3. நந்த³வக்³கோ³

1. கம்மவிபாகஜஸுத்தவண்ணனா

21. நந்த³வக்³க³ஸ்ஸ பட²மே அஞ்ஞதரோ பி⁴க்கூ²தி நாமகோ³த்தேன அபாகடோ ஏகோ கீ²ணாஸவபி⁴க்கு². ஸோ கிர ராஜக³ஹவாஸீ குலபுத்தோ மோக்³க³ல்லானத்தே²ரேன ஸம்வேஜிதோ ஸம்ஸாரதோ³ஸம் தி³ஸ்வா ஸத்து² ஸந்திகே பப்³ப³ஜித்வா ஸீலானி ஸோதே⁴த்வா சதுஸச்சகம்மட்டா²னம் க³ஹேத்வா ந சிரஸ்ஸேவ விபஸ்ஸனம் உஸ்ஸுக்காபேத்வா அரஹத்தம் பாபுணி. தஸ்ஸ அபரபா⁴கே³ க²ரோ ஆபா³தோ⁴ உப்பஜ்ஜி, ஸோ பச்சவேக்க²ணாய அதி⁴வாஸேந்தோ விஹரதி. கீ²ணாஸவானஞ்ஹி சேதஸிகது³க்க²ம் நாம நத்தி², காயிகது³க்க²ம் பன ஹோதியேவ. ஸோ ஏகதி³வஸம் ப⁴க³வதோ த⁴ம்மம் தே³ஸேந்தஸ்ஸ நாதிதூ³ரே டா²னே து³க்க²ம் அதி⁴வாஸேந்தோ பல்லங்கேன நிஸீதி³. தேன வுத்தம் ‘‘ப⁴க³வதோ அவிதூ³ரே நிஸின்னோ ஹோதீ’’திஆதி³.

தத்த² பல்லங்கந்தி ஸமந்ததோ ஊருப³த்³தா⁴ஸனம். ஆபு⁴ஜித்வாதி ப³ந்தி⁴த்வா. உஜும் காயம் பணிதா⁴யாதி உபரிமம் ஸரீரம் உஜுகம் ட²பேத்வா அட்டா²ரஸ பிட்டி²கண்டகே கோடியா கோடிம் படிபாதே³த்வா. ஏவஞ்ஹி நிஸின்னஸ்ஸ சம்மமம்ஸன்ஹாரூனி ந நமந்தி, தஸ்மா ஸோ ததா² நிஸின்னோ ஹோதி. புராணகம்மவிபாகஜந்தி புப்³பே³ கதஸ்ஸ கம்மஸ்ஸ விபாகபா⁴வேன ஜாதம், புராணகம்மவிபாகே வா ஸுக²து³க்க²ப்பகாரே விபாகவட்டஸமுதா³யே ததே³கதே³ஸபா⁴வேன ஜாதம். கிம் தம்? து³க்க²ம். புராணகம்மவிபாகஜந்தி ச இமினா தஸ்ஸ ஆபா³த⁴ஸ்ஸ கம்மஸமுட்டா²னதம் த³ஸ்ஸேந்தோ ஓபக்கமிகஉதுவிபரிணாமஜாதி³பா⁴வம் படிக்கி²பதி. து³க்க²ந்தி பசுரஜனேஹி க²மிதும் அஸக்குணேய்யம். திப்³ப³ந்தி திகி²ணம், அபி⁴ப⁴வித்வா பவத்தியா ப³ஹலம் வா. க²ரந்தி கக்க²ளம். கடுகந்தி அஸாதம். அதி⁴வாஸேந்தோதி உபரி வாஸேந்தோ ஸஹந்தோ க²மந்தோ.

ஸதோ ஸம்பஜானோதி வேத³னாபரிக்³கா³ஹகானம் ஸதிஸம்பஜஞ்ஞானம் வஸேன ஸதிமா ஸம்பஜானந்தோ ச. இத³ம் வுத்தம் ஹோதி – ‘‘அயம் வேத³னா நாம ஹுத்வா அபா⁴வட்டே²ன அனிச்சா, அனிட்டா²ரம்மணாதி³பச்சயே படிச்ச உப்பன்னத்தா படிச்சஸமுப்பன்னா, உப்பஜ்ஜித்வா ஏகந்தேன பி⁴ஜ்ஜனஸபா⁴வத்தா க²யத⁴ம்மா வயத⁴ம்மா விராக³த⁴ம்மா நிரோத⁴த⁴ம்மா’’தி வேத³னாய அனிச்சதாஸல்லக்க²ணவஸேன ஸதோகாரிதாய ஸதோ, அவிபரீதஸபா⁴வபடிவிஜ்ஜ²னவஸேன ஸம்பஜானோ ச ஹுத்வா. அத² வா ஸதிவேபுல்லபத்தியா ஸப்³ப³த்தே²வ காயவேத³னாசித்தத⁴ம்மேஸு ஸுட்டு² உபட்டி²தஸதிதாய ஸதோ, ததா² பஞ்ஞாவேபுல்லப்பத்தியா பரிக்³க³ஹிதஸங்கா²ரதாய ஸம்பஜானோ. அவிஹஞ்ஞமானோதி ‘‘அஸ்ஸுதவா, பி⁴க்க²வே, புது²ஜ்ஜனோ அஞ்ஞதரஞ்ஞதரேன து³க்க²த⁴ம்மேன பு²ட்டோ² ஸமானோ ஸோசதி கிலமதி பரிதே³வதி உரத்தாளிம் கந்த³தி ஸம்மோஹம் ஆபஜ்ஜதீ’’தி வுத்தனயேன அந்த⁴புது²ஜ்ஜனோ விய ந விஹஞ்ஞமானோ மக்³கே³னேவ ஸமுக்³கா⁴திதத்தா சேதோது³க்க²ம் அனுப்பாதே³ந்தோ கேவலம் கம்மவிபாகஜம் ஸரீரது³க்க²ம் அதி⁴வாஸேந்தோ ஸமாபத்திம் ஸமாபன்னோ விய நிஸின்னோ ஹோதி. அத்³த³ஸாதி தம் ஆயஸ்மந்தம் அதி⁴வாஸனக²ந்தியா ததா² நிஸின்னம் அத்³த³க்கி².

ஏதமத்த²ந்தி ஏதம் தாதி³ஸஸ்ஸபி ரோக³ஸ்ஸ வேஜ்ஜாதீ³ஹி திகிச்ச²னத்த²ம் அனுஸ்ஸுக்காபஜ்ஜனகாரணம் கீ²ணாஸவானம் லோகத⁴ம்மேஹி அனுபலேபிதஸங்கா²தம் அத்த²ம் ஸப்³பா³காரதோ விதி³த்வா. இமம் உதா³னந்தி இமம் ஸங்க²தத⁴ம்மானம் யேஹி கேஹிசி து³க்க²த⁴ம்மேஹி அவிகா⁴தபத்திவிபா⁴வனம் உதா³னம் உதா³னேஸி.

தத்த² ஸப்³ப³கம்மஜஹஸ்ஸாதி பஹீனஸப்³ப³கம்மஸ்ஸ. அக்³க³மக்³க³ஸ்ஸ ஹி உப்பன்னகாலதோ பட்டா²ய அரஹதோ ஸப்³பா³னி குஸலாகுஸலகம்மானி பஹீனானி நாம ஹோந்தி படிஸந்தி⁴ம் தா³தும் அஸமத்த²பா⁴வதோ, யதோ அரியமக்³க³ஞாணம் கம்மக்க²யகரந்தி வுச்சதி. பி⁴க்கு²னோதி பி⁴ன்னகிலேஸதாய பி⁴க்கு²னோ. து⁴னமானஸ்ஸ புரே கதம் ரஜந்தி அரஹத்தப்பத்திதோ புப்³பே³ கதம் ராக³ரஜாதி³மிஸ்ஸதாய ரஜந்தி லத்³த⁴னாமம் து³க்க²வேத³னீயம் கம்மம் விபாகபடிஸம்வேத³னேன தம் து⁴னந்தஸ்ஸ வித்³த⁴ம்ஸேந்தஸ்ஸ, அரஹத்தப்பத்தியா பரதோ பன ஸாவஜ்ஜகிரியாய ஸம்ப⁴வோயேவ நத்தி², அனவஜ்ஜகிரியா ச ப⁴வமூலஸ்ஸ ஸமுச்சி²ன்னத்தா ஸமுச்சி²ன்னமூலதாய புப்ப²ம் விய ப²லதா³னஸமத்த²தாய அபா⁴வதோ கிரியமத்தாவ ஹோதி.

அமமஸ்ஸாதி ரூபாதீ³ஸு கத்த²சி மமந்தி க³ஹணாபா⁴வதோ அமமஸ்ஸ மமங்காரரஹிதஸ்ஸ. யஸ்ஸ ஹி மமங்காரோ அத்தி², ஸோ அத்தஸினேஹேன வேஜ்ஜாதீ³ஹி ஸரீரம் படிஜக்³கா³பேதி. அரஹா பன அமமோ, தஸ்மா ஸோ ஸரீரஜக்³க³னேபி உதா³ஸீனதா⁴துகோவ. டி²தஸ்ஸாதி சதுப்³பி³த⁴ம்பி ஓக⁴ம் தரித்வா நிப்³பா³னத²லே டி²தஸ்ஸ, படிஸந்தி⁴க்³க³ஹணவஸேன வா ஸந்தா⁴வனஸ்ஸ அபா⁴வேன டி²தஸ்ஸ. ஸேக்க²புது²ஜ்ஜனா ஹி கிலேஸாபி⁴ஸங்கா²ரானம் அப்பஹீனத்தா சுதிபடிஸந்தி⁴வஸேன ஸம்ஸாரே தா⁴வந்தி நாம, அரஹா பன தத³பா⁴வதோ டி²தோதி வுச்சதி. அத² வா த³ஸவிதே⁴ கீ²ணாஸவஸங்கா²தே அரியத⁴ம்மே டி²தஸ்ஸ. தாதி³னோதி ‘‘படிகூலே அப்படிகூலஸஞ்ஞீ விஹரதீ’’திஆதி³னா (படி. ம. 3.17) நயேன வுத்தாய பஞ்சவிதா⁴ய அரியித்³தி⁴யா அட்ட²ஹி லோகத⁴ம்மேஹி அகம்பனியாய ச²ளங்கு³பேக்கா²ய ச ஸமன்னாக³தேன இட்டா²தீ³ஸு ஏகஸதி³ஸதாஸங்கா²தேன தாதீ³பா⁴வேன தாதி³னோ. அத்தோ² நத்தி² ஜனம் லபேதவேதி ‘‘மம பே⁴ஸஜ்ஜாதீ³னி கரோதா²’’தி ஜனம் லபிதும் கதே²தும் பயோஜனம் நத்தி² ஸரீரே நிரபேக்க²பா⁴வதோ. பண்டு³பலாஸோ விய ஹி ப³ந்த⁴னா பவுத்தோ ஸயமேவாயம் காயோ பி⁴ஜ்ஜித்வா பததூதி கீ²ணாஸவானம் அஜ்ஜா²ஸயோ. வுத்தஞ்ஹேதம் –

‘‘நாபி⁴கங்கா²மி மரணம், நாபி⁴கங்கா²மி ஜீவிதம்;

காலஞ்ச படிகங்கா²மி, நிப்³பி³ஸம் ப⁴தகோ யதா²’’தி. (தே²ரகா³. 606);

அத² வா யம்கிஞ்சி நிமித்தம் த³ஸ்ஸேத்வா ‘‘கிம் அய்யஸ்ஸ இச்சி²தப்³ப³’’ந்தி ஜனம் லபேதவே பச்சயேஹி நிமந்தனவஸேன லபாபேதும் கீ²ணாஸவஸ்ஸ அத்தோ² நத்தி² தாதி³ஸஸ்ஸ மிச்சா²ஜீவஸ்ஸ மக்³கே³னேவ ஸமுக்³கா⁴திதத்தாதி அத்தோ². இதி ப⁴க³வா ‘‘கிஸ்ஸாயம் தே²ரோ அத்தனோ ரோக³ம் வேஜ்ஜேஹி அதிகிச்சா²பேத்வா ப⁴க³வதோ அவிதூ³ரே நிஸீத³தீ’’தி சிந்தேந்தானம் தஸ்ஸ அதிகிச்சா²பனே காரணம் பகாஸேஸி.

பட²மஸுத்தவண்ணனா நிட்டி²தா.

2. நந்த³ஸுத்தவண்ணனா

22. து³தியே நந்தோ³தி தஸ்ஸ நாமம். ஸோ ஹி சக்கவத்திலக்க²ணூபேதத்தா மாதாபிதரோ ஸபரிஜனம் ஸகலஞ்ச ஞாதிபரிவட்டம் நந்த³யந்தோ ஜாதோதி ‘‘நந்தோ³’’தி நாமம் லபி⁴. ப⁴க³வதோ பா⁴தாதி ப⁴க³வதோ ஏகபிதுபுத்ததாய பா⁴தா. ந ஹி ப⁴க³வதோ ஸஹோத³ரா உப்பஜ்ஜந்தி, தேன வுத்தம் ‘‘மாதுச்சா²புத்தோ’’தி, சூளமாதுபுத்தோதி அத்தோ². மஹாபஜாபதிகோ³தமியா ஹி ஸோ புத்தோ. அனபி⁴ரதோதி ந அபி⁴ரதோ. ப்³ரஹ்மசரியந்தி ப்³ரஹ்மம் ஸேட்ட²ம் உத்தமம் சரியம் ஏகாஸனம் ஏகஸேய்யம் மேது²னவிரதிம். ஸந்தா⁴ரேதுந்தி பட²மசித்ததோ யாவசரிமகசித்தம் ஸம்மா பரிபுண்ணம் பரிஸுத்³த⁴ம் தா⁴ரேதும் பவத்தேதும். து³தியேன சேத்த² ப்³ரஹ்மசரியபதே³ன மக்³க³ப்³ரஹ்மசரியஸ்ஸாபி ஸங்க³ஹோ வேதி³தப்³போ³. ஸிக்க²ம் பச்சக்கா²யாதி உபஸம்பத³காலே பி⁴க்கு²பா⁴வேன ஸத்³தி⁴ம் ஸமாதி³ன்னம் நிப்³ப³த்தேதப்³ப³பா⁴வேன அனுட்டி²தம் திவித⁴ம்பி ஸிக்க²ம் படிக்கி²பித்வா, விஸ்ஸஜ்ஜேத்வாதி அத்தோ². ஹீனாயாதி கி³ஹிபா⁴வாய. ஆவத்திஸ்ஸாமீதி நிவத்திஸ்ஸாமி.

கஸ்மா பனாயம் ஏவமாரோசேஸீதி? ஏத்தா²யம் அனுபுப்³பி³கதா² – ப⁴க³வா பவத்தவரத⁴ம்மசக்கோ ராஜக³ஹம் க³ந்த்வா வேளுவனே விஹரந்தோ ‘‘புத்தம் மே ஆனேத்வா த³ஸ்ஸேதா²’’தி ஸுத்³தோ⁴த³னமஹாராஜேன பேஸிதேஸு ஸஹஸ்ஸஸஹஸ்ஸபரிவாரேஸு த³ஸஸு தூ³தேஸு ஸஹ பரிவாரேன அரஹத்தம் பத்தேஸு ஸப்³ப³பச்சா² க³ந்த்வா அரஹத்தப்பத்தேன காளுதா³யித்தே²ரேன க³மனகாலம் ஞத்வா மக்³க³வண்ணனம் வண்ணேத்வா ஜாதிபூ⁴மிக³மனாய யாசிதோ வீஸதிஸஹஸ்ஸகீ²ணாஸவபரிவுத்தோ கபிலவத்து²னக³ரம் க³ந்த்வா ஞாதிஸமாக³மே போக்க²ரவஸ்ஸம் அட்டு²ப்பத்திம் கத்வா வேஸ்ஸந்தரஜாதகம் (ஜா. 2.22.1655 ஆத³யோ) கதே²த்வா புனதி³வஸே பிண்டா³ய பவிட்டோ² ‘‘உத்திட்டே² நப்பமஜ்ஜேய்யா’’தி (த⁴. ப. 168) கா³தா²ய பிதரம் ஸோதாபத்திப²லே பதிட்டா²பேத்வா நிவேஸனம் க³ந்த்வா ‘‘த⁴ம்மஞ்சரே’’தி (த⁴. ப. 169) கா³தா²ய மஹாபஜாபதிம் ஸோதாபத்திப²லே, ராஜானம் ஸகதா³கா³மிப²லே பதிட்டா²பேஸி.

ப⁴த்தகிச்சாவஸானே பன ராஹுலமாதுகு³ணகத²ம் நிஸ்ஸாய சந்த³கின்னரீஜாதகம் (ஜா. 1.14.18 ஆத³யோ) கதே²த்வா ததியதி³வஸே நந்த³குமாரஸ்ஸ அபி⁴ஸேககே³ஹப்பவேஸனவிவாஹமங்க³லேஸு வத்தமானேஸு பிண்டா³ய பவிஸித்வா நந்த³குமாரஸ்ஸ ஹத்தே² பத்தம் த³த்வா மங்க³லம் வத்வா உட்டா²யாஸனா பக்கமந்தோ குமாரஸ்ஸ ஹத்த²தோ பத்தம் ந க³ண்ஹி. ஸோபி ததா²க³தே கா³ரவேன ‘‘பத்தம் தே, ப⁴ந்தே, க³ண்ஹதா²’’தி வத்தும் நாஸக்கி². ஏவம் பன சிந்தேஸி, ‘‘ஸோபானஸீஸே பத்தம் க³ண்ஹிஸ்ஸதீ’’தி, ஸத்தா² தஸ்மிம் டா²னே ந க³ண்ஹி. இதரோ ‘‘ஸோபானமூலே க³ண்ஹிஸ்ஸதீ’’தி சிந்தேஸி, ஸத்தா² தத்த²பி ந க³ண்ஹி. இதரோ ‘‘ராஜங்க³ணே க³ண்ஹிஸ்ஸதீ’’தி சிந்தேஸி, ஸத்தா² தத்த²பி ந க³ண்ஹி. குமாரோ நிவத்திதுகாமோ அனிச்சா²ய க³ச்ச²ந்தோ கா³ரவேன ‘‘பத்தம் க³ண்ஹதா²’’தி வத்தும் ந ஸக்கோதி, ‘‘இத⁴ க³ண்ஹிஸ்ஸதி, ஏத்த² க³ண்ஹிஸ்ஸதீ’’தி சிந்தேந்தோ க³ச்ச²தி.

தஸ்மிம் க²ணே ஜனபத³கல்யாணியா ஆசிக்கி²ம்ஸு, ‘‘அய்யே ப⁴க³வா, நந்த³ராஜானம் க³ஹேத்வா க³ச்ச²தி, தும்ஹேஹி வினா கரிஸ்ஸதீ’’தி. ஸா உத³கபி³ந்தூ³ஹி பக்³க⁴ரந்தேஹி அட்³டு⁴ல்லிகி²தேஹி கேஸேஹி வேகே³ன பாஸாத³ம் ஆருய்ஹ ஸீஹபஞ்ஜரத்³வாரே ட²த்வா ‘‘துவடம் கோ², அய்யபுத்த, ஆக³ச்சே²ய்யாஸீ’’தி ஆஹ. தம் தஸ்ஸா வசனம் தஸ்ஸ ஹத³யே திரியம் பதித்வா விய டி²தம். ஸத்தா²பிஸ்ஸ ஹத்த²தோ பத்தம் அக்³க³ஹேத்வாவ தம் விஹாரம் நேத்வா ‘‘பப்³ப³ஜிஸ்ஸஸி நந்தா³’’தி ஆஹ. ஸோ பு³த்³த⁴கா³ரவேன ‘‘ந பப்³ப³ஜிஸ்ஸாமீ’’தி அவத்வா, ‘‘ஆம, பப்³ப³ஜிஸ்ஸாமீ’’தி ஆஹ. ஸத்தா² தேன ஹி நந்த³ம் பப்³பா³ஜேதா²தி கபிலவத்து²புரம் க³ந்த்வா ததியதி³வஸே தம் பப்³பா³ஜேஸி. ஸத்தமே தி³வஸே மாதரா அலங்கரித்வா பேஸிதம் ‘‘தா³யஜ்ஜம் மே, ஸமண, தே³ஹீ’’தி வத்வா அத்தனா ஸத்³தி⁴ம் ஆராமாக³தம் ராஹுலகுமாரம் பப்³பா³ஜேஸி. புனேகதி³வஸம் மஹாத⁴ம்மபாலஜாதகம் (ஜா. 1.10.92 ஆத³யோ) கதே²த்வா ராஜானம் அனாகா³மிப²லே பதிட்டா²பேஸி.

இதி ப⁴க³வா மஹாபஜாபதிம் ஸோதாபத்திப²லே, பிதரம் தீஸு ப²லேஸு பதிட்டா²பேத்வா பி⁴க்கு²ஸங்க⁴பரிவுதோ புனதே³வ ராஜக³ஹம் க³ந்த்வா ததோ அனாத²பிண்டி³கேன ஸாவத்தி²ம் ஆக³மனத்தா²ய க³ஹிதபடிஞ்ஞோ நிட்டி²தே ஜேதவனமஹாவிஹாரே தத்த² க³ந்த்வா வாஸம் கப்பேஸி. ஏவம் ஸத்த²ரி ஜேதவனே விஹரந்தே ஆயஸ்மா நந்தோ³ அத்தனோ அனிச்சா²ய பப்³ப³ஜிதோ காமேஸு அனாதீ³னவத³ஸ்ஸாவீ ஜனபத³கல்யாணியா வுத்தவசனமனுஸ்ஸரந்தோ உக்கண்டி²தோ ஹுத்வா பி⁴க்கூ²னம் அத்தனோ அனபி⁴ரதிம் ஆரோசேஸி. தேன வுத்தம் ‘‘தேன கோ² பன ஸமயேன ஆயஸ்மா நந்தோ³…பே… ஹீனாயாவத்திஸ்ஸாமீ’’தி.

கஸ்மா பன நம் ப⁴க³வா ஏவம் பப்³பா³ஜேஸீதி? ‘‘புரேதரமேவ ஆதீ³னவம் த³ஸ்ஸேத்வா காமேஹி நம் விவேசேதும் ந ஸக்கா, பப்³பா³ஜேத்வா பன உபாயேன ததோ விவேசேத்வா உபரிவிஸேஸம் நிப்³ப³த்தேஸ்ஸாமீ’’தி வேனேய்யத³மனகுஸலோ ஸத்தா² ஏவம் நம் பட²மம் பப்³பா³ஜேஸி.

ஸாகியானீதி ஸக்யராஜதீ⁴தா. ஜனபத³கல்யாணீதி ஜனபத³ம்ஹி கல்யாணீ ரூபேன உத்தமா ச²ஸரீரதோ³ஸரஹிதா, பஞ்சகல்யாணஸமன்னாக³தா. ஸா ஹி யஸ்மா நாதிதீ³கா⁴ நாதிரஸ்ஸா நாதிகிஸா நாதிதூ²லா நாதிகாளிகா நச்சோதா³தா அதிக்கந்தா மானுஸகவண்ணம் அப்பத்தா தி³ப்³ப³வண்ணம், தஸ்மா ச²ஸரீரதோ³ஸரஹிதா. ச²விகல்யாணம் மம்ஸகல்யாணம் நக²கல்யாணம் அட்டி²கல்யாணம் வயகல்யாணந்தி இமேஹி பஞ்சஹி கல்யாணேஹி ஸமன்னாக³தா.

தத்த² அத்தனோ ஸரீரோபா⁴ஸேன த³ஸத்³வாத³ஸஹத்தே² டா²னே ஆலோகம் கரோதி, பியங்கு³ஸமா வா ஸுவண்ணஸமா வா ஹோதி, அயமஸ்ஸா ச²விகல்யாணதா. சத்தாரோ பனஸ்ஸா ஹத்த²பாதா³ முக²பரியோஸானஞ்ச லாகா²ரஸபரிகம்மகதம் விய ரத்தபவாளரத்தகம்ப³லேன ஸதி³ஸம் ஹோதி, அயமஸ்ஸா மம்ஸகல்யாணதா. வீஸதி நக²பத்தானி மம்ஸதோ அமுத்தட்டா²னே லாகா²ரஸபரிகிதானி விய முத்தட்டா²னே கீ²ரதா⁴ராஸதி³ஸானி ஹோந்தி, அயமஸ்ஸா நக²கல்யாணதா. த்³வத்திம்ஸத³ந்தா ஸுபு²ஸிதா பரிஸுத்³த⁴பவாளபந்திஸதி³ஸா வஜிரபந்தீ விய கா²யந்தி, அயமஸ்ஸா அட்டி²கல்யாணதா. வீஸதிவஸ்ஸஸதிகாபி ஸமானா ஸோளஸவஸ்ஸுத்³தே³ஸிகா விய ஹோதி நிப்பலிதா, அயமஸ்ஸா வயகல்யாணதா. ஸுந்த³ரீ ச ஹோதி ஏவரூபகு³ணஸமன்னாக³தா, தேன வுத்தம் ‘‘ஜனபத³கல்யாணீ’’தி.

க⁴ரா நிக்க²மந்தஸ்ஸாதி அனாத³ரே ஸாமிவசனம், க⁴ரதோ நிக்க²மதோதி அத்தோ². ‘‘க⁴ரா நிக்க²மந்த’’ந்திபி பட²ந்தி. உபட்³டு⁴ல்லிகி²தேஹி கேஸேஹீதி இத்த²ம்பூ⁴தலக்க²ணே கரணவசனம், விப்பகதுல்லிகி²தேஹி கேஸேஹி உபலக்கி²தாதி அத்தோ². ‘‘அட்³டு⁴ல்லிகி²தேஹீ’’திபி பட²ந்தி. உல்லிக²னந்தி ச ப²ணகாதீ³ஹி கேஸஸண்டா²பனம், ‘‘அட்³ட⁴காரவிதா⁴ன’’ந்திபி வத³ந்தி. அபலோகேத்வாதி ஸினேஹரஸவிப்பா²ரஸம்ஸூசகேன அட்³ட⁴க்கி²னா ஆப³ந்த⁴ந்தீ விய ஓலோகேத்வா. மம், ப⁴ந்தேதி புப்³பே³பி ‘‘ம’’ந்தி வத்வா உக்கண்டா²குலசித்ததாய புன ‘‘மம் ஏதத³வோசா’’தி ஆஹ. துவடந்தி ஸீக⁴ம். தமனுஸ்ஸரமானோதி தம் தஸ்ஸா வசனம், தம் வா தஸ்ஸா ஆகாரஸஹிதம் வசனம் அனுஸ்ஸரந்தோ.

ப⁴க³வா தஸ்ஸ வசனம் ஸுத்வா ‘‘உபாயேனஸ்ஸ ராக³ம் வூபஸமேஸ்ஸாமீ’’தி இத்³தி⁴ப³லேன நம் தாவதிம்ஸப⁴வனம் நேந்தோ அந்தராமக்³கே³ ஏகஸ்மிம் ஜா²மகே²த்தே ஜா²மகா²ணுமத்த²கே நிஸின்னம் சி²ன்னகண்ணனாஸானங்கு³ட்ட²ம் ஏகம் பலுட்ட²மக்கடிம் த³ஸ்ஸேத்வா தாவதிம்ஸப⁴வனம் நேஸி. பாளியம் பன ஏகக்க²ணேனேவ ஸத்தா²ரா தாவதிம்ஸப⁴வனம் க³தம் விய வுத்தம், தம் க³மனம் அவத்வா தாவதிம்ஸப⁴வனம் ஸந்தா⁴ய வுத்தம். க³ச்ச²ந்தோயேவ ஹி ப⁴க³வா ஆயஸ்மதோ நந்த³ஸ்ஸ அந்தராமக்³கே³ தம் பலுட்ட²மக்கடிம் த³ஸ்ஸேதி. யதி³ ஏவம் கத²ம் ஸமிஞ்ஜனாதி³னித³ஸ்ஸனம்? தம் அந்தரதா⁴னனித³ஸ்ஸனந்தி க³ஹேதப்³ப³ம். ஏவம் ஸத்தா² தம் தாவதிம்ஸப⁴வனம் நேத்வா ஸக்கஸ்ஸ தே³வரஞ்ஞோ உபட்டா²னம் ஆக³தானி ககுடபாதா³னி பஞ்ச அச்ச²ராஸதானி அத்தானம் வந்தி³த்வா டி²தானி த³ஸ்ஸேத்வா ஜனபத³கல்யாணியா தாஸம் பஞ்சன்னம் அச்ச²ராஸதானம் ரூபஸம்பத்திம் படிச்ச விஸேஸம் புச்சி². தேன வுத்தம் – ‘‘அத² கோ² ப⁴க³வா ஆயஸ்மந்தம் நந்த³ம் பா³ஹாயம் க³ஹேத்வா…பே… ககுடபாதா³னீ’’தி.

தத்த² பா³ஹாயம் க³ஹேத்வாதி பா³ஹும்ஹி க³ஹேத்வா விய. ப⁴க³வா ஹி ததா³ தாதி³ஸம் இத்³தா⁴பி⁴ஸங்கா²ரம் அபி⁴ஸங்கா²ரேஸி, யதா² ஆயஸ்மா நந்தோ³ பு⁴ஜே க³ஹேத்வா ப⁴க³வதா நீயமானோ விய அஹோஸி. தத்த² ச ப⁴க³வதா ஸசே தஸ்ஸ ஆயஸ்மதோ தாவதிம்ஸதே³வலோகஸ்ஸ த³ஸ்ஸனம் பவேஸனமேவ வா இச்சி²தம் ஸியா, யதா²னிஸின்னஸ்ஸேவ தஸ்ஸ தம் தே³வலோகம் த³ஸ்ஸேய்ய லோகவிவரணித்³தி⁴காலே விய, தமேவ வா இத்³தி⁴யா தத்த² பேஸேய்ய. யஸ்மா பனஸ்ஸ தி³ப்³ப³த்தபா⁴வதோ மனுஸ்ஸத்தபா⁴வஸ்ஸ யோ நிஹீனஜிகு³ச்ச²னீயபா⁴வோ, தஸ்ஸ ஸுக²க்³க³ஹணத்த²ம் அந்தராமக்³கே³ தம் மக்கடிம் த³ஸ்ஸேதுகாமோ, தே³வலோகஸிரிவிப⁴வஸம்பத்தியோ ச ஓகா³ஹேத்வா த³ஸ்ஸேதுகாமோ அஹோஸி, தஸ்மா தம் க³ஹேத்வா தத்த² நேஸி. ஏவஞ்ஹிஸ்ஸ தத³த்த²ம் ப்³ரஹ்மசரியவாஸே விஸேஸதோ அபி⁴ரதி ப⁴விஸ்ஸதீதி.

ககுடபாதா³னீதி ரத்தவண்ணதாய பாராவதஸதி³ஸபாதா³னி. தா கிர ஸப்³பா³பி கஸ்ஸபஸ்ஸ ப⁴க³வதோ ஸாவகானம் பாத³மக்க²னதேலதா³னேன தாதி³ஸா ஸுகுமாரபாதா³ அஹேஸும். பஸ்ஸஸி நோதி பஸ்ஸஸி நு. அபி⁴ரூபதராதி விஸிட்ட²ரூபதரா. த³ஸ்ஸனீயதராதி தி³வஸம்பி பஸ்ஸந்தானம் அதித்திகரணட்டே²ன பஸ்ஸிதப்³ப³தரா. பாஸாதி³கதராதி ஸப்³பா³வயவஸோபா⁴ய ஸமந்ததோ பஸாதா³வஹதரா.

கஸ்மா பன ப⁴க³வா அவஸ்ஸுதசித்தம் ஆயஸ்மந்தம் நந்த³ம் அச்ச²ராயோ ஓலோகாபேஸி? ஸுகே²னேவஸ்ஸ கிலேஸே நீஹரிதும். யதா² ஹி குஸலோ வேஜ்ஜோ உஸ்ஸன்னதோ³ஸம் புக்³க³லம் திகிச்ச²ந்தோ ஸினேஹபானாதி³னா பட²மம் தோ³ஸே உக்கிலேதே³த்வா பச்சா² வமனவிரேசனேஹி ஸம்மதே³வ நீஹராபேதி, ஏவம் வினேய்யத³மனகுஸலோ ப⁴க³வா உஸ்ஸன்னராக³ம் ஆயஸ்மந்தம் நந்த³ம் தே³வச்ச²ராயோ த³ஸ்ஸேத்வா உக்கிலேதே³ஸி அரியமக்³க³பே⁴ஸஜ்ஜேன அனவஸேஸதோ நீஹரிதுகாமோதி வேதி³தப்³ப³ம்.

பலுட்ட²மக்கடீதி ஜா²மங்க³பச்சங்க³மக்கடீ. ஏவமேவ கோ²தி யதா² ஸா, ப⁴ந்தே, தும்ஹேஹி மய்ஹம் த³ஸ்ஸிதா சி²ன்னகண்ணனாஸா பலுட்ட²மக்கடீ ஜனபத³கல்யாணிம் உபாதா³ய, ஏவமேவ ஜனபத³கல்யாணீ இமானி பஞ்ச அச்ச²ராஸதானி உபாதா³யாதி அத்தோ². பஞ்சன்னம் அச்ச²ராஸதானந்தி உபயோகே³ ஸாமிவசனம், பஞ்ச அச்ச²ராஸதானீதி அத்தோ². அவயவஸம்ப³ந்தே⁴ வா ஏதம் ஸாமிவசனம், தேன பஞ்சன்னம் அச்ச²ராஸதானம் ரூபஸம்பத்திம் உபனிதா⁴யாதி அதி⁴ப்பாயோ. உபனிதா⁴யாதி ச ஸமீபே ட²பேத்வா, உபாதா³யாதி அத்தோ². ஸங்க்²யந்தி இத்தீ²தி க³ணனம். கலபா⁴க³ந்தி கலாயபி பா⁴க³ம், ஏகம் ஸோளஸகோட்டா²ஸே கத்வா ததோ ஏககோட்டா²ஸம் க³ஹேத்வா ஸோளஸதா⁴ க³ணிதே தத்த² யோ ஏகேகோ கோட்டா²ஸோ, ஸோ கலபா⁴கோ³தி அதி⁴ப்பேதோ, தம்பி கலபா⁴க³ம் ந உபேதீதி வத³தி. உபனிதி⁴ந்தி ‘‘இமாய அயம் ஸதி³ஸீ’’தி உபமாபா⁴வேன க³ஹேத்வா ஸமீபே ட²பனம்பி.

யத்தா²யம் அனபி⁴ரதோ, தம் ப்³ரஹ்மசரியம் புப்³பே³ வுத்தம் பாகடஞ்சாதி தம் அனாமஸித்வா தத்த² அபி⁴ரதியம் ஆத³ரஜனனத்த²ம் அபி⁴ரம, நந்த³, அபி⁴ரம, நந்தா³’’தி ஆமேடி³தவஸேன வுத்தம். அஹம் தே பாடிபோ⁴கோ³தி கஸ்மா ப⁴க³வா தஸ்ஸ ப்³ரஹ்மசரியவாஸம் இச்ச²ந்தோ அப்³ரஹ்மசரியவாஸஸ்ஸ பாடிபோ⁴க³ம் உபக³ஞ்சி²? யத்த²ஸ்ஸ ஆரம்மணே ராகோ³ த³ள்ஹம் நிபதி, தம் ஆக³ந்துகாரம்மணே ஸங்காமேத்வா ஸுகே²ன ஸக்கா ஜஹாபேதுந்தி பாடிபோ⁴க³ம் உபக³ஞ்சி². அனுபுப்³பி³கதா²யம் ஸக்³க³கதா² இமஸ்ஸ அத்த²ஸ்ஸ நித³ஸ்ஸனம்.

அஸ்ஸோஸுந்தி கத²மஸ்ஸோஸும்? ப⁴க³வா ஹி ததா³ ஆயஸ்மந்தே நந்தே³ வத்தம் த³ஸ்ஸேத்வா அத்தனோ தி³வாட்டா²னம் க³தே உபட்டா²னம் ஆக³தானம் பி⁴க்கூ²னம் தம் பவத்திம் கதே²த்வா யதா² நாம குஸலோ புரிஸோ அனிக்க²ந்தம் ஆணிம் அஞ்ஞாய ஆணியா நீஹரித்வா புன தம் ஹத்தா²தீ³ஹி ஸஞ்சாலேத்வா அபனேதி, ஏவமேவ ஆசிண்ணவிஸயே தஸ்ஸ ராக³ம் ஆக³ந்துகவிஸயேன நீஹரித்வா புன தத³பி ப்³ரஹ்மசரியமக்³க³ஹேதும் கத்வா அபனேதுகாமோ ‘‘ஏத² தும்ஹே, பி⁴க்க²வே, நந்த³ம் பி⁴க்கு²ம் ப⁴தகவாதே³ன ச உபக்கிதகவாதே³ன ச ஸமுதா³சரதா²’’தி ஆணாபேஸி, ஏவம் பி⁴க்கூ² அஸ்ஸோஸும். கேசி பன ‘‘ப⁴க³வா ததா²ரூபம் இத்³தா⁴பி⁴ஸங்கா²ரம் அபி⁴ஸங்கா²ரேஸி, யதா² தே பி⁴க்கூ² தமத்த²ம் ஜானிம்ஸூ’’தி வத³ந்தி.

ப⁴தகவாதே³னாதி ப⁴தகோதி வாதே³ன. யோ ஹி ப⁴தியா கம்மம் கரோதி, ஸோ ப⁴தகோதி வுச்சதி, அயம்பி ஆயஸ்மா அச்ச²ராஸம்போ⁴க³னிமித்தம் ப்³ரஹ்மசரியம் சரந்தோ ப⁴தகோ விய ஹோதீதி வுத்தம் ‘‘ப⁴தகவாதே³னா’’தி. உபக்கிதகவாதே³னாதி யோ கஹாபணாதீ³ஹி கிஞ்சி கிணாதி, ஸோ உபக்கிதகோதி வுச்சதி, அயம்பி ஆயஸ்மா அச்ச²ரானம் ஹேது அத்தனோ ப்³ரஹ்மசரியம் கிணாதி, தஸ்மா ‘‘உபக்கிதகோ’’தி ஏவம் வசனேன. அத² வா ப⁴க³வதோ ஆணாய அச்ச²ராஸம்போ⁴க³ஸங்கா²தாய ப⁴தியா ப்³ரஹ்மசரியவாஸஸங்கா²தம் ஜீவிதம் பவத்தேந்தோ தாய ப⁴தியா யாபனே ப⁴க³வதா ப⁴ரியமானோ விய ஹோதீதி ‘‘ப⁴தகோ’’தி வுத்தோ, ததா² அச்ச²ராஸம்போ⁴க³ஸங்கா²தம் விக்கயம் ஆதா³தப்³ப³ம் கத்வா ப⁴க³வதோ ஆணத்தியம் திட்ட²ந்தோ தேன விக்கயேன ப⁴க³வதா உபக்கிதோ விய ஹோதீதி வுத்தம் ‘‘உபக்கிதகோ’’தி.

அட்டீயமானோதி பீளியமானோ து³க்கா²பியமானோ. ஹராயமானோதி லஜ்ஜமானோ. ஜிகு³ச்ச²மானோதி பாடிகுல்யதோ த³ஹந்தோ. ஏகோதி அஸஹாயோ. வூபகட்டோ²தி வத்து²காமேஹி கிலேஸகாமேஹி ச காயேன சேவ சித்தேன ச வூபகட்டோ². அப்பமத்தோதி கம்மட்டா²னே ஸதிம் அவிஜஹந்தோ. ஆதாபீதி காயிகசேதஸிகவீரியாதாபேன ஆதாபவா, ஆதாபேதி கிலேஸேதி ஆதாபோ, வீரியம். பஹிதத்தோதி காயே ச ஜீவிதே ச அனபேக்க²தாய பேஸிதத்தோ விஸ்ஸட்ட²அத்தபா⁴வோ, நிப்³பா³னே வா பேஸிதசித்தோ. ந சிரஸ்ஸேவாதி கம்மட்டா²னாரம்ப⁴தோ ந சிரேனேவ. யஸ்ஸத்தா²யாதி யஸ்ஸ அத்தா²ய. குலபுத்தாதி து³விதா⁴ குலபுத்தா ஜாதிகுலபுத்தா ச ஆசாரகுலபுத்தா ச, அயம் பன உப⁴யதா²பி குலபுத்தோ. ஸம்மதே³வாதி ஹேதுனா ச காரணேன ச. அகா³ரஸ்மாதி க⁴ரதோ. அனகா³ரியந்தி பப்³ப³ஜ்ஜம். கஸிவணிஜ்ஜாதி³கம்மஞ்ஹி அகா³ரஸ்ஸ ஹிதந்தி அகா³ரியம் நாம, தம் ஏத்த² நத்தீ²தி பப்³ப³ஜ்ஜா அனகா³ரியாதி வுச்சதி. பப்³ப³ஜந்தீதி உபக³ச்ச²ந்தி. தத³னுத்தரந்தி தம் அனுத்தரம். ப்³ரஹ்மசரியபரியோஸானந்தி மக்³க³ப்³ரஹ்மசரியஸ்ஸ பரியோஸானபூ⁴தம் அரஹத்தப²லம். தஸ்ஸ ஹி அத்தா²ய குலபுத்தா இத⁴ பப்³ப³ஜந்தி. தி³ட்டே²வ த⁴ம்மேதி தஸ்மிம்யேவ அத்தபா⁴வே. ஸயம் அபி⁴ஞ்ஞா ஸச்சி²கத்வாதி அத்தனாயேவ பஞ்ஞாய பச்சக்க²ம் கத்வா, அபரப்பச்சயேன ஞத்வாதி அத்தோ². உபஸம்பஜ்ஜ விஹாஸீதி பாபுணித்வா ஸம்பாதே³த்வா வா விஹாஸி. ஏவம் விஹரந்தோவ கீ²ணா ஜாதி…பே… அப்³ப⁴ஞ்ஞாஸீதி. இமினா அஸ்ஸ பச்சவேக்க²ணபூ⁴மி த³ஸ்ஸிதா.

தத்த² கீ²ணா ஜாதீதி ந தாவஸ்ஸ அதீதா ஜாதி கீ²ணா புப்³பே³வ கீ²ணத்தா, ந அனாக³தா அனாக³தத்தா ஏவ, ந பச்சுப்பன்னா விஜ்ஜமானத்தா. மக்³க³ஸ்ஸ பன அபா⁴விதத்தா யா ஏகசதுபஞ்சவோகாரப⁴வேஸு ஏகசதுபஞ்சக்க²ந்த⁴ப்பபே⁴தா³ ஜாதி உப்பஜ்ஜேய்ய, ஸா மக்³க³ஸ்ஸ பா⁴விதத்தா அனுப்பாத³த⁴ம்மதம் ஆபஜ்ஜனேன கீ²ணா. தம் ஸோ மக்³க³பா⁴வனாய பஹீனகிலேஸே பச்சவேக்கி²த்வா கிலேஸாபா⁴வேன விஜ்ஜமானம்பி கம்மம் ஆயதிம் அப்படிஸந்தி⁴கம் ஹோதீதி ஜானனேன அப்³ப⁴ஞ்ஞாஸி. வுஸிதந்தி வுத்த²ம் பரிவுத்த²ம் கதம் சரிதம், நிட்டா²பிதந்தி அத்தோ². ப்³ரஹ்மசரியந்தி மக்³க³ப்³ரஹ்மசரியம். புது²ஜ்ஜனகல்யாணகேன ஹி ஸத்³தி⁴ம் ஸத்த ஸேக்கா² ப்³ரஹ்மசரியவாஸம் வஸந்தி நாம, கீ²ணாஸவோ வுத்த²வாஸோ, தஸ்மா ஸோ அத்தனோ ப்³ரஹ்மசரியவாஸம் பச்சவேக்க²ந்தோ ‘‘வுஸிதம் ப்³ரஹ்மசரிய’’ந்தி அப்³ப⁴ஞ்ஞாஸி. கதம் கரணீயந்தி சதூஸு ஸச்சேஸு சதூஹி மக்³கே³ஹி பரிஞ்ஞாபஹானஸச்சி²கிரியாபா⁴வனாவஸேன ஸோளஸவித⁴ம்பி கிச்சம் நிட்டா²பிதம். புது²ஜ்ஜனகல்யாணகாத³யோ ஹி தம் கிச்சம் கரோந்தி நாம, கீ²ணாஸவோ கதகரணீயோ, தஸ்மா ஸோ அத்தனோ கரணீயம் பச்சவேக்க²ந்தோ ‘‘கதம் கரணீய’’ந்தி அப்³ப⁴ஞ்ஞாஸி. நாபரம் இத்த²த்தாயாதி ‘‘இதா³னி புன இத்த²பா⁴வாய ஏவம் ஸோளஸகிச்சபா⁴வாய கிலேஸக்க²யாய வா மக்³க³பா⁴வனாய கிச்சம் மே நத்தீ²’’தி அப்³ப⁴ஞ்ஞாஸி. நாபரம் இத்த²த்தாயாதி வா ‘‘இத்த²பா⁴வதோ இமஸ்மா ஏவம்பகாரா வத்தமானக்க²ந்த⁴ஸந்தானா அபரம் க²ந்த⁴ஸந்தானம் மய்ஹம் நத்தி², இமே பன பஞ்சக்க²ந்தா⁴ பரிஞ்ஞாதா திட்ட²ந்தி சி²ன்னமூலகா விய ருக்கா², தே சரிமகசித்தனிரோதே⁴ன அனுபாதா³னோ விய ஜாதவேதோ³ நிப்³பா³யிஸ்ஸந்தி, அபண்ணத்திகபா⁴வம் க³மிஸ்ஸந்தீ’’தி அப்³ப⁴ஞ்ஞாஸி. அஞ்ஞதரோதி ஏகோ. அரஹதந்தி ப⁴க³வதோ ஸாவகானம் அரஹந்தானம் அப்³ப⁴ந்தரோ ஏகோ மஹாஸாவகோ அஹோஸீதி அத்தோ².

அஞ்ஞதரா தே³வதாதி அதி⁴க³தமக்³கா³ ஏகா ப்³ரஹ்மதே³வதா. ஸா ஹி ஸயம் அஸேக்க²த்தா அஸேக்க²விஸயம் அப்³ப⁴ஞ்ஞாஸி. ஸேக்கா² ஹி தம் தம் ஸேக்க²விஸயம், புது²ஜ்ஜனா ச அத்தனோ புது²ஜ்ஜனவிஸயமேவ ஜானந்தி. அபி⁴க்கந்தாய ரத்தியாதி பரிக்கீ²ணாய ரத்தியா, மஜ்ஜி²மயாமேதி அத்தோ². அபி⁴க்கந்தவண்ணாதி அதிஉத்தமவண்ணா. கேவலகப்பந்தி அனவஸேஸேன ஸமந்ததோ. ஓபா⁴ஸேத்வாதி அத்தனோ பபா⁴ய சந்தோ³ விய ஸூரியோ விய ச ஜேதவனம் ஏகோபா⁴ஸம் கத்வா. தேனுபஸங்கமீதி ஆயஸ்மதோ நந்த³ஸ்ஸ அரஹத்தப்பத்திம் விதி³த்வா பீதிஸோமனஸ்ஸஜாதா ‘‘தம் ப⁴க³வதோ படிவேதே³ஸ்ஸாமீ’’தி உபஸங்கமி.

ஆஸவானம் க²யாதி ஏத்த² ஆஸவந்தீதி ஆஸவா, சக்கு²த்³வாராதீ³ஹி பவத்தந்தீதி அத்தோ². அத² வா ஆகோ³த்ரபு⁴ம் ஆப⁴வக்³க³ம் வா ஸவந்தீதி ஆஸவா, ஏதே த⁴ம்மே ஏதஞ்ச ஓகாஸம் அந்தோ கரித்வா பவத்தந்தீதி அத்தோ². சிரபாரிவாஸியட்டே²ன மதி³ராதி³ஆஸவா வியாதி ஆஸவா. ‘‘புரிமா, பி⁴க்க²வே, கோடி ந பஞ்ஞாயதி அவிஜ்ஜாயா’’திஆதி³வசனேஹி (அ. நி. 10.61) நேஸம் சிரபாரிவாஸியதா வேதி³தப்³பா³. அத² வா ஆயதம் ஸம்ஸாரது³க்க²ம் ஸவந்தி பஸவந்தீதிபி, ஆஸவா. புரிமோ சேத்த² அத்தோ² கிலேஸேஸு யுஜ்ஜதி, பச்சி²மோ கம்மேபி. ந கேவலஞ்ச கம்மகிலேஸா ஏவ ஆஸவா, அத² கோ² நானப்பகாரா உபத்³த³வாபி. ததா² ஹி ‘‘நாஹம், சுந்த³, தி³ட்ட²த⁴ம்மிகானம்யேவ ஆஸவானம் ஸம்வராய த⁴ம்மம் தே³ஸேமீ’’தி ஏத்த² (தீ³. நி. 3.182) விவாத³மூலபூ⁴தா கிலேஸா ஆஸவாதி ஆக³தா.

‘‘யேன தே³வூபபத்யஸ்ஸ, க³ந்த⁴ப்³போ³ வா விஹங்க³மோ;

யக்க²த்தம் யேன க³ச்சே²ய்ய, மனுஸ்ஸத்தஞ்ச அப்³ப³ஜே;

தே மய்ஹம் ஆஸவா கீ²ணா, வித்³த⁴ஸ்தா வினலீகதா’’தி. (அ. நி. 4.36) –

ஏத்த² தேபூ⁴மிகம் கம்மம் அவஸேஸா ச அகுஸலா த⁴ம்மா ஆஸவாதி ஆக³தா. ‘‘தி³ட்ட²த⁴ம்மிகானம் ஆஸவானம் ஸம்வராய, ஸம்பராயிகானம் ஆஸவானம் படிகா⁴தாயா’’தி (பாரா. 39) பரூபகா⁴தவிப்படிஸாரவத⁴ப³ந்தா⁴த³யோ சேவ அபாயது³க்க²பூ⁴தா ச நானப்பகாரா உபத்³த³வா.

தே பனேதே ஆஸவா வினயே – ‘‘தி³ட்ட²த⁴ம்மிகானம் ஆஸவானம் ஸம்வராய ஸம்பராயிகானம் ஆஸவானம் படிகா⁴தாயா’’தி (பாரா. 39) த்³விதா⁴ ஆக³தா. ஸளாயதனே ‘‘தயோமே, ஆவுஸோ, ஆஸவா – காமாஸவோ, ப⁴வாஸவோ, அவிஜ்ஜாஸவோ’’தி (தீ³. நி. 3.305) திதா⁴ ஆக³தா, ததா² அஞ்ஞேஸு ச ஸுத்தந்தேஸு. அபி⁴த⁴ம்மே தேயேவ தி³ட்டா²ஸவேன ஸத்³தி⁴ம் சதுதா⁴ ஆக³தா. நிப்³பே³தி⁴கபரியாயே ‘‘அத்தி², பி⁴க்க²வே, ஆஸவா நிரயகா³மினியா’’திஆதி³னா (அ. நி. 6.63) பஞ்சதா⁴ ஆக³தா. ச²க்கனிபாதே ‘‘அத்தி², பி⁴க்க²வே, ஆஸவா ஸம்வராய பஹாதப்³பா³’’திஆதி³னா (அ. நி. 6.58) நயேன ச²தா⁴ ஆக³தா. ஸப்³பா³ஸவபரியாயே (ம. நி. 1.22) தேயேவ த³ஸ்ஸனபஹாதப்³பே³ஹி ஸத்³தி⁴ம் ஸத்ததா⁴ ஆக³தா. இத⁴ பன அபி⁴த⁴ம்மனயேன சத்தாரோ ஆஸவா வேதி³தப்³பா³.

க²யாதி ஏத்த² பன ‘‘யோ ஆஸவானம் க²யோ பே⁴தோ³ பரிபே⁴தோ³’’திஆதீ³ஸு ஆஸவானம் ஸரஸபே⁴தோ³ ஆஸவக்க²யோதி வுத்தோ. ‘‘ஜானதோ அஹம், பி⁴க்க²வே, பஸ்ஸதோ ஆஸவானம் க²யம் வதா³மீ’’திஆதீ³ஸு (ம. நி. 1.15) ஆஸவானம் ஆயதிம் அனுப்பாதோ³ ஆஸவக்க²யோதி வுத்தோ.

‘‘ஸேக்க²ஸ்ஸ ஸிக்க²மானஸ்ஸ, உஜுமக்³கா³னுஸாரினோ;

க²யஸ்மிம் பட²மம் ஞாணம், ததோ அஞ்ஞா அனந்தரா’’தி. (இதிவு. 62) –

ஆதீ³ஸு மக்³கோ³ ஆஸவக்க²யோதி வுத்தோ. ‘‘ஆஸவானம் க²யா ஸமணோ ஹோதீ’’திஆதீ³ஸு (ம. நி. 1.438) ப²லம்.

‘‘பரவஜ்ஜானுபஸ்ஸிஸ்ஸ, நிச்சம் உஜ்ஜா²னஸஞ்ஞினோ;

ஆஸவா தஸ்ஸ வட்³ட⁴ந்தி, ஆரா ஸோ ஆஸவக்க²யா’’தி. –

ஆதீ³ஸு (த⁴. ப. 253) நிப்³பா³னம். இத⁴ பன ஆஸவானம் அச்சந்தக²யோ அனுப்பாதோ³ வா மக்³கோ³ வா ‘‘ஆஸவானம் க²யோ’’தி வுத்தோ.

அனாஸவந்தி படிபஸ்ஸத்³தி⁴வஸேன ஸப்³ப³ஸோ பஹீனாஸவம். சேதோவிமுத்திந்தி அரஹத்தப²லஸமாதி⁴ம். பஞ்ஞாவிமுத்திந்தி அரஹத்தப²லபஞ்ஞம். உப⁴யவசனம் மக்³கே³ விய ப²லேபி ஸமத²விபஸ்ஸனானம் யுக³னந்த⁴பா⁴வத³ஸ்ஸனத்த²ம். ஞாணந்தி ஸப்³ப³ஞ்ஞுதஞ்ஞாணம். தே³வதாய வசனஸமனந்தரமேவ ‘‘கத²ம் நு கோ²’’தி ஆவஜ்ஜேந்தஸ்ஸ ப⁴க³வதோ ஞாணம் உப்பஜ்ஜி ‘‘நந்தே³ன அரஹத்தம் ஸச்சி²கத’’ந்தி. ஸோ ஹி ஆயஸ்மா ஸஹாயபி⁴க்கூ²ஹி ததா² உப்பண்டி³யமானோ ‘‘பா⁴ரியம் வத மயா கதம், யோஹம் ஏவம் ஸ்வாக்கா²தே த⁴ம்மவினயே பப்³ப³ஜித்வா அச்ச²ரானம் படிலாபா⁴ய ஸத்தா²ரம் பாடிபோ⁴க³ம் அகாஸி’’ந்தி உப்பன்னஸம்வேகோ³ ஹிரோத்தப்பம் பச்சுபட்ட²பேத்வா க⁴டேந்தோ வாயமந்தோ அரஹத்தம் பத்வா சிந்தேஸி – ‘‘யம்னூனாஹம் ப⁴க³வந்தம் ஏதஸ்மா படிஸ்ஸவா மோசேய்ய’’ந்தி. ஸோ ப⁴க³வந்தம் உபஸங்கமித்வா அத்தனோ அதி⁴ப்பாயம் ஸத்து² ஆரோசேஸி. தேன வுத்தம் – ‘‘அத² கோ² ஆயஸ்மா நந்தோ³…பே… ஏதஸ்மா படிஸ்ஸவா’’தி. தத்த² படிஸ்ஸவாதி பாடிபோ⁴க³ப்படிஸ்ஸவா, ‘‘அச்ச²ரானம் படிலாபா⁴ய அஹம் படிபூ⁴தோ’’தி படிஞ்ஞாய.

அத²ஸ்ஸ ப⁴க³வா ‘‘யஸ்மா தயா அஞ்ஞா ஆராதி⁴தாதி ஞாதமேதம் மயா, தே³வதாபி மே ஆரோசேஸி, தஸ்மா நாஹம் படிஸ்ஸவா இதா³னி மோசேதப்³போ³ அரஹத்தப்பத்தியாவ மோசிதத்தா’’தி ஆஹ. தேன வுத்தம் ‘‘யதே³வ கோ² தே நந்தா³’’திஆதி³. தத்த² யதே³வாதி யதா³ ஏவ. தேதி தவ. முத்தோதி பமுத்தோ. இத³ம் வுத்தம் ஹோதி – யஸ்மிம்யேவ காலே ஆஸவேஹி தவ சித்தம் விமுத்தம், அத² அனந்தரமேவாஹம் ததோ பாடிபோ⁴க³தோ முத்தோதி.

ஸோபி ஆயஸ்மா விபஸ்ஸனாகாலேயேவ ‘‘யதே³வாஹம் இந்த்³ரியாஸம்வரம் நிஸ்ஸாய இமம் விப்பகாரம் பத்தோ, தமேவ ஸுட்டு² நிக்³க³ஹேஸ்ஸாமீ’’தி உஸ்ஸாஹஜாதோ ப³லவஹிரோத்தப்போ தத்த² ச கதாதி⁴காரத்தா இந்த்³ரியஸம்வரே உக்கட்ட²படிபத³ம்பி அக³மாஸி. வுத்தஞ்ஹேதம் –

‘‘ஸசே, பி⁴க்க²வே, நந்த³ஸ்ஸ புரத்தி²மா தி³ஸா ஆலோகேதப்³பா³ ஹோதி, ஸப்³ப³ம் சேதஸோ ஸமன்னாஹரித்வா நந்தோ³ புரத்தி²மம் தி³ஸம் ஆலோகேதி ‘ஏவம் மே புரத்தி²மம் தி³ஸம் ஆலோகயதோ ந அபி⁴ஜ்ஜா²தோ³மனஸ்ஸா பாபகா அகுஸலா த⁴ம்மா அன்வாஸ்ஸவேய்யு’ந்தி, இதிஹ தத்த² ஸம்பஜானோ ஹோதி.

‘‘ஸசே, பி⁴க்க²வே, நந்த³ஸ்ஸ பச்சி²மா…பே… உத்தரா… த³க்கி²ணா… உத்³த⁴ம்… அதோ⁴… அனுதி³ஸா ஆலோகேதப்³பா³ ஹோதி, ஸப்³ப³ம் சேதஸோ ஸமன்னாஹரித்வா நந்தோ³ அனுதி³ஸம் ஆலோகேதி ‘ஏவம் மே…பே… ஸம்பஜானோ ஹோதீ’’’தி (அ. நி. 8.9).

தேனேவ தம் ஆயஸ்மந்தம் ஸத்தா² ‘‘ஏதத³க்³க³ம், பி⁴க்க²வே, மம ஸாவகானம் பி⁴க்கூ²னம் இந்த்³ரியேஸு கு³த்தத்³வாரானம் யதி³த³ம் நந்தோ³’’தி (அ. நி. 1.230) ஏதத³க்³கே³ ட²பேஸி.

ஏதமத்த²ம் விதி³த்வாதி ஏதம் ஆயஸ்மதோ நந்த³ஸ்ஸ ஸப்³பா³ஸவே கே²பேத்வா ஸுகா²தீ³ஸு தாதி³பா⁴வப்பத்திஸங்கா²தம் அத்த²ம் ஸப்³பா³காரதோ விதி³த்வா. இமம் உதா³னந்தி தத³த்த²விபா⁴வனம் இமம் உதா³னம் உதா³னேஸி.

தத்த² யஸ்ஸ நித்திண்ணோ பங்கோதி யேன அரியபுக்³க³லேன அரியமக்³க³ஸேதுனா ஸப்³போ³ தி³ட்டி²பங்கோ ஸம்ஸாரபங்கோ ஏவ வா நிப்³பா³னபாரக³மனேன திண்ணோ. மத்³தி³தோ காமகண்ட³கோதி யேன ஸத்தானம் விஜ்ஜ²னதோ. ‘‘காமகண்ட³கோ’’தி லத்³த⁴னாமோ ஸப்³போ³ கிலேஸகாமோ ஸப்³போ³ காமவிஸூகோ அக்³க³ஞாணத³ண்டே³ன மத்³தி³தோ ப⁴க்³கோ³ அனவஸேஸதோ மதி²தோ. மோஹக்க²யம் அனுப்பத்தோதி ஏவம்பூ⁴தோ ச து³க்கா²தி³விஸயஸ்ஸ ஸப்³ப³ஸ்ஸ ஸம்மோஹஸ்ஸ கே²பனேன மோஹக்க²யம் பத்தோ, அரஹத்தப²லம் நிப்³பா³னஞ்ச அனுப்பத்தோ. ஸுக²து³க்கே²ஸு ந வேத⁴தீ ஸ பி⁴க்கூ²தி ஸோ பி⁴ன்னகிலேஸோ பி⁴க்கு² இட்டா²ரம்மணஸமாயோக³தோ உப்பன்னேஸு ஸுகே²ஸு அனிட்டா²ரம்மணஸமாயோக³தோ உப்பன்னேஸு து³க்கே²ஸு ச ந வேத⁴தி ந கம்பதி, தம் நிமித்தம் சித்தவிகாரம் நாபஜ்ஜதி. ‘‘ஸுக²து³க்கே²ஸூ’’தி ச தே³ஸனாமத்தம், ஸப்³பே³ஸுபி லோகத⁴ம்மேஸு ந வேத⁴தீதி வேதி³தப்³ப³ம்.

து³தியஸுத்தவண்ணனா நிட்டி²தா.

3. யஸோஜஸுத்தவண்ணனா

23. ததியே யஸோஜப்பமுகா²னீதி ஏத்த² யஸோஜோதி தஸ்ஸ தே²ரஸ்ஸ நாமம், தம் புப்³ப³ங்க³மம் கத்வா பப்³ப³ஜிதத்தா விசரணதோ ச தானி பஞ்ச பி⁴க்கு²ஸதானி ‘‘யஸோஜப்பமுகா²னீ’’தி வுத்தானி.

தேஸம் அயம் புப்³ப³யோகோ³ – அதீதே கிர கஸ்ஸபத³ஸப³லஸ்ஸ ஸாஸனே அஞ்ஞதரோ பி⁴க்கு² ஆரஞ்ஞகோ அரஞ்ஞே பிட்டி²பாஸாணே கதபண்ணகுடியம் விஹரதி. தஸ்மிஞ்ச ஸமயே பஞ்சஸதா சோரா கா³மகா⁴தகாதீ³னி கத்வா சோரிகாய ஜீவந்தா சோரகம்மம் கத்வா ஜனபத³மனுஸ்ஸேஹி அனுப³த்³தா⁴ பலாயமானா அரஞ்ஞம் பவிஸித்வா தத்த² கிஞ்சி க³ஹணம் வா படிஸரணம் வா அபஸ்ஸந்தா அவிதூ³ரே தம் பி⁴க்கு²ம் பாஸாணே நிஸின்னம் தி³ஸ்வா வந்தி³த்வா தம் பவத்திம் ஆசிக்கி²த்வா ‘‘அம்ஹாகம், ப⁴ந்தே, படிஸரணம் ஹோதா²’’தி யாசிம்ஸு. தே²ரோ ‘‘தும்ஹாகம் ஸீலஸதி³ஸம் படிஸரணம் நத்தி², ஸப்³பே³ பஞ்ச ஸீலானி ஸமாதி³யதா²’’தி ஆஹ. தே ‘‘ஸாதூ⁴’’தி ஸம்படிச்சி²த்வா ஸீலானி ஸமாதி³யிம்ஸு. தே²ரோ ‘‘தும்ஹே இதா³னி ஸீலேஸு பதிட்டி²தா, அத்தனோ ஜீவிதம் வினாஸயந்தேஸுபி மா மனம் பதோ³ஸயித்தா²’’தி ககசூபமவிதி⁴ம் (ம. நி. 1.222 ஆத³யோ) ஆசிக்கி². தே ‘‘ஸாதூ⁴’’தி ஸம்படிச்சி²ம்ஸு. அத² தே ஜானபதா³ தம் ஸம்பத்தா இதோ சிதோ ச க³வேஸந்தா தே சோரே தி³ஸ்வா ஸப்³பே³வ ஜீவிதா வோரோபேஸும். தே தேஸு மனோபதோ³ஸமத்தம்பி அகத்வா அக்க²ண்ட³ஸீலா காலம் கத்வா காமாவசரதே³வேஸு நிப்³ப³த்திம்ஸு. தேஸு ஜேட்ட²சோரோ ஜேட்ட²தே³வபுத்தோ அஹோஸி, இதரே தஸ்ஸேவ பரிவாரா.

தே அபராபரம் ஸம்ஸரந்தா ஏகம் பு³த்³த⁴ந்தரம் தே³வலோகே கே²பேத்வா அம்ஹாகம் ப⁴க³வதோ காலே தே³வலோகதோ சவித்வா ஜேட்ட²தே³வபுத்தோ ஸாவத்தி²னக³ரத்³வாரே கேவட்டகா³மே பஞ்சஸதகுலகா³மஜேட்ட²கஸ்ஸ கேவட்டஸ்ஸ புத்தோ ஹுத்வா நிப்³ப³த்தி, யஸோஜோதிஸ்ஸ நாமம் அகம்ஸு. இதரேபி அவஸேஸகேவட்டானம் புத்தா ஹுத்வா நிப்³ப³த்திம்ஸு. தே புப்³ப³ஸன்னிவாஸேன ஸப்³பே³பி ஸஹாயகா ஹுத்வா ஸஹபம்ஸுகீளிதம் கீளந்தா அனுபுப்³பே³ன வயப்பத்தா அஹேஸும், யஸோஜோ தேஸம் அக்³கோ³ அஹோஸி. தே ஸப்³பே³வ ஏகதோ ஹுத்வா ஜாலானி க³ஹேத்வா நதி³தளாகாதீ³ஸு மச்சே² ப³ந்த⁴ந்தா விசரந்தி.

அதே²கதி³வஸம் அசிரவதியா நதி³யா ஜாலே கி²த்தே ஸுவண்ணவண்ணோ மச்சோ² அந்தோஜாலே பாவிஸி. தம் தி³ஸ்வா ஸப்³பே³பி கேவட்டா ‘‘அம்ஹாகம் புத்தா மச்சே² ப³ந்த⁴ந்தா ஸுவண்ணவண்ணம் மச்ச²ம் ப³ந்தி⁴ம்ஸூ’’தி ஹட்ட²துட்டா² அஹேஸும். அத² தே பஞ்சஸதாபி ஸஹாயகா மச்ச²ம் நாவாய பக்கி²பித்வா நாவம் உக்கி²பித்வா ரஞ்ஞோ த³ஸ்ஸேஸும். ராஜா தம் தி³ஸ்வா ‘‘ப⁴க³வா ஏதஸ்ஸ ஸுவண்ணவண்ணகாரணம் ஜானிஸ்ஸதீ’’தி மச்ச²ம் கா³ஹாபேத்வா ப⁴க³வதோ த³ஸ்ஸேஸி. ஸத்தா² ‘‘அயம் கஸ்ஸபஸம்மாஸம்பு³த்³த⁴ஸ்ஸ ஸாஸனே ஓஸக்கமானே பப்³ப³ஜித்வா மிச்சா² படிபஜ்ஜந்தோ ஸாஸனம் ஓஸக்காபேத்வா நிரயே நிப்³ப³த்தோ ஏகம் பு³த்³த⁴ந்தரம் நிரயே பச்சித்வா ததோ சுதோ அசிரவதியம் மச்சோ² ஹுத்வா நிப்³ப³த்தோ’’தி வத்வா தஸ்ஸ மாதுப⁴கி³னீனஞ்ச நிரயே நிப்³ப³த்தபா⁴வம், தஸ்ஸ பா⁴திகத்தே²ரஸ்ஸ பரினிப்³பு³தபா⁴வஞ்ச தேனேவ கதா²பேத்வா இமிஸ்ஸா அட்டு²ப்பத்தியா கபிலஸுத்தம் தே³ஸேஸி.

ஸத்து² தே³ஸனம் ஸுத்வா தே பஞ்சஸதா கேவட்டபுத்தா ஸம்வேக³ஜாதா ஹுத்வா ப⁴க³வதோ ஸந்திகே பப்³ப³ஜித்வா, உபஸம்பன்னா ஹுத்வா விவேகவாஸம் வஸந்தா ப⁴க³வந்தம் த³ஸ்ஸனாய ஆக³மம்ஸு. தேன வுத்தம் – ‘‘தேன கோ² பன ஸமயேன யஸோஜப்பமுகா²னி பஞ்சமத்தானி பி⁴க்கு²ஸதானீ’’திஆதி³.

தத்த² தேதா⁴தி தே இத⁴. நேவாஸிகேஹீதி நிப³த்³த⁴வாஸம் வஸமானேஹி. படிஸம்மோத³மானாதி நேவாஸிகபி⁴க்கூ²ஹி ‘‘கச்சாவுஸோ, க²மனீய’’ந்திஆதி³னா படிஸந்தா²ரவஸேன ஸம்மோத³னாய கதாய ‘‘ஆமாவுஸோ, க²மனீய’’ந்திஆதி³னா, புன ஸம்மோத³மானா தேஹி ஸத்³தி⁴ம் ஸமப்பவத்தமோதா³. ஸேனாஸனானி பஞ்ஞாபயமானாதி ஆசரியுபஜ்ஜா²யானம் அத்தனோ ச பாபுணகானி ஸேனாஸனானி புச்சி²த்வா தேஹி நேவாஸிகேஹி தேஸம் ‘‘இத³ம் தும்ஹாகம் ஆசரியானம், இத³ம் தும்ஹாகம் உபஜ்ஜா²யானம், இத³ம் தும்ஹாகம் பாபுணாதீ’’தி ஸேனாஸனானி ஸம்விதா⁴பேத்வா அத்தனா ச தத்த² க³ந்த்வா, த்³வாரகவாடானி விவரித்வா, மஞ்சபீட²கடஸாரகாதீ³னி நீஹரித்வா பப்போ²டேத்வா யதா²டா²னம் ட²பனாதி³வஸேன பஞ்ஞாபேந்தா ச.

பத்தசீவரானி படிஸாமயமானாதி, ‘‘ப⁴ந்தே, இமம் மே பத்தம் ட²பேத², இத³ம் சீவரம், இத³ம் தா²லகம், இத³ம் உத³கதும்ப³ம், இத³ம் மே கத்தரயட்டி²’’ந்தி ஏவம் ஸமணபரிக்கா²ரம் ஸம்கோ³பயமானா. உச்சாஸத்³தா³ மஹாஸத்³தா³தி உத்³த⁴ம் க³தட்டே²ன உச்சோ ஸத்³தோ³ யேஸந்தே உச்சாஸத்³தா³ அகாரஸ்ஸ ஆகாரம் கத்வா. ஸமந்ததோ பத்த²டட்டே²ன மஹந்தோ ஸத்³தோ³ யேஸந்தே மஹாஸத்³தா³. கேவட்டா மஞ்ஞே மச்ச²விலோபேதி கேவட்டா விய மச்ச²விலும்பனே. யதா² நாம கேவட்டா உத³கே வட்டனதோ மச்ச²க்³க³ஹணத்த²ம் பவத்தனதோ ‘‘கேவட்டா’’தி லத்³த⁴னாமா மச்ச²ப³ந்தா⁴ மச்ச²க்³க³ஹணத்த²ம் ஜலே ஜாலம் பக்கி²பித்வா ‘‘பவிட்டோ² ந பவிட்டோ², க³ஹிதோ ந க³ஹிதோ’’திஆதி³னா உச்சாஸத்³த³மஹாஸத்³தா³ ஹோந்தி. யதா² ச தே மச்ச²பச்சி²ஆதீ³னி ட²பிதட்டா²னே மஹாஜனே க³ந்த்வா ‘‘மய்ஹம் ஏகம் மச்ச²ம் தே³த², மய்ஹம் ஏகம் மச்ச²பா²லம் தே³த², அமுகஸ்ஸ தி³ன்னோ மஹந்தோ, மய்ஹம் கு²த்³த³கோ’’திஆதீ³னி வத்வா விலும்பமானே தேஸம் படிஸேத⁴னாதி³வஸேன உச்சாஸத்³த³மஹாஸத்³தா³ ச ஹோந்தி, ஏவமேதே பி⁴க்கூ²தி த³ஸ்ஸேதி. தேதேதி தே ஏதே. கிம்னூதி கிஸ்ஸ நு, கிமத்த²ம் நூதி அத்தோ². தேமேதி தே இமே. பணாமேமீதி நீஹராமி. வோதி தும்ஹே. ந வோ மம ஸந்திகே வத்த²ப்³ப³ந்தி தும்ஹேஹி மய்ஹம் ஸந்திகே ந வஸிதப்³ப³ம். யே தும்ஹே மாதி³ஸஸ்ஸ பு³த்³த⁴ஸ்ஸ வஸனட்டா²னம் ஆக³ந்த்வா ஏவம் மஹாஸத்³த³ம் கரோத², அத்தனோ த⁴ம்மதாய வஸந்தா கிம் நாம ஸாருப்பம் கரிஸ்ஸத², தும்ஹாதி³ஸானம் மம ஸந்திகே வஸனகிச்சம் நத்தீ²தி தீ³பேதி. ஏவம் பணாமிதேஸு ச ப⁴க³வதா தேஸு ஏகபி⁴க்கு²பி ‘‘ப⁴க³வா தும்ஹே மஹாஸத்³த³மத்தகேன அம்ஹே பணாமேதா²’’தி வா அஞ்ஞம் வா கிஞ்சி படிவசனம் அவத்வா பு³த்³த⁴கா³ரவேன ஸப்³பே³ ப⁴க³வதோ வசனம் ஸம்படிச்ச²ந்தா ‘‘ஏவம், ப⁴ந்தே’’தி வத்வா நிக்க²மிம்ஸு. ஏவம் பன தேஸம் அஹோஸி ‘‘மயம் ஸத்தா²ரம் பஸ்ஸிஸ்ஸாம, த⁴ம்மம் ஸோஸ்ஸாம, ஸத்து² ஸந்திகே வஸிஸ்ஸாமாதி ஆக³தா, ஏவரூபஸ்ஸ பன க³ருனோ ஸத்து² ஸந்திகம் ஆக³ந்த்வா மஹாஸத்³த³ம் கரிம்ஹா, அம்ஹாகமேவ தோ³ஸோயம், பணாமிதம்ஹா ததோ, ந லத்³த⁴ம் ஸத்து² ஸந்திகே வத்து²ம், ஸமந்தபாஸாதி³கம் ஸுவண்ணவண்ணம் ஸரீரம் ஓலோகேதும், மது⁴ரஸ்ஸரேன தே³ஸிதம் த⁴ம்மம் ஸோது’’ந்தி. தே ப³லவதோ³மனஸ்ஸஜாதா ஹுத்வா பக்கமிம்ஸு.

ஸம்ஸாமேத்வாதி ஸுகு³த்தம் கத்வா. வஜ்ஜீதி ஏவம்னாமகோ ஜனபதோ³, வஜ்ஜீ நாம ஜானபதி³னோ ராஜகுமாரா, தேஸம் நிவாஸோ ஏகோபி ஜனபதோ³ ருள்ஹீவஸேன ‘‘வஜ்ஜீ’’த்வேவ வுச்சதி. தேன வுத்தம் ‘‘வஜ்ஜீஸூ’’தி. வக்³கு³முதா³தி ஏவம்னாம லோகஸ்ஸ புஞ்ஞஸம்மதா ஏகா நதீ³. ‘‘வக்³க³முதா³’’திபி பாடோ². அத்த²காமேனாதி கிஞ்சி பயோஜனம் அனபேக்கி²த்வா அத்த²மேவ இச்ச²ந்தேன. ஹிதேஸினாதி அத்த²ம் இச்ச²ந்தேன, ‘‘கிந்தி மே ஸாவகா வட்டது³க்கா² பரிமுச்சேய்யு’’ந்தி தஸ்ஸ அத்த²ஸங்கா²தஸ்ஸ அத்த²ஸ்ஸ வா ஹேதுபூ⁴தஸ்ஸ ஹிதஸ்ஸ ஏஸனஸீலேன. ததோ ஏவ அத்தனோ ஸரீரகே²த³ம் அக³ணேத்வா தூ³ரேபி வேனேய்யஸந்திகம் க³ந்த்வா அனுகம்பனதோ அனுகம்பகேன. தமேவ அனுகம்பம் உபாதா³ய மயம் பணாமிதா, ந அத்தனோ வேய்யாவச்சாதி³பச்சாஸீஸாய. யஸ்மா த⁴ம்மக³ருனோ பு³த்³தா⁴ ப⁴க³வந்தோ ஸம்மாபடிபத்தியாவ பூஜேதப்³பா³, யே உச்சாஸத்³த³கரணமத்தேபி பணாமேந்தி, தஸ்மா ஹந்த³ மயம், ஆவுஸோ, ததா² விஹாரம் கப்பேம ஸப்³ப³த்த² ஸதிஸம்பஜஞ்ஞயோகே³ன அபண்ணகப்படிபத³ம் பூரேந்தா யதா²க³ஹிதகம்மட்டா²னம் மத்த²கம் பாபேந்தா சதுஇரியாபத²விஹாரம் கப்பேம விஹராம. யதா² நோ விஹரதந்தி யதா² அம்ஹேஸு விஹரந்தேஸு, ப⁴க³வா அத்தமனோ அஸ்ஸ, ஸம்மாபடிபத்தியா பூஜாய ஆராதி⁴தோ ப⁴வேய்யாதி அத்தோ².

தேனேவந்தரவஸ்ஸேனாதி தஸ்மிம்யேவ அந்தரவஸ்ஸே மஹாபவாரணம் அனதிக்கமித்வாவ. ஸப்³பே³வ திஸ்ஸோ விஜ்ஜா ஸச்சா²கம்ஸூதி ஸப்³பே³யேவ தே பஞ்சஸதா பி⁴க்கூ² புப்³பே³னிவாஸானுஸ்ஸதிஞாணம் தி³ப்³ப³சக்கு²ஞாணம் ஆஸவக்க²யஞாணந்தி இமா திஸ்ஸோ புப்³பே³னிவுத்த²க்க²ந்த⁴ப்படிச்சா²த³கமோஹக்க²ந்தா⁴தீ³னம் வினிவிஜ்ஜ²னட்டே²ன விஜ்ஜா அத்தபச்சக்கா² அகம்ஸு. லோகியாபி⁴ஞ்ஞாஸு இமாயேவ த்³வே அபி⁴ஞ்ஞா ஆஸவக்க²யஞாணஸ்ஸ ப³ஹூபகாரா, ந ததா² தி³ப்³ப³ஸோதசேதோபரியஇத்³தி⁴வித⁴ஞாணானீதி த³ஸ்ஸனத்த²ம் விஜ்ஜத்தயமேவேத்த² தேஸம் பி⁴க்கூ²னம் அதி⁴க³மத³ஸ்ஸனவஸேன உத்³த⁴டம். ததா² ஹி வேரஞ்ஜஸுத்தே (அ. நி. 8.11) ப⁴க³வா வேரஞ்ஜப்³ராஹ்மணஸ்ஸ அத்தனோ அதி⁴க³மம் த³ஸ்ஸேந்தோ விஜ்ஜத்தயமேவ தே³ஸேஸி, ந தி³ப்³ப³ஸோதஞாணாதீ³னம் அபா⁴வதோ. ஏவம் தேஸம்பி பி⁴க்கூ²னம் விஜ்ஜமானானிபி தி³ப்³ப³ஸோதஞாணாதீ³னி ந உத்³த⁴டானி. ச²ளபி⁴ஞ்ஞா ஹி தே பி⁴க்கூ². ஏவஞ்ச கத்வா ‘‘வக்³கு³முதா³ய நதி³யா தீரே அந்தரஹிதா மஹாவனே கூடாகா³ரஸாலாயம் ப⁴க³வதோ ஸம்முகே² பாதுரஹேஸு’’ந்தி தேஸம் பி⁴க்கூ²னம் இத்³தி⁴வளஞ்ஜனம் வக்க²தி.

யதா²பி⁴ரந்தந்தி யதா²பி⁴ரதிம் யதா²ஜ்ஜா²ஸயம். பு³த்³தா⁴னஞ்ஹி ஏகஸ்மிம் டா²னே வஸந்தானம் சா²யூத³கவிபத்திம் வா அபா²ஸுகஸேனாஸனம் வா மனுஸ்ஸானம் அஸ்ஸத்³தா⁴தி³பா⁴வம் வா ஆக³ம்ம அனபி⁴ரதி நாம நத்தி², தேஸம் ஸம்பத்தியா ‘‘பா²ஸும் விஹராமா’’தி சிரவிஹாரோபி நத்தி². யத்த² பன ப⁴க³வதி விஹரந்தே மனுஸ்ஸா ஸரணேஸு வா பதிட்ட²ஹந்தி, ஸீலானி வா ஸமாதி³யந்தி பப்³ப³ஜந்தி, ஸோதாபத்திமக்³கா³தீ³னி வா பாபுணந்தி, ஸத்தா² தாஸு ஸம்பத்தீஸு தேஸம் பதிட்டா²பனத்த²ம் வஸதி, தத³பா⁴வே பக்கமதி. ததா³ ஹி ஸாவத்தி²யம் கத்தப்³ப³பு³த்³த⁴கிச்சம் நாஹோஸி. தேன வுத்தம் – ‘‘அத² கோ² ப⁴க³வா ஸாவத்தி²யம் யதா²பி⁴ரந்தம் விஹரித்வா யேன வேஸாலீ தேன சாரிகம் பக்காமீ’’தி.

சாரிகம் சரமானோதி அத்³தா⁴னக³மனம் க³ச்ச²ந்தோ. சாரிகா ச நாமேஸா ப⁴க³வதோ து³விதா⁴ துரிதசாரிகா அதுரிதசாரிகாதி. தத்த² தூ³ரேபி போ³த⁴னேய்யபுக்³க³லம் தி³ஸ்வா தஸ்ஸ போ³த⁴னத்த²ம் ஸஹஸா க³மனம் துரிதசாரிகா நாம, ஸா மஹாகஸ்ஸபபச்சுக்³க³மனாதீ³ஸு த³ட்ட²ப்³பா³. யா பன கா³மனிக³மராஜதா⁴னீபடிபாடியா தே³வஸிகம் யோஜனத்³த⁴யோஜனவஸேன பிண்ட³பாதசரியாதீ³ஹி லோகம் அனுக்³க³ண்ஹந்தோ க³ச்ச²தி, அயம் அதுரிதசாரிகா நாம, அயமேவ இதா⁴தி⁴ப்பேதா. தத³வஸரீதி தேன அவஸரி, தம் வா அவஸரி, தத்த² அவஸரி, பாவிஸீதி அத்தோ².

தத்ராதி தஸ்ஸம். ஸுத³ந்தி நிபாதமத்தம். வேஸாலியந்தி திக்க²த்தும் விஸாலீபூ⁴தத்தா ‘‘வேஸாலீ’’தி லத்³த⁴னாமே லிச்ச²விராஜூனம் நக³ரே. மஹாவனேதி மஹாவனம் நாம ஸயம்ஜாதம் அரோபிமம் ஸபரிச்சே²த³ம் மஹந்தம் வனம். கபிலவத்து²ஸாமந்தா பன மஹாவனம் ஹிமவந்தேன ஸஹ ஏகாப³த்³த⁴ம் அபரிச்சே²த³ம் ஹுத்வா மஹாஸமுத்³த³ம் ஆஹச்ச டி²தம். இத³ம் தாதி³ஸம் ந ஹோதி, ஸபரிச்சே²த³ம் மஹந்தம் வனந்தி மஹாவனம். கூடாகா³ரஸாலாயந்தி தஸ்மிம் மஹாவனே ப⁴க³வந்தம் உத்³தி³ஸ்ஸ கதே ஆராமே கூடாகா³ரம் அந்தோ கத்வா ஹம்ஸவட்டகச்ச²ன்னேன கதா ஸப்³பா³காரஸம்பன்னா பு³த்³த⁴ஸ்ஸ ப⁴க³வதோ க³ந்த⁴குடி கூடாகா³ரஸாலா நாம, தஸ்ஸம் கூடாகா³ரஸாலாயம். வக்³கு³முதா³தீரியானந்தி வக்³கு³முதா³தீரவாஸீனம். சேதஸா சேதோ பரிச்ச மனஸி கரித்வாதி அத்தனோ சித்தேன தேஸம் சித்தம் பரிச்சி²ஜ்ஜ மனஸி கரித்வா, சேதோபரியஞாணேன வா ஸப்³ப³ஞ்ஞுதஞ்ஞாணேன வா தேஹி அதி⁴க³தவிஸேஸம் ஜானித்வாதி அத்தோ².

ஆலோகஜாதா வியாதி ஸஞ்ஜாதாலோகா விய. இதரம் தஸ்ஸேவ வேவசனம், சந்த³ஸஹஸ்ஸஸூரியஸஹஸ்ஸேஹி ஓபா⁴ஸிதா வியாதி அத்தோ². யஸ்மா தே யஸோஜப்பமுகா² பஞ்சஸதா பி⁴க்கூ² ஸப்³ப³ஸோ அவிஜ்ஜந்த⁴காரவித⁴மனேன ஆலோகபூ⁴தா ஓபா⁴ஸபூ⁴தா ஹுத்வா விஹரந்தி, தஸ்மா ப⁴க³வா தேஹி டி²ததி³ஸாய ‘‘ஆலோகஜாதா விய மே, ஆனந்த³, ஏஸா தி³ஸா’’திஆதி³னா வண்ணப⁴ணனாபதே³ஸேன தே பி⁴க்கூ² பஸம்ஸதி. தேன வுத்தம் – ‘‘யஸ்ஸம் தி³ஸாயம் வக்³கு³முதா³தீரியா பி⁴க்கூ² விஹரந்தீ’’தி. அப்படிகூலாதி ந படிகூலா, மனாபா மனோஹராதி அத்தோ². யஸ்மிஞ்ஹி பதே³ஸே ஸீலாதி³கு³ணஸம்பன்னா மஹேஸினோ விஹரந்தி, தம் கிஞ்சாபி உக்கூலவிகூலவிஸமது³க்³கா³காரம், அத² கோ² மனுஞ்ஞம் ரமணீயமேவ. வுத்தஞ்ஹேதம் –

‘‘கா³மே வா யதி³ வாரஞ்ஞே, நின்னே வா யதி³ வா த²லே;

யத்த² அரஹந்தோ விஹரந்தி, தம் பூ⁴மிராமணேய்யக’’ந்தி. (த⁴. ப. 98);

பஹிணேய்யாஸீதி பேஸேய்யாஸி. ஸத்தா² ஆயஸ்மந்தானம் த³ஸ்ஸனகாமோதி தேஸம் பி⁴க்கூ²னம் ஸந்திகே பஹேணாகாரத³ஸ்ஸனம். இதி ப⁴க³வா யத³த்த²ம் தே பி⁴க்கூ² பணாமேஸி, தமத்த²ம் மத்த²கப்பத்தம் தி³ஸ்வா ஆரத்³த⁴சித்தோ தேஸம் த³ஸ்ஸனகாமதம் தே²ரஸ்ஸ ஆரோசேஸி. ஏவம் கிரஸ்ஸ அஹோஸி ‘‘அஹம் இமே உச்சாஸத்³த³மஹாஸத்³த³கரணே பணாமேஸ்ஸாமி, அத² தே ப⁴த்³ரோ அஸ்ஸாஜானீயோ விய கஸாபி⁴கா⁴தேன, தேன சோதி³தா ஸம்வேக³ப்பத்தா மமாராத⁴னத்த²ம் அரஞ்ஞம் பவிஸித்வா க⁴டேந்தா வாயமந்தா கி²ப்பமேவ அரஹத்தம் ஸச்சி²கரிஸ்ஸந்தீ’’தி. இதா³னி தே அக்³க³ப²லப்பத்தே தி³ஸ்வா தாய அரஹத்தப்பத்தியா ஆராதி⁴தசித்தோ தேஸம் த³ஸ்ஸனகாமோ ஹுத்வா ஏவம் த⁴ம்மப⁴ண்டா³கா³ரிகம் ஆணாபேஸி.

ஸோ பி⁴க்கூ²தி ஆனந்த³த்தே²ரேன ததா² ஆணத்தோ ச²ளபி⁴ஞ்ஞோ ஏகோ பி⁴க்கு². பமுகே²தி ஸம்முகே². ஆனேஞ்ஜஸமாதி⁴னாதி சதுத்த²ஜ்ஜா²னபாத³கேன அக்³க³ப²லஸமாதி⁴னா, ‘‘அரூபஜ்ஜா²னபாத³கேனா’’திபி வத³ந்தி. ‘‘ஆனேஞ்ஜேன ஸமாதி⁴னா’’திபி பாடோ². கஸ்மா பன ப⁴க³வா தேஸம் பி⁴க்கூ²னம் ஆக³மனம் ஜானந்தோ படிஸந்தா²ரம் அகத்வா ஸமாபத்திம்யேவ ஸமாபஜ்ஜி? தேஸம் அத்தனா ஸமாபன்னஸமாபத்திம் ஜானித்வா ஸமாபஜ்ஜனத்த²ம், தேஸம் புப்³பே³ பணாமிதானம் இதா³னி அத்தனா ஸமானஸம்போ⁴க³த³ஸ்ஸனத்த²ம், ஆனுபா⁴வதீ³பனத்த²ம், வினா வசீபே⁴தே³ன அஞ்ஞப்³யாகரணதீ³பனத்த²ஞ்ச. அபரே பனாஹு ‘‘புப்³பே³ பணாமிதானம் இதா³னி அத்தனோ ஸந்திகம் ஆக³தானம் அனுத்தரஸுகு²ப்பாத³னேன அனஞ்ஞஸாதா⁴ரணபடிஸந்தா²ரகரணத்த²’’ந்தி. தேபி ஆயஸ்மந்தோ ப⁴க³வதோ அஜ்ஜா²ஸயம் ஞத்வா தம்யேவ ஸமாபத்திம் ஸமாபஜ்ஜிம்ஸு. தேன வுத்தம் – ‘‘கதமேன நு கோ² ப⁴க³வா விஹாரேன ஏதரஹி விஹரதீ’’திஆதி³.

ஏத்த² ச ரூபாவசரசதுத்த²ஜ்ஜா²னம் கோஸஜ்ஜாதீ³னம் பாரிபந்திகத⁴ம்மானம் ஸுவிதூ³ரபா⁴வதோ இத்³தி⁴யா மூலபூ⁴தேஹி அனோணமனாதீ³ஹி ஸோளஸஹி வோதா³னத⁴ம்மேஹி ஸமன்னாக³மனதோ ஆனேஞ்ஜப்பத்தம் ஸயம் அனிஞ்ஜனட்டே²ன ஆனேஞ்ஜந்தி வுச்சதி. வுத்தஞ்ஹேதம் –

‘‘அனோணதம் சித்தம் கோஸஜ்ஜே ந இஞ்ஜதீதி ஆனேஞ்ஜம். அனுண்ணதம் சித்தம் உத்³த⁴ச்சே ந இஞ்ஜதீதி ஆனேஞ்ஜம். அனபி⁴ரதம் சித்தம் ராகே³ ந இஞ்ஜதீதி ஆனேஞ்ஜம். அனபனதம் சித்தம் ப்³யாபாதே³ ந இஞ்ஜதீதி ஆனேஞ்ஜம். அனிஸ்ஸிதம் சித்தம் தி³ட்டி²யா ந இஞ்ஜதீதி ஆனேஞ்ஜம். அப்படிப³த்³த⁴ம் சித்தம் ச²ந்த³ராகே³ ந இஞ்ஜதீதி ஆனேஞ்ஜம். விப்பமுத்தம் சித்தம் காமராகே³ ந இஞ்ஜதீதி ஆனேஞ்ஜம். விஸம்யுத்தம் சித்தம் கிலேஸே ந இஞ்ஜதீதி ஆனேஞ்ஜம். விமரியாதி³கதம் சித்தம் கிலேஸமரியாதா³ய ந இஞ்ஜதீதி ஆனேஞ்ஜம். ஏகத்தக³தம் சித்தம் நானத்தகிலேஸே ந இஞ்ஜதீதி ஆனேஞ்ஜம். ஸத்³தா⁴ய பரிக்³க³ஹிதம் சித்தம் அஸ்ஸத்³தி⁴யே ந இஞ்ஜதீதி ஆனேஞ்ஜம். வீரியேன பரிக்³க³ஹிதம் சித்தம் கோஸஜ்ஜே ந இஞ்ஜதீதி ஆனேஞ்ஜம். ஸதியா பரிக்³க³ஹிதம் சித்தம் பமாதே³ ந இஞ்ஜதீதி ஆனேஞ்ஜம். ஸமாதி⁴னா பரிக்³க³ஹிதம் சித்தம் உத்³த⁴ச்சே ந இஞ்ஜதீதி ஆனேஞ்ஜம். பஞ்ஞாய பரிக்³க³ஹிதம் சித்தம் அவிஜ்ஜாய ந இஞ்ஜதீதி ஆனேஞ்ஜம். ஓபா⁴ஸக³தம் சித்தம் அவிஜ்ஜந்த⁴காரே ந இஞ்ஜதீதி ஆனேஞ்ஜ’’ந்தி.

ரூபாவசரசதுத்த²ஜ்ஜா²னமேவ ச ரூபவிராக³பா⁴வனாவஸேன பவத்திதம், ஆரம்மணவிபா⁴கே³ன சதுப்³பி³த⁴ம் அரூபாவசரஜ்ஜா²னந்தி ஏதேஸம் பஞ்சன்னம் ஜா²னானம் ஆனேஞ்ஜவோஹாரோ. தேஸம் யம் கிஞ்சி பாத³கம் கத்வா ஸமாபன்னா அரஹத்தப²லஸமாபத்தி ஆனேஞ்ஜஸமாதீ⁴தி போராணா.

அபி⁴க்கந்தாயாதி அதீதாய. நிக்க²ந்தேதி நிக்³க³தே, அபக³தேதி அத்தோ². துண்ஹீ அஹோஸீதி ப⁴க³வா அரியேன துண்ஹீபா⁴வேன துண்ஹீ அஹோஸி. உத்³த⁴ஸ்தே அருணேதி உக்³க³தே அருணே, அருணோ நாம புரத்தி²மதி³ஸாய ஸூரியோத³யதோ புரேதரமேவ உட்டி²தோபா⁴ஸோ. நந்தி³முகி²யாதி ரத்தியா அருணஸ்ஸ உக்³க³தத்தா ஏவ அருணப்பபா⁴ய ஸூரியாலோகூபஜீவினோ ஸத்தே நந்தா³பனமுகி²யா விய ரத்தியா ஜாதாய, விபா⁴யமானாயாதி அத்தோ².

தம்ஹா ஸமாதி⁴ம்ஹா வுட்ட²ஹித்வாதி யதா²பரிச்சே²த³ம் ததோ ஆனேஞ்ஜஸமாதி⁴தோ அரஹத்தப²லஸமாபத்திதோ உட்டா²ய. ஸசே கோ² த்வம், ஆனந்த³, ஜானேய்யாஸீதி ப⁴க³வா ‘‘இமே ச பி⁴க்கூ² ஏத்தகம் காலம் இமினா நாம ஸமாபத்திஸுகே²ன வீதினாமேந்தீ’’தி, ஆனந்த³, யதி³ த்வம் ஜானேய்யாஸி. ஏத்தகம்பி தே நப்படிபா⁴ஸேய்யாதி லோகியபடிஸம்மோத³னம் ஸந்தா⁴ய யதி³த³ம் தே ‘‘அபி⁴க்கந்தா, ப⁴ந்தே, ரத்தீ’’திஆதி³னா திக்க²த்தும் படிபா⁴னம் உபட்டி²தம், தயித³ம் ஏத்தகம்பி தே ந உபட்ட²ஹேய்ய. யஸ்மா ச கோ² த்வம், ஆனந்த³, ஸேக்கோ² அஸேக்க²ம் ஸமாபத்திவிஹாரம் ந ஜானாஸி, தஸ்மா மம் இமேஸம் பி⁴க்கூ²னம் லோகியபடிஸம்மோத³னம் காரேதும் உஸ்ஸுக்கம் ஆபஜ்ஜி. அஹம் பன இமேஹி பி⁴க்கூ²ஹி ஸத்³தி⁴ம் லோகுத்தரபடிஸம்மோத³னேனேவ தியாமரத்திம் வீதினாமேஸிந்தி த³ஸ்ஸேந்தோ ப⁴க³வா ஆஹ – ‘‘அஹஞ்ச, ஆனந்த³, இமானி ச பஞ்ச பி⁴க்கு²ஸதானி ஸப்³பே³வ ஆனேஞ்ஜஸமாதி⁴னா நிஸீதி³ம்ஹா’’தி.

ஏதமத்த²ம் விதி³த்வாதி ஏதம் தேஸம் பி⁴க்கூ²னம் அத்தனா ஸமம் ஆனேஞ்ஜஸமாதி⁴ஸமாபஜ்ஜனஸமத்த²தாஸங்கா²தம் வஸீபா⁴வத்த²ம் ஸப்³பா³காரதோ விதி³த்வா. இமம் உதா³னந்தி இமம் தேஸம் பி⁴க்கூ²னம் அனவஸேஸராகா³தி³ப்பஹானஸம்ஸித்³தி⁴தாதி³ஸபா⁴வதீ³பனம் உதா³னம் உதா³னேஸி.

தத்த² யஸ்ஸ ஜிதோ காமகண்ட³கோதி குஸலபக்க²விஜ்ஜ²னட்டே²ன கண்ட³கபூ⁴தோ கிலேஸகாமோ யேன அரியபுக்³க³லேன அனவஸேஸம் ஜிதோ பஹீனோ, ஏதேனஸ்ஸ அனுனயாபா⁴வம் த³ஸ்ஸேதி. ‘‘கா³மகண்டகோ’’திபி பாடோ². தஸ்ஸத்தோ² – கா³மே கண்டகோ கண்டகட்டா²னியோ ஸகலோ வத்து²காமோ யஸ்ஸ ஜிதோதி. ஜயோ சஸ்ஸ தப்படிப³த்³த⁴ச²ந்த³ராக³ப்பஹானேனேவ வேதி³தப்³போ³, தேன தேஸம் அனாகா³மிமக்³கோ³ வுத்தோ ஹோதி. அக்கோஸோ ச ஜிதோதி ஸம்ப³ந்தோ⁴. வதோ⁴ ச ப³ந்த⁴னஞ்சாதி ஏத்தா²பி ஏஸேவ நயோ. தேஸு அக்கோஸஜயேன வசீது³ச்சரிதாபா⁴வோ, இதரேன காயது³ச்சரிதாபா⁴வோ த³ஸ்ஸிதோ. தேன தம்னிமித்தகஸ்ஸ ப்³யாபாத³ஸ்ஸ அனவஸேஸப்பஹானேன ததியமக்³கோ³ வுத்தோ ஹோதி. அத² வா அக்கோஸாதி³ஜயவசனேன ததியமக்³கோ³ வுத்தோ ஹோதி, அக்கோஸாதீ³னம் அச்சந்தக²மனம் தத்த² பகாஸிதம் ஹோதி, உப⁴யதா²பி நேஸம் விரோதா⁴பா⁴வம் த³ஸ்ஸேதி. பப்³ப³தோ விய ஸோ டி²தோ அனேஜோதி ஏஜா வுச்சதி சலனகிலேஸபரிபந்தோ², ஏஜாஹேதூனம் அவஸேஸகிலேஸானம் அபா⁴வேன அனேஜோ, அனேஜத்தாயேவ ஸப்³ப³கிலேஸேஹி பரவாத³வாதேஹி ச அகம்பனீயத்தா டி²தோ ஏகக்³க⁴னபப்³ப³தஸதி³ஸோ. ஸுக²து³க்கே²ஸு ந வேத⁴தி ஸ பி⁴க்கூ²தி ஸோ பி⁴ன்னகிலேஸோ பி⁴க்கு² ஸுக²து³க்க²னிமித்தம் ந கம்பதீதி ஹேட்டா² வுத்தனயேனேவ அத்தோ² வேதி³தப்³போ³. இதி ப⁴க³வா தேஸம் பஞ்சஸதானம் பி⁴க்கூ²னம் அரஹத்தாதி⁴க³மேன தாதி³பா⁴வப்பத்திம் ஏகஜ்ஜ²ம் கத்வா ஏகபுக்³க³லாதி⁴ட்டா²னம் உதா³னம் உதா³னேஸீதி.

ததியஸுத்தவண்ணனா நிட்டி²தா.

4. ஸாரிபுத்தஸுத்தவண்ணனா

24. சதுத்தே² பரிமுக²ம் ஸதிம் உபட்ட²பேத்வாதி ஆரம்மணாபி⁴முக²ம் ஸதிம் ட²பயித்வா முக²ஸமீபே கத்வா. ததா² ஹி விப⁴ங்கே³ வுத்தம் –

‘‘அயம் ஸதி உபட்டி²தா ஹோதி ஸுபட்டி²தா நாஸிகக்³கே³ வா முக²னிமித்தே வா, தேன வுச்சதி பரிமுக²ம் ஸதிம் உபட்ட²பேத்வா’’தி (விப⁴. 537).

அத² வா ‘‘பரீதி பரிக்³க³ஹட்டோ², முக²ந்தி நிய்யானட்டோ², ஸதீதி உபட்டா²னட்டோ², தேன வுச்சதி ‘பரிமுக²ம் ஸதி’’’ந்தி. ஏவம் படிஸம்பி⁴தா³யம் (படி. ம. 1.164) வுத்தனயேனபேத்த² அத்தோ² வேதி³தப்³போ³. தத்ராயம் ஸங்கே²பத்தோ² – பரிக்³க³ஹிதனிய்யானஸதிம் கத்வாதி. நிய்யானந்தி ச ஸதியா ஓகா³ஹிதப்³ப³ம் ஆரம்மணம் த³ட்ட²ப்³ப³ம். ஏத்த² ச புரிமோ பச்சி²மோ ச அத்தோ² ஸப்³ப³ஸங்கா³ஹகவஸேன, இதரோ ஸமாபத்தியா புப்³ப³பா⁴க³ஸமன்னாஹாரவஸேன த³ட்ட²ப்³போ³. ஸதீதி வா ஸதிஸீஸேன ஜா²னம் வுத்தம் ‘‘யே காயக³தாஸதிம் பரிபு⁴ஞ்ஜந்தீ’’திஆதீ³ஸு (அ. நி. 1.600) விய. கதமம் பன தம் ஜா²னந்தி? ரூபாவசரசதுத்த²ஜ்ஜா²னம் பாத³கம் கத்வா ஸமாபன்னம் அரஹத்தப²லஜ்ஜா²னம். கத²ம் பனேதம் ஜானிதப்³ப³ந்தி? ஆனேஞ்ஜஸமாதி⁴யோகே³ன தே²ரஸ்ஸ ஸவிஸேஸம் நிச்சலபா⁴வம் கேனசி அகம்பனீயதஞ்ச பப்³ப³தோபமாய பகாஸேந்தோ ப⁴க³வா இமம் உதா³னம் அபா⁴ஸீதி கா³தா²ய ஏவ அயமத்தோ² விஞ்ஞாயதி. ந சாயம் நிஸஜ்ஜா தே²ரஸ்ஸ ஸச்சப்படிவேதா⁴ய, அத² கோ² தி³ட்ட²த⁴ம்மஸுக²விஹாராய. புப்³பே³யேவ ஹி ஸூகரக²தலேணே (ம. நி. 2.201) அத்தனோ பா⁴கி³னேய்யஸ்ஸ தீ³க⁴னக²பரிப்³பா³ஜகஸ்ஸ ப⁴க³வதி த⁴ம்மம் தே³ஸேந்தே அயம் மஹாதே²ரோ ஸச்சப்படிவேத⁴கிச்சம் மத்த²கம் பாபேஸீதி.

ஏதமத்த²ந்தி ஏதம் தே²ரஸ்ஸ ஆனேஞ்ஜஸமாதி⁴யோகே³ன தாதி³பா⁴வப்பத்தியா ச கேனசி அகம்பனீயதாஸங்கா²தம் அத்த²ம் ஸப்³பா³காரதோ விதி³த்வா தத³த்த²விபா⁴வனம் இமம் உதா³னம் உதா³னேஸி.

தத்த² யதா²பி பப்³ப³தோ ஸேலோதி யதா² ஸிலாமயோ ஏகக்³க⁴னஸிலாபப்³ப³தோ, ந பம்ஸுபப்³ப³தோ ந மிஸ்ஸகபப்³ப³தோதி அத்தோ². அசலோ ஸுப்பதிட்டி²தோதி ஸுப்பதிட்டி²தமூலோ பகதிவாதேஹி அசலோ அகம்பனீயோ ஹோதி. ஏவம் மோஹக்க²யா பி⁴க்கு², பப்³ப³தோவ ந வேத⁴தீதி மோஹஸ்ஸ அனவஸேஸப்பஹானா மோஹமூலகத்தா ச ஸப்³பா³குஸலானம் பஹீனஸப்³பா³குஸலோ பி⁴க்கு², யதா² ஸோ பப்³ப³தோ பகதிவாதேஹி, ஏவம் லோகத⁴ம்மேஹி ந வேத⁴தி ந கம்பதி. மோஹக்க²யோதி வா யஸ்மா நிப்³பா³னம் அரஹத்தஞ்ச வுச்சதி, தஸ்மா மோஹக்க²யஸ்ஸ ஹேது நிப்³பா³னஸ்ஸ அரஹத்தஸ்ஸ வா அதி⁴க³தத்தா சதூஸு அரியஸச்சேஸு ஸுப்பதிட்டி²தோ அஸமாபன்னகாலேபி யதா²வுத்தபப்³ப³தோ விய ந கேனசி வேத⁴தி, பகே³வ ஸமாபன்னகாலேதி அதி⁴ப்பாயோ.

சதுத்த²ஸுத்தவண்ணனா நிட்டி²தா.

5. மஹாமோக்³க³ல்லானஸுத்தவண்ணனா

25. பஞ்சமே காயக³தாய ஸதியாதி காயானுபஸ்ஸனாவஸேன காயே க³தாய காயாரம்மணாய ஸதியா, இத்த²ம்பூ⁴தலக்க²ணே இத³ம் கரணவசனம். அஜ்ஜ²த்தந்தி இத⁴ அஜ்ஜ²த்தம் நாம நியகஜ்ஜ²த்தம், தஸ்மா அத்தனி அத்தஸந்தானேதி அத்தோ². அத² வா யஸ்மா கம்மட்டா²னபூ⁴தோ கேஸாதி³கோ த்³வத்திம்ஸகோட்டா²ஸஸமுதா³யோ இத⁴ காயோதி அதி⁴ப்பேதோ, தஸ்மா அஜ்ஜ²த்தந்தி பத³ஸ்ஸ கோ³சரஜ்ஜ²த்தந்தி அத்தோ² வேதி³தப்³போ³. ஸூபட்டி²தாயாதி நியகஜ்ஜ²த்தபூ⁴தே கோ³சரஜ்ஜ²த்தபூ⁴தே வா காயே ஸுட்டு² உபட்டி²தாய. கா பனாயம் ஸதி, யா ‘‘அஜ்ஜ²த்தம் ஸூபட்டி²தா’’தி வுத்தா? ய்வாயம் ப⁴க³வதா ‘‘அத்தி² இமஸ்மிம் காயே கேஸா லோமா’’திஆதி³னா (தீ³. நி. 2.377; ம. நி. 1.110; கு². பா. 3.த்³வத்திம்ஸாகார) அஜ்ஜ²த்தகேஸாதி³கோ த்³வத்திம்ஸாகாரோ காயோ வுத்தோ, தத்த² யா படிகூலமனஸிகாரம் பவத்தேந்தஸ்ஸ உபசாரப்பனாவஸேன காயே உபட்டி²தா ஸதி, ஸா ‘‘காயக³தா ஸதீ’’தி வுச்சதி. யதா² சாயம், ஏவம் ஆனாபானசதுஇரியாபத²ஸதிஸம்பஜஞ்ஞானம் வஸேன உத்³து⁴மாதகவினீலகாதி³வஸேன ச மனஸிகாரம் பவத்தேந்தஸ்ஸ யதா²ரஹம் உபசாரப்பனாவஸேன காயே உபட்டி²தா ஸதி ‘‘காயக³தா ஸதீ’’தி வுச்சதி. இத⁴ பன அஜ்ஜ²த்தம் காயக³தா ஸதி பத²வீஆதி³கா சதஸ்ஸோ தா⁴துயோ ஸஸம்பா⁴ரஸங்கே²பாதீ³ஸு சதூஸு யேன கேனசி ஏகேனாகாரேன வவத்த²பேத்வா தேஸம் அனிச்சாதி³லக்க²ணஸல்லக்க²ணவஸேன உபட்டி²தா விபஸ்ஸனாஸம்பயுத்தா ஸதி ‘‘காயக³தா ஸதீ’’தி அதி⁴ப்பேதா. தே²ரோ பன ததா² விபஸ்ஸித்வா அத்தனோ ப²லஸமாபத்திமேவ ஸமாபஜ்ஜித்வா நிஸீதி³. இதா⁴பி கா³தா²ய ஏவம் இமஸ்ஸ அத்த²ஸ்ஸ விஞ்ஞாதப்³ப³தா ‘‘ந சாயம் நிஸஜ்ஜா’’திஆதி³னா வுத்தனயானுஸாரேன யோஜேதப்³பா³.

ஏதமத்த²ந்தி ஏதம் தே²ரஸ்ஸ சதுதா⁴துவவத்தா²னமுகே²ன காயானுபஸ்ஸனாஸதிபட்டா²னேன விபஸ்ஸனம் ஓகா³ஹேத்வா ப²லஸமாபத்திஸமாபஜ்ஜனஸங்கா²தம் அத்த²ம் விதி³த்வா. இமம் உதா³னந்தி இமம் ஸதிபட்டா²னபா⁴வனாய நிப்³பா³னாதி⁴க³மதீ³பகம் உதா³னம் உதா³னேஸி.

தத்த² ஸதி காயக³தா உபட்டி²தாதி புப்³பே³ வுத்தலக்க²ணா ஸதி ஸத்³தா⁴புப்³ப³ங்க³மானம் ஸமாதி⁴வீரியபஞ்ஞானம் யதா²ஸகம் கிச்சனிப்பா²த³னேன ஸஹாயபா⁴வம் ஆபன்னத்தா பஹீனப்படிபக்கா² ததோ ஏவ திக்க²விஸத³பூ⁴தா ச யதா²வுத்தகாயஸம்வரணவஸேன ஏகத்த²ஸமோஸரணவஸேன ச அவிபரீதஸபா⁴வம் ஸல்லக்கே²ந்தீ உபக³ந்த்வா டி²தா ஹோதி, ஏதேன காயஸங்கா²தானம் சதுன்னம் தா⁴தூனம் தன்னிஸ்ஸிதானஞ்ச உபாதா³ரூபானம் ஸல்லக்க²ணவஸேன, பச்சயே வவத்த²பேத்வா ததோ பரம் தேஸம் அனிச்சாதி³லக்க²ணஸல்லக்க²ணவஸேன ச பவத்தம் ஞாணபரம்பராக³தம் ஸதிம் த³ஸ்ஸேதி, ஸதிஸீஸேன வா தம்ஸம்பயுத்தம் பரிஞ்ஞாத்தயபரியாபன்னஞாணபரம்பரமேவ த³ஸ்ஸேதி. ச²ஸு ப²ஸ்ஸாயதனேஸு ஸம்வுதோதி யதா²வுத்தாய காயே உபட்டி²தாய ஸதியா ஸமன்னாக³தோ சக்கா²தீ³ஸு ப²ஸ்ஸஸ்ஸ காரணபூ⁴தேஸு ச²ஸு த்³வாரேஸு காயானுபஸ்ஸனாய அபா⁴விதாய உப்பஜ்ஜனாரஹானம் அபி⁴ஜ்ஜா²தீ³னம் தஸ்ஸா பா⁴விதத்தா ஞாணப்பவத்திம் படிவேதே⁴ந்தோ தே பித³ஹந்தோ ‘‘தத்த² ஸம்வுதோ’’தி வுச்சதி, ஏதேன ஞாணஸம்வரம் த³ஸ்ஸேதி.

ஸததம் பி⁴க்கு² ஸமாஹிதோதி ஸோ பி⁴க்கு² ஏவம் உபட்டி²தஸ்ஸதி ஸப்³ப³த்த² ச ஸம்வுதோ புது²த்தாரம்மணே சித்தம் அவிஸ்ஸஜ்ஜேத்வா அனிச்சாதி³வஸேன ஸம்மஸந்தோ விபஸ்ஸனம் உஸ்ஸுக்காபேத்வா ஞாணே திக்கே² ஸூரே வஹந்தே விபஸ்ஸனாஸமாதி⁴னா தாவ ஸததம் நிரந்தரம் ஸமாஹிதோ அனுலோமஞாணானந்தரம் கோ³த்ரபு⁴ஞாணோத³யதோ பட்டா²ய. ஜஞ்ஞா நிப்³பா³னமத்தனோதி அஞ்ஞேஸம் புது²ஜ்ஜனானம் ஸுபினந்தேபி அகோ³சரபா⁴வதோ, அரியானம் பன தஸ்ஸ தஸ்ஸேவ ஆவேணிகத்தா அத்தஸதி³ஸத்தா ச ‘‘அத்தா’’தி லத்³த⁴வோஹாரஸ்ஸ மக்³க³ப²லஞாணஸ்ஸ ஸாதிஸயவிஸயபா⁴வதோ ஏகந்தஸுகா²வஹம் நிப்³பா³னம் அஸங்க²ததா⁴து ‘‘அத்தனோ’’தி வுத்தம், தம் நிப்³பா³னம் ஜஞ்ஞா ஜானேய்ய, மக்³க³ப²லஞாணேஹி படிவிஜ்ஜே²ய்ய, ஸச்சி²கரேய்யாதி அத்தோ². ஏதேன அரியானம் நிப்³பா³னே அதி⁴முத்ததம் த³ஸ்ஸேதி. அரியா ஹி அதி⁴சித்தப்பவத்திகாலேபி ஏகந்தேனேவ நிப்³பா³னே நின்னபோணபப்³பா⁴ரபா⁴வேன விஹரந்தி. ஏத்த² ச யஸ்ஸ ஸதி காயக³தா உபட்டி²தா, ஸோ பி⁴க்கு² ச²ஸு ப²ஸ்ஸாயதனேஸு ஸம்வுதோ, ததோ ஏவ ஸததம் ஸமாஹிதோ அத்தபச்சக்க²கரணேன நிப்³பா³னம் அத்தனோ ஜானேய்யாதி ஏவம் கா³தா²பதா³னம் ஸம்ப³ந்தோ⁴ வேதி³தப்³போ³. ஏவம் காயானுபஸ்ஸனாஸதிபட்டா²னமுகே²ன யாவ அரஹத்தா ஏகஸ்ஸ பி⁴க்கு²னோ நிய்யானமக்³க³ம் த³ஸ்ஸேதி த⁴ம்மராஜா.

அபரோ நயோ – ஸதி காயக³தா உபட்டி²தாதி ஏதேன காயானுபஸ்ஸனாஸதிபட்டா²னம் த³ஸ்ஸேதி. ச²ஸு ப²ஸ்ஸாயதனேஸு ஸம்வுதோதி ப²ஸ்ஸோ ஆயதனம் காரணம் ஏதேஸந்தி ப²ஸ்ஸாயதனானி, தேஸு ப²ஸ்ஸாயதனேஸு. ப²ஸ்ஸஹேதுகேஸு ப²ஸ்ஸபச்சயா நிப்³ப³த்தேஸு ச²ஸு சக்கு²ஸம்ப²ஸ்ஸஜாதி³வேத³யிதேஸு தண்ஹாதீ³னம் அப்பவத்தியா ஸம்வுதோ, ஏதேன வேத³னானுபஸ்ஸனாஸதிபட்டா²னம் த³ஸ்ஸேதி. ஸததம் பி⁴க்கு² ஸமாஹிதோதி ஸததம் நிச்சகாலம் நிரந்தரம் விக்கே²பாபா⁴வதோ ஸமாஹிதோ பி⁴க்கு². ஸோ சாயம் அவிக்கே²போ ஸப்³ப³ஸோ ஸதிபட்டா²னபா⁴வனாய மத்த²கப்பத்தாய ஹோதி. ஸம்மஸந்தோ ஹி அதீதாதி³பே⁴த³பி⁴ன்னேஸு பஞ்சுபாதா³னக்க²ந்தே⁴ஸு அனவஸேஸதோவ பரிக்³க³ஹேத்வா ஸம்மஸதீதி. ஏதேன ஸேஸஸதிபட்டா²னே த³ஸ்ஸேதி. ஜஞ்ஞா நிப்³பா³னமத்தனோதி ஏவம் சதுஸதிபட்டா²னபா⁴வனம் மத்த²கம் பாபேத்வா டி²தோ பி⁴ன்னகிலேஸோ பி⁴க்கு² அத்தனோ கிலேஸனிப்³பா³னம் பச்சவேக்க²ணஞாணேன ஸயமேவ ஜானேய்யாதி அத்தோ².

அத² வா ஸதி காயக³தா உபட்டி²தாதி அத்தனோ பரேஸஞ்ச காயஸ்ஸ யதா²ஸபா⁴வபரிஞ்ஞாதீ³பனேன தே²ரஸ்ஸ ஸதிவேபுல்லப்பத்தி தீ³பிதா. ச²ஸு ப²ஸ்ஸாயதனேஸு ஸம்வுதோதி சக்கா²தீ³ஸு ச²ஸு த்³வாரேஸு அச்சந்தஸம்வரதீ³பனேன ஸததவிஹாரிவஸேன தே²ரஸ்ஸ ஸம்பஜஞ்ஞப்பகாஸினீ பஞ்ஞாவேபுல்லப்பத்தி தீ³பிதா. ஸததம் பி⁴க்கு² ஸமாஹிதோதி ஸமாபத்திப³ஹுலதாத³ஸ்ஸனேன நவானுபுப்³ப³விஹாரஸமாபத்தியோ த³ஸ்ஸிதா. ஏவம்பூ⁴தோ பன பி⁴க்கு² ஜஞ்ஞா நிப்³பா³னமத்தனோதி கதகிச்சத்தா உத்தரி கரணீயாபா⁴வதோ கேவலம் அத்தனோ அனுபாதி³ஸேஸனிப்³பா³னமேவ ஜானேய்ய சிந்தேய்ய, அஞ்ஞம்பி தஸ்ஸ சிந்தேதப்³ப³ம் நத்தீ²தி அதி⁴ப்பாயோ.

பஞ்சமஸுத்தவண்ணனா நிட்டி²தா.

6. பிலிந்த³வச்ச²ஸுத்தவண்ணனா

26. ச²ட்டே² பிலிந்த³வச்சோ²தி பிலிந்தா³திஸ்ஸ நாமம், வச்சோ²தி கோ³த்தவஸேன தே²ரம் ஸஞ்ஜானந்தி. வஸலவாதே³ன ஸமுதா³சரதீதி ‘‘ஏஹி, வஸல, அபேஹி, வஸலா’’திஆதி³னா பி⁴க்கூ² வஸலவாதே³ன வோஹரதி ஆலபதி. ஸம்ப³ஹுலா பி⁴க்கூ²தி ப³ஹூ பி⁴க்கூ². தே தே²ரம் ததா² ஸமுதா³சரந்தம் தி³ஸ்வா ‘‘அரஹாவ ஸமானோ அப்பஹீனவாஸனத்தா ஏவம் ப⁴ணதீ’’தி அஜானந்தா ‘‘தோ³ஸந்தரோ மஞ்ஞே அயம் தே²ரோ ஏவம் ஸமுதா³சரதீ’’தி சிந்தேத்வா உல்லபனாதி⁴ப்பாயா தம் ததோ வுட்டா²பேதும் ப⁴க³வதோ ஆரோசேஸும். தேன வுத்தம் – ‘‘ஆயஸ்மா, ப⁴ந்தே, பிலிந்த³வச்சோ² பி⁴க்கூ² வஸலவாதே³ன ஸமுதா³சரதீ’’தி. கேசி பனாஹு – ‘‘இமம் தே²ரம் பி⁴க்கூ² ‘அரஹா’தி ஸஞ்ஜானந்தி, அயஞ்ச பி⁴க்கூ² ப²ருஸவசனேன ஏவம் ஸமுதா³சரதி, ‘அபூ⁴தோ ஏவ நு கோ² இமஸ்மிம் உத்தரிமனுஸ்ஸத⁴ம்மோ’தி வாஸனாவஸேன தஸ்ஸ ததா² ஸமுதா³சாரம் அஜானந்தா அரியபா⁴வஞ்சஸ்ஸ அஸத்³த³ஹந்தா உஜ்ஜா²னஸஞ்ஞினோ ப⁴க³வதோ தமத்த²ம் ஆரோசேஸு’’ந்தி. ப⁴க³வா தே²ரஸ்ஸ தோ³ஸந்தராபா⁴வம் பகாஸேதுகாமோ ஏகேன பி⁴க்கு²னா தம் பக்கோஸாபேத்வா ஸம்முகா² தஸ்ஸ ‘‘புப்³பா³சிண்ணவஸேனாயம் ததா² ஸமுதா³சரதி, ந ப²ருஸவசனாதி⁴ப்பாயோ’’தி ஆஹ. தேன வுத்தம் – ‘‘அத² கோ² ப⁴க³வா அஞ்ஞதரம் பி⁴க்கு²ம் ஆமந்தேஸீ’’திஆதி³.

தத்த² புப்³பே³னிவாஸம் மனஸி கரித்வாதி ஸத்தா² ‘‘ஸச்சம் கிர த்வம், வச்ச², பி⁴க்கூ² வஸலவாதே³ன ஸமுதா³சரஸீ’’தி தே²ரம் புச்சி²த்வா தேன ‘‘ஏவம், ப⁴ந்தே’’தி வுத்தே ‘‘அயம் வச்சோ² கிலேஸவாஸனாய வஸலவாத³ம் ந பரிச்சஜதி, கிம் நு கோ² அதீதேஸுபி அத்தபா⁴வேஸு ப்³ராஹ்மணஜாதிகோ அஹோஸீ’’தி ஆவஜ்ஜேந்தோ புப்³பே³னிவாஸஞாணேன ஸப்³ப³ஞ்ஞுதஞ்ஞாணேன வா தஸ்ஸ புப்³பே³னிவாஸம் அதீதாஸு ஜாதீஸு நிவுத்த²க்க²ந்த⁴ஸந்தானம் மனஸி கரித்வா ஹத்த²தலே ட²பிதம் ஆமலகம் விய பச்சக்க²கரணவஸேன அத்தனோ மனஸி கத்வா. பி⁴க்கூ² ஆமந்தேஸீதி தே பி⁴க்கூ² ஸஞ்ஞாபேதும் ஆலபி, அபா⁴ஸி. தேன வுத்தம் ‘‘மா கோ² தும்ஹே, பி⁴க்க²வே’’திஆதி³.

தத்த² மாதி படிஸேதே⁴ நிபாதோ, தஸ்ஸ ‘‘உஜ்ஜா²யித்தா²’’தி இமினா ஸம்ப³ந்தோ⁴. மா உஜ்ஜா²யித்தா²தி மா ஹேட்டா² கத்வா சிந்தயித்த², ஓலோகயித்தா²தி அத்தோ². வச்ச²ஸ்ஸ பி⁴க்கு²னோதி ச உஜ்ஜா²யனஸ்ஸ உஸூயனத்த²த்தா ஸம்பதா³னவசனம். இதா³னிஸ்ஸ அனுஜ்ஜா²யிதப்³பே³ காரணம் த³ஸ்ஸேந்தோ ‘‘ந, பி⁴க்க²வே, வச்சோ² தோ³ஸந்தரோ பி⁴க்கூ² வஸலவாதே³ன ஸமுதா³சரதீ’’தி ஆஹ. தஸ்ஸத்தோ² – பி⁴க்க²வே, அயம் வச்சோ² தோ³ஸந்தரோ தோ³ஸசித்தோ தோ³ஸேன ப்³யாபாதே³ன தூ³ஸிதசித்தோ ஹுத்வா பி⁴க்கூ² வஸலவாதே³ன ந ஸமுதா³சரதி, மக்³கே³னேவ சஸ்ஸ ப்³யாபாதோ³ ஸமுக்³கா⁴திதோ. ஏவம் அதோ³ஸந்தரத்தேபி தஸ்ஸ ததா² ஸமுதா³சாரஸ்ஸ புரிமஜாதிஸித்³த⁴ம் காரணம் த³ஸ்ஸேந்தோ ‘‘வச்ச²ஸ்ஸ, பி⁴க்க²வே’’திஆதி³மாஹ.

தத்த² அப்³போ³கிண்ணானீதி க²த்தியாதி³ஜாதிஅந்தரேஹி அவோமிஸ்ஸானி அனந்தரிதானி. பஞ்ச ஜாதிஸதானி ப்³ராஹ்மணகுலே பச்சாஜாதானீதி ஸப்³பா³னி தானி வச்ச²ஸ்ஸ பஞ்ச ஜாதிஸதானி படிபாடியா ப்³ராஹ்மணகுலே ஏவ ஜாதானி, அஹேஸுந்தி அத்தோ². ஸோ தஸ்ஸ வஸலவாதோ³ தீ³க⁴ரத்தம் ஸமுதா³சிண்ணோதி யோ ஏதரஹி கீ²ணாஸவேனபி ஸதா பவத்தியதி, ஸோ தஸ்ஸ வச்ச²ஸ்ஸ பி⁴க்கு²னோ வஸலவாதோ³ தீ³க⁴ரத்தம் இதோ ஜாதிதோ பட்டா²ய உத்³த⁴ம் ஆரோஹனவஸேன பஞ்சஜாதிஸதமத்தம் காலம் ப்³ராஹ்மணஜாதிகத்தா ஸமுதா³சிண்ணோ ஸமுதா³சரிதோ அஹோஸி. ப்³ராஹ்மணா ஹி ஜாதிஸித்³தே⁴ன மானேன த²த்³தா⁴ அஞ்ஞம் வஸலவாதே³ன ஸமுதா³சரந்தி. ‘‘அஜ்ஜா²சிண்ணோ’’திபி பட²ந்தி, ஸோ ஏவ அத்தோ². தேனாதி தேன தீ³க⁴ரத்தம் ததா² ஸமுதா³சிண்ணபா⁴வேன, ஏதேனஸ்ஸ ததா² ஸமுதா³சாரஸ்ஸ காரணம் வாஸனாதி த³ஸ்ஸேதி. கா பனாயம் வாஸனா நாம? யம் கிலேஸரஹிதஸ்ஸாபி ஸந்தானே அப்பஹீனகிலேஸானம் ஸமாசாரஸதி³ஸஸமாசாரஹேதுபூ⁴தம், அனாதி³காலபா⁴விதேஹி கிலேஸேஹி ஆஹிதம் ஸாமத்தி²யமத்தம், ததா²ரூபா அதி⁴முத்தீதி வத³ந்தி. தம் பனேதம் அபி⁴னீஹாரஸம்பத்தியா ஞேய்யாவரணப்பஹானவஸேன யத்த² கிலேஸா பஹீனா, தத்த² ப⁴க³வதோ ஸந்தானே நத்தி². யத்த² பன ததா² கிலேஸா ந பஹீனா, தத்த² ஸாவகானம் பச்சேகபு³த்³தா⁴னஞ்ச ஸந்தானே அத்தி², ததோ ததா²க³தோவ அனாவரணஞாணத³ஸ்ஸனோ.

ஏதமத்த²ம் விதி³த்வாதி ஏதம் ஆயஸ்மதோ பிலிந்த³வச்ச²ஸ்ஸ ஸதிபி வஸலஸமுதா³சாரே தோ³ஸந்தராபா⁴வஸங்கா²தம் அத்த²ம் விதி³த்வா. இமம் உதா³னந்தி தஸ்ஸ அக்³க³ப²லாதி⁴க³மவிபா⁴வனம் இமம் உதா³னம் உதா³னேஸி.

தத்த² யம்ஹி ந மாயா வஸதி ந மானோதி யஸ்மிம் அரியபுக்³க³லே ஸந்ததோ³ஸப்படிச்சா²த³னலக்க²ணா மாயா, ‘‘ஸேய்யோஹமஸ்மீ’’திஆதி³னா ஸம்பக்³க³ஹவஸேன பவத்தோ உண்ணதிலக்க²ணோ மானோ ச ந வஸதி, மக்³கே³ன ஸமுக்³கா⁴திதத்தா ந பவத்ததி ந உப்பஜ்ஜதி. யோ வீதலோபோ⁴ அமமோ நிராஸோதி யோ ச ராகா³தி³பரியாயவஸேன பவத்தஸ்ஸ ஆரம்மணக்³க³ஹணலக்க²ணஸ்ஸ லோப⁴ஸ்ஸ ஸப்³ப³தா² விக³தத்தா வீதலோபோ⁴, ததோ ஏவ ரூபாதீ³ஸு கத்த²சி மமாயனாபா⁴வதோ அமமோ அபரிக்³க³ஹோ, அனாக³தானம்பி ப⁴வாதீ³னம் அனாஸீஸனதோ நிராஸோ. பனுண்ணகோதோ⁴தி குஜ்ஜ²னலக்க²ணஸ்ஸ கோத⁴ஸ்ஸ அனாகா³மிமக்³கே³ன ஸப்³ப³ஸோ பஹீனத்தா பனுண்ணகோதோ⁴ ஸமுச்சி²ன்னாகா⁴தோ. அபி⁴னிப்³பு³தத்தோதி யோ ஏவம் மாயாமானலோப⁴கோதா⁴னம் ஸமுக்³கா⁴தேன ததே³கட்ட²தாய ஸப்³ப³ஸ்ஸ ஸம்கிலேஸபக்க²ஸ்ஸ ஸுப்பஹீனத்தா ஸப்³ப³ஸோ கிலேஸபரினிப்³பா³னேன அபி⁴னிப்³பு³தசித்தோ ஸீதிபூ⁴தோ. ஸோ ப்³ராஹ்மணோ ஸோ ஸமணோ ஸ பி⁴க்கூ²தி ஸோ ஏவரூபோ கீ²ணாஸவோ ஸப்³ப³ஸோ பா³ஹிதபாபத்தா ப்³ராஹ்மணோ, ஸோ ஏவ ஸமிதபாபத்தா ஸமசரியாய ச ஸமணோ, ஸோ ஏவ ச ஸப்³ப³ஸோ பி⁴ன்னகிலேஸத்தா பி⁴க்கு² நாம. ஏவம்பூ⁴தோ ச, பி⁴க்க²வே, வச்சோ² ஸோ கத²ம் தோ³ஸந்தரோ கிஞ்சி காயகம்மாதி³ம் பவத்தேய்ய, கேவலம் பன வாஸனாய அப்பஹீனத்தா வஸலவாதே³ன ஸமுதா³சரதீதி.

ச²ட்ட²ஸுத்தவண்ணனா நிட்டி²தா.

7. ஸக்குதா³னஸுத்தவண்ணனா

27. ஸத்தமே ஸத்தாஹம் ஏகபல்லங்கேன நிஸின்னோ ஹோதி அஞ்ஞதரம் ஸமாதி⁴ம் ஸமாபஜ்ஜித்வாதி ஏத்த² கேசி தாவ ஆஹு ‘‘அரஹத்தப²லஸமாதி⁴ இத⁴ ‘அஞ்ஞதரோ ஸமாதீ⁴’தி அதி⁴ப்பேதோ’’தி. தஞ்ஹி ஸோ ஆயஸ்மா ப³ஹுலம் ஸமாபஜ்ஜதி தி³ட்ட²த⁴ம்மஸுக²விஹாரத்த²ம், பஹோதி ச ஸத்தாஹம்பி ப²லஸமாபத்தியா வீதினாமேதும். ததா² ஹி ப⁴க³வதா –

‘‘அஹம், பி⁴க்க²வே, யாவதே³ ஆகங்கா²மி விவிச்சேவ காமேஹி, விவிச்ச அகுஸலேஹி த⁴ம்மேஹி…பே… விஹராமி. கஸ்ஸபோபி, பி⁴க்க²வே, யாவதே³ ஆகங்க²தி விவிச்சேவ காமேஹி…பே… விஹரதீ’’தி (ஸம். நி. 2.152) –

ஆதி³னா நவானுபுப்³ப³விஹாரச²ளபி⁴ஞ்ஞாதி³பே⁴தே³ உத்தரிமனுஸ்ஸத⁴ம்மே அத்தனா ஸமஸமட்டா²னே ட²பிதோ, ந சேத்த² ‘‘யதி³ ஏவம் தே²ரோ யமகபாடிஹாரியம்பி கரேய்யா’’தி வத்தப்³ப³ம் ஸாவகஸாதா⁴ரணானம்யேவ ஜா²னாதீ³னம் அதி⁴ப்பேதத்தாதி.

போராணா பனாஹு – அஞ்ஞதரம் ஸமாதி⁴ம் ஸமாபஜ்ஜித்வாதி நிரோத⁴ஸமாபத்திம் ஸமாபஜ்ஜித்வா. கத²ம் பன நிரோத⁴ஸமாபத்தி ஸமாதீ⁴தி வுத்தா? ஸமாதா⁴னட்டே²ன. கோ பனாயம் ஸமாதா⁴னட்டோ²? ஸம்மதே³வ ஆதா⁴தப்³ப³தா. யா ஹி ஏஸா பச்சனீகத⁴ம்மேஹி அகம்பனீயா ப³லப்பத்தியா ஸமத²ப³லம் விபஸ்ஸனாப³லந்தி இமேஹி த்³வீஹி ப³லேஹி, அனிச்சது³க்கா²னத்தனிப்³பி³தா³விராக³னிரோத⁴படினிஸ்ஸக்³க³விவட்டானுபஸ்ஸனா சத்தாரி மக்³க³ஞாணானி சத்தாரி ச ப²லஞாணானீதி இமேஸம் ஸோளஸன்னம் ஞாணானம் வஸேன ஸோளஸஹி ஞாணசரியாஹி, பட²மஜ்ஜா²னஸமாதி⁴ஆத³யோ அட்ட² ஸமாதீ⁴ ஏகஜ்ஜ²ம் கத்வா க³ஹிதோ தேஸம் உபசாரஸமாதி⁴ சாதி இமேஸம் நவன்னம் ஸமாதீ⁴னம் வஸேன நவஹி ஸமாதி⁴சரியாஹி காயஸங்கா²ரோ வசீஸங்கா²ரோ சித்தஸங்கா²ரோதி இமேஸம் திண்ணம் ஸங்கா²ரானம் தத்த² தத்த² படிப்பஸ்ஸத்³தி⁴யா ததா² விஹரிதுகாமேன யதா²வுத்தேஸு டா²னேஸு வஸீபா⁴வப்பத்தேன அரஹதா அனாகா³மினா வா யதா²தி⁴ப்பேதம் காலம் சித்தசேதஸிகஸந்தானஸ்ஸ ஸம்மதே³வ அப்பவத்தி ஆதா⁴தப்³பா³, தஸ்ஸா ததா² ஸமாதா⁴தப்³ப³தா இத⁴ ஸமாதா⁴னட்டோ², தேனாயம் விஹாரோ ஸமாதீ⁴தி வுத்தோ, ந அவிக்கே²பட்டே²ன. ஏதேனஸ்ஸ ஸமாபத்திஅத்தோ²பி வுத்தோதி வேதி³தப்³போ³. இமஞ்ஹி நிரோத⁴ஸமாபத்திம் ஸந்தா⁴ய படிஸம்பி⁴தா³மக்³கே³ –

‘‘கத²ம் த்³வீஹி ப³லேஹி ஸமன்னாக³தத்தா திண்ணம் ஸங்கா²ரானம் படிப்பஸ்ஸத்³தி⁴யா ஸோளஸஹி ஞாணசரியாஹி நவஹி ஸமாதி⁴சரியாஹி வஸீபா⁴வதாய ஸஞ்ஞானிரோத⁴ஸமாபத்தியா ஞாண’’ந்தி (படி. ம. 1.83) –

புச்சி²த்வா ‘‘த்³வீஹி ப³லேஹீ’’தி த்³வே ப³லானி ஸமத²ப³லம் விபஸ்ஸனாப³லந்தி வித்தா²ரோ. ஸாயம் நிரோத⁴ஸமாபத்திகதா² விஸுத்³தி⁴மக்³கே³ (விஸுத்³தி⁴. 2.867 ஆத³யோ) ஸம்வண்ணிதாவ. கஸ்மா பனாயம் தே²ரோ ப²லஸமாபத்திம் அஸமாபஜ்ஜித்வா நிரோத⁴ம் ஸமாபஜ்ஜி? ஸத்தேஸு அனுகம்பாய. அயஞ்ஹி மஹாதே²ரோ ஸப்³பா³பி ஸமாபத்தியோ வளஞ்ஜேதி, ஸத்தானுக்³க³ஹேன பன யேபு⁴ய்யேன நிரோத⁴ம் ஸமாபஜ்ஜதி. தஞ்ஹி ஸமாபஜ்ஜித்வா வுட்டி²தஸ்ஸ கதோ அப்பகோபி ஸக்காரோ விஸேஸதோ மஹப்ப²லோ மஹானிஸம்ஸோ ஹோதீதி.

வுட்டா²ஸீதி அரஹத்தப²லசித்துப்பத்தியா வுட்டா²ஸி. நிரோத⁴ம் ஸமாபன்னோ ஹி அரஹா சே அரஹத்தப²லஸ்ஸ, அனாகா³மீ சே அனாகா³மிப²லஸ்ஸ உப்பாதே³ன வுட்டி²தோ நாம ஹோதி.

தேன கோ² பன ஸமயேன ஸக்கோ தே³வானமிந்தோ³ ஆயஸ்மதோ மஹாகஸ்ஸபஸ்ஸ பிண்ட³பாதம் தா³துகாமோ ஹோதீதி கத²ம் தஸ்ஸ தா³துகாமதா ஜாதா? யானி ‘‘தானி பஞ்சமத்தானி தே³வதாஸதானீ’’தி வுத்தானி, தா ஸக்கஸ்ஸ தே³வரஞ்ஞோ பரிசாரிகா ககுடபாதி³னியோ புப்³பே³ ‘‘அய்யோ மஹாகஸ்ஸபோ ராஜக³ஹம் பிண்டா³ய பவிஸதி, க³ச்ச²த² தே²ரஸ்ஸ தா³னம் தே³தா²’’தி ஸக்கேன பேஸிதா உபக³ந்த்வா தி³ப்³பா³ஹாரம் தா³துகாமா டி²தா தே²ரேன படிக்கி²த்தா தே³வலோகமேவ க³தா. இதா³னி புரிமப்படிக்கே²பம் சிந்தேத்வா ‘‘கதா³சி க³ண்ஹேய்யா’’தி ஸமாபத்திதோ வுட்டி²தஸ்ஸ தே²ரஸ்ஸ தா³னம் தா³துகாமா ஸக்கஸ்ஸ அனாரோசேத்வா ஸயமேவ ஆக³ந்த்வா தி³ப்³ப³போ⁴ஜனானி உபனேந்தியோ புரிமனயேனேவ தே²ரேன படிக்கி²த்தா தே³வலோகம் க³ந்த்வா ஸக்கேன ‘‘கஹம் க³தத்தா²’’தி புட்டா² தமத்த²ம் ஆரோசேத்வா ‘‘தி³ன்னோ வோ தே²ரஸ்ஸ பிண்ட³பாதோ’’தி ஸக்கேன வுத்தே ‘‘க³ண்ஹிதும் ந இச்ச²தீ’’தி. ‘‘கிம் கதே²ஸீ’’தி? ‘‘‘து³க்³க³தானம் ஸங்க³ஹம் கரிஸ்ஸாமீ’தி ஆஹ, தே³வா’’தி. ‘‘தும்ஹே கேனாகாரேன க³தா’’தி? ‘‘இமினாவ, தே³வா’’தி. ஸக்கோ ‘‘தும்ஹாதி³ஸியோ தே²ரஸ்ஸ பிண்ட³பாதம் கிம் த³ஸ்ஸந்தீ’’தி? ஸயம் தா³துகாமோ, ஜராஜிண்ணோ க²ண்ட³த³ந்தோ பலிதகேஸோ ஓப⁴க்³க³ஸரீரோ மஹல்லகோ தந்தவாயோ ஹுத்வா, ஸுஜம்பி அஸுரதீ⁴தரம் ததா²ரூபிமேவ மஹல்லிகம் கத்வா, ஏகம் பேஸகாரவீதி²ம் மாபேத்வா தந்தம் பஸாரேந்தோ அச்சி², ஸுஜா தஸரம் பூரேதி. தேன வுத்தம் – ‘‘தேன கோ² பன ஸமயேன ஸக்கோ தே³வானமிந்தோ³…பே… தஸரம் பூரேதீ’’தி.

தத்த² தந்தம் வினாதீதி பஸாரிததந்தம் வினந்தோ விய ஹோதி. தஸரம் பூரேதீதி தஸரவட்டிம் வட்³டே⁴ந்தீ விய. யேன ஸக்கஸ்ஸ தே³வானமிந்த³ஸ்ஸ நிவேஸனம் தேனுபஸங்கமீதி தே²ரோ நிவாஸேத்வா பத்தசீவரமாதா³ய ‘‘து³க்³க³தஜனஸங்க³ஹம் கரிஸ்ஸாமீ’’தி நக³ராபி⁴முகோ² க³ச்ச²ந்தோ ப³ஹினக³ரே ஸக்கேன மாபிதம் பேஸகாரவீதி²ம் படிபஜ்ஜித்வா ஓலோகேந்தோ அத்³த³ஸ ஓலுக்³க³விலுக்³க³ஜிண்ணஸாலம் தத்த² ச தே ஜாயம்பதிகே யதா²வுத்தரூபே தந்தவாயகம்மம் கரோந்தே தி³ஸ்வா சிந்தேஸி – ‘‘இமே மஹல்லககாலேபி கம்மம் கரோந்தி. இமஸ்மிம் நக³ரே இமேஹி து³க்³க³ததரா நத்தி² மஞ்ஞே. இமேஹி தி³ன்னம் ஸாகமத்தம்பி க³ஹேத்வா இமேஸம் ஸங்க³ஹம் கரிஸ்ஸாமீ’’தி. ஸோ தேஸம் கே³ஹாபி⁴முகோ² அக³மாஸி. ஸக்கோ தம் ஆக³ச்ச²ந்தம் தி³ஸ்வா ஸுஜம் ஆஹ – ‘‘ப⁴த்³தே³, மய்ஹம் அய்யோ இதோ ஆக³ச்ச²தி, தம் த்வம் அபஸ்ஸந்தீ விய துண்ஹீ ஹுத்வா நிஸீத³. க²ணேனேவ வஞ்சேத்வா பிண்ட³பாதம் த³ஸ்ஸாமா’’தி தே²ரோ க³ந்த்வா கே³ஹத்³வாரே அட்டா²ஸி. தேபி அபஸ்ஸந்தா விய அத்தனோ கம்மமேவ கரோந்தா தோ²கம் ஆக³மயிம்ஸு. அத² ஸக்கோ ‘‘கே³ஹத்³வாரே டி²தோ ஏகோ தே²ரோ விய கா²யதி, உபதா⁴ரேஹி தாவா’’தி ஆஹ. ‘‘தும்ஹே க³ந்த்வா உபதா⁴ரேத², ஸாமீ’’தி. ஸோ கே³ஹா நிக்க²மித்வா தே²ரம் பஞ்சபதிட்டி²தேன வந்தி³த்வா உபோ⁴ஹி ஹத்தே²ஹி ஜண்ணுகானி ஓலும்பி³த்வா நித்து²னந்தோ உட்டா²ய ‘‘கதரத்தே²ரோ நு கோ² அய்யோ’’தி தோ²கம் ஓஸக்கித்வா ‘‘அக்கீ²னி மே தூ⁴மாயந்தீ’’தி வத்வா நலாடே ஹத்த²ம் ட²பேத்வா உத்³த⁴ம் உல்லோகேத்வா ‘‘அஹோ து³க்க²ம் அய்யோ நோ மஹாகஸ்ஸபத்தே²ரோவ சிரஸ்ஸம் மே குடித்³வாரம் ஆக³தோ. அத்தி² நு கோ² கிஞ்சி கே³ஹே’’தி ஆஹ. ஸுஜா தோ²கம் ஆகுலா விய ஹுத்வா ‘‘அத்தி², ஸாமீ’’தி படிவசனம் அதா³ஸி. ஸக்கோ, ‘‘ப⁴ந்தே, லூக²ம் வா பணீதம் வாதி அசிந்தேத்வா ஸங்க³ஹம் நோ கரோதா²’’தி பத்தம் க³ண்ஹி. தே²ரோ பத்தம் தே³ந்தோ ‘‘இமேஸம் ஏவ து³க்³க³தானம் ஜராஜிண்ணானம் மயா ஸங்க³ஹோ காதப்³போ³’’தி சிந்தேஸி. ஸோ அந்தோ பவிஸித்வா க⁴டிஓத³னம் நாம க⁴டிதோ உத்³த⁴ரித்வா, பத்தம் பூரேத்வா, தே²ரஸ்ஸ ஹத்தே² ட²பேஸி. தேன வுத்தம் – ‘‘அத்³த³ஸா கோ² ஸக்கோ தே³வானமிந்தோ³…பே… அதா³ஸீ’’தி.

தத்த² க⁴டியாதி ப⁴த்தக⁴டிதோ. ‘‘க⁴டிஓத³ன’’ந்திபி பாடோ², தஸ்ஸ க⁴டிஓத³னம் நாம தே³வானம் கோசி ஆஹாரவிஸேஸோதி அத்த²ம் வத³ந்தி. உத்³த⁴ரித்வாதி குதோசி பா⁴ஜனதோ உத்³த⁴ரித்வா. அனேகஸூபோ ஸோ ஏவ ஆஹாரோ பத்தே பக்கி²பித்வா தே²ரஸ்ஸ ஹத்தே² ட²பனகாலே கபணானம் உபகப்பனகலூகா²ஹாரோ விய பஞ்ஞாயித்த², ஹத்தே² ட²பிதமத்தே பன அத்தனோ தி³ப்³ப³ஸபா⁴வேனேவ அட்டா²ஸி. அனேகஸூபோதி முக்³க³மாஸாதி³ஸூபேஹி சேவ க²ஜ்ஜவிகதீஹி ச அனேகவித⁴ஸூபோ. அனேகப்³யஞ்ஜனோதி நானாவித⁴உத்தரிப⁴ங்கோ³. அனேகரஸப்³யஞ்ஜனோதி அனேகேஹி ஸூபேஹி சேவ ப்³யஞ்ஜனேஹி ச மது⁴ராதி³மூலரஸானஞ்சேவ ஸம்பி⁴ன்னரஸானஞ்ச அபி⁴ப்³யஞ்ஜகோ, நானக்³க³ரஸஸூபப்³யஞ்ஜனோதி அத்தோ².

ஸோ கிர பிண்ட³பாதோ தே²ரஸ்ஸ ஹத்தே² ட²பிதகாலே ராஜக³ஹனக³ரம் அத்தனோ தி³ப்³ப³க³ந்தே⁴ன அஜ்ஜோ²த்த²ரி, ததோ தே²ரோ சிந்தேஸி – ‘‘அயம் புரிஸோ அப்பேஸக்கோ², பிண்ட³பாதோ அதிவிய பணீதோ ஸக்கஸ்ஸ போ⁴ஜனஸதி³ஸோ. கோ நு கோ² ஏஸோ’’தி? அத² நம் ‘‘ஸக்கோ’’தி ஞத்வா ஆஹ – ‘‘பா⁴ரியம் தே, கோஸிய, கம்மம் கதம் து³க்³க³தானம் ஸம்பத்திம் விலும்பந்தேன, அஜ்ஜ மய்ஹம் தா³னம் த³த்வா கோசிதே³வ து³க்³க³தோ ஸேனாபதிட்டா²னம் வா ஸேட்டி²ட்டா²னம் வா லபே⁴ய்யா’’தி. ‘‘கோ மயா து³க்³க³ததரோ அத்தி², ப⁴ந்தே’’தி? ‘‘கத²ம் த்வம் து³க்³க³தோ தே³வரஜ்ஜஸிரிம் அனுப⁴வந்தோ’’தி? ‘‘ப⁴ந்தே, ஏவம் நாமேதம், மயா பன அனுப்பன்னே பு³த்³தே⁴ கல்யாணகம்மம் கதம், பு³த்³து⁴ப்பாதே³ பன வத்தமானே புஞ்ஞகம்மம் கத்வா சூளரத²தே³வபுத்தோ மஹாரத²தே³வபுத்தோ அனேகவண்ணதே³வபுத்தோதி இமே தயோ தே³வபுத்தா மமாஸன்னட்டா²னே நிப்³ப³த்தா மஹாதேஜவந்ததரா. அஹம் தேஸு தே³வபுத்தேஸு ‘நக்க²த்தம் கீளிஸ்ஸாமா’தி பரிசாரிகாயோ க³ஹேத்வா அந்தரவீதி²ம் ஓதிண்ணேஸு பலாயித்வா கே³ஹம் பவிஸாமி. தேஸஞ்ஹி ஸரீரதோ தேஜோ மம ஸரீரம் ஓத்த²ரதி, மம ஸரீரதோ தேஜோ தேஸம் ஸரீரம் ந ஓத்த²ரதி. கோ மயா து³க்³க³ததரோ, ப⁴ந்தே’’தி? ‘‘ஏவம் ஸந்தேபி இதோ பட்டா²ய மய்ஹம் மா ஏவம் வஞ்சேத்வா தா³னமதா³ஸீ’’தி. ‘‘வஞ்சேத்வா தும்ஹாகம் தா³னே தி³ன்னே மய்ஹம் குஸலம் அத்தி² நத்தீ²’’தி? ‘‘அத்தி², ஆவுஸோ’’தி. ‘‘ஏவம் ஸந்தே குஸலகரணம் நாம மய்ஹம் பா⁴ரோ, ப⁴ந்தே’’தி வத்வா தே²ரம் வந்தி³த்வா ஸுஜம் ஆதா³ய தே²ரம் பத³க்கி²ணம் கத்வா, வேஹாஸம் அப்³பு⁴க்³க³ந்த்வா ‘‘அஹோ தா³னம் பரமதா³னம், கஸ்ஸபே ஸுப்பதிட்டி²த’’ந்தி திக்க²த்தும் உதா³னம் உதா³னேஸி. தேன வுத்தம் ‘‘அத² கோ² ஆயஸ்மதோ மஹாகஸ்ஸபஸ்ஸ ஏதத³ஹோஸீ’’திஆதி³.

தத்த² கோஸியாதி ஸக்கம் தே³வானமிந்த³ம் கோ³த்தேன ஆலபதி. புஞ்ஞேன அத்தோ²தி புஞ்ஞேன பயோஜனம். அத்தீ²தி வசனஸேஸோ. வேஹாஸம் அப்³பு⁴க்³க³ந்த்வாதி பத²விதோ வேஹாஸம் அபி⁴உக்³க³ந்த்வா. ஆகாஸே அந்தலிக்கே²தி ஆகாஸமேவ பரியாயஸத்³தே³ன அந்தலிக்கே²தி வத³ந்தி. அத² வா அந்தலிக்க²ஸங்கா²தே ஆகாஸே ந கஸிணுக்³கா⁴டிமாதி³ஆகாஸேதி விஸேஸேந்தோ வத³தி. அஹோ தா³னந்தி ஏத்த² அஹோதி அச்ச²ரியத்தே² நிபாதோ. ஸக்கோ ஹி தே³வானமிந்தோ³, ‘‘யஸ்மா நிரோதா⁴ வுட்டி²தஸ்ஸ அய்யஸ்ஸ மஹாகஸ்ஸபத்தே²ரஸ்ஸ ஸக்கச்சம் ஸஹத்தே²ன சித்தீகத்வா அனபவித்³த⁴ம் காலேன பரேஸம் அனுபஹச்ச, ஸம்மாதி³ட்டி²ம் புரக்க²த்வா இத³மீதி³ஸம் மயா தி³ப்³ப³போ⁴ஜனதா³னம் தி³ன்னம், தஸ்மா கே²த்தஸம்பத்தி தே³ய்யத⁴ம்மஸம்பத்தி சித்தஸம்பத்தீதி, திவிதா⁴யபி ஸம்பத்தியா ஸமன்னாக³தத்தா ஸப்³ப³ங்க³ஸம்பன்னம் வத மயா தா³னம் பவத்தித’’ந்தி அச்ச²ரியப்³பு⁴தசித்தஜாதோ ததா³ அத்தனோ ஹத³யப்³ப⁴ந்தரக³தம் பீதிஸோமனஸ்ஸம் ஸமுக்³கி³ரந்தோ ‘‘அஹோ தா³ன’’ந்தி வத்வா தஸ்ஸ தா³னஸ்ஸ வுத்தனயேன உத்தமதா³னபா⁴வம் கே²த்தங்க³தபா⁴வஞ்ச பகாஸேந்தோ ‘‘பரமதா³னம் கஸ்ஸபே ஸுப்பதிட்டி²த’’ந்தி உதா³னம் உதா³னேஸி.

ஏவம் பன ஸக்கஸ்ஸ உதா³னேந்தஸ்ஸ ப⁴க³வா விஹாரே டி²தோயேவ தி³ப்³ப³ஸோதேன ஸத்³த³ம் ஸுத்வா ‘‘பஸ்ஸத², பி⁴க்க²வே, ஸக்கம் தே³வானமிந்த³ம் உதா³னம் உதா³னேத்வா ஆகாஸேன க³ச்ச²ந்த’’ந்தி பி⁴க்கூ²னம் வத்வா தேஹி ‘‘கிம் பன, ப⁴ந்தே, தேன கத’’ந்தி புட்டோ² ‘‘மம புத்தஸ்ஸ கஸ்ஸபஸ்ஸ வஞ்சேத்வா தா³னம் அதா³ஸி, தேன ச அத்தமனோ உதா³னேஸீ’’தி ஆஹ. தேன வுத்தம் ‘‘அஸ்ஸோஸி கோ² ப⁴க³வா தி³ப்³பா³ய ஸோததா⁴துயா’’திஆதி³.

தத்த² தி³ப்³பா³ய ஸோததா⁴துயாதி தி³ப்³ப³ஸதி³ஸத்தா தி³ப்³பா³. தே³வதானஞ்ஹி ஸுசரிதகம்மனிப்³ப³த்தா பித்தஸேம்ஹருஹிராதீ³ஹி அபலிபு³த்³தா⁴ உபக்கிலேஸவினிமுத்ததாய தூ³ரேபி ஆரம்மணம் க³ஹேதும் ஸமத்தா² தி³ப்³ப³பஸாத³ஸோததா⁴து ஹோதி. அயஞ்சாபி ப⁴க³வதோ வீரியபா⁴வனாப³லனிப்³ப³த்தா ஞாணமயா ஸோததா⁴து தாதி³ஸா ஏவாதி தி³ப்³ப³ஸதி³ஸத்தா தி³ப்³பா³. அபி ச தி³ப்³ப³விஹாரவஸேன படிலத்³த⁴த்தா அத்தனா ச தி³ப்³ப³விஹாரஸன்னிஸ்ஸிதத்தாபி தி³ப்³பா³. ஸவனட்டே²ன ச ஸபா⁴வதா⁴ரணட்டே²ன ச ஸோததா⁴து, ஸோததா⁴துயாபி கிச்சகரணேன ஸோததா⁴து வியாதி ஸோததா⁴து, தாய தி³ப்³பா³ய ஸோததா⁴துயா. விஸுத்³தா⁴யாதி பரிஸுத்³தா⁴ய நிருபக்கிலேஸாய. அதிக்கந்தமானுஸிகாயாதி மனுஸ்ஸூபசாரம் அதிக்கமித்வா ஸத்³த³ஸ்ஸவனேன மானுஸிகமம்ஸஸோததா⁴தும் அதிக்கமித்வா டி²தாய.

ஏதமத்த²ம் விதி³த்வாதி ‘‘ஸம்மாபடிபத்தியா கு³ணவிஸேஸே பதிட்டி²தம் புரிஸாதிஸயம் தே³வாபி மனுஸ்ஸாபி ஆத³ரஜாதா அதிவிய பிஹயந்தீ’’தி இமமத்த²ம் விதி³த்வா தத³த்த²தீ³பனம் இமம் உதா³னம் உதா³னேஸி.

தத்ர பிண்ட³பாதிகங்க³ஸங்கா²தம் து⁴தங்க³ம் ஸமாதா³ய தஸ்ஸ பரிபூரணேன பிண்ட³பாதிகஸ்ஸ. நனு சாயம் கா³தா² ஆயஸ்மந்தம் மஹாகஸ்ஸபம் நிமித்தம் கத்வா பா⁴ஸிதா, தே²ரோ ச ஸப்³பே³ஸம் து⁴தவாதா³னம் அக்³கோ³ தேரஸது⁴தங்க³த⁴ரோ, ஸோ கஸ்மா ஏகேனேவ து⁴தங்கே³ன கித்திதோதி? அட்டு²ப்பத்திவஸேனாயம் நித்³தே³ஸோ. அத² வா தே³ஸனாமத்தமேதம், இமினா தே³ஸனாஸீஸேன ஸப்³பே³பிஸ்ஸ து⁴தங்கா³ வுத்தாதி வேதி³தப்³பா³. அத² வா ‘‘யதா²பி ப⁴மரோ புப்ப²’’ந்தி (த⁴. ப. 49) கா³தா²ய வுத்தனயேன பரமப்பிச்ச²தாய குலானுத்³த³யதாய சஸ்ஸ ஸப்³ப³ம் பிண்ட³பாதிகவத்தம் அக்க²ண்டே³த்வா தத்த² ஸாதிஸயம் படிபத்தியா பகாஸனத்த²ம் ‘‘பிண்ட³பாதிகஸ்ஸா’’தி வுத்தம். பிண்ட³பாதிகஸ்ஸாதி ச பிஹயந்தீதி பத³ம் அபேக்கி²த்வா ஸம்பதா³னவசனம், தம் உபயோக³த்தே² த³ட்ட²ப்³ப³ம். அத்தப⁴ரஸ்ஸாதி ‘‘அப்பானி ச தானி ஸுலபா⁴னி அனவஜ்ஜானீ’’தி (அ. நி. 4.27; இதிவு. 101) ஏவம் வுத்தேஹி அப்பானவஜ்ஜஸுலப⁴ரூபேஹி சதூஹி பச்சயேஹி அத்தானமேவ ப⁴ரந்தஸ்ஸ. அனஞ்ஞபோஸினோதி ஆமிஸஸங்க³ண்ஹனேன அஞ்ஞே ஸிஸ்ஸாதி³கே போஸேதும் அனுஸ்ஸுக்கதாய அனஞ்ஞபோஸினோ. பத³த்³வயேனஸ்ஸ காயபரிஹாரிகேன சீவரேன குச்சி²பரிஹாரிகேன பிண்ட³பாதேன விசரணதோ ஸல்லஹுகவுத்திதம் ஸுப⁴ரதம் பரமஞ்ச ஸந்துட்டி²ம் த³ஸ்ஸேதி. அத² வா அத்தப⁴ரஸ்ஸாதி ஏகவசனிச்சா²ய அத்தபா⁴வஸங்கா²தம் ஏகம்யேவ இமம் அத்தானம் ப⁴ரதி, ந இதோ பரம் அஞ்ஞந்தி அத்தப⁴ரோ, ததோ ஏவ அத்தனா அஞ்ஞஸ்ஸ போஸேதப்³ப³ஸ்ஸ அபா⁴வதோ அனஞ்ஞபோஸீ, தஸ்ஸ அத்தப⁴ரஸ்ஸ அனஞ்ஞபோஸினோ. பத³த்³வயேனபி கீ²ணாஸவபா⁴வேன ஆயதிம் அனாதா³னதம் த³ஸ்ஸேதி.

தே³வா பிஹயந்தி…பே… ஸதீமதோதி தம் அக்³க³ப²லாதி⁴க³மேன ஸப்³ப³கிலேஸத³ரத²பரிளாஹானம் வூபஸமேன படிப்பஸ்ஸத்³தி⁴யா உபஸந்தம், ஸதிவேபுல்லப்பத்தியா நிச்சகாலம் ஸதோகாரிதாய ஸதிமந்தம், ததோ ஏவ இட்டா²னிட்டா²தீ³ஸு தாதி³லக்க²ணப்பத்தம் கீ²ணாஸவம் ஸக்காத³யோ தே³வா பிஹயந்தி பத்தே²ந்தி, தஸ்ஸ ஸீலாதி³கு³ணவிஸேஸேஸு ப³ஹுமானம் உப்பாதே³ந்தா ஆத³ரம் ஜனேந்தி, பகே³வ மனுஸ்ஸாதி.

ஸத்தமஸுத்தவண்ணனா நிட்டி²தா.

8. பிண்ட³பாதிகஸுத்தவண்ணனா

28. அட்ட²மே பச்சா²ப⁴த்தந்தி ஏகாஸனிகக²லுபச்சா²ப⁴த்திகானம் பாதோவ பு⁴த்தானம் அந்தோமஜ்ஜ²ன்ஹிகோபி பச்சா²ப⁴த்தமேவ, இத⁴ பன பகதிப⁴த்தஸ்ஸேவ பச்ச²தோ பச்சா²ப⁴த்தந்தி வேதி³தப்³ப³ம். பிண்ட³பாதபடிக்கந்தானந்தி பிண்ட³பாததோ படிக்கந்தானம், பிண்ட³பாதம் பரியேஸித்வா ப⁴த்தகிச்சஸ்ஸ நிட்டா²பனவஸேன ததோ நிவத்தானம். கரேரிமண்ட³லமாளேதி ஏத்த² கரேரீதி வருணருக்க²ஸ்ஸ நாமம். ஸோ கிர க³ந்த⁴குடியா மண்ட³பஸ்ஸ ஸாலாய ச அந்தரே ஹோதி, தேன க³ந்த⁴குடீபி ‘‘கரேரிகுடிகா’’தி வுச்சதி, மண்ட³போபி ஸாலாபி ‘‘கரேரிமண்ட³லமாளோ’’தி. தஸ்மா கரேரிருக்க²ஸ்ஸ அவிதூ³ரே கதே நிஸீத³னஸாலஸங்கா²தே மண்ட³லமாளே. திணபண்ணச்ச²த³னம் அனோவஸ்ஸகம் ‘‘மண்ட³லமாளோ’’தி வத³ந்தி, அதிமுத்தகாதி³லதாமண்ட³போ ‘‘மண்ட³லமாளோ’’தி அபரே.

காலேன காலந்தி காலே காலே அந்தரந்தரா, தஸ்மிம் தஸ்மிம் ஸமயேதி அத்தோ². மனாபிகேதி மனவட்³ட⁴கே, பியரூபே இட்டே²தி அத்தோ². இட்டா²னிட்ட²பா⁴வோ ச புக்³க³லவஸேன ச த்³வாரவஸேன ச க³ஹேதப்³போ³. ஏகச்சஸ்ஸ ஹி இட்டா²பி⁴மதோ ஏகச்சஸ்ஸ அனிட்டோ² ஹோதி, ஏகச்சஸ்ஸ அனிட்டா²பி⁴மதோ ஏகச்சஸ்ஸ இட்டோ². ததா² ஏகஸ்ஸ த்³வாரஸ்ஸ இட்டோ² அஞ்ஞஸ்ஸ அனிட்டோ². விபாகவஸேன பனேத்த² வினிச்ச²யோ வேதி³தப்³போ³. குஸலவிபாகோ ஹி ஏகந்தேன இட்டோ², அகுஸலவிபாகோ அனிட்டோ² ஏவாதி. சக்கு²னா ரூபே பஸ்ஸிதுந்தி கா³மம் பிண்டா³ய பவிட்டோ² உபாஸகேஹி கே³ஹம் பவேஸேத்வா பூஜாஸக்காரகரணத்த²ம் உபனீதேஸு ஆஸனவிதானாதீ³ஸு நானாவிராக³ஸமுஜ்ஜலவண்ணஸங்கா²தே ரஜனீயே அஞ்ஞே ச ஸவிஞ்ஞாணகரூபே சக்கு²த்³வாரிகவிஞ்ஞாணேஹி பஸ்ஸிதும். ஸத்³தே³தி ததே²வ இஸ்ஸரஜனானம் கே³ஹம் பவிட்டோ² தேஸம் பயுத்தே கீ³தவாதி³தஸத்³தே³ ஸோதும். க³ந்தே⁴தி ததா² தேஹி பூஜாஸக்காரவஸேன உபனீதே புப்ப²தூ⁴மாதி³க³ந்தே⁴ கா⁴யிதும். ரஸேதி தேஹி தி³ன்னாஹாரபரிபோ⁴கே³ நானக்³க³ரஸே ஸாயிதும். போ²ட்ட²ப்³பே³தி மஹக்³க⁴பச்சத்த²ரணேஸு ஆஸனேஸு நிஸின்னகாலே ஸுக²ஸம்ப²ஸ்ஸே போ²ட்ட²ப்³பே³ பு²ஸிதும். ஏவஞ்ச பஞ்சத்³வாரிகஇட்டா²ரம்மணப்படிலாப⁴ம் கித்தேத்வா இதா³னி மனோத்³வாரிகஇட்டா²ரம்மணப்படிலாப⁴ம் த³ஸ்ஸேதும் ‘‘ஸக்கதோ’’திஆதி³ வுத்தம். தம் ஹேட்டா² வுத்தத்த²மேவ.

கிம் பன அபிண்ட³பாதிகானம் அயம் நயோ ந லப்³ப⁴தீதி? லப்³ப⁴தி. தேஸம்பி ஹி நிமந்தனஸலாகப⁴த்தாதி³அத்த²ம் கா³மம் க³தகாலே உளாரவிப⁴வா உபாஸகா ததா² ஸக்காரஸம்மானம் கரோந்தியேவ, தம் பன அனியதம். பிண்ட³பாதிகானம் பன ததா³ நிச்சமேவ தத்த² பூஜாஸக்காரம் கரியமானம் தி³ஸ்வா, ஸக்காரக³ருதாய அனிஸ்ஸரணமக்³கே³ ட²த்வா, அயோனிஸோமனஸிகாரவஸேன தே பி⁴க்கூ² ஏவமாஹம்ஸு. தேனேவாஹ – ‘‘ஹந்தா³வுஸோ, மயம்பி பிண்ட³பாதிகா ஹோமா’’திஆதி³.

தத்த² ஹந்தா³தி வோஸ்ஸக்³க³த்தே² நிபாதோ. லச்சா²மாதி லபி⁴ஸ்ஸாம. தேனுபஸங்கமீதி தத்த² ஸுரபி⁴க³ந்த⁴குடியம் நிஸின்னோ தேஸம் தம் கதா²ஸல்லாபம் ஸுத்வா ‘‘இமே பி⁴க்கூ² மாதி³ஸஸ்ஸ நாம பு³த்³த⁴ஸ்ஸ ஸாஸனே பப்³ப³ஜித்வா மயா ஸத்³தி⁴ம் ஏகவிஹாரே வஸந்தாபி ஏவம் அயோனிஸோமனஸிகாரவஸேன கத²ம் பவத்தேந்தி, ஸல்லேகே² ந வத்தந்தி, ஹந்த³ தே ததோ நிவாரேத்வா ஸல்லேக²விஹாரே நியோஜேஸ்ஸாமீ’’தி மண்ட³லமாளம் உபஸங்கமி. ஸேஸம் ஹேட்டா² வுத்தனயமேவ.

ஏதமத்த²ம் விதி³த்வாதி ‘‘அப்பிச்ச²தாஸந்துட்டி²தாஸல்லேகா²னம் வஸேன கிலேஸே து⁴னிதும் தண்ஹம் விஸோஸேதும் படிபன்னோதி பிண்ட³பாதிகஸ்ஸ ஸதோ தே³வா பிஹயந்தி, தஸ்ஸ படிபத்தியா ஆத³ரஜாதா பியாயந்தி, ந இதோ அஞ்ஞதா²’’தி இமமத்த²ம் விதி³த்வா தத³த்த²தீ³பனம் இமம் உதா³னம் உதா³னேஸி.

தத்த² நோ சே ஸத்³த³ஸிலோகனிஸ்ஸிதோதி ‘‘அஹோ அய்யோ அப்பிச்சோ² ஸந்துட்டோ² பரமஸல்லேக²வுத்தீ’’திஆதி³னா பரேஹி கித்திதப்³ப³ஸத்³த³ஸங்கா²தம் ஸிலோகம். தண்ஹாய நிஸ்ஸிதோ ந ஹோதி சேதி அத்தோ². ஸத்³தோ³ வா ஸம்முகா² வண்ணப⁴ணனது²திகோ⁴ஸோ, ஸிலோகோ பரம்முக²பூ⁴தா பஸம்ஸா பத்த²டயஸதா வா. ஸேஸம் அனந்தரஸுத்தே வுத்தனயமேவ.

அட்ட²மஸுத்தவண்ணனா நிட்டி²தா.

9. ஸிப்பஸுத்தவண்ணனா

29. நவமே கோ நு கோ², ஆவுஸோ, ஸிப்பம் ஜானாதீதி, ஆவுஸோ, அம்ஹேஸு இத⁴ ஸன்னிபதிதேஸு கோ நு ஜீவிதனிமித்தம் ஸிக்கி²தப்³ப³ட்டே²ன ‘‘ஸிப்ப’’ந்தி லத்³த⁴னாமம் யம்கிஞ்சி ஆஜீவம் விஜானாதி? கோ கிம் ஸிப்பம் ஸிக்கீ²தி கோ தீ³க⁴ரத்தம் ஸிப்பாசரியகுலம் பயிருபாஸித்வா ஆக³மதோ பயோக³தோ ச ஹத்தி²ஸிப்பாதீ³ஸு கிம் ஸிப்பம் ஸிக்கி²? கதரம் ஸிப்பம் ஸிப்பானம் அக்³க³ந்தி ஸப்³ப³ஸிப்பானம் அகா³ரய்ஹதாய மஹப்ப²லதாய அகிச்ச²ஸித்³தி⁴யா ச கதரம் ஸிப்பம் அக்³க³ம் உத்தமம்? யம் நிஸ்ஸாய ஸுகே²ன ஸக்கா ஜீவிதுந்தி அதி⁴ப்பாயோ. தத்தே²கச்சேதி தேஸு பி⁴க்கூ²ஸு ஏகச்சே பி⁴க்கூ². யே ஹத்தா²சரியகுலா பப்³ப³ஜிதா தே. ஏவமாஹம்ஸூதி தே ஏவம் ப⁴ணிம்ஸு. இதோ பரம்பி ‘‘ஏகச்சே’’தி வுத்தட்டா²னே ஏஸேவ நயோ. ஹத்தி²ஸிப்பந்தி யம் ஹத்தீ²னம் பரிக்³க³ண்ஹனத³மனஸாரணரோக³திகிச்சா²தி³பே⁴த³ம் கத்தப்³ப³ம், தம் உத்³தி³ஸ்ஸ பவத்தம் ஸப்³ப³ம்பி ஸிப்பம் இத⁴ ‘‘ஹத்தி²ஸிப்ப’’ந்தி அதி⁴ப்பேதம். அஸ்ஸஸிப்பந்தி ஏத்தா²பி ஏஸேவ நயோ. ரத²ஸிப்பம் பன ரத²யோக்³கா³னம் த³மனஸாரணாதி³விதா⁴னவஸேன சேவ ரத²ஸ்ஸ கரணவஸேன ச வேதி³தப்³ப³ம். த⁴னுஸிப்பந்தி இஸ்ஸாஸஸிப்பம், யோ த⁴னுப்³பே³தோ⁴தி வுச்சதி. த²ருஸிப்பந்தி ஸேஸஆவுத⁴ஸிப்பம். முத்³தா³ஸிப்பந்தி ஹத்த²முத்³தா³ய க³ணனஸிப்பம். க³ணனஸிப்பந்தி அச்சி²த்³த³கக³ணனஸிப்பம். ஸங்கா²னஸிப்பந்தி ஸங்கலனபடுப்பாத³னாதி³வஸேன பிண்ட³க³ணனஸிப்பம். தம் யஸ்ஸ பகு³ணம் ஹோதி, ஸோ ருக்க²ம்பி தி³ஸ்வா ‘‘ஏத்தகானி ஏத்த² பண்ணானீ’’தி க³ணிதும் ஜானாதி. லேகா²ஸிப்பந்தி நானாகாரேஹி அக்க²ரலிக²னஸிப்பம், லிபிஞாணம் வா. காவேய்யஸிப்பந்தி அத்தனோ சிந்தாவஸேன வா பரதோ படிலத்³த⁴ஸுதவஸேன வா, ‘‘இமஸ்ஸ அயமத்தோ², ஏவம் நம் யோஜேஸ்ஸாமீ’’தி ஏவம் அத்த²வஸேன வா, கிஞ்சிதே³வ கப்³ப³ம் தி³ஸ்வா, ‘‘தப்படிபா⁴க³ம் கப்³ப³ம் கரிஸ்ஸாமீ’’தி டா²னுப்பத்திகபடிபா⁴னவஸேன வா சிந்தாகவிஆதீ³னம் சதுன்னம் கவீனம் கப்³ப³கரணஸிப்பம். வுத்தஞ்ஹேதம் ப⁴க³வதா –

‘‘சத்தாரோமே, பி⁴க்க²வே, கவீ – சிந்தாகவி, ஸுதகவி, அத்த²கவி, படிபா⁴னகவீ’’தி (அ. நி. 4.231).

லோகாயதஸிப்பந்தி ‘‘காகோ ஸேதோ அட்டீ²னம் ஸேதத்தா, ப³லாகா ரத்தா லோஹிதஸ்ஸ ரத்தத்தா’’தி ஏவமாதி³னயப்பவத்தம் பரலோகனிப்³பா³னானம் படிஸேத⁴கம் விதண்ட³ஸத்த²ஸிப்பம். க²த்தவிஜ்ஜாஸிப்பந்தி அப்³பே⁴ய்யமாஸுரக்கா²தி³னீதிஸத்த²ஸிப்பம். இமானி கிர த்³வாத³ஸ மஹாஸிப்பானி நாம. தேனேவாஹ தத்த² தத்த² ‘‘ஸிப்பானம் அக்³க³’’ந்தி.

ஏதமத்த²ம் விதி³த்வாதி ஏதம் ஸப்³ப³ஸிப்பாயதனானம் ஜீவிகத்த²தாய வட்டது³க்க²தோ அனிஸ்ஸரணபா⁴வம், ஸீலாதீ³னம்யேவ பன ஸுபரிஸுத்³தா⁴னம் நிஸ்ஸரணபா⁴வம், தம் ஸமங்கி³னோயேவ ச பி⁴க்கு²பா⁴வம் ஸப்³பா³காரதோ விதி³த்வா தத³த்த²விபா⁴வனம் இமம் உதா³னம் உதா³னேஸி.

தத்த² அஸிப்பஜீவீதி சதுன்னம் தண்ஹுப்பாதா³னம் ஸமுச்சே²த³விக்க²ம்ப⁴னேன பச்சயாஸாய விஸோஸிதத்தா யம்கிஞ்சி ஸிப்பம் உபனிஸ்ஸாய ஜீவிகம் ந கப்பேதீதி அஸிப்பஜீவீ, ஏதேன ஆஜீவபாரிஸுத்³தி⁴ஸீலம் த³ஸ்ஸேதி. லஹூதி அப்பகிச்சதாய ஸல்லஹுகவுத்திதாய ச லஹு அப³ஹுலஸம்பா⁴ரோ, ஏதேன சதுபச்சயஸந்தோஸஸித்³த⁴ம் ஸுப⁴ரதம் த³ஸ்ஸேதி. அத்த²காமோதி ஸதே³வகஸ்ஸ லோகஸ்ஸ அத்த²மேவ காமேதீதி அத்த²காமோ, ஏதேன ஸத்தானம் அனத்த²பரிவஜ்ஜனஸ்ஸ பகாஸிதத்தா பாதிமோக்க²ஸம்வரஸீலம் த³ஸ்ஸேதி பாணாதிபாதாதி³அனத்த²விரமணபரிதீ³பனதோ. யதிந்த்³ரியோதி சக்கா²தீ³னம் ச²ன்னம் இந்த்³ரியானம் அபி⁴ஜ்ஜா²த்³யப்பவத்திதோ ஸம்யமேன யதிந்த்³ரியோ, ஏதேன இந்த்³ரியஸம்வரஸீலம் வுத்தம். ஸப்³ப³தி⁴ விப்பமுத்தோதி ஏவம் ஸுபரிஸுத்³த⁴ஸீலோ சதுபச்சயஸந்தோஸே அவட்டி²தோ ஸப்பச்சயம் நாமரூபம் பரிக்³க³ஹேத்வா அனிச்சாதி³வஸேன ஸங்கா²ரே ஸம்மஸந்தோ விபஸ்ஸனம் உஸ்ஸுக்காபேத்வா ததோ பரம் படிபாடியா பவத்திதேஹி சதூஹி அரியமக்³கே³ஹி ஸம்யோஜனானம் பஹீனத்தா ஸப்³ப³தி⁴ ஸப்³ப³த்த² ப⁴வாதீ³ஸு விப்பமுத்தோ.

அனோகஸாரீ அமமோ நிராஸோதி ததா² ஸப்³ப³தி⁴ விப்பமுத்தத்தா ஏவ ஓகஸங்கா²தேஸு ச²ஸுபி ஆயதனேஸு தண்ஹாபி⁴ஸரணஸ்ஸ அபா⁴வேன அனோகஸாரீ, ரூபாதீ³ஸு கத்த²சி மமங்காராபா⁴வதோ அமமோ, ஸப்³பே³ன ஸப்³ப³ம் அனாஸீஸனதோ நிராஸோ. ஹித்வா மானம் ஏகசரோ ஸ பி⁴க்கூ²தி ஏவம்பூ⁴தோ ச ஸோ அரஹத்தமக்³க³ப்பத்திஸமகாலமேவ அனவஸேஸம் மானம் ஹித்வா பஜஹித்வா இமே பி⁴க்கூ² விய க³ணஸங்க³ணிகம் அகத்வா பவிவேககாமதாய தண்ஹாஸஹாயவிரஹேன ச ஸப்³பி³ரியாபதே²ஸு ஏகசரோ, ஸோ ஸப்³ப³ஸோ பி⁴ன்னகிலேஸத்தா பரமத்த²தோ பி⁴க்கு² நாம. ஏத்த² ச ‘‘அஸிப்பஜீவீ’’திஆதி³னா லோகியகு³ணா கதி²தா, ‘‘ஸப்³ப³தி⁴ விப்பமுத்தோ’’திஆதி³னா லோகுத்தரகு³ணா கதி²தா. தத்த² அஸிப்பஜீவீதிஆதி³ ‘‘விப⁴வே டி²தஸ்ஸேவ அயம் த⁴ம்மோ, ந ஸிப்பம் நிஸ்ஸாய மிச்சா²ஜீவேன ஜீவிகம் கப்பேந்தஸ்ஸ, தஸ்மா ஸிப்பேஸு ஸாரக்³க³ஹணம் விஸ்ஸஜ்ஜேத்வா அதி⁴ஸீலாதீ³ஸுயேவ தும்ஹேஹி ஸிக்கி²தப்³ப³’’ந்தி த³ஸ்ஸேதி.

நவமஸுத்தவண்ணனா நிட்டி²தா.

10. லோகஸுத்தவண்ணனா

30. த³ஸமே பு³த்³த⁴சக்கு²னாதி ஏத்த² ஆஸயானுஸயஞாணம் இந்த்³ரியபரோபரியத்தஞாணஞ்ச பு³த்³த⁴சக்கு² நாம. யதா²ஹ –

‘‘அத்³த³ஸா கோ² ப⁴க³வா பு³த்³த⁴சக்கு²னா லோகம் வோலோகேந்தோ ஸத்தே அப்பரஜக்கே² மஹாரஜக்கே² திக்கி²ந்த்³ரியே முதி³ந்த்³ரியே’’திஆதி³ (ம. நி. 1.283; 2.339).

லோகந்தி தயோ லோகா – ஓகாஸலோகோ, ஸங்கா²ரலோகோ, ஸத்தலோகோதி. தத்த² –

‘‘யாவதா சந்தி³மஸூரியா பரிஹரந்தி,

தி³ஸா ப⁴ந்தி விரோசனா;

தாவ ஸஹஸ்ஸதா⁴ லோகோ,

ஏத்த² தே வத்ததீ வஸோ’’தி. –

ஆதீ³ஸு (ம. நி. 1.503) ஓகாஸலோகோ. ‘‘ஏகோ லோகோ – ஸப்³பே³ ஸத்தா ஆஹாரட்டி²திகா, த்³வே லோகா – நாமஞ்ச ரூபஞ்ச, தயோ லோகா – திஸ்ஸோ வேத³னா, சத்தாரோ லோகா – சத்தாரோ ஆஹாரா, பஞ்ச லோகா – பஞ்சுபாதா³னக்க²ந்தா⁴, ச² லோகா – ச² அஜ்ஜ²த்திகானி ஆயதனானி, ஸத்த லோகா – ஸத்த விஞ்ஞாணட்டி²தியோ, அட்ட² லோகா – அட்ட² லோகத⁴ம்மா, நவ லோகா – நவ ஸத்தாவாஸா, த³ஸ லோகா – த³ஸாயதனானி, த்³வாத³ஸ லோகா – த்³வாத³ஸாயதனானி, அட்டா²ரஸ லோகா – அட்டா²ரஸ தா⁴துயோ’’திஆதீ³ஸு (படி. ம. 1.112) ஸங்கா²ரலோகோ. ‘‘ஸஸ்ஸதோ லோகோ, அஸஸ்ஸதோ லோகோ’’திஆதீ³ஸு ஸத்தலோகோ வுத்தோ. இதா⁴பி ஸத்தலோகோ வேதி³தப்³போ³.

தத்த² லோகீயதி விசித்தாகாரதோ தி³ஸ்ஸதீதி சக்கவாளஸங்கா²தோ லோகோ ஓகாஸலோகோ, ஸங்கா²ரோ லுஜ்ஜதி பலுஜ்ஜதீதி லோகோ, லோகீயதி ஏத்த² புஞ்ஞபாபம் தப்³பி³பாகோ சாதி ஸத்தலோகோ. தேஸு ப⁴க³வா மஹாகருணாய அனுகம்பமானோ ஸம்ஸாரது³க்க²தோ மோசேதுகாமோ ஸத்தலோகம் ஓலோகேஸி. கதமஸ்ஸ பன ஸத்தாஹஸ்ஸ அச்சயேன ஓலோகேஸி? பட²மஸ்ஸ ஸத்தாஹஸ்ஸ. ப⁴க³வா ஹி பல்லங்கஸத்தாஹஸ்ஸ பரியோஸானே பச்சி²மயாமாவஸானே ‘‘யதா³ ஹவே பாதுப⁴வந்தி த⁴ம்மா…பே… ஸூரியோவ ஓபா⁴ஸயமந்தலிக்க²’’ந்தி (உதா³. 1-3; கதா². 321; மஹாவ. 1-3) இமம் அரியமக்³கா³னுபா⁴வதீ³பகம் உதா³னம் உதா³னேத்வா, ‘‘அஹம் தாவ ஏவம் ஸுது³த்தரம் ஸம்ஸாரமஹோக⁴ம் இமாய த⁴ம்மனாவாய ஸமுத்தரித்வா நிப்³பா³னபாரே டி²தோ, ஹந்த³ தா³னி லோகம்பி தாரேஸ்ஸாமி, கீதி³ஸோ நு கோ² லோகோ’’தி லோகம் வோலோகேஸி. தம் ஸந்தா⁴ய வுத்தம் – ‘‘அத² கோ² ப⁴க³வா தஸ்ஸ ஸத்தாஹஸ்ஸ அச்சயேன தம்ஹா ஸமாதி⁴ம்ஹா வுட்ட²ஹித்வா பு³த்³த⁴சக்கு²னா லோகம் வோலோகேஸீ’’தி.

தத்த² வோலோகேஸீதி விவிதே⁴ஹி ஆகாரேஹி பஸ்ஸி, ஹத்த²தலே ட²பிதஆமலகம் விய அத்தனோ ஞாணேன பச்சக்க²ம் அகாஸி. அனேகேஹி ஸந்தாபேஹீதிஆதி³ வோலோகிதாகாரத³ஸ்ஸனம். அனேகேஹி ஸந்தாபேஹீதி அனேகேஹி து³க்கே²ஹி. து³க்க²ஞ்ஹி ஸந்தாபனபீளனட்டே²ன ஸந்தாபோதி வுச்சதி. யதா²ஹ – ‘‘து³க்க²ஸ்ஸ பீளனட்டோ² ஸங்க²தட்டோ² ஸந்தாபட்டோ² விபரிணாமட்டோ²’’தி (படி. ம. 1.17). தஞ்ச து³க்க²து³க்கா²தி³வஸேன சேவ ஜாதிஆதி³வஸேன ச அனேகப்பகாரம். தேன வுத்தம் ‘‘அனேகேஹி ஸந்தாபேஹீ’’தி. அனேகேஹி து³க்கே²ஹி ஸந்தப்பமானே பீளியமானே பா³தி⁴யமானே. பரிளாஹேஹீதி பரிதா³ஹேஹி. பரிட³ய்ஹமானேதி இந்த⁴னம் விய அக்³கி³னா ஸமந்ததோ ட³ய்ஹமானே. ராக³ஜேஹீதி ராக³ஸம்பூ⁴தேஹி. ஏஸ நயோ ஸேஸேஸுபி. ராகா³த³யோ ஹி யஸ்மிம் ஸந்தானே உப்பஜ்ஜந்தி, தம் நித்³த³ஹந்தா விய விபா³தே⁴ந்தி, தேன வுத்தம் – ‘‘தயோமே, பி⁴க்க²வே, அக்³கீ³ – ராக³க்³கி³, தோ³ஸக்³கி³, மோஹக்³கீ³’’தி (இதிவு. 93). யதோ தே சித்தம் காயஞ்ச கிலேஸேந்தீதி கிலேஸாதி வுச்சந்தி. ஏத்த² ச பரிட³ய்ஹமானேதி ஏதேன ப⁴க³வா ராகா³தி³கிலேஸானம் பவத்திது³க்க²தம், தேன ச ஸத்தானம் அபி⁴பூ⁴ததம் த³ஸ்ஸேதி. ஸந்தப்பமானேதி இமினா பன தேஸம் காலந்தரது³க்க²தம், தேன நிரந்தரோபத்³த³வதஞ்ச த³ஸ்ஸேதி.