7. ஸேலஸுத்தவண்ணனா

ஏவம் மே ஸுதந்தி ஸேலஸுத்தம். கா உப்பத்தி? அயமேவ யாஸ்ஸ நிதா³னே வுத்தா. அத்த²வண்ணனாக்கமேபி சஸ்ஸ புப்³ப³ஸதி³ஸம் புப்³பே³ வுத்தனயேனேவ வேதி³தப்³ப³ம். யம் பன அபுப்³ப³ம், தம் உத்தானத்தா²னி பதா³னி பரிஹரந்தா வண்ணயிஸ்ஸாம. அங்கு³த்தராபேஸூதி அங்கா³ ஏவ ஸோ ஜனபதோ³, க³ங்கா³ய பன யா உத்தரேன ஆபோ, தாஸம் அவிதூ³ரத்தா ‘‘உத்தராபோ’’திபி வுச்சதி. கதரக³ங்கா³ய உத்தரேன யா ஆபோதி? மஹாமஹீக³ங்கா³ய.

தத்ராயம் தஸ்ஸா நதி³யா ஆவிபா⁴வத்த²ம் ஆதி³தோ பபு⁴தி வண்ணனா – அயம் கிர ஜம்பு³தீ³போ த³ஸஸஹஸ்ஸயோஜனபரிமாணோ. தத்த² சதுஸஹஸ்ஸயோஜனபரிமாணோ பதே³ஸோ உத³கேன அஜ்ஜோ²த்த²டோ ‘‘ஸமுத்³தோ³’’தி ஸங்க²ம் க³தோ. திஸஹஸ்ஸயோஜனபமாணே மனுஸ்ஸா வஸந்தி. திஸஹஸ்ஸயோஜனபமாணே ஹிமவா பதிட்டி²தோ உப்³பே³தே⁴ன பஞ்சயோஜனஸதிகோ சதுராஸீதிஸஹஸ்ஸகூடேஹி படிமண்டி³தோ ஸமந்ததோ ஸந்த³மானபஞ்சஸதனதீ³விசித்தோ. யத்த² ஆயாமவித்தா²ரேன க³ம்பீ⁴ரதாய ச பஞ்ஞாஸபஞ்ஞாஸயோஜனா தி³யட்³ட⁴யோஜனஸதபரிமண்ட³லா பூரளாஸஸுத்தவண்ணனாயம் வுத்தா அனோதத்தாத³யோ ஸத்த மஹாஸரா பதிட்டி²தா.

தேஸு அனோதத்தோ ஸுத³ஸ்ஸனகூடம், சித்ரகூடம், காளகூடம், க³ந்த⁴மாத³னகூடம், கேலாஸகூடந்தி இமேஹி பஞ்சஹி பப்³ப³தேஹி பரிக்கி²த்தோ. தத்த² ஸுத³ஸ்ஸனகூடம் ஸுவண்ணமயம் த்³வியோஜனஸதுப்³பே³த⁴ம் அந்தோவங்கம் காகமுக²ஸண்டா²னம் தமேவ ஸரம் படிச்சா²தே³த்வா டி²தம், சித்ரகூடம் ஸப்³ப³ரதனமயம், காளகூடம் அஞ்ஜனமயம், க³ந்த⁴மாத³னகூடம் ஸானுமயம் அப்³ப⁴ந்தரே முக்³க³வண்ணம் நானப்பகாரஓஸத⁴ஸஞ்ச²ன்னம் காளபக்கு²போஸத²தி³வஸே ஆதி³த்தமிவ அங்கா³ரம் ஜலந்தம் திட்ட²தி, கேலாஸகூடம் ரஜதமயம். ஸப்³பா³னி ஸுத³ஸ்ஸனேன ஸமானுப்³பே³த⁴ஸண்டா²னானி தமேவ ஸரம் படிச்சா²தே³த்வா டி²தானி. ஸப்³பா³னி தே³வானுபா⁴வேன நாகா³னுபா⁴வேன ச வஸ்ஸந்தி, நதி³யோ ச தேஸு ஸந்த³ந்தி. தம் ஸப்³ப³ம்பி உத³கம் அனோதத்தமேவ பவிஸதி. சந்தி³மஸூரியா த³க்கி²ணேன வா உத்தரேன வா க³ச்ச²ந்தா பப்³ப³தந்தரேன தம் ஓபா⁴ஸேந்தி, உஜும் க³ச்ச²ந்தா ந ஓபா⁴ஸேந்தி. தேனேவஸ்ஸ ‘‘அனோதத்த’’ந்தி ஸங்கா² உத³பாதி³.

தத்த² மனோஹரஸிலாதலானி நிம்மச்ச²கச்ச²பானி ப²லிகஸதி³ஸனிம்மலூத³கானி நஹானதித்தா²னி ஸுப்படியத்தானி ஹோந்தி, யேஸு பு³த்³த⁴பச்சேகபு³த்³த⁴கீ²ணாஸவா இஸிக³ணா ச ந்ஹாயந்தி, தே³வயக்கா²த³யோ ச உய்யானகீளிகம் கீளந்தி.

சதூஸு சஸ்ஸ பஸ்ஸேஸு ஸீஹமுக²ம், ஹத்தி²முக²ம், அஸ்ஸமுக²ம், உஸப⁴முக²ந்தி சத்தாரி முகா²னி ஹோந்தி, யேஹி சதஸ்ஸோ நதி³யோ ஸந்த³ந்தி. ஸீஹமுகே²ன நிக்க²ந்தனதீ³தீரே ஸீஹா ப³ஹுதரா ஹோந்தி, ஹத்தி²முகா²தீ³ஹி ஹத்தி²அஸ்ஸஉஸபா⁴. புரத்தி²மதி³ஸதோ நிக்க²ந்தனதீ³ அனோதத்தம் திக்க²த்தும் பத³க்கி²ணம் கத்வா இதரா திஸ்ஸோ நதி³யோ அனுபக³ம்ம பாசீனஹிமவந்தேனேவ அமனுஸ்ஸபத²ம் க³ந்த்வா மஹாஸமுத்³த³ம் பவிஸதி. பச்சி²மதி³ஸதோ ச உத்தரதி³ஸதோ ச நிக்க²ந்தனதி³யோபி ததே²வ பத³க்கி²ணம் கத்வா பச்சி²மஹிமவந்தேனேவ உத்தரஹிமவந்தேனேவ ச அமனுஸ்ஸபத²ம் க³ந்த்வா மஹாஸமுத்³த³ம் பவிஸந்தி. த³க்கி²ணதி³ஸதோ நிக்க²ந்தனதீ³ பன தம் திக்க²த்தும் பத³க்கி²ணம் கத்வா த³க்கி²ணேன உஜுகம் பாஸாணபிட்டே²னேவ ஸட்டி²யோஜனானி க³ந்த்வா பப்³ப³தம் பஹரித்வா வுட்டா²ய பரிணாஹேன திகா³வுதபமாணா உத³கதா⁴ரா ஹுத்வா ஆகாஸேன ஸட்டி² யோஜனானி க³ந்த்வா தியக்³க³ளே நாம பாஸாணே பதிதா, பாஸாணோ உத³கதா⁴ராவேகே³ன பி⁴ன்னோ. தத்ர பஞ்ஞாஸயோஜனபமாணா தியக்³க³ளா நாம போக்க²ரணீ ஜாதா. போக்க²ரணியா கூலம் பி⁴ந்தி³த்வா பாஸாணம் பவிஸிய ஸட்டி² யோஜனானி க³தா. ததோ க⁴னபத²விம் பி⁴ந்தி³த்வா உமங்கே³ன ஸட்டி² யோஜனானி க³ந்த்வா விஞ்ஜ²ம் நாம திரச்சா²னபப்³ப³தம் பஹரித்வா ஹத்த²தலே பஞ்சங்கு³லிஸதி³ஸா பஞ்சதா⁴ரா ஹுத்வா பவத்ததி. ஸா திக்க²த்தும் அனோதத்தம் பத³க்கி²ணம் கத்வா க³தட்டா²னே ‘‘ஆவட்டக³ங்கா³’’தி வுச்சதி. உஜுகம் பாஸாணபிட்டே²ன ஸட்டி² யோஜனானி க³தட்டா²னே ‘‘கண்ஹக³ங்கா³’’தி வுச்சதி. ஆகாஸேன ஸட்டி² யோஜனானி க³தட்டா²னே ‘‘ஆகாஸக³ங்கா³’’தி வுச்சதி. தியக்³க³ளபாஸாணே பஞ்ஞாஸயோஜனோகாஸே ‘‘தியக்³க³ளபோக்க²ரணீ’’தி வுச்சதி. கூலம் பி⁴ந்தி³த்வா பாஸாணம் பவிஸிய ஸட்டி² யோஜனானி க³தட்டா²னே ‘‘ப³ஹலக³ங்கா³’’தி வுச்சதி. பத²விம் பி⁴ந்தி³த்வா உமங்கே³ன ஸட்டி² யோஜனானி க³தட்டா²னே ‘‘உமங்க³க³ங்கா³’’தி வுச்சதி. விஞ்ஜ²ம் நாம திரச்சா²னபப்³ப³தம் பஹரித்வா பஞ்சதா⁴ரா ஹுத்வா பவத்தட்டா²னே ‘‘க³ங்கா³, யமுனா, அசிரவதீ, ஸரபூ⁴, மஹீ’’தி பஞ்சதா⁴ வுச்சதி. ஏவமேதா பஞ்ச மஹாக³ங்கா³ ஹிமவதா ஸம்ப⁴வந்தி. தாஸு யா அயம் பஞ்சமீ மஹீ நாம, ஸா இத⁴ ‘‘மஹாமஹீக³ங்கா³’’தி அதி⁴ப்பேதா. தஸ்ஸா க³ங்கா³ய உத்தரேன யா ஆபோ, தாஸம் அவிதூ³ரத்தா ஸோ ஜனபதோ³ ‘‘அங்கு³த்தராபோ’’தி வேதி³தப்³போ³. தஸ்மிம் ஜனபதே³ அங்கு³த்தராபேஸு.

சாரிகம் சரமானோதி அத்³தா⁴னக³மனம் குருமானோ. தத்த² ப⁴க³வதோ து³விதா⁴ சாரிகா துரிதசாரிகா, அதுரிதசாரிகா ச. தத்த² தூ³ரேபி ப⁴ப்³ப³புக்³க³லே தி³ஸ்வா ஸஹஸா க³மனம் துரிதசாரிகா. ஸா மஹாகஸ்ஸபபச்சுக்³க³மனாதீ³ஸு த³ட்ட²ப்³பா³. தம் பச்சுக்³க³ச்ச²ந்தோ ஹி ப⁴க³வா முஹுத்தேனேவ திகா³வுதம் அக³மாஸி, ஆளவகத³மனத்த²ம் திம்ஸயோஜனம், ததா² அங்கு³லிமாலஸ்ஸத்தா²ய. புக்குஸாதிஸ்ஸ பன பஞ்சத்தாலீஸயோஜனம், மஹாகப்பினஸ்ஸ வீஸயோஜனஸதம், த⁴னியஸ்ஸத்தா²ய ஸத்தயோஜனஸதம் அத்³தா⁴னம் அக³மாஸி. அயம் துரிதசாரிகா நாம. கா³மனிக³மனக³ரபடிபாடியா பன பிண்ட³பாதசரியாதீ³ஹி லோகம் அனுக்³க³ண்ஹந்தஸ்ஸ க³மனம் அதுரிதசாரிகா நாம. அயம் இத⁴ அதி⁴ப்பேதா. ஏவம் சாரிகம் சரமானோ. மஹதாதி ஸங்க்²யாமஹதா கு³ணமஹதா ச. பி⁴க்கு²ஸங்கே⁴னாதி ஸமணக³ணேன. அட்³ட⁴தேளஸேஹீதி அட்³டே⁴ன தேளஸஹி, த்³வாத³ஸஹி ஸதேஹி பஞ்ஞாஸாய ச பி⁴க்கூ²ஹி ஸத்³தி⁴ந்தி வுத்தம் ஹோதி. யேன…பே… தத³வஸரீதி ஆபணப³ஹுலதாய ஸோ நிக³மோ ‘‘ஆபணோ’’ த்வேவ நாமம் லபி⁴. தஸ்மிம் கிர வீஸதிஆபணமுக²ஸஹஸ்ஸானி விப⁴த்தானி அஹேஸும். யேன தி³ஸாபா⁴கே³ன மக்³கே³ன வா ஸோ அங்கு³த்தராபானம் ரட்ட²ஸ்ஸ நிக³மோ ஓஸரிதப்³போ³, தேன அவஸரி தத³வஸரி அக³மாஸி, தம் நிக³மம் அனுபாபுணீதி வுத்தம் ஹோதி.

கேணியோ ஜடிலோதி கேணியோதி நாமேன, ஜடிலோதி தாபஸோ. ஸோ கிர ப்³ராஹ்மணமஹாஸாலோ, த⁴னரக்க²ணத்தா²ய பன தாபஸபப்³ப³ஜ்ஜம் ஸமாதா³ய ரஞ்ஞோ பண்ணாகாரம் த³த்வா பூ⁴மிபா⁴க³ம் க³ஹேத்வா தத்த² அஸ்ஸமம் காரேத்வா வஸதி குலஸஹஸ்ஸஸ்ஸ நிஸ்ஸயோ ஹுத்வா. அஸ்ஸமேபி சஸ்ஸ ஏகோ தாலருக்கோ² தி³வஸே தி³வஸே ஏகம் ஸுவண்ணப²லம் முஞ்சதீதி வத³ந்தி. ஸோ தி³வா காஸாயானி தா⁴ரேதி ஜடா ச ப³ந்த⁴தி, ரத்திம் யதா²ஸுக²ம் பஞ்சஹி காமகு³ணேஹி ஸமப்பிதோ ஸமங்கீ³பூ⁴தோ பரிசாரேதி. ஸக்யபுத்தோதி உச்சாகுலபரிதீ³பனம். ஸக்யகுலா பப்³ப³ஜிதோதி ஸத்³தா⁴ய பப்³ப³ஜிதபா⁴வபரிதீ³பனம், கேனசி பாரிஜுஞ்ஞேன அனபி⁴பூ⁴தோ அபரிக்கீ²ணம்யேவ தம் குலம் பஹாய ஸத்³தா⁴ய பப்³ப³ஜிதோதி வுத்தம் ஹோதி. தம் கோ² பனாதி இத்த²ம்பூ⁴தாக்²யானத்தே² உபயோக³வசனம், தஸ்ஸ கோ² பன போ⁴தோ கோ³தமஸ்ஸாதி அத்தோ². கல்யாணோதி கல்யாணகு³ணஸமன்னாக³தோ, ஸேட்டோ²தி வுத்தம் ஹோதி. கித்திஸத்³தோ³தி கித்தியேவ து²திகோ⁴ஸோ வா.

இதிபி ஸோ ப⁴க³வாதி ஆதி³ம்ஹி பன அயம் தாவ யோஜனா – ஸோ ப⁴க³வா இதிபி அரஹம், இதிபி ஸம்மாஸம்பு³த்³தோ⁴…பே… இதிபி ப⁴க³வாதி, இமினா ச இமினா ச காரணேனாதி வுத்தம் ஹோதி. தத்த² ஆரகத்தா, அரீனம் அரானஞ்ச ஹதத்தா பச்சயாதீ³னம் அரஹத்தா, பாபகரணே ரஹாபா⁴வாதி இமேஹி தாவ காரணேஹி ஸோ ப⁴க³வா அரஹந்தி வேதி³தப்³போ³. ஆரகா ஹி ஸோ ஸப்³ப³கிலேஸேஹி மக்³கே³ன ஸவாஸனானம் கிலேஸானம் வித்³த⁴ம்ஸிதத்தாதி ஆரகத்தா அரஹம். தே சானேன கிலேஸாரயோ மக்³கே³ன ஹதாதி அரீனம் ஹதத்தாபி அரஹம். யஞ்சேதம் அவிஜ்ஜாப⁴வதண்ஹாமயனாபி⁴, புஞ்ஞாதி³அபி⁴ஸங்கா²ரானம் ஜராமரணனேமி, ஆஸவஸமுத³யமயேன அக்கே²ன விஜ்ஜி²த்வா திப⁴வரதே² ஸமாயோஜிதம் அனாதி³காலபவத்தம் ஸம்ஸாரசக்கம். தஸ்ஸானேன போ³தி⁴மண்டே³ வீரியபாதே³ஹி ஸீலபத²வியம் பதிட்டா²ய ஸத்³தா⁴ஹத்தே²ன கம்மக்க²யகரஞாணப²ரஸும் க³ஹேத்வா ஸப்³பே³ அரா ஹதாதி அரானம் ஹதத்தாதிபி அரஹம். அக்³க³த³க்கி²ணேய்யத்தா ச சீவராதி³பச்சயே ஸக்காரக³ருகாராதீ³னி ச அரஹதீதி பச்சயாதீ³னம் அரஹத்தாபி அரஹம். யதா² ச லோகே கேசி பண்டி³தமானினோ பா³லா அஸிலோகப⁴யேன ரஹோ பாபம் கரோந்தி, ஏவம் நாயம் கதா³சி கரோதீதி பாபகரணே ரஹாபா⁴வதோபி அரஹம். ஹோதி சேத்த² –

‘‘ஆரகத்தா ஹதத்தா ச, கிலேஸாரீன ஸோ முனி;

ஹதஸம்ஸாரசக்காரோ, பச்சயாதீ³ன சாரஹோ;

ந ரஹோ கரோதி பாபானி, அரஹம் தேன பவுச்சதீ’’தி.

ஸம்மா ஸாமஞ்ச ஸச்சானம் பு³த்³த⁴த்தா ஸம்மாஸம்பு³த்³தோ⁴. அதிஸயவிஸுத்³தா⁴ஹி விஜ்ஜாஹி அப்³பு⁴த்தமேன சரணேன ச ஸமன்னாக³தத்தா விஜ்ஜாசரணஸம்பன்னோ. ஸோப⁴னக³மனத்தா ஸுந்த³ரம் டா²னம் க³தத்தா ஸுட்டு² க³தத்தா ஸம்மா க³த³த்தா ச ஸுக³தோ. ஸப்³ப³தா²பி விதி³தலோகத்தா லோகவிதூ³. ஸோ ஹி ப⁴க³வா ஸபா⁴வதோ ஸமுத³யதோ நிரோத⁴தோ நிரோதூ⁴பாயதோதி ஸப்³ப³தா² க²ந்தா⁴யதனாதி³பே⁴த³ம் ஸங்கா²ரலோகம் அவேதி³, ‘‘ஏகோ லோகோ ஸப்³பே³ ஸத்தா ஆஹாரட்டி²திகா. த்³வே லோகா நாமஞ்ச ரூபஞ்ச. தயோ லோகா திஸ்ஸோ வேத³னா. சத்தாரோ லோகா சத்தாரோ ஆஹாரா. பஞ்ச லோகா பஞ்சுபாதா³னக்க²ந்தா⁴. ச² லோகா ச² அஜ்ஜ²த்திகானி ஆயதனானி. ஸத்த லோகா ஸத்த விஞ்ஞாணட்டி²தியோ. அட்ட² லோகா அட்ட² லோகத⁴ம்மா. நவ லோகா நவ ஸத்தாவாஸா. த³ஸ லோகா த³ஸாயதனானி. த்³வாத³ஸ லோகா த்³வாத³ஸாயதனானி. அட்டா²ரஸ லோகா அட்டா²ரஸ தா⁴துயோ’’தி (படி. ம. 1.112) ஏவம் ஸப்³ப³தா² ஸங்கா²ரலோகம் அவேதி³. ஸத்தானம் ஆஸயம் ஜானாதி, அனுஸயம் ஜானாதி, சரிதம் ஜானாதி, அதி⁴முத்திம் ஜானாதி, அப்பரஜக்கே² மஹாரஜக்கே² திக்கி²ந்த்³ரியே முதி³ந்த்³ரியே ஸ்வாகாரே த்³வாகாரே ஸுவிஞ்ஞாபயே து³விஞ்ஞாபயே ப⁴ப்³பே³ அப⁴ப்³பே³ ஸத்தே ஜானாதீதி ஸப்³ப³தா² ஸத்தலோகம் அவேதி³. ததா² ஏகம் சக்கவாளம் ஆயாமதோ வித்தா²ரதோ ச யோஜனானம் த்³வாத³ஸ ஸதஸஹஸ்ஸானி தீணி ஸஹஸ்ஸானி அட்³ட⁴பஞ்சமானி ச ஸதானி, பரிக்கே²பதோ ச²த்திம்ஸ ஸதஸஹஸ்ஸானி த³ஸ ஸஹஸ்ஸானி அட்³டு⁴ட்³டா⁴னி ச ஸதானி.

தத்த² –

து³வே ஸதஸஹஸ்ஸானி, சத்தாரி நஹுதானி ச;

ஏத்தகம் ப³ஹலத்தேன, ஸங்கா²தாயம் வஸுந்த⁴ரா.

சத்தாரி ஸதஸஹஸ்ஸானி, அட்டே²வ நஹுதானி ச;

ஏத்தகம் ப³ஹலத்தேன, ஜலம் வாதே பதிட்டி²தம்.

நவ ஸதஸஹஸ்ஸானி, மாலுதோ நப⁴முக்³க³தோ;

ஸட்டி² சேவ ஸஹஸ்ஸானி, ஏஸா லோகஸ்ஸ ஸண்டி²தி’’.

ஏவம் ஸண்டி²தே சேத்த² யோஜனானம் –

சதுராஸீதி ஸஹஸ்ஸானி, அஜ்ஜோ²கா³ள்ஹோ மஹண்ணவே;

அச்சுக்³க³தோ தாவதே³வ, ஸினேரு பப்³ப³துத்தமோ.

ததோ உபட்³டு⁴பட்³டே⁴ன, பமாணேன யதா²க்கமம்;

அஜ்ஜோ²கா³ள்ஹுக்³க³தா தி³ப்³பா³, நானாரதனசித்திதா.

யுக³ந்த⁴ரோ ஈஸத⁴ரோ, கரவீகோ ஸுத³ஸ்ஸனோ;

நேமிந்த⁴ரோ வினதகோ, அஸ்ஸகண்ணோ கி³ரி ப்³ரஹா.

ஏதே ஸத்த மஹாஸேலா, ஸினேருஸ்ஸ ஸமந்ததோ;

மஹாராஜானமாவாஸா, தே³வயக்க²னிஸேவிதா.

யோஜனானம் ஸதானுச்சோ, ஹிமவா பஞ்ச பப்³ப³தோ;

யோஜனானம் ஸஹஸ்ஸானி, தீணி ஆயதவித்த²தோ.

சதுராஸீதிஸஹஸ்ஸேஹி, கூடேஹி படிமண்டி³தோ;

திபஞ்சயோஜனக்க²ந்த⁴-பரிக்கே²பா நக³வ்ஹயா.

பஞ்ஞாஸயோஜனக்க²ந்த⁴-ஸாகா²யாமா ஸமந்ததோ;

ஸத்தயோஜனவித்தி²ண்ணா, தாவதே³வ ச உக்³க³தா.

ஜம்பூ³ யஸ்ஸானுபா⁴வேன, ஜம்பு³தீ³போ பகாஸிதோ;

த்³வே அஸீதிஸஹஸ்ஸானி, அஜ்ஜோ²கா³ள்ஹோ மஹண்ணவே.

அச்சுக்³க³தோ தாவதே³வ, சக்கவாளஸிலுச்சயோ;

பரிக்கி²பித்வா தம் ஸப்³ப³ம், சக்கவாளமயம் டி²தோ’’.

தத்த² சந்த³மண்ட³லம் ஏகூனபஞ்ஞாஸயோஜனம், ஸூரியமண்ட³லம் பஞ்ஞாஸயோஜனம், தாவதிம்ஸப⁴வனம் த³ஸஸஹஸ்ஸயோஜனம், ததா² அஸுரப⁴வனம் அவீசிமஹானிரயோ ஜம்பு³தீ³போ ச. அபரகோ³யானம் ஸத்தஸஹஸ்ஸயோஜனம், ததா² புப்³ப³விதே³ஹோ, உத்தரகுரு அட்ட²ஸஹஸ்ஸயோஜனோ. ஏகமேகோ சேத்த² மஹாதீ³போ பஞ்சஸதபஞ்சஸதபரித்ததீ³பபரிவாரோ. தம் ஸப்³ப³ம்பி ஏகம் சக்கவாளம் ஏகா லோகதா⁴து. சக்கவாளந்தரேஸு லோகந்தரிகனிரயா. ஏவம் அனந்தானி சக்கவாளானி அனந்தா லோகதா⁴துயோ, அனந்தேன பு³த்³த⁴ஞாணேன அஞ்ஞாஸீதி ஸப்³ப³தா² ஓகாஸலோகம் அவேதி³. ஏவம் ஸோ ப⁴க³வா ஸப்³ப³தா². விதி³தலோகத்தா லோகவிதூ³தி வேதி³தப்³போ³.

அத்தனோ பன கு³ணேஹி விஸிட்ட²தரஸ்ஸ கஸ்ஸசி அபா⁴வா அனுத்தரோ. விசித்தேஹி வினயனூபாயேஹி புரிஸத³ம்மே ஸாரேதீதி புரிஸத³ம்மஸாரதி². தி³ட்ட²த⁴ம்மிகஸம்பராயிகபரமத்தே²ஹி யதா²ரஹம் அனுஸாஸதி நித்தா²ரேதி சாதி ஸத்தா². தே³வமனுஸ்ஸக்³க³ஹணம் உக்கட்ட²பரிச்சே²த³வஸேன ப⁴ப்³ப³புக்³க³லபரிக்³க³ஹவஸேன ச கதம், நாகா³தி³கேபி பன ஏஸ லோகியத்தே²ன அனுஸாஸதி. யத³த்தி² நேய்யம் நாம, ஸப்³ப³ஸ்ஸ பு³த்³த⁴த்தா விமோக்க²ந்திகஞாணவஸேன பு³த்³தோ⁴. யதோ பன ஸோ –

‘‘ப⁴க்³யவா ப⁴க்³க³வா யுத்தோ, ப⁴கே³ஹி ச விப⁴த்தவா;

ப⁴த்தவா வந்தக³மனோ, ப⁴வேஸு ப⁴க³வா ததோ’’தி.

அயமேத்த² ஸங்கே²போ, வித்தா²ரதோ பனேதானி பதா³னி விஸுத்³தி⁴மக்³கே³ (விஸுத்³தி⁴. 1.124-125) வுத்தானி.

ஸோ இமம் லோகந்தி ஸோ ப⁴க³வா இமம் லோகம். இதா³னி வத்தப்³ப³ம் நித³ஸ்ஸேதி. ஸதே³வகந்திஆதீ³னி கஸிபா⁴ரத்³வாஜஆளவகஸுத்தேஸு வுத்தனயானேவ. ஸயந்தி ஸாமம் அபரனேய்யோ ஹுத்வா. அபி⁴ஞ்ஞாதி அபி⁴ஞ்ஞாய. ஸச்சி²கத்வாதி பச்சக்க²ம் கத்வா. பவேதே³தீதி போ³தே⁴தி ஞாபேதி பகாஸேதி. ஸோ த⁴ம்மம் தே³ஸேதி…பே… பரியோஸானகல்யாணந்தி ஸோ ப⁴க³வா ஸத்தேஸு காருஞ்ஞதம் படிச்ச அனுத்தரம் விவேகஸுக²ம் ஹித்வாபி த⁴ம்மம் தே³ஸேதி. தஞ்ச கோ² அப்பம் வா ப³ஹும் வா தே³ஸேந்தோ ஆதி³கல்யாணாதி³ப்பகாரமேவ தே³ஸேதி. கத²ம்? ஏககா³தா²பி ஹி ஸமந்தப⁴த்³த³கத்தா த⁴ம்மஸ்ஸ பட²மபாதே³ன ஆதி³கல்யாணா, து³தியததியபாதே³ஹி மஜ்ஜே²கல்யாணா, பச்சி²மபாதே³ன பரியோஸானகல்யாணா. ஏகானுஸந்தி⁴கம் ஸுத்தம் நிதா³னேன ஆதி³கல்யாணம், நிக³மனேன பரியோஸானகல்யாணம், ஸேஸேன மஜ்ஜே²கல்யாணம். நானானுஸந்தி⁴கம் பட²மானுஸந்தி⁴னா ஆதி³கல்யாணம், பச்சி²மேன பரியோஸானகல்யாணம், ஸேஸேஹி மஜ்ஜே²கல்யாணம். ஸகலோபி ஸாஸனத⁴ம்மோ அத்தனோ அத்த²பூ⁴தேன ஸீலேன ஆதி³கல்யாணோ, ஸமத²விபஸ்ஸனாமக்³க³ப²லேஹி மஜ்ஜே²கல்யாணோ, நிப்³பா³னேன பரியோஸானகல்யாணோ. ஸீலஸமாதீ⁴ஹி வா ஆதி³கல்யாணோ, விபஸ்ஸனாமக்³கே³ஹி மஜ்ஜே²கல்யாணோ, ப²லனிப்³பா³னேஹி பரியோஸானகல்யாணோ. பு³த்³த⁴ஸுபோ³தி⁴தாய வா ஆதி³கல்யாணோ, த⁴ம்மஸுத⁴ம்மதாய மஜ்ஜே²கல்யாணோ, ஸங்க⁴ஸுப்படிபத்தியா பரியோஸானகல்யாணோ. தம் ஸுத்வா தத²த்தாய படிபன்னேன அதி⁴க³ந்தப்³பா³ய அபி⁴ஸம்போ³தி⁴யா வா ஆதி³கல்யாணோ, பச்சேகபோ³தி⁴யா மஜ்ஜே²கல்யாணோ, ஸாவகபோ³தி⁴யா பரியோஸானகல்யாணோ. ஸுய்யமானோ சேஸ நீவரணாதி³விக்க²ம்ப⁴னதோ ஸவனேனபி கல்யாணமேவ ஆவஹதீதி ஆதி³கல்யாணோ, படிபஜ்ஜமானோ ஸமத²விபஸ்ஸனாஸுகா²வஹனதோ படிபத்தியாபி கல்யாணமேவ ஆவஹதீதி மஜ்ஜே²கல்யாணோ, ததா² படிபன்னோ ச படிபத்திப²லே நிட்டி²தே தாதி³பா⁴வாவஹனதோ படிபத்திப²லேனபி கல்யாணமேவ ஆவஹதீதி பரியோஸானகல்யாணோ. நாத²ப்பப⁴வத்தா ச பப⁴வஸுத்³தி⁴யா ஆதி³கல்யாணோ, அத்த²ஸுத்³தி⁴யா மஜ்ஜே²கல்யாணோ, கிச்சஸுத்³தி⁴யா பரியோஸானகல்யாணோ. யதோ அப்பம் வா ப³ஹும் வா தே³ஸேந்தோ ஆதி³கல்யாணாதி³ப்பகாரமேவ தே³ஸேதீதி வேதி³தப்³போ³.

ஸாத்த²ம் ஸப்³யஞ்ஜனந்தி ஏவமாதீ³ஸு பன யஸ்மா இமம் த⁴ம்மம் தே³ஸேந்தோ ஸாஸனப்³ரஹ்மசரியம் மக்³க³ப்³ரஹ்மசரியஞ்ச பகாஸேதி, நானானயேஹி தீ³பேதி, தஞ்ச யதா²ஸம்ப⁴வம் அத்த²ஸம்பத்தியா ஸாத்த²ம், ப்³யஞ்ஜனஸம்பத்தியா ஸப்³யஞ்ஜனம். ஸங்காஸனபகாஸனவிவரணவிப⁴ஜனஉத்தானீகரணபஞ்ஞத்திஅத்த²பத³ஸமாயோக³தோ ஸாத்த²ம், அக்க²ரபத³ப்³யஞ்ஜனாகாரனிருத்தினித்³தே³ஸஸம்பத்தியா ஸப்³யஞ்ஜனம். அத்த²க³ம்பீ⁴ரதாபடிவேத⁴க³ம்பீ⁴ரதாஹி ஸாத்த²ம், த⁴ம்மக³ம்பீ⁴ரதாதே³ஸனாக³ம்பீ⁴ரதாஹி ஸப்³யஞ்ஜனம். அத்த²படிபா⁴னபடிஸம்பி⁴தா³விஸயதோ ஸாத்த²ம், த⁴ம்மனிருத்திபடிஸம்பி⁴தா³விஸயதோ ஸப்³யஞ்ஜனம். பண்டி³தவேத³னீயதோ ஸரிக்க²கஜனப்பஸாத³கந்தி ஸாத்த²ம், ஸத்³தே⁴ய்யதோ லோகியஜனப்பஸாத³கந்தி ஸப்³யஞ்ஜனம். க³ம்பீ⁴ராதி⁴ப்பாயதோ ஸாத்த²ம், உத்தானபத³தோ ஸப்³யஞ்ஜனம். உபனேதப்³ப³ஸ்ஸாபா⁴வதோ ஸகலபரிபுண்ணபா⁴வேன கேவலபரிபுண்ணம், அபனேதப்³ப³ஸ்ஸ அபா⁴வதோ நித்³தோ³ஸபா⁴வேன பரிஸுத்³த⁴ம். ஸிக்க²த்தயபரிக்³க³ஹிதத்தா ப்³ரஹ்மபூ⁴தேஹி ஸேட்டே²ஹி சரிதப்³ப³தோ தேஸஞ்ச சரியபா⁴வதோ ப்³ரஹ்மசரியம். தஸ்மா ‘‘ஸாத்த²ம் ஸப்³யஞ்ஜனம்…பே… ப்³ரஹ்மசரியம் பகாஸேதீ’’தி வுச்சதி.

அபிச யஸ்மா ஸனிதா³னம் ஸஉப்பத்திகஞ்ச தே³ஸேந்தோ ஆதி³கல்யாணம் தே³ஸேதி, வினேய்யானம் அனுரூபதோ அத்த²ஸ்ஸ அவிபரீததாய ஹேதுதா³ஹரணயோக³தோ ச மஜ்ஜே²கல்யாணம், ஸோதூனம் ஸத்³தா⁴படிலாபே⁴ன நிக³மனேன ச பரியோஸானகல்யாணம். ஏவம் தே³ஸேந்தோ ச ப்³ரஹ்மசரியம் பகாஸேதி. தஞ்ச படிபத்தியா அதி⁴க³மப்³யத்திதோ ஸாத்த²ம், பரியத்தியா ஆக³மப்³யத்திதோ ஸப்³யஞ்ஜனம், ஸீலாதி³பஞ்சத⁴ம்மக்க²ந்த⁴யுத்ததோ கேவலபரிபுண்ணம், நிருபக்கிலேஸதோ நித்த²ரணத்தா²ய பவத்திதோ லோகாமிஸனிரபேக்க²தோ ச பரிஸுத்³த⁴ம், ஸேட்ட²ட்டே²ன ப்³ரஹ்மபூ⁴தானம் பு³த்³த⁴பச்சேகபு³த்³த⁴ஸாவகானம் சரியதோ ப்³ரஹ்மசரியந்தி வுச்சதி, தஸ்மாபி ‘‘ஸோ த⁴ம்மம் தே³ஸேதி…பே… ப்³ரஹ்மசரியம் பகாஸேதீ’’தி வுச்சதி.

ஸாது⁴ கோ² பனாதி ஸுந்த³ரம் கோ² பன, அத்தா²வஹம் ஸுகா²வஹந்தி வுத்தம் ஹோதி. த⁴ம்மியா கதா²யாதி பானகானிஸம்ஸபடிஸம்யுத்தாய. அயஞ்ஹி கேணியோ ஸாயன்ஹஸமயே ப⁴க³வதோ ஆக³மனம் அஸ்ஸோஸி. ‘‘துச்ச²ஹத்தோ² ப⁴க³வந்தம் த³ஸ்ஸனாய க³ந்தும் லஜ்ஜமானோ விகாலபோ⁴ஜனா விரதானம்பி பானகம் கப்பதீ’’தி சிந்தேத்வா பஞ்சஹி காஜஸதேஹி ஸுஸங்க²தம் ப³த³ரபானம் கா³ஹாபேத்வா அக³மாஸி. யதா²ஹ பே⁴ஸஜ்ஜக்க²ந்த⁴கே ‘‘அத² கோ² கேணியஸ்ஸ ஜடிலஸ்ஸ ஏதத³ஹோஸி, கிம் நு கோ² அஹம் ஸமணஸ்ஸ கோ³தமஸ்ஸ ஹராபேய்ய’’ந்தி (மஹாவ. 300) ஸப்³ப³ம் வேதி³தப்³ப³ம். ததோ நம் ப⁴க³வா யதா² ஸேக்க²ஸுத்தே (ம. நி. 2.22 ஆத³யோ) ஸாகியே ஆவஸதா²னிஸம்ஸபடிஸம்யுத்தாய கதா²ய, கோ³ஸிங்க³ஸாலவனே (ம. நி. 1.325 ஆத³யோ) தயோ குலபுத்தே ஸாமக்³கி³ரஸானிஸம்ஸபடிஸம்யுத்தாய, ரத²வினீதே (ம. நி. 1.252 ஆத³யோ) ஜாதிபூ⁴மகே பி⁴க்கூ² த³ஸகதா²வத்து²படிஸம்யுத்தாய, ஏவம் தங்க²ணானுரூபாய பானகானிஸம்ஸபடிஸம்யுத்தாய கதா²ய பானகதா³னானிஸம்ஸம் ஸந்த³ஸ்ஸேஸி, ததா²ரூபானம் புஞ்ஞானம் புனபி கத்தப்³ப³தாய நியோஜேந்தோ ஸமாத³பேஸி, அப்³பு⁴ஸ்ஸாஹம் ஜனேந்தோ ஸமுத்தேஜேஸி, ஸந்தி³ட்டி²கஸம்பராயிகேன ப²லவிஸேஸேன பஹம்ஸேந்தோ ஸம்பஹம்ஸேஸி. தேனாஹ ‘‘த⁴ம்மியா கதா²ய…பே… ஸம்பஹம்ஸேஸீ’’தி. ஸோ பி⁴ய்யோஸோமத்தாய ப⁴க³வதி பஸன்னோ ப⁴க³வந்தம் நிமந்தேஸி, ப⁴க³வா சஸ்ஸ திக்க²த்தும் படிக்கி²பித்வா அதி⁴வாஸேஸி. தேனாஹ ‘‘அத² கோ² கேணியோ ஜடிலோ…பே… அதி⁴வாஸேஸி ப⁴க³வா துண்ஹீபா⁴வேனா’’தி.

கிமத்த²ம் பன படிக்கி²பி ப⁴க³வாதி? புனப்புனம் யாசனாய சஸ்ஸ புஞ்ஞவுட்³டி⁴ ப⁴விஸ்ஸதி, ப³ஹுதரஞ்ச படியாதே³ஸ்ஸதி, ததோ அட்³ட⁴தேலஸானம் பி⁴க்கு²ஸதானம் படியத்தம் அட்³ட⁴ஸோளஸன்னம் பாபுணிஸ்ஸதீதி. குதோ அபரானி தீணி ஸதானீதி சே? அப்படியத்தேயேவ ஹி ப⁴த்தே ஸேலோ ப்³ராஹ்மணோ தீஹி மாணவகஸதேஹி ஸத்³தி⁴ம் பப்³ப³ஜிஸ்ஸதி, தம் தி³ஸ்வா ப⁴க³வா ஏவமாஹாதி. மித்தாமச்சேதி மித்தே ச கம்மகரே ச. ஞாதிஸாலோஹிதேதி ஸமானலோஹிதே ஏகயோனிஸம்ப³ந்தே⁴ புத்ததீ⁴தாத³யோ அவஸேஸப³ந்த⁴வே ச. யேனாதி யஸ்மா. மேதி மய்ஹம். காயவேய்யாவடிகந்தி காயேன வேய்யாவச்சம். மண்ட³லமாளம் படியாதே³தீதி ஸேதவிதானமண்ட³பம் கரோதி.

திண்ணம் வேதா³னந்தி இருப்³பே³த³யஜுப்³பே³த³ஸாமவேதா³னம். ஸஹ நிக⁴ண்டு³னா ச கேடுபே⁴ன ச ஸனிக⁴ண்டு³கேடுபா⁴னம். நிக⁴ண்டூ³தி நாமனிக⁴ண்டு³ருக்கா²தீ³னம் வேவசனப்பகாஸகம் ஸத்த²ம். கேடுப⁴ந்தி கிரியாகப்பவிகப்போ கவீனம் உபகாராய ஸத்த²ம். ஸஹ அக்க²ரப்பபே⁴தே³ன ஸாக்க²ரப்பபே⁴தா³னம். அக்க²ரப்பபே⁴தோ³தி ஸிக்கா² ச நிருத்தி ச. இதிஹாஸபஞ்சமானந்தி அத²ப்³ப³னவேத³ம் சதுத்த²ம் கத்வா ‘‘இதிஹ ஆஸ இதிஹ ஆஸா’’தி ஈதி³ஸவசனபடிஸம்யுத்தோ புராணகதா²ஸங்கா²தோ இதிஹாஸோ பஞ்சமோ ஏதேஸந்தி இதிஹாஸபஞ்சமா. தேஸம் இதிஹாஸபஞ்சமானம். பத³ம் தத³வஸேஸஞ்ச ப்³யாகரணம் அஜ்ஜே²தி வேதே³தி சாதி பத³கோ வேய்யாகரணோ. லோகாயதே விதண்ட³வாத³ஸத்தே² மஹாபுரிஸலக்க²ணாதி⁴காரே ச த்³வாத³ஸஸஹஸ்ஸே மஹாபுரிஸலக்க²ணஸத்தே² அனூனோ பரிபூரகாரீதி லோகாயதமஹாபுரிஸலக்க²ணேஸு அனவயோ, அவயோ ந ஹோதீதி வுத்தம் ஹோதி. அவயோ நாம யோ தானி அத்த²தோ ச க³ந்த²தோ ச ஸந்தா⁴ரேதும் ந ஸக்கோதி.

ஜங்கா⁴ய ஹிதம் விஹாரம் ஜங்கா⁴விஹாரம், சிராஸனாதி³ஜனிதம் பரிஸ்ஸமம் வினோதே³தும் ஜங்கா⁴பஸாரணத்த²ம் அதீ³க⁴சாரிகந்தி வுத்தம் ஹோதி. அனுசங்கமமானோதி சங்கமமானோ ஏவ. அனுவிசரமானோதி இதோ சிதோ ச சரமானோ. கேணியஸ்ஸ ஜடிலஸ்ஸ அஸ்ஸமோதி கேணியஸ்ஸ அஸ்ஸமம் நிவேஸனம். ஆவாஹோதி கஞ்ஞாக³ஹணம். விவாஹோதி கஞ்ஞாதா³னம். மஹாயஞ்ஞோதி மஹாயஜனம். மாக³தோ⁴தி மக³தா⁴னம் இஸ்ஸரோ. மஹதியா ஸேனாய ஸமன்னாக³தத்தா ஸேனியோ. பி³ம்பீ³தி ஸுவண்ணம், தஸ்மா ஸாரஸுவண்ணஸதி³ஸவண்ணதாய பி³ம்பி³ஸாரோ. ஸோ மே நிமந்திதோதி ஸோ மயா நிமந்திதோ.

அத² ப்³ராஹ்மணோ புப்³பே³ கதாதி⁴காரத்தா பு³த்³த⁴ஸத்³த³ம் ஸுத்வாவ அமதேனேவாபி⁴ஸித்தோ விம்ஹயரூபத்தா ஆஹ – ‘‘பு³த்³தோ⁴தி, போ⁴ கேணிய, வதே³ஸீ’’தி. இதரோ யதா²பூ⁴தம் ஆசிக்க²ந்தோ ஆஹ – ‘‘பு³த்³தோ⁴தி, போ⁴ ஸேல, வதா³மீ’’தி. ததோ நம் புனபி த³ள்ஹீகரணத்த²ம் புச்சி², இதரோபி ததே²வ ஆரோசேஸி. அத² கப்பஸதஸஹஸ்ஸேஹிபி பு³த்³த⁴ஸத்³த³ஸ்ஸ து³ல்லப⁴பா⁴வம் த³ஸ்ஸேந்தோ ஆஹ – ‘‘கோ⁴ஸோபி கோ² ஏஸோ து³ல்லபோ⁴ லோகஸ்மிம் யதி³த³ம் பு³த்³தோ⁴’’தி. தத்த² யதி³த³ந்தி நிபாதோ, யோ ஏஸோதி வுத்தம் ஹோதி.

அத² ப்³ராஹ்மணோ பு³த்³த⁴ஸத்³த³ம் ஸுத்வா ‘‘கிம் நு கோ² ஸோ ஸச்சமேவ பு³த்³தோ⁴, உதா³ஹு நாமமத்தமேவஸ்ஸ பு³த்³தோ⁴’’தி வீமம்ஸிதுகாமோ சிந்தேஸி, அபா⁴ஸி ஏவ வா ‘‘ஆக³தானி கோ² பன…பே… விவட்டச்ச²தோ³’’தி. தத்த² ‘‘மந்தேஸூ’’தி வேதே³ஸு. ‘‘ததா²க³தோ கிர உப்பஜ்ஜிஸ்ஸதீ’’தி படிகச்சேவ ஸுத்³தா⁴வாஸதே³வா ப்³ராஹ்மணவேஸேன லக்க²ணானி பக்கி²பித்வா வேதே³ வாசேந்தி ‘‘தத³னுஸாரேன மஹேஸக்கா² ஸத்தா ததா²க³தம் ஜானிஸ்ஸந்தீ’’தி. தேன புப்³பே³ வேதே³ஸு மஹாபுரிஸலக்க²ணானி ஆக³ச்ச²ந்தி. பரினிப்³பு³தே பன ததா²க³தே கமேன அந்தரதா⁴யந்தி, தேன ஏதரஹி நத்தி². மஹாபுரிஸஸ்ஸாதி பணிதி⁴ஸமாதா³னஞாணஸமாதா³னகருணாதி³கு³ணமஹதோ புரிஸஸ்ஸ. த்³வேவ க³தியோதி த்³வே ஏவ நிட்டா². காமஞ்சாயம் க³திஸத்³தோ³ ‘‘பஞ்ச கோ² இமா, ஸாரிபுத்த, க³தியோ’’திஆதீ³ஸு (ம. நி. 1.153) ப⁴வபே⁴தே³, ‘‘க³தீ மிகா³னம் பவன’’ந்திஆதீ³ஸு (பரி. 339) நிவாஸட்டா²னே, ‘‘ஏவம் அதி⁴மத்தக³திமந்தோ’’திஆதீ³ஸு (ம. நி. 1.161) பஞ்ஞாயம், ‘‘க³திக³த’’ந்திஆதீ³ஸு (சூளவ. 204) விஸடபா⁴வே வத்ததி, இத⁴ பன நிட்டா²யம் வேதி³தப்³போ³. தத்த² கிஞ்சாபி யேஹி லக்க²ணேஹி ஸமன்னாக³தோ ராஜா ஹோதி சக்கவத்தி, ந தேஹி ஏவ பு³த்³தோ⁴. ஜாதிஸாமஞ்ஞதோ பன தானியேவ தானீதி வுச்சந்தி. தஸ்மா வுத்தம் ‘‘யேஹி ஸமன்னாக³தஸ்ஸா’’தி.

ஸசே அகா³ரம் அஜ்ஜா²வஸதீதி யதி³ அகா³ரே வஸதி. ராஜா ஹோதி சக்கவத்தீதி சதூஹி அச்ச²ரியத⁴ம்மேஹி ஸங்க³ஹவத்தூ²ஹி ச லோகம் ரஞ்ஜனதோ ராஜா. சக்கரதனம் வத்தேதி, சதூஹி ஸம்பத்திசக்கேஹி, வத்ததி, தேஹி ச பரம் வத்தேதி, பரஹிதாய ச இரியாபத²சக்கானம் வத்தோ ஏதஸ்மிம் அத்தீ²தி சக்கவத்தி. ஏத்த² ச ராஜாதி ஸாமஞ்ஞம், சக்கவத்தீதி விஸேஸனம். த⁴ம்மேன சரதீதி த⁴ம்மிகோ, ஞாயேன ஸமேன வத்ததீதி அத்தோ². த⁴ம்மேன ரஜ்ஜம் லபி⁴த்வா ராஜா ஜாதோதி த⁴ம்மராஜா. பரஹிதத⁴ம்மகரணேன வா த⁴ம்மிகோ, அத்தஹிதத⁴ம்மகரணேன த⁴ம்மராஜா. சதுரந்தாய இஸ்ஸரோதி சாதுரந்தோ, சதுஸமுத்³த³ந்தாய சத்துப்³பி³த⁴தீ³பவிபூ⁴ஸிதாய ச பத²வியா இஸ்ஸரோதி அத்தோ². அஜ்ஜ²த்தம் கோதா⁴தி³பச்சத்தி²கே ப³ஹித்³தா⁴ ச ஸப்³ப³ராஜானோ விஜேஸீதி விஜிதாவீ. ஜனபத³த்தா²வரியப்பத்தோதி ஜனபதே³ து⁴வபா⁴வம் தா²வரபா⁴வம் பத்தோ, ந ஸக்கா கேனசி சாலேதும், ஜனபதோ³ வா தம்ஹி தா²வரியப்பத்தோ அனுஸ்ஸுக்கோ ஸகம்மனிரதோ அசலோ அஸம்பவேதீ⁴திபி ஜனபத³த்தா²வரியப்பத்தோ.

ஸேய்யதி²த³ந்தி நிபாதோ, தஸ்ஸ ஏதானி கதமானீதி அத்தோ². சக்கரதனம்…பே… பரிணாயகரதனமேவ ஸத்தமந்தி தானி ஸப்³ப³ப்பகாரதோ ரதனஸுத்தவண்ணனாயம் வுத்தானி. தேஸு அயம் சக்கவத்திராஜா சக்கரதனேன அஜிதம் ஜினாதி, ஹத்தி²அஸ்ஸரதனேஹி விஜிதே யதா²ஸுக²மனுவிசரதி, பரிணாயகரதனேன விஜிதமனுரக்க²தி, ஸேஸேஹி உபபோ⁴க³ஸுக²மனுப⁴வதி. பட²மேன சஸ்ஸ உஸ்ஸாஹஸத்தியோகோ³, ஹத்தி²அஸ்ஸக³ஹபதிரதனேஹி பபு⁴ஸத்தியோகோ³, பரிணாயகரதனேன மந்தஸத்தியோகோ³ ஸுபரிபுண்ணோ ஹோதி, இத்தி²மணிரதனேஹி ச திவித⁴ஸத்தியோக³ப²லம். ஸோ இத்தி²மணிரதனேஹி போ⁴க³ஸுக²மனுபோ⁴தி, ஸேஸேஹி இஸ்ஸரியஸுக²ம். விஸேஸதோ சஸ்ஸ புரிமானி தீணி அதோ³ஸகுஸலமூலஜனிதகம்மானுபா⁴வேன ஸம்பஜ்ஜந்தி, மஜ்ஜி²மானி அலோப⁴குஸலமூலஜனிதகம்மானுபா⁴வேன, பச்சி²மமேகம் அமோஹகுஸலமூலஜனிதகம்மானுபா⁴வேனாதி வேதி³தப்³ப³ம்.

பரோஸஹஸ்ஸந்தி அதிரேகஸஹஸ்ஸம். ஸூராதி அபீ⁴ருகஜாதிகா. வீரங்க³ரூபாதி தே³வபுத்தஸதி³ஸகாயா, ஏவம் தாவேகே. அயம் பனேத்த² ஸபா⁴வோ வீராதி உத்தமஸூரா வுச்சந்தி, வீரானம் அங்க³ம் வீரங்க³ம், வீரகாரணம் வீரியந்தி வுத்தம் ஹோதி. வீரங்க³ம் ரூபம் ஏதேஸந்தி வீரங்க³ரூபா, வீரியமயஸரீரா வியாதி வுத்தம் ஹோதி. பரஸேனப்பமத்³த³னாதி ஸசே படிமுக²ம் திட்டே²ய்ய பரஸேனா, தம் பமத்³தி³தும் ஸமத்தா²தி அதி⁴ப்பாயோ. த⁴ம்மேனாதி ‘‘பாணோ ந ஹந்தப்³போ³’’திஆதி³னா (தீ³. நி. 2.244; ம. நி. 3.257) பஞ்சஸீலத⁴ம்மேன. அரஹம் ஹோதி ஸம்மாஸம்பு³த்³தோ⁴ லோகே விவட்டச்ச²தோ³தி ஏத்த² ராக³தோ³ஸமோஹமானதி³ட்டி²அவிஜ்ஜாது³ச்சரிதச²த³னேஹி ஸத்தஹி படிச்ச²ன்னே கிலேஸந்த⁴காரே லோகே தம் ச²த³னம் விவட்டேத்வா ஸமந்ததோ ஸஞ்ஜாதாலோகோ ஹுத்வா டி²தோதி விவட்டச்ச²தோ³. தத்த² பட²மேன பதே³ன பூஜாரஹதா, து³தியேன தஸ்ஸா ஹேது யஸ்மா ஸம்மாஸம்பு³த்³தோ⁴தி. ததியேன பு³த்³த⁴த்தஹேது விவட்டச்ச²த³தா வுத்தாதி வேதி³தப்³பா³. அத² வா விவட்டோ ச விச்ச²தோ³ சாதி விவட்டச்ச²தோ³, வட்டரஹிதோ ச²த³னரஹிதோ சாதி வுத்தம் ஹோதி. தேன அரஹம் வட்டாபா⁴வேன ஸம்மாஸம்பு³த்³தோ⁴ ச²த³னாபா⁴வேனாதி ஏவம் புரிமபத³த்³வயஸ்ஸேவ ஹேதுத்³வயம் வுத்தம் ஹோதி. து³தியேன வேஸாரஜ்ஜேன சேத்த² புரிமஸித்³தி⁴, பட²மேன து³தியஸித்³தி⁴, ததியசதுத்தே²ஹி ததியஸித்³தி⁴ ஹோதி. புரிமஞ்ச த⁴ம்மசக்கு²ம், து³தியம் பு³த்³த⁴சக்கு²ம், ததியம் ஸமந்தசக்கு²ம் ஸாதே⁴தீதி வேதி³தப்³ப³ம்.

இதா³னி ப⁴க³வதோ ஸந்திகம் க³ந்துகாமோ ஆஹ – ‘‘கஹம் பன போ⁴…பே… ஸம்மாஸம்பு³த்³தோ⁴’’தி. ஏவம் வுத்தேதிஆதீ³ஸு யேனேஸாதி யேன தி³ஸாபா⁴கே³ன ஏஸா. நீலவனராஜீதி நீலவண்ணருக்க²பந்தி. வனம் கிர மேக⁴பந்திஸதி³ஸம். யத்த² ப⁴க³வா ததா³ விஹாஸி, தம் நித்³தி³ஸந்தோ ஆஹ – ‘‘யேனேஸா போ⁴, ஸேல, நீலவனராஜீ’’தி. தத்த² ‘‘ஸோ விஹரதீ’’தி அயம் பனேத்த² பாட²ஸேஸோ, பு⁴ம்மத்தே² வா கரணவசனம். பதே³ பத³ந்தி பத³ஸமீபே பத³ம். தேன துரிதக³மனம் படிஸேதே⁴தி. து³ராஸதா³ ஹீதி காரணம் ஆஹ, யஸ்மா தே து³ராஸதா³, தஸ்மா ஏவம் போ⁴ந்தோ ஆக³ச்ச²ந்தூதி. கிம் பன காரணா து³ராஸதா³தி சே? ஸீஹாவ ஏகசரா. யதா² ஹி ஸீஹா ஸஹாயகிச்சாபா⁴வதோ ஏகசரா, ஏவம் தேபி விவேககாமதாய. ‘‘யதா³ சாஹ’’ந்திஆதி³னா பன தே மாணவகே உபசாரம் ஸிக்கா²பேதி. தத்த² மா ஓபாதேதா²தி மா பவேஸேத², மா கதே²தா²தி வுத்தம் ஹோதி. ஆக³மேந்தூதி படிமானேந்து, யாவ கதா² பரியோஸானம் க³ச்ச²தி, தாவ துண்ஹீ ப⁴வந்தூதி அத்தோ².

ஸமன்னேஸீதி க³வேஸி. யேபு⁴ய்யேனாதி ப³ஹுகானி அத்³த³ஸ, அப்பகானி நாத்³த³ஸ. ததோ யானி ந அத்³த³ஸ, தானி தீ³பேந்தோ ஆஹ ‘‘ட²பேத்வா த்³வே’’தி. கங்க²தீதி கங்க²ம் உப்பாதே³தி பத்த²னம் ‘‘அஹோ வத பஸ்ஸேய்ய’’ந்தி. விசிகிச்ச²தீதி ததோ ததோ தானி விசினந்தோ கிச்ச²தி ந ஸக்கோதி த³ட்டு²ம். நாதி⁴முச்சதீதி தாய விசிகிச்சா²ய ஸன்னிட்டா²னம் ந க³ச்ச²தி. ந ஸம்பஸீத³தீதி ததோ ‘‘பரிபுண்ணலக்க²ணோ அய’’ந்தி ப⁴க³வதி பஸாத³ம் நாபஜ்ஜதி. கங்கா²ய வா ஸுது³ப்³ப³லவிமதி வுத்தா, விசிகிச்சா²ய மஜ்ஜி²மா, அனதி⁴முச்சனதாய ப³லவதீ, அஸம்பஸாதே³ன தேஹி தீஹி த⁴ம்மேஹி சித்தஸ்ஸ காலுஸ்ஸியபா⁴வோ.

கோஸோஹிதேதி வத்தி²கோஸேன படிச்ச²ன்னே. வத்த²கு³ய்ஹேதி அங்க³ஜாதே. ப⁴க³வதோ ஹி வரவாரணஸ்ஸேவ கோஸோஹிதம் வத்த²கு³ய்ஹம் ஸுவண்ணவண்ணம் பது³மக³ப்³ப⁴ஸமானம். தம் ஸோ வத்த²படிச்ச²ன்னத்தா அபஸ்ஸந்தோ அந்தோமுக²க³தாய ச ஜிவ்ஹாய பஹூதபா⁴வம் அஸல்லக்கே²ந்தோ தேஸு த்³வீஸு லக்க²ணேஸு கங்கீ² அஹோஸி விசிகிச்சீ². ததா²ரூபந்தி கத²ம் ரூபம்? கிமேத்த² அம்ஹேஹி வத்தப்³ப³ம், வுத்தமேதம் நாக³ஸேனத்தே²ரேனேவ மிலிந்த³ரஞ்ஞா புட்டே²ன (மி. ப. 4.3.3) –

‘‘து³க்கரம், ப⁴ந்தே நாக³ஸேன, ப⁴க³வதா கதந்தி. கிம், மஹாராஜாதி? மஹாஜனேன ஹிரிகரணோகாஸம் ப்³ரஹ்மாயுப்³ராஹ்மணஸ்ஸ ச அந்தேவாஸிஉத்தரஸ்ஸ ச பா³வரிஸ்ஸ அந்தேவாஸீனம் ஸோளஸன்னம் ப்³ராஹ்மணானஞ்ச ஸேலஸ்ஸ ப்³ராஹ்மணஸ்ஸ அந்தேவாஸீனம் திஸதமாணவானஞ்ச த³ஸ்ஸேஸி, ப⁴ந்தேதி. ந, மஹாராஜ, ப⁴க³வா கு³ய்ஹம் த³ஸ்ஸேதி, சா²யம் ப⁴க³வா த³ஸ்ஸேதி, இத்³தி⁴யா அபி⁴ஸங்க²ரித்வா நிவாஸனனிவத்த²ம் காயப³ந்த⁴னப³த்³த⁴ம் சீவரபாருதம் சா²யாரூபகமத்தம் த³ஸ்ஸேதி, மஹாராஜாதி. சா²யாரூபே தி³ட்டே² ஸதி தி³ட்டோ² ஏவ நனு, ப⁴ந்தேதி. திட்ட²தேதம், மஹாராஜ, ஹத³யரூபம் தி³ஸ்வா பு³ஜ்ஜ²னகஸத்தோ ப⁴வேய்ய, ஹத³யமம்ஸம் நீஹரித்வா த³ஸ்ஸேய்ய ஸம்மாஸம்பு³த்³தோ⁴தி. கல்லோஸி, ப⁴ந்தே, நாக³ஸேனா’’தி (மி. ப. 4.3.3).

நின்னாமேத்வாதி நீஹரித்வா. கண்ணஸோதானுமஸனேன சேத்த² தீ³க⁴பா⁴வோ, நாஸிகாஸோதானுமஸனேன தனுபா⁴வோ, நலாடச்சா²த³னேன புது²லபா⁴வோ பகாஸிதோதி வேதி³தப்³போ³. ஆசரியபாசரியானந்தி ஆசரியானஞ்சேவ ஆசரியாசரியானஞ்ச. ஸகே வண்ணேதி அத்தனோ கு³ணே.

554. பரிபுண்ணகாயோதி லக்க²ணேஹி பரிபுண்ணதாய அஹீனங்க³பச்சங்க³தாய ச பரிபுண்ணஸரீரோ. ஸுருசீதி ஸுந்த³ரஸரீரப்பபோ⁴. ஸுஜாதோதி ஆரோஹபரிணாஹஸம்பத்தியா ஸண்டா²னஸம்பத்தியா ச ஸுனிப்³ப³த்தோ. சாருத³ஸ்ஸனோதி ஸுசிரம்பி பஸ்ஸந்தானம் அதித்திஜனகம் அப்படிகூலம் ரமணீயம் சாரு ஏவ த³ஸ்ஸனம் அஸ்ஸாதி சாருத³ஸ்ஸனோ. கேசி பன ப⁴ணந்தி ‘‘சாருத³ஸ்ஸனோதி ஸுந்த³ரனேத்தோ’’தி. ஸுவண்ணவண்ணோதி ஸுவண்ணஸதி³ஸவண்ணோ. அஸீதி ப⁴வஸி. ஏதம் ஸப்³ப³பதே³ஹி யோஜேதப்³ப³ம். ஸுஸுக்கதா³டோ²தி ஸுட்டு² ஸுக்கதா³டோ². ப⁴க³வதோ ஹி தா³டா²ஹி சந்த³கிரணா விய அதிவிய பண்ட³ரரம்ஸியோ நிச்ச²ரந்தி. தேனாஹ – ‘‘ஸுஸுக்கதா³டோ²ஸீ’’தி.

555. மஹாபுரிஸலக்க²ணாதி புப்³பே³ வுத்தப்³யஞ்ஜனானேவ வசனந்தரேன நிக³மேந்தோ ஆஹ.

556. இதா³னி தேஸு லக்க²ணேஸு அத்தனோ அபி⁴ருசிதேஹி லக்க²ணேஹி ப⁴க³வந்தம் து²னந்தோ ஆஹ – ‘‘பஸன்னனேத்தோ’’திஆதி³. ப⁴க³வா ஹி பஞ்சவண்ணபஸாத³ஸம்பத்தியா பஸன்னனேத்தோ, பரிபுண்ணசந்த³மண்ட³லஸதி³ஸமுக²த்தா ஸுமுகோ², ஆரோஹபரிணாஹஸம்பத்தியா ப்³ரஹா, ப³ஹ்முஜுக³த்ததாய உஜு, ஜுதிமந்ததாய பதாபவா. யம்பி சேத்த² புப்³பே³ வுத்தம், தம் ‘‘மஜ்ஜே² ஸமணஸங்க⁴ஸ்ஸா’’தி இமினா பரியாயேன து²னதா புன வுத்தம். ஈதி³ஸோ ஹி ஏவம் விரோசதி. ஏஸ நயோ உத்தரகா³தா²யபி.

557-8. உத்தமவண்ணினோதி உத்தமவண்ணஸம்பன்னஸ்ஸ. ஜம்பு³ஸண்ட³ஸ்ஸாதி ஜம்பு³தீ³பஸ்ஸ. பாகடேன இஸ்ஸரியம் வண்ணயந்தோ ஆஹ, அபிச சக்கவத்தி சதுன்னம்பி தீ³பானம் இஸ்ஸரோ ஹோதி.

559. க²த்தியாதி ஜாதிக²த்தியா. போ⁴ஜாதி போ⁴கி³யா. ராஜானோதி யே கேசி ரஜ்ஜம் காரேந்தா. அனுயந்தாதி அனுகா³மினோ ஸேவகா. ராஜாபி⁴ராஜாதி ராஜூனம் பூஜனியோ ராஜா ஹுத்வா, சக்கவத்தீதி அதி⁴ப்பாயோ. மனுஜிந்தோ³தி மனுஸ்ஸாதி⁴பதி பரமிஸ்ஸரோ ஹுத்வா.

560. ஏவம் வுத்தே ப⁴க³வா ‘‘யே தே ப⁴வந்தி அரஹந்தோ ஸம்மாஸம்பு³த்³தா⁴, தே ஸகே வண்ணே ப⁴ஞ்ஞமானே அத்தானம் பாதுகரோந்தீ’’தி இமம் ஸேலஸ்ஸ மனோரத²ம் பூரேந்தோ ஆஹ ‘‘ராஜாஹமஸ்மீ’’தி. தத்ராயமதி⁴ப்பாயோ – யம் கோ² மம் த்வம் ஸேல யாசஸி ‘‘ராஜா அரஹஸி ப⁴விதும் சக்கவத்தீ’’தி, ஏத்த² அப்போஸ்ஸுக்கோ ஹோதி, ராஜாஹமஸ்மி, ஸதி ச ராஜத்தே யதா² அஞ்ஞோ ராஜா ஸமானோபி யோஜனஸதம் வா அனுஸாஸதி, த்³வே தீணி வா சத்தாரி வா பஞ்ச வா யோஜனஸதானி யோஜனஸஹஸ்ஸம் வா சக்கவத்தி ஹுத்வாபி சதுதீ³பபரியந்தமத்தம் வா, நாஹமேவம் பரிச்சி²ன்னவிஸயோ. அஹஞ்ஹி த⁴ம்மராஜா அனுத்தரோ ப⁴வக்³க³தோ அவீசிபரியந்தம் கத்வா திரியம் அப்பமேய்யா லோகதா⁴துயோ அனுஸாஸாமி. யாவதா ஹி அபத³த்³விபதா³தி³பே⁴தா³ ஸத்தா, அஹம் தேஸம் அக்³கோ³. ந ஹி மே கோசி ஸீலேன வா…பே… விமுத்திஞாணத³ஸ்ஸனேன வா படிபா⁴கோ³ அத்தி². ஸ்வாஹம் ஏவம் த⁴ம்மராஜா அனுத்தரோ அனுத்தரேனேவ சதுஸதிபட்டா²னாதி³பே⁴த³போ³தி⁴பக்கி²யஸங்கா²தேன த⁴ம்மேன சக்கம் வத்தேமி ‘‘இத³ம் பஜஹத², இத³ம் உபஸம்பஜ்ஜ விஹரதா²’’திஆதி³னா ஆணாசக்கம், ‘‘இத³ம் கோ² பன, பி⁴க்க²வே, து³க்க²ம் அரியஸச்ச’’ந்திஆதி³னா (ஸம். நி. 5.1081; மஹாவ. 14) பரியத்தித⁴ம்மேன த⁴ம்மசக்கமேவ வா. சக்கம் அப்படிவத்தியந்தி யம் சக்கம் அப்படிவத்தியம் ஹோதி ஸமணேன வா…பே… கேனசி லோகஸ்மிந்தி.

561-2. ஏவம் அத்தானம் ஆவிகரோந்தம் ப⁴க³வந்தம் தி³ஸ்வா பீதிஸோமனஸ்ஸஜாதோ ஸேலோ த³ள்ஹிகரணத்த²ம் ‘‘ஸம்பு³த்³தோ⁴ படிஜானாஸீ’’தி கா³தா²த்³வயமாஹ. தத்த² கோ நு ஸேனாபதீதி த⁴ம்மரஞ்ஞோ போ⁴தோ, த⁴ம்மேன பவத்திதஸ்ஸ த⁴ம்மசக்கஸ்ஸ அனுப்பவத்தகோ ஸேனாபதி கோதி புச்சி².

563. தேன ச ஸமயேன ப⁴க³வதோ த³க்கி²ணபஸ்ஸே ஆயஸ்மா ஸாரிபுத்தோ நிஸின்னோ ஹோதி ஸுவண்ணபுஞ்ஜோ விய ஸிரியா ஸோப⁴மானோ, தம் த³ஸ்ஸேந்தோ ப⁴க³வா ‘‘மயா பவத்தித’’ந்தி கா³த²மாஹ. தத்த² அனுஜாதோ ததா²க³தந்தி ததா²க³தஹேது அனுஜாதோ, ததா²க³தேன ஹேதுனா ஜாதோதி அத்தோ².

564. ஏவம் ‘‘கோ நு ஸேனாபதீ’’தி பஞ்ஹம் ப்³யாகரித்வா யம் ஸேலோ ஆஹ – ‘‘ஸம்பு³த்³தோ⁴ படிஜானாஸீ’’தி, தத்ர நம் நிக்கங்க²ம் காதுகாமோ ‘‘நாஹம் படிஞ்ஞாமத்தேனேவ படிஜானாமி, அபிசாஹம் இமினா காரணேன பு³த்³தோ⁴’’தி ஞாபேதும் ‘‘அபி⁴ஞ்ஞேய்ய’’ந்தி கா³த²மாஹ. தத்த² அபி⁴ஞ்ஞேய்யந்தி விஜ்ஜா ச விமுத்தி ச. மக்³க³ஸச்சஸமுத³யஸச்சானி பன பா⁴வேதப்³ப³பஹாதப்³பா³னி, ஹேதுவசனேன பன ப²லஸித்³தி⁴தோ தேஸம் ப²லானி நிரோத⁴ஸச்சது³க்க²ஸச்சானிபி வுத்தானேவ ப⁴வந்தி. யதோ ஸச்சி²காதப்³ப³ம் ஸச்சி²கதம், பரிஞ்ஞேய்யம் பரிஞ்ஞாதந்தி ஏவம்பேத்த² வுத்தமேவ ஹோதி. ஏவம் சதுஸச்சபா⁴வனாப²லஞ்ச விஜ்ஜாவிமுத்திம் த³ஸ்ஸேந்தோ ‘‘பு³ஜ்ஜி²தப்³ப³ம் பு³ஜ்ஜி²த்வா பு³த்³தோ⁴ ஜாதோஸ்மீ’’தி யுத்தேன ஹேதுனா பு³த்³த⁴த்தம் ஸாதே⁴தி.

565-7. ஏவம் நிப்பரியாயேன அத்தானம் பாதுகத்வா அத்தனி கங்கா²விதரணத்த²ம் ப்³ராஹ்மணம் அபி⁴த்த²ரயமானோ ‘‘வினயஸ்ஸூ’’தி கா³தா²த்தயமாஹ. தத்த² ஸல்லகத்தோதி ராக³ஸல்லாதி³ஸத்தஸல்லகத்தனோ. ப்³ரஹ்மபூ⁴தோதி ஸேட்ட²பூ⁴தோ. அதிதுலோதி துலம் அதீதோ உபமம் அதீதோ, நிரூபமோதி அத்தோ². மாரஸேனப்பமத்³த³னோதி ‘‘காமா தே பட²மா ஸேனா’’திஆதி³காய ‘‘பரே ச அவஜானாதீ’’தி (ஸு. நி. 440; மஹானி. 28; சூளனி. நந்த³மாணவபுச்சா²னித்³தே³ஸ 47) ஏவம் வுத்தாய மாரபரிஸஸங்கா²தாய மாரஸேனாய பமத்³த³னோ. ஸப்³பா³மித்தேதி க²ந்த⁴கிலேஸாபி⁴ஸங்கா²ரமச்சுதே³வபுத்தமாராதி³கே ஸப்³ப³பச்சத்தி²கே. வஸீகத்வாதி அத்தனோ வஸே வத்தேத்வா. அகுதோப⁴யோதி குதோசி அப⁴யோ.

568-70. ஏவம் வுத்தே ஸேலோ ப்³ராஹ்மணோ தாவதே³வ ப⁴க³வதி ஸஞ்ஜாதப்பஸாதோ³ பப்³ப³ஜ்ஜாபேக்கோ² ஹுத்வா ‘‘இமம் ப⁴வந்தோ’’தி கா³தா²த்தயமாஹ யதா² தம் பரிபாகக³தாய உபனிஸ்ஸயஸம்பத்தியா ஸம்மா சோதி³யமானோ. தத்த² கண்ஹாபி⁴ஜாதிகோதி சண்டா³லாதி³னீசகுலே ஜாதோ.

571. ததோ தேபி மாணவகா ததே²வ பப்³ப³ஜ்ஜாபேக்கா² ஹுத்வா ‘‘ஏதஞ்சே ருச்சதி போ⁴தோ’’தி கா³த²மாஹம்ஸு யதா² தம் தேன ஸத்³தி⁴ம் கதாதி⁴காரா குலபுத்தா.

572. அத² ஸேலோ தேஸு மாணவகேஸு துட்ட²சித்தோ தே த³ஸ்ஸேந்தோ பப்³ப³ஜ்ஜம் யாசமானோ ‘‘ப்³ராஹ்மணா’’தி கா³த²மாஹ.

573. ததோ ப⁴க³வா யஸ்மா ஸேலோ அதீதே பது³முத்தரஸ்ஸ ப⁴க³வதோ ஸாஸனே தேஸம்யேவ திண்ணம் புரிஸஸதானம் க³ணஸேட்டோ² ஹுத்வா தேஹி ஸத்³தி⁴ம் பரிவேணம் காராபேத்வா தா³னாதீ³னி புஞ்ஞானி ச கத்வா கமேன தே³வமனுஸ்ஸஸம்பத்திம் அனுப⁴வமானோ பச்சி²மே ப⁴வே தேஸம்யேவ ஆசரியோ ஹுத்வா நிப்³ப³த்தோ, தஞ்ச நேஸம் கம்மம் விமுத்திபரிபாகாய பரிபக்கம் ஏஹிபி⁴க்கு²பா⁴வஸ்ஸ ச உபனிஸ்ஸயபூ⁴தம், தஸ்மா தே ஸப்³பே³வ ஏஹிபி⁴க்கு²பப்³ப³ஜ்ஜாய பப்³பா³ஜேந்தோ ‘‘ஸ்வாக்கா²த’’ந்தி கா³த²மாஹ. தத்த² ஸந்தி³ட்டி²கந்தி பச்சக்க²ம். அகாலிகந்தி மக்³கா³னந்தரப²லுப்பத்திதோ ந காலந்தரே பத்தப்³ப³ப²லம். யத்தா²தி யன்னிமித்தா. மக்³க³ப்³ரஹ்மசரியனிமித்தா ஹி பப்³ப³ஜ்ஜா அப்பமத்தஸ்ஸ ஸதிவிப்பவாஸவிரஹிதஸ்ஸ தீஸு ஸிக்கா²ஸு ஸிக்க²தோ அமோகா⁴ ஹோதி. தேனாஹ – ‘‘ஸ்வாக்கா²தம்…பே… ஸிக்க²தோ’’தி.

ஏவஞ்ச வத்வா ‘‘ஏத² பி⁴க்க²வோ’’தி ப⁴க³வா அவோச. தே ஸப்³பே³ பத்தசீவரத⁴ரா ஹுத்வா ஆகாஸேனாக³ம்ம ப⁴க³வந்தம் அபி⁴வாதே³ஸும். ஏவமிமம் தேஸம் ஏஹிபி⁴க்கு²பா⁴வம் ஸந்தா⁴ய ஸங்கீ³திகாரா ‘‘அலத்த² கோ² ஸேலோ…பே… உபஸம்பத³’’ந்தி ஆஹம்ஸு.

பு⁴த்தாவிந்தி பு⁴த்தவந்தம். ஓனீதபத்தபாணிந்தி பத்ததோ ஓனீதபாணிம், அபனீதஹத்த²ந்தி வுத்தம் ஹோதி. தத்த² ‘‘உபக³ந்த்வா’’தி பாட²ஸேஸோ த³ட்ட²ப்³போ³. இதரதா² ஹி ப⁴க³வந்தம் ஏகமந்தம் நிஸீதீ³தி ந யுஜ்ஜதி.

574. அக்³கி³ஹுத்தமுகா²தி ப⁴க³வா கேணியஸ்ஸ சித்தானுகூலவஸேன அனுமோத³ந்தோ ஏவமாஹ. தத்த² அக்³கி³பரிசரியம் வினா ப்³ராஹ்மணானம் யஞ்ஞாபா⁴வதோ ‘‘அக்³கி³ஹுத்தமுகா² யஞ்ஞா’’தி வுத்தம். அக்³கி³ஹுத்தஸேட்டா² அக்³கி³ஹுத்தபதா⁴னாதி அத்தோ². வேதே³ ஸஜ்ஜா²யந்தேஹி பட²மம் ஸஜ்ஜா²யிதப்³ப³தோ ஸாவித்தீ ‘‘ச²ந்த³ஸோ முக²’’ந்தி வுத்தா. மனுஸ்ஸானம் ஸேட்ட²தோ ராஜா ‘‘முக²’’ந்தி வுத்தோ. நதீ³னம் ஆதா⁴ரதோ படிஸரணதோ ச ஸாக³ரோ ‘‘முக²’’ந்தி வுத்தோ. சந்த³யோக³வஸேன ‘‘அஜ்ஜ கத்திகா அஜ்ஜ ரோஹினீ’’தி ஸஞ்ஜானனதோ ஆலோககரணதோ ஸோம்மபா⁴வதோ ச ‘‘நக்க²த்தானம் முக²ம் சந்தோ³’’தி வுத்தோ. தபந்தானம் அக்³க³த்தா ஆதி³ச்சோ ‘‘தபதம் முக²’’ந்தி வுத்தோ. த³க்கி²ணேய்யானம் பன அக்³க³த்தா விஸேஸேன தஸ்மிம் ஸமயே பு³த்³த⁴ப்பமுக²ம் ஸங்க⁴ம் ஸந்தா⁴ய ‘‘புஞ்ஞம் ஆகங்க²மானானம், ஸங்கோ⁴ வே யஜதம் முக²’’ந்தி வுத்தோ. தேன ஸங்கோ⁴ புஞ்ஞஸ்ஸ ஆயமுக²ந்தி த³ஸ்ஸேதி.

576. யம் தம் ஸரணந்தி அஞ்ஞப்³யாகரணகா³த²மாஹ. தஸ்ஸத்தோ² – பஞ்சஹி சக்கூ²ஹி சக்கு²மா ப⁴க³வா, யஸ்மா மயம் இதோ அட்ட²மே தி³வஸே தம் ஸரணம் அக³மம்ஹ, தஸ்மா ஸத்தரத்தேன தவ ஸாஸனே அனுத்தரேன த³மதே²ன த³ந்தம்ஹ. அஹோ தே ஸரணஸ்ஸ ஆனுபா⁴வோதி.

577-8. ததோ பரம் ப⁴க³வந்தம் த்³வீஹி கா³தா²ஹி து²னித்வா ததியாய வந்த³னம் யாசதி –

579. ‘‘பி⁴க்க²வோ திஸதா இமே, திட்ட²ந்தி பஞ்ஜலீகதா;

பாதே³ வீர பஸாரேஹி, நாகா³ வந்த³ந்து ஸத்து²னோ’’தி.

பரமத்த²ஜோதிகாய கு²த்³த³க-அட்ட²கதா²ய

ஸுத்தனிபாத-அட்ட²கதா²ய ஸேலஸுத்தவண்ணனா நிட்டி²தா.