பி வாசஸிகம் ஸீலம் ஸங்க³ண்ஹாதி. அனூபகா⁴தோதி காயேன கஸ்ஸசி உபகா⁴தஸ்ஸ பரவிஹேட²னஸ்ஸ அகரணம். தேன ஸப்³ப³ம்பி காயிகம் ஸீலம் ஸங்க³ண்ஹாதி. யாதி³ஸம் பனித³ம் உப⁴யம் பு³த்³தா⁴னம் ஸாஸனந்தோக³த⁴ம் ஹோதி, தம் த³ஸ்ஸேதும் – ‘‘பாதிமோக்கே² ச ஸம்வரோ’’தி வுத்தம். சஸத்³தோ³ நிபாதமத்தம். பாதிமோக்கே² ச ஸம்வரோதி பாதிமோக்க²ஸம்வரபூ⁴தோ அனூபவாதோ³ அனூபகா⁴தோ சாதி அத்தோ².

அத² வா பாதிமோக்கே²தி அதி⁴கரணே பு⁴ம்மம். பாதிமோக்கே² நிஸ்ஸயபூ⁴தே ஸம்வரோ. கோ பன ஸோதி? அனூபவாதோ³ அனூபகா⁴தோ. உபஸம்பத³வேலாயஞ்ஹி அவிஸேஸேன பாதிமோக்க²ஸீலம் ஸமாதி³ன்னம் நாம ஹோதி, தஸ்மிம் பாதிமோக்கே² டி²தஸ்ஸ ததோ பரம் உபவாதூ³பகா⁴தானம் அகரணவஸேன ஸம்வரோ, ஸோ அனூபவாதோ³ அனூபகா⁴தோ சாதி வுத்தோ.

அத² வா பாதிமோக்கே²தி நிப்பா²தே³தப்³பே³ பு⁴ம்மம் யதா² ‘‘சேதஸோ அவூபஸமோ அயோனிஸோமனஸிகாரபத³ட்டா²ன’’ந்தி (ஸம். நி. 5.232). தேன பாதிமோக்கே²ன ஸாதே⁴தப்³போ³ அனூபவாதோ³ அனூபகா⁴தோ, பாதிமோக்க²ஸம்வரஸங்க³ஹிதோ அனூபவாதோ³ அனூபகா⁴தோஇச்சேவ அத்தோ². ஸம்வரோதி இமினா பன ஸதிஸம்வரோ, ஞாணஸம்வரோ, க²ந்திஸம்வரோ, வீரியஸம்வரோதி இமேஸம் சதுன்னம் ஸம்வரானம் க³ஹணம், பாதிமோக்க²ஸாத⁴னம் இத³ம் ஸம்வரசதுக்கம்.

மத்தஞ்ஞுதா ச ப⁴த்தஸ்மிந்தி பரியேஸனபடிக்³க³ஹணபரிபோ⁴க³விஸ்ஸஜ்ஜனானம் வஸேன போ⁴ஜனே பமாணஞ்ஞுதா. பந்தஞ்ச ஸயனாஸனந்தி பா⁴வனானுகூலம் அரஞ்ஞருக்க²மூலாதி³விவித்தஸேனாஸனம். அதி⁴சித்தே ச ஆயோகோ³தி ஸப்³ப³சித்தானம் அதி⁴கத்தா உத்தமத்தா அதி⁴சித்தஸங்கா²தே அரஹத்தப²லசித்தே ஸாதே⁴தப்³பே³ தஸ்ஸ நிப்பா²த³னத்த²ம் ஸமத²விபஸ்ஸனாபா⁴வனாவஸேன ஆயோகோ³. ஏதம் பு³த்³தா⁴ன ஸாஸனந்தி ஏதம் பரஸ்ஸ அனூபவத³னம், அனூபகா⁴தனம், பாதிமோக்க²ஸம்வரோ, பரியேஸனபடிக்³க³ஹணாதீ³ஸு மத்தஞ்ஞுதா, விவித்தவாஸோ, யதா²வுத்தஅதி⁴சித்தானுயோகோ³ ச பு³த்³தா⁴னம் ஸாஸனம் ஓவாதோ³ அனுஸிட்டீ²தி அத்தோ². ஏவம் இமாய கா³தா²ய திஸ்ஸோ ஸிக்கா² கதி²தாதி வேதி³தப்³பா³.

ச²ட்ட²ஸுத்தவண்ணனா நிட்டி²தா.