6. மஹாகஸ்ஸபஸுத்தவண்ணனா

6. ச²ட்டே² ராஜக³ஹேதி ஏவம்னாமகே நக³ரே. தஞ்ஹி மஹாமந்தா⁴துமஹாகோ³விந்தா³தீ³ஹி பரிக்³க³ஹிதத்தா ‘‘ராஜக³ஹ’’ந்தி வுச்சதி. ‘‘து³ரபி⁴ப⁴வனீயத்தா படிராஜூனம் க³ஹபூ⁴தந்தி ராஜக³ஹ’’ந்திஆதி³னா அஞ்ஞேனேத்த² பகாரேன வண்ணயந்தி. கிந்தேஹி? நாமமேதம் தஸ்ஸ நக³ரஸ்ஸ. தம் பனேதம் பு³த்³த⁴காலே சக்கவத்திகாலே ச நக³ரம் ஹோதி, ஸேஸகாலே ஸுஞ்ஞம் யக்க²பரிக்³க³ஹிதம் தேஸம் வஸனட்டா²னம் ஹுத்வா திட்ட²தி. வேளுவனே கலந்த³கனிவாபேதி வேளுவனந்தி தஸ்ஸ விஹாரஸ்ஸ நாமம். தம் கிர அட்டா²ரஸஹத்து²ப்³பே³தே⁴ன பாகாரேன பரிக்கி²த்தம் பு³த்³த⁴ஸ்ஸ ப⁴க³வதோ வஸனானுச்ச²விகாய மஹதியா க³ந்த⁴குடியா அஞ்ஞேஹி ச பாஸாத³குடிலேணமண்ட³பசங்கமத்³வாரகோட்ட²காதீ³ஹி படிமண்டி³தம் ப³ஹி வேளூஹி பரிக்கி²த்தம் அஹோஸி நீலோபா⁴ஸம் மனோரமம், தேன ‘‘வேளுவன’’ந்தி வுச்சதி. கலந்த³கானஞ்சேத்த² நிவாபம் அத³ம்ஸு, தஸ்மா ‘‘கலந்த³கனிவாபோ’’தி வுச்சதி. புப்³பே³ கிர அஞ்ஞதரோ ராஜா தம் உய்யானம் கீளனத்த²ம் பவிட்டோ² ஸுராமத³மத்தோ தி³வாஸேய்யம் உபக³தோ ஸுபி, பரிஜனோபிஸ்ஸ ‘‘ஸுத்தோ ராஜா’’தி புப்ப²ப²லாதீ³ஹி பலோபி⁴யமானோ இதோ சிதோ ச பக்காமி. அத² ஸுராக³ந்தே⁴ன அஞ்ஞதரஸ்மா ருக்க²ஸுஸிரா கண்ஹஸப்போ நிக்க²மித்வா ரஞ்ஞோ அபி⁴முகோ² ஆக³ச்ச²தி. தம் தி³ஸ்வா ருக்க²தே³வதா ‘‘ரஞ்ஞோ ஜீவிதம் த³ஸ்ஸாமீ’’தி கலந்த³கவேஸேன க³ந்த்வா கண்ணமூலே ஸத்³த³மகாஸி. ராஜா படிபு³ஜ்ஜி², கண்ஹஸப்போ நிவத்தோ. ஸோ தம் தி³ஸ்வா ‘‘இமாய காளகாய மம ஜீவிதம் தி³ன்ன’’ந்தி காளகானம் நிவாபம் தத்த² பட்ட²பேஸி, அப⁴யகோ⁴ஸஞ்ச கோ⁴ஸாபேஸி. தஸ்மா ததோ பட்டா²ய தம் ‘‘கலந்த³கனிவாப’’ந்தி ஸங்க²ம் க³தம். கலந்த³காதி ஹி காளகானம் நாமம், தஸ்மிம் வேளுவனே கலந்த³கனிவாபே.

மஹாகஸ்ஸபோதி மஹந்தேஹி ஸீலக்க²ந்தா⁴தீ³ஹி ஸமன்னாக³தத்தா மஹந்தோ கஸ்ஸபோதி மஹாகஸ்ஸபோ, அபிச குமாரகஸ்ஸபத்தே²ரம் உபாதா³ய அயம் மஹாதே²ரோ ‘‘மஹாகஸ்ஸபோ’’தி வுச்சதி. பிப்பலிகு³ஹாயந்தி தஸ்ஸா கிர கு³ஹாய த்³வாரஸமீபே ஏகோ பிப்பலிருக்கோ² அஹோஸி, தேன ஸா ‘‘பிப்பலிகு³ஹா’’தி பஞ்ஞாயித்த². தஸ்ஸம் பிப்பலிகு³ஹாயம். ஆபா³தி⁴கோதி ஆபா³தோ⁴ அஸ்ஸ அத்தீ²தி ஆபா³தி⁴கோ, ப்³யாதி⁴கோதி அத்தோ². து³க்கி²தோதி காயஸன்னிஸ்ஸிதம் து³க்க²ம் ஸஞ்ஜாதம் அஸ்ஸாதி து³க்கி²தோ, து³க்க²ப்பத்தோதி அத்தோ². பா³ள்ஹகி³லானோதி அதி⁴மத்தகே³லஞ்ஞோ, தம் பன கே³லஞ்ஞம் ஸதோ ஸம்பஜானோ ஹுத்வா அதி⁴வாஸேஸி. அத²ஸ்ஸ ப⁴க³வா தம் பவத்திம் ஞத்வா தத்த² க³ந்த்வா போ³ஜ்ஜ²ங்க³பரித்தம் அபா⁴ஸி, தேனேவ தே²ரஸ்ஸ ஸோ ஆபா³தோ⁴ வூபஸமி. வுத்தஞ்ஹேதம் போ³ஜ்ஜ²ங்க³ஸம்யுத்தே –

‘‘தேன கோ² பன ஸமயேன ஆயஸ்மா மஹாகஸ்ஸபோ பிப்பலிகு³ஹாயம் விஹரதி ஆபா³தி⁴கோ து³க்கி²தோ பா³ள்ஹகி³லானோ. அத² கோ² ப⁴க³வா ஸாயன்ஹஸமயம் படிஸல்லானா வுட்டி²தோ யேனாயஸ்மா மஹாகஸ்ஸபோ தேனுபஸங்கமி, உபஸங்கமித்வா பஞ்ஞத்தே ஆஸனே நிஸீதி³. நிஸஜ்ஜ கோ² ப⁴க³வா…பே… ஏதத³வோச – ‘கச்சி தே, கஸ்ஸப, க²மனீயம், கச்சி யாபனீயம், கச்சி து³க்கா² வேத³னா படிக்கமந்தி, நோ அபி⁴க்கமந்தி, படிக்கமோஸானம் பஞ்ஞாயதி நோ அபி⁴க்கமோ’தி? ‘ந மே, ப⁴ந்தே, க²மனீயம், ந யாபனீயம், பா³ள்ஹா மே ப⁴ந்தே, து³க்கா² வேத³னா அபி⁴க்கமந்தி நோ படிக்கமந்தி, அபி⁴க்கமோஸானம் பஞ்ஞாயதி நோ படிக்கமோ’தி.

‘‘‘ஸத்திமே, கஸ்ஸப, போ³ஜ்ஜ²ங்கா³ மயா ஸம்மத³க்கா²தா பா⁴விதா ப³ஹுலீகதா அபி⁴ஞ்ஞாய ஸம்போ³தா⁴ய நிப்³பா³னாய ஸம்வத்தந்தி. கதமே ஸத்த? ஸதிஸம்போ³ஜ்ஜ²ங்கோ³ கோ², கஸ்ஸப, மயா ஸம்மத³க்கா²தோ பா⁴விதோ ப³ஹுலீகதோ அபி⁴ஞ்ஞாய ஸம்போ³தா⁴ய நிப்³பா³னாய ஸம்வத்ததி…பே… உபேக்கா²ஸம்போ³ஜ்ஜ²ங்கோ³ கோ², கஸ்ஸப, மயா ஸம்மத³க்கா²தோ பா⁴விதோ ப³ஹுலீகதோ அபி⁴ஞ்ஞாய ஸம்போ³தா⁴ய நிப்³பா³னாய ஸம்வத்ததி. இமே கோ², கஸ்ஸப, ஸத்த போ³ஜ்ஜ²ங்கா³ மயா ஸம்மத³க்கா²தா பா⁴விதா ப³ஹூலீகதா அபி⁴ஞ்ஞாய ஸம்போ³தா⁴ய நிப்³பா³னாய ஸம்வத்தந்தீ’தி. ‘தக்³க⁴ ப⁴க³வா போ³ஜ்ஜ²ங்கா³, தக்³க⁴, ஸுக³த, போ³ஜ்ஜ²ங்கா³’’’தி.

‘‘இத³மவோச ப⁴க³வா. அத்தமனோ ஆயஸ்மா மஹாகஸ்ஸபோ ப⁴க³வதோ பா⁴ஸிதம் அபி⁴னந்தி³. வுட்ட²ஹி சாயஸ்மா மஹாகஸ்ஸபோ தம்ஹா ஆபா³தா⁴, ததா² பஹீனோ சாயஸ்மதோ மஹாகஸ்ஸபஸ்ஸ ஸோ ஆபா³தோ⁴ அஹோஸீ’’தி.

தேன வுத்தம் – ‘‘அத² கோ² ஆயஸ்மா மஹாகஸ்ஸபோ அபரேன ஸமயேன தம்ஹா ஆபா³தா⁴ வுட்டா²ஸீ’’தி.

ஏதத³ஹோஸீதி புப்³பே³ கே³லஞ்ஞதி³வஸேஸு ஸத்³தி⁴விஹாரிகேஹி உபனீதம் பிண்ட³பாதம் பரிபு⁴ஞ்ஜித்வா விஹாரே ஏவ அஹோஸி. அத²ஸ்ஸ தம்ஹா ஆபா³தா⁴ வுட்டி²தஸ்ஸ ஏதம் ‘‘யம்னூனாஹம் ராஜக³ஹம் பிண்டா³ய பவிஸேய்ய’’ந்தி பரிவிதக்கோ அஹோஸி. பஞ்சமத்தானி தே³வதாஸதானீதி ஸக்கஸ்ஸ தே³வரஞ்ஞோ பரிசாரிகா பஞ்சஸதா ககுடபாதி³னியோ அச்ச²ராயோ. உஸ்ஸுக்கம் ஆபன்னானி ஹோந்தீதி தே²ரஸ்ஸ பிண்ட³பாதம் த³ஸ்ஸாமாதி பஞ்சபிண்ட³பாதஸதானி ஸஜ்ஜேத்வா ஸுவண்ணபா⁴ஜனேஹி ஆதா³ய அந்தராமக்³கே³ ட²த்வா, ‘‘ப⁴ந்தே, இமம் பிண்ட³பாதம் க³ண்ஹத², ஸங்க³ஹம் நோ கரோதா²’’தி வத³மானா பிண்ட³பாததா³னே யுத்தப்பயுத்தானி ஹோந்தி. தேன வுத்தம் ‘‘ஆயஸ்மதோ மஹாகஸ்ஸபஸ்ஸ பிண்ட³பாதப்படிலாபா⁴யா’’தி.

ஸக்கோ கிர தே³வராஜா தே²ரஸ்ஸ சித்தப்பவத்திம் ஞத்வா தா அச்ச²ராயோ உய்யோஜேஸி ‘‘க³ச்ச²த² தும்ஹே அய்யஸ்ஸ மஹாகஸ்ஸபத்தே²ரஸ்ஸ பிண்ட³பாதம் த³த்வா அத்தனோ பதிட்ட²ம் கரோதா²’’தி. ஏவம் ஹிஸ்ஸ அஹோஸி ‘‘இமாஸு ஸப்³பா³ஸு க³தாஸு கதா³சி ஏகிஸ்ஸாபி ஹத்த²தோ பிண்ட³பாதம் தே²ரோ படிக்³க³ண்ஹேய்ய, தம் தஸ்ஸா ப⁴விஸ்ஸதி தீ³க⁴ரத்தம் ஹிதாய ஸுகா²யா’’தி. படிக்கி²பி தே²ரோ, ‘‘ப⁴ந்தே, மய்ஹம் பிண்ட³பாதம் க³ண்ஹத², மய்ஹம் பிண்ட³பாதம் க³ண்ஹதா²’’தி வத³ந்தியோ ‘‘க³ச்ச²த² தும்ஹே கதபுஞ்ஞா மஹாபோ⁴கா³, அஹம் து³க்³க³தானம் ஸங்க³ஹம் கரிஸ்ஸாமீ’’தி வத்வா, ‘‘ப⁴ந்தே, மா நோ நாஸேத², ஸங்க³ஹம் நோ கரோதா²’’தி வத³ந்தியோ புனபி படிக்கி²பித்வா புனபி அபக³ந்தும் அனிச்ச²மானா யாசந்தியோ ‘‘ந அத்தனோ பமாணம் ஜானாத², அபக³ச்ச²தா²’’தி வத்வா அச்ச²ரம் பஹரி. தா தே²ரஸ்ஸ அச்ச²ராஸத்³த³ம் ஸுத்வா ஸந்தஜ்ஜிதா டா²தும் அஸக்கோந்தியோ பலாயித்வா தே³வலோகமேவ க³தா. தேன வுத்தம் – ‘‘பஞ்சமத்தானி தே³வதாஸதானி படிக்கி²பித்வா’’தி.

புப்³ப³ண்ஹஸமயந்தி புப்³ப³ண்ஹே ஏகம் ஸமயம், ஏகஸ்மிம் காலே. நிவாஸேத்வாதி விஹாரனிவாஸனபரிவத்தனவஸேன நிவாஸனம் த³ள்ஹம் நிவாஸேத்வா. பத்தசீவரமாதா³யாதி சீவரம் பாருபித்வா பத்தம் ஹத்தே²ன க³ஹேத்வா. பிண்டா³ய பாவிஸீதி பிண்ட³பாதத்தா²ய பாவிஸி. த³லித்³த³விஸிகா²தி து³க்³க³தமனுஸ்ஸானம் வஸனோகாஸோ. கபணவிஸிகா²தி போ⁴க³பாரிஜுஞ்ஞப்பத்தியா தீ³னமனுஸ்ஸானம் வாஸோ. பேஸகாரவிஸிகா²தி தந்தவாயவாஸோ. அத்³த³ஸா கோ² ப⁴க³வாதி கத²ம் அத்³த³ஸ? ‘‘ஆபா³தா⁴ வுட்டி²தோ மம புத்தோ கஸ்ஸபோ கின்னு கோ² கரோதீ’’தி ஆவஜ்ஜேந்தோ வேளுவனே நிஸின்னோ ஏவ ப⁴க³வா தி³ப்³ப³சக்கு²னா அத்³த³ஸ.

ஏதமத்த²ம் விதி³த்வாதி யாயம் ஆயஸ்மதோ மஹாகஸ்ஸபஸ்ஸ பஞ்சஹி அச்ச²ராஸதேஹி உபனீதம் அனேகஸூபம் அனேகப்³யஞ்ஜனம் தி³ப்³ப³பிண்ட³பாதம் படிக்கி²பித்வா கபணஜனானுக்³க³ஹப்படிபத்தி வுத்தா, ஏதமத்த²ம் ஜானித்வா. இமம் உதா³னந்தி இமம் பரமப்பிச்ச²தாத³ஸ்ஸனமுகே²ன கீ²ணாஸவஸ்ஸ தாதீ³பா⁴வானுபா⁴வதீ³பகம் உதா³னம் உதா³னேஸி.

தத்த² அனஞ்ஞபோஸிந்தி அஞ்ஞம் போஸேதீதி அஞ்ஞபோஸீ, ந அஞ்ஞபோஸீ அனஞ்ஞபோஸீ, அத்தனா போஸேதப்³ப³ஸ்ஸ அஞ்ஞஸ்ஸ அபா⁴வேன அது³தியோ, ஏககோதி அத்தோ². தேன தே²ரஸ்ஸ ஸுப⁴ரதம் த³ஸ்ஸேதி. தே²ரோ ஹி காயபரிஹாரிகேன சீவரேன குச்சி²பரிஹாரிகேன ச பிண்ட³பாதேன அத்தானமேவ போஸேந்தோ பரமப்பிச்சோ² ஹுத்வா விஹரதி, அஞ்ஞம் ஞாதிமித்தாதீ³ஸு கஞ்சி ந போஸேதி கத்த²சி அலக்³க³பா⁴வதோ. அத² வா அஞ்ஞேன அஞ்ஞதரேன போஸேதப்³ப³தாய அபா⁴வதோ அனஞ்ஞபோஸீ. யோ ஹி ஏகஸ்மிம்யேவ பச்சயதா³யகே படிப³த்³த⁴சதுபச்சயோ ஸோ அனஞ்ஞபோஸீ நாம ந ஹோதி ஏகாயத்தவுத்திதோ. தே²ரோ பன ‘‘யதா²பி ப⁴மரோ புப்ப²’’ந்தி (த⁴. ப. 49) கா³தா²ய வுத்தனயேன ஜங்கா⁴ப³லம் நிஸ்ஸாய பிண்டா³ய சரந்தோ குலேஸு நிச்சனவோ ஹுத்வா மிஸ்ஸகப⁴த்தேன யாபேதி. ததா² ஹி நம் ப⁴க³வா சந்தூ³பமப்படிபதா³ய தோ²மேஸி. அஞ்ஞாதந்தி அபி⁴ஞ்ஞாதம், யதா²பு⁴ச்சகு³ணேஹி பத்த²டயஸம், தேனேவ வா அனஞ்ஞபோஸிபா⁴வேன அப்பிச்ச²தாஸந்துட்டி²தாஹி ஞாதம். அத² வா அஞ்ஞாதந்தி ஸப்³ப³ஸோ பஹீனதண்ஹதாய லாப⁴ஸக்காரஸிலோகனிகாமனஹேது அத்தானம் ஜானாபனவஸேன ந ஞாதம். அவீததண்ஹோ ஹி பாபிச்சோ² குஹகதாய ஸம்பா⁴வனாதி⁴ப்பாயேன அத்தானம் ஜானாபேதி. த³ந்தந்தி ச²ளங்கு³பேக்கா²வஸேன இந்த்³ரியேஸு உத்தமத³மனேன த³ந்தம். ஸாரே பதிட்டி²தந்தி விமுத்திஸாரே அவட்டி²தம், அஸேக்க²ஸீலக்க²ந்தா⁴தி³கே வா ஸீலாதி³ஸாரே பதிட்டி²தம். கீ²ணாஸவம் வந்ததோ³ஸந்தி காமாஸவாதீ³னம் சதுன்னம் ஆஸவானம் அனவஸேஸம் பஹீனத்தா கீ²ணாஸவம். ததோ ஏவ ராகா³தி³தோ³ஸானம் ஸப்³ப³ஸோ வந்தத்தா வந்ததோ³ஸம். தமஹம் ப்³ரூமி ப்³ராஹ்மணந்தி தம் யதா²வுத்தகு³ணம் பரமத்த²ப்³ராஹ்மணம் அஹம் ப்³ராஹ்மணந்தி வதா³மீதி. இதா⁴பி ஹேட்டா² வுத்தனயேனேவ தே³ஸனானானத்தம் வேதி³தப்³ப³ம்.

ச²ட்ட²ஸுத்தவண்ணனா நிட்டி²தா.