1. கம்மவிபாகஜஸுத்தவண்ணனா

21. நந்த³வக்³க³ஸ்ஸ பட²மே அஞ்ஞதரோ பி⁴க்கூ²தி நாமகோ³த்தேன அபாகடோ ஏகோ கீ²ணாஸவபி⁴க்கு². ஸோ கிர ராஜக³ஹவாஸீ குலபுத்தோ மோக்³க³ல்லானத்தே²ரேன ஸம்வேஜிதோ ஸம்ஸாரதோ³ஸம் தி³ஸ்வா ஸத்து² ஸந்திகே பப்³ப³ஜித்வா ஸீலானி ஸோதே⁴த்வா சதுஸச்சகம்மட்டா²னம் க³ஹேத்வா ந சிரஸ்ஸேவ விபஸ்ஸனம் உஸ்ஸுக்காபேத்வா அரஹத்தம் பாபுணி. தஸ்ஸ அபரபா⁴கே³ க²ரோ ஆபா³தோ⁴ உப்பஜ்ஜி, ஸோ பச்சவேக்க²ணாய அதி⁴வாஸேந்தோ விஹரதி. கீ²ணாஸவானஞ்ஹி சேதஸிகது³க்க²ம் நாம நத்தி², காயிகது³க்க²ம் பன ஹோதியேவ. ஸோ ஏகதி³வஸம் ப⁴க³வதோ த⁴ம்மம் தே³ஸேந்தஸ்ஸ நாதிதூ³ரே டா²னே து³க்க²ம் அதி⁴வாஸேந்தோ பல்லங்கேன நிஸீதி³. தேன வுத்தம் ‘‘ப⁴க³வதோ அவிதூ³ரே நிஸின்னோ ஹோதீ’’திஆதி³.

தத்த² பல்லங்கந்தி ஸமந்ததோ ஊருப³த்³தா⁴ஸனம். ஆபு⁴ஜித்வாதி ப³ந்தி⁴த்வா. உஜும் காயம் பணிதா⁴யாதி உபரிமம் ஸரீரம் உஜுகம் ட²பேத்வா அட்டா²ரஸ பிட்டி²கண்டகே கோடியா கோடிம் படிபாதே³த்வா. ஏவஞ்ஹி நிஸின்னஸ்ஸ சம்மமம்ஸன்ஹாரூனி ந நமந்தி, தஸ்மா ஸோ ததா² நிஸின்னோ ஹோதி. புராணகம்மவிபாகஜந்தி புப்³பே³ கதஸ்ஸ கம்மஸ்ஸ விபாகபா⁴வேன ஜாதம், புராணகம்மவிபாகே வா ஸுக²து³க்க²ப்பகாரே விபாகவட்டஸமுதா³யே ததே³கதே³ஸபா⁴வேன ஜாதம். கிம் தம்? து³க்க²ம். புராணகம்மவிபாகஜந்தி ச இமினா தஸ்ஸ ஆபா³த⁴ஸ்ஸ கம்மஸமுட்டா²னதம் த³ஸ்ஸேந்தோ ஓபக்கமிகஉதுவிபரிணாமஜாதி³பா⁴வம் படிக்கி²பதி. து³க்க²ந்தி பசுரஜனேஹி க²மிதும் அஸக்குணேய்யம். திப்³ப³ந்தி திகி²ணம், அபி⁴ப⁴வித்வா பவத்தியா ப³ஹலம் வா. க²ரந்தி கக்க²ளம். கடுகந்தி அஸாதம். அதி⁴வாஸேந்தோதி உபரி வாஸேந்தோ ஸஹந்தோ க²மந்தோ.

ஸதோ ஸம்பஜானோதி வேத³னாபரிக்³கா³ஹகானம் ஸதிஸம்பஜஞ்ஞானம் வஸேன ஸதிமா ஸம்பஜானந்தோ ச. இத³ம் வுத்தம் ஹோதி – ‘‘அயம் வேத³னா நாம ஹுத்வா அபா⁴வட்டே²ன அனிச்சா, அனிட்டா²ரம்மணாதி³பச்சயே படிச்ச உப்பன்னத்தா படிச்சஸமுப்பன்னா, உப்பஜ்ஜித்வா ஏகந்தேன பி⁴ஜ்ஜனஸபா⁴வத்தா க²யத⁴ம்மா வயத⁴ம்மா விராக³த⁴ம்மா நிரோத⁴த⁴ம்மா’’தி வேத³னாய அனிச்சதாஸல்லக்க²ணவஸேன ஸதோகாரிதாய ஸதோ, அவிபரீதஸபா⁴வபடிவிஜ்ஜ²னவஸேன ஸம்பஜானோ ச ஹுத்வா. அத² வா ஸதிவேபுல்லபத்தியா ஸப்³ப³த்தே²வ காயவேத³னாசித்தத⁴ம்மேஸு ஸுட்டு² உபட்டி²தஸதிதாய ஸதோ, ததா² பஞ்ஞாவேபுல்லப்பத்தியா பரிக்³க³ஹிதஸங்கா²ரதாய ஸம்பஜானோ. அவிஹஞ்ஞமானோதி ‘‘அஸ்ஸுதவா, பி⁴க்க²வே, புது²ஜ்ஜனோ அஞ்ஞதரஞ்ஞதரேன து³க்க²த⁴ம்மேன பு²ட்டோ² ஸமானோ ஸோசதி கிலமதி பரிதே³வதி உரத்தாளிம் கந்த³தி ஸம்மோஹம் ஆபஜ்ஜதீ’’தி வுத்தனயேன அந்த⁴புது²ஜ்ஜனோ விய ந விஹஞ்ஞமானோ மக்³கே³னேவ ஸமுக்³கா⁴திதத்தா சேதோது³க்க²ம் அனுப்பாதே³ந்தோ கேவலம் கம்மவிபாகஜம் ஸரீரது³க்க²ம் அதி⁴வாஸேந்தோ ஸமாபத்திம் ஸமாபன்னோ விய நிஸின்னோ ஹோதி. அத்³த³ஸாதி தம் ஆயஸ்மந்தம் அதி⁴வாஸனக²ந்தியா ததா² நிஸின்னம் அத்³த³க்கி².

ஏதமத்த²ந்தி ஏதம் தாதி³ஸஸ்ஸபி ரோக³ஸ்ஸ வேஜ்ஜாதீ³ஹி திகிச்ச²னத்த²ம் அனுஸ்ஸுக்காபஜ்ஜனகாரணம் கீ²ணாஸவானம் லோகத⁴ம்மேஹி அனுபலேபிதஸங்கா²தம் அத்த²ம் ஸப்³பா³காரதோ விதி³த்வா. இமம் உதா³னந்தி இமம் ஸங்க²தத⁴ம்மானம் யேஹி கேஹிசி து³க்க²த⁴ம்மேஹி அவிகா⁴தபத்திவிபா⁴வனம் உதா³னம் உதா³னேஸி.

தத்த² ஸப்³ப³கம்மஜஹஸ்ஸாதி பஹீனஸப்³ப³கம்மஸ்ஸ. அக்³க³மக்³க³ஸ்ஸ ஹி உப்பன்னகாலதோ பட்டா²ய அரஹதோ ஸப்³பா³னி குஸலாகுஸலகம்மானி பஹீனானி நாம ஹோந்தி படிஸந்தி⁴ம் தா³தும் அஸமத்த²பா⁴வதோ, யதோ அரியமக்³க³ஞாணம் கம்மக்க²யகரந்தி வுச்சதி. பி⁴க்கு²னோதி பி⁴ன்னகிலேஸதாய பி⁴க்கு²னோ. து⁴னமானஸ்ஸ புரே கதம் ரஜந்தி அரஹத்தப்பத்திதோ புப்³பே³ கதம் ராக³ரஜாதி³மிஸ்ஸதாய ரஜந்தி லத்³த⁴னாமம் து³க்க²வேத³னீயம் கம்மம் விபாகபடிஸம்வேத³னேன தம் து⁴னந்தஸ்ஸ வித்³த⁴ம்ஸேந்தஸ்ஸ, அரஹத்தப்பத்தியா பரதோ பன ஸாவஜ்ஜகிரியாய ஸம்ப⁴வோயேவ நத்தி², அனவஜ்ஜகிரியா ச ப⁴வமூலஸ்ஸ ஸமுச்சி²ன்னத்தா ஸமுச்சி²ன்னமூலதாய புப்ப²ம் விய ப²லதா³னஸமத்த²தாய அபா⁴வதோ கிரியமத்தாவ ஹோதி.

அமமஸ்ஸாதி ரூபாதீ³ஸு கத்த²சி மமந்தி க³ஹணாபா⁴வதோ அமமஸ்ஸ மமங்காரரஹிதஸ்ஸ. யஸ்ஸ ஹி மமங்காரோ அத்தி², ஸோ அத்தஸினேஹேன வேஜ்ஜாதீ³ஹி ஸரீரம் படிஜக்³கா³பேதி. அரஹா பன அமமோ, தஸ்மா ஸோ ஸரீரஜக்³க³னேபி உதா³ஸீனதா⁴துகோவ. டி²தஸ்ஸாதி சதுப்³பி³த⁴ம்பி ஓக⁴ம் தரித்வா நிப்³பா³னத²லே டி²தஸ்ஸ, படிஸந்தி⁴க்³க³ஹணவஸேன வா ஸந்தா⁴வனஸ்ஸ அபா⁴வேன டி²தஸ்ஸ. ஸேக்க²புது²ஜ்ஜனா ஹி கிலேஸாபி⁴ஸங்கா²ரானம் அப்பஹீனத்தா சுதிபடிஸந்தி⁴வஸேன ஸம்ஸாரே தா⁴வந்தி நாம, அரஹா பன தத³பா⁴வதோ டி²தோதி வுச்சதி. அத² வா த³ஸவிதே⁴ கீ²ணாஸவஸங்கா²தே அரியத⁴ம்மே டி²தஸ்ஸ. தாதி³னோதி ‘‘படிகூலே அப்படிகூலஸஞ்ஞீ விஹரதீ’’திஆதி³னா (படி. ம. 3.17) நயேன வுத்தாய பஞ்சவிதா⁴ய அரியித்³தி⁴யா அட்ட²ஹி லோகத⁴ம்மேஹி அகம்பனியாய ச²ளங்கு³பேக்கா²ய ச ஸமன்னாக³தேன இட்டா²தீ³ஸு ஏகஸதி³ஸதாஸங்கா²தேன தாதீ³பா⁴வேன தாதி³னோ. அத்தோ² நத்தி² ஜனம் லபேதவேதி ‘‘மம பே⁴ஸஜ்ஜாதீ³னி கரோதா²’’தி ஜனம் லபிதும் கதே²தும் பயோஜனம் நத்தி² ஸரீரே நிரபேக்க²பா⁴வதோ. பண்டு³பலாஸோ விய ஹி ப³ந்த⁴னா பவுத்தோ ஸயமேவாயம் காயோ பி⁴ஜ்ஜித்வா பததூதி கீ²ணாஸவானம் அஜ்ஜா²ஸயோ. வுத்தஞ்ஹேதம் –

‘‘நாபி⁴கங்கா²மி மரணம், நாபி⁴கங்கா²மி ஜீவிதம்;

காலஞ்ச படிகங்கா²மி, நிப்³பி³ஸம் ப⁴தகோ யதா²’’தி. (தே²ரகா³. 606);

அத² வா யம்கிஞ்சி நிமித்தம் த³ஸ்ஸேத்வா ‘‘கிம் அய்யஸ்ஸ இச்சி²தப்³ப³’’ந்தி ஜனம் லபேதவே பச்சயேஹி நிமந்தனவஸேன லபாபேதும் கீ²ணாஸவஸ்ஸ அத்தோ² நத்தி² தாதி³ஸஸ்ஸ மிச்சா²ஜீவஸ்ஸ மக்³கே³னேவ ஸமுக்³கா⁴திதத்தாதி அத்தோ². இதி ப⁴க³வா ‘‘கிஸ்ஸாயம் தே²ரோ அத்தனோ ரோக³ம் வேஜ்ஜேஹி அதிகிச்சா²பேத்வா ப⁴க³வதோ அவிதூ³ரே நிஸீத³தீ’’தி சிந்தேந்தானம் தஸ்ஸ அதிகிச்சா²பனே காரணம் பகாஸேஸி.

பட²மஸுத்தவண்ணனா நிட்டி²தா.