8. ஸல்லஸுத்தவண்ணனா

580. அனிமித்தந்தி ஸல்லஸுத்தம். கா உப்பத்தி? ப⁴க³வதோ கிர உபட்டா²கோ ஏகோ உபாஸகோ, தஸ்ஸ புத்தோ காலமகாஸி. ஸோ புத்தஸோகாபி⁴பூ⁴தோ ஸத்தாஹம் நிராஹாரோ அஹோஸி. தம் அனுகம்பந்தோ ப⁴க³வா தஸ்ஸ க⁴ரம் க³ந்த்வா ஸோகவினோத³னத்த²ம் இமம் ஸுத்தமபா⁴ஸி.

தத்த² அனிமத்தந்தி கிரியாகாரனிமித்தவிரஹிதம். யதா² ஹி ‘‘யதா³ஹம் அக்கி²ம் வா நிக²ணிஸ்ஸாமி, ப⁴முகம் வா உக்கி²பிஸ்ஸாமி, தேன நிமித்தேன தம் ப⁴ண்ட³ம் அவஹரா’’திஆதீ³ஸு கிரியாகாரனிமித்தமத்தி², ந ஏவம் ஜீவிதே. ந ஹி ஸக்கா லத்³து⁴ம் ‘‘யாவாஹம் இத³ம் வா இத³ம் வா கரோமி, தாவ த்வம் ஜீவ, மா மீயா’’தி. அனஞ்ஞாதந்தி அதோ ஏவ ந ஸக்கா ஏகம்ஸேன அஞ்ஞாதும் ‘‘ஏத்தகம் வா ஏத்தகம் வா காலம் இமினா ஜீவிதப்³ப³’’ந்தி க³தியா ஆயுபரியந்தவஸேன வா. யதா² ஹி சாதுமஹாராஜிகாதீ³னம் பரிமிதம் ஆயு, ந ததா² மச்சானம், ஏவம்பி ஏகம்ஸேன அனஞ்ஞாதம்.

கஸிரந்தி அனேகபச்சயபடிப³த்³த⁴வுத்திபா⁴வதோ கிச்ச²ம் ந ஸுக²யாபனீயம். ததா² ஹி தம் அஸ்ஸாஸபடிப³த்³த⁴ஞ்ச, பஸ்ஸாஸபடிப³த்³த⁴ஞ்ச, மஹாபூ⁴தபடிப³த்³த⁴ஞ்ச, கப³ளீகாராஹாரபடிப³த்³த⁴ஞ்ச, உஸ்மாபடிப³த்³த⁴ஞ்ச, விஞ்ஞாணபடிப³த்³த⁴ஞ்ச. அனஸ்ஸஸந்தோபி ஹி ந ஜீவதி அபஸ்ஸஸந்தோபி. சதூஸு ச தா⁴தூஸு கட்ட²முகா²தி³ஆஸீவிஸத³ட்டோ² விய காயோ பத²வீதா⁴துப்பகோபேன தாவ த²த்³தோ⁴ ஹோதி கலிங்க³ரஸதி³ஸோ. யதா²ஹ –

‘‘பத்த²த்³தோ⁴ ப⁴வதீ காயோ, த³ட்டோ² கட்ட²முகே²ன வா;

பத²வீதா⁴துப்பகோபேன, ஹோதி கட்ட²முகே²வ ஸோ’’தி. (த⁴. ஸ. அட்ட². 584);

ஆபோதா⁴துப்பகோபேன பூதிபா⁴வம் ஆபஜ்ஜித்வா பக்³க⁴ரிதபுப்³ப³மம்ஸலோஹிதோ அட்டி²சம்மாவஸேஸோ ஹோதி. யதா²ஹ –

‘‘பூதிகோ ப⁴வதீ காயோ, த³ட்டோ² பூதிமுகே²ன வா;

ஆபோதா⁴துப்பகோபேன, ஹோதி பூதிமுகே²வ ஸோ’’தி. (த⁴. ஸ. அட்ட². 584);

தேஜோதா⁴துப்பகோபேன அங்கா³ரகாஸுயம் பக்கி²த்தோ விய ஸமந்தா பரிட³ய்ஹதி. யதா²ஹ –

‘‘ஸந்தத்தோ ப⁴வதீ காயோ, த³ட்டோ² அக்³கி³முகே²ன வா;

தேஜோதா⁴துப்பகோபேன, ஹோதி அக்³கி³முகே²வ ஸோ’’தி. (த⁴. ஸ. அட்ட². 584);

வாயோதா⁴துப்பகோபேன ஸஞ்சி²ஜ்ஜமானஸந்தி⁴ப³ந்த⁴னோ பாஸாணேஹி கோட்டேத்வா ஸஞ்சுண்ணியமானட்டி²கோ விய ச ஹோதி. யதா²ஹ –

‘‘ஸஞ்சி²ன்னோ ப⁴வதீ காயோ, த³ட்டோ² ஸத்த²முகே²ன வா;

வாயோதா⁴துப்பகோபேன, ஹோதி ஸத்த²முகே²வ ஸோ’’தி. (த⁴. ஸ. அட்ட². 584);

தா⁴துப்பகோபப்³யாபன்னகாயோபி ச ந ஜீவதி. யதா³ பன தா தா⁴துயோ அஞ்ஞமஞ்ஞம் பதிட்டா²னாதி³கிச்சம் ஸாதே⁴ந்தாபி ஸமம் வஹந்தி, ததா³ ஜீவிதம் பவத்ததி. ஏவம் மஹாபூ⁴தபடிப³த்³த⁴ஞ்ச ஜீவிதம். து³ப்³பி⁴க்கா²தீ³ஸு பன ஆஹாருபச்சே²தே³ன ஸத்தானம் ஜீவிதக்க²யோ பாகடோ ஏவ. ஏவம் கப³ளீகாராஹாரபடிப³த்³த⁴ஞ்ச ஜீவிதம். ததா² அஸிதபீதாதி³பரிபாகே கம்மஜதேஜே கீ²ணே ஸத்தா ஜீவிதக்க²யம் பாபுணந்தாபி பாகடா ஏவ. ஏவம் உஸ்மாபடிப³த்³த⁴ஞ்ச ஜீவிதம். விஞ்ஞாணே பன நிருத்³தே⁴ நிருத்³த⁴தோ பபு⁴தி ஸத்தானம் ந ஹோதி ஜீவிதந்தி ஏவம்பி லோகே பாகடமேவ. ஏவம் விஞ்ஞாணபடிப³த்³த⁴ஞ்ச ஜீவிதம். ஏவம் அனேகபச்சயபடிப³த்³த⁴வுத்திபா⁴வதோ கஸிரம் வேதி³தப்³ப³ம்.

பரித்தஞ்சாதி அப்பகம், தே³வானம் ஜீவிதம் உபனிதா⁴ய திணக்³கே³ உஸ்ஸாவபி³ந்து³ஸதி³ஸம், சித்தக்க²ணதோ உத்³த⁴ம் அபா⁴வேன வா பரித்தம். அதிதீ³கா⁴யுகோபி ஹி ஸத்தோ அதீதேன சித்தேன ஜீவித்த² ந ஜீவதி ந ஜீவிஸ்ஸதி, அனாக³தேன ஜீவிஸ்ஸதி ந ஜீவதி ந ஜீவித்த², பச்சுப்பன்னேன ஜீவதி ந ஜீவித்த² ந ஜீவிஸ்ஸதி. வுத்தஞ்சேதம் –

‘‘ஜீவிதம் அத்தபா⁴வோ ச, ஸுக²து³க்கா² ச கேவலா;

ஏகசித்தஸமாயுத்தா, லஹுஸோ வத்ததே க²ணோ.

‘‘சுல்லாஸீதிஸஹஸ்ஸானி, கப்பா திட்ட²ந்தி யே மரூ;

நத்வேவ தேபி ஜீவந்தி, த்³வீஹி சித்தேஹி ஸம்யுதா’’தி. (மஹானி. 10);

தஞ்ச து³க்கே²ன ஸம்யுதந்தி தஞ்ச ஜீவிதம் ஏவம் அனிமித்தமனஞ்ஞாதம் கஸிரம் பரித்தஞ்ச ஸமானம்பி ஸீதுண்ஹட³ம்ஸமகஸாதி³ஸம்ப²ஸ்ஸகு²ப்பிபாஸாஸங்கா²ரது³க்க²விபரிணாமது³க்க²து³க்க²து³க்கே²ஹி ஸம்யுதம். கிம் வுத்தம் ஹோதி? யஸ்மா ஈதி³ஸம் மச்சானம் ஜீவிதம், தஸ்மா த்வம் யாவ தம் பரிக்க²யம் ந க³ச்ச²தி, தாவ த⁴ம்மசரியமேவ ப்³ரூஹய, மா புத்தமனுஸோசாதி.

581. அதா²பி மஞ்ஞேய்யாஸி ‘‘ஸப்³பூ³பகரணேஹி புத்தம் அனுரக்க²ந்தஸ்ஸாபி மே ஸோ மதோ, தேன ஸோசாமீ’’தி, ஏவம்பி மா ஸோசி. ந ஹி ஸோ உபக்கமோ அத்தி², யேன ஜாதா ந மிய்யரே, ந ஹி ஸக்கா கேனசி உபக்கமேன ஜாதா ஸத்தா மா மரந்தூதி ரக்கி²துந்தி வுத்தம் ஹோதி. ததோ யஸ்மா ஸோ ‘‘ஜரம் பத்வா நாம, ப⁴ந்தே, மரணம் அனுரூபம், அதித³ஹரோ மே புத்தோ மதோ’’தி சிந்தேஸி, தஸ்மா ஆஹ ‘‘ஜரம்பி பத்வா மரணம், ஏவம்த⁴ம்மா ஹி பாணினோ’’தி, ஜரம் பத்வாபி அப்பத்வாபி மரணம், நத்தி² ஏத்த² நியமோதி வுத்தம் ஹோதி.

582. இதா³னி தமத்த²ம் நித³ஸ்ஸனேன ஸாதே⁴ந்தோ ‘‘ப²லானமிவ பக்கான’’ந்திஆதி³மாஹ. தஸ்ஸத்தோ² – யதா² ப²லானம் பக்கானம் யஸ்மா ஸூரியுக்³க³மனதோ பபு⁴தி ஸூரியாதபேன ஸந்தப்பமானே ருக்கே² பத²விரஸோ ச ஆபோரஸோ ச பத்ததோ ஸாக²ம் ஸாக²தோ க²ந்த⁴ம் க²ந்த⁴தோ மூலந்தி ஏவம் அனுக்கமேன மூலதோ பத²விமேவ பவிஸதி, ஓக³மனதோ பபு⁴தி பன பத²விதோ மூலம் மூலதோ க²ந்த⁴ந்தி ஏவம் அனுக்கமேன ஸாகா²பத்தபல்லவாதீ³னி புன ஆரோஹதி, ஏவம் ஆரோஹந்தோ ச பரிபாகக³தே ப²லே வண்டமூலம் ந பவிஸதி. அத² ஸூரியாதபேன தப்பமானே வண்டமூலே பரிளாஹோ உப்பஜ்ஜதி. தேன தானி ப²லானி பாதோ பாதோ நிச்சகாலம் பதந்தி, நேஸம் பாதோ பதனதோ ப⁴யம் ஹோதி, பதனா ப⁴யம் ஹோதீதி அத்தோ². ஏவம் ஜாதானம் மச்சானம் நிச்சம் மரணதோ ப⁴யம். பக்கப²லஸதி³ஸா ஹி ஸத்தாதி.

583-6. கிஞ்ச பி⁴ய்யோ ‘‘யதா²பி கும்ப⁴காரஸ்ஸ…பே… ஜீவித’’ந்தி. தஸ்மா ‘‘த³ஹரா ச…பே… பராயணா’’தி ஏவம் க³ண்ஹ, ஏவஞ்ச க³ஹேத்வா ‘‘தேஸம் மச்சு…பே… ஞாதீ வா பன ஞாதகே’’தி ஏவம்பி க³ண்ஹ. யஸ்மா ச ந பிதா தாயதே புத்தம், ஞாதீ வா பன ஞாதகே, தஸ்மா பேக்க²தம்யேவ…பே… நீயதி.

தத்த² அயம் யோஜனா – பஸ்ஸமானானம்யேவ ஞாதீனம் ‘‘அம்ம, தாதா’’திஆதி³னா நயேன புது² அனேகப்பகாரகம் லாலபதம்யேவ மச்சானம் ஏகமேகோ மச்சோ யதா² கோ³ வஜ்ஜோ² ஏவம் நீயதி, ஏவம் பஸ்ஸ, உபாஸக, யாவ அதாணோ லோகோதி.

587. தத்த² யே பு³த்³த⁴பச்சேகபு³த்³தா⁴த³யோ தி⁴திஸம்பன்னா, தே ‘‘ஏவமப்³பா⁴ஹதோ லோகோ மச்சுனா ச ஜராய ச, ஸோ ந ஸக்கா கேனசி பரித்தாணம் காது’’ந்தி யஸ்மா ஜானந்தி, தஸ்மா தீ⁴ரா ந ஸோசந்தி விதி³த்வா லோகபரியாயம். இமம் லோகஸபா⁴வம் ஞத்வா ந ஸோசந்தீதி வுத்தம் ஹோதி.

588. த்வம் பன யஸ்ஸ மக்³க³ம்…பே… பரிதே³வஸி. கிம் வுத்தம் ஹோதி? யஸ்ஸ மாதுகுச்சி²ம் ஆக³தஸ்ஸ ஆக³தமக்³க³ம் வா இதோ சவித்வா அஞ்ஞத்த² க³தஸ்ஸ க³தமக்³க³ம் வா ந ஜானாஸி, தஸ்ஸ இமே உபோ⁴ அந்தே அஸம்பஸ்ஸம் நிரத்த²ம் பரிதே³வஸி. தீ⁴ரா பன தே பஸ்ஸந்தா விதி³த்வா லோகபரியாயம் ந ஸோசந்தீதி.

589. இதா³னி ‘‘நிரத்த²ம் பரிதே³வஸீ’’தி ஏத்த² வுத்தபரிதே³வனாய நிரத்த²கபா⁴வம் ஸாதே⁴ந்தோ ‘‘பரிதே³வயமானோ சே’’திஆதி³மாஹ. தத்த² உத³ப்³ப³ஹேதி உப்³ப³ஹேய்ய தா⁴ரேய்ய, அத்தனி ஸஞ்ஜனேய்யாதி அத்தோ². ஸம்மூள்ஹோ ஹிம்ஸமத்தானந்தி ஸம்மூள்ஹோ ஹுத்வா அத்தானம் பா³தே⁴ந்தோ. கயிரா சே நம் விசக்க²ணோதி யதி³ தாதி³ஸோ கஞ்சி அத்த²ம் உத³ப்³ப³ஹே, விசக்க²ணோபி நம் பரிதே³வம் கரேய்ய.

590. ந ஹி ருண்ணேனாதி ஏத்தா²யம் யோஜனா – ந பன கோசி ருண்ணேன வா ஸோகேன வா சேதஸோ ஸந்திம் பப்போதி, அபிச கோ² பன ரோத³தோ ஸோசதோ ச பி⁴ய்யோ அஸ்ஸ உப்பஜ்ஜதே து³க்க²ம், ஸரீரஞ்ச து³ப்³ப³ண்ணியாதீ³ஹி உபஹஞ்ஞதீதி.

591. ந தேன பேதாதி தேன பரிதே³வனேன காலகதா ந பாலேந்தி ந யாபேந்தி, ந தம் தேஸம் உபகாராய ஹோதி. தஸ்மா நிரத்தா² பரிதே³வனாதி.

592. ந கேவலஞ்ச நிரத்தா², அனத்த²ம்பி ஆவஹதி. கஸ்மா? யஸ்மா ஸோகமப்பஜஹம் …பே… வஸமன்வகூ³. தத்த² அனுத்து²னந்தோதி அனுஸோசந்தோ. வஸமன்வகூ³தி வஸம் க³தோ.

593. ஏவம்பி நிரத்த²கத்தம் அனத்தா²வஹத்தஞ்ச ஸோகஸ்ஸ த³ஸ்ஸேத்வா இதா³னி ஸோகவினயத்த²ம் ஓவத³ந்தோ ‘‘அஞ்ஞேபி பஸ்ஸா’’திஆதி³மாஹ. தத்த² க³மினேதி க³மிகே, பரலோகக³மனஸஜ்ஜே டி²தேதி வுத்தம் ஹோதி. ப²ந்த³ந்தேவித⁴ பாணினோதி மரணப⁴யேன ப²ந்த³மானேயேவ இத⁴ ஸத்தே.

594. யேன யேனாதி யேனாகாரேன மஞ்ஞந்தி ‘‘தீ³கா⁴யுகோ ப⁴விஸ்ஸதி, அரோகோ³ ப⁴விஸ்ஸதீ’’தி. ததோ தம் அஞ்ஞதா²யேவ ஹோதி, ஸோ ஏவம் மஞ்ஞிதோ மரதிபி, ரோகீ³பி ஹோதி. ஏதாதி³ஸோ அயம் வினாபா⁴வோ மஞ்ஞிதப்பச்சனீகேன ஹோதி, பஸ்ஸ, உபாஸக, லோகஸபா⁴வந்தி ஏவமேத்த² அதி⁴ப்பாயயோஜனா வேதி³தப்³பா³.

596. அரஹதோ ஸுத்வாதி இமம் ஏவரூபம் அரஹதோ த⁴ம்மதே³ஸனம் ஸுத்வா. நேஸோ லப்³பா⁴ மயா இதீதி ஸோ பேதோ ‘‘இதா³னி மயா புன ஜீவதூ’’தி ந லப்³பா⁴ இதி பரிஜானந்தோ, வினேய்ய பரிதே³விதந்தி வுத்தம் ஹோதி.

597. கிஞ்ச பி⁴ய்யோ – ‘‘யதா² ஸரணமாதி³த்தம்…பே… த⁴ம்ஸயே’’தி. தத்த² தீ⁴ரோ தி⁴திஸம்பதா³ய, ஸபஞ்ஞோ ஸாபா⁴விகபஞ்ஞாய, பண்டி³தோ பா³ஹுஸச்சபஞ்ஞாய, குஸலோ சிந்தகஜாதிகதாய வேதி³தப்³போ³. சிந்தாமயஸுதமயபா⁴வனாமயபஞ்ஞாஹி வா யோஜேதப்³ப³ம்.

598-9. ந கேவலஞ்ச ஸோகமேவ, பரிதே³வம்…பே… ஸல்லமத்தனோ. தத்த² பஜப்பந்தி தண்ஹம். தோ³மனஸ்ஸந்தி சேதஸிகது³க்க²ம். அப்³ப³ஹேதி உத்³த⁴ரே. ஸல்லந்தி ஏதமேவ திப்பகாரம் து³ன்னீஹரணட்டே²ன அந்தோவிஜ்ஜ²னட்டே²ன ச ஸல்லம். புப்³பே³ வுத்தம் ஸத்தவித⁴ம் ராகா³தி³ஸல்லம் வா. ஏதஸ்மிஞ்ஹி அப்³பூ³ள்ஹே ஸல்லே அப்³பூ³ள்ஹஸல்லோ…பே… நிப்³பு³தோதி அரஹத்தனிகூடேன தே³ஸனம் நிட்டா²பேஸி. தத்த² அஸிதோதி தண்ஹாதி³ட்டீ²ஹி அனிஸ்ஸிதோ. பப்புய்யாதி பாபுணித்வா. ஸேஸம் இத⁴ இதோ புப்³பே³ வுத்தத்தா உத்தானத்த²மேவ, தஸ்மா ந வண்ணிதம்.

பரமத்த²ஜோதிகாய கு²த்³த³க-அட்ட²கதா²ய

ஸுத்தனிபாத-அட்ட²கதா²ய ஸல்லஸுத்தவண்ணனா நிட்டி²தா.