9. வாஸேட்ட²ஸுத்தவண்ணனா

ஏவம் மே ஸுதந்தி வாஸேட்ட²ஸுத்தம். கா உப்பத்தி? அயமேவ யாஸ்ஸ நிதா³னே வுத்தா அத்த²வண்ணனம் பனஸ்ஸ வுத்தனயானி உத்தானத்தா²னி ச பதா³னி பரிஹரந்தா கரிஸ்ஸாம. இச்சா²னங்க³லோதி கா³மஸ்ஸ நாமம். ப்³ராஹ்மணமஹாஸாலானம் சங்கீ தாருக்கோ² தோதே³ய்யோதி வோஹாரனாமமேதம். போக்க²ரஸாதி ஜாணுஸ்ஸோணீதி நேமித்திகம். தேஸு கிர ஏகோ ஹிமவந்தபஸ்ஸே போக்க²ரணியா பது³மே நிப்³ப³த்தோ, அஞ்ஞதரோ தாபஸோ தம் பது³மம் க³ஹேத்வா தத்த² ஸயிதம் தா³ரகம் தி³ஸ்வா ஸம்வட்³டே⁴த்வா ரஞ்ஞோ த³ஸ்ஸேஸி. போக்க²ரே ஸயிதத்தா ‘‘போக்க²ரஸாதீ’’தி சஸ்ஸ நாமமகாஸி. ஏகஸ்ஸ டா²னந்தரே நேமித்திகம். தேன கிர ஜாணுஸ்ஸோணினாமகம் புரோஹிதட்டா²னம் லத்³த⁴ம், ஸோ தேனேவ பஞ்ஞாயி.

தே ஸப்³பே³பி அஞ்ஞே ச அபி⁴ஞ்ஞாதா அபி⁴ஞ்ஞாதா ப்³ராஹ்மணமஹாஸாலா கஸ்மா இச்சா²னங்க³லே படிவஸந்தீதி? வேத³ஸஜ்ஜா²யனபரிவீமம்ஸனத்த²ம். தேன கிர ஸமயேன கோஸலஜனபதே³ வேத³கா ப்³ராஹ்மணா வேதா³னம் ஸஜ்ஜா²யகரணத்த²ஞ்ச அத்தூ²பபரிக்க²ணத்த²ஞ்ச தஸ்மிம்யேவ கா³மே ஸன்னிபதந்தி. தேன தேபி அந்தரந்தரா அத்தனோ போ⁴க³கா³மதோ ஆக³ம்ம தத்த² படிவஸந்தி.

வாஸேட்ட²பா⁴ரத்³வாஜானந்தி வாஸேட்ட²ஸ்ஸ ச பா⁴ரத்³வாஜஸ்ஸ ச. அயமந்தராகதா²தி யம் அத்தனோ ஸஹாயகபா⁴வானுரூபம் கத²ம் கதே²ந்தா அனுவிசரிம்ஸு, தஸ்ஸா கதா²ய அந்தரா வேமஜ்ஜே²யேவ அயம் அஞ்ஞா கதா² உத³பாதீ³தி வுத்தம் ஹோதி. ஸம்ஸுத்³த⁴க³ஹணிகோதி ஸம்ஸுத்³த⁴குச்சி²கோ, ஸம்ஸுத்³தா⁴ய ப்³ராஹ்மணியா ஏவ குச்சி²ஸ்மிம் நிப்³ப³த்தோதி அதி⁴ப்பாயோ. ‘‘ஸமவேபாகினியா க³ஹணியா’’திஆதீ³ஸு ஹி உத³ரக்³கி³ ‘‘க³ஹணீ’’தி வுச்சதி. இத⁴ பன மாதுகுச்சி². யாவ ஸத்தமாதி மாது மாதா, பிது பிதாதி ஏவம் படிலோமேன யாவ ஸத்த ஜாதியோ. ஏத்த² ச பிதாமஹோ ச பிதாமஹீ ச பிதாமஹா, ததா² மாதாமஹோ ச மாதாமஹீ ச மாதாமஹா, பிதாமஹா ச மாதாமஹா ச பிதாமஹாயேவ. பிதாமஹானம் யுக³ம் பிதாமஹயுக³ம். யுக³ந்தி ஆயுப்பமாணம். அபி⁴லாபமத்தமேவ சேதம், அத்த²தோ பன பிதாமஹாயேவ பிதாமஹயுக³ம். அக்கி²த்தோதி ஜாதிம் ஆரப்³ப⁴ ‘‘கிம் ஸோ’’தி கேனசி அனவஞ்ஞாதோ. அனுபக்குட்டோ²தி ஜாதிஸந்தோ³ஸவாதே³ன அனுபக்குட்ட²புப்³போ³. வதஸம்பன்னோதி ஆசாரஸம்பன்னோ. ஸஞ்ஞாபேதுந்தி ஞாபேதும் போ³தே⁴தும், நிரந்தரம் காதுந்தி வுத்தம் ஹோதி. ஆயாமாதி க³ச்சா²ம.

600. அனுஞ்ஞாதபடிஞ்ஞாதாதி ‘‘தேவிஜ்ஜா தும்ஹே’’தி ஏவம் மயம் ஆசரியேஹி ச அனுஞ்ஞாதா அத்தனா ச படிஜானிம்ஹாதி அத்தோ². அஸ்மாதி ப⁴வாம. உபோ⁴தி த்³வேபி ஜனா. அஹம் போக்க²ரஸாதிஸ்ஸ, தாருக்க²ஸ்ஸாயம் மாணவோதி அஹம் போக்க²ரஸாதிஸ்ஸ ஜேட்ட²ந்தேவாஸீ அக்³க³ஸிஸ்ஸோ, அயம் தாருக்க²ஸ்ஸாதி அதி⁴ப்பாயேன ப⁴ணதி ஆசரியஸம்பத்திம் அத்தனோ ஸம்பத்திஞ்ச தீ³பேந்தோ.

601. தேவிஜ்ஜானந்தி திவேதா³னம். கேவலினோதி நிட்ட²ங்க³தா. அஸ்மஸேதி அம்ஹ ப⁴வாம. இதா³னி தம் கேவலிபா⁴வம் வித்தா²ரேந்தோ ஆஹ – ‘‘பத³கஸ்மா…பே… ஸாதி³ஸா’’தி. தத்த² ஜப்பேதி வேதே³. கம்முனாதி த³ஸவிதே⁴ன குஸலகம்மபத²கம்முனா. அயஞ்ஹி புப்³பே³ ஸத்தவித⁴ம் காயவசீகம்மம் ஸந்தா⁴ய ‘‘யதோ கோ² போ⁴ ஸீலவா ஹோதீ’’தி ஆஹ. திவித⁴ம் மனோகம்மம் ஸந்தா⁴ய ‘‘வதஸம்பன்னோ’’தி ஆஹ. தேன ஸமன்னாக³தோ ஹி ஆசாரஸம்பன்னோ ஹோதி.

602-5. இதா³னி தம் வசனந்தரேன த³ஸ்ஸேந்தோ ஆஹ – ‘‘அஹஞ்ச கம்முனா ப்³ரூமீ’’தி. க²யாதீதந்தி ஊனபா⁴வம் அதீதம், பரிபுண்ணந்தி அத்தோ². பேச்சாதி உபக³ந்த்வா. நமஸ்ஸந்தீதி நமோ கரோந்தி. சக்கு²ம் லோகே ஸமுப்பன்னந்தி அவிஜ்ஜந்த⁴காரே லோகே, தம் அந்த⁴காரம் வித⁴மித்வா லோகஸ்ஸ தி³ட்ட²த⁴ம்மிகாதி³அத்த²ஸந்த³ஸ்ஸனேன சக்கு² ஹுத்வா ஸமுப்பன்னம்.

606. ஏவம் அபி⁴த்த²வித்வா வாஸேட்டே²ன யாசிதோ ப⁴க³வா த்³வேபி ஜனே ஸங்க³ண்ஹந்தோ ஆஹ – ‘‘தேஸம் வோ அஹம் ப்³யக்கி²ஸ்ஸ’’ந்திஆதி³. தத்த² ப்³யக்கி²ஸ்ஸந்தி ப்³யாகரிஸ்ஸாமி. அனுபுப்³ப³ந்தி திட்ட²து தாவ ப்³ராஹ்மணசிந்தா, கீடபடங்க³திணருக்க²தோ பபு⁴தி வோ அனுபுப்³ப³ம் ப்³யக்கி²ஸ்ஸந்தி ஏவமேத்த² அதி⁴ப்பாயோ வேதி³தப்³போ³, ஏவம் வித்தா²ரகதா²ய வினேதப்³பா³ ஹி தே மாணவகா. ஜாதிவிப⁴ங்க³ந்தி ஜாதிவித்தா²ரம். அஞ்ஞமஞ்ஞா ஹி ஜாதியோதி தேஸம் தேஸஞ்ஹி பாணானம் ஜாதியோ அஞ்ஞா அஞ்ஞா நானப்பகாராதி அத்தோ².

607. ததோ பாணானம் ஜாதிவிப⁴ங்கே³ கதே²தப்³பே³ ‘‘திணருக்கே²பி ஜானாதா²’’தி அனுபாதி³ன்னகானம் தாவ கதே²தும் ஆரத்³தோ⁴. தம் கிமத்த²மிதி சே? உபாதி³ன்னேஸு ஸுக²ஞாபனத்த²ம். அனுபாதி³ன்னேஸு ஹி ஜாதிபே⁴தே³ க³ஹிதே உபாதி³ன்னேஸு ஸோ பாகடதரோ ஹோதி. தத்த² திணானி நாம அந்தோபே²க்³கூ³னி ப³ஹிஸாரானி. தஸ்மா தாலனாளிகேராத³யோபி திணஸங்க³ஹம் க³ச்ச²ந்தி. ருக்கா² நாம ப³ஹிபே²க்³கூ³ அந்தோஸாரா. திணானி ச ருக்கா² ச திணருக்கா². தே உபயோக³ப³ஹுவசனேன த³ஸ்ஸேந்தோ ஆஹ – ‘‘திணருக்கே²பி ஜானாதா²’’தி. ந சாபி படிஜானரேதி ‘‘மயம் திணா, மயம் ருக்கா²’’தி ஏவம்பி ந படிஜானந்தி. லிங்க³ம் ஜாதிமயந்தி அபடிஜானந்தானம்பி ச தேஸம் ஜாதிமயமேவ ஸண்டா²னம் அத்தனோ மூலபூ⁴ததிணாதி³ஸதி³ஸமேவ ஹோதி. கிம் காரணம்? அஞ்ஞமஞ்ஞா ஹி ஜாதியோ, யஸ்மா அஞ்ஞா திணஜாதி, அஞ்ஞா ருக்க²ஜாதி; திணேஸுபி அஞ்ஞா தாலஜாதி, அஞ்ஞா நாளிகேரஜாதீதி ஏவம் வித்தா²ரேதப்³ப³ம்.

தேன கிம் தீ³பேதி? யம் ஜாதிவஸேன நானா ஹோதி, தம் அத்தனோ படிஞ்ஞம் பரேஸம் வா உபதே³ஸம் வினாபி அஞ்ஞஜாதிதோ விஸேஸேன க³ய்ஹதி. யதி³ ச ஜாதியா ப்³ராஹ்மணோ ப⁴வேய்ய, ஸோபி அத்தனோ படிஞ்ஞம் பரேஸம் வா உபதே³ஸம் வினா க²த்தியதோ வேஸ்ஸஸுத்³த³தோ வா விஸேஸேன க³ய்ஹேய்ய, ந ச க³ய்ஹதி, தஸ்மா ந ஜாதியா ப்³ராஹ்மணோதி. பரதோ பன ‘‘யதா² ஏதாஸு ஜாதீஸூ’’தி இமாய கா³தா²ய ஏதமத்த²ம் வசீபே⁴தே³னேவ ஆவிகரிஸ்ஸதி.

608. ஏவம் அனுபாதி³ன்னேஸு ஜாதிபே⁴த³ம் த³ஸ்ஸேத்வா உபாதி³ன்னேஸு தம் த³ஸ்ஸேந்தோ ‘‘ததோ கீடே’’தி ஏவமாதி³மாஹ. தத்த² கீடாதி கிமயோ. படங்கா³தி படங்கா³யேவ. யாவ குந்த²கிபில்லிகேதி குந்த²கிபில்லிகம் பரியந்தம் கத்வாதி அத்தோ².

609. கு²த்³த³கேதி காளககண்ட³காத³யோ. மஹல்லகேதி ஸஸபி³ளாராத³யோ. ஸப்³பே³ ஹி தே அனேகவண்ணா.

610. பாதூ³த³ரேதி உத³ரபாதே³, உத³ரம்யேவ யேஸம் பாதா³தி வுத்தம் ஹோதி. தீ³க⁴பிட்டி²கேதி ஸப்பானஞ்ஹி ஸீஸதோ யாவ நங்கு³ட்டா² பிட்டி² ஏவ ஹோதி, தேன தே ‘‘தீ³க⁴பிட்டி²கா’’தி வுச்சந்தி. தேபி அனேகப்பகாரா ஆஸீவிஸாதி³பே⁴தே³ன.

611. ஓத³கேதி உத³கம்ஹி ஜாதே. மச்சா²பி அனேகப்பகாரா ரோஹிதமச்சா²தி³பே⁴தே³ன.

612. பக்கீ²தி ஸகுணே. தே ஹி பக்கா²னம் அத்தி²தாய ‘‘பக்கீ²’’தி வுச்சந்தி. பத்தேஹி யந்தீதி பத்தயானா. வேஹாஸே க³ச்ச²ந்தீதி விஹங்க³மா. தேபி அனேகப்பகாரா காகாதி³பே⁴தே³ன.

613. ஏவம் த²லஜலாகாஸகோ³சரானம் பாணானம் ஜாதிபே⁴த³ம் த³ஸ்ஸேத்வா இதா³னி யேனாதி⁴ப்பாயேன தம் த³ஸ்ஸேஸி, தம் ஆவிகரோந்தோ ‘‘யதா² ஏதாஸூ’’தி கா³த²மாஹ. தஸ்ஸத்தோ² ஸங்கே²பதோ புப்³பே³ வுத்தாதி⁴ப்பாயவண்ணனாவஸேனேவ வேதி³தப்³போ³.

614-6. வித்தா²ரதோ பனேத்த² யம் வத்தப்³ப³ம், தம் ஸயமேவ த³ஸ்ஸேந்தோ ‘‘ந கேஸேஹீ’’திஆதி³மாஹ. தத்ராயம் யோஜனா – யம் வுத்தம் ‘‘நத்தி² மனுஸ்ஸேஸு லிங்க³ம் ஜாதிமயம் புதூ²’’தி, தம் ஏவம் நத்தீ²தி வேதி³தப்³ப³ம். ஸேய்யதி²த³ம், ந கேஸேஹீதி. ந ஹி ‘‘ப்³ராஹ்மணானம் ஈதி³ஸா கேஸா ஹோந்தி, க²த்தியானம் ஈதி³ஸா’’தி நியமோ அத்தி² யதா² ஹத்தி²அஸ்ஸமிகா³தீ³னந்தி இமினா நயேன ஸப்³ப³ம் யோஜேதப்³ப³ம். லிங்க³ம் ஜாதிமயம் நேவ, யதா² அஞ்ஞாஸு ஜாதிஸூதி இத³ம் பன வுத்தஸ்ஸேவத்த²ஸ்ஸ நிக³மனந்தி வேதி³தப்³ப³ம். தஸ்ஸ யோஜனா – ததே³வ யஸ்மா இமேஹி கேஸாதீ³ஹி நத்தி² மனுஸ்ஸேஸு லிங்க³ம் ஜாதிமயம் புது², தஸ்மா வேதி³தப்³ப³மேதம் ‘‘ப்³ராஹ்மணாதி³பே⁴தே³ஸு மனுஸ்ஸேஸு லிங்க³ம் ஜாதிமயம் நேவ யதா² அஞ்ஞாஸு ஜாதீஸூ’’தி.

617. இதா³னி ஏவம் ஜாதிபே⁴தே³ அஸந்தேபி ப்³ராஹ்மணோ க²த்தியோதி இத³ம் நானத்தம் யதா² ஜாதம், தம் த³ஸ்ஸேதும் ‘‘பச்சத்த’’ந்தி கா³த²மாஹ. தஸ்ஸத்தோ² – ஏதம் திரச்சா²னானம் விய யோனிஸித்³த⁴மேவ கேஸாதி³ஸண்டா²னானத்தம் மனுஸ்ஸேஸு ப்³ராஹ்மணாதீ³னம் அத்தனோ அத்தனோ ஸரீரேஸு ந விஜ்ஜதி. அவிஜ்ஜமானேபி பன ஏதஸ்மிம் யதே³தம் ப்³ராஹ்மணோ க²த்தியோதி நானத்தவிதா⁴னபரியாயம் வோகாரம், தம் வோகாரஞ்ச மனுஸ்ஸேஸு ஸமஞ்ஞாய பவுச்சதி, வோஹாரமத்தேன வுச்சதீதி.

619-625. ஏத்தாவதா ப⁴க³வா பா⁴ரத்³வாஜஸ்ஸ வாத³ம் நிக்³க³ஹேத்வா இதா³னி யதி³ ஜாதியா ப்³ராஹ்மணோ ப⁴வேய்ய, ஆஜீவஸீலாசாரவிபன்னோபி ப்³ராஹ்மணோ ப⁴வேய்ய. யஸ்மா பன போராணா ப்³ராஹ்மணா தஸ்ஸ ப்³ராஹ்மணபா⁴வம் ந இச்ச²ந்தி லோகே ச அஞ்ஞேபி பண்டி³தமனுஸ்ஸா, தஸ்மா வாஸேட்ட²ஸ்ஸ வாத³பக்³க³ஹணத்த²ம் தம் த³ஸ்ஸேந்தோ ‘‘யோ ஹி கோசி மனுஸ்ஸேஸூ’’திஆதி³கா அட்ட² கா³தா²யோ ஆஹ. தத்த² கோ³ரக்க²ந்தி கே²த்தரக்க²ம், கஸிகம்மந்தி வுத்தம் ஹோதி. பத²வீ ஹி ‘‘கோ³’’தி வுச்சதி, தப்பபே⁴தோ³ ச கே²த்தம். புது²ஸிப்பேனாதி தந்தவாயகம்மாதி³னானாஸிப்பேன. வோஹாரந்தி வணிஜ்ஜம். பரபேஸ்ஸேனாதி பரேஸம் வேய்யாவச்சேன. இஸ்ஸத்த²ந்தி ஆவுத⁴ஜீவிகம், உஸுஞ்ச ஸத்திஞ்சாதி வுத்தம் ஹோதி. போரோஹிச்சேனாதி புரோஹிதகம்மேன.

626. ஏவம் ப்³ராஹ்மணஸமயேன ச லோகவோஹாரேன ச ஆஜீவஸீலாசாரவிபன்னஸ்ஸ அப்³ராஹ்மணபா⁴வம் ஸாதே⁴த்வா ஏவம் ஸந்தே ந ஜாதியா ப்³ராஹ்மணோ, கு³ணேஹி பன ப்³ராஹ்மணோ ஹோதி. தஸ்மா யத்த² யத்த² குலே ஜாதோ யோ கு³ணவா, ஸோ ப்³ராஹ்மணோ, அயமேத்த² ஞாயோதி ஏவமேதம் ஞாயம் அத்த²தோ ஆபாதே³த்வா புன ததே³வ ஞாயம் வசீபே⁴தே³ன பகாஸேந்தோ ஆஹ ‘‘ந சாஹம் ப்³ராஹ்மணம் ப்³ரூமீ’’தி.

தஸ்ஸத்தோ² – அஹம் பன ய்வாயம் சதூஸு யோனீஸு யத்த² கத்த²சி ஜாதோ, தத்ராபி வா விஸேஸேன யோ ப்³ராஹ்மணஸமஞ்ஞிதாய மாதரி ஸம்பூ⁴தோ, தம் யோனிஜம் மத்திஸம்ப⁴வம் யா சாயம் ‘‘உப⁴தோ ஸுஜாதோ’’திஆதி³னா (தீ³. நி. 1.303; ம. நி. 2.424) நயேன ப்³ராஹ்மணேஹி ப்³ராஹ்மணஸ்ஸ பரிஸுத்³த⁴உப்பத்திமக்³க³ஸங்கா²தா யோனி கதீ²யதி, ‘‘ஸம்ஸுத்³த⁴க³ஹணிகோ’’தி இமினா ச மாதுஸம்பத்தி, ததோபி ஜாதஸம்பூ⁴தத்தா ‘‘யோனிஜோ மத்திஸம்ப⁴வோ’’தி ச வுச்சதி, தம்பி யோனிஜம் மத்திஸம்ப⁴வம் இமினா ச யோனிஜமத்திஸம்ப⁴வமத்தேன ப்³ராஹ்மணம் ந ப்³ரூமி. கஸ்மா? யஸ்மா ‘‘போ⁴ போ⁴’’தி வசனமத்தேன அஞ்ஞேஹி ஸகிஞ்சனேஹி விஸிட்ட²த்தா போ⁴வாதீ³ நாம ஸோ ஹோதி, ஸசே ஹோதி ஸகிஞ்சனோ. யோ பனாயம் யத்த² கத்த²சி குலே ஜாதோபி ராகா³தி³கிஞ்சனாபா⁴வேன அகிஞ்சனோ, ஸப்³ப³க³ஹணபடினிஸ்ஸக்³கே³ன ச அனாதா³னோ, அகிஞ்சனம் அனாதா³னம் தமஹம் ப்³ரூமி ப்³ராஹ்மணம். கஸ்மா? யஸ்மா பா³ஹிதபாபோதி.

627. கிஞ்ச பி⁴ய்யோ – ‘‘ஸப்³ப³ஸம்யோஜனம் சே²த்வா’’திஆதி³கா ஸத்தவீஸதி கா³தா². தத்த² ஸப்³ப³ஸம்யோஜனந்தி த³ஸவித⁴ம் ஸம்யோஜனம். ந பரிதஸ்ஸதீதி தண்ஹாய ந தஸ்ஸதி. தமஹந்தி தம் அஹம் ராகா³தீ³னம் ஸங்கா³னம் அதிக்கந்தத்தா ஸங்கா³திக³ம், சதுன்னம்பி யோகா³னம் அபா⁴வேன விஸம்யுத்தம் ப்³ராஹ்மணம் வதா³மீதி அத்தோ².

628. நத்³தி⁴ந்தி நய்ஹனபா⁴வேன பவத்தம் கோத⁴ம். வரத்தந்தி ப³ந்த⁴னபா⁴வேன பவத்தம் தண்ஹம். ஸந்தா³னம் ஸஹனுக்கமந்தி அனுஸயானுக்கமஸஹிதம் த்³வாஸட்டி²தி³ட்டி²ஸந்தா³னம், இத³ம் ஸப்³ப³ம்பி சி²ந்தி³த்வா டி²தம் அவிஜ்ஜாபலிக⁴ஸ்ஸ உக்கி²த்தத்தா உக்கி²த்தபலிக⁴ம் சதுன்னம் ஸச்சான்னம் பு³த்³த⁴த்தா பு³த்³த⁴ம் அஹம் ப்³ராஹ்மணம் வதா³மீதி அத்தோ².

629. அது³ட்டோ²தி ஏவம் த³ஸஹி அக்கோஸவத்தூ²ஹி அக்கோஸஞ்ச பாணிஆதீ³ஹி போத²னஞ்ச அந்து³ப³ந்த⁴னாதீ³ஹி ப³ந்த⁴னஞ்ச யோ அகுத்³த⁴மானஸோ ஹுத்வா அதி⁴வாஸேஸி, க²ந்திப³லேன ஸமன்னாக³தத்தா க²ந்தீப³லம், புனப்புனம் உப்பத்தியா அனீகபூ⁴தேன தேனேவ க²ந்தீப³லானீகேன ஸமன்னாக³தத்தா ப³லானீகம் தம் ஏவரூபம் அஹம் ப்³ராஹ்மணம் வதா³மீதி அத்தோ².

630. வதந்தந்தி து⁴தவதேன ஸமன்னாக³தம், சதுபாரிஸுத்³தி⁴ஸீலேன ஸீலவந்தம், தண்ஹாஉஸ்ஸதா³பா⁴வேன அனுஸ்ஸத³ம், ச²ளிந்த்³ரியத³மனேன த³ந்தம், கோடியம் டி²தேன அத்தபா⁴வேன அந்திமஸாரீரம் தமஹம் ப்³ராஹ்மணம் வதா³மீதி அத்தோ².

631. யோ ந லிம்பதீதி ஏவமேவ யோ அப்³ப⁴ந்தரே து³விதே⁴பி காமே ந லிம்பதி, தஸ்மிம் காமே ந ஸண்டா²தி, தமஹம் ப்³ராஹ்மணம் வதா³மீதி அத்தோ².

632. து³க்க²ஸ்ஸாதி க²ந்த⁴து³க்க²ஸ்ஸ. பன்னபா⁴ரந்தி ஓஹிதக்க²ந்த⁴பா⁴ரம் சதூஹி யோகே³ஹி ஸப்³ப³கிலேஸேஹி வா விஸம்யுத்தம் தமஹம் ப்³ராஹ்மணம் வதா³மீதி அத்தோ².

633. க³ம்பீ⁴ரபஞ்ஞந்தி க³ம்பீ⁴ரேஸு க²ந்தா⁴தீ³ஸு பவத்தாய பஞ்ஞாய ஸமன்னாக³தம், த⁴ம்மோஜபஞ்ஞாய மேதா⁴விம், ‘‘அயம் து³க்³க³தியா, அயம் ஸுக³தியா, அயம் நிப்³பா³னஸ்ஸ மக்³கோ³, அயம் அமக்³கோ³’’தி ஏவம் மக்³கே³ அமக்³கே³ ச சே²கதாய மக்³கா³மக்³க³ஸ்ஸ கோவித³ம், அரஹத்தஸங்கா²தம் உத்தமத்த²மனுப்பத்தம் தமஹம் ப்³ராஹ்மணம் வதா³மீதி அத்தோ².

634. அஸம்ஸட்ட²ந்தி த³ஸ்ஸனஸவனஸமுல்லாபபரிபோ⁴க³காயஸம்ஸக்³கா³னம் அபா⁴வேன அஸம்ஸட்ட²ம். உப⁴யந்தி கி³ஹீஹி ச அனகா³ரேஹி சாதி உப⁴யேஹிபி அஸம்ஸட்ட²ம். அனோகஸாரிந்தி அனாலயசாரிம், தம் ஏவரூபம் அஹம் ப்³ராஹ்மணம் வதா³மீதி அத்தோ².

635. நிதா⁴யாதி நிக்கி²பித்வா ஓரோபேத்வா. தஸேஸு தா²வரேஸு சாதி தண்ஹாதாஸேன தஸேஸு தண்ஹாபா⁴வேன தி²ரதாய தா²வரேஸு. யோ ந ஹந்தீதி யோ ஏவம் ஸப்³ப³ஸத்தேஸு விக³தபடிக⁴தாய நிக்கி²த்தத³ண்டோ³ நேவ கஞ்சி ஸயம் ஹனதி, ந அஞ்ஞேன கா⁴தேதி, தமஹம் ப்³ராஹ்மணம் வதா³மீதி அத்தோ².

636. அவிருத்³த⁴ந்தி ஆகா⁴தவஸேன விருத்³தே⁴ஸுபி லோகியமஹாஜனேஸு ஆகா⁴தாபா⁴வேன அவிருத்³த⁴ம், ஹத்த²க³தே த³ண்டே³ வா ஸத்தே² வா அவிஜ்ஜமானேபி பரேஸம் பஹாரதா³னதோ அவிரதத்தா அத்தத³ண்டே³ஸு ஜனேஸு நிப்³பு³தம் நிக்கி²த்தத³ண்ட³ம், பஞ்சன்னம் க²ந்தா⁴னம் ‘‘அஹம் மம’’ந்தி க³ஹிதத்தா ஸாதா³னேஸு, தஸ்ஸ க³ஹணஸ்ஸ அபா⁴வேன அனாதா³னம் தம் ஏவரூபம் அஹம் ப்³ராஹ்மணம் வதா³மீதி அத்தோ².

637. ஆரக்³கா³தி யஸ்ஸேதே ராகா³த³யோ அயஞ்ச பரகு³ணமக்க²ணலக்க²ணோ மக்கோ² ஆரக்³கா³ ஸாஸபோ விய பபதிதோ, யதா² ஸாஸபோ ஆரக்³கே³ ந ஸந்திட்ட²தி, ஏவம் சித்தே ந திட்ட²தி, தமஹம் ப்³ராஹ்மணம் வதா³மீதி அத்தோ².

638. அகக்கஸந்தி அப²ருஸம். விஞ்ஞாபனிந்தி அத்த²விஞ்ஞாபனிம். ஸச்சந்தி பூ⁴தம். நாபி⁴ஸஜேதி யாய கி³ராய அஞ்ஞம் குஜ்ஜா²பனவஸேன ந லக்³கா³பேய்ய. கீ²ணாஸவோ நாம ஏவரூபமேவ கி³ரம் பா⁴ஸேய்ய. தஸ்மா தமஹம் ப்³ராஹ்மணம் வதா³மீதி அத்தோ².

639. ஸாடகாப⁴ரணாதீ³ஸு தீ³க⁴ம் வா ரஸ்ஸம் வா, மணிமுத்தாதீ³ஸு அணும் வா தூ²லம் வா மஹக்³க⁴அப்பக்³க⁴வஸேன ஸுப⁴ம் வா அஸுப⁴ம் வா யோ புக்³க³லோ இமஸ்மிம் லோகே பரபரிக்³க³ஹிதம் நாதி³யதி, தமஹம் ப்³ராஹ்மணம் வதா³மீதி அத்தோ².

640. நிராஸாஸந்தி நித்தண்ஹம். விஸம்யுத்தந்தி ஸப்³ப³கிலேஸேஹி வியுத்தம் தமஹம் ப்³ராஹ்மணம் வதா³மீதி அத்தோ².

641. ஆலயாதி தண்ஹா. அஞ்ஞாய அகத²ம்கதீ²தி அட்ட² வத்தூ²னி யதா²பூ⁴தம் ஜானித்வா அட்ட²வத்து²காய விசிகிச்சா²ய நிப்³பி³சிகிச்சோ². அமதோக³த⁴மனுப்பத்தந்தி அமதம் நிப்³பா³னம் ஓக³ஹேத்வா அனுப்பத்தம் தமஹம் ப்³ராஹ்மணம் வதா³மீதி அத்தோ².

642. உபோ⁴தி த்³வேபி புஞ்ஞானி பாபானி ச ச²ட்³டே³த்வாதி அத்தோ². ஸங்க³ந்தி ராகா³தி³பே⁴த³ம் ஸங்க³ம். உபச்சகா³தி அதிக்கந்தோ. தமஹம் வட்டமூலஸோகேன அஸோகம், அப்³ப⁴ந்தரே ராக³ரஜாதீ³னம் அபா⁴வேன விரஜம், நிருபக்கிலேஸதாய ஸுத்³த⁴ம் ப்³ராஹ்மணம் வதா³மீதி அத்தோ².

643. விமலந்தி அப்³பா⁴தி³மலவிரஹிதம். ஸுத்³த⁴ந்தி நிருபக்கிலேஸம். விப்பஸன்னந்தி பஸன்னசித்தம். அனாவிலந்தி கிலேஸாவிலத்தவிரஹிதம். நந்தீ³ப⁴வபரிக்கீ²ணந்தி தீஸு ப⁴வேஸு பரிக்கீ²ணதண்ஹம் தமஹம் ப்³ராஹ்மணம் வதா³மீதி அத்தோ².

644. யோ பி⁴க்கு² இமம்ராக³பலிபத²ஞ்சேவ கிலேஸது³க்³க³ஞ்ச ஸம்ஸாரவட்டஞ்ச சதுன்னம் ஸச்சானம் அப்படிவிஜ்ஜ²னகமோஹஞ்ச அதீதோ, சத்தாரோ ஓகே⁴ திண்ணோ ஹுத்வா பாரம் அனுப்பத்தோ, து³விதே⁴ன ஜா²னேன ஜா²யீ, தண்ஹாய அபா⁴வேன அனேஜோ, கத²ம்கதா²ய அபா⁴வேன அகத²ம்கதீ², உபாதா³னானம் அபா⁴வேன அனுபாதி³யித்வா கிலேஸனிப்³பா³னேன நிப்³பு³தோ, தமஹம் ப்³ராஹ்மணம் வதா³மீதி அத்தோ².

645. யோ புக்³க³லோ, இத⁴ லோகே, உபோ⁴பி காமே ஹித்வா அனாகா³ரோ ஹுத்வா பரிப்³ப³ஜதி, தம் பரிக்கீ²ணகாமஞ்சேவ பரிக்கீ²ணப⁴வஞ்ச அஹம் ப்³ராஹ்மணம் வதா³மீதி அத்தோ².

646. யோ இத⁴ லோகே ச²த்³வாரிகம் தண்ஹம் ஜஹித்வா க⁴ராவாஸேன அனத்தி²கோ அனாகா³ரோ ஹுத்வா பரிப்³ப³ஜதி, தண்ஹாய சேவ ப⁴வஸ்ஸ ச பரிக்கீ²ணத்தா தண்ஹாப⁴வபரிக்கீ²ணம் தமஹம் ப்³ராஹ்மணம் வதா³மீதி அத்தோ².

647. மானுஸகம் யோக³ந்தி மானுஸகம் ஆயுஞ்சேவ பஞ்சவித⁴காமகு³ணே ச. தி³ப்³ப³யோகே³பி ஏஸேவ நயோ. உபச்சகா³தி யோ மானுஸகம் யோக³ம் ஹித்வா தி³ப்³ப³ம் அதிக்கந்தோ, தம் ஸப்³பே³ஹி சதூஹி யோகே³ஹி விஸம்யுத்தம் அஹம் ப்³ராஹ்மணம் வதா³மீதி அத்தோ².

648. ரதிந்தி பஞ்சகாமகு³ணரதிம். அரதிந்தி அரஞ்ஞவாஸே உக்கண்டி²தத்தம். ஸீதிபூ⁴தந்தி நிப்³பு³தம், நிருபதி⁴ந்தி நிருபக்கிலேஸம், வீரந்தி தம் ஏவரூபம் ஸப்³ப³ம் க²ந்த⁴லோகம் அபி⁴ப⁴வித்வா டி²தம் வீரியவந்தம் அஹம் ப்³ராஹ்மணம் வதா³மீதி அத்தோ².

649. யோ வேதீ³தி யோ ஸத்தானம் ஸப்³பா³காரேன சுதிஞ்ச படிஸந்தி⁴ஞ்ச பாகடம் கத்வா ஜானாதி, தமஹம் அலக்³க³தாய அஸத்தம், படிபத்தியா ஸுட்டு² க³தத்தா ஸுக³தம், சதுன்னம் ஸச்சானம் பு³த்³த⁴தாய பு³த்³த⁴ம் ப்³ராஹ்மணம் வதா³மீதி அத்தோ².

650. யஸ்ஸாதி யஸ்ஸேதே தே³வாத³யோ க³திம் ந ஜானந்தி, தமஹம் ஆஸவானம் கீ²ணதாய கீ²ணாஸவம், கிலேஸேஹி ஆரகத்தா அரஹந்தம் ப்³ராஹ்மணம் வதா³மீதி அத்தோ².

651. புரேதி அதீதக்க²ந்தே⁴ஸு. பச்சா²தி அனாக³தேஸு. மஜ்ஜே²தி பச்சுப்பன்னேஸு. கிஞ்சனந்தி யஸ்ஸேதேஸு டா²னேஸு தண்ஹாகா³ஹஸங்கா²தம் கிஞ்சனம் நத்தி². தமஹம் ராக³கிஞ்சனாதீ³ஹி அகிஞ்சனம். கஸ்ஸசி க³ஹணஸ்ஸ அபா⁴வேன அனாதா³னம் ப்³ராஹ்மணம் வதா³மீதி அத்தோ².

652. அச்ச²ம்பி⁴தத்தேன உஸப⁴ஸதி³ஸதாய உஸப⁴ம், உத்தமட்டே²ன பவரம், வீரியஸம்பத்தியா வீரம், மஹந்தானம் ஸீலக்க²ந்தா⁴தீ³னம் ஏஸிதத்தா மஹேஸிம், திண்ணம் மாரானம் விஜிதத்தா விஜிதாவினம், நின்ஹாதகிலேஸதாய ந்ஹாதகம், சதுஸச்சபு³த்³த⁴தாய பு³த்³த⁴ம் தம் ஏவரூபம் ப்³ராஹ்மணம் வதா³மீதி அத்தோ².

653. யோ புப்³பே³னிவாஸம் பாகடம் கத்வா ஜானாதி, ச²ப்³பீ³ஸதிதே³வலோகபே⁴த³ம் ஸக்³க³ம், சதுப்³பி³த⁴ம் அபாயஞ்ச தி³ப்³ப³சக்கு²னா பஸ்ஸதி, அதோ² ஜாதிக்க²யஸங்கா²தம் அரஹத்தம் பத்தோ, தமஹம் ப்³ராஹ்மணம் வதா³மீதி அத்தோ².

654. ஏவம் ப⁴க³வா கு³ணதோ ப்³ராஹ்மணம் வத்வா ‘‘யே ‘ஜாதிதோ ப்³ராஹ்மணோ’தி அபி⁴னிவேஸம் கரோந்தி, தே இத³ம் வோஹாரமத்தம் அஜானந்தா, ஸா ச நேஸம் தி³ட்டி² து³த்³தி³ட்டீ²’’தி த³ஸ்ஸேந்தோ ‘‘ஸமஞ்ஞா ஹேஸா’’தி கா³தா²த்³வயமாஹ. தஸ்ஸத்தோ² – ‘‘யதி³த³ம் ப்³ராஹ்மணோ க²த்தியோ பா⁴ரத்³வாஜோ வாஸேட்டோ²’’தி நாமகோ³த்தம் பகப்பிதம், ஸமஞ்ஞா ஹேஸா லோகஸ்மிம், பஞ்ஞத்திவோஹாரமத்தந்தி வேதி³தப்³ப³ம். கஸ்மா? யஸ்மா ஸம்முச்சா ஸமுதா³க³தம் ஸமனுஞ்ஞாய ஆக³தம். தஞ்ஹி தத்த² தத்த² ஜாதகாலேயேவஸ்ஸ ஞாதிஸாலோஹிதேஹி பகப்பிதம் கதம். நோ சேதம் ஏவம் பகப்பேய்யும், ந கோசி கஞ்சி தி³ஸ்வா ‘‘அயம் ப்³ராஹ்மணோ’’தி வா ‘‘பா⁴ரத்³வாஜோ’’தி வா ஜானேய்ய.

655. ஏவம் பகப்பிதஞ்சேதம் தீ³க⁴ரத்தமனுஸயிதம் தி³ட்டி²க³தமஜானதம், ‘‘பகப்பிதம் நாமகோ³த்தம், நாமகோ³த்தமத்தமேதம் ஸம்வோஹாரத்த²ம் பகப்பித’’ந்தி அஜானந்தானம் ஸத்தானம் ஹத³யே தீ³க⁴ரத்தம் தி³ட்டி²க³தமனுஸயிதம், தஸ்ஸ அனுஸயிதத்தா தம் நாமகோ³த்தம் அஜானந்தா தே பப்³ருவந்தி ‘‘ஜாதியா ஹோதி ப்³ராஹ்மணோ’’தி, அஜானந்தாயேவ ஏவம் வத³ந்தீதி வுத்தம் ஹோதி.

656-7. ஏவம் ‘‘யே ‘ஜாதிதோ ப்³ராஹ்மணோ’தி அபி⁴னிவேஸம் கரோந்தி, தே இத³ம் வோஹாரமத்தமஜானந்தா, ஸா ச நேஸம் தி³ட்டி² து³த்³தி³ட்டீ²’’தி த³ஸ்ஸேத்வா இதா³னி நிப்பரியாயமேவ ஜாதிவாத³ம் படிக்கி²பந்தோ கம்மவாத³ஞ்ச நிரோபேந்தோ ‘‘ந ஜச்சா’’திஆதி³மாஹ. தத்த² ‘‘கம்முனா ப்³ராஹ்மணோ ஹோதி, கம்முனா ஹோதி அப்³ராஹ்மணோ’’தி இமிஸ்ஸா உபட்³ட⁴கா³தா²ய அத்த²வித்தா²ரணத்த²ம் ‘‘கஸ்ஸகோ கம்முனா’’திஆதி³ வுத்தம். தத்த² கம்முனாதி பச்சுப்பன்னேன கஸிகம்மாதி³னிப்³ப³த்தகசேதனாகம்முனா.

659. படிச்சஸமுப்பாத³த³ஸ்ஸாதி ‘‘இமினா பச்சயேன ஏவம் ஹோதீ’’தி ஏவம் படிச்சஸமுப்பாத³த³ஸ்ஸாவினோ. கம்மவிபாககோவிதா³தி ஸம்மானாவமானாரஹே குலே கம்மவஸேன உப்பத்தி ஹோதி, அஞ்ஞாபி ஹீனபணீததா ஹீனபணீதே கம்மே விபச்சமானே ஹோதீதி ஏவம் கம்மவிபாககுஸலா.

660. ‘‘கம்முனாவத்ததீ’’தி கா³தா²ய பன ‘‘லோகோ’’தி வா ‘‘பஜா’’தி வா ‘‘ஸத்தா’’தி வா ஏகோயேவ அத்தோ², வசனமத்தமேவ நானம். புரிமபதே³ன சேத்த² ‘‘அத்தி² ப்³ரஹ்மா மஹாப்³ரஹ்மா…பே… ஸேட்டோ² ஸஜிதா வஸீ பிதா பூ⁴தப⁴ப்³யான’’ந்தி (தீ³. நி. 1.42) இமிஸ்ஸா தி³ட்டி²யா நிஸேதோ⁴ வேதி³தப்³போ³. கம்முனா ஹி வத்ததி தாஸு தாஸு க³தீஸு உப்பஜ்ஜதி லோகோ, தஸ்ஸ கோ ஸஜிதாதி? து³தியேன ‘‘ஏவம் கம்முனா உப்பன்னோபி ச பவத்தியம்பி அதீதபச்சுப்பன்னபே⁴தே³ன கம்முனா ஏவ பவத்ததி, ஸுக²து³க்கா²னி பச்சனுபோ⁴ந்தோ ஹீனபணீதாதி³பா⁴வம் ஆபஜ்ஜந்தோ பவத்ததீ’’தி த³ஸ்ஸேதி. ததியேன தமேவத்த²ம் நிக³மேதி ‘‘ஏவம் ஸப்³ப³தா²பி கம்மனிப³ந்த⁴னா ஸத்தா கம்மேனேவ ப³த்³தா⁴ ஹுத்வா பவத்தந்தி, ந அஞ்ஞதா²’’தி. சதுத்தே²ன தமத்த²ம் உபமாய விபா⁴வேதி ரத²ஸ்ஸாணீவ யாயதோதி. யதா² ரத²ஸ்ஸ யாயதோ ஆணி நிப³ந்த⁴னம் ஹோதி, ந தாய அனிப³த்³தோ⁴ யாதி, ஏவம் லோகஸ்ஸ உப்பஜ்ஜதோ ச பவத்ததோ ச கம்மம் நிப³ந்த⁴னம், ந தேன அனிப³த்³தோ⁴ உப்பஜ்ஜதி நப்பவத்ததி.

661. இதா³னி யஸ்மா ஏவம் கம்மனிப³ந்த⁴னோ லோகோ, தஸ்மா ஸேட்டே²ன கம்முனா ஸேட்ட²பா⁴வம் த³ஸ்ஸேந்தோ ‘‘தபேனா’’தி கா³தா²த்³வயமாஹ. தத்த² தபேனாதி இந்த்³ரியஸம்வரேன. ப்³ரஹ்மசரியேனாதி ஸிக்கா²னிஸ்ஸிதேன வுத்தாவஸேஸஸேட்ட²சரியேன. ஸம்யமேனாதி ஸீலேன. த³மேனாதி பஞ்ஞாய. ஏதேன ஸேட்ட²ட்டே²ன ப்³ரஹ்மபூ⁴தேன கம்முனா ப்³ராஹ்மணோ ஹோதி. கஸ்மா? யஸ்மா ஏதம் ப்³ராஹ்மணமுத்தமம், யஸ்மா ஏதம் கம்மம் உத்தமோ ப்³ராஹ்மணபா⁴வோதி வுத்தம் ஹோதி. ‘‘ப்³ரஹ்மான’’ந்திபி பாடோ², தஸ்ஸத்தோ² – ப்³ரஹ்மம் ஆனேதீதி ப்³ரஹ்மானம், ப்³ரஹ்மபா⁴வம் ஆனேதி ஆவஹதி தே³தீதி வுத்தம் ஹோதி.

662. து³தியகா³தா²ய ஸந்தோதி ஸந்தகிலேஸோ. ப்³ரஹ்மா ஸக்கோதி ப்³ரஹ்மா ச ஸக்கோ ச. யோ ஏவரூபோ, ஸோ ந கேவலம் ப்³ராஹ்மணோ, அபிச கோ² ப்³ரஹ்மா ச ஸக்கோ ச ஸோ விஜானதம் பண்டி³தானம், ஏவம் வாஸேட்ட² ஜானாஹீதி வுத்தம் ஹோதி. ஸேஸம் வுத்தனயமேவாதி.

பரமத்த²ஜோதிகாய கு²த்³த³க-அட்ட²கதா²ய

ஸுத்தனிபாத-அட்ட²கதா²ய வாஸேட்ட²ஸுத்தவண்ணனா நிட்டி²தா.