1. பப்³ப³ஜ்ஜாஸுத்தவண்ணனா

408. பப்³ப³ஜ்ஜம் கித்தயிஸ்ஸாமீதி பப்³ப³ஜ்ஜாஸுத்தம். கா உப்பத்தி? ப⁴க³வதி கிர ஸாவத்தி²யம் விஹரந்தே ஆயஸ்மதோ ஆனந்த³ஸ்ஸ பரிவிதக்கோ உத³பாதி³ – ‘‘ஸாரிபுத்தாதீ³னம் மஹாஸாவகானம் பப்³ப³ஜ்ஜா கித்திதா, தம் பி⁴க்கூ² ச உபாஸகா ச ஜானந்தி. ப⁴க³வதோ பன அகித்திதா, யம்னூனாஹம் கித்தேய்ய’’ந்தி. ஸோ ஜேதவனவிஹாரே ஆஸனே நிஸீதி³த்வா சித்தபீ³ஜனிம் க³ஹேத்வா பி⁴க்கூ²னம் ப⁴க³வதோ பப்³ப³ஜ்ஜம் கித்தேந்தோ இமம் ஸுத்தமபா⁴ஸி.

தத்த² யஸ்மா பப்³ப³ஜ்ஜம் கித்தேந்தேன யதா² பப்³ப³ஜி, தம் கித்தேதப்³ப³ம். யதா² ச பப்³ப³ஜி, தம் கித்தேந்தேன யதா² வீமம்ஸமானோ பப்³ப³ஜ்ஜம் ரோசேஸி, தம் கித்தேதப்³ப³ம். தஸ்மா ‘‘பப்³ப³ஜ்ஜம் கித்தயிஸ்ஸாமீ’’தி வத்வா ‘‘யதா² பப்³ப³ஜீ’’திஆதி³மாஹ. சக்கு²மாதி பஞ்சஹி சக்கூ²ஹி சக்கு²மா சக்கு²ஸம்பன்னோதி அத்தோ². ஸேஸமாதி³கா³தா²ய உத்தானமேவ.

409. இதா³னி ‘‘யதா² வீமம்ஸமானோ’’தி தமத்த²ம் பகாஸேந்தோ ஆஹ ‘‘ஸம்பா³தோ⁴ய’’ந்தி. தத்த² ஸம்பா³தோ⁴தி புத்ததா³ராதி³ஸம்பீளனேன கிலேஸஸம்பீளனேன ச குஸலகிரியாய ஓகாஸரஹிதோ. ரஜஸ்ஸாயதனந்தி கம்போ³ஜாத³யோ விய அஸ்ஸாதீ³னம், ராகா³தி³ரஜஸ்ஸ உப்பத்திதே³ஸோ. அப்³போ⁴காஸோதி வுத்தஸம்பா³த⁴படிபக்க²பா⁴வேன ஆகாஸோ விய விவடா. இதி தி³ஸ்வான பப்³ப³ஜீதி இதி க⁴ராவாஸபப்³ப³ஜ்ஜாஸு ப்³யாதி⁴ஜராமரணேஹி ஸுட்டு²தரம் சோதி³யமானஹத³யோ ஆதீ³னவமானிஸம்ஸஞ்ச வீமம்ஸித்வா, மஹாபி⁴னிக்க²மனம் நிக்க²மித்வா, அனோமானதீ³தீரே க²க்³கே³ன கேஸே சி²ந்தி³த்வா, தாவதே³வ ச த்³வங்கு³லமத்தஸண்டி²தஸமணஸாருப்பகேஸமஸ்ஸு ஹுத்வா க⁴டிகாரேன ப்³ரஹ்முனா உபனீதே அட்ட² பரிக்கா²ரே க³ஹேத்வா ‘‘ஏவம் நிவாஸேதப்³ப³ம் பாருபிதப்³ப³’’ந்தி கேனசி அனனுஸிட்டோ² அனேகஜாதிஸஹஸ்ஸபவத்திதேன அத்தனோ பப்³ப³ஜ்ஜாசிண்ணேனேவ ஸிக்கா²பியமானோ பப்³ப³ஜி. ஏகம் காஸாவம் நிவாஸேத்வா ஏகம் உத்தராஸங்க³ம் கரித்வா ஏகம் சீவரம் க²ந்தே⁴ கரித்வா மத்திகாபத்தம் அம்ஸே ஆலக்³கே³த்வா பப்³ப³ஜிதவேஸம் அதி⁴ட்டா²ஸீதி வுத்தம் ஹோதி. ஸேஸமேத்த² உத்தானமேவ.

410. ஏவம் ப⁴க³வதோ பப்³ப³ஜ்ஜம் கித்தேத்வா ததோ பரம் பப்³ப³ஜிதபடிபத்திம் அனோமானதீ³தீரம் ஹித்வா பதா⁴னாய க³மனஞ்ச பகாஸேதும் ‘‘பப்³ப³ஜித்வான காயேனா’’திஆதி³ம் ஸப்³ப³மபா⁴ஸி. தத்த² காயேன பாபகம்மம் விவஜ்ஜயீதி திவித⁴ம் காயது³ச்சரிதம் வஜ்ஜேஸி. வசீது³ச்சரிதந்தி சதுப்³பி³த⁴ம் வசீது³ச்சரிதம். ஆஜீவம் பரிஸோத⁴யீதி மிச்சா²ஜீவம் ஹித்வா ஸம்மாஜீவமேவ பவத்தயி.

411. ஏவம் ஆஜீவட்ட²மகஸீலம் ஸோதே⁴த்வா அனோமானதீ³தீரதோ திம்ஸயோஜனப்பமாணம் ஸத்தாஹேன அக³மா ராஜக³ஹம் பு³த்³தோ⁴. தத்த² கிஞ்சாபி யதா³ ராஜக³ஹம் அக³மாஸி, ததா³ பு³த்³தோ⁴ ந ஹோதி, ததா²பி பு³த்³த⁴ஸ்ஸ புப்³ப³சரியாதி கத்வா ஏவம் வத்தும் லப்³ப⁴தி – ‘‘இத⁴ ராஜா ஜாதோ, இத⁴ ரஜ்ஜம் அக்³க³ஹேஸீ’’திஆதி³ லோகியவோஹாரவசனம் விய. மக³தா⁴னந்தி மக³தா⁴னம் ஜனபத³ஸ்ஸ நக³ரந்தி வுத்தம் ஹோதி. கி³ரிப்³ப³ஜந்தி இத³ம்பி தஸ்ஸ நாமம். தஞ்ஹி பண்ட³வகி³ஜ்ஜ²கூடவேபா⁴ரஇஸிகி³லிவேபுல்லனாமகானம் பஞ்சன்னம் கி³ரீனம் மஜ்ஜே² வஜோ விய டி²தம், தஸ்மா ‘‘கி³ரிப்³ப³ஜ’’ந்தி வுச்சதி. பிண்டா³ய அபி⁴ஹாரேஸீதி பி⁴க்க²த்தா²ய தஸ்மிம் நக³ரே சரி. ஸோ கிர நக³ரத்³வாரே ட²த்வா சிந்தேஸி – ‘‘ஸசாஹம் ரஞ்ஞோ பி³ம்பி³ஸாரஸ்ஸ அத்தனோ ஆக³மனம் நிவேதே³ய்யம், ‘ஸுத்³தோ⁴த³னஸ்ஸ புத்தோ ஸித்³த⁴த்தோ² நாம குமாரோ ஆக³தோ’தி ப³ஹும்பி மே பச்சயம் அபி⁴ஹரேய்ய. ந கோ² பன மே தம் பதிரூபம் பப்³ப³ஜிதஸ்ஸ ஆரோசேத்வா பச்சயக³ஹணம், ஹந்தா³ஹம் பிண்டா³ய சராமீ’’தி தே³வத³த்தியம் பம்ஸுகூலசீவரம் பாருபித்வா மத்திகாபத்தம் க³ஹேத்வா பாசீனத்³வாரேன நக³ரம் பவிஸித்வா அனுக⁴ரம் பிண்டா³ய அசரி. தேனாஹ ஆயஸ்மா ஆனந்தோ³ – ‘‘பிண்டா³ய அபி⁴ஹாரேஸீ’’தி. ஆகிண்ணவரலக்க²ணோதி ஸரீரே ஆகிரித்வா விய ட²பிதவரலக்க²ணோ விபுலவரலக்க²ணோ வா. விபுலம்பி ஹி ‘‘ஆகிண்ண’’ந்தி வுச்சதி. யதா²ஹ – ‘‘ஆகிண்ணலுத்³தோ³ புரிஸோ, தா⁴திசேலம்வ மக்கி²தோ’’தி (ஜா. 1.6.118; 1.9.106). விபுலலுத்³தோ³தி அத்தோ².

412. தமத்³த³ஸாதி ததோ கிர புரிமானி ஸத்த தி³வஸானி நக³ரே நக்க²த்தம் கோ⁴ஸிதம் அஹோஸி. தம் தி³வஸம் பன ‘‘நக்க²த்தம் வீதிவத்தம், கம்மந்தா பயோஜேதப்³பா³’’தி பே⁴ரி சரி. அத² மஹாஜனோ ராஜங்க³ணே ஸன்னிபதி. ராஜாபி ‘‘கம்மந்தம் ஸம்வித³ஹிஸ்ஸாமீ’’தி ஸீஹபஞ்ஜரம் விவரித்வா ப³லகாயம் பஸ்ஸந்தோ தம் பிண்டா³ய அபி⁴ஹாரேந்தம் மஹாஸத்தம் அத்³த³ஸ. தேனாஹ ஆயஸ்மா ஆனந்தோ³ – ‘‘தமத்³த³ஸா பி³ம்பி³ஸாரோ, பாஸாத³ஸ்மிம் பதிட்டி²தோ’’தி. இமமத்த²ம் அபா⁴ஸதா²தி இமம் அத்த²ம் அமச்சானம் அபா⁴ஸி.

413. இதா³னி தம் தேஸம் அமச்சானம் பா⁴ஸிதமத்த²ம் த³ஸ்ஸேந்தோ ஆஹ – ‘‘இமம் போ⁴ந்தோ’’தி. தத்த² இமந்தி ஸோ ராஜா போ³தி⁴ஸத்தம் த³ஸ்ஸேதி, போ⁴ந்தோதி அமச்சே ஆலபதி. நிஸாமேதா²தி பஸ்ஸத². அபி⁴ரூபோதி த³ஸ்ஸனீயங்க³பச்சங்கோ³. ப்³ரஹ்மாதி ஆரோஹபரிணாஹஸம்பன்னோ. ஸுசீதி பரிஸுத்³த⁴ச²விவண்ணோ. சரணேனாதி க³மனேன.

414-5. நீசகுலாமிவாதி நீசகுலா இவ பப்³ப³ஜிதோ ந ஹோதீதி அத்தோ². மகாரோ பத³ஸந்தி⁴கரோ. குஹிம் பி⁴க்கு² க³மிஸ்ஸதீதி அயம் பி⁴க்கு² குஹிம் க³மிஸ்ஸதி, அஜ்ஜ கத்த² வஸிஸ்ஸதீதி ஜானிதும் ராஜதூ³தா ஸீக⁴ம் க³ச்ச²ந்து. த³ஸ்ஸனகாமா ஹி மயம் அஸ்ஸாதி இமினா அதி⁴ப்பாயேன ஆஹ. கு³த்தத்³வாரோ ஓக்கி²த்தசக்கு²தாய, ஸுஸம்வுதோ ஸதியா. கு³த்தத்³வாரோ வா ஸதியா, ஸுஸம்வுதோ பாஸாதி³கேன ஸங்கா⁴டிசீவரதா⁴ரணேன.

416. கி²ப்பம் பத்தம் அபூரேஸீதி ஸம்பஜானத்தா பதிஸ்ஸதத்தா ச அதி⁴கம் அக³ண்ஹந்தோ ‘‘அலம் ஏத்தாவதா’’தி அஜ்ஜா²ஸயபூரணேன கி²ப்பம் பத்தம் அபூரேஸி. முனீதி மோனத்தா²ய படிபன்னத்தா அப்பத்தமுனிபா⁴வோபி முனிஇச்சேவ வுத்தோ, லோகவோஹாரேன வா. லோகியா ஹி அமோனஸம்பத்தம்பி பப்³ப³ஜிதம் ‘‘முனீ’’தி ப⁴ணந்தி. பண்ட³வம் அபி⁴ஹாரேஸீதி தம் பப்³ப³தம் அபி⁴ருஹி. ஸோ கிர மனுஸ்ஸே புச்சி² ‘‘இமஸ்மிம் நக³ரே பப்³ப³ஜிதா கத்த² வஸந்தீ’’தி. அத²ஸ்ஸ தே ‘‘பண்ட³வஸ்ஸ உபரி புரத்தா²பி⁴முக²பப்³பா⁴ரே’’தி ஆரோசேஸும். தஸ்மா தமேவ பண்ட³வம் அபி⁴ஹாரேஸி ‘‘ஏத்த² வாஸோ ப⁴விஸ்ஸதீ’’தி ஏவம் சிந்தேத்வா.

419-23. ப்³யக்³கு⁴ஸபோ⁴வ ஸீஹோவ கி³ரிக³ப்³ப⁴ரேதி கி³ரிகு³ஹாயம் ப்³யக்³கோ⁴ விய உஸபோ⁴ விய ஸீஹோ விய ச நிஸின்னோதி அத்தோ². ஏதே ஹி தயோ ஸேட்டா² விக³தப⁴யபே⁴ரவா கி³ரிக³ப்³ப⁴ரே நிஸீத³ந்தி, தஸ்மா ஏவம் உபமம் அகாஸி. ப⁴த்³த³யானேனாதி ஹத்தி²அஸ்ஸரத²ஸிவிகாதி³னா உத்தமயானேன. ஸயானபூ⁴மிம் யாயித்வாதி யாவதிகா பூ⁴மி ஹத்தி²அஸ்ஸாதி³னா யானேன ஸக்கா க³ந்தும், தம் க³ந்த்வா. ஆஸஜ்ஜாதி பத்வா, ஸமீபமஸ்ஸ க³ந்த்வாதி அத்தோ². உபாவிஸீதி நிஸீதி³. யுவாதி யோப்³ப³னஸம்பன்னோ. த³ஹரோதி ஜாதியா தருணோ. பட²முப்பத்திகோ ஸுஸூதி தது³ப⁴யவிஸேஸனமேவ. யுவா ஸுஸூதி அதியோப்³ப³னோ. பட²முப்பத்திகோதி பட²மேனேவ யோப்³ப³னவேஸேன உட்டி²தோ. த³ஹரோ சாஸீதி ஸதி ச த³ஹரத்தே ஸுஸு பா³லகோ விய கா²யஸீதி.

424-5. அனீகக்³க³ந்தி ப³லகாயம் ஸேனாமுக²ம். த³தா³மி போ⁴கே³ பு⁴ஞ்ஜஸ்ஸூதி ஏத்த² ‘‘அஹம் தே அங்க³மக³தே⁴ஸு யாவிச்ச²ஸி, தாவ த³தா³மி போ⁴கே³. தம் த்வம் ஸோப⁴யந்தோ அனீகக்³க³ம் நாக³ஸங்க⁴புரக்க²தோ பு⁴ஞ்ஜஸ்ஸூ’’தி ஏவம் ஸம்ப³ந்தோ⁴ வேதி³தப்³போ³. உஜும் ஜனபதோ³ ராஜாதி ‘‘த³தா³மி போ⁴கே³ பு⁴ஞ்ஜஸ்ஸு, ஜாதிம் அக்கா²ஹி புச்சி²தோ’’தி ஏவம் கிர வுத்தோ மஹாபுரிஸோ சிந்தேஸி – ‘‘ஸசே அஹம் ரஜ்ஜேன அத்தி²கோ அஸ்ஸம், சாதுமஹாராஜிகாத³யோபி மம் அத்தனோ அத்தனோ ரஜ்ஜேன நிமந்தேய்யும், கே³ஹே டி²தோ ஏவ வா சக்கவத்திரஜ்ஜம் காரேய்யம். அயம் பன ராஜா அஜானந்தோ ஏவமாஹ – ‘ஹந்தா³ஹம், தம் ஜானாபேமீ’’’தி பா³ஹம் உச்சாரேத்வா அத்தனோ ஆக³ததி³ஸாபா⁴க³ம் நித்³தி³ஸந்தோ ‘‘உஜும் ஜனபதோ³ ராஜா’’திஆதி³மாஹ. தத்த² ஹிமவந்தஸ்ஸ பஸ்ஸதோதி ப⁴ணந்தோ ஸஸ்ஸஸம்பத்திவேகல்லாபா⁴வம் த³ஸ்ஸேதி. ஹிமவந்தஞ்ஹி நிஸ்ஸாய பாஸாணவிவரஸம்ப⁴வா மஹாஸாலாபி பஞ்சஹி வுத்³தீ⁴ஹி வட்³ட⁴ந்தி, கிமங்க³ம் பன கே²த்தே வுத்தானி ஸஸ்ஸானி. த⁴னவீரியேன ஸம்பன்னோதி ப⁴ணந்தோ ஸத்தஹி ரதனேஹி அவேகல்லத்தம், பரராஜூஹி அதக்கனீயம் வீரபுரிஸாதி⁴ட்டி²தபா⁴வஞ்சஸ்ஸ த³ஸ்ஸேதி. கோஸலேஸு நிகேதினோதி ப⁴ணந்தோ நவகராஜபா⁴வம் படிக்கி²பதி. நவகராஜா ஹி நிகேதீதி ந வுச்சதி. யஸ்ஸ பன ஆதி³காலதோ பபு⁴தி அன்வயவஸேன ஸோ ஏவ ஜனபதோ³ நிவாஸோ, ஸோ நிகேதீதி வுச்சதி. ததா²ரூபோ ச ராஜா ஸுத்³தோ⁴த³னோ, யம் ஸந்தா⁴யாஹ ‘‘கோஸலேஸு நிகேதினோ’’தி. தேன அன்வயாக³தம்பி போ⁴க³ஸம்பத்திம் தீ³பேதி.

426. ஏத்தாவதா அத்தனோ போ⁴க³ஸம்பத்திம் தீ³பேத்வா ‘‘ஆதி³ச்சா நாம கோ³த்தேன, ஸாகியா நாம ஜாதியா’’தி இமினா ஜாதிஸம்பத்திஞ்ச ஆசிக்கி²த்வா யம் வுத்தம் ரஞ்ஞா ‘‘த³தா³மி போ⁴கே³ பு⁴ஞ்ஜஸ்ஸூ’’தி, தம் படிக்கி²பந்தோ ஆஹ – ‘‘தம்ஹா குலா பப்³ப³ஜிதோம்ஹி, ந காமே அபி⁴பத்த²ய’’ந்தி. யதி³ ஹி அஹம் காமே அபி⁴பத்த²யேய்யம், ந ஈதி³ஸம் த⁴னவீரியஸம்பன்னம் த்³வாஸீதிஸஹஸ்ஸவீரபுரிஸஸமாகுலம் குலம் ச²ட்³டே³த்வா பப்³ப³ஜேய்யந்தி அயம் கிரேத்த² அதி⁴ப்பாயோ.

427. ஏவம் ரஞ்ஞோ வசனம் படிக்கி²பித்வா ததோ பரம் அத்தனோ பப்³ப³ஜ்ஜாஹேதும் த³ஸ்ஸேந்தோ ஆஹ – ‘‘காமேஸ்வாதீ³னவம் தி³ஸ்வா, நேக்க²ம்மம் த³ட்டு² கே²மதோ’’தி. ஏதம் ‘‘பப்³ப³ஜிதோம்ஹீ’’தி இமினா ஸம்ப³ந்தி⁴தப்³ப³ம். தத்த² த³ட்டூ²தி தி³ஸ்வா. ஸேஸமேத்த² இதோ புரிமகா³தா²ஸு ச யம் யம் ந விசாரிதம், தம் தம் ஸப்³ப³ம் உத்தானத்த²த்தா ஏவ ந விசாரிதந்தி வேதி³தப்³ப³ம். ஏவம் அத்தனோ பப்³ப³ஜ்ஜாஹேதும் வத்வா பதா⁴னத்தா²ய க³ந்துகாமோ ராஜானம் ஆமந்தேந்தோ ஆஹ – ‘‘பதா⁴னாய க³மிஸ்ஸாமி, ஏத்த² மே ரஞ்ஜதீ மனோ’’தி. தஸ்ஸத்தோ² – யஸ்மாஹம், மஹாராஜ, நேக்க²ம்மம் த³ட்டு² கே²மதோ பப்³ப³ஜிதோ, தஸ்மா தம் பரமத்த²னேக்க²ம்மம் நிப்³பா³னாமதம் ஸப்³ப³த⁴ம்மானம் அக்³க³ட்டே²ன பதா⁴னம் பத்தே²ந்தோ பதா⁴னத்தா²ய க³மிஸ்ஸாமி, ஏத்த² மே பதா⁴னே ரஞ்ஜதி மனோ, ந காமேஸூதி. ஏவம் வுத்தே கிர ராஜா போ³தி⁴ஸத்தம் ஆஹ – ‘‘புப்³பே³வ மேதம், ப⁴ந்தே, ஸுதம் ‘ஸுத்³தோ⁴த³னரஞ்ஞோ கிர புத்தோ ஸித்³த⁴த்த²குமாரோ சத்தாரி புப்³ப³னிமித்தானி தி³ஸ்வா பப்³ப³ஜித்வா பு³த்³தோ⁴ ப⁴விஸ்ஸதீ’தி, ஸோஹம், ப⁴ந்தே, தும்ஹாகம் அதி⁴முத்திம் தி³ஸ்வா ஏவம்பஸன்னோ ‘அத்³தா⁴ பு³த்³த⁴த்தம் பாபுணிஸ்ஸதா²’தி. ஸாது⁴, ப⁴ந்தே, பு³த்³த⁴த்தம் பத்வா பட²மம் மம விஜிதம் ஓக்கமேய்யாதா²’’தி.

பரமத்த²ஜோதிகாய கு²த்³த³க-அட்ட²கதா²ய

ஸுத்தனிபாத-அட்ட²கதா²ய பப்³ப³ஜ்ஜாஸுத்தவண்ணனா நிட்டி²தா.