2. நந்த³ஸுத்தவண்ணனா

22. து³தியே நந்தோ³தி தஸ்ஸ நாமம். ஸோ ஹி சக்கவத்திலக்க²ணூபேதத்தா மாதாபிதரோ ஸபரிஜனம் ஸகலஞ்ச ஞாதிபரிவட்டம் நந்த³யந்தோ ஜாதோதி ‘‘நந்தோ³’’தி நாமம் லபி⁴. ப⁴க³வதோ பா⁴தாதி ப⁴க³வதோ ஏகபிதுபுத்ததாய பா⁴தா. ந ஹி ப⁴க³வதோ ஸஹோத³ரா உப்பஜ்ஜந்தி, தேன வுத்தம் ‘‘மாதுச்சா²புத்தோ’’தி, சூளமாதுபுத்தோதி அத்தோ². மஹாபஜாபதிகோ³தமியா ஹி ஸோ புத்தோ. அனபி⁴ரதோதி ந அபி⁴ரதோ. ப்³ரஹ்மசரியந்தி ப்³ரஹ்மம் ஸேட்ட²ம் உத்தமம் சரியம் ஏகாஸனம் ஏகஸேய்யம் மேது²னவிரதிம். ஸந்தா⁴ரேதுந்தி பட²மசித்ததோ யாவசரிமகசித்தம் ஸம்மா பரிபுண்ணம் பரிஸுத்³த⁴ம் தா⁴ரேதும் பவத்தேதும். து³தியேன சேத்த² ப்³ரஹ்மசரியபதே³ன மக்³க³ப்³ரஹ்மசரியஸ்ஸாபி ஸங்க³ஹோ வேதி³தப்³போ³. ஸிக்க²ம் பச்சக்கா²யாதி உபஸம்பத³காலே பி⁴க்கு²பா⁴வேன ஸத்³தி⁴ம் ஸமாதி³ன்னம் நிப்³ப³த்தேதப்³ப³பா⁴வேன அனுட்டி²தம் திவித⁴ம்பி ஸிக்க²ம் படிக்கி²பித்வா, விஸ்ஸஜ்ஜேத்வாதி அத்தோ². ஹீனாயாதி கி³ஹிபா⁴வாய. ஆவத்திஸ்ஸாமீதி நிவத்திஸ்ஸாமி.

கஸ்மா பனாயம் ஏவமாரோசேஸீதி? ஏத்தா²யம் அனுபுப்³பி³கதா² – ப⁴க³வா பவத்தவரத⁴ம்மசக்கோ ராஜக³ஹம் க³ந்த்வா வேளுவனே விஹரந்தோ ‘‘புத்தம் மே ஆனேத்வா த³ஸ்ஸேதா²’’தி ஸுத்³தோ⁴த³னமஹாராஜேன பேஸிதேஸு ஸஹஸ்ஸஸஹஸ்ஸபரிவாரேஸு த³ஸஸு தூ³தேஸு ஸஹ பரிவாரேன அரஹத்தம் பத்தேஸு ஸப்³ப³பச்சா² க³ந்த்வா அரஹத்தப்பத்தேன காளுதா³யித்தே²ரேன க³மனகாலம் ஞத்வா மக்³க³வண்ணனம் வண்ணேத்வா ஜாதிபூ⁴மிக³மனாய யாசிதோ வீஸதிஸஹஸ்ஸகீ²ணாஸவபரிவுத்தோ கபிலவத்து²னக³ரம் க³ந்த்வா ஞாதிஸமாக³மே போக்க²ரவஸ்ஸம் அட்டு²ப்பத்திம் கத்வா வேஸ்ஸந்தரஜாதகம் (ஜா. 2.22.1655 ஆத³யோ) கதே²த்வா புனதி³வஸே பிண்டா³ய பவிட்டோ² ‘‘உத்திட்டே² நப்பமஜ்ஜேய்யா’’தி (த⁴. ப. 168) கா³தா²ய பிதரம் ஸோதாபத்திப²லே பதிட்டா²பேத்வா நிவேஸனம் க³ந்த்வா ‘‘த⁴ம்மஞ்சரே’’தி (த⁴. ப. 169) கா³தா²ய மஹாபஜாபதிம் ஸோதாபத்திப²லே, ராஜானம் ஸகதா³கா³மிப²லே பதிட்டா²பேஸி.

ப⁴த்தகிச்சாவஸானே பன ராஹுலமாதுகு³ணகத²ம் நிஸ்ஸாய சந்த³கின்னரீஜாதகம் (ஜா. 1.14.18 ஆத³யோ) கதே²த்வா ததியதி³வஸே நந்த³குமாரஸ்ஸ அபி⁴ஸேககே³ஹப்பவேஸனவிவாஹமங்க³லேஸு வத்தமானேஸு பிண்டா³ய பவிஸித்வா நந்த³குமாரஸ்ஸ ஹத்தே² பத்தம் த³த்வா மங்க³லம் வத்வா உட்டா²யாஸனா பக்கமந்தோ குமாரஸ்ஸ ஹத்த²தோ பத்தம் ந க³ண்ஹி. ஸோபி ததா²க³தே கா³ரவேன ‘‘பத்தம் தே, ப⁴ந்தே, க³ண்ஹதா²’’தி வத்தும் நாஸக்கி². ஏவம் பன சிந்தேஸி, ‘‘ஸோபானஸீஸே பத்தம் க³ண்ஹிஸ்ஸதீ’’தி, ஸத்தா² தஸ்மிம் டா²னே ந க³ண்ஹி. இதரோ ‘‘ஸோபானமூலே க³ண்ஹிஸ்ஸதீ’’தி சிந்தேஸி, ஸத்தா² தத்த²பி ந க³ண்ஹி. இதரோ ‘‘ராஜங்க³ணே க³ண்ஹிஸ்ஸதீ’’தி சிந்தேஸி, ஸத்தா² தத்த²பி ந க³ண்ஹி. குமாரோ நிவத்திதுகாமோ அனிச்சா²ய க³ச்ச²ந்தோ கா³ரவேன ‘‘பத்தம் க³ண்ஹதா²’’தி வத்தும் ந ஸக்கோதி, ‘‘இத⁴ க³ண்ஹிஸ்ஸதி, ஏத்த² க³ண்ஹிஸ்ஸதீ’’தி சிந்தேந்தோ க³ச்ச²தி.

தஸ்மிம் க²ணே ஜனபத³கல்யாணியா ஆசிக்கி²ம்ஸு, ‘‘அய்யே ப⁴க³வா, நந்த³ராஜானம் க³ஹேத்வா க³ச்ச²தி, தும்ஹேஹி வினா கரிஸ்ஸதீ’’தி. ஸா உத³கபி³ந்தூ³ஹி பக்³க⁴ரந்தேஹி அட்³டு⁴ல்லிகி²தேஹி கேஸேஹி வேகே³ன பாஸாத³ம் ஆருய்ஹ ஸீஹபஞ்ஜரத்³வாரே ட²த்வா ‘‘துவடம் கோ², அய்யபுத்த, ஆக³ச்சே²ய்யாஸீ’’தி ஆஹ. தம் தஸ்ஸா வசனம் தஸ்ஸ ஹத³யே திரியம் பதித்வா விய டி²தம். ஸத்தா²பிஸ்ஸ ஹத்த²தோ பத்தம் அக்³க³ஹேத்வாவ தம் விஹாரம் நேத்வா ‘‘பப்³ப³ஜிஸ்ஸஸி நந்தா³’’தி ஆஹ. ஸோ பு³த்³த⁴கா³ரவேன ‘‘ந பப்³ப³ஜிஸ்ஸாமீ’’தி அவத்வா, ‘‘ஆம, பப்³ப³ஜிஸ்ஸாமீ’’தி ஆஹ. ஸத்தா² தேன ஹி நந்த³ம் பப்³பா³ஜேதா²தி கபிலவத்து²புரம் க³ந்த்வா ததியதி³வஸே தம் பப்³பா³ஜேஸி. ஸத்தமே தி³வஸே மாதரா அலங்கரித்வா பேஸிதம் ‘‘தா³யஜ்ஜம் மே, ஸமண, தே³ஹீ’’தி வத்வா அத்தனா ஸத்³தி⁴ம் ஆராமாக³தம் ராஹுலகுமாரம் பப்³பா³ஜேஸி. புனேகதி³வஸம் மஹாத⁴ம்மபாலஜாதகம் (ஜா. 1.10.92 ஆத³யோ) கதே²த்வா ராஜானம் அனாகா³மிப²லே பதிட்டா²பேஸி.

இதி ப⁴க³வா மஹாபஜாபதிம் ஸோதாபத்திப²லே, பிதரம் தீஸு ப²லேஸு பதிட்டா²பேத்வா பி⁴க்கு²ஸங்க⁴பரிவுதோ புனதே³வ ராஜக³ஹம் க³ந்த்வா ததோ அனாத²பிண்டி³கேன ஸாவத்தி²ம் ஆக³மனத்தா²ய க³ஹிதபடிஞ்ஞோ நிட்டி²தே ஜேதவனமஹாவிஹாரே தத்த² க³ந்த்வா வாஸம் கப்பேஸி. ஏவம் ஸத்த²ரி ஜேதவனே விஹரந்தே ஆயஸ்மா நந்தோ³ அத்தனோ அனிச்சா²ய பப்³ப³ஜிதோ காமேஸு அனாதீ³னவத³ஸ்ஸாவீ ஜனபத³கல்யாணியா வுத்தவசனமனுஸ்ஸரந்தோ உக்கண்டி²தோ ஹுத்வா பி⁴க்கூ²னம் அத்தனோ அனபி⁴ரதிம் ஆரோசேஸி. தேன வுத்தம் ‘‘தேன கோ² பன ஸமயேன ஆயஸ்மா நந்தோ³…பே… ஹீனாயாவத்திஸ்ஸாமீ’’தி.

கஸ்மா பன நம் ப⁴க³வா ஏவம் பப்³பா³ஜேஸீதி? ‘‘புரேதரமேவ ஆதீ³னவம் த³ஸ்ஸேத்வா காமேஹி நம் விவேசேதும் ந ஸக்கா, பப்³பா³ஜேத்வா பன உபாயேன ததோ விவேசேத்வா உபரிவிஸேஸம் நிப்³ப³த்தேஸ்ஸாமீ’’தி வேனேய்யத³மனகுஸலோ ஸத்தா² ஏவம் நம் பட²மம் பப்³பா³ஜேஸி.

ஸாகியானீதி ஸக்யராஜதீ⁴தா. ஜனபத³கல்யாணீதி ஜனபத³ம்ஹி கல்யாணீ ரூபேன உத்தமா ச²ஸரீரதோ³ஸரஹிதா, பஞ்சகல்யாணஸமன்னாக³தா. ஸா ஹி யஸ்மா நாதிதீ³கா⁴ நாதிரஸ்ஸா நாதிகிஸா நாதிதூ²லா நாதிகாளிகா நச்சோதா³தா அதிக்கந்தா மானுஸகவண்ணம் அப்பத்தா தி³ப்³ப³வண்ணம், தஸ்மா ச²ஸரீரதோ³ஸரஹிதா. ச²விகல்யாணம் மம்ஸகல்யாணம் நக²கல்யாணம் அட்டி²கல்யாணம் வயகல்யாணந்தி இமேஹி பஞ்சஹி கல்யாணேஹி ஸமன்னாக³தா.

தத்த² அத்தனோ ஸரீரோபா⁴ஸேன த³ஸத்³வாத³ஸஹத்தே² டா²னே ஆலோகம் கரோதி, பியங்கு³ஸமா வா ஸுவண்ணஸமா வா ஹோதி, அயமஸ்ஸா ச²விகல்யாணதா. சத்தாரோ பனஸ்ஸா ஹத்த²பாதா³ முக²பரியோஸானஞ்ச லாகா²ரஸபரிகம்மகதம் விய ரத்தபவாளரத்தகம்ப³லேன ஸதி³ஸம் ஹோதி, அயமஸ்ஸா மம்ஸகல்யாணதா. வீஸதி நக²பத்தானி மம்ஸதோ அமுத்தட்டா²னே லாகா²ரஸபரிகிதானி விய முத்தட்டா²னே கீ²ரதா⁴ராஸதி³ஸானி ஹோந்தி, அயமஸ்ஸா நக²கல்யாணதா. த்³வத்திம்ஸத³ந்தா ஸுபு²ஸிதா பரிஸுத்³த⁴பவாளபந்திஸதி³ஸா வஜிரபந்தீ விய கா²யந்தி, அயமஸ்ஸா அட்டி²கல்யாணதா. வீஸதிவஸ்ஸஸதிகாபி ஸமானா ஸோளஸவஸ்ஸுத்³தே³ஸிகா விய ஹோதி நிப்பலிதா, அயமஸ்ஸா வயகல்யாணதா. ஸுந்த³ரீ ச ஹோதி ஏவரூபகு³ணஸமன்னாக³தா, தேன வுத்தம் ‘‘ஜனபத³கல்யாணீ’’தி.

க⁴ரா நிக்க²மந்தஸ்ஸாதி அனாத³ரே ஸாமிவசனம், க⁴ரதோ நிக்க²மதோதி அத்தோ². ‘‘க⁴ரா நிக்க²மந்த’’ந்திபி பட²ந்தி. உபட்³டு⁴ல்லிகி²தேஹி கேஸேஹீதி இத்த²ம்பூ⁴தலக்க²ணே கரணவசனம், விப்பகதுல்லிகி²தேஹி கேஸேஹி உபலக்கி²தாதி அத்தோ². ‘‘அட்³டு⁴ல்லிகி²தேஹீ’’திபி பட²ந்தி. உல்லிக²னந்தி ச ப²ணகாதீ³ஹி கேஸஸண்டா²பனம், ‘‘அட்³ட⁴காரவிதா⁴ன’’ந்திபி வத³ந்தி. அபலோகேத்வாதி ஸினேஹரஸவிப்பா²ரஸம்ஸூசகேன அட்³ட⁴க்கி²னா ஆப³ந்த⁴ந்தீ விய ஓலோகேத்வா. மம், ப⁴ந்தேதி புப்³பே³பி ‘‘ம’’ந்தி வத்வா உக்கண்டா²குலசித்ததாய புன ‘‘மம் ஏதத³வோசா’’தி ஆஹ. துவடந்தி ஸீக⁴ம். தமனுஸ்ஸரமானோதி தம் தஸ்ஸா வசனம், தம் வா தஸ்ஸா ஆகாரஸஹிதம் வசனம் அனுஸ்ஸரந்தோ.

ப⁴க³வா தஸ்ஸ வசனம் ஸுத்வா ‘‘உபாயேனஸ்ஸ ராக³ம் வூபஸமேஸ்ஸாமீ’’தி இத்³தி⁴ப³லேன நம் தாவதிம்ஸப⁴வனம் நேந்தோ அந்தராமக்³கே³ ஏகஸ்மிம் ஜா²மகே²த்தே ஜா²மகா²ணுமத்த²கே நிஸின்னம் சி²ன்னகண்ணனாஸானங்கு³ட்ட²ம் ஏகம் பலுட்ட²மக்கடிம் த³ஸ்ஸேத்வா தாவதிம்ஸப⁴வனம் நேஸி. பாளியம் பன ஏகக்க²ணேனேவ ஸத்தா²ரா தாவதிம்ஸப⁴வனம் க³தம் விய வுத்தம், தம் க³மனம் அவத்வா தாவதிம்ஸப⁴வனம் ஸந்தா⁴ய வுத்தம். க³ச்ச²ந்தோயேவ ஹி ப⁴க³வா ஆயஸ்மதோ நந்த³ஸ்ஸ அந்தராமக்³கே³ தம் பலுட்ட²மக்கடிம் த³ஸ்ஸேதி. யதி³ ஏவம் கத²ம் ஸமிஞ்ஜனாதி³னித³ஸ்ஸனம்? தம் அந்தரதா⁴னனித³ஸ்ஸனந்தி க³ஹேதப்³ப³ம். ஏவம் ஸத்தா² தம் தாவதிம்ஸப⁴வனம் நேத்வா ஸக்கஸ்ஸ தே³வரஞ்ஞோ உபட்டா²னம் ஆக³தானி ககுடபாதா³னி பஞ்ச அச்ச²ராஸதானி அத்தானம் வந்தி³த்வா டி²தானி த³ஸ்ஸேத்வா ஜனபத³கல்யாணியா தாஸம் பஞ்சன்னம் அச்ச²ராஸதானம் ரூபஸம்பத்திம் படிச்ச விஸேஸம் புச்சி². தேன வுத்தம் – ‘‘அத² கோ² ப⁴க³வா ஆயஸ்மந்தம் நந்த³ம் பா³ஹாயம் க³ஹேத்வா…பே… ககுடபாதா³னீ’’தி.

தத்த² பா³ஹாயம் க³ஹேத்வாதி பா³ஹும்ஹி க³ஹேத்வா விய. ப⁴க³வா ஹி ததா³ தாதி³ஸம் இத்³தா⁴பி⁴ஸங்கா²ரம் அபி⁴ஸங்கா²ரேஸி, யதா² ஆயஸ்மா நந்தோ³ பு⁴ஜே க³ஹேத்வா ப⁴க³வதா நீயமானோ விய அஹோஸி. தத்த² ச ப⁴க³வதா ஸசே தஸ்ஸ ஆயஸ்மதோ தாவதிம்ஸதே³வலோகஸ்ஸ த³ஸ்ஸனம் பவேஸனமேவ வா இச்சி²தம் ஸியா, யதா²னிஸின்னஸ்ஸேவ தஸ்ஸ தம் தே³வலோகம் த³ஸ்ஸேய்ய லோகவிவரணித்³தி⁴காலே விய, தமேவ வா இத்³தி⁴யா தத்த² பேஸேய்ய. யஸ்மா பனஸ்ஸ தி³ப்³ப³த்தபா⁴வதோ மனுஸ்ஸத்தபா⁴வஸ்ஸ யோ நிஹீனஜிகு³ச்ச²னீயபா⁴வோ, தஸ்ஸ ஸுக²க்³க³ஹணத்த²ம் அந்தராமக்³கே³ தம் மக்கடிம் த³ஸ்ஸேதுகாமோ, தே³வலோகஸிரிவிப⁴வஸம்பத்தியோ ச ஓகா³ஹேத்வா த³ஸ்ஸேதுகாமோ அஹோஸி, தஸ்மா தம் க³ஹேத்வா தத்த² நேஸி. ஏவஞ்ஹிஸ்ஸ தத³த்த²ம் ப்³ரஹ்மசரியவாஸே விஸேஸதோ அபி⁴ரதி ப⁴விஸ்ஸதீதி.

ககுடபாதா³னீதி ரத்தவண்ணதாய பாராவதஸதி³ஸபாதா³னி. தா கிர ஸப்³பா³பி கஸ்ஸபஸ்ஸ ப⁴க³வதோ ஸாவகானம் பாத³மக்க²னதேலதா³னேன தாதி³ஸா ஸுகுமாரபாதா³ அஹேஸும். பஸ்ஸஸி நோதி பஸ்ஸஸி நு. அபி⁴ரூபதராதி விஸிட்ட²ரூபதரா. த³ஸ்ஸனீயதராதி தி³வஸம்பி பஸ்ஸந்தானம் அதித்திகரணட்டே²ன பஸ்ஸிதப்³ப³தரா. பாஸாதி³கதராதி ஸப்³பா³வயவஸோபா⁴ய ஸமந்ததோ பஸாதா³வஹதரா.

கஸ்மா பன ப⁴க³வா அவஸ்ஸுதசித்தம் ஆயஸ்மந்தம் நந்த³ம் அச்ச²ராயோ ஓலோகாபேஸி? ஸுகே²னேவஸ்ஸ கிலேஸே நீஹரிதும். யதா² ஹி குஸலோ வேஜ்ஜோ உஸ்ஸன்னதோ³ஸம் புக்³க³லம் திகிச்ச²ந்தோ ஸினேஹபானாதி³னா பட²மம் தோ³ஸே உக்கிலேதே³த்வா பச்சா² வமனவிரேசனேஹி ஸம்மதே³வ நீஹராபேதி, ஏவம் வினேய்யத³மனகுஸலோ ப⁴க³வா உஸ்ஸன்னராக³ம் ஆயஸ்மந்தம் நந்த³ம் தே³வச்ச²ராயோ த³ஸ்ஸேத்வா உக்கிலேதே³ஸி அரியமக்³க³பே⁴ஸஜ்ஜேன அனவஸேஸதோ நீஹரிதுகாமோதி வேதி³தப்³ப³ம்.

பலுட்ட²மக்கடீதி ஜா²மங்க³பச்சங்க³மக்கடீ. ஏவமேவ கோ²தி யதா² ஸா, ப⁴ந்தே, தும்ஹேஹி மய்ஹம் த³ஸ்ஸிதா சி²ன்னகண்ணனாஸா பலுட்ட²மக்கடீ ஜனபத³கல்யாணிம் உபாதா³ய, ஏவமேவ ஜனபத³கல்யாணீ இமானி பஞ்ச அச்ச²ராஸதானி உபாதா³யாதி அத்தோ². பஞ்சன்னம் அச்ச²ராஸதானந்தி உபயோகே³ ஸாமிவசனம், பஞ்ச அச்ச²ராஸதானீதி அத்தோ². அவயவஸம்ப³ந்தே⁴ வா ஏதம் ஸாமிவசனம், தேன பஞ்சன்னம் அச்ச²ராஸதானம் ரூபஸம்பத்திம் உபனிதா⁴யாதி அதி⁴ப்பாயோ. உபனிதா⁴யாதி ச ஸமீபே ட²பேத்வா, உபாதா³யாதி அத்தோ². ஸங்க்²யந்தி இத்தீ²தி க³ணனம். கலபா⁴க³ந்தி கலாயபி பா⁴க³ம், ஏகம் ஸோளஸகோட்டா²ஸே கத்வா ததோ ஏககோட்டா²ஸம் க³ஹேத்வா ஸோளஸதா⁴ க³ணிதே தத்த² யோ ஏகேகோ கோட்டா²ஸோ, ஸோ கலபா⁴கோ³தி அதி⁴ப்பேதோ, தம்பி கலபா⁴க³ம் ந உபேதீதி வத³தி. உபனிதி⁴ந்தி ‘‘இமாய அயம் ஸதி³ஸீ’’தி உபமாபா⁴வேன க³ஹேத்வா ஸமீபே ட²பனம்பி.

யத்தா²யம் அனபி⁴ரதோ, தம் ப்³ரஹ்மசரியம் புப்³பே³ வுத்தம் பாகடஞ்சாதி தம் அனாமஸித்வா தத்த² அபி⁴ரதியம் ஆத³ரஜனனத்த²ம் அபி⁴ரம, நந்த³, அபி⁴ரம, நந்தா³’’தி ஆமேடி³தவஸேன வுத்தம். அஹம் தே பாடிபோ⁴கோ³தி கஸ்மா ப⁴க³வா தஸ்ஸ ப்³ரஹ்மசரியவாஸம் இச்ச²ந்தோ அப்³ரஹ்மசரியவாஸஸ்ஸ பாடிபோ⁴க³ம் உபக³ஞ்சி²? யத்த²ஸ்ஸ ஆரம்மணே ராகோ³ த³ள்ஹம் நிபதி, தம் ஆக³ந்துகாரம்மணே ஸங்காமேத்வா ஸுகே²ன ஸக்கா ஜஹாபேதுந்தி பாடிபோ⁴க³ம் உபக³ஞ்சி². அனுபுப்³பி³கதா²யம் ஸக்³க³கதா² இமஸ்ஸ அத்த²ஸ்ஸ நித³ஸ்ஸனம்.

அஸ்ஸோஸுந்தி கத²மஸ்ஸோஸும்? ப⁴க³வா ஹி ததா³ ஆயஸ்மந்தே நந்தே³ வத்தம் த³ஸ்ஸேத்வா அத்தனோ தி³வாட்டா²னம் க³தே உபட்டா²னம் ஆக³தானம் பி⁴க்கூ²னம் தம் பவத்திம் கதே²த்வா யதா² நாம குஸலோ புரிஸோ அனிக்க²ந்தம் ஆணிம் அஞ்ஞாய ஆணியா நீஹரித்வா புன தம் ஹத்தா²தீ³ஹி ஸஞ்சாலேத்வா அபனேதி, ஏவமேவ ஆசிண்ணவிஸயே தஸ்ஸ ராக³ம் ஆக³ந்துகவிஸயேன நீஹரித்வா புன தத³பி ப்³ரஹ்மசரியமக்³க³ஹேதும் கத்வா அபனேதுகாமோ ‘‘ஏத² தும்ஹே, பி⁴க்க²வே, நந்த³ம் பி⁴க்கு²ம் ப⁴தகவாதே³ன ச உபக்கிதகவாதே³ன ச ஸமுதா³சரதா²’’தி ஆணாபேஸி, ஏவம் பி⁴க்கூ² அஸ்ஸோஸும். கேசி பன ‘‘ப⁴க³வா ததா²ரூபம் இத்³தா⁴பி⁴ஸங்கா²ரம் அபி⁴ஸங்கா²ரேஸி, யதா² தே பி⁴க்கூ² தமத்த²ம் ஜானிம்ஸூ’’தி வத³ந்தி.

ப⁴தகவாதே³னாதி ப⁴தகோதி வாதே³ன. யோ ஹி ப⁴தியா கம்மம் கரோதி, ஸோ ப⁴தகோதி வுச்சதி, அயம்பி ஆயஸ்மா அச்ச²ராஸம்போ⁴க³னிமித்தம் ப்³ரஹ்மசரியம் சரந்தோ ப⁴தகோ விய ஹோதீதி வுத்தம் ‘‘ப⁴தகவாதே³னா’’தி. உபக்கிதகவாதே³னாதி யோ கஹாபணாதீ³ஹி கிஞ்சி கிணாதி, ஸோ உபக்கிதகோதி வுச்சதி, அயம்பி ஆயஸ்மா அச்ச²ரானம் ஹேது அத்தனோ ப்³ரஹ்மசரியம் கிணாதி, தஸ்மா ‘‘உபக்கிதகோ’’தி ஏவம் வசனேன. அத² வா ப⁴க³வதோ ஆணாய அச்ச²ராஸம்போ⁴க³ஸங்கா²தாய ப⁴தியா ப்³ரஹ்மசரியவாஸஸங்கா²தம் ஜீவிதம் பவத்தேந்தோ தாய ப⁴தியா யாபனே ப⁴க³வதா ப⁴ரியமானோ விய ஹோதீதி ‘‘ப⁴தகோ’’தி வுத்தோ, ததா² அச்ச²ராஸம்போ⁴க³ஸங்கா²தம் விக்கயம் ஆதா³தப்³ப³ம் கத்வா ப⁴க³வதோ ஆணத்தியம் திட்ட²ந்தோ தேன விக்கயேன ப⁴க³வதா உபக்கிதோ விய ஹோதீதி வுத்தம் ‘‘உபக்கிதகோ’’தி.

அட்டீயமானோதி பீளியமானோ து³க்கா²பியமானோ. ஹராயமானோதி லஜ்ஜமானோ. ஜிகு³ச்ச²மானோதி பாடிகுல்யதோ த³ஹந்தோ. ஏகோதி அஸஹாயோ. வூபகட்டோ²தி வத்து²காமேஹி கிலேஸகாமேஹி ச காயேன சேவ சித்தேன ச வூபகட்டோ². அப்பமத்தோதி கம்மட்டா²னே ஸதிம் அவிஜஹந்தோ. ஆதாபீதி காயிகசேதஸிகவீரியாதாபேன ஆதாபவா, ஆதாபேதி கிலேஸேதி ஆதாபோ, வீரியம். பஹிதத்தோதி காயே ச ஜீவிதே ச அனபேக்க²தாய பேஸிதத்தோ விஸ்ஸட்ட²அத்தபா⁴வோ, நிப்³பா³னே வா பேஸிதசித்தோ. ந சிரஸ்ஸேவாதி கம்மட்டா²னாரம்ப⁴தோ ந சிரேனேவ. யஸ்ஸத்தா²யாதி யஸ்ஸ அத்தா²ய. குலபுத்தாதி து³விதா⁴ குலபுத்தா ஜாதிகுலபுத்தா ச ஆசாரகுலபுத்தா ச, அயம் பன உப⁴யதா²பி குலபுத்தோ. ஸம்மதே³வாதி ஹேதுனா ச காரணேன ச. அகா³ரஸ்மாதி க⁴ரதோ. அனகா³ரியந்தி பப்³ப³ஜ்ஜம். கஸிவணிஜ்ஜாதி³கம்மஞ்ஹி அகா³ரஸ்ஸ ஹிதந்தி அகா³ரியம் நாம, தம் ஏத்த² நத்தீ²தி பப்³ப³ஜ்ஜா அனகா³ரியாதி வுச்சதி. பப்³ப³ஜந்தீதி உபக³ச்ச²ந்தி. தத³னுத்தரந்தி தம் அனுத்தரம். ப்³ரஹ்மசரியபரியோஸானந்தி மக்³க³ப்³ரஹ்மசரியஸ்ஸ பரியோஸானபூ⁴தம் அரஹத்தப²லம். தஸ்ஸ ஹி அத்தா²ய குலபுத்தா இத⁴ பப்³ப³ஜந்தி. தி³ட்டே²வ த⁴ம்மேதி தஸ்மிம்யேவ அத்தபா⁴வே. ஸயம் அபி⁴ஞ்ஞா ஸச்சி²கத்வாதி அத்தனாயேவ பஞ்ஞாய பச்சக்க²ம் கத்வா, அபரப்பச்சயேன ஞத்வாதி அத்தோ². உபஸம்பஜ்ஜ விஹாஸீதி பாபுணித்வா ஸம்பாதே³த்வா வா விஹாஸி. ஏவம் விஹரந்தோவ கீ²ணா ஜாதி…பே… அப்³ப⁴ஞ்ஞாஸீதி. இமினா அஸ்ஸ பச்சவேக்க²ணபூ⁴மி த³ஸ்ஸிதா.

தத்த² கீ²ணா ஜாதீதி ந தாவஸ்ஸ அதீதா ஜாதி கீ²ணா புப்³பே³வ கீ²ணத்தா, ந அனாக³தா அனாக³தத்தா ஏவ, ந பச்சுப்பன்னா விஜ்ஜமானத்தா. மக்³க³ஸ்ஸ பன அபா⁴விதத்தா யா ஏகசதுபஞ்சவோகாரப⁴வேஸு ஏகசதுபஞ்சக்க²ந்த⁴ப்பபே⁴தா³ ஜாதி உப்பஜ்ஜேய்ய, ஸா மக்³க³ஸ்ஸ பா⁴விதத்தா அனுப்பாத³த⁴ம்மதம் ஆபஜ்ஜனேன கீ²ணா. தம் ஸோ மக்³க³பா⁴வனாய பஹீனகிலேஸே பச்சவேக்கி²த்வா கிலேஸாபா⁴வேன விஜ்ஜமானம்பி கம்மம் ஆயதிம் அப்படிஸந்தி⁴கம் ஹோதீதி ஜானனேன அப்³ப⁴ஞ்ஞாஸி. வுஸிதந்தி வுத்த²ம் பரிவுத்த²ம் கதம் சரிதம், நிட்டா²பிதந்தி அத்தோ². ப்³ரஹ்மசரியந்தி மக்³க³ப்³ரஹ்மசரியம். புது²ஜ்ஜனகல்யாணகேன ஹி ஸத்³தி⁴ம் ஸத்த ஸேக்கா² ப்³ரஹ்மசரியவாஸம் வஸந்தி நாம, கீ²ணாஸவோ வுத்த²வாஸோ, தஸ்மா ஸோ அத்தனோ ப்³ரஹ்மசரியவாஸம் பச்சவேக்க²ந்தோ ‘‘வுஸிதம் ப்³ரஹ்மசரிய’’ந்தி அப்³ப⁴ஞ்ஞாஸி. கதம் கரணீயந்தி சதூஸு ஸச்சேஸு சதூஹி மக்³கே³ஹி பரிஞ்ஞாபஹானஸச்சி²கிரியாபா⁴வனாவஸேன ஸோளஸவித⁴ம்பி கிச்சம் நிட்டா²பிதம். புது²ஜ்ஜனகல்யாணகாத³யோ ஹி தம் கிச்சம் கரோந்தி நாம, கீ²ணாஸவோ கதகரணீயோ, தஸ்மா ஸோ அத்தனோ கரணீயம் பச்சவேக்க²ந்தோ ‘‘கதம் கரணீய’’ந்தி அப்³ப⁴ஞ்ஞாஸி. நாபரம் இத்த²த்தாயாதி ‘‘இதா³னி புன இத்த²பா⁴வாய ஏவம் ஸோளஸகிச்சபா⁴வாய கிலேஸக்க²யாய வா மக்³க³பா⁴வனாய கிச்சம் மே நத்தீ²’’தி அப்³ப⁴ஞ்ஞாஸி. நாபரம் இத்த²த்தாயாதி வா ‘‘இத்த²பா⁴வதோ இமஸ்மா ஏவம்பகாரா வத்தமானக்க²ந்த⁴ஸந்தானா அபரம் க²ந்த⁴ஸந்தானம் மய்ஹம் நத்தி², இமே பன பஞ்சக்க²ந்தா⁴ பரிஞ்ஞாதா திட்ட²ந்தி சி²ன்னமூலகா விய ருக்கா², தே சரிமகசித்தனிரோதே⁴ன அனுபாதா³னோ விய ஜாதவேதோ³ நிப்³பா³யிஸ்ஸந்தி, அபண்ணத்திகபா⁴வம் க³மிஸ்ஸந்தீ’’தி அப்³ப⁴ஞ்ஞாஸி. அஞ்ஞதரோதி ஏகோ. அரஹதந்தி ப⁴க³வதோ ஸாவகானம் அரஹந்தானம் அப்³ப⁴ந்தரோ ஏகோ மஹாஸாவகோ அஹோஸீதி அத்தோ².

அஞ்ஞதரா தே³வதாதி அதி⁴க³தமக்³கா³ ஏகா ப்³ரஹ்மதே³வதா. ஸா ஹி ஸயம் அஸேக்க²த்தா அஸேக்க²விஸயம் அப்³ப⁴ஞ்ஞாஸி. ஸேக்கா² ஹி தம் தம் ஸேக்க²விஸயம், புது²ஜ்ஜனா ச அத்தனோ புது²ஜ்ஜனவிஸயமேவ ஜானந்தி. அபி⁴க்கந்தாய ரத்தியாதி பரிக்கீ²ணாய ரத்தியா, மஜ்ஜி²மயாமேதி அத்தோ². அபி⁴க்கந்தவண்ணாதி அதிஉத்தமவண்ணா. கேவலகப்பந்தி அனவஸேஸேன ஸமந்ததோ. ஓபா⁴ஸேத்வாதி அத்தனோ பபா⁴ய சந்தோ³ விய ஸூரியோ விய ச ஜேதவனம் ஏகோபா⁴ஸம் கத்வா. தேனுபஸங்கமீதி ஆயஸ்மதோ நந்த³ஸ்ஸ அரஹத்தப்பத்திம் விதி³த்வா பீதிஸோமனஸ்ஸஜாதா ‘‘தம் ப⁴க³வதோ படிவேதே³ஸ்ஸாமீ’’தி உபஸங்கமி.

ஆஸவானம் க²யாதி ஏத்த² ஆஸவந்தீதி ஆஸவா, சக்கு²த்³வாராதீ³ஹி பவத்தந்தீதி அத்தோ². அத² வா ஆகோ³த்ரபு⁴ம் ஆப⁴வக்³க³ம் வா ஸவந்தீதி ஆஸவா, ஏதே த⁴ம்மே ஏதஞ்ச ஓகாஸம் அந்தோ கரித்வா பவத்தந்தீதி அத்தோ². சிரபாரிவாஸியட்டே²ன மதி³ராதி³ஆஸவா வியாதி ஆஸவா. ‘‘புரிமா, பி⁴க்க²வே, கோடி ந பஞ்ஞாயதி அவிஜ்ஜாயா’’திஆதி³வசனேஹி (அ. நி. 10.61) நேஸம் சிரபாரிவாஸியதா வேதி³தப்³பா³. அத² வா ஆயதம் ஸம்ஸாரது³க்க²ம் ஸவந்தி பஸவந்தீதிபி, ஆஸவா. புரிமோ சேத்த² அத்தோ² கிலேஸேஸு யுஜ்ஜதி, பச்சி²மோ கம்மேபி. ந கேவலஞ்ச கம்மகிலேஸா ஏவ ஆஸவா, அத² கோ² நானப்பகாரா உபத்³த³வாபி. ததா² ஹி ‘‘நாஹம், சுந்த³, தி³ட்ட²த⁴ம்மிகானம்யேவ ஆஸவானம் ஸம்வராய த⁴ம்மம் தே³ஸேமீ’’தி ஏத்த² (தீ³. நி. 3.182) விவாத³மூலபூ⁴தா கிலேஸா ஆஸவாதி ஆக³தா.

‘‘யேன தே³வூபபத்யஸ்ஸ, க³ந்த⁴ப்³போ³ வா விஹங்க³மோ;

யக்க²த்தம் யேன க³ச்சே²ய்ய, மனுஸ்ஸத்தஞ்ச அப்³ப³ஜே;

தே மய்ஹம் ஆஸவா கீ²ணா, வித்³த⁴ஸ்தா வினலீகதா’’தி. (அ. நி. 4.36) –

ஏத்த² தேபூ⁴மிகம் கம்மம் அவஸேஸா ச அகுஸலா த⁴ம்மா ஆஸவாதி ஆக³தா. ‘‘தி³ட்ட²த⁴ம்மிகானம் ஆஸவானம் ஸம்வராய, ஸம்பராயிகானம் ஆஸவானம் படிகா⁴தாயா’’தி (பாரா. 39) பரூபகா⁴தவிப்படிஸாரவத⁴ப³ந்தா⁴த³யோ சேவ அபாயது³க்க²பூ⁴தா ச நானப்பகாரா உபத்³த³வா.

தே பனேதே ஆஸவா வினயே – ‘‘தி³ட்ட²த⁴ம்மிகானம் ஆஸவானம் ஸம்வராய ஸம்பராயிகானம் ஆஸவானம் படிகா⁴தாயா’’தி (பாரா. 39) த்³விதா⁴ ஆக³தா. ஸளாயதனே ‘‘தயோமே, ஆவுஸோ, ஆஸவா – காமாஸவோ, ப⁴வாஸவோ, அவிஜ்ஜாஸவோ’’தி (தீ³. நி. 3.305) திதா⁴ ஆக³தா, ததா² அஞ்ஞேஸு ச ஸுத்தந்தேஸு. அபி⁴த⁴ம்மே தேயேவ தி³ட்டா²ஸவேன ஸத்³தி⁴ம் சதுதா⁴ ஆக³தா. நிப்³பே³தி⁴கபரியாயே ‘‘அத்தி², பி⁴க்க²வே, ஆஸவா நிரயகா³மினியா’’திஆதி³னா (அ. நி. 6.63) பஞ்சதா⁴ ஆக³தா. ச²க்கனிபாதே ‘‘அத்தி², பி⁴க்க²வே, ஆஸவா ஸம்வராய பஹாதப்³பா³’’திஆதி³னா (அ. நி. 6.58) நயேன ச²தா⁴ ஆக³தா. ஸப்³பா³ஸவபரியாயே (ம. நி. 1.22) தேயேவ த³ஸ்ஸனபஹாதப்³பே³ஹி ஸத்³தி⁴ம் ஸத்ததா⁴ ஆக³தா. இத⁴ பன அபி⁴த⁴ம்மனயேன சத்தாரோ ஆஸவா வேதி³தப்³பா³.

க²யாதி ஏத்த² பன ‘‘யோ ஆஸவானம் க²யோ பே⁴தோ³ பரிபே⁴தோ³’’திஆதீ³ஸு ஆஸவானம் ஸரஸபே⁴தோ³ ஆஸவக்க²யோதி வுத்தோ. ‘‘ஜானதோ அஹம், பி⁴க்க²வே, பஸ்ஸதோ ஆஸவானம் க²யம் வதா³மீ’’திஆதீ³ஸு (ம. நி. 1.15) ஆஸவானம் ஆயதிம் அனுப்பாதோ³ ஆஸவக்க²யோதி வுத்தோ.

‘‘ஸேக்க²ஸ்ஸ ஸிக்க²மானஸ்ஸ, உஜுமக்³கா³னுஸாரினோ;

க²யஸ்மிம் பட²மம் ஞாணம், ததோ அஞ்ஞா அனந்தரா’’தி. (இதிவு. 62) –

ஆதீ³ஸு மக்³கோ³ ஆஸவக்க²யோதி வுத்தோ. ‘‘ஆஸவானம் க²யா ஸமணோ ஹோதீ’’திஆதீ³ஸு (ம. நி. 1.438) ப²லம்.

‘‘பரவஜ்ஜானுபஸ்ஸிஸ்ஸ, நிச்சம் உஜ்ஜா²னஸஞ்ஞினோ;

ஆஸவா தஸ்ஸ வட்³ட⁴ந்தி, ஆரா ஸோ ஆஸவக்க²யா’’தி. –

ஆதீ³ஸு (த⁴. ப. 253) நிப்³பா³னம். இத⁴ பன ஆஸவானம் அச்சந்தக²யோ அனுப்பாதோ³ வா மக்³கோ³ வா ‘‘ஆஸவானம் க²யோ’’தி வுத்தோ.

அனாஸவந்தி படிபஸ்ஸத்³தி⁴வஸேன ஸப்³ப³ஸோ பஹீனாஸவம். சேதோவிமுத்திந்தி அரஹத்தப²லஸமாதி⁴ம். பஞ்ஞாவிமுத்திந்தி அரஹத்தப²லபஞ்ஞம். உப⁴யவசனம் மக்³கே³ விய ப²லேபி ஸமத²விபஸ்ஸனானம் யுக³னந்த⁴பா⁴வத³ஸ்ஸனத்த²ம். ஞாணந்தி ஸப்³ப³ஞ்ஞுதஞ்ஞாணம். தே³வதாய வசனஸமனந்தரமேவ ‘‘கத²ம் நு கோ²’’தி ஆவஜ்ஜேந்தஸ்ஸ ப⁴க³வதோ ஞாணம் உப்பஜ்ஜி ‘‘நந்தே³ன அரஹத்தம் ஸச்சி²கத’’ந்தி. ஸோ ஹி ஆயஸ்மா ஸஹாயபி⁴க்கூ²ஹி ததா² உப்பண்டி³யமானோ ‘‘பா⁴ரியம் வத மயா கதம், யோஹம் ஏவம் ஸ்வாக்கா²தே த⁴ம்மவினயே பப்³ப³ஜித்வா அச்ச²ரானம் படிலாபா⁴ய ஸத்தா²ரம் பாடிபோ⁴க³ம் அகாஸி’’ந்தி உப்பன்னஸம்வேகோ³ ஹிரோத்தப்பம் பச்சுபட்ட²பேத்வா க⁴டேந்தோ வாயமந்தோ அரஹத்தம் பத்வா சிந்தேஸி – ‘‘யம்னூனாஹம் ப⁴க³வந்தம் ஏதஸ்மா படிஸ்ஸவா மோசேய்ய’’ந்தி. ஸோ ப⁴க³வந்தம் உபஸங்கமித்வா அத்தனோ அதி⁴ப்பாயம் ஸத்து² ஆரோசேஸி. தேன வுத்தம் – ‘‘அத² கோ² ஆயஸ்மா நந்தோ³…பே… ஏதஸ்மா படிஸ்ஸவா’’தி. தத்த² படிஸ்ஸவாதி பாடிபோ⁴க³ப்படிஸ்ஸவா, ‘‘அச்ச²ரானம் படிலாபா⁴ய அஹம் படிபூ⁴தோ’’தி படிஞ்ஞாய.

அத²ஸ்ஸ ப⁴க³வா ‘‘யஸ்மா தயா அஞ்ஞா ஆராதி⁴தாதி ஞாதமேதம் மயா, தே³வதாபி மே ஆரோசேஸி, தஸ்மா நாஹம் படிஸ்ஸவா இதா³னி மோசேதப்³போ³ அரஹத்தப்பத்தியாவ மோசிதத்தா’’தி ஆஹ. தேன வுத்தம் ‘‘யதே³வ கோ² தே நந்தா³’’திஆதி³. தத்த² யதே³வாதி யதா³ ஏவ. தேதி தவ. முத்தோதி பமுத்தோ. இத³ம் வுத்தம் ஹோதி – யஸ்மிம்யேவ காலே ஆஸவேஹி தவ சித்தம் விமுத்தம், அத² அனந்தரமேவாஹம் ததோ பாடிபோ⁴க³தோ முத்தோதி.

ஸோபி ஆயஸ்மா விபஸ்ஸனாகாலேயேவ ‘‘யதே³வாஹம் இந்த்³ரியாஸம்வரம் நிஸ்ஸாய இமம் விப்பகாரம் பத்தோ, தமேவ ஸுட்டு² நிக்³க³ஹேஸ்ஸாமீ’’தி உஸ்ஸாஹஜாதோ ப³லவஹிரோத்தப்போ தத்த² ச கதாதி⁴காரத்தா இந்த்³ரியஸம்வரே உக்கட்ட²படிபத³ம்பி அக³மாஸி. வுத்தஞ்ஹேதம் –

‘‘ஸசே, பி⁴க்க²வே, நந்த³ஸ்ஸ புரத்தி²மா தி³ஸா ஆலோகேதப்³பா³ ஹோதி, ஸப்³ப³ம் சேதஸோ ஸமன்னாஹரித்வா நந்தோ³ புரத்தி²மம் தி³ஸம் ஆலோகேதி ‘ஏவம் மே புரத்தி²மம் தி³ஸம் ஆலோகயதோ ந அபி⁴ஜ்ஜா²தோ³மனஸ்ஸா பாபகா அகுஸலா த⁴ம்மா அன்வாஸ்ஸவேய்யு’ந்தி, இதிஹ தத்த² ஸம்பஜானோ ஹோதி.

‘‘ஸசே, பி⁴க்க²வே, நந்த³ஸ்ஸ பச்சி²மா…பே… உத்தரா… த³க்கி²ணா… உத்³த⁴ம்… அதோ⁴… அனுதி³ஸா ஆலோகேதப்³பா³ ஹோதி, ஸப்³ப³ம் சேதஸோ ஸமன்னாஹரித்வா நந்தோ³ அனுதி³ஸம் ஆலோகேதி ‘ஏவம் மே…பே… ஸம்பஜானோ ஹோதீ’’’தி (அ. நி. 8.9).

தேனேவ தம் ஆயஸ்மந்தம் ஸத்தா² ‘‘ஏதத³க்³க³ம், பி⁴க்க²வே, மம ஸாவகானம் பி⁴க்கூ²னம் இந்த்³ரியேஸு கு³த்தத்³வாரானம் யதி³த³ம் நந்தோ³’’தி (அ. நி. 1.230) ஏதத³க்³கே³ ட²பேஸி.

ஏதமத்த²ம் விதி³த்வாதி ஏதம் ஆயஸ்மதோ நந்த³ஸ்ஸ ஸப்³பா³ஸவே கே²பேத்வா ஸுகா²தீ³ஸு தாதி³பா⁴வப்பத்திஸங்கா²தம் அத்த²ம் ஸப்³பா³காரதோ விதி³த்வா. இமம் உதா³னந்தி தத³த்த²விபா⁴வனம் இமம் உதா³னம் உதா³னேஸி.

தத்த² யஸ்ஸ நித்திண்ணோ பங்கோதி யேன அரியபுக்³க³லேன அரியமக்³க³ஸேதுனா ஸப்³போ³ தி³ட்டி²பங்கோ ஸம்ஸாரபங்கோ ஏவ வா நிப்³பா³னபாரக³மனேன திண்ணோ. மத்³தி³தோ காமகண்ட³கோதி யேன ஸத்தானம் விஜ்ஜ²னதோ. ‘‘காமகண்ட³கோ’’தி லத்³த⁴னாமோ ஸப்³போ³ கிலேஸகாமோ ஸப்³போ³ காமவிஸூகோ அக்³க³ஞாணத³ண்டே³ன மத்³தி³தோ ப⁴க்³கோ³ அனவஸேஸதோ மதி²தோ. மோஹக்க²யம் அனுப்பத்தோதி ஏவம்பூ⁴தோ ச து³க்கா²தி³விஸயஸ்ஸ ஸப்³ப³ஸ்ஸ ஸம்மோஹஸ்ஸ கே²பனேன மோஹக்க²யம் பத்தோ, அரஹத்தப²லம் நிப்³பா³னஞ்ச அனுப்பத்தோ. ஸுக²து³க்கே²ஸு ந வேத⁴தீ ஸ பி⁴க்கூ²தி ஸோ பி⁴ன்னகிலேஸோ பி⁴க்கு² இட்டா²ரம்மணஸமாயோக³தோ உப்பன்னேஸு ஸுகே²ஸு அனிட்டா²ரம்மணஸமாயோக³தோ உப்பன்னேஸு து³க்கே²ஸு ச ந வேத⁴தி ந கம்பதி, தம் நிமித்தம் சித்தவிகாரம் நாபஜ்ஜதி. ‘‘ஸுக²து³க்கே²ஸூ’’தி ச தே³ஸனாமத்தம், ஸப்³பே³ஸுபி லோகத⁴ம்மேஸு ந வேத⁴தீதி வேதி³தப்³ப³ம்.

து³தியஸுத்தவண்ணனா நிட்டி²தா.