16. பிங்கி³யஸுத்தவண்ணனா

1127. ஜிண்ணோஹமஸ்மீதி பிங்கி³யஸுத்தம். தத்த² ஜிண்ணோஹமஸ்மி அப³லோ வீதவண்ணோதி ஸோ கிர ப்³ராஹ்மணோ ஜராபி⁴பூ⁴தோ வீஸவஸ்ஸஸதிகோ ஜாதியா, து³ப்³ப³லோ ச ‘‘இத⁴ பத³ம் கரிஸ்ஸாமீ’’தி அஞ்ஞத்தே²வ கரோதி, வினட்ட²புரிமச்ச²விவண்ணோ ச. தேனாஹ – ‘‘ஜிண்ணோஹமஸ்மி அப³லோ வீதவண்ணோ’’தி. மாஹம் நஸ்ஸம் மோமுஹோ அந்தராவாதி மாஹம் துய்ஹம் த⁴ம்மம் அஸச்சி²கத்வா அந்தராயேவ அவித்³வா ஹுத்வா அனஸ்ஸிம். ஜாதிஜராய இத⁴ விப்பஹானந்தி இதே⁴வ தவ பாத³மூலே பாஸாணகே வா சேதிய ஜாதிஜராய விப்பஹானம் நிப்³பா³னத⁴ம்மம் யமஹம் விஜஞ்ஞம், தம் மே ஆசிக்க².

1128. இதா³னி யஸ்மா பிங்கி³யோ காயே ஸாபேக்க²தாய ‘‘ஜிண்ணோஹமஸ்மீ’’தி கா³த²மாஹ தேனஸ்ஸ ப⁴க³வா காயே ஸினேஹப்பஹானத்த²ம் ‘‘தி³ஸ்வான ரூபேஸு விஹஞ்ஞமானே’’தி கா³த²மாஹ. தத்த² ரூபேஸூதி ரூபஹேது ரூபபச்சயா. விஹஞ்ஞமானேதி கம்மகாரணாதீ³ஹி உபஹஞ்ஞமானே. ருப்பந்தி ரூபேஸூதி சக்கு²ரோகா³தீ³ஹி ச ரூபஹேதுயேவ ஜனா ருப்பந்தி பா³தீ⁴யந்தி.

1129-30. ஏவம் ப⁴க³வதா யாவ அரஹத்தம் தாவ கதி²தம் படிபத்திம் ஸுத்வாபி பிங்கி³யோ ஜராது³ப்³ப³லதாய விஸேஸம் அனதி⁴க³ந்த்வாவ புன ‘‘தி³ஸா சதஸ்ஸோ’’தி இமாய கா³தா²ய ப⁴க³வந்தம் தோ²மேந்தோ தே³ஸனம் யாசதி. அத²ஸ்ஸ ப⁴க³வா புனபி யாவ அரஹத்தம், தாவ படிபத³ம் த³ஸ்ஸேந்தோ ‘‘தண்ஹாதி⁴பன்னே’’தி கா³த²மாஹ. ஸேஸம் ஸப்³ப³த்த² பாகடமேவ.

இமம்பி ஸுத்தம் ப⁴க³வா அரஹத்தனிகூடேனேவ தே³ஸேஸி. தே³ஸனாபரியோஸானே ச பிங்கி³யோ அனாகா³மிப²லே பதிட்டா²ஸி. ஸோ கிர அந்தரந்தரா சிந்தேஸி – ‘‘ஏவம் விசித்ரபடிபா⁴னம் நாம தே³ஸனம் ந லபி⁴ மய்ஹம் மாதுலோ பா³வரீ ஸவனாயா’’தி. தேன ஸினேஹவிக்கே²பேன அரஹத்தம் பாபுணிதும் நாஸக்கி². அந்தேவாஸினோ பனஸ்ஸ ஸஹஸ்ஸஜடிலா அரஹத்தம் பாபுணிம்ஸு. ஸப்³பே³வ இத்³தி⁴மயபத்தசீவரத⁴ரா ஏஹிபி⁴க்க²வோ அஹேஸுந்தி.

பரமத்த²ஜோதிகாய கு²த்³த³க-அட்ட²கதா²ய

ஸுத்தனிபாத-அட்ட²கதா²ய பிங்கி³யஸுத்தவண்ணனா நிட்டி²தா.

பாராயனத்து²திகா³தா²வண்ணனா

இதோ பரம் ஸங்கீ³திகாரா தே³ஸனம் தோ²மேந்தா ‘‘இத³மவோச ப⁴க³வா’’திஆதி³மாஹம்ஸு. தத்த² இத³மவோசாதி இத³ம் பராயனம் அவோச. பரிசாரகஸோளஸானந்தி பா³வரிஸ்ஸ பரிசாரகேன பிங்கி³யேன ஸஹ ஸோளஸன்னம் பு³த்³த⁴ஸ்ஸ வா ப⁴க³வதோ பரிசாரகானம் ஸோளஸன்னந்தி பரிசாரகஸோளஸன்னம். தே ஏவ ச ப்³ராஹ்மணா. தத்த² ஸோளஸபரிஸா பன புரதோ ச பச்ச²தோ ச வாமபஸ்ஸதோ ச த³க்கி²ணபஸ்ஸதோ ச ச² ச² யோஜனானி நிஸின்னா உஜுகேன த்³வாத³ஸயோஜனிகா அஹோஸி. அஜ்ஜி²ட்டோ²தி யாசிதோ அத்த²மஞ்ஞாயாதி பாளிஅத்த²மஞ்ஞாய. த⁴ம்மமஞ்ஞாயாதி பாளிமஞ்ஞாய. பாராயனந்தி ஏவம் இமஸ்ஸ த⁴ம்மபரியாயஸ்ஸ அதி⁴வசனம் ஆரோபேத்வா தேஸம் ப்³ராஹ்மணானம் நாமானி கித்தயந்தா ‘‘அஜிதோ திஸ்ஸமேத்தேய்யோ…பே… பு³த்³த⁴ஸேட்ட²ம் உபாக³மு’’ந்தி ஆஹம்ஸு.

1131-7. தத்த² ஸம்பன்னசரணந்தி நிப்³பா³னபத³ட்டா²னபூ⁴தேன பாதிமோக்க²ஸீலாதி³னா ஸம்பன்னம். இஸிந்தி மஹேஸிம். ஸேஸம் பாகடமேவ. ததோ பரம் ப்³ரஹ்மசரியமசரிம்ஸூதி மக்³க³ப்³ரஹ்மசரியம் அசரிம்ஸு. தஸ்மா பாராயனந்தி தஸ்ஸ பாரபூ⁴தஸ்ஸ நிப்³பா³னஸ்ஸ அயனந்தி வுத்தம் ஹோதி.

பாராயனானுகீ³திகா³தா²வண்ணனா

1138. பாராயனமனுகா³யிஸ்ஸந்தி அஸ்ஸ அயம் ஸம்ப³ந்தோ⁴ – ப⁴க³வதா ஹி பாராயனே தே³ஸிதே ஸோளஸஸஹஸ்ஸா ஜடிலா அரஹத்தம் பாபுணிம்ஸு, அவஸேஸானஞ்ச சுத்³த³ஸகோடிஸங்கா²னம் தே³வமனுஸ்ஸானம் த⁴ம்மாபி⁴ஸமயோ அஹோஸி. வுத்தஞ்ஹேதம் போராணேஹி –

‘‘ததோ பாஸாணகே ரம்மே, பாராயனஸமாக³மே;

அமதம் பாபயீ பு³த்³தோ⁴, சுத்³த³ஸ பாணகோடியோ’’தி.

நிட்டி²தாய பன த⁴ம்மதே³ஸனாய ததோ ததோ ஆக³தா மனுஸ்ஸா ப⁴க³வதோ ஆனுபா⁴வேன அத்தனோ அத்தனோ கா³மனிக³மாதீ³ஸ்வேவ பாதுரஹேஸும். ப⁴க³வாபி ஸாவத்தி²மேவ அக³மாஸி பரிசாரகஸோளஸாதீ³ஹி அனேகேஹி பி⁴க்கு²ஸஹஸ்ஸேஹி பரிவுதோ. தத்த² பிங்கி³யோ ப⁴க³வந்தம் வந்தி³த்வா ஆஹ – ‘‘க³ச்சா²மஹம், ப⁴ந்தே, பா³வரிஸ்ஸ பு³த்³து⁴ப்பாத³ம் ஆரோசேதும், படிஸ்ஸுதஞ்ஹி தஸ்ஸ மயா’’தி. அத² ப⁴க³வதா அனுஞ்ஞாதோ ஞாணக³மனேனேவ கோ³தா⁴வரீதீரம் க³ந்த்வா பாத³க³மனேன அஸ்ஸமாபி⁴முகோ² அக³மாஸி. தமேனம் பா³வரீ ப்³ராஹ்மணோ மக்³க³ம் ஓலோகேந்தோ நிஸின்னோ தூ³ரதோவ கா²ரிஜடாதி³விரஹிதம் பி⁴க்கு²வேஸேன ஆக³ச்ச²ந்தம் தி³ஸ்வா ‘‘பு³த்³தோ⁴ லோகே உப்பன்னோ’’தி நிட்ட²ம் அக³மாஸி. ஸம்பத்தஞ்சாபி நம் புச்சி² – ‘‘கிம், பிங்கி³ய, பு³த்³தோ⁴ லோகே உப்பன்னோ’’தி. ‘‘ஆம, ப்³ராஹ்மண, உப்பன்னோ, பாஸாணகே சேதியே நிஸின்னோ அம்ஹாகம் த⁴ம்மம் தே³ஸேஸி, தமஹம் துய்ஹம் தே³ஸேஸ்ஸாமீ’’தி. ததோ பா³வரீ மஹதா ஸக்காரேன ஸபரிஸோ தம் பூஜேத்வா ஆஸனம் பஞ்ஞாபேஸி. தத்த² நிஸீதி³த்வா பிங்கி³யோ ‘‘பாராயனமனுகா³யிஸ்ஸ’’ந்திஆதி³மாஹ.

தத்த² அனுகா³யிஸ்ஸந்தி ப⁴க³வதா கீ³தம் அனுகா³யிஸ்ஸம். யதா²த்³த³க்கீ²தி யதா² ஸாமம் ஸச்சாபி⁴ஸம்போ³தே⁴ன அஸாதா⁴ரணஞாணேன ச அத்³த³க்கி². நிக்காமோதி பஹீனகாமோ. ‘‘நிக்கமோ’’திபி பாடோ², வீரியவாதி அத்தோ² நிக்க²ந்தோ வா அகுஸலபக்கா². நிப்³ப³னோதி கிலேஸவனவிரஹிதோ, தண்ஹாவிரஹிதோ ஏவ வா. கிஸ்ஸ ஹேது முஸா ப⁴ணேதி யேஹி கிலேஸேஹி முஸா ப⁴ணேய்ய, ஏதே தஸ்ஸ பஹீனாதி த³ஸ்ஸேதி. ஏதேன ப்³ராஹ்மணஸ்ஸ ஸவனே உஸ்ஸாஹம் ஜனேதி.

1139-41. வண்ணூபஸஞ்ஹிதந்தி கு³ணூபஸஞ்ஹிதம். ஸச்சவ்ஹயோதி ‘‘பு³த்³தோ⁴’’தி ஸச்சேனேவ அவ்ஹானேன நாமேன யுத்தோ. ப்³ரஹ்மேதி தம் ப்³ராஹ்மணம் ஆலபதி. குப்³ப³னகந்தி பரித்தவனம். ப³ஹுப்ப²லம் கானனமாவஸேய்யாதி அனேகப²லாதி³விகதிப⁴ரிதம் கானனம் ஆக³ம்ம வஸேய்ய. அப்பத³ஸ்ஸேதி பா³வரிபபு⁴திகே பரித்தபஞ்ஞே. மஹோத³தி⁴ந்தி அனோதத்தாதி³ம் மஹந்தம் உத³கராஸிம்.

1142-4. யேமே புப்³பே³தி யே இமே புப்³பே³. தமனுதா³ஸினோதி தமோனுதோ³ ஆஸினோ. பூ⁴ரிபஞ்ஞாணோதி ஞாணத⁴ஜோ. பூ⁴ரிமேத⁴ஸோதி விபுலபஞ்ஞோ. ஸந்தி³ட்டி²கமகாலிகந்தி ஸாமம் பஸ்ஸிதப்³ப³ப²லம், ந ச காலந்தரே பத்தப்³ப³ப²லம். அனீதிகந்தி கிலேஸஈதிவிரஹிதம்.

1145-50. அத² நம் பா³வரீ ஆஹ ‘‘கிம் நு தம்ஹா’’தி த்³வே கா³தா². ததோ பிங்கி³யோ ப⁴க³வதோ ஸந்திகா அவிப்பவாஸமேவ தீ³பேந்தோ ‘‘நாஹம் தம்ஹா’’திஆதி³மாஹ. பஸ்ஸாமி நம் மனஸா சக்கு²னாவாதி தம் பு³த்³த⁴ம் அஹம் சக்கு²னா விய மனஸா பஸ்ஸாமி. நமஸ்ஸமானோ விவஸேமி ரத்திந்தி நமஸ்ஸமானோவ ரத்திம் அதினாமேமி. தேன தேனேவ நதோதி யேன தி³ஸாபா⁴கே³ன பு³த்³தோ⁴, தேன தேனேவாஹம்பி நதோ தன்னின்னோ தப்போணோதி த³ஸ்ஸேதி.

1151. து³ப்³ப³லதா²மகஸ்ஸாதி அப்பதா²மகஸ்ஸ, அத² வா து³ப்³ப³லஸ்ஸ து³த்தா²மகஸ்ஸ ச ப³லவீரியஹீனஸ்ஸாதி வுத்தம் ஹோதி. தேனேவ காயோ ந பலேதீதி தேனேவ து³ப்³ப³லதா²மகத்தேன காயோ ந க³ச்ச²தி, யேன வா பு³த்³தோ⁴, தேன ந க³ச்ச²தி. ‘‘ந பரேதீ’’திபி பாடோ², ஸோ ஏவத்தோ². தத்தா²தி பு³த்³த⁴ஸ்ஸ ஸந்திகே. ஸங்கப்பயந்தாயாதி ஸங்கப்பக³மனேன. தேன யுத்தோதி யேன பு³த்³தோ⁴, தேன யுத்தோ பயுத்தோ அனுயுத்தோதி த³ஸ்ஸேதி.

1152. பங்கே ஸயானோதி காமகத்³த³மே ஸயமானோ. தீ³பா தீ³பம் உபப்லவிந்தி ஸத்தா²ராதி³தோ ஸத்தா²ராதி³ம் அபி⁴க³ச்சி²ம். அத²த்³த³ஸாஸிம் ஸம்பு³த்³த⁴ந்தி ஸோஹம் ஏவம் து³த்³தி³ட்டி²ம் க³ஹேத்வா அன்வாஹிண்ட³ந்தோ அத² பாஸாணகே சேதியே பு³த்³த⁴மத்³த³க்கி²ம்.

1153. இமிஸ்ஸா கா³தா²ய அவஸானே பிங்கி³யஸ்ஸ ச பா³வரிஸ்ஸ ச இந்த்³ரியபரிபாகம் விதி³த்வா ப⁴க³வா ஸாவத்தி²யம் டி²தோயேவ ஸுவண்ணோபா⁴ஸம் முஞ்சி. பிங்கி³யோ பா³வரிஸ்ஸ பு³த்³த⁴கு³ணே வண்ணயந்தோ நிஸின்னோ ஏவ தம் ஓபா⁴ஸம் தி³ஸ்வா ‘‘கிம் இத³’’ந்தி விலோகேந்தோ ப⁴க³வந்தம் அத்தனோ புரதோ டி²தம் விய தி³ஸ்வா பா³வரிப்³ராஹ்மணஸ்ஸ ‘‘பு³த்³தோ⁴ ஆக³தோ’’தி ஆரோசேஸி, ப்³ராஹ்மணோ உட்டா²யாஸனா அஞ்ஜலிம் பக்³க³ஹேத்வா அட்டா²ஸி. ப⁴க³வாபி ஓபா⁴ஸம் ப²ரித்வா ப்³ராஹ்மணஸ்ஸ அத்தானம் த³ஸ்ஸேந்தோ உபி⁴ன்னம்பி ஸப்பாயம் விதி³த்வா பிங்கி³யமேவ ஆலபமானோ ‘‘யதா² அஹூ வக்கலீ’’தி இமம் கா³த²மபா⁴ஸி.

தஸ்ஸத்தோ² – யதா² வக்கலித்தே²ரோ ஸத்³தா⁴தி⁴முத்தோ அஹோஸி, ஸத்³தா⁴து⁴ரேன ச அரஹத்தம் பாபுணி. யதா² ச ஸோளஸன்னம் ஏகோ ப⁴த்³ராவுதோ⁴ நாம யதா² ச ஆளவி கோ³தமோ, ஏவமேவ த்வம்பி பமுஞ்சஸ்ஸு ஸத்³த⁴ம். ததோ ஸத்³தா⁴ய அதி⁴முச்சந்தோ ‘‘ஸப்³பே³ ஸங்கா²ரா அனிச்சா’’திஆதி³னா நயேன விபஸ்ஸனம் ஆரபி⁴த்வா மச்சுதே⁴ய்யஸ்ஸ பாரம் நிப்³பா³னம் க³மிஸ்ஸஸீதி அரஹத்தனிகூடேனேவ தே³ஸனம் நிட்டா²பேஸி. தே³ஸனாபரியோஸானே பிங்கி³யோ அரஹத்தே பா³வரீ அனாகா³மிப²லே பதிட்ட²ஹி. பா³வரிப்³ராஹ்மணஸ்ஸ ஸிஸ்ஸா பன பஞ்சஸதா ஸோதாபன்னா அஹேஸும்.

1154-5. இதா³னி பிங்கி³யோ அத்தனோ பஸாத³ம் பவேதே³ந்தோ ‘‘ஏஸ பி⁴ய்யோ’’திஆதி³மாஹ. தத்த² படிபா⁴னவாதி படிபா⁴னபடிஸம்பி⁴தா³ய உபேதோ. அதி⁴தே³வே அபி⁴ஞ்ஞாயாதி அதி⁴தே³வகரே த⁴ம்மே ஞத்வா. பரோவரந்தி ஹீனபணீதம், அத்தனோ ச பரஸ்ஸ ச அதி⁴தே³வத்தகரம் ஸப்³ப³ம் த⁴ம்மஜாதம் வேதீ³தி வுத்தம் ஹோதி. கங்கீ²னம் படிஜானதந்தி கங்கீ²னம்யேவ ஸதம் ‘‘நிக்கங்க²ம்ஹா’’தி படிஜானந்தானம்.

1156. அஸம்ஹீரந்தி ராகா³தீ³ஹி அஸம்ஹாரியம். அஸம்குப்பந்தி அகுப்பம் அவிபரிணாமத⁴ம்மம். த்³வீஹிபி பதே³ஹி நிப்³பா³னம் ப⁴ணதி. அத்³தா⁴ க³மிஸ்ஸாமீதி ஏகம்ஸேனேவ தம் அனுபாதி³ஸேஸம் நிப்³பா³னதா⁴தும் க³மிஸ்ஸாமி. ந மேத்த² கங்கா²தி நத்தி² மே ஏத்த² நிப்³பா³னே கங்கா². ஏவம் மம் தா⁴ரேஹி அதி⁴முத்தசித்தந்தி பிங்கி³யோ ‘‘ஏவமேவ த்வம்பி பமுஞ்சஸ்ஸு ஸத்³த⁴’’ந்தி. இமினா ப⁴க³வதோ ஓவாதே³ன அத்தனி ஸத்³த⁴ம் உப்பாதே³த்வா ஸத்³தா⁴து⁴ரேனேவ ச விமுஞ்சித்வா தம் ஸத்³தா⁴தி⁴முத்ததம் பகாஸேந்தோ ப⁴க³வந்தம் ஆஹ – ‘‘ஏவம் மம் தா⁴ரேஹி அதி⁴முத்தசித்த’’ந்தி. அயமேத்த² அதி⁴ப்பாயோ ‘‘யதா² மம் த்வம் அவச, ஏவமேவ அதி⁴முத்தம் தா⁴ரேஹீ’’தி.

இதி பரமத்த²ஜோதிகாய கு²த்³த³க-அட்ட²கதா²ய

ஸுத்தனிபாத-அட்ட²கதா²ய ஸோளஸப்³ராஹ்மணஸுத்தவண்ணனா நிட்டி²தா.

நிட்டி²தோ ச பஞ்சமோ வக்³கோ³ அத்த²வண்ணனானயதோ, நாமேன

பாராயனவக்³கோ³தி.

நிக³மனகதா²

ஏத்தாவதா ச யம் வுத்தம் –

‘‘உத்தமம் வந்த³னேய்யானம், வந்தி³த்வா ரதனத்தயம்;

யோ கு²த்³த³கனிகாயம்ஹி, கு²த்³தா³சாரப்பஹாயினா.

‘‘தே³ஸிதோ லோகனாதே²ன, லோகனித்த²ரணேஸினா;

தஸ்ஸ ஸுத்தனிபாதஸ்ஸ, கரிஸ்ஸாமத்த²வண்ணன’’ந்தி.

ஏத்த² உரக³வக்³கா³தி³பஞ்சவக்³க³ஸங்க³ஹிதஸ்ஸ உரக³ஸுத்தாதி³ஸத்ததிஸுத்தப்பபே⁴த³ஸ்ஸ ஸுத்தனிபாதஸ்ஸ அத்த²வண்ணனா கதா ஹோதி. தேனேதம் வுச்சதி –

‘‘இமம் ஸுத்தனிபாதஸ்ஸ, கரோந்தேனத்த²வண்ணனம்;

ஸத்³த⁴ம்மட்டி²திகாமேன, யம் பத்தம் குஸலம் மயா.

‘‘தஸ்ஸானுபா⁴வதோ கி²ப்பம், த⁴ம்மே அரியப்பவேதி³தே;

வுட்³டி⁴ம் விரூள்ஹிம் வேபுல்லம், பாபுணாது அயம் ஜனோ’’தி.

(பரியத்திப்பமாணதோ சதுசத்தாலீஸமத்தா பா⁴ணவாரா.)

பரமவிஸுத்³த⁴ஸத்³தா⁴பு³த்³தி⁴வீரியப்படிமண்டி³தேன ஸீலாசாரஜ்ஜவமத்³த³வாதி³கு³ணஸமுத³யஸமுதி³தேன ஸகஸமயஸமயந்தரக³ஹனஜ்ஜோ²கா³ஹணஸமத்தே²ன பஞ்ஞாவேய்யத்தியஸமன்னாக³தேன திபிடகபரியத்திப்பபே⁴தே³ ஸாட்ட²கதே² ஸத்து²ஸாஸனே அப்படிஹதஞாணப்பபா⁴வேன மஹாவேய்யாகரணேன கரணஸம்பத்திஜனிதஸுக²வினிக்³க³தமது⁴ரோதா³ரவசனலாவண்ணயுத்தேன யுத்தமுத்தவாதி³னா வாதீ³வரேன மஹாகவினா ச²ளபி⁴ஞ்ஞாபடிஸம்பி⁴தா³தி³ப்பபே⁴த³கு³ணபடிமண்டி³தே உத்தரிமனுஸ்ஸத⁴ம்மே ஸுப்பதிட்டி²தபு³த்³தீ⁴னம் தே²ரவம்ஸப்பதீ³பானம் தே²ரானம் மஹாவிஹாரவாஸீனம் வம்ஸாலங்காரபூ⁴தேன விபுலவிஸுத்³த⁴பு³த்³தி⁴னா பு³த்³த⁴கோ⁴ஸோதி க³ரூஹி க³ஹிதனாமதே⁴ய்யேன தே²ரேன கதா அயம் பரமத்த²ஜோதிகா நாம ஸுத்தனிபாத-அட்ட²கதா² –

தாவ திட்ட²து லோகஸ்மிம், லோகனித்த²ரணேஸினம்;

த³ஸ்ஸேந்தீ குலபுத்தானம், நயம் பஞ்ஞாவிஸுத்³தி⁴யா.

யாவ பு³த்³தோ⁴தி நாமம்பி, ஸுத்³த⁴சித்தஸ்ஸ தாதி³னோ;

லோகம்ஹி லோகஜேட்ட²ஸ்ஸ, பவத்ததி மஹேஸினோதி.

ஸுத்தனிபாத-அத்த²வண்ணனா நிட்டி²தா.