7. அஜகலாபகஸுத்தவண்ணனா

7. ஸத்தமே பாவாயந்தி ஏவம்னாமகே மல்லராஜூனம் நக³ரே. அஜகலாபகே சேதியேதி அஜகலாபகேன நாம யக்கே²ன பரிக்³க³ஹிதத்தா ‘‘அஜகலாபக’’ந்தி லத்³த⁴னாமே மனுஸ்ஸானம் சித்தீகதட்டா²னே. ஸோ கிர யக்கோ² அஜே கலாபே கத்வா ப³ந்த⁴னேன அஜகோட்டா²ஸேன ஸத்³தி⁴ம் ப³லிம் படிச்ச²தி, ந அஞ்ஞதா², தஸ்மா ‘‘அஜகலாபகோ’’தி பஞ்ஞாயித்த². கேசி பனாஹு – அஜகே விய ஸத்தே லாபேதீதி அஜகலாபகோதி. தஸ்ஸ கிர ஸத்தா ப³லிம் உபனேத்வா யதா³ அஜஸத்³த³ம் கத்வா ப³லிம் உபஹரந்தி, ததா³ ஸோ துஸ்ஸதி, தஸ்மா ‘‘அஜகலாபகோ’’தி வுச்சதீதி. ஸோ பன யக்கோ² ஆனுபா⁴வஸம்பன்னோ கக்க²ளோ ப²ருஸோ தத்த² ச ஸன்னிஹிதோ, தஸ்மா தம் டா²னம் மனுஸ்ஸா சித்திம் கரோந்தி, காலேன காலம் ப³லிம் உபஹரந்தி. தேன வுத்தம் ‘‘அஜகலாபகே சேதியே’’தி. அஜகலாபகஸ்ஸ யக்க²ஸ்ஸ ப⁴வனேதி தஸ்ஸ யக்க²ஸ்ஸ விமானே.

ததா³ கிர ஸத்தா² தம் யக்க²ம் த³மேதுகாமோ ஸாயன்ஹஸமயே ஏகோ அது³தியோ பத்தசீவரம் ஆதா³ய அஜகலாபகஸ்ஸ யக்க²ஸ்ஸ ப⁴வனத்³வாரம் க³ந்த்வா தஸ்ஸ தோ³வாரிகம் ப⁴வனபவிஸனத்தா²ய யாசி. ஸோ ‘‘கக்க²ளோ, ப⁴ந்தே, அஜகலாபகோ யக்கோ², ஸமணோதி வா ப்³ராஹ்மணோதி வா கா³ரவம் ந கரோதி, தஸ்மா தும்ஹே ஏவ ஜானாத², மய்ஹம் பன தஸ்ஸ அனாரோசனம் ந யுத்த’’ந்தி தாவதே³வ யக்க²ஸமாக³மம் க³தஸ்ஸ அஜகலாபகஸ்ஸ ஸந்திகம் வாதவேகே³ன அக³மாஸி. ஸத்தா² அந்தோப⁴வனம் பவிஸித்வா அஜகலாபகஸ்ஸ நிஸீத³னமண்ட³பே பஞ்ஞத்தாஸனே நிஸீதி³. யக்க²ஸ்ஸ ஓரோதா⁴ ஸத்தா²ரம் உபஸங்கமித்வா வந்தி³த்வா ஏகமந்தம் அட்ட²ம்ஸு. ஸத்தா² தாஸம் காலயுத்தம் த⁴ம்மிம் கத²ம் கதே²ஸி. தேன வுத்தம் – ‘‘பாவாயம் விஹரதி அஜகலாபகே சேதியே அஜகலாபகஸ்ஸ யக்க²ஸ்ஸ ப⁴வனே’’தி.

தஸ்மிம் ஸமயே ஸாதாகி³ரஹேமவதா அஜகலாபகஸ்ஸ ப⁴வனமத்த²கேன யக்க²ஸமாக³மம் க³ச்ச²ந்தா அத்தனோ க³மனே அஸம்பஜ்ஜமானே ‘‘கிம் நு கோ² காரண’’ந்தி ஆவஜ்ஜேந்தா ஸத்தா²ரம் அஜகலாபகஸ்ஸ ப⁴வனே நிஸின்னம் தி³ஸ்வா தத்த² க³ந்த்வா ப⁴க³வந்தம் வந்தி³த்வா ‘‘மயம், ப⁴ந்தே, யக்க²ஸமாக³மம் க³மிஸ்ஸாமா’’தி ஆபுச்சி²த்வா பத³க்கி²ணம் கத்வா க³தா யக்க²ஸன்னிபாதே அஜகலாபகம் தி³ஸ்வா துட்டி²ம் பவேத³யிம்ஸு ‘‘லாபா⁴ தே, ஆவுஸோ, அஜகலாபக, யஸ்ஸ தே ப⁴வனே ஸதே³வகே லோகே அக்³க³புக்³க³லோ ப⁴க³வா நிஸின்னோ, உபஸங்கமித்வா ப⁴க³வந்தம் பயிருபாஸஸ்ஸு, த⁴ம்மஞ்ச ஸுணாஹீ’’தி. ஸோ தேஸம் கத²ம் ஸுத்வா ‘‘இமே தஸ்ஸ முண்ட³கஸ்ஸ ஸமணகஸ்ஸ மம ப⁴வனே நிஸின்னபா⁴வம் கதே²ந்தீ’’தி கோதா⁴பி⁴பூ⁴தோ ஹுத்வா ‘‘அஜ்ஜ மய்ஹம் தேன ஸமணேன ஸத்³தி⁴ம் ஸங்கா³மோ ப⁴விஸ்ஸதீ’’தி சிந்தேத்வா யக்க²ஸன்னிபாததோ உட்ட²ஹித்வா த³க்கி²ணம் பாத³ம் உக்கி²பித்வா ஸட்டி²யோஜனமத்தம் பப்³ப³தகூடம் அக்கமி, தம் பி⁴ஜ்ஜித்வா த்³விதா⁴ அஹோஸி. ஸேஸம் ஏத்த² யம் வத்தப்³ப³ம், தம் ஆளவகஸுத்தவண்ணனாயம் (ஸம். நி. அட்ட². 1.1.246) ஆக³தனயேனேவ வேதி³தப்³ப³ம்.

அஜகலாபகஸ்ஸ ஸமாக³மோ ஹி ஆளவகஸமாக³மஸதி³ஸோவ ட²பேத்வா பஞ்ஹகரணம் விஸ்ஸஜ்ஜனம் ப⁴வனதோ திக்க²த்தும் நிக்க²மனம் பவேஸனஞ்ச. அஜகலாபகோ ஹி ஆக³ச்ச²ந்தோயேவ ‘‘ஏதேஹியேவ தம் ஸமணம் பலாபேஸ்ஸாமீ’’தி வாதமண்ட³லாதி³கே நவவஸ்ஸே ஸமுட்டா²பேத்வா தேஹி ப⁴க³வதோ சலனமத்தம்பி காதும் அஸக்கோந்தோ நானாவித⁴ப்பஹரணஹத்தே² அதிவிய ப⁴யானகரூபே பூ⁴தக³ணே நிம்மினித்வா தேஹி ஸத்³தி⁴ம் ப⁴க³வந்தம் உபஸங்கமித்வா அந்தந்தேனேவ சரந்தோ ஸப்³ப³ரத்திம் நானப்பகாரம் விப்பகாரம் கத்வாபி ப⁴க³வதோ கிஞ்சி கேஸக்³க³மத்தம்பி நிஸின்னட்டா²னதோ சலனம் காதும் நாஸக்கி². கேவலம் பன ‘‘அயம் ஸமணோ மம் அனாபுச்சா² மய்ஹம் ப⁴வனம் பவிஸித்வா நிஸீத³தீ’’தி கோத⁴வஸேன பஜ்ஜலி. அத²ஸ்ஸ ப⁴க³வா சித்தப்பவத்திம் ஞத்வா ‘‘ஸேய்யதா²பி நாம சண்ட³ஸ்ஸ குக்குரஸ்ஸ நாஸாய பித்தம் பி⁴ந்தே³ய்ய, ஏவம் ஸோ பி⁴ய்யோஸோமத்தாய சண்ட³தரோ அஸ்ஸ, ஏவமேவாயம் யக்கோ² மயி இத⁴ நிஸின்னே சித்தம் பதூ³ஸேதி, யம்னூனாஹம் ப³ஹி நிக்க²மேய்ய’’ந்தி ஸயமேவ ப⁴வனதோ நிக்க²மித்வா அப்³போ⁴காஸே நிஸீதி³. தேன வுத்தம் – ‘‘தேன கோ² பன ஸமயேன ப⁴க³வா ரத்தந்த⁴காரதிமிஸாயம் அப்³போ⁴காஸே நிஸின்னோ ஹோதீ’’தி.

தத்த² ரத்தந்த⁴காரதிமிஸாயந்தி ரத்தியம் அந்த⁴கரணதமஸி, சக்கு²விஞ்ஞாணுப்பத்திவிரஹிதே ப³ஹலந்த⁴காரேதி அத்தோ². சதுரங்க³ஸமன்னாக³தோ கிர ததா³ அந்த⁴காரோ பவத்தீதி. தே³வோதி மேகோ⁴ ஏகமேகம் பு²ஸிதகம் உத³கபி³ந்து³ம் பாதேதி. அத² யக்கோ² ‘‘இமினா ஸத்³தே³ன தாஸேத்வா இமம் ஸமணம் பலாபேஸ்ஸாமீ’’தி ப⁴க³வதோ ஸமீபம் க³ந்த்வா ‘‘அக்குலோ’’திஆதி³னா தம் பி⁴ம்ஸனம் அகாஸி. தேன வுத்தம் ‘‘அத² கோ² அஜகலாபகோ’’திஆதி³. தத்த² ப⁴யந்தி சித்துத்ராஸம், ச²ம்பி⁴தத்தந்தி ஊருத்த²ம்ப⁴கஸரீரஸ்ஸ ச²ம்பி⁴தபா⁴வம். லோமஹம்ஸந்தி லோமானம் பஹட்ட²பா⁴வம், தீஹிபி பதே³ஹி ப⁴யுப்பத்திமேவ த³ஸ்ஸேதி. உபஸங்கமீதி கஸ்மா பனாயம் ஏவமதி⁴ப்பாயோ உபஸங்கமி, நனு புப்³பே³ அத்தனா காதப்³ப³ம் விப்பகாரம் அகாஸீதி? ஸச்சமகாஸி, தம் பனேஸ ‘‘அந்தோப⁴வனே கே²மட்டா²னே தி²ரபூ⁴மியம் டி²தஸ்ஸ ந கிஞ்சி காதும் அஸக்கி², இதா³னி ப³ஹி டி²தம் ஏவம் பி⁴ம்ஸாபேத்வா பலாபேதும் ஸக்கா’’தி மஞ்ஞமானோ உபஸங்கமி. அயஞ்ஹி யக்கோ² அத்தனோ ப⁴வனம் ‘‘தி²ரபூ⁴மீ’’தி மஞ்ஞதி, ‘‘தத்த² டி²தத்தா அயம் ஸமணோ ந பா⁴யதீ’’தி ச.

திக்க²த்தும் ‘‘அக்குலோ பக்குலோ’’தி அக்குலபக்குலிகம் அகாஸீதி தயோ வாரே ‘‘அக்குலோ பக்குலோ’’தி பி⁴ம்ஸாபேதுகாமதாய ஏவரூபம் ஸத்³த³ம் அகாஸி. அனுகரணஸத்³தோ³ ஹி அயம். ததா³ ஹி ஸோ யக்கோ² ஸினேரும் உக்கி²பந்தோ விய மஹாபத²விம் பரிவத்தேந்தோ விய ச மஹதா உஸ்ஸாஹேன அஸனிஸதஸத்³த³ஸங்கா⁴டம் விய ஏகஸ்மிம் டா²னே புஞ்ஜீகதம் ஹுத்வா வினிச்ச²ரந்தம் தி³ஸாக³ஜானம் ஹத்தி²க³ஜ்ஜிதம், கேஸரஸீஹானம் ஸீஹனின்னாத³ம், யக்கா²னம் ஹிம்காரஸத்³த³ம், பூ⁴தானம் அட்டஹாஸம், அஸுரானம் அப்போ²டனகோ⁴ஸம், இந்த³ஸ்ஸ தே³வரஞ்ஞோ வஜிரனிக்³கா⁴தனிக்³கோ⁴ஸம், அத்தனோ க³ம்பீ⁴ரதாய விப்பா²ரிகதாய ப⁴யானகதாய ச அவஸேஸஸத்³த³ம் அவஹஸந்தமிவ அபி⁴ப⁴வந்தமிவ ச கப்பவுட்டா²னமஹாவாதமண்ட³லிகாய வினிக்³கோ⁴ஸம் புது²ஜ்ஜனானம் ஹத³யம் பா²லேந்தம் விய மஹந்தம் படிப⁴யனிக்³கோ⁴ஸம் அப்³யத்தக்க²ரம் திக்க²த்தும் அத்தனோ யக்க²க³ஜ்ஜிதம் க³ஜ்ஜி ‘‘ஏதேன இமம் ஸமணம் பி⁴ம்ஸாபேத்வா பலாபேஸ்ஸாமீ’’தி. யம் யம் நிச்ச²ரதி, தேன தேன பப்³ப³தா பபடிகம் முஞ்சிம்ஸு, வனப்பதிஜேட்ட²கே உபாதா³ய ஸப்³பே³ஸு ருக்க²லதாகு³ம்பே³ஸு பத்தப²லபுப்பா²னி ஸீத³யிம்ஸு, தியோஜனஸஹஸ்ஸவித்த²தோபி ஹிமவந்தபப்³ப³தராஜா ஸங்கம்பி ஸம்பகம்பி ஸம்பவேதி⁴, பு⁴ம்மதே³வதா ஆதி³ம் கத்வா யேபு⁴ய்யேன தே³வதானம்பி அஹுதே³வ ப⁴யம் ச²ம்பி⁴தத்தம் லோமஹம்ஸோ, பகே³வ மனுஸ்ஸானம். அஞ்ஞேஸஞ்ச அபத³த்³விபத³சதுப்பதா³னம் மஹாபத²வியா உந்த்³ரியனகாலோ விய மஹதீ விபி⁴ம்ஸனகா அஹோஸி, ஸகலஸ்மிம் ஜம்பு³தீ³பதலே மஹந்தம் கோலாஹலம் உத³பாதி³. ப⁴க³வா பன தம் ஸத்³த³ம் ‘‘கிமீ’’தி அமஞ்ஞமானோ நிச்சலோ நிஸீதி³, ‘‘மா கஸ்ஸசி இமினா அந்தராயோ ஹோதூ’’தி அதி⁴ட்டா²ஸி.

யஸ்மா பன ஸோ ஸத்³தோ³ ‘‘அக்குல பக்குல’’ இதி இமினா ஆகாரேன ஸத்தானம் ஸோதபத²ம் அக³மாஸி, தஸ்மா தஸ்ஸ அனுகரணவஸேன ‘‘அக்குலோ பக்குலோ’’தி, யக்க²ஸ்ஸ ச தஸ்ஸம் நிக்³கோ⁴ஸனிச்சா²ரணாயம் அக்குலபக்குலகரணம் அத்தீ²தி கத்வா ‘‘அக்குலபக்குலிகம் அகாஸீ’’தி ஸங்க³ஹம் ஆரோபயிம்ஸு. கேசி பன ‘‘ஆகுலப்³யாகுல இதி பத³த்³வயஸ்ஸ பரியாயாபி⁴தா⁴னவஸேன அக்குலோ ப³க்குலோதி அயம் ஸத்³தோ³ வுத்தோ’’தி வத³ந்தி யதா² ‘‘ஏகம் ஏகக’’ந்தி. யஸ்மா ஏகவாரம் ஜாதோ பட²முப்பத்திவஸேனேவ நிப்³ப³த்தத்தா ஆகுலோதி ஆதி³அத்தோ² ஆகாரோ, தஸ்ஸ ச ககாராக³மம் கத்வா ரஸ்ஸத்தம் கதந்தி. த்³வே வாரே பன ஜாதோ ப³க்குலோ, குலஸத்³தோ³ சேத்த² ஜாதிபரியாயோ கோலம்கோலோதிஆதீ³ஸு விய. வுத்தஅதி⁴ப்பாயானுவிதா⁴யீ ச ஸத்³த³ப்பயோகோ³தி பட²மேன பதே³ன ஜலாபு³ஜஸீஹப்³யக்³கா⁴த³யோ, து³தியேன அண்ட³ஜஆஸீவிஸகண்ஹஸப்பாத³யோ வுச்சந்தி, தஸ்மா ஸீஹாதி³கோ விய ஆஸீவிஸாதி³கோ விய ச ‘‘அஹம் தே ஜீவிதஹாரகோ’’தி இமம் அத்த²ம் யக்கோ² பத³த்³வயேன த³ஸ்ஸேதீதி அஞ்ஞே. அபரே பன ‘‘அக்கு²லோ ப⁴க்கு²லோ’’தி பாளிம் வத்வா ‘‘அக்கே²தும் கே²பேதும் வினாஸேதும் உலதி பவத்தேதீதி அக்கு²லோ, ப⁴க்கி²தும் கா²தி³தும் உலதீதி ப⁴க்கு²லோ. கோ பனேஸோ? யக்க²ரக்க²ஸபிஸாசஸீஹப்³யக்³கா⁴தீ³ஸு அஞ்ஞதரோ யோ கோசி மனுஸ்ஸானம் அனத்தா²வஹோ’’தி தஸ்ஸ அத்த²ம் வத³ந்தி. இதா⁴பி புப்³பே³ வுத்தனயேனேவ அதி⁴ப்பாயயோஜனா வேதி³தப்³பா³.

ஏஸோ தே, ஸமண, பிஸாசோதி ‘‘அம்போ⁴, ஸமண, தவ பிஸிதாஸனோ பிஸாசோ உபட்டி²தோ’’தி மஹந்தம் பே⁴ரவரூபம் அபி⁴னிம்மினித்வா ப⁴க³வதோ புரதோ ட²த்வா அத்தானம் ஸந்தா⁴ய யக்கோ² வத³தி.

ஏதமத்த²ம் விதி³த்வாதி ஏதம் தேன யக்கே²ன காயவாசாஹி பவத்தியமானம் விப்பகாரம். தேன ச அத்தனோ அனபி⁴ப⁴வனீயஸ்ஸ ஹேதுபூ⁴தம் லோகத⁴ம்மேஸு நிருபக்கிலேஸதம் ஸப்³பா³காரதோ விதி³த்வா. தாயம் வேலாயந்தி தஸ்ஸம் விப்பகாரகரணவேலாயம். இமம் உதா³னந்தி தம் விப்பகாரம் அக³ணேத்வா அஸ்ஸ அக³ணனஹேதுபூ⁴தம் த⁴ம்மானுபா⁴வதீ³பகம் இமம் உதா³னம் உதா³னேஸி.

தத்த² யதா³ ஸகேஸு த⁴ம்மேஸூதி யஸ்மிம் காலே ஸகஅத்தபா⁴வஸங்கா²தேஸு பஞ்சஸு உபாதா³னக்க²ந்த⁴த⁴ம்மேஸு. பாரகூ³தி பரிஞ்ஞாபி⁴ஸமயபாரிபூரிவஸேன பாரங்க³தோ, ததோயேவ தேஸம் ஹேதுபூ⁴தே ஸமுத³யே, தத³ப்பவத்திலக்க²ணே நிரோதே⁴, நிரோத⁴கா³மினியா படிபதா³ய ச பஹானஸச்சி²கிரியாபா⁴வனாபி⁴ஸமயபாரிபூரிவஸேன பாரக³தோ. ஹோதி ப்³ராஹ்மணோதி ஏவம் ஸப்³ப³ஸோ பா³ஹிதபாபத்தா ப்³ராஹ்மணோ நாம ஹோதி, ஸப்³ப³ஸோ ஸகஅத்தபா⁴வாவபோ³த⁴னேபி சதுஸச்சாபி⁴ஸமயோ ஹோதி. வுத்தஞ்சேதம் – ‘‘இமஸ்மிம்யேவ ப்³யாமமத்தே களேவரே ஸஸஞ்ஞிம்ஹி ஸமனகே லோகஞ்ச லோகஸமுத³யஞ்ச பஞ்ஞபேமீ’’திஆதி³ (ஸம். நி. 1.107; அ. நி. 4.45). அத² வா ஸகேஸு த⁴ம்மேஸூதி அத்தனோ த⁴ம்மேஸு, அத்தனோ த⁴ம்மா நாம அத்த²காமஸ்ஸ புக்³க³லஸ்ஸ ஸீலாதி³த⁴ம்மா. ஸீலஸமாதி⁴பஞ்ஞாவிமுத்திஆத³யோ ஹி வோதா³னத⁴ம்மா ஏகந்தஹிதஸுக²ஸம்பாத³னேன புரிஸஸ்ஸ அத்தனோ த⁴ம்மா நாம, ந அனத்தா²வஹா ஸம்கிலேஸத⁴ம்மா விய அஸகத⁴ம்மா. பாரகூ³தி தேஸம் ஸீலாதீ³னம் பாரிபூரியா பாரம் பரியந்தம் க³தோ.

தத்த² ஸீலம் தாவ லோகியலோகுத்தரவஸேன து³வித⁴ம். தேஸு லோகியம் புப்³ப³பா⁴க³ஸீலம். தம் ஸங்கே²பதோ பாதிமோக்க²ஸம்வராதி³வஸேன சதுப்³பி³த⁴ம், வித்தா²ரதோ பன அனேகப்பபே⁴த³ம். லோகுத்தரம் மக்³க³ப²லவஸேன து³வித⁴ம், அத்த²தோ ஸம்மாவாசாஸம்மாகம்மந்தஸம்மாஆஜீவா. யதா² ச ஸீலம், ததா² ஸமாதி⁴பஞ்ஞா ச லோகியலோகுத்தரவஸேன து³விதா⁴. தத்த² லோகியஸமாதி⁴ ஸஹ உபசாரேன அட்ட² ஸமாபத்தியோ, லோகுத்தரஸமாதி⁴ மக்³க³பரியாபன்னோ. பஞ்ஞாபி லோகியா ஸுதமயா, சிந்தாமயா, பா⁴வனாமயா ச ஸாஸவா, லோகுத்தரா பன மக்³க³ஸம்பயுத்தா ப²லஸம்பயுத்தா ச. விமுத்தி நாம ப²லவிமுத்தி நிப்³பா³னஞ்ச, தஸ்மா ஸா லோகுத்தராவ. விமுத்திஞாணத³ஸ்ஸனம் லோகியமேவ, தம் ஏகூனவீஸதிவித⁴ம் பச்சவேக்க²ணஞாணபா⁴வதோ. ஏவம் ஏதேஸம் ஸீலாதி³த⁴ம்மானம் அத்தனோ ஸந்தானே அரஹத்தப²லாதி⁴க³மேன அனவஸேஸதோ நிப்³ப³த்தபாரிபூரியா பாரம் பரியந்தம் க³தோதி ஸகேஸு த⁴ம்மேஸு பாரகூ³.

அத² வா ஸோதாபத்திப²லாதி⁴க³மேன ஸீலஸ்மிம் பாரகூ³. ஸோ ஹி ‘‘ஸீலேஸு பரிபூரகாரீ’’தி வுத்தோ, ஸோதாபன்னக்³க³ஹணேனேவ சேத்த² ஸகதா³கா³மீபி க³ஹிதோ ஹோதி. அனாகா³மிப²லாதி⁴க³மேன ஸமாதி⁴ஸ்மிம் பாரகூ³. ஸோ ஹி ‘‘ஸமாதி⁴ஸ்மிம் பரிபூரகாரீ’’தி வுத்தோ. அரஹத்தப²லாதி⁴க³மேன இதரேஸு தீஸு பாரகூ³. அரஹா ஹி பஞ்ஞாவேபுல்லப்பத்தியா அக்³க³பூ⁴தாய அகுப்பாய சேதோவிமுத்தியா அதி⁴க³தத்தா பச்சவேக்க²ணஞாணஸ்ஸ ச பரியோஸானக³மனதோ பஞ்ஞாவிமுத்திவிமுத்திஞாணத³ஸ்ஸனேஸு பாரகூ³ நாம ஹோதி. ஏவம் ஸப்³ப³தா²பி சதூஸு அரியஸச்சேஸு சதுமக்³க³வஸேன பரிஞ்ஞாதி³ஸோளஸவிதா⁴ய கிச்சனிப்ப²த்தியா யதா²வுத்தேஸு தஸ்மிம் தஸ்மிம் காலே ஸகேஸு த⁴ம்மேஸு பாரக³தோ.

ஹோதி ப்³ராஹ்மணோதி ததா³ ஸோ பா³ஹிதபாபத⁴ம்மதாய பரமத்த²ப்³ராஹ்மணோ ஹோதி. அத² ஏதம் பிஸாசஞ்ச, பக்குலஞ்சாதிவத்ததீதி ததோ யதா²வுத்தபாரக³மனதோ அத² பச்சா², அஜகலாபக, ஏதம் தயா த³ஸ்ஸிதம் பிஸிதாஸனத்த²மாக³தம் பிஸாசம் ப⁴யஜனனத்த²ம் ஸமுட்டா²பிதம் அக்குலபக்குலிகஞ்ச அதிவத்ததி, அதிக்கமதி, அபி⁴ப⁴வதி, தம் ந பா⁴யதீதி அத்தோ².

அயம்பி கா³தா² அரஹத்தமேவ உல்லபித்வா கதி²தா. அத² அஜகலாபகோ அத்தனா கதேன ததா²ரூபேனபி படிப⁴யரூபேன விபி⁴ம்ஸனேன அகம்பனீயஸ்ஸ ப⁴க³வதோ தம் தாதி³பா⁴வம் தி³ஸ்வா ‘‘அஹோ அச்ச²ரியமனுஸ்ஸோவதாய’’ந்தி பஸன்னமானஸோ போது²ஜ்ஜனிகாய ஸத்³தா⁴ய அத்தனி நிவிட்ட²பா⁴வம் விபா⁴வேந்தோ ஸத்து² ஸம்முகா² உபாஸகத்தம் பவேதே³ஸி.

ஸத்தமஸுத்தவண்ணனா நிட்டி²தா.