10. கோகாலிகஸுத்தவண்ணனா

ஏவம் மே ஸுதந்தி கோகாலிகஸுத்தம். கா உப்பத்தி? இமஸ்ஸ ஸுத்தஸ்ஸ உப்பத்தி அத்த²வண்ணனாயமேவ ஆவி ப⁴விஸ்ஸதி. அத்த²வண்ணனாய சஸ்ஸ ஏவம் மே ஸுதந்திஆதி³ வுத்தனயமேவ. அத² கோ² கோகாலிகோதி ஏத்த² பன கோ அயம் கோகாலிகோ, கஸ்மா ச உபஸங்கமீதி? வுச்சதே – அயம் கிர கோகாலிகரட்டே² கோகாலிகனக³ரே கோகாலிகஸேட்டி²ஸ்ஸ புத்தோ பப்³ப³ஜித்வா பிதரா காராபிதே விஹாரேயேவ படிவஸதி ‘‘சூளகோகாலிகோ’’தி நாமேன, ந தே³வத³த்தஸ்ஸ ஸிஸ்ஸோ. ஸோ ஹி ப்³ராஹ்மணபுத்தோ ‘‘மஹாகோகாலிகோ’’தி பஞ்ஞாயி.

ப⁴க³வதி கிர ஸாவத்தி²யம் விஹரந்தே த்³வே அக்³க³ஸாவகா பஞ்சமத்தேஹி பி⁴க்கு²ஸதேஹி ஸத்³தி⁴ம் ஜனபத³சாரிகம் சரமானா உபகட்டா²ய வஸ்ஸூபனாயிகாய விவேகவாஸம் வஸிதுகாமா தே பி⁴க்கூ² உய்யோஜேத்வா அத்தனோ பத்தசீவரமாதா³ய தஸ்மிம் ஜனபதே³ தம் நக³ரம் பத்வா தம் விஹாரம் அக³மம்ஸு. தத்த² தே கோகாலிகேன ஸத்³தி⁴ம் ஸம்மோதி³த்வா தம் ஆஹம்ஸு – ‘‘ஆவுஸோ, மயம் இத⁴ தேமாஸம் வஸிஸ்ஸாம, மா கஸ்ஸசி ஆரோசேய்யாஸீ’’தி. ஸோ ‘‘ஸாதூ⁴’’தி படிஸ்ஸுணித்வா தேமாஸே அதீதே இதரதி³வஸம் பகே³வ நக³ரம் பவிஸித்வா ஆரோசேஸி – ‘‘தும்ஹே அக்³க³ஸாவகே இதா⁴க³ந்த்வா வஸமானே ந ஜானித்த², ந தே கோசி பச்சயேனாபி நிமந்தேதீ’’தி. நக³ரவாஸினோ ‘‘கஸ்மா நோ, ப⁴ந்தே, நாரோசயித்தா²’’தி. கிம் ஆரோசிதேன, கிம் நாத்³த³ஸத² த்³வே பி⁴க்கூ² வஸந்தே, நனு ஏதே அக்³க³ஸாவகாதி. தே கி²ப்பம் ஸன்னிபதித்வா ஸப்பிகு³ளவத்தா²தீ³னி ஆனேத்வா கோகாலிகஸ்ஸ புரதோ நிக்கி²பிம்ஸு. ஸோ சிந்தேஸி – ‘‘பரமப்பிச்சா² அக்³க³ஸாவகா ‘பயுத்தவாசாய உப்பன்னோ லாபோ⁴’தி ஞத்வா ந ஸாதி³யிஸ்ஸந்தி, அஸாதி³யந்தா அத்³தா⁴ ‘ஆவாஸிகஸ்ஸ தே³தா²’தி ப⁴ணிஸ்ஸந்தி, ஹந்தா³ஹம் இமம் லாப⁴ம் கா³ஹாபேத்வா க³ச்சா²மீ’’தி. ஸோ ததா² அகாஸி, தே²ரா தி³ஸ்வாவ பயுத்தவாசாய உப்பன்னபா⁴வம் ஞத்வா ‘‘இமே பச்சயா நேவ அம்ஹாகம் ந கோகாலிகஸ்ஸ வட்டந்தீ’’தி சிந்தேத்வா ‘‘ஆவாஸிகஸ்ஸ தே³தா²’’தி அவத்வா படிக்கி²பித்வா பக்கமிம்ஸு. தேன கோகாலிகோ ‘‘கத²ஞ்ஹி நாம அத்தனா அக்³க³ண்ஹந்தா மய்ஹம்பி ந தா³பேஸு’’ந்தி தோ³மனஸ்ஸம் உப்பாதே³ஸி.

தே ப⁴க³வதோ ஸந்திகம் அக³மம்ஸு. ப⁴க³வா ச பவாரேத்வா ஸசே அத்தனா ஜனபத³சாரிகம் ந க³ச்ச²தி, அக்³க³ஸாவகே பேஸேதி – ‘‘சரத², பி⁴க்க²வே, சாரிகம் ப³ஹுஜனஹிதாயா’’திஆதீ³னி (மஹாவ. 32) வத்வா. இத³மாசிண்ணம் ததா²க³தானம். தேன கோ² பன ஸமயேன அத்தனா அக³ந்துகாமோ ஹோதி. அத² கோ² இமே புனதே³வ உய்யோஜேஸி – ‘‘க³ச்ச²த², பி⁴க்க²வே, சரத² சாரிக’’ந்தி. தே பஞ்சமத்தேஹி பி⁴க்கு²ஸதேஹி ஸத்³தி⁴ம் சாரிகம் சரமானா அனுபுப்³பே³ன தஸ்மிம் ரட்டே² தமேவ நக³ரம் அக³மம்ஸு. நாக³ரா தே²ரே ஸஞ்ஜானித்வா ஸஹ பரிக்கா²ரேஹி தா³னம் ஸஜ்ஜேத்வா நக³ரமஜ்ஜே² மண்ட³பம் கத்வா தா³னம் அத³ம்ஸு, தே²ரானஞ்ச பரிக்கா²ரே உபனாமேஸும். தே²ரா க³ஹேத்வா பி⁴க்கு²ஸங்க⁴ஸ்ஸ அத³ம்ஸு. தம் தி³ஸ்வா கோகாலிகோ சிந்தேஸி – ‘‘இமே புப்³பே³ அப்பிச்சா² அஹேஸும், இதா³னி லோபா⁴பி⁴பூ⁴தா பாபிச்சா² ஜாதா, புப்³பே³பி அப்பிச்ச²ஸந்துட்ட²பவிவித்தஸதி³ஸா மஞ்ஞே, இமே பாபிச்சா² அஸந்தகு³ணபரிதீ³பகா பாபபி⁴க்கூ²’’தி. ஸோ தே²ரே உபஸங்கமித்வா ‘‘ஆவுஸோ, தும்ஹே புப்³பே³ அப்பிச்சா² ஸந்துட்டா² பவிவித்தா விய அஹுவத்த², இதா³னி பனத்த² பாபபி⁴க்கூ² ஜாதா’’தி வத்வா பத்தசீவரமாதா³ய தாவதே³வ தரமானரூபோ நிக்க²மித்வா க³ந்த்வா ‘‘ப⁴க³வதோ ஏதமத்த²ம் ஆரோசேஸ்ஸாமீ’’தி ஸாவத்தா²பி⁴முகோ² க³ந்த்வா அனுபுப்³பே³ன ப⁴க³வந்தம் உபஸங்கமி. அயமேத்த² கோகாலிகோ, இமினா காரணேன உபஸங்கமி. தேன வுத்தம் ‘‘அத² கோ² கோகாலிகோ பி⁴க்கு² யேன ப⁴க³வா தேனுபஸங்கமீ’’திஆதி³.

ப⁴க³வா தம் துரிததுரிதம் ஆக³ச்ச²ந்தம் தி³ஸ்வாவ ஆவஜ்ஜேத்வா அஞ்ஞாஸி – ‘‘அக்³க³ஸாவகே அக்கோஸிதுகாமோ ஆக³தோ’’தி. ‘‘ஸக்கா நு கோ² படிஸேதே⁴து’’ந்தி ச ஆவஜ்ஜேந்தோ ‘‘ந ஸக்கா, தே²ரேஸு அபரஜ்ஜி²த்வா ஆக³தோ, ஏகம்ஸேன பது³மனிரயே உப்பஜ்ஜிஸ்ஸதீ’’தி அத்³த³ஸ. ஏவம் தி³ஸ்வாபி பன ‘‘ஸாரிபுத்தமோக்³க³ல்லானேபி நாம க³ரஹந்தம் ஸுத்வா ந நிஸேதே⁴தீ’’தி பரூபவாத³மோசனத்த²ம் அரியூபவாத³ஸ்ஸ மஹாஸாவஜ்ஜபா⁴வத³ஸ்ஸனத்த²ஞ்ச ‘‘மா ஹேவ’’ந்திஆதி³னா நயேன திக்க²த்தும் படிஸேதே⁴ஸி. தத்த² மா ஹேவந்தி மா ஏவமாஹ, மா ஏவம் அப⁴ணீதி அத்தோ². பேஸலாதி பியஸீலா. ஸத்³தா⁴யிகோதி ஸத்³தா⁴க³மகரோ, பஸாதா³வஹோதி வுத்தம் ஹோதி. பச்சயிகோதி பச்சயகரோ, ‘‘ஏவமேத’’ந்தி ஸன்னிட்டா²வஹோதி வுத்தம் ஹோதி.

அசிரபக்கந்தஸ்ஸாதி பக்கந்தஸ்ஸ ஸதோ ந சிரேனேவ ஸப்³போ³ காயோ பு²டோ அஹோஸீதி கேஸக்³க³மத்தம்பி ஓகாஸம் அவஜ்ஜேத்வா ஸகலஸரீரம் அட்டீ²னி பி⁴ந்தி³த்வா உக்³க³தாஹி பீளகாஹி அஜ்ஜோ²த்த²டம் அஹோஸி. தத்த² யஸ்மா பு³த்³தா⁴னுபா⁴வேன ததா²ரூபம் கம்மம் பு³த்³தா⁴னம் ஸம்முகீ²பா⁴வே விபாகம் ந தே³தி, த³ஸ்ஸனூபசாரே பன விஜஹிதமத்தே தே³தி, தஸ்மா தஸ்ஸ அசிரபக்கந்தஸ்ஸ பீளகா உட்ட²ஹிம்ஸு. தேனேவ வுத்தம் ‘‘அசிரபக்கந்தஸ்ஸ ச கோகாலிகஸ்ஸா’’தி. அத² கஸ்மா தத்தே²வ ந அட்டா²ஸீதி சே? கம்மானுபா⁴வேன. ஓகாஸகதஞ்ஹி கம்மம் அவஸ்ஸம் விபச்சதி, தம் தஸ்ஸ தத்த² டா²தும் ந தே³தி. ஸோ கம்மானுபா⁴வேன சோதி³யமானோ உட்டா²யாஸனா பக்காமி. களாயமத்தியோதி சணகமத்தியோ. பே³லுவஸலாடுகமத்தியோதி தருணபே³லுவமத்தியோ. பபி⁴ஜ்ஜிம்ஸூதி பி⁴ஜ்ஜிம்ஸு. தாஸு பி⁴ன்னாஸு ஸகலஸரீரம் பனஸபக்கம் விய அஹோஸி. ஸோ பக்கேன க³த்தேன அனயப்³யஸனம் பத்வா து³க்கா²பி⁴பூ⁴தோ ஜேதவனத்³வாரகோட்ட²கே ஸயி. அத² த⁴ம்மஸ்ஸவனத்த²ம் ஆக³தாக³தா மனுஸ்ஸா தம் தி³ஸ்வா ‘‘தி⁴ கோகாலிக, தி⁴ கோகாலிக, அயுத்தமகாஸி, அத்தனோயேவ முக²ம் நிஸ்ஸாய அனயப்³யஸனம் பத்தோஸீ’’தி ஆஹம்ஸு. தேஸம் ஸுத்வா ஆரக்க²தே³வதா தி⁴க்காரம் அகம்ஸு, ஆரக்க²தே³வதானம் ஆகாஸட்ட²தே³வதாதி இமினா உபாயேன யாவ அகனிட்ட²ப⁴வனா ஏகதி⁴க்காரோ உத³பாதி³.

ததா³ ச துரூ நாம பி⁴க்கு² கோகாலிகஸ்ஸ உபஜ்ஜா²யோ அனாகா³மிப²லம் பத்வா ஸுத்³தா⁴வாஸேஸு நிப்³ப³த்தோ ஹோதி. ஸோபி ஸமாபத்தியா வுட்டி²தோ தம் தி⁴க்காரம் ஸுத்வா ஆக³ம்ம கோகாலிகம் ஓவதி³ ஸாரிபுத்தமோக்³க³ல்லானேஸு சித்தப்பஸாத³ஜனனத்த²ம். ஸோ தஸ்ஸாபி வசனம் அக்³க³ஹேத்வா அஞ்ஞத³த்து² தமேவ அபராதே⁴த்வா காலம் கத்வா பது³மனிரயே உப்பஜ்ஜி. தேனாஹ – ‘‘அத² கோ² கோகாலிகோ பி⁴க்கு² தேனேவாபா³தே⁴ன…பே… ஆகா⁴தேத்வா’’தி.

அத² கோ² ப்³ரஹ்மா ஸஹம்பதீதி கோ அயம் ப்³ரஹ்மா, கஸ்மா ச ப⁴க³வந்தம் உபஸங்கமித்வா ஏதத³வோசாதி? அயம் கஸ்ஸபஸ்ஸ ப⁴க³வதோ ஸாஸனே ஸஹகோ நாம பி⁴க்கு² அனாகா³மீ ஹுத்வா ஸுத்³தா⁴வாஸேஸு உப்பன்னோ, தத்த² நம் ‘‘ஸஹம்பதி ப்³ரஹ்மா’’தி ஸஞ்ஜானந்தி. ஸோ பன ‘‘அஹம் ப⁴க³வந்தம் உபஸங்கமித்வா பது³மனிரயம் கித்தேஸ்ஸாமி, ததோ ப⁴க³வா பி⁴க்கூ²னம் ஆரோசேஸ்ஸதி. கதா²னுஸந்தி⁴குஸலா பி⁴க்கூ² தத்தா²யுப்பமாணம் புச்சி²ஸ்ஸந்தி, ப⁴க³வா ஆசிக்க²ந்தோ அரியூபவாதே³ ஆதீ³னவம் பகாஸேஸ்ஸதீ’’தி இமினா காரணேன ப⁴க³வந்தம் உபஸங்கமித்வா ஏதத³வோச. ப⁴க³வா ததே²வ அகாஸி, அஞ்ஞதரோபி பி⁴க்கு² புச்சி². தேன ச புட்டோ² ‘‘ஸேய்யதா²பி பி⁴க்கூ²’’திஆதி³மாஹ.

தத்த² வீஸதிகா²ரிகோதி மாக³த⁴கேன பத்தே²ன சத்தாரோ பத்தா² கோஸலரட்டே² ஏகோ பத்தோ² ஹோதி, தேன பத்தே²ன சத்தாரோ பத்தா² ஆள்ஹகம், சத்தாரி ஆள்ஹகானி தோ³ணம், சதுதோ³ணா மானிகா, சதுமானிகா கா²ரீ, தாய கா²ரியா வீஸதிகா²ரிகோ. திலவாஹோதி திலஸகடம். அப்³பு³தோ³ நிரயோதி அப்³பு³தோ³ நாம கோசி பச்சேகனிரயோ நத்தி², அவீசிம்ஹியேவ அப்³பு³த³க³ணனாய பச்சனோகாஸோ பன ‘‘அப்³பு³தோ³ நிரயோ’’தி வுத்தோ. ஏஸ நயோ நிரப்³பு³தா³தீ³ஸு.

தத்த² வஸ்ஸக³ணனாபி ஏவம் வேதி³தப்³பா³ – யதே²வ ஹி ஸதம் ஸதஸஹஸ்ஸானி கோடி ஹோதி, ஏவம் ஸதம் ஸதஸஹஸ்ஸகோடியோ பகோடி நாம ஹோதி, ஸதம் ஸதஸஹஸ்ஸபகோடியோ கோடிப்பகோடி நாம, ஸதம் ஸதஸஹஸ்ஸகோடிப்பகோடியோ நஹுதம், ஸதம் ஸதஸஹஸ்ஸனஹுதானி நின்னஹுதம், ஸதம் ஸதஸஹஸ்ஸனின்னஹுதானி ஏகம் அப்³பு³த³ம், ததோ வீஸதிகு³ணம் நிரப்³பு³த³ம். ஏஸ நயோ ஸப்³ப³த்த². கேசி பன ‘‘தத்த² தத்த² பரிதே³வனானத்தேனபி கம்மகரணனானத்தேனபி இமானி நாமானி லத்³தா⁴னீ’’தி வத³ந்தி, அபரே ‘‘ஸீதனரகா ஏவ ஏதே’’தி.

அதா²பரந்தி தத³த்த²விஸேஸத்த²தீ³பகம் கா³தா²ப³ந்த⁴ம் ஸந்தா⁴ய வுத்தம். பாட²வஸேன வுத்தவீஸதிகா³தா²ஸு ஹி ஏத்த² ‘‘ஸதம் ஸஹஸ்ஸான’’ந்தி அயமேகா ஏவ கா³தா² வுத்தத்த²தீ³பிகா, ஸேஸா விஸேஸத்த²தீ³பிகா ஏவ, அவஸானே கா³தா²த்³வயமேவ பன மஹாஅட்ட²கதா²யம் வினிச்சி²தபாடே² நத்தி². தேனாவோசும்ஹ ‘‘வீஸதிகா³தா²ஸூ’’தி.

663. தத்த² குடா²ரீதி அத்தச்சே²த³கட்டே²ன குடா²ரிஸதி³ஸா ப²ருஸவாசா. சி²ந்த³தீதி குஸலமூலஸங்கா²தம் அத்தனோ மூலம்யேவ நிகந்ததி.

664. நிந்தி³யந்தி நிந்தி³தப்³ப³ம். தம் வா நிந்த³தி யோ பஸம்ஸியோதி யோ உத்தமட்டே²ன பஸம்ஸாரஹோ புக்³க³லோ, தம் வா ஸோ பாபிச்ச²தாதீ³னி ஆரோபேத்வா க³ரஹதி. விசினாதீதி உபசினாதி. கலிந்தி அபராத⁴ம்.

665. அயம் கலீதி அயம் அபராதோ⁴. அக்கே²ஸூதி ஜூதகீளனஅக்கே²ஸு. ஸப்³ப³ஸ்ஸாபி ஸஹாபி அத்தனாதி ஸப்³பே³ன அத்தனோ த⁴னேனபி அத்தனாபி ஸத்³தி⁴ம். ஸுக³தேஸூபி ஸுட்டு² க³தத்தா, ஸுந்த³ரஞ்ச டா²னம் க³தத்தா ஸுக³தனாமகேஸு பு³த்³த⁴பச்சேகபு³த்³த⁴ஸாவகேஸு. மனம் பதோ³ஸயேதி யோ மனம் பதூ³ஸேய்ய. தஸ்ஸாயம் மனோபதோ³ஸோ ஏவ மஹத்தரோ கலீதி வுத்தம் ஹோதி.

666. கஸ்மா? யஸ்மா ஸதம் ஸஹஸ்ஸானம்…பே… பாபகம், யஸ்மா வஸ்ஸக³ணனாய ஏத்தகோ ஸோ காலோ, யம் காலம் அரியக³ரஹீ வாசம் மனஞ்ச பணிதா⁴ய பாபகம் நிரயம் உபேதி, தத்த² பச்சதீதி வுத்தம் ஹோதி. இத³ஞ்ஹி ஸங்கே²பேன பது³மனிரயே ஆயுப்பமாணம்.

667. இதா³னி அபரேனபி நயேன ‘‘அயமேவ மஹத்தரோ கலி, யோ ஸுக³தேஸு மனம் பதூ³ஸயே’’தி இமமத்த²ம் விபா⁴வேந்தோ ‘‘அபூ⁴தவாதீ³’’தி ஆதி³மாஹ. தத்த² அபூ⁴தவாதீ³தி அரியூபவாத³வஸேன அலிகவாதீ³. நிரயந்தி பது³மாதி³ம். பேச்ச ஸமா ப⁴வந்தீதி இதோ படிக³ந்த்வா நிரயூபபத்தியா ஸமா ப⁴வந்தி. பரத்தா²தி பரலோகே.

668. கிஞ்ச பி⁴ய்யோ – யோ அப்பது³ட்ட²ஸ்ஸாதி. தத்த² மனோபதோ³ஸாபா⁴வேன அப்பது³ட்டோ², அவிஜ்ஜாமலாபா⁴வேன ஸுத்³தோ⁴, பாபிச்சா²பா⁴வேன அனங்க³ணோதி வேதி³தப்³போ³. அப்பது³ட்ட²த்தா வா ஸுத்³த⁴ஸ்ஸ, ஸுத்³த⁴த்தா அனங்க³ணஸ்ஸாதி ஏவம்பேத்த² யோஜேதப்³ப³ம்.

669. ஏவம் ஸுக³தேஸு மனோபதோ³ஸஸ்ஸ மஹத்தரகலிபா⁴வம் ஸாதே⁴த்வா இதா³னி வாரிதவத்து²கா³தா² நாம சுத்³த³ஸ கா³தா² ஆஹ. இமா கிர கோகாலிகம் மீயமானமேவ ஓவத³ந்தேனாயஸ்மதா மஹாமோக்³க³ல்லானேன வுத்தா, ‘‘மஹாப்³ரஹ்முனா’’தி ஏகே. தாஸம் இமினா ஸுத்தேன ஸத்³தி⁴ம் ஏகஸங்க³ஹத்த²ம் அயமுத்³தே³ஸோ ‘‘யோ லோப⁴கு³ணே அனுயுத்தோ’’திஆதி³. தத்த² பட²மகா³தா²ய தாவ ‘‘கு³ணோ’’தி நித்³தி³ட்ட²த்தா அனேகக்க²த்தும் பவத்தத்தா வா லோபோ⁴யேவ லோப⁴கு³ணோ, தண்ஹாயேதம் அதி⁴வசனம். அவத³ஞ்ஞூதி அவசனஞ்ஞூ பு³த்³தா⁴னம்பி ஓவாத³ம் அக்³க³ஹணேன. மச்ச²ரீதி பஞ்சவித⁴மச்ச²ரியேன. பேஸுணியம் அனுயுத்தோதி அக்³க³ஸாவகானம் பே⁴த³காமதாய. ஸேஸம் பாகடமேவ. இத³ம் வுத்தம் ஹோதி – யோ, ஆவுஸோ கோகாலிக, தும்ஹாதி³ஸோ அனுயுத்தலோப⁴தண்ஹாய லோப⁴கு³ணே அனுயுத்தோ அஸ்ஸத்³தோ⁴ கத³ரியோ அவத³ஞ்ஞூ மச்ச²ரீ பேஸுணியம் அனுயுத்தோ, ஸோ வசஸா பரிபா⁴ஸதி அஞ்ஞம் அபா⁴ஸனேய்யம்பி புக்³க³லம். தேன தம் வதா³மி ‘‘முக²து³க்³கா³’’தி கா³தா²த்தயம்.

670. தஸ்ஸாயம் அனுத்தானபத³த்தோ² – முக²து³க்³க³ முக²விஸம, விபூ⁴த விக³தபூ⁴த, அலிகவாதி³, அனரிய அஸப்புரிஸ, பூ⁴னஹு பூ⁴திஹனக, வுட்³டி⁴னாஸக, புரிஸந்த அந்திமபுரிஸ, கலி அலக்கி²புரிஸ, அவஜாத பு³த்³த⁴ஸ்ஸ அவஜாதபுத்த.

671. ரஜமாகிரஸீதி கிலேஸரஜம் அத்தனி பக்கி²பஸி. பபதந்தி ஸோப்³ப⁴ம். ‘‘பபாத’’ந்திபி பாடோ², ஸோ ஏவத்தோ². ‘‘பபத³’’ந்திபி பாடோ², மஹானிரயந்தி அத்தோ².

672. ஏதி ஹதந்தி ஏத்த² ஹ-இதி நிபாதோ, தந்தி தம் குஸலாகுஸலகம்மம். அத² வா ஹதந்தி க³தம் படிபன்னம், உபசிதந்தி அத்தோ². ஸுவாமீதி ஸாமி தஸ்ஸ கம்மஸ்ஸ கதத்தா. ஸோ ஹி தம் கம்மம் லப⁴தேவ, நாஸ்ஸ தம் நஸ்ஸதீதி வுத்தம் ஹோதி. யஸ்மா ச லப⁴தி, தஸ்மா து³க்க²ம் மந்தோ³…பே… கிப்³பி³ஸகாரீ.

673. இதா³னி யம் து³க்க²ம் மந்தோ³ பஸ்ஸதி, தம் பகாஸேந்தோ ‘‘அயோஸங்குஸமாஹதட்டா²ன’’ந்திஆதி³மாஹ. தத்த² புரிமஉபட்³ட⁴கா³தா²ய தாவ அத்தோ² – யம் தம் அயோஸங்குஸமாஹதட்டா²னம் ஸந்தா⁴ய ப⁴க³வதா ‘‘தமேனம், பி⁴க்க²வே, நிரயபாலா பஞ்சவித⁴ப³ந்த⁴னம் நாம காரணம் கரோந்தீ’’தி (ம. நி. 3.250; அ. நி. 3.36) வுத்தம், தம் உபேதி, ஏவம் உபேந்தோ ச தத்தே²வ ஆதி³த்தாய லோஹபத²வியா நிபஜ்ஜாபேத்வா நிரயபாலேஹி பஞ்சஸு டா²னேஸு ஆகோடியமானம் தத்தம் கி²லஸங்கா²தம் திண்ஹதா⁴ரமயஸூலமுபேதி, யம் ஸந்தா⁴ய ப⁴க³வதா வுத்தம் ‘‘தத்தம் அயோகி²லம் ஹத்தே² க³மேந்தீ’’திஆதி³. ததோ பரா உபட்³ட⁴கா³தா² அனேகானி வஸ்ஸஸஹஸ்ஸானி தத்த² பச்சித்வா பக்காவஸேஸானுப⁴வனத்த²ம் அனுபுப்³பே³ன கா²ரோத³கனதீ³தீரம் க³தஸ்ஸ யம் தம் ‘‘தத்தம் அயோகு³ளம் முகே² பக்கி²பந்தி, தத்தம் தம்ப³லோஹம் முகே² ஆஸிஞ்சந்தீ’’தி வுத்தம், தம் ஸந்தா⁴ய வுத்தம். தத்த² அயோதி லோஹம். கு³ளஸன்னிப⁴ந்தி பே³லுவஸண்டா²னம். அயோக³ஹணேன சேத்த² தம்ப³லோஹம், இதரேன அயோகு³ளம் வேதி³தப்³ப³ம். பதிரூபந்தி கதகம்மானுரூபம்.

674. ததோ பராஸு கா³தா²ஸு ந ஹி வக்³கூ³தி ‘‘க³ண்ஹத², பஹரதா²’’திஆதீ³னி வத³ந்தா நிரயபாலா மது⁴ரவாசம் ந வத³ந்தி. நாபி⁴ஜவந்தீதி ந ஸுமுக²பா⁴வேன அபி⁴முகா² ஜவந்தி, ந ஸுமுகா² உபஸங்கமந்தி, அனயப்³யஸனமாவஹந்தா ஏவ உபஸங்கமந்தீதி வுத்தம் ஹோதி. ந தாணமுபேந்தீதி தாணம் லேணம் படிஸரணம் ஹுத்வா ந உபக³ச்ச²ந்தி, க³ண்ஹந்தா ஹனந்தா ஏவ உபேந்தீதி வுத்தம் ஹோதி. அங்கா³ரே ஸந்த²தே ஸயந்தீதி அங்கா³ரபப்³ப³தம் ஆரோபிதா ஸமானா அனேகானி வஸ்ஸஸஹஸ்ஸானி ஸந்த²தே அங்கா³ரே ஸேந்தி. கி³னிஸம்பஜ்ஜலிதந்தி ஸமந்ததோ ஜலிதம் ஸப்³ப³தி³ஸாஸு ச ஸம்பஜ்ஜலிதம் அக்³கி³ம். பவிஸந்தீதி மஹானிரயே பக்கி²த்தா ஸமானா ஓகா³ஹந்தி. மஹானிரயோ நாம யோ ஸோ ‘‘சதுக்கண்ணோ’’தி (அ. நி. 3.36) வுத்தோ, நம் யோஜனஸதே ட²த்வா பஸ்ஸதம் அக்கீ²னி பி⁴ஜ்ஜந்தி.

675. ஜாலேன ச ஓனஹியானாதி அயோஜாலேன பலிவேடே²த்வா மிக³லுத்³த³கா மிக³ம் விய ஹனந்தி. இத³ம் தே³வதூ³தே அவுத்தகம்மகாரணம். அந்த⁴ம்வ திமிஸமாயந்தீதி அந்த⁴கரணேன அந்த⁴மேவ ப³ஹலந்த⁴காரத்தா ‘‘திமிஸ’’ந்தி ஸஞ்ஞிதம் தூ⁴மரோருவம் நாம நரகம் க³ச்ச²ந்தி. தத்ர கிர நேஸம் க²ரதூ⁴மம் கா⁴யித்வா அக்கீ²னி பி⁴ஜ்ஜந்தி, தேன ‘‘அந்த⁴ம்வா’’தி வுத்தம். தம் விததஞ்ஹி யதா² மஹிகாயோதி தஞ்ச அந்த⁴திமிஸம் மஹிகாயோ விய விததம் ஹோதீதி அத்தோ². ‘‘வித்த²த’’ந்திபி பாடோ². இத³ம்பி தே³வதூ³தே அவுத்தகம்மகாரணமேவ.

676. அத² லோஹமயந்தி அயம் பன லோஹகும்பீ⁴ பத²விபரியந்திகா சதுனஹுதாதி⁴கானி த்³வேயோஜனஸதஸஹஸ்ஸானி க³ம்பீ⁴ரா ஸமதித்திகா தத்ரலோஹபூரா ஹோதி. பச்சந்தி ஹி தாஸு சிரரத்தந்தி தாஸு கும்பீ⁴ஸு தீ³க⁴ரத்தம் பச்சந்தி. அக்³கி³னிஸமாஸூதி அக்³கி³ஸமாஸு. ஸமுப்பிலவாதேதி ஸமுப்பிலவந்தா, ஸகிம்பி உத்³த⁴ம் ஸகிம்பி அதோ⁴ க³ச்ச²மானா பே²ணுத்³தே³ஹகம் பச்சந்தீதி வுத்தம் ஹோதி. தே³வதூ³தே வுத்தனயேனேவ தம் வேதி³தப்³ப³ம்.

677. புப்³ப³லோஹிதமிஸ்ஸேதி புப்³ப³லோஹிதமிஸ்ஸாய லோஹகும்பி⁴யா. தத்த² கிந்தி தத்த². யம் யம் தி³ஸகந்தி தி³ஸம் விதி³ஸம். அதி⁴ஸேதீதி க³ச்ச²தி. ‘‘அபி⁴ஸேதீ’’திபி பாடோ², தத்த² யம் யம் தி³ஸம் அல்லீயதி அபஸ்ஸயதீதி அத்தோ². கிலிஸ்ஸதீதி பா³தீ⁴யதி. ‘‘கிலிஜ்ஜதீ’’திபி பாடோ², பூதி ஹோதீதி அத்தோ². ஸம்பு²ஸமானோதி தேன புப்³ப³லோஹிதேன பு²ட்டோ² ஸமானோ. இத³ம்பி தே³வதூ³தே அவுத்தகம்மகாரணம்.

678. புளவாவஸதே²தி புளவானம் ஆவாஸே. அயம்பி லோஹகும்பீ⁴யேவ தே³வதூ³தே ‘‘கூ³த²னிரயோ’’தி வுத்தா, தத்த² பதிதஸ்ஸ ஸூசிமுக²பாணா ச²விஆதீ³னி சி²ந்தி³த்வா அட்டி²மிஞ்ஜம் கா²த³ந்தி. க³ந்தும் ந ஹி தீரமபத்தீ²தி அபக³ந்தும் ந ஹி தீரம் அத்தி². ‘‘தீரவமத்தீ²’’திபி பாடோ², ஸோயேவத்தோ². தீரமேவ ஏத்த² ‘‘தீரவ’’ந்தி வுத்தம். ஸப்³ப³ஸமா ஹி ஸமந்தகபல்லாதி யஸ்மா தஸ்ஸா கும்பி⁴யா உபரிபா⁴கே³பி நிகுஜ்ஜிதத்தா ஸப்³ப³த்த² ஸமா ஸமந்ததோ கடாஹா, தஸ்மா அபக³ந்தும் தீரம் நத்தீ²தி வுத்தம் ஹோதி.

679. அஸிபத்தவனம் தே³வதூ³தே வுத்தனயமேவ. தஞ்ஹி தூ³ரதோ ரமணீயம் அம்ப³வனம் விய தி³ஸ்ஸதி, அதே²த்த² லோபே⁴ன நேரயிகா பவிஸந்தி, ததோ நேஸம் வாதேரிதானி பத்தானி பதித்வா அங்க³பச்சங்கா³னி சி²ந்த³ந்தி. தேனாஹ – ‘‘தம் பவிஸந்தி ஸமுச்சி²த³க³த்தா’’தி. தம் பவிஸந்தி ததோ ஸுட்டு² சி²ன்னக³த்தா ஹோந்தீதி. ஜிவ்ஹம் ப³ளிஸேன க³ஹேத்வா ஆரஜயாரஜயா விஹனந்தீதி தத்த² அஸிபத்தவனே வேகே³ன தா⁴வித்வா பதிதானம் முஸாவாதீ³னம் நேரயிகானம் நிரயபாலா ஜிவ்ஹம் ப³ளிஸேன நிக்கட்³டி⁴த்வா யதா² மனுஸ்ஸா அல்லசம்மம் பூ⁴மியம் பத்த²ரித்வா கி²லேஹி ஆகோடேந்தி, ஏவம் ஆகோடேத்வா ப²ரஸூஹி பா²லேத்வா பா²லேத்வா ஏகமேகம் கோடிம் சி²ந்தே³த்வா விஹனந்தி, சி²ன்னசி²ன்னா கோடி புனப்புனம் ஸமுட்டா²தி. ‘‘ஆரசயாரசயா’’திபி பாடோ², ஆவிஞ்சி²த்வா ஆவிஞ்சி²த்வாதி அத்தோ². ஏதம்பி தே³வதூ³தே அவுத்தகம்மகாரணம்.

680. வேதரணிந்தி தே³வதூ³தே ‘‘மஹதீ கா²ரோத³கா நதீ³’’தி (ம. நி. 3.269) வுத்தனதி³ம். ஸா கிர க³ங்கா³ விய உத³கப⁴ரிதா தி³ஸ்ஸதி. அதே²த்த² ந்ஹாயிஸ்ஸாம பிவிஸ்ஸாமாதி நேரயிகா பதந்தி. திண்ஹதா⁴ரகு²ரதா⁴ரந்தி திண்ஹதா⁴ரம் கு²ரதா⁴ரம், திக்க²தா⁴ரகு²ரதா⁴ரவதிந்தி வுத்தம் ஹோதி. தஸ்ஸா கிர நதி³யா உத்³த⁴மதோ⁴ உப⁴யதீரேஸு ச திண்ஹதா⁴ரா கு²ரா படிபாடியா ட²பிதா விய திட்ட²ந்தி, தேன ஸா ‘‘திண்ஹதா⁴ரா கு²ரதா⁴ரா’’தி வுச்சதி. தம் திண்ஹதா⁴ரகு²ரதா⁴ரம் உத³காஸாய உபேந்தி அல்லீயந்தீதி அத்தோ². ஏவம் உபேந்தா ச பாபகம்மேன சோதி³தா தத்த² மந்தா³ பபதந்தி பா³லாதி அத்தோ².

681. ஸாமா ஸப³லாதி ஏதம் பரதோ ‘‘ஸோணா’’தி இமினா யோஜேதப்³ப³ம். ஸாமவண்ணா கம்மாஸவண்ணா ச ஸோணா கா²த³ந்தீதி வுத்தம் ஹோதி. காகோலக³ணாதி கண்ஹகாகக³ணா. படிகி³த்³தா⁴தி ஸுட்டு² ஸஞ்ஜாதகே³தா⁴ ஹுத்வா, ‘‘மஹாகி³ஜ்ஜா²’’தி ஏகே. குலலாதி குலலபக்கி²னோ, ‘‘ஸேனானமேதம் நாம’’ந்தி ஏகே. வாயஸாதி அகண்ஹகாகா. இத³ம்பி தே³வதூ³தே அவுத்தகம்மகாரணம். தத்த² வுத்தானிபி பன கானிசி இத⁴ ந வுத்தானி, தானி ஏதேஸம் புரிமபச்சி²மபா⁴க³த்தா வுத்தானேவ ஹோந்தீதி வேதி³தப்³பா³னி.

682. இதா³னி ஸப்³ப³மேவேதம் நரகவுத்திம் த³ஸ்ஸேத்வா ஓவத³ந்தோ ‘‘கிச்சா² வதாய’’ந்தி கா³த²மாஹ. தஸ்ஸத்தோ² – கிச்சா² வத அயம் இத⁴ நரகே நானப்பகாரகம்மகரணபே⁴தா³ வுத்தி, யம் ஜனோ பு²ஸதி கிப்³பி³ஸகாரீ. தஸ்மா இத⁴ ஜீவிதஸேஸே ஜீவிதஸந்ததியா விஜ்ஜமானாய இத⁴ லோகே டி²தோயேவ ஸமானோ ஸரணக³மனாதி³குஸலத⁴ம்மானுட்டா²னேன கிச்சகரோ நரோ ஸியா ப⁴வேய்ய. கிச்சகரோ ப⁴வந்தோபி ச ஸாதச்சகாரிதாவஸேனேவ ப⁴வேய்ய, ந பமஜ்ஜே முஹுத்தம்பி ந பமாத³மாபஜ்ஜேய்யாதி அயமேத்த² ஸமுச்சயவண்ணனா. யஸ்மா பன வுத்தாவஸேஸானி பதா³னி புப்³பே³ வுத்தனயத்தா உத்தானத்த²த்தா ச ஸுவிஞ்ஞேய்யானேவ, தஸ்மா அனுபத³வண்ணனா ந கதாதி.

பரமத்த²ஜோதிகாய கு²த்³த³க-அட்ட²கதா²ய

ஸுத்தனிபாத-அட்ட²கதா²ய கோகாலிகஸுத்தவண்ணனா நிட்டி²தா.