11. நாலகஸுத்தவண்ணனா

685. ஆனந்த³ஜாதேதி நாலகஸுத்தம். கா உப்பத்தி? பது³முத்தரஸ்ஸ கிர ப⁴க³வதோ ஸாவகம் மோனேய்யபடிபத³ம் படிபன்னம் தி³ஸ்வா தத²த்தம் அபி⁴கங்க²மானோ ததோ பபு⁴தி கப்பஸதஸஹஸ்ஸம் பாரமியோ பூரேத்வா அஸிதஸ்ஸ இஸினோ பா⁴கி³னேய்யோ நாலகோ நாம தாபஸோ ப⁴க³வந்தம் த⁴ம்மசக்கப்பவத்திததி³வஸதோ ஸத்தமே தி³வஸே ‘‘அஞ்ஞாதமேத’’ந்திஆதீ³ஹி த்³வீஹி கா³தா²ஹி மோனேய்யபடிபத³ம் புச்சி². தஸ்ஸ ப⁴க³வா ‘‘மோனேய்யம் தே உபஞ்ஞிஸ்ஸ’’ந்திஆதி³னா நயேன தம் ப்³யாகாஸி. பரினிப்³பு³தே பன ப⁴க³வதி ஸங்கீ³திம் கரோந்தேனாயஸ்மதா மஹாகஸ்ஸபேன ஆயஸ்மா ஆனந்தோ³ தமேவ மோனேய்யபடிபத³ம் புட்டோ² யேன யதா³ ச ஸமாத³பிதோ நாலகோ ப⁴க³வந்தம் புச்சி². தம் ஸப்³ப³ம் பாகடம் கத்வா த³ஸ்ஸேதுகாமோ ‘‘ஆனந்த³ஜாதே’’திஆதி³கா வீஸதி வத்து²கா³தா²யோ வத்வா அபா⁴ஸி. தம் ஸப்³ப³ம்பி ‘‘நாலகஸுத்த’’ந்தி வுச்சதி.

தத்த² ஆனந்த³ஜாதேதி ஸமித்³தி⁴ஜாதே வுத்³தி⁴ப்பத்தே. பதீதேதி துட்டே². அத² வா ஆனந்த³ஜாதேதி பமுதி³தே. பதீதேதி ஸோமனஸ்ஸஜாதே. ஸுசிவஸனேதி அகிலிட்ட²வஸனே. தே³வானஞ்ஹி கப்பருக்க²னிப்³ப³த்தானி வஸனானி ரஜம் வா மலம் வா ந க³ண்ஹந்தி. து³ஸ்ஸம் க³ஹேத்வாதி இத⁴ து³ஸ்ஸஸதி³ஸத்தா ‘‘து³ஸ்ஸ’’ந்தி லத்³த⁴வோஹாரம் தி³ப்³ப³வத்த²ம் உக்கி²பித்வா. அஸிதோ இஸீதி கண்ஹஸரீரவண்ணத்தா ஏவம்லத்³த⁴னாமோ இஸி. தி³வாவிஹாரேதி தி³வாவிஹாரட்டா²னே. ஸேஸம் பத³தோ உத்தானமேவ.

ஸம்ப³ந்த⁴தோ பன – அயம் கிர ஸுத்³தோ⁴த³னஸ்ஸ பிது ஸீஹஹனுரஞ்ஞோ புரோஹிதோ ஸுத்³தோ⁴த³னஸ்ஸபி அனபி⁴ஸித்தகாலே ஸிப்பாசரியோ ஹுத்வா அபி⁴ஸித்தகாலே புரோஹிதோயேவ அஹோஸி. தஸ்ஸ ஸாயம் பாதம் ராஜுபட்டா²னம் ஆக³தஸ்ஸ ராஜா த³ஹரகாலே விய நிபச்சகாரம் அகத்வா அஞ்ஜலிகம்மமத்தமேவ கரோதி. த⁴ம்மதா கிரேஸா பத்தாபி⁴ஸேகானம் ஸக்யராஜூனம். புரோஹிதோ தேன நிப்³பி³ஜ்ஜித்வா ‘‘பப்³ப³ஜ்ஜாமஹம் மஹாராஜா’’தி ஆஹ. ராஜா தஸ்ஸ நிச்ச²யம் ஞத்வா ‘‘தேன ஹி, ஆசரிய, மமேவ உய்யானே வஸிதப்³ப³ம், யதா² தே அஹம் அபி⁴ண்ஹம் பஸ்ஸேய்ய’’ந்தி யாசி. ஸோ ‘‘ஏவம் ஹோதூ’’தி படிஸ்ஸுணித்வா தாபஸபப்³ப³ஜ்ஜம் பப்³ப³ஜித்வா ரஞ்ஞா உபட்ட²ஹியமானோ உய்யானேயேவ வஸந்தோ கஸிணபரிகம்மம் கத்வா அட்ட² ஸமாபத்தியோ பஞ்சாபி⁴ஞ்ஞாயோ ச நிப்³ப³த்தேஸி. ஸோ ததோ பபு⁴தி ராஜகுலே ப⁴த்தகிச்சம் கத்வா ஹிமவந்தசாதுமஹாராஜிகப⁴வனாதீ³னம் அஞ்ஞதரம் க³ந்த்வா தி³வாவிஹாரம் கரோதி. அதே²கதி³வஸம் தாவதிம்ஸப⁴வனம் க³ந்த்வா ரதனவிமானம் பவிஸித்வா தி³ப்³ப³ரதனபல்லங்கே நிஸின்னோ ஸமாதி⁴ஸுக²ம் அனுப⁴வித்வா ஸாயன்ஹஸமயம் வுட்டா²ய விமானத்³வாரே ட²த்வா இதோ சிதோ ச விலோகேந்தோ ஸட்டி²யோஜனாய மஹாவீதி²யா சேலுக்கே²பம் கத்வா போ³தி⁴ஸத்தகு³ணபஸம்ஸிதானி து²திவசனானி வத்வா கீளந்தே ஸக்கப்பமுகே² தே³வே அத்³த³ஸ. தேனாஹ ஆயஸ்மா ஆனந்தோ³ – ‘‘ஆனந்த³ஜாதே…பே… தி³வாவிஹாரே’’தி.

686. ததோ ஸோ ஏவம் தி³ஸ்வான தே³வே…பே… கிம் படிச்ச. தத்த² உத³க்³கே³தி அப்³பு⁴ன்னதகாயே. சித்திம் கரித்வானாதி ஆத³ரம் கத்வா. கல்யரூபோதி துட்ட²ரூபோ. ஸேஸம் உத்தானத்த²மேவ.

687. இதா³னி ‘‘யதா³பி ஆஸீ’’திஆதி³கா³தா² உத்தானஸம்ப³ந்தா⁴ ஏவ. பத³த்தோ² பன பட²மகா³தா²ய தாவ ஸங்க³மோதி ஸங்கா³மோ. ஜயோ ஸுரானந்தி தே³வானம் ஜயோ.

தஸ்ஸாவிபா⁴வத்த²ம் அயமனுபுப்³பி³கதா² வேதி³தப்³பா³ – ஸக்கோ கிர மக³த⁴ரட்டே² மசலகா³மவாஸீ தேத்திம்ஸமனுஸ்ஸஸேட்டோ² மகோ⁴ நாம மாணவோ ஹுத்வா ஸத்த வத்தபதா³னி பூரேத்வா தாவதிம்ஸப⁴வனே நிப்³ப³த்தி ஸத்³தி⁴ம் பரிஸாய. ததோ புப்³ப³தே³வா ‘‘ஆக³ந்துகதே³வபுத்தா ஆக³தா, ஸக்காரம் நேஸம் கரிஸ்ஸாமா’’தி வத்வா தி³ப்³ப³பது³மானி உபனாமேஸும், உபட்³ட⁴ரஜ்ஜேன ச நிமந்தேஸும். ஸக்கோ உபட்³ட⁴ரஜ்ஜேன அஸந்துட்டோ² ஸகபரிஸம் ஸஞ்ஞாபேத்வா ஏகதி³வஸம் ஸுராமத³மத்தே தே பாதே³ க³ஹேத்வா ஸினேருபப்³ப³தபாதே³ கி²பி. தேஸம் ஸினேருஸ்ஸ ஹேட்டி²மதலே த³ஸஸஹஸ்ஸயோஜனம் அஸுரப⁴வனம் நிப்³ப³த்தி பாரிச்ச²த்தகபடிச்ச²ன்னபூ⁴தாய சித்ரபாடலியா உபஸோபி⁴தம். ததோ தே ஸதிம் படிலபி⁴த்வா தாவதிம்ஸப⁴வனம் அபஸ்ஸந்தா ‘‘அஹோ ரே நட்டா² மயம் பானமத³தோ³ஸேன, ந தா³னி மயம் ஸுரம் பிவிம்ஹா, அஸுரம் பிவிம்ஹா, ந தா³னிம்ஹா ஸுரா, அஸுரா தா³னி ஜாதம்ஹா’’தி. ததோ பபு⁴தி ‘‘அஸுரா’’இச்சேவ உப்பன்னஸமஞ்ஞா ஹுத்வா ‘‘ஹந்த³ தா³னி தே³வேஹி ஸத்³தி⁴ம் ஸங்கா³மேமா’’தி ஸினேரும் பரிதோ ஆரோஹிம்ஸு. ததோ ஸக்கோ அஸுரே யுத்³தே⁴ன அப்³பு⁴க்³க³ந்த்வா புனபி ஸமுத்³தே³ பக்கி²பித்வா சதூஸு த்³வாரேஸு அத்தனா ஸதி³ஸம் இந்த³படிமம் மாபேத்வா ட²பேஸி. ததோ அஸுரா ‘‘அப்பமத்தோ வதாயம் ஸக்கோ நிச்சம் ரக்க²ந்தோ திட்ட²தீ’’தி சிந்தேத்வா புனதே³வ நக³ரம் அக³மிம்ஸு. ததோ தே³வா அத்தனோ ஜயம் கோ⁴ஸேந்தா மஹாவீதி²யம் சேலுக்கே²பம் கரோந்தா நக்க²த்தம் கீளிம்ஸு. அத² அஸிதோ அதீதானாக³தே சத்தாலீஸகப்பே அனுஸ்ஸரிதும் ஸமத்த²தாய ‘‘கிம் நு கோ² இமேஹி புப்³பே³பி ஏவம் கீளிதபுப்³ப³’’ந்தி ஆவஜ்ஜேந்தோ தம் தே³வாஸுரஸங்கா³மே தே³வவிஜயம் தி³ஸ்வா ஆஹ –

‘‘யதா³பி ஆஸீ அஸுரேஹி ஸங்க³மோ,

ஜயோ ஸுரானம் அஸுரா பராஜிதா;

ததா³பி நேதாதி³ஸோ லோமஹம்ஸனோ’’தி.

தஸ்மிம்பி காலே ஏதாதி³ஸோ லோமஹம்ஸனோ பமோதோ³ ந ஆஸி. கிமப்³பு⁴தம் த³ட்டு² மரூ பமோதி³தாதி அஜ்ஜ பன கிம் அப்³பு⁴தம் தி³ஸ்வா ஏவம் தே³வா பமுதி³தாதி.

688. து³தியகா³தா²ய ஸேளேந்தீதி முகே²ன உஸ்ஸேளனஸத்³த³ம் முஞ்சந்தி. கா³யந்தி நானாவிதா⁴னி கீ³தானி, வாத³யந்தி அட்ட²ஸட்டி² தூரியஸஹஸ்ஸானி, போ²டேந்தீதி அப்போ²டேந்தி. புச்சா²மி வோஹந்தி அத்தனா ஆவஜ்ஜேத்வா ஞாதும் ஸமத்தோ²பி தேஸம் வசனம் ஸோதுகாமதாய புச்ச²தி. மேருமுத்³த⁴வாஸினேதி ஸினேருமுத்³த⁴னி வஸந்தே. ஸினேருஸ்ஸ ஹி ஹேட்டி²மதலே த³ஸயோஜனஸஹஸ்ஸம் அஸுரப⁴வனம், மஜ்ஜி²மதலே த்³விஸஹஸ்ஸபரித்ததீ³பபரிவாரா சத்தாரோ மஹாதீ³பா, உபரிமதலே த³ஸயோஜனஸஹஸ்ஸம் தாவதிம்ஸப⁴வனம். தஸ்மா தே³வா ‘‘மேருமுத்³த⁴வாஸினோ’’தி வுச்சந்தி. மாரிஸாதி தே³வே ஆமந்தேதி, நிது³க்கா² நிராபா³தா⁴தி வுத்தம் ஹோதி.

689. அத²ஸ்ஸ தமத்த²ம் ஆரோசேந்தேஹி தே³வேஹி வுத்தாய ததியகா³தா²ய போ³தி⁴ஸத்தோதி பு³ஜ்ஜ²னகஸத்தோ, ஸம்மாஸம்போ³தி⁴ம் க³ந்தும் அரஹோ ஸத்தோ ரதனவரோதி வரரதனபூ⁴தோ. தேனம்ஹ துட்டா²தி தேன காரணேன மயம் துட்டா². ஸோ ஹி பு³த்³த⁴த்தம் பத்வா ததா² த⁴ம்மம் தே³ஸேஸ்ஸதி, யதா² மயஞ்ச அஞ்ஞே ச தே³வக³ணா ஸேக்கா²ஸேக்க²பூ⁴மிம் பாபுணிஸ்ஸாம. மனுஸ்ஸாபிஸ்ஸ த⁴ம்மம் ஸுத்வா யே ந ஸக்கி²ஸ்ஸந்தி பரினிப்³பா³தும், தே தா³னாதீ³னி கத்வா தே³வலோகே பரிபூரேஸ்ஸந்தீதி அயம் கிர நேஸம் அதி⁴ப்பாயோ. தத்த² ‘‘துட்டா² கல்யரூபா’’தி கிஞ்சாபி இத³ம் பத³த்³வயம் அத்த²தோ அபி⁴ன்னம், ததா²பி ‘‘கிமப்³பு⁴தம் த³ட்டு² மரூ பமோதி³தா, கிம் தே³வஸங்கோ⁴ அதிரிவ கல்யரூபோ’’தி இமஸ்ஸ பஞ்ஹத்³வயஸ்ஸ விஸ்ஸஜ்ஜனத்த²ம் வுத்தந்தி வேதி³தப்³ப³ம்.

690. இதா³னி யேன அதி⁴ப்பாயேன போ³தி⁴ஸத்தே ஜாதே துட்டா² அஹேஸும், தம் ஆவிகரோந்தேஹி வுத்தாய சதுத்த²கா³தா²ய ஸத்தக்³க³ஹணேன தே³வமனுஸ்ஸக்³க³ஹணம், பஜாக³ஹணேன ஸேஸக³திக்³க³ஹணம். ஏவம் த்³வீஹி பதே³ஹி பஞ்சஸுபி க³தீஸு ஸேட்ட²பா⁴வம் த³ஸ்ஸேதி. திரச்சா²னாபி ஹி ஸீஹாத³யோ அஸந்தாஸாதி³கு³ணயுத்தா, தேபி அயமேவ அதிஸேதி. தஸ்மா ‘‘பஜானமுத்தமோ’’தி வுத்தோ. தே³வமனுஸ்ஸேஸு பன யே அத்தஹிதாய படிபன்னாத³யோ சத்தாரோ புக்³க³லா, தேஸு உப⁴யஹிதபடிபன்னோ அக்³க³புக்³க³லோ அயம், நரேஸு ச உஸப⁴ஸதி³ஸத்தா நராஸபோ⁴. தேனஸ்ஸ து²திம் ப⁴ணந்தா இத³ம்பி பத³த்³வயமாஹம்ஸு.

691. பஞ்சமகா³தா²ய தம் ஸத்³த³ந்தி தம் தே³வேஹி வுத்தவசனஸத்³த³ம். அவஸரீதி ஓதரி. தத³ ப⁴வனந்தி ததா³ ப⁴வனம்.

692. ச²ட்ட²கா³தா²ய ததோதி அஸிதஸ்ஸ வசனதோ அனந்தரம். உக்காமுகே²வாதி உக்காமுகே² ஏவ, மூஸாமுகே²தி வுத்தம் ஹோதி. ஸுகுஸலஸம்பஹட்ட²ந்தி ஸுகுஸலேன ஸுவண்ணகாரேன ஸங்க⁴ட்டிதம், ஸங்க⁴ட்டேந்தேன தாபிதந்தி அதி⁴ப்பாயோ. த³த்³த³ல்லமானந்தி விஜ்ஜோதமானம். அஸிதவ்ஹயஸ்ஸாதி அஸிதனாமஸ்ஸ து³தியேன நாமேன கண்ஹதே³விலஸ்ஸ இஸினோ.

693. ஸத்தமகா³தா²ய தாராஸப⁴ம் வாதி தாரானம் உஸப⁴ஸதி³ஸம், சந்த³ந்தி அதி⁴ப்பாயோ. விஸுத்³த⁴ந்தி அப்³பா⁴தி³உபக்கிலேஸரஹிதம். ஸரத³ரிவாதி ஸரதே³ இவ. ஆனந்த³ஜாதோதி ஸவனமத்தேனேவ உப்பன்னாய பீதியா பீதிஜாதோ. அலத்த² பீதிந்தி தி³ஸ்வா புனபி பீதிம் லபி⁴.

694. ததோ பரம் போ³தி⁴ஸத்தஸ்ஸ தே³வேஹி ஸதா³ பயுஜ்ஜமானஸக்காரதீ³பனத்த²ம் வுத்தஅட்ட²மகா³தா²ய அனேகஸாக²ந்தி அனேகஸலாகம். ஸஹஸ்ஸமண்ட³லந்தி ரத்தஸுவண்ணமயஸஹஸ்ஸமண்ட³லயுத்தம். ச²த்தந்தி தி³ப்³ப³ஸேதச்ச²த்தம். வீதிபதந்தீதி ஸரீரம் பீ³ஜமானா பதனுப்பதனம் கரோந்தி.

695. நவமகா³தா²ய ஜடீதி ஜடிலோ. கண்ஹஸிரிவ்ஹயோதி கண்ஹஸத்³தே³ன ச ஸிரிஸத்³தே³ன ச அவ்ஹயமானோ. தம் கிர ‘‘ஸிரிகண்ஹோ’’திபி அவ்ஹயந்தி ஆமந்தேந்தி, ஆலபந்தீதி வுத்தம் ஹோதி. பண்டு³கம்ப³லேதி ரத்தகம்ப³லே. அதி⁴காரதோ சேத்த² ‘‘குமார’’ந்தி வத்தப்³ப³ம், பாட²ஸேஸோ வா காதப்³போ³. புரிமகா³தா²ய ச அஹத்த²பாஸக³தம் ஸந்தா⁴ய ‘‘தி³ஸ்வா’’தி வுத்தம். இத⁴ பன ஹத்த²பாஸக³தம் படிக்³க³ஹணத்த²ம் உபனீதம், தஸ்மா புன வசனம் ‘‘தி³ஸ்வா’’தி. புரிமம் வா த³ஸ்ஸனபீதிலாபா⁴பேக்க²ம் கா³தா²வஸானே ‘‘விபுலமலத்த² பீதி’’ந்தி வசனதோ, இத³ம் படிக்³க³ஹாபேக்க²ம் அவஸானே ‘‘ஸுமனோ படிக்³க³ஹே’’தி வசனதோ. புரிமஞ்ச குமாரஸம்ப³ந்த⁴மேவ, இத³ம் ஸேதச்ச²த்தஸம்ப³ந்த⁴ம்பி. தி³ஸ்வாதி ஸதஸஹஸ்ஸக்³க⁴னகே க³ந்தா⁴ரரத்தகம்ப³லே ஸுவண்ணனிக்க²ம் விய குமாரம் ‘‘ச²த்தம் மரூ’’தி ஏத்த² வுத்தப்பகாரம் ஸேதச்ச²த்தம் தா⁴ரியந்தம் முத்³த⁴னி தி³ஸ்வா. கேசி பன ‘‘இத³ம் மானுஸகம் ச²த்தம் ஸந்தா⁴ய வுத்த’’ந்தி ப⁴ணந்தி. யதே²வ ஹி தே³வா, ஏவம் மனுஸ்ஸாபி ச²த்தசாமரமோரஹத்த²தாலவண்டவாளபீ³ஜனிஹத்தா² மஹாபுரிஸம் உபக³ச்ச²ந்தீதி. ஏவம் ஸந்தேபி ந தஸ்ஸ வசனேன கோசிபி அதிஸயோ அத்தி², தஸ்மா யதா²வுத்தமேவ ஸுந்த³ரம். படிக்³க³ஹேதி உபோ⁴ஹி ஹத்தே²ஹி படிக்³க³ஹேஸி. இஸிம் கிர வந்தா³பேதும் குமாரம் உபனேஸும். அத²ஸ்ஸ பாதா³ பரிவத்தித்வா இஸிஸ்ஸ மத்த²கே பதிட்ட²ஹிம்ஸு. ஸோ தம்பி அச்ச²ரியம் தி³ஸ்வா உத³க்³க³சித்தோ ஸுமனோ படிக்³க³ஹேஸி.

696. த³ஸமகா³தா²யம் ஜிகீ³ஸகோதி ஜிகீ³ஸந்தோ மக்³க³ந்தோ பரியேஸந்தோ, உபபரிக்க²ந்தோதி வுத்தம் ஹோதி. லக்க²ணமந்தபாரகூ³தி லக்க²ணானம் வேதா³னஞ்ச பாரம் க³தோ. அனுத்தராயந்தி அனுத்தரோ அயம். ஸோ கிர அத்தனோ அபி⁴முகா²க³தேஸு மஹாஸத்தஸ்ஸ பாத³தலேஸு சக்கானி தி³ஸ்வா தத³னுஸாரேன ஸேஸலக்க²ணானி ஜிகீ³ஸந்தோ ஸப்³ப³ம் லக்க²ணஸம்பத்திம் தி³ஸ்வா ‘‘அத்³தா⁴யம் பு³த்³தோ⁴ ப⁴விஸ்ஸதீ’’தி ஞத்வா ஏவமாஹ.

697. ஏகாத³ஸாயம் அத²த்தனோ க³மனந்தி படிஸந்தி⁴வஸேன அரூபக³மனம். அகல்யரூபோ க³ளயதி அஸ்ஸுகானீதி தம் அத்தனோ அரூபூபபத்திம் அனுஸ்ஸரித்வா ‘‘ந தா³னாஹம் அஸ்ஸ த⁴ம்மதே³ஸனம் ஸோதும் லச்சா²மீ’’தி அதுட்ட²ரூபோ ப³லவஸோகாபி⁴ப⁴வேன தோ³மனஸ்ஸஜாதோ ஹுத்வா அஸ்ஸூனி பாதேதி க³ளயதி. ‘‘க³ரயதீ’’திபி பாடோ². யதி³ பனேஸ ரூபப⁴வே சித்தம் நமேய்ய, கிம் தத்த² ந உப்பஜ்ஜேய்ய, யேனேவம் ரோத³தீதி? ந ந உப்பஜ்ஜேய்ய, அகுஸலதாய பனேதம் விதி⁴ம் ந ஜானாதி. ஏவம் ஸந்தேபி தோ³மனஸ்ஸுப்பத்தியேவஸ்ஸ அயுத்தா ஸமாபத்திலாபே⁴ன விக்க²ம்பி⁴தத்தாதி சே? ந, விக்க²ம்பி⁴தத்தா ஏவ. மக்³க³பா⁴வனாய ஸமுச்சி²ன்னா ஹி கிலேஸா ந உப்பஜ்ஜந்தி, ஸமாபத்திலாபீ⁴னம் பன ப³லவபச்சயேன உப்பஜ்ஜந்தி. உப்பன்னே கிலேஸே பரிஹீனஜ்ஜா²னத்தா குதஸ்ஸ அரூபக³மனந்தி சே? அப்பகஸிரேன புனாதி⁴க³மதோ. ஸமாபத்திலாபி⁴னோ ஹி உப்பன்னே கிலேஸே ப³லவவீதிக்கமம் அனாபஜ்ஜந்தா வூபஸந்தமத்தேயேவ கிலேஸவேகே³ புன தம் விஸேஸம் அப்பகஸிரேனேவாதி⁴க³ச்ச²ந்தி, ‘‘பரிஹீனவிஸேஸா இமே’’திபி து³விஞ்ஞேய்யா ஹோந்தி, தாதி³ஸோ ச ஏஸோ. நோ சே குமாரே ப⁴விஸ்ஸதி அந்தராயோதி ந ப⁴விஸ்ஸதி நு கோ² இமஸ்மிம் குமாரே அந்தராயோ.

698. த்³வாத³ஸாயம் ந ஓரகாயந்தி அயம் ஓரகோ பரித்தோ ந ஹோதி. உத்தரகா³தா²ய வத்தப்³ப³ம் பு³த்³த⁴பா⁴வம் ஸந்தா⁴யாஹ.

699. தேரஸாயம் ஸம்போ³தி⁴யக்³க³ந்தி ஸப்³ப³ஞ்ஞுதஞ்ஞாணம். தஞ்ஹி அவிபரீதபா⁴வேன ஸம்மா பு³ஜ்ஜ²னதோ ஸம்போ³தி⁴, கத்த²சி ஆவரணாபா⁴வேன ஸப்³ப³ஞாணுத்தமதோ ‘‘அக்³க³’’ந்தி வுச்சதி. பு²ஸிஸ்ஸதீதி பாபுணிஸ்ஸதி. பரமவிஸுத்³த⁴த³ஸ்ஸீதி நிப்³பா³னத³ஸ்ஸீ. தஞ்ஹி ஏகந்தவிஸுத்³த⁴த்தா பரமவிஸுத்³த⁴ம். வித்தா²ரிகஸ்ஸாதி வித்தா²ரிகம் அஸ்ஸ. ப்³ரஹ்மசரியந்தி ஸாஸனம்.

700. சுத்³த³ஸாயம் அத²ந்தராதி அந்தராயேவ அஸ்ஸ, ஸம்போ³தி⁴ப்பத்திதோ ஓரதோ ஏவாதி வுத்தம் ஹோதி. ந ஸோஸ்ஸந்தி ந ஸுணிஸ்ஸம். அஸமது⁴ரஸ்ஸாதி அஸமவீரியஸ்ஸ. அட்டோதி ஆதுரோ. ப்³யஸனம் க³தோதி ஸுக²வினாஸம் பத்தோ. அகா⁴வீதி து³க்கி²தோ, ஸப்³ப³ம் தோ³மனஸ்ஸுப்பாத³மேவ ஸந்தா⁴யாஹ. தோ³மனஸ்ஸேன ஹி ஸோ ஆதுரோ. தஞ்சஸ்ஸ ஸுக²ப்³யஸனதோ ப்³யஸனம், ஸுக²வினாஸனதோதி வுத்தம் ஹோதி. தேன ச ஸோ சேதஸிகஅக⁴பூ⁴தேன அகா⁴வீ.

701. பன்னரஸாயம் விபுலம் ஜனேத்வானாதி விபுலம் ஜனேத்வா. அயமேவ வா பாடோ². நிக்³க³மாதி நிக்³க³தோ. ஏவம் நிக்³க³தோ ச ஸோ பா⁴கி³னேய்யம் ஸயந்தி ஸகம் பா⁴கி³னேய்யம், அத்தனோ ப⁴கி³னியா புத்தந்தி வுத்தம் ஹோதி. ஸமாத³பேஸீதி அத்தனோ அப்பாயுகபா⁴வம் ஞத்வா கனிட்ட²ப⁴கி³னியா ச புத்தஸ்ஸ நாலகஸ்ஸ மாணவகஸ்ஸ உபசிதபுஞ்ஞதம் அத்தனோ ப³லேன ஞத்வா ‘‘வுட்³டி⁴ப்பத்தோ பமாத³ம்பி ஆபஜ்ஜேய்யா’’தி நம் அனுகம்பமானோ ப⁴கி³னியா க⁴ரம் க³ந்த்வா ‘‘கஹம் நாலகோ’’தி. ‘‘ப³ஹி, ப⁴ந்தே, கீளதீ’’தி. ‘‘ஆனேத² ந’’ந்தி ஆணாபேத்வா தங்க²ணம்யேவ தாபஸபப்³ப³ஜ்ஜம் பப்³பா³ஜேத்வா ஸமாத³பேஸி ஓவதி³ அனுஸாஸி. கத²ம்? ‘‘பு³த்³தோ⁴தி கோ⁴ஸம்…பே… ப்³ரஹ்மசரிய’’ந்தி ஸோளஸமகா³த²மாஹ.

702. தத்த² யத³ பரதோதி யதா³ பரதோ. த⁴ம்மமக்³க³ந்தி பரமத⁴ம்மஸ்ஸ நிப்³பா³னஸ்ஸ மக்³க³ம், த⁴ம்மம் வா அக்³க³ம் ஸஹ படிபதா³ய நிப்³பா³னம். தஸ்மிந்தி தஸ்ஸ ஸந்திகே. ப்³ரஹ்மசரியந்தி ஸமணத⁴ம்மம்.

703. ஸத்தரஸாயம் தாதி³னாதி தஸ்ஸண்டி²தேன, தஸ்மிம் ஸமயே கிலேஸவிக்க²ம்ப⁴னே ஸமாதி⁴லாபே⁴ ச ஸதி விக்க²ம்பி⁴தகிலேஸேன ஸமாஹிதசித்தேன சாதி அதி⁴ப்பாயோ. அனாக³தே பரமவிஸுத்³த⁴த³ஸ்ஸினாதி ‘‘அயம் நாலகோ அனாக³தே காலே ப⁴க³வதோ ஸந்திகே பரமவிஸுத்³த⁴ம் நிப்³பா³னம் பஸ்ஸிஸ்ஸதீ’’தி ஏவம் தி³ட்ட²த்தா ஸோ இஸி இமினா பரியாயேன ‘‘அனாக³தே பரமவிஸுத்³த⁴த³ஸ்ஸீ’’தி வுத்தோ. தேன அனாக³தே பரமவிஸுத்³த⁴த³ஸ்ஸினா. உபசிதபுஞ்ஞஸஞ்சயோதி பது³முத்தரதோ பபு⁴தி கதபுஞ்ஞஸஞ்சயோ. பதிக்க²ந்தி ஆக³மயமானோ. பரிவஸீதி பப்³ப³ஜித்வா தாபஸவேஸேன வஸி. ரக்கி²திந்த்³ரியோதி ரக்கி²தஸோதிந்த்³ரியோ ஹுத்வா. ஸோ கிர ததோ பபு⁴தி உத³கே ந நிமுஜ்ஜி ‘‘உத³கம் பவிஸித்வா ஸோதிந்த்³ரியம் வினாஸேய்ய, ததோ த⁴ம்மஸ்ஸவனபா³ஹிரோ ப⁴வேய்ய’’ந்தி சிந்தேத்வா.

704. அட்டா²ரஸாயம் ஸுத்வான கோ⁴ஸந்தி ஸோ நாலகோ ஏவம் பரிவஸந்தோ அனுபுப்³பே³ன ப⁴க³வதா ஸம்போ³தி⁴ம் பத்வா பா³ராணஸியம் த⁴ம்மசக்கே பவத்திதே தம் ‘‘ப⁴க³வதா த⁴ம்மசக்கம் பவத்திதம், ஸம்மாஸம்பு³த்³தோ⁴ வத ஸோ ப⁴க³வா உப்பன்னோ’’திஆதி³னா நயேன ஜினவரசக்கவத்தனே பவத்தகோ⁴ஸம் அத்தனோ அத்த²காமாஹி தே³வதாஹி ஆக³ந்த்வா ஆரோசிதம் ஸுத்வா. க³ந்த்வான தி³ஸ்வா இஸினிஸப⁴ந்தி ஸத்தாஹம் தே³வதாஹி மோனேய்யகோலாஹலே கயிரமானே ஸத்தமே தி³வஸே இஸிபதனம் க³ந்த்வா ‘‘நாலகோ ஆக³மிஸ்ஸதி, தஸ்ஸ த⁴ம்மம் தே³ஸேஸ்ஸாமீ’’தி இமினா ச அபி⁴ஸந்தி⁴னா வரபு³த்³தா⁴ஸனே நிஸின்னம் தி³ஸ்வா நிஸப⁴ஸதி³ஸம் இஸினிஸப⁴ம் ப⁴க³வந்தம். பஸன்னோதி ஸஹ த³ஸ்ஸனேனேவ பஸன்னசித்தோ ஹுத்வா. மோனேய்யஸேட்ட²ந்தி ஞாணுத்தமம், மக்³க³ஞாணந்தி வுத்தம் ஹோதி. ஸமாக³தே அஸிதாவ்ஹயஸ்ஸ ஸாஸனேதி அஸிதஸ்ஸ இஸினோ ஓவாத³காலே அனுப்பத்தே. தேன ஹி – ‘‘யதா³ விவரதி த⁴ம்மமக்³க³ம், ததா³ க³ந்த்வா ஸமயம் பரிபுச்ச²மானோ சரஸ்ஸு தஸ்மிம் ப⁴க³வதி ப்³ரஹ்மசரிய’’ந்தி அனுஸிட்டோ², அயஞ்ச ஸோ காலோ. தேன வுத்தம் – ‘‘ஸமாக³தே அஸிதாவ்ஹயஸ்ஸ ஸாஸனே’’தி. ஸேஸமேத்த² பாகடமேவ.

அயம் தாவ வத்து²கா³தா²வண்ணனா.

705. புச்சா²கா³தா²த்³வயே அஞ்ஞாதமேதந்தி விதி³தம் மயா ஏதம். யதா²தத²ந்தி அவிபரீதம். கோ அதி⁴ப்பாயோ? யம் அஸிதோ ‘‘ஸம்போ³தி⁴யக்³க³ம் பு²ஸிஸ்ஸதாயம் குமாரோ’’தி ஞத்வா ‘‘பு³த்³தோ⁴தி கோ⁴ஸம் யத³ பரதோ ஸுணோஸி, ஸம்போ³தி⁴ப்பத்தோ விவரதி த⁴ம்மமக்³க³’’ந்தி மம் அவச, ததே³தம் மயா அஸிதஸ்ஸ வசனம் அஜ்ஜ ப⁴க³வந்தம் ஸக்கி²ம் தி³ஸ்வா ‘‘யதா²தத²மேவா’’தி அஞ்ஞாதந்தி. தம் தந்தி தஸ்மா தம். ஸப்³ப³த⁴ம்மான பாரகு³ந்தி ஹேமவதஸுத்தே வுத்தனயேன ச²ஹி ஆகாரேஹி. ஸப்³ப³த⁴ம்மானம் பாரக³தம்.

706. அனகா³ரியுபேதஸ்ஸாதி அனகா³ரியம் உபேதஸ்ஸ, பப்³ப³ஜிதஸ்ஸாதி அத்தோ². பி⁴க்கா²சரியம் ஜிகீ³ஸதோதி அரியேஹி ஆசிண்ணம் அனுபக்கிலிட்ட²ம் பி⁴க்கா²சரியம் பரியேஸமானஸ்ஸ. மோனேய்யந்தி முனீனம் ஸந்தகம். உத்தமம் பத³ந்தி உத்தமபடிபத³ம். ஸேஸமேத்த² பாகடமேவ.

707. அத²ஸ்ஸ ஏவம் புட்டோ² ப⁴க³வா ‘‘மோனேய்யம் தே உபஞ்ஞிஸ்ஸ’’ந்திஆதி³னா நயேன மோனேய்யபடிபத³ம் ப்³யாகாஸி. தத்த² உபஞ்ஞிஸ்ஸந்தி உபஞ்ஞாபேய்யம், விவரேய்யம் பஞ்ஞாபேய்யந்தி அத்தோ². து³க்கரம் து³ரபி⁴ஸம்ப⁴வந்தி காதுஞ்ச து³க்க²ம் கயிரமானஞ்ச ஸம்ப⁴விதும் ஸஹிதும் து³க்க²ந்தி வுத்தம் ஹோதி. அயம் பனேத்த² அதி⁴ப்பாயோ – அஹம் தே மோனேய்யம் பஞ்ஞாபேய்யம், யதி³ நம் காதும் வா அபி⁴ஸம்போ⁴தும் வா ஸுக²ம் ப⁴வேய்ய, ஏவம் பன து³க்கரம் து³ரபி⁴ஸம்ப⁴வம் புது²ஜ்ஜனகாலதோ பபு⁴தி கிலிட்ட²சித்தம் அனுப்பாதே³த்வா படிபஜ்ஜிதப்³ப³தோ. ததா² ஹி நம் ஏகஸ்ஸ பு³த்³த⁴ஸ்ஸ ஏகோவ ஸாவகோ கரோதி ச ஸம்போ⁴தி சாதி.

ஏவம் ப⁴க³வா மோனேய்யஸ்ஸ து³க்கரபா⁴வம் து³ரபி⁴ஸம்ப⁴வதஞ்ச த³ஸ்ஸேந்தோ நாலகஸ்ஸ உஸ்ஸாஹம் ஜனேத்வா தமஸ்ஸ வத்துகாமோ ஆஹ ‘‘ஹந்த³ தே நம் பவக்கா²மி, ஸந்த²ம்ப⁴ஸ்ஸு த³ள்ஹோ ப⁴வா’’தி. தத்த² ஹந்தா³தி ப்³யவஸாயத்தே² நிபாதோ. தே நம் பவக்கா²மீதி துய்ஹம் தம் மோனேய்யம் பவக்கா²மி. ஸந்த²ம்ப⁴ஸ்ஸூதி து³க்கரகரணஸமத்தே²ன வீரியூபத்த²ம்பே⁴ன அத்தானம் உபத்த²ம்ப⁴ய. த³ள்ஹோ ப⁴வாதி து³ரபி⁴ஸம்ப⁴வஸஹனஸமத்தா²ய அஸிதி²லபரக்கமதாய தி²ரோ ஹோதி. கிம் வுத்தம் ஹோதி? யஸ்மா த்வம் உபசிதபுஞ்ஞஸம்பா⁴ரோ, தஸ்மாஹம் ஏகந்தப்³யவஸிதோவ ஹுத்வா ஏவம் து³க்கரம் து³ரபி⁴ஸம்ப⁴வம்பி ஸமானம் துய்ஹம் தம் மோனேய்யம் பவக்கா²மி, ஸந்த²ம்ப⁴ஸ்ஸு த³ள்ஹோ ப⁴வாதி.

708. ஏவம் பரமஸல்லேக²ம் மோனேய்யவத்தம் வத்துகாமோ நாலகம் ஸந்த²ம்ப⁴னே த³ள்ஹீபா⁴வே ச நியோஜேத்வா பட²மம் தாவ கா³மூபனிப³த்³த⁴கிலேஸப்பஹானம் த³ஸ்ஸேந்தோ ‘‘ஸமானபா⁴க³’’ந்தி உபட்³ட⁴கா³த²மாஹ. தத்த² ஸமானபா⁴க³ந்தி ஸமபா⁴க³ம் ஏகஸதி³ஸம் நின்னானாகரணம். அக்குட்ட²வந்தி³தந்தி அக்கோஸஞ்ச வந்த³னஞ்ச.

இதா³னி யதா² தம் ஸமானபா⁴க³ம் கயிரதி, தம் உபாயம் த³ஸ்ஸேந்தோ ‘‘மனோபதோ³ஸ’’ந்தி உபட்³ட⁴கா³த²மாஹ. தஸ்ஸத்தோ² – அக்குட்டோ² மனோபதோ³ஸம் ரக்கே²ய்ய, வந்தி³தோ ஸந்தோ அனுண்ணதோ சரே, ரஞ்ஞாபி வந்தி³தோ ஸமானோ ‘‘மம் வந்த³தீ’’தி உத்³த⁴ச்சம் நாபஜ்ஜேய்ய.

709. இதா³னி அரஞ்ஞூபனிப³த்³த⁴கிலேஸப்பஹானம் த³ஸ்ஸேந்தோ ‘‘உச்சாவசா’’தி கா³த²மாஹ. தஸ்ஸத்தோ² – அரஞ்ஞஸஞ்ஞிதே தா³யேபி இட்டா²னிட்ட²வஸேன உச்சாவசா நானப்பகாரா ஆரம்மணா நிச்ச²ரந்தி, சக்கா²தீ³னம் ஆபாத²மாக³ச்ச²ந்தி, தே ச கோ² அக்³கி³ஸிகூ²பமா பரிளாஹஜனகட்டே²ன. யதா² வா ட³ய்ஹமானே வனே அக்³கி³ஸிகா² நானப்பகாரதாய உச்சாவசா நிச்ச²ரந்தி, ஸதூ⁴மாபி, விதூ⁴மாபி, நீலாபி, பீதாபி, ரத்தாபி, கு²த்³த³காபி, மஹந்தாபி, ஏவம் ஸீஹப்³யக்³க⁴மனுஸ்ஸாமனுஸ்ஸவிவித⁴விஹங்க³விருதபுப்ப²ப²லபல்லவாதி³பே⁴த³வஸேன நானப்பகாரதாய தா³யே உச்சாவசா ஆரம்மணா நிச்ச²ரந்தி பி⁴ம்ஸனகாபி, ரஜனீயாபி, தோ³ஸனீயாபி, மோஹனீயாபி. தேனாஹ – ‘‘உச்சாவசா நிச்ச²ரந்தி, தா³யே அக்³கி³ஸிகூ²பமா’’தி. ஏவம் நிச்ச²ரந்தேஸு ச உச்சாவசேஸு ஆரம்மணேஸு யா காசி உய்யானவனசாரிகம் க³தா ஸமானா பகதியா வா வனசாரினியோ கட்ட²ஹாரிகாத³யோ ரஹோக³தம் தி³ஸ்வா ஹஸிதலபிதருதி³தது³ன்னிவத்தா²தீ³ஹி நாரியோ முனிம் பலோபே⁴ந்தி, தா ஸு தம் மா பலோப⁴யும், தா நாரியோ தம் மா பலோப⁴யும். யதா² ந பலோபே⁴ந்தி, ததா² கரோஹீதி வுத்தம் ஹோதி.

710-11. ஏவமஸ்ஸ ப⁴க³வா கா³மே ச அரஞ்ஞே ச படிபத்திவிதி⁴ம் த³ஸ்ஸேத்வா இதா³னி ஸீலஸம்வரம் த³ஸ்ஸேந்தோ ‘‘விரதோ மேது²னா த⁴ம்மா’’தி கா³தா²த்³வயமாஹ. தத்த² ஹித்வா காமே பரோபரேதி மேது²னத⁴ம்மதோ அவஸேஸேபி ஸுந்த³ரே ச அஸுந்த³ரே ச பஞ்ச காமகு³ணே ஹித்வா. தப்பஹானேன ஹி மேது²னவிரதி ஸுஸம்பன்னா ஹோதி. தேனாஹ – ‘‘ஹித்வா காமே பரோபரே’’தி. அயமேத்த² அதி⁴ப்பாயோ. ‘‘அவிருத்³தோ⁴’’திஆதீ³னி பன பதா³னி ‘‘ந ஹனேய்ய, ந கா⁴தயே’’தி ஏத்த² வுத்தாய பாணாதிபாதாவேரமணியா ஸம்பத்தித³ஸ்ஸனத்த²ம் வுத்தானி. தத்ராயம் ஸங்கே²பவண்ணனா – பரபக்கி²யேஸு பாணேஸு அவிருத்³தோ⁴, அத்தபக்கி²யேஸு அஸாரத்தோ, ஸப்³பே³பி ஸதண்ஹனித்தண்ஹதாய தஸதா²வரே பாணே ஜீவிதுகாமதாய அமரிதுகாமதாய ஸுக²காமதாய து³க்க²படிகூலதாய ச ‘‘யதா² அஹம் ததா² ஏதே’’தி அத்தஸமானதாய தேஸு விரோத⁴ம் வினேந்தோ தேனேவ பகாரேன ‘‘யதா² ஏதே ததா² அஹ’’ந்தி பரேஸம் ஸமானதாய ச அத்தனி அனுரோத⁴ம் வினேந்தோ ஏவம் உப⁴யதா²பி அனுரோத⁴விரோத⁴விப்பஹீனோ ஹுத்வா மரணபடிகூலதாய அத்தானம் உபமம் கத்வா பாணேஸு யே கேசி தஸே வா தா²வரே வா பாணே ந ஹனேய்ய ஸாஹத்தி²காதீ³ஹி பயோகே³ஹி, ந கா⁴தயே ஆணத்திகாதீ³ஹீதி.

712. ஏவமஸ்ஸ மேது²னவிரதிபாணாதிபாதவிரதிமுகே²ன ஸங்கே²பதோ பாதிமோக்க²ஸம்வரஸீலம் வத்வா ‘‘ஹித்வா காமே’’திஆதீ³ஹி இந்த்³ரியஸம்வரஞ்ச த³ஸ்ஸேத்வா இதா³னி ஆஜீவபாரிஸுத்³தி⁴ம் த³ஸ்ஸேந்தோ ‘‘ஹித்வா இச்ச²ஞ்சா’’திஆதி³மாஹ. தஸ்ஸத்தோ² – யாயம் தண்ஹா ஏகம் லத்³தா⁴ து³தியம் இச்ச²தி, த்³வே லத்³தா⁴ ததியம், ஸதஸஹஸ்ஸம் லத்³தா⁴ தது³த்தரிம்பி இச்ச²தீதி ஏவம் அப்படிலத்³த⁴விஸயம் இச்ச²னதோ ‘‘இச்சா²’’தி வுச்சதி, யோ சாயம் படிலத்³த⁴விஸயலுப்³ப⁴னோ லோபோ⁴. தம் ஹித்வா இச்ச²ஞ்ச லோப⁴ஞ்ச யத்த² ஸத்தோ புது²ஜ்ஜனோ, யஸ்மிம் சீவராதி³பச்சயே தேஹி இச்சா²லோபே⁴ஹி புது²ஜ்ஜனோ ஸத்தோ லக்³கோ³ படிப³த்³தோ⁴ திட்ட²தி, தத்த² தம் உப⁴யம்பி ஹித்வா பச்சயத்த²ம் ஆஜீவபாரிஸுத்³தி⁴ம் அவிரோதே⁴ந்தோ ஞாணசக்கு²னா சக்கு²மா ஹுத்வா இமம் மோனேய்யபடிபத³ம் படிபஜ்ஜேய்ய. ஏவஞ்ஹி படிபன்னோ தரேய்ய நரகம் இமம், து³ப்பூரணட்டே²ன நரகஸஞ்ஞிதம் மிச்சா²ஜீவஹேதுபூ⁴தம் இமம் பச்சயதண்ஹம் தரேய்ய, இமாய வா படிபதா³ய தரேய்யாதி வுத்தம் ஹோதி.

713. ஏவம் பச்சயதண்ஹாபஹானமுகே²ன ஆஜீவபாரிஸுத்³தி⁴ம் த³ஸ்ஸேத்வா இதா³னி போ⁴ஜனே மத்தஞ்ஞுதாமுகே²ன பச்சயபரிபோ⁴க³ஸீலம் தத³னுஸாரேன ச யாவ அரஹத்தப்பத்தி, தாவ படிபத³ம் த³ஸ்ஸேந்தோ ‘‘ஊனூத³ரோ’’தி கா³த²மாஹ. தஸ்ஸத்தோ² – த⁴ம்மேன ஸமேன லத்³தே⁴ஸு இதரீதரசீவராதீ³ஸு பச்சயேஸு ஆஹாரம் தாவ ஆஹாரேந்தோ –

‘‘சத்தாரோ பஞ்ச ஆலோபே, அபு⁴த்வா உத³கம் பிவே;

அலம் பா²ஸுவிஹாராய, பஹிதத்தஸ்ஸ பி⁴க்கு²னோ’’தி. (தே²ரகா³. 983) –

வுத்தனயேன ஊனஉத³ரோ அஸ்ஸ, ந வாதப⁴ரிதப⁴ஸ்தா விய உத்³து⁴மாதுத³ரோ, ப⁴த்தஸம்மத³பச்சயா தி²னமித்³த⁴ம் பரிஹரேய்யாதி வுத்தம் ஹோதி. ஊனூத³ரோ ஹோந்தோபி ச மிதாஹாரோ அஸ்ஸ போ⁴ஜனே மத்தஞ்ஞூ, ‘‘நேவ த³வாயா’’திஆதி³னா பச்சவேக்க²ணேன கு³ணதோ தோ³ஸதோ ச பரிச்சி²ன்னாஹாரோ. ஏவம் மிதாஹாரோ ஸமானோபி பச்சயது⁴தங்க³பரியத்திஅதி⁴க³மவஸேன சதுப்³பி³தா⁴ய அப்பிச்ச²தாய அப்பிச்சோ² அஸ்ஸ. ஏகம்ஸேன ஹி மோனேய்யபடிபத³ம் படிபன்னேன பி⁴க்கு²னா ஏவம் அப்பிச்சே²ன ப⁴விதப்³ப³ம். தத்த² ஏகேகஸ்மிம் பச்சயே தீஹி ஸந்தோஸேஹி ஸந்துஸ்ஸனா பச்சயப்பிச்ச²தா. து⁴தங்க³த⁴ரஸ்ஸேவ ஸதோ ‘‘து⁴தவாதி மம் பரே ஜானந்தூ’’தி அனிச்ச²னதா து⁴தங்க³ப்பிச்ச²தா. ப³ஹுஸ்ஸுதஸ்ஸேவ ஸதோ ‘‘ப³ஹுஸ்ஸுதோதி மம் பரே ஜானந்தூ’’தி அனிச்ச²னதா பரியத்திஅப்பிச்ச²தா மஜ்ஜ²ந்திகத்தே²ரஸ்ஸ விய. அதி⁴க³மஸம்பன்னஸ்ஸேவ ஸதோ ‘‘அதி⁴க³தோ அயம் குஸலம் த⁴ம்மந்தி மம் பரே ஜானந்தூ’’தி அனிச்ச²னதா அதி⁴க³மப்பிச்ச²தா. ஸா ச அரஹத்தாதி⁴க³மதோ ஓரம் வேதி³தப்³பா³. அரஹத்தாதி⁴க³மத்த²ஞ்ஹி அயம் படிபதா³தி. ஏவம் அப்பிச்சோ²பி ச அரஹத்தமக்³கே³ன தண்ஹாலோலுப்பம் ஹித்வா அலோலுபோ அஸ்ஸ. ஏவம் அலோலுபோ ஹி ஸதா³ இச்சா²ய நிச்சா²தோ அனிச்சோ² ஹோதி நிப்³பு³தோ, யாய இச்சா²ய சா²தா ஹோந்தி ஸத்தா கு²ப்பிபாஸாதுரா விய அதித்தா, தாய இச்சா²ய அனிச்சோ² ஹோதி அனிச்ச²த்தா ச நிச்சா²தோ ஹோதி அனாதுரோ பரமதித்திப்பத்தோ. ஏவம் நிச்சா²தத்தா நிப்³பு³தோ ஹோதி வூபஸந்தஸப்³ப³கிலேஸபரிளாஹோதி ஏவமேத்த² உப்படிபாடியா யோஜனா வேதி³தப்³பா³.

714. ஏவம் யாவ அரஹத்தப்பத்தி, தாவபடிபத³ம் கதே²த்வா இதா³னி தம் படிபத³ம் படிபன்னஸ்ஸ பி⁴க்கு²னோ அரஹத்தப்பத்தினிட்ட²ம் து⁴தங்க³ஸமாதா³னம் ஸேனாஸனவத்தஞ்ச கதே²ந்தோ ‘‘ஸ பிண்ட³சார’’ந்தி கா³தா²த்³வயமாஹ. தத்த² ஸ பிண்ட³சாரம் சரித்வாதி ஸோ பி⁴க்கு² பி⁴க்க²ம் சரித்வா ப⁴த்தகிச்சம் வா கத்வா. வனந்தமபி⁴ஹாரயேதி அபபஞ்சிதோ கி³ஹிபபஞ்சேன வனம் ஏவ க³ச்சே²ய்ய. உபட்டி²தோ ருக்க²மூலஸ்மிந்தி ருக்க²மூலே டி²தோ வா ஹுத்வா. ஆஸனூபக³தோதி ஆஸனம் உபக³தோ வா ஹுத்வா, நிஸின்னோதி வுத்தம் ஹோதி. முனீதி மோனேய்யபடிபத³ம் படிபன்னோ. ஏத்த² ச ‘‘பிண்ட³சாரம் சரித்வா’’தி இமினா பிண்ட³பாதிகங்க³ம் வுத்தம். யஸ்மா பன உக்கட்ட²பிண்ட³பாதிகோ ஸபதா³னசாரீ ஏகாஸனிகோ பத்தபிண்டி³கோ க²லுபச்சா²ப⁴த்திகோ ச ஹோதியேவ, தேசீவரிகபம்ஸுகூலம்பி ச ஸமாதி³யதேவ, தஸ்மா இமானிபி ச² வுத்தானேவ ஹோந்தி. ‘‘வனந்தமபி⁴ஹாரயே’’தி இமினா பன ஆரஞ்ஞிகங்க³ம் வுத்தம், ‘‘உபட்டி²தோ ருக்க²மூலஸ்மி’’ந்தி இமினா ருக்க²மூலிகங்க³ம், ‘‘ஆஸனூபக³தோ’’தி இமினா நேஸஜ்ஜிகங்க³ம். யதா²க்கமம் பன ஏதேஸம் அனுலோமத்தா அப்³போ⁴காஸிகயதா²ஸந்த²திகஸோஸானிகங்கா³னி வுத்தானியேவ ஹோந்தீதி ஏவமேதாய கா³தா²ய தேரஸ து⁴தங்கா³னி நாலகத்தே²ரஸ்ஸ கதே²ஸி.

715. ஸ ஜா²னபஸுதோ தீ⁴ரோதி ஸோ அனுப்பன்னஸ்ஸ ஜா²னஸ்ஸ உப்பாத³னேன உப்பன்னஸ்ஸ ஆவஜ்ஜனஸமாபஜ்ஜனாதி⁴ட்டா²னவுட்டா²னபச்சவேக்க²ணேஹி ச ஜா²னேஸு பஸுதோ அனுயுத்தோ. தீ⁴ரோதி தி⁴திஸம்பன்னோ. வனந்தே ரமிதோ ஸியாதி வனே அபி⁴ரதோ ஸியா, கா³மந்தஸேனாஸனே நாபி⁴ரமேய்யாதி வுத்தம் ஹோதி. ஜா²யேத² ருக்க²மூலஸ்மிம், அத்தானமபி⁴தோஸயந்தி ந கேவலம் லோகியஜ்ஜா²னபஸுதோயேவ ஸியா, அபிச கோ² தஸ்மிம்யேவ ருக்க²மூலே ஸோதாபத்திமக்³கா³தி³ஸம்பயுத்தேன லோகுத்தரஜ்ஜா²னேனாபி அத்தானம் அதீவ தோஸேந்தோ ஜா²யேத². பரமஸ்ஸாஸப்பத்தியா ஹி லோகுத்தரஜ்ஜா²னேனேவ சித்தம் அதீவ துஸ்ஸதி, ந அஞ்ஞேன. தேனாஹ – ‘‘அத்தானமபி⁴தோஸய’’ந்தி. ஏவமிமாய கா³தா²ய ஜா²னபஸுததாய வனந்தஸேனாஸனாபி⁴ரதிம் அரஹத்தஞ்ச கதே²ஸி.

716. இதா³னி யஸ்மா இமம் த⁴ம்மதே³ஸனம் ஸுத்வா நாலகத்தே²ரோ வனந்தமபி⁴ஹாரேத்வா நிராஹாரோபி படிபதா³பூரணே அதீவ உஸ்ஸுக்கோ அஹோஸி, நிராஹாரேன ச ஸமணத⁴ம்மம் காதும் ந ஸக்கா. ததா² கரோந்தஸ்ஸ ஹி ஜீவிதம் நப்பவத்ததி, கிலேஸே பன அனுப்பாதே³ந்தேன ஆஹாரோ பரியேஸிதப்³போ³, அயமேத்த² ஞாயோ. தஸ்மா தஸ்ஸ ப⁴க³வா அபராபரேஸுபி தி³வஸேஸு பிண்டா³ய சரிதப்³ப³ம், கிலேஸா பன ந உப்பாதே³தப்³பா³தி த³ஸ்ஸனத்த²ம் அரஹத்தப்பத்தினிட்ட²ம்யேவ பி⁴க்கா²சாரவத்தம் கதே²ந்தோ ‘‘ததோ ரத்யா விவஸானே’’திஆதி³கா ச² கா³தா²யோ அபா⁴ஸி. தத்த² ததோதி ‘‘ஸ பிண்ட³சாரம் சரித்வா, வனந்தமபி⁴ஹாரயே’’தி ஏத்த² வுத்தபிண்ட³சாரவனந்தாபி⁴ஹாரதோ உத்தரிபி. ரத்யா விவஸானேதி ரத்திஸமதிக்கமே, து³தியதி³வஸேதி வுத்தம் ஹோதி. கா³மந்தமபி⁴ஹாரயேதி ஆபி⁴ஸமாசாரிகவத்தம் கத்வா யாவ பி⁴க்கா²சாரவேலா, தாவ விவேகமனுப்³ரூஹேத்வா க³தபச்சாக³தவத்தே வுத்தனயேன கம்மட்டா²னம் மனஸி கரோந்தோ கா³மம் க³ச்சே²ய்ய. அவ்ஹானம் நாபி⁴னந்தே³ய்யாதி ‘‘ப⁴ந்தே, அம்ஹாகம் க⁴ரே பு⁴ஞ்ஜிதப்³ப³’’ந்தி நிமந்தனம், ‘‘தே³தி நு கோ² ந தே³தி நு கோ² ஸுந்த³ரம் நு கோ² தே³தி அஸுந்த³ரம் நு கோ² தே³தீ’’தி ஏவரூபம் விதக்கம் போ⁴ஜனஞ்ச படிபதா³பூரகோ பி⁴க்கு² நாபி⁴னந்தே³ய்ய, நப்படிக்³க³ண்ஹேய்யாதி வுத்தம் ஹோதி. யதி³ பன ப³லக்காரேன பத்தம் க³ஹேத்வா பூரேத்வா தே³ந்தி, பரிபு⁴ஞ்ஜித்வா ஸமணத⁴ம்மோ காதப்³போ³, து⁴தங்க³ம் ந குப்பதி, தது³பாதா³ய பன தம் கா³மம் ந பவிஸிதப்³ப³ம். அபி⁴ஹாரஞ்ச கா³மதோதி ஸசே கா³மம் பவிட்ட²ஸ்ஸ பாதிஸதேஹிபி ப⁴த்தம் அபி⁴ஹரந்தி, தம்பி நாபி⁴னந்தே³ய்ய, ததோ ஏகஸித்த²ம்பி நப்படிக்³க³ண்ஹேய்ய, அஞ்ஞத³த்து² க⁴ரபடிபாடியா பிண்ட³பாதமேவ சரேய்யாதி.

717. ந முனீ கா³மமாக³ம்ம, குலேஸு ஸஹஸா சரேதி ஸோ ச மோனத்தா²ய படிபன்னகோ முனி கா³மம் க³தோ ஸமானோ குலேஸு ஸஹஸா ந சரே, ஸஹஸோகிதாதி³அனனுலோமிகம் கி³ஹிஸம்ஸக்³க³ம் ந ஆபஜ்ஜேய்யாதி வுத்தம் ஹோதி. கா⁴ஸேஸனம் சி²ன்னகதோ², ந வாசம் பயுதம் ப⁴ணேதி சி²ன்னகதோ² விய ஹுத்வா ஓபா⁴ஸபரிகதா²னிமித்தவிஞ்ஞத்திபயுத்தம் கா⁴ஸேஸனவாசம் ந ப⁴ணேய்ய. ஸசே ஆகங்கே²ய்ய, கி³லானோ ஸமானோ கே³லஞ்ஞபடிபா³ஹனத்தா²ய ப⁴ணேய்ய. ஸேனாஸனத்தா²ய வா விஞ்ஞத்திம் ட²பேத்வா ஓபா⁴ஸபரிகதா²னிமித்தபயுத்தம், அவஸேஸபச்சயத்தா²ய பன அகி³லானோ நேவ கிஞ்சி ப⁴ணேய்யாதி.

718-9. அலத்த²ம் யதி³த³ந்தி இமிஸ்ஸா பன கா³தா²ய அயமத்தோ² – கா³மம் பிண்டா³ய பவிட்டோ² அப்பமத்தகேபி கிஸ்மிஞ்சி லத்³தே⁴ ‘‘அலத்த²ம் யம் இத³ம் ஸாதூ⁴’’தி சிந்தேத்வா அலத்³தே⁴ ‘‘நாலத்த²ம் குஸல’’ந்தி தம்பி ‘‘ஸுந்த³ர’’ந்தி சிந்தேத்வா உப⁴யேனேவ லாபா⁴லாபே⁴ன ஸோ தாதீ³ நிப்³பி³காரோ ஹுத்வா ருக்க²ம்வுபனிவத்ததி, யதா²பி புரிஸோ ப²லக³வேஸீ ருக்க²ம் உபக³ம்ம ப²லம் லத்³தா⁴பி அலத்³தா⁴பி அனனுனீதோ அப்படிஹதோ மஜ்ஜ²த்தோயேவ ஹுத்வா க³ச்ச²தி, ஏவம் குலம் உபக³ம்ம லாப⁴ம் லத்³தா⁴பி அலத்³தா⁴பி மஜ்ஜ²த்தோவ ஹுத்வா க³ச்ச²தீதி. ஸ பத்தபாணீ தி கா³தா² உத்தானத்தா²வ.

720. உச்சாவசாதி இமிஸ்ஸா கா³தா²ய ஸம்ப³ந்தோ⁴ – ஏவம் பி⁴க்கா²சாரவத்தஸம்பன்னோ ஹுத்வாபி தாவதகேனேவ துட்டி²ம் அனாபஜ்ஜித்வா படிபத³ம் ஆரோதே⁴ய்ய. படிபத்திஸாரஞ்ஹி ஸாஸனம். ஸா சாயம் உச்சாவசா…பே… முதந்தி. தஸ்ஸத்தோ² – ஸா சாயம் மக்³க³படிபதா³ உத்தமனிஹீனபே⁴த³தோ உச்சாவசா பு³த்³த⁴ஸமணேன பகாஸிதா. ஸுகா²படிபதா³ ஹி கி²ப்பாபி⁴ஞ்ஞா உச்சா, து³க்கா²படிபதா³ த³ந்தா⁴பி⁴ஞ்ஞா அவசா. இதரா த்³வே ஏகேனங்கே³ன உச்சா, ஏகேன அவசா. பட²மா ஏவ வா உச்சா, இதரா திஸ்ஸோபி அவசா. தாய சேதாய உச்சாய அவசாய வா படிபதா³ய ந பாரம் தி³கு³ணம் யந்தி. ‘‘து³கு³ண’’ந்தி வா பாடோ², ஏகமக்³கே³ன த்³விக்க²த்தும் நிப்³பா³னம் ந யந்தீதி அத்தோ². கஸ்மா? யேன மக்³கே³ன யே கிலேஸா பஹீனா, தேஸம் புன அப்பஹாதப்³ப³தோ. ஏதேன பரிஹானத⁴ம்மாபா⁴வம் தீ³பேதி. நயித³ம் ஏககு³ணம் முதந்தி தஞ்ச இத³ம் பாரம் ஏகக்க²த்தும்யேவ பு²ஸனாரஹம்பி ந ஹோதி. கஸ்மா? ஏகேன மக்³கே³ன ஸப்³ப³கிலேஸப்பஹானாபா⁴வதோ. ஏதேன ஏகமக்³கே³னேவ அரஹத்தாபா⁴வம் தீ³பேதி.

721. இதா³னி படிபதா³னிஸம்ஸம் த³ஸ்ஸேந்தோ ‘‘யஸ்ஸ ச விஸதா’’தி கா³த²மாஹ. தஸ்ஸத்தோ² – யஸ்ஸ ச ஏவம் படிபன்னஸ்ஸ பி⁴க்கு²னோ தாய படிபதா³ய பஹீனத்தா அட்ட²ஸததண்ஹாவிசரிதபா⁴வேன விஸதத்தா விஸதா தண்ஹா நத்தி², தஸ்ஸ கிலேஸஸோதச்சே²தே³ன சி²ன்னஸோதஸ்ஸ குஸலாகுஸலப்பஹானேன கிச்சாகிச்சப்பஹீனஸ்ஸ ராக³ஜோ வா தோ³ஸஜோ வா அப்பமத்தகோபி பரிளாஹோ ந விஜ்ஜதீதி.

722. இதா³னி யஸ்மா இமா கா³தா²யோ ஸுத்வா நாலகத்தே²ரஸ்ஸ சித்தம் உத³பாதி³ – ‘‘யதி³ ஏத்தகம் மோனேய்யம் ஸுகரம் ந து³க்கரம், ஸக்கா அப்பகஸிரேன பூரேது’’ந்தி, தஸ்மாஸ்ஸ ப⁴க³வா ‘‘து³க்கரமேவ மோனேய்ய’’ந்தி த³ஸ்ஸேந்தோ புன ‘‘மோனேய்யம் தே உபஞ்ஞிஸ்ஸ’’ந்திஆதி³மாஹ. தத்த² உபஞ்ஞிஸ்ஸந்தி உபஞ்ஞாபேய்யம், கத²யிஸ்ஸந்தி வுத்தம் ஹோதி. கு²ரதா⁴ரா உபமா அஸ்ஸாதி கு²ரதா⁴ரூபமோ. ப⁴வேதி ப⁴வேய்ய. கோ அதி⁴ப்பாயோ? மோனேய்யம் படிபன்னோ பி⁴க்கு² கு²ரதா⁴ரம் உபமம் கத்வா பச்சயேஸு வத்தேய்ய. யதா² மது⁴தி³த்³த⁴ம் கு²ரதா⁴ரம் லிஹந்தோ, சே²த³தோ, ஜிவ்ஹம் ரக்க²தி, ஏவம் த⁴ம்மேன லத்³தே⁴ பச்சயே பரிபு⁴ஞ்ஜந்தோ சித்தம் கிலேஸுப்பத்திதோ ரக்கே²ய்யாதி வுத்தம் ஹோதி. பச்சயா ஹி பரிஸுத்³தே⁴ன ஞாயேன லத்³து⁴ஞ்ச அனவஜ்ஜபரிபோ⁴கே³ன பரிபு⁴ஞ்ஜிதுஞ்ச ந ஸுகே²ன ஸக்காதி ப⁴க³வா பச்சயனிஸ்ஸிதமேவ ப³ஹுஸோ ப⁴ணதி. ஜிவ்ஹாய தாலுமாஹச்ச, உத³ரே ஸஞ்ஞதோ ஸியாதி ஜிவ்ஹாய தாலும் உப்பீளேத்வாபி ரஸதண்ஹம் வினோதே³ந்தோ கிலிட்டே²ன மக்³கே³ன உப்பன்னபச்சயே அஸேவந்தோ உத³ரே ஸம்யதோ ஸியா.

723. அலீனசித்தோ ச ஸியாதி நிச்சம் குஸலானம் த⁴ம்மானம் பா⁴வனாய அட்டி²தகாரிதாய அகுஸீதசித்தோ ச ப⁴வேய்ய. ந சாபி ப³ஹு சிந்தயேதி ஞாதிஜனபதா³மரவிதக்கவஸேன ச ப³ஹும் ந சிந்தேய்ய. நிராமக³ந்தோ⁴ அஸிதோ, ப்³ரஹ்மசரியபராயணோதி நிக்கிலேஸோ ச ஹுத்வா தண்ஹாதி³ட்டீ²ஹி கிஸ்மிஞ்சி ப⁴வே அனிஸ்ஸிதோ ஸிக்கா²த்தயஸகலஸாஸனப்³ரஹ்மசரியபராயணோ ஏவ ப⁴வேய்ய.

724-5. ஏகாஸனஸ்ஸாதி விவித்தாஸனஸ்ஸ. ஆஸனமுகே²ன சேத்த² ஸப்³ப³இரியாபதா² வுத்தா. யதோ ஸப்³ப³இரியாபதே²ஸு ஏகீபா⁴வஸ்ஸ ஸிக்கே²ய்யாதி வுத்தம் ஹோதீதி வேதி³தப்³ப³ம். ஏகாஸனஸ்ஸாதி ச ஸம்பதா³னவசனமேதம். ஸமணூபாஸனஸ்ஸ சாதி ஸமணேஹி உபாஸிதப்³ப³ஸ்ஸ அட்ட²திம்ஸாரம்மணபா⁴வனானுயோக³ஸ்ஸ, ஸமணானம் வா உபாஸனபூ⁴தஸ்ஸ அட்ட²திம்ஸாரம்மணபே⁴த³ஸ்ஸேவ. இத³ம்பி ஸம்பதா³னவசனமேவ, உபாஸனத்த²ந்தி வுத்தம் ஹோதி. ஏத்த² ச ஏகாஸனேன காயவிவேகோ, ஸமணூபாஸனேன சித்தவிவேகோ வுத்தோ ஹோதீதி வேதி³தப்³போ³. ஏகத்தம் மோனமக்கா²தந்தி ஏவமித³ம் காயசித்தவிவேகவஸேன ‘‘ஏகத்தம் மோன’’ந்தி அக்கா²தம். ஏகோ சே அபி⁴ரமிஸ்ஸஸீதி இத³ம் பன உத்தரகா³தா²பேக்க²ம் பத³ம், ‘‘அத² பா⁴ஹிஸி த³ஸதி³ஸா’’தி இமினா அஸ்ஸ ஸம்ப³ந்தோ⁴.

பா⁴ஹிஸீதி பா⁴ஸிஸ்ஸஸி பகாஸேஸ்ஸஸி. இமம் படிபத³ம் பா⁴வேந்தோ ஸப்³ப³தி³ஸாஸு கித்தியா பாகடோ ப⁴விஸ்ஸஸீதி வுத்தம் ஹோதி. ஸுத்வா தீ⁴ரானந்திஆதீ³னம் பன சதுன்னம் பதா³னம் அயமத்தோ² – யேன ச கித்திகோ⁴ஸேன பா⁴ஹிஸி த³ஸதி³ஸா தம் தீ⁴ரானம் ஜா²யீனம் காமசாகி³னம் நிகோ⁴ஸம் ஸுத்வா அத² த்வம் தேன உத்³த⁴ச்சம் அனாபஜ்ஜித்வா பி⁴ய்யோ ஹிரிஞ்ச ஸத்³த⁴ஞ்ச கரேய்யாஸி, தேன கோ⁴ஸேன ஹராயமானோ ‘‘நிய்யானிகபடிபதா³ அய’’ந்தி ஸத்³த⁴ம் உப்பாதே³த்வா உத்தரி படிபத்திமேவ ப்³ரூஹேய்யாஸி. மாமகோதி ஏவஞ்ஹி ஸந்தே மம ஸாவகோ ஹோதீதி.

726. தம் நதீ³ஹீதி யம் தம் மயா ‘‘ஹிரிஞ்ச ஸத்³த⁴ஞ்ச பி⁴ய்யோ குப்³பே³தா²’’தி வத³தா ‘‘உத்³த⁴ச்சம் ந காதப்³ப³’’ந்தி வுத்தம், தம் இமினா நதீ³னித³ஸ்ஸனேனாபி ஜானாத², தப்³பி³பரியாயஞ்ச ஸோப்³பே⁴ஸு ச பத³ரேஸுச ஜானாத². ஸோப்³பே⁴ஸூதி மாதிகாஸு. பத³ரேஸூதி த³ரீஸு. கத²ம்? ஸணந்தா யந்தி குஸோப்³பா⁴, துண்ஹீ யந்தி மஹோத³தீ⁴தி. குஸோப்³பா⁴ ஹி ஸோப்³ப⁴பத³ராதி³பே⁴தா³ ஸப்³பா³பி குன்னதி³யோ ஸணந்தா ஸத்³த³ம் கரோந்தா உத்³த⁴தா ஹுத்வா யந்தி, க³ங்கா³தி³பே⁴தா³ பன மஹானதி³யோ துண்ஹீ யந்தி, ஏவம் ‘‘மோனேய்யம் பூரேமீ’’தி உத்³த⁴தோ ஹோதி அமாமகோ, மாமகோ பன ஹிரிஞ்ச ஸத்³த⁴ஞ்ச உப்பாதே³த்வா நீசசித்தோவ ஹோதி.

727-9. கிஞ்ச பி⁴ய்யோ – யதூ³னகம்…பே… பண்டி³தோதி. தத்த² ஸியா – ஸசே அட்³ட⁴கும்பூ⁴பமோ பா³லோ ஸணந்ததாய, ரஹதோ³ பூரோவ பண்டி³தோ ஸந்ததாய, அத² கஸ்மா பு³த்³த⁴ஸமணோ ஏவம் த⁴ம்மதே³ஸனாப்³யாவடோ ஹுத்வா ப³ஹும் பா⁴ஸதீதி இமினா ஸம்ப³ந்தே⁴ன ‘‘யம் ஸமணோ’’தி கா³த²மாஹ. தஸ்ஸத்தோ² – யம் பு³த்³த⁴ஸமணோ ப³ஹும் பா⁴ஸதி உபேதம் அத்த²ஸஞ்ஹிதம், அத்து²பேதம் த⁴ம்முபேதஞ்ச ஹிதேன ச ஸம்ஹிதம், தம் ந உத்³த⁴ச்சேன, அபிச கோ² ஜானம் ஸோ த⁴ம்மம் தே³ஸேதி தி³வஸம்பி தே³ஸேந்தோ நிப்பபஞ்சோவ ஹுத்வா. தஸ்ஸ ஹி ஸப்³ப³ம் வசீகம்மம் ஞாணானுபரிவத்தி. ஏவம் தே³ஸேந்தோ ச ‘‘இத³மஸ்ஸ ஹிதம் இத³மஸ்ஸ ஹித’’ந்தி நானப்பகாரதோ ஜானம் ஸோ ப³ஹு பா⁴ஸதி, ந கேவலம் ப³ஹுபா⁴ணிதாய. அவஸானகா³தா²ய ஸம்ப³ந்தோ⁴ – ஏவம் தாவ ஸப்³ப³ஞ்ஞுதஞ்ஞாணேன ஸமன்னாக³தோ பு³த்³த⁴ஸமணோ ஜானம் ஸோ த⁴ம்மம் தே³ஸேதி, ஜானம் ஸோ ப³ஹு பா⁴ஸதி. தேன தே³ஸிதம் பன த⁴ம்மம் நிப்³பே³த⁴பா⁴கி³யேனேவ ஞாணேன யோ ச ஜானம் ஸம்யதத்தோ, ஜானம் ந ப³ஹு பா⁴ஸதி, ஸ முனி மோனமரஹதி, ஸ முனி மோனமஜ்ஜ²கா³தி. தஸ்ஸத்தோ² – தம் த⁴ம்மம் ஜானந்தோ ஸம்யதத்தோ கு³த்தசித்தோ ஹுத்வா யம் பா⁴ஸிதம் ஸத்தானம் ஹிதஸுகா²வஹம் ந ஹோதி, தம் ஜானம் ந ப³ஹு பா⁴ஸதி. ஸோ ஏவம்விதோ⁴ மோனத்த²ம் படிபன்னகோ முனி மோனேய்யபடிபதா³ஸங்கா²தம் மோனம் அரஹதி. ந கேவலஞ்ச அரஹதியேவ, அபிச கோ² பன ஸ முனி அரஹத்தமக்³க³ஞாணஸங்கா²தம் மோனம் அஜ்ஜ²கா³ இச்சேவ வேதி³தப்³போ³தி அரஹத்தனிகூடேன தே³ஸனம் நிட்டா²பேஸி.

தம் ஸுத்வா நாலகத்தே²ரோ தீஸு டா²னேஸு அப்பிச்சோ² அஹோஸி த³ஸ்ஸனே ஸவனே புச்சா²யாதி. ஸோ ஹி தே³ஸனாபரியோஸானே பஸன்னசித்தோ ப⁴க³வந்தம் வந்தி³த்வா வனம் பவிட்டோ², புன ‘‘அஹோ வதாஹம் ப⁴க³வந்தம் பஸ்ஸேய்ய’’ந்தி லோலபா⁴வம் ந ஜனேஸி. அயமஸ்ஸ த³ஸ்ஸனே அப்பிச்ச²தா. ததா² ‘‘அஹோ வதாஹம் புன த⁴ம்மதே³ஸனம் ஸுணேய்ய’’ந்தி லோலபா⁴வம் ந ஜனேஸி. அயமஸ்ஸ ஸவனே அப்பிச்ச²தா. ததா² ‘‘அஹோ வதாஹம் புன மோனேய்யபடிபத³ம் புச்சே²ய்ய’’ந்தி லோலபா⁴வம் ந ஜனேஸி. அயமஸ்ஸ புச்சா²ய அப்பிச்ச²தா.

ஸோ ஏவம் அப்பிச்சோ² ஸமானோ பப்³ப³தபாத³ம் பவிஸித்வா ஏகவனஸண்டே³ த்³வே தி³வஸானி ந வஸி, ஏகருக்க²மூலே த்³வே தி³வஸானி ந நிஸீதி³, ஏககா³மே த்³வே தி³வஸானி பிண்டா³ய ந பாவிஸி. இதி வனதோ வனம், ருக்க²தோ ருக்க²ம், கா³மதோ கா³மம் ஆஹிண்ட³ந்தோ அனுரூபபடிபத³ம் படிபஜ்ஜித்வா அக்³க³ப²லே பதிட்டா²ஸி. அத² யஸ்மா மோனேய்யபடிபத³ம் உக்கட்ட²ம் கத்வா பூரேந்தோ பி⁴க்கு² ஸத்தேவ மாஸானி ஜீவதி, மஜ்ஜி²மம் கத்வா பூரேந்தோ ஸத்த வஸ்ஸானி, மந்த³ம் கத்வா பூரேந்தோ ஸோளஸ வஸ்ஸானி. அயஞ்ச உக்கட்ட²ம் கத்வா பூரேஸி, தஸ்மா ஸத்த மாஸே ட²த்வா அத்தனோ ஆயுஸங்கா²ரபரிக்க²யம் ஞத்வா ந்ஹாயித்வா நிவாஸேத்வா காயப³ந்த⁴னம் ப³ந்தி⁴த்வா தி³கு³ணம் ஸங்கா⁴டிம் பாருபித்வா த³ஸப³லாபி⁴முகோ² பஞ்சபதிட்டி²தம் வந்தி³த்வா அஞ்ஜலிம் பக்³க³ஹேத்வா ஹிங்கு³லகபப்³ப³தம் நிஸ்ஸாய டி²தகோவ அனுபாதி³ஸேஸாய நிப்³பா³னதா⁴துயா பரினிப்³பா³யி. தஸ்ஸ பரினிப்³பு³தபா⁴வம் ஞத்வா ப⁴க³வா பி⁴க்கு²ஸங்கே⁴ன ஸத்³தி⁴ம் தத்த² க³ந்த்வா ஸரீரகிச்சம் கத்வா தா⁴துயோ கா³ஹாபேத்வா சேதியம் பதிட்டா²பேத்வா அக³மாஸீதி.

பரமத்த²ஜோதிகாய கு²த்³த³க-அட்ட²கதா²ய

ஸுத்தனிபாத-அட்ட²கதா²ய நாலகஸுத்தவண்ணனா நிட்டி²தா.