2. து³தியபோ³தி⁴ஸுத்தவண்ணனா

2. து³தியே படிலோமந்தி ‘‘அவிஜ்ஜானிரோதா⁴ ஸங்கா²ரனிரோதோ⁴’’திஆதி³னா நயேன வுத்தோ அவிஜ்ஜாதி³கோயேவ பச்சயாகாரோ அனுப்பாத³னிரோதே⁴ன நிருஜ்ஜ²மானோ அத்தனோ கத்தப்³ப³கிச்சஸ்ஸ அகரணதோ படிலோமோதி வுச்சதி. பவத்தியா வா விலோமனதோ படிலோமோ, அந்ததோ பன மஜ்ஜ²தோ வா பட்டா²ய ஆதி³ம் பாபேத்வா அவுத்தத்தா இதோ அஞ்ஞேனத்தே²னேத்த² படிலோமதா ந யுஜ்ஜதி. படிலோமந்தி ச ‘‘விஸமம் சந்த³ஸூரியா பரிவத்தந்தீ’’திஆதீ³ஸு விய பா⁴வனபும்ஸகனித்³தே³ஸோ. இமஸ்மிம் அஸதி இத³ம் ந ஹோதீதி இமஸ்மிம் அவிஜ்ஜாதி³கே பச்சயே அஸதி மக்³கே³ன பஹீனே இத³ம் ஸங்கா²ராதி³கம் ப²லம் ந ஹோதி நப்பவத்ததி. இமஸ்ஸ நிரோதா⁴ இத³ம் நிருஜ்ஜ²தீதி இமஸ்ஸ அவிஜ்ஜாதி³கஸ்ஸ பச்சயஸ்ஸ நிரோதா⁴ மக்³கே³ன அனுப்பத்தித⁴ம்மதம் ஆபாதி³தத்தா இத³ம் ஸங்கா²ராதி³கம் ப²லம் நிருஜ்ஜ²தி, நப்பவத்ததீதி அத்தோ². இதா⁴பி யதா² ‘‘இமஸ்மிம் ஸதி இத³ம் ஹோதி, இமஸ்ஸுப்பாதா³ இத³ம் உப்பஜ்ஜதீ’’தி ஏத்த² ‘‘இமஸ்மிம் ஸதியேவ, நாஸதி, இமஸ்ஸ உப்பாதா³ ஏவ, ந நிரோதா⁴’’தி அந்தோக³த⁴னியமதா த³ஸ்ஸிதா. ஏவம் இமஸ்மிம் அஸதியேவ, ந ஸதி, இமஸ்ஸ நிரோதா⁴ ஏவ, ந உப்பாதா³தி அந்தோக³த⁴னியமதாலக்க²ணா த³ஸ்ஸிதாதி வேதி³தப்³ப³ம். ஸேஸமேத்த² யம் வத்தப்³ப³ம், தம் பட²மபோ³தி⁴ஸுத்தவண்ணனாய வுத்தனயானுஸாரேன வேதி³தப்³ப³ம்.

ஏவம் யதா² ப⁴க³வா படிலோமபடிச்சஸமுப்பாத³ம் மனஸி அகாஸி, தம் ஸங்கே²பேன த³ஸ்ஸேத்வா இதா³னி வித்தா²ரேன த³ஸ்ஸேதும் ‘‘அவிஜ்ஜானிரோதா⁴ ஸங்கா²ரனிரோதோ⁴’’திஆதி³ வுத்தம். தத்த² அவிஜ்ஜானிரோதா⁴தி அரியமக்³கே³ன அவிஜ்ஜாய அனவஸேஸனிரோதா⁴, அனுஸயப்பஹானவஸேன அக்³க³மக்³கே³ன அவிஜ்ஜாய அச்சந்தஸமுக்³கா⁴டதோதி அத்தோ². யதி³பி ஹேட்டி²மமக்³கே³ஹி பஹீயமானா அவிஜ்ஜா அச்சந்தஸமுக்³கா⁴டவஸேனேவ பஹீயதி, ததா²பி ந அனவஸேஸதோ பஹீயதி. அபாயகா³மினியா ஹி அவிஜ்ஜா பட²மமக்³கே³ன பஹீயதி. ததா² ஸகிதே³வ இமஸ்மிம் லோகே ஸப்³ப³த்த² ச அனரியபூ⁴மியம் உபபத்திபச்சயபூ⁴தா அவிஜ்ஜா யதா²க்கமம் து³தியததியமக்³கே³ஹி பஹீயதி, ந இதராதி. அரஹத்தமக்³கே³னேவ ஹி ஸா அனவஸேஸம் பஹீயதீதி. ஸங்கா²ரனிரோதோ⁴தி ஸங்கா²ரானம் அனுப்பாத³னிரோதோ⁴ ஹோதி. ஏவம் நிருத்³தா⁴னம் பன ஸங்கா²ரானம் நிரோதா⁴ விஞ்ஞாணம், விஞ்ஞாணாதீ³னஞ்ச நிரோதா⁴ நாமரூபாதீ³னி நிருத்³தா⁴னி ஏவ ஹோந்தீதி த³ஸ்ஸேதும் ‘‘ஸங்கா²ரனிரோதா⁴ விஞ்ஞாணனிரோதோ⁴’’திஆதி³ம் வத்வா ‘‘ஏவமேதஸ்ஸ கேவலஸ்ஸ து³க்க²க்க²ந்த⁴ஸ்ஸ நிரோதோ⁴ ஹோதீ’’தி வுத்தம். தத்த² யம் வத்தப்³ப³ம், தம் ஹேட்டா² வுத்தனயமேவ.

அபிசேத்த² கிஞ்சாபி ‘‘அவிஜ்ஜானிரோதா⁴ ஸங்கா²ரனிரோதோ⁴, ஸங்கா²ரனிரோதா⁴ விஞ்ஞாணனிரோதோ⁴’’தி ஏத்தாவதாபி ஸகலஸ்ஸ து³க்க²க்க²ந்த⁴ஸ்ஸ அனவஸேஸதோ நிரோதோ⁴ வுத்தோ ஹோதி, ததா²பி யதா² அனுலோமே யஸ்ஸ யஸ்ஸ பச்சயத⁴ம்மஸ்ஸ அத்தி²தாய யோ யோ பச்சயுப்பன்னத⁴ம்மோ ந நிருஜ்ஜ²தி பவத்ததி ஏவாதி இமஸ்ஸ அத்த²ஸ்ஸ த³ஸ்ஸனத்த²ம் ‘‘அவிஜ்ஜாபச்சயா ஸங்கா²ரா…பே… ஸமுத³யோ ஹோதீ’’தி வுத்தம். ஏவம் தப்படிபக்க²தோ தஸ்ஸ தஸ்ஸ பச்சயத⁴ம்மஸ்ஸ அபா⁴வே ஸோ ஸோ பச்சயுப்பன்னத⁴ம்மோ நிருஜ்ஜ²தி நப்பவத்ததீதி த³ஸ்ஸனத்த²ம் இத⁴ ‘‘அவிஜ்ஜானிரோதா⁴ ஸங்கா²ரனிரோதோ⁴, ஸங்கா²ரனிரோதா⁴ விஞ்ஞாணனிரோதோ⁴…பே… து³க்க²க்க²ந்த⁴ஸ்ஸ நிரோதோ⁴ ஹோதீ’’தி வுத்தம், ந பன அனுலோமே விய காலத்தயபரியாபன்னஸ்ஸ து³க்க²க்க²ந்த⁴ஸ்ஸ நிரோத⁴த³ஸ்ஸனத்த²ம். அனாக³தஸ்ஸேவ ஹி அரியமக்³க³பா⁴வனாய அஸதி உப்பஜ்ஜனாரஹஸ்ஸ து³க்க²க்க²ந்த⁴ஸ்ஸ அரியமக்³க³பா⁴வனாய நிரோதோ⁴ இச்சி²தோதி அயம்பி விஸேஸோ வேதி³தப்³போ³.

ஏதமத்த²ம் விதி³த்வாதி ய்வாயம் ‘‘அவிஜ்ஜானிரோதா⁴தி³வஸேன ஸங்கா²ராதி³கஸ்ஸ து³க்க²க்க²ந்த⁴ஸ்ஸ நிரோதோ⁴ ஹோதீ’’தி வுத்தோ, ஸப்³பா³காரேன ஏதமத்த²ம் விதி³த்வா. இமம் உதா³னம் உதா³னேஸீதி இமஸ்மிம் அத்தே² விதி³தே ‘‘அவிஜ்ஜானிரோதா⁴ ஸங்கா²ரனிரோதோ⁴’’தி ஏவம் பகாஸிதஸ்ஸ அவிஜ்ஜாதீ³னம் பச்சயானம் க²யஸ்ஸ அவபோ³தா⁴னுபா⁴வதீ³பகம் உதா³னம் உதா³னேஸீதி அத்தோ².

தத்ராயம் ஸங்கே²பத்தோ² – யஸ்மா அவிஜ்ஜாதீ³னம் பச்சயானம் அனுப்பாத³னிரோத⁴ஸங்கா²தம் க²யம் அவேதி³ அஞ்ஞாஸி படிவிஜ்ஜி², தஸ்மா ஏதஸ்ஸ வுத்தனயேன ஆதாபினோ ஜா²யதோ ப்³ராஹ்மணஸ்ஸ வுத்தப்பகாரா போ³தி⁴பக்கி²யத⁴ம்மா சதுஸச்சத⁴ம்மா வா பாதுப⁴வந்தி உப்பஜ்ஜந்தி பகாஸேந்தி வா. அத² யா பச்சயனிரோத⁴ஸ்ஸ ஸம்மா அவிதி³தத்தா உப்பஜ்ஜேய்யும் புப்³பே³ வுத்தப்பபே⁴தா³ கங்கா², தா ஸப்³பா³பி வபயந்தி நிருஜ்ஜ²ந்தீதி. ஸேஸம் ஹேட்டா² வுத்தனயமேவ.

து³தியபோ³தி⁴ஸுத்தவண்ணனா நிட்டி²தா.