3. ததியபோ³தி⁴ஸுத்தவண்ணனா

3. ததியே அனுலோமபடிலோமந்தி அனுலோமஞ்ச படிலோமஞ்ச, யதா²வுத்தஅனுலோமவஸேன சேவ படிலோமவஸேன சாதி அத்தோ². நனு ச புப்³பே³பி அனுலோமவஸேன படிலோமவஸேன ச படிச்சஸமுப்பாதே³ மனஸிகாரப்பவத்தி ஸுத்தத்³வயே வுத்தா, இத⁴ கஸ்மா புனபி தது³ப⁴யவஸேன மனஸிகாரப்பவத்தி வுச்சதீதி? தது³ப⁴யவஸேன ததியவாரம் தத்த² மனஸிகாரஸ்ஸ பவத்திதத்தா. கத²ம் பன தது³ப⁴யவஸேன மனஸிகாரோ பவத்திதோ? ந ஹி ஸக்கா அபுப்³ப³ம் அசரிமம் அனுலோமபடிலோமம் படிச்சஸமுப்பாத³ஸ்ஸ மனஸிகாரம் பவத்தேதுந்தி? ந கோ² பனேதம் ஏவம் த³ட்ட²ப்³ப³ம் ‘‘தது³ப⁴யம் ஏகஜ்ஜ²ம் மனஸாகாஸீ’’தி, அத² கோ² வாரேன. ப⁴க³வா ஹி பட²மம் அனுலோமவஸேன படிச்சஸமுப்பாத³ம் மனஸி கரித்வா தத³னுரூபம் பட²மம் உதா³னம் உதா³னேஸி. து³தியம்பி படிலோமவஸேன தம் மனஸி கரித்வா தத³னுரூபமேவ உதா³னம் உதா³னேஸி. ததியவாரே பன காலேன அனுலோமம் காலேன படிலோமம் மனஸிகரணவஸேன அனுலோமபடிலோமம் மனஸி அகாஸி. தேன வுத்தம் – ‘‘அனுலோமபடிலோமந்தி அனுலோமஞ்ச படிலோமஞ்ச, யதா²வுத்தஅனுலோமவஸேன சேவ படிலோமவஸேன சா’’தி. இமினா மனஸிகாரஸ்ஸ பகு³ணப³லவபா⁴வோ ச வஸீபா⁴வோ ச பகாஸிதோ ஹோதி. ஏத்த² ச ‘‘அனுலோமம் மனஸி கரிஸ்ஸாமி, படிலோமம் மனஸி கரிஸ்ஸாமி, அனுலோமபடிலோமம் மனஸி கரிஸ்ஸாமீ’’தி ஏவம் பவத்தானம் புப்³பா³போ⁴கா³னம் வஸேன நேஸம் விபா⁴கோ³ வேதி³தப்³போ³.

தத்த² அவிஜ்ஜாய த்வேவாதி அவிஜ்ஜாய து ஏவ. அஸேஸவிராக³னிரோதா⁴தி விராக³ஸங்கா²தேன மக்³கே³ன அஸேஸனிரோதா⁴, அக்³க³மக்³கே³ன அனவஸேஸஅனுப்பாத³ப்பஹானாதி அத்தோ². ஸங்கா²ரனிரோதோ⁴தி ஸப்³பே³ஸம் ஸங்கா²ரானம் அனவஸேஸம் அனுப்பாத³னிரோதோ⁴. ஹேட்டி²மேன ஹி மக்³க³த்தயேன கேசி ஸங்கா²ரா நிருஜ்ஜ²ந்தி, கேசி ந நிருஜ்ஜ²ந்தி அவிஜ்ஜாய ஸாவஸேஸனிரோதா⁴. அக்³க³மக்³கே³ன பனஸ்ஸா அனவஸேஸனிரோதா⁴ ந கேசி ஸங்கா²ரா ந நிருஜ்ஜ²ந்தீதி.

ஏதமத்த²ம் விதி³த்வாதி ய்வாயம் அவிஜ்ஜாதி³வஸேன ஸங்கா²ராதி³கஸ்ஸ து³க்க²க்க²ந்த⁴ஸ்ஸ ஸமுத³யோ நிரோதோ⁴ ச அவிஜ்ஜாதீ³னம் ஸமுத³யா நிரோதா⁴ ச ஹோதீதி வுத்தோ, ஸப்³பா³காரேன ஏதமத்த²ம் விதி³த்வா. இமம் உதா³னம் உதா³னேஸீதி இத³ம் யேன மக்³கே³ன யோ து³க்க²க்க²ந்த⁴ஸ்ஸ ஸமுத³யனிரோத⁴ஸங்கா²தோ அத்தோ² கிச்சவஸேன ஆரம்மணகிரியாய ச விதி³தோ, தஸ்ஸ அரியமக்³க³ஸ்ஸ ஆனுபா⁴வதீ³பகம் வுத்தப்பகாரம் உதா³னம் உதா³னேஸீதி அத்தோ².

தத்ராயம் ஸங்கே²பத்தோ² – யதா³ ஹவே பாதுப⁴வந்தி த⁴ம்மா ஆதாபினோ ஜா²யதோ ப்³ராஹ்மணஸ்ஸ, ததா³ ஸோ ப்³ராஹ்மணோ தேஹி உப்பன்னேஹி போ³தி⁴பக்கி²யத⁴ம்மேஹி யஸ்ஸ வா அரியமக்³க³ஸ்ஸ சதுஸச்சத⁴ம்மா பாதுபூ⁴தா, தேன அரியமக்³கே³ன விதூ⁴பயம் திட்ட²தி மாரஸேனம், ‘‘காமா தே பட²மா ஸேனா’’திஆதி³னா (ஸு. நி. 438; மஹானி. 28; சூளனி. நந்த³மாணவபுச்சா²னித்³தே³ஸ 47) நயேன வுத்தப்பகாரம் மாரஸேனம் விதூ⁴பயந்தோ வித⁴மேந்தோ வித்³த⁴ம்ஸேந்தோ திட்ட²தி. கத²ம்? ஸூரியோவ ஓபா⁴ஸயமந்தலிக்க²ம், யதா² ஸூரியோ அப்³பு⁴க்³க³தோ அத்தனோ பபா⁴ய அந்தலிக்க²ம் ஓபா⁴ஸேந்தோவ அந்த⁴காரம் வித⁴மேந்தோ திட்ட²தி, ஏவம் ஸோபி கீ²ணாஸவப்³ராஹ்மணோ தேஹி த⁴ம்மேஹி தேன வா அரியமக்³கே³ன ஸச்சானி படிவிஜ்ஜ²ந்தோவ மாரஸேனம் விதூ⁴பயந்தோ திட்ட²தீதி.

ஏவம் ப⁴க³வதா பட²மம் பச்சயாகாரபஜானனஸ்ஸ, து³தியம் பச்சயக்க²யாதி⁴க³மஸ்ஸ, ததியம் அரியமக்³க³ஸ்ஸ ஆனுபா⁴வப்பகாஸனானி இமானி தீணி உதா³னானி தீஸு யாமேஸு பா⁴ஸிதானி. கதராய ரத்தியா? அபி⁴ஸம்போ³தி⁴தோ ஸத்தமாய ரத்தியா. ப⁴க³வா ஹி விஸாக²புண்ணமாய ரத்தியா பட²மயாமே புப்³பே³னிவாஸம் அனுஸ்ஸரித்வா மஜ்ஜி²மயாமே தி³ப்³ப³சக்கு²ம் விஸோதே⁴த்வா பச்சி²மயாமே படிச்சஸமுப்பாதே³ ஞாணம் ஓதாரேத்வா நானானயேஹி தேபூ⁴மகஸங்கா²ரே ஸம்மஸித்வா ‘‘இதா³னி அருணோ உக்³க³மிஸ்ஸதீ’’தி ஸம்மாஸம்போ³தி⁴ம் பாபுணி, ஸப்³ப³ஞ்ஞுதப்பத்திஸமனந்தரமேவ ச அருணோ உக்³க³ச்சீ²தி. ததோ தேனேவ பல்லங்கேன போ³தி⁴ருக்க²மூலே ஸத்தாஹம் வீதினாமேந்தோ ஸம்பத்தாய பாடிபத³ரத்தியா தீஸு யாமேஸு வுத்தனயேன படிச்சஸமுப்பாத³ம் மனஸி கரித்வா யதா²க்கமம் இமானி உதா³னானி உதா³னேஸி.

க²ந்த⁴கே பன தீஸுபி வாரேஸு ‘‘படிச்சஸமுப்பாத³ம் அனுலோமபடிலோமம் மனஸாகாஸீ’’தி (மஹாவ. 1) ஆக³தத்தா க²ந்த⁴கட்ட²கதா²யம் ‘‘தீஸுபி யாமேஸு ஏவம் மனஸி கத்வா பட²மம் உதா³னம் பச்சயாகாரபச்சவேக்க²ணவஸேன, து³தியம் நிப்³பா³னபச்சவேக்க²ணவஸேன, ததியம் மக்³க³பச்சவேக்க²ணவஸேனாதி ஏவம் இமானி ப⁴க³வா உதா³னானி உதா³னேஸீ’’தி வுத்தம், தம்பி ந விருஜ்ஜ²தி. ப⁴க³வா ஹி ட²பேத்வா ரதனக⁴ரஸத்தாஹம் ஸேஸேஸு ச²ஸு ஸத்தாஹேஸு அந்தரந்தரா த⁴ம்மம் பச்சவேக்கி²த்வா யேபு⁴ய்யேன விமுத்திஸுக²படிஸம்வேதீ³ விஹாஸி, ரதனக⁴ரஸத்தாஹே பன அபி⁴த⁴ம்மபரிசயவஸேனேவ விஹாஸீதி.

ததியபோ³தி⁴ஸுத்தவண்ணனா நிட்டி²தா.