11. ராஹுலஸுத்தவண்ணனா

338. கச்சி அபி⁴ண்ஹஸம்வாஸாதி ராஹுலஸுத்தம். கா உப்பத்தி? ப⁴க³வா ஸம்மாஸம்போ³தி⁴ம் அபி⁴ஸம்பு³ஜ்ஜி²த்வா போ³தி⁴மண்ட³தோ அனுபுப்³பே³ன கபிலவத்து²ம் க³ந்த்வா தத்த² ராஹுலகுமாரேன ‘‘தா³யஜ்ஜம் மே ஸமண தே³ஹீ’’தி தா³யஜ்ஜம் யாசிதோ ஸாரிபுத்தத்தே²ரம் ஆணாபேஸி – ‘‘ராஹுலகுமாரம் பப்³பா³ஜேஹீ’’தி. தம் ஸப்³ப³ம் க²ந்த⁴கட்ட²கதா²யம் (மஹாவ. அட்ட². 105) வுத்தனயேனேவ க³ஹேதப்³ப³ம். ஏவம் பப்³ப³ஜிதம் பன ராஹுலகுமாரம் வுட்³டி⁴ப்பத்தம் ஸாரிபுத்தத்தே²ரோவ உபஸம்பாதே³ஸி, மஹாமோக்³க³ல்லானத்தே²ரோ அஸ்ஸ கம்மவாசாசரியோ அஹோஸி. தம் ப⁴க³வா ‘‘அயம் குமாரோ ஜாதிஆதி³ஸம்பன்னோ, ஸோ ஜாதிகோ³த்தகுலவண்ணபோக்க²ரதாதீ³னி நிஸ்ஸாய மானம் வா மத³ம் வா மா அகாஸீ’’தி த³ஹரகாலதோ பபு⁴தி யாவ ந அரியபூ⁴மிம் பாபுணி, தாவ ஓவத³ந்தோ அபி⁴ண்ஹம் இமம் ஸுத்தமபா⁴ஸி. தஸ்மா சேதம் ஸுத்தபரியோஸானேபி வுத்தம் ‘‘இத்த²ம் ஸுத³ம் ப⁴க³வா ஆயஸ்மந்தம் ராஹுலம் இமாஹி கா³தா²ஹி அபி⁴ண்ஹம் ஓவத³தீ’’தி. தத்த² பட²மகா³தா²யம் அயம் ஸங்கே²பத்தோ² ‘‘கச்சி த்வம், ராஹுல, அபி⁴ண்ஹம் ஸம்வாஸஹேது ஜாதிஆதீ³னம் அஞ்ஞதரேன வத்து²னா ந பரிப⁴வஸி பண்டி³தம், ஞாணபதீ³பஸ்ஸ த⁴ம்மதே³ஸனாபதீ³பஸ்ஸ ச தா⁴ரணதோ உக்காதா⁴ரோ மனுஸ்ஸானம் கச்சி அபசிதோ தயா, கச்சி நிச்சம் பூஜிதோ தயா’’தி ஆயஸ்மந்தம் ஸாரிபுத்தம் ஸந்தா⁴ய ப⁴ணதி.

339. ஏவம் வுத்தே ஆயஸ்மா ராஹுலோ ‘‘நாஹம் ப⁴க³வா நீசபுரிஸோ விய ஸம்வாஸஹேது மானம் வா மத³ம் வா கரோமீ’’தி தீ³பேந்தோ இமம் படிகா³த²மாஹ ‘‘நாஹம் அபி⁴ண்ஹஸம்வாஸா’’தி. ஸா உத்தானத்தா² ஏவ.

340. ததோ நம் ப⁴க³வா உத்தரிம் ஓவத³ந்தோ பஞ்ச காமகு³ணேதிஆதி³கா அவஸேஸகா³தா²யோ ஆஹ. தத்த² யஸ்மா பஞ்ச காமகு³ணா ஸத்தானம் பியரூபா பியஜாதிகா அதிவிய ஸத்தேஹி இச்சி²தா பத்தி²தா, மனோ ச நேஸம் ரமயந்தி, தே சாயஸ்மா ராஹுலோ ஹித்வா ஸத்³தா⁴ய க⁴ரா நிக்க²ந்தோ, ந ராஜாபி⁴னீதோ, ந சோராபி⁴னீதோ, ந இணட்டோ, ந ப⁴யட்டோ, ந ஜீவிகாபகதோ, தஸ்மா நம் ப⁴க³வா ‘‘பஞ்ச காமகு³ணே ஹித்வா, பியரூபே மனோரமே, ஸத்³தா⁴ய க⁴ரா நிக்க²ம்மா’’தி ஸமுத்தேஜேத்வா இமஸ்ஸ நேக்க²ம்மஸ்ஸ பதிரூபாய படிபத்தியா நியோஜேந்தோ ஆஹ – ‘‘து³க்க²ஸ்ஸந்தகரோ ப⁴வா’’தி.

தத்த² ஸியா ‘‘நனு சாயஸ்மா தா³யஜ்ஜம் பத்தே²ந்தோ ப³லக்காரேன பப்³பா³ஜிதோ, அத² கஸ்மா ப⁴க³வா ஆஹ – ‘ஸத்³தா⁴ய க⁴ரா நிக்க²ம்மா’’’தி வுச்சதே – நேக்க²ம்மாதி⁴முத்தத்தா. அயஞ்ஹி ஆயஸ்மா தீ³க⁴ரத்தம் நேக்க²ம்மாதி⁴முத்தோ பது³முத்தரஸம்மாஸம்பு³த்³த⁴ஸ்ஸ புத்தம் உபரேவதம் நாம ஸாமணேரம் தி³ஸ்வா ஸங்கோ² நாம நாக³ராஜா ஹுத்வா ஸத்த தி³வஸே தா³னம் த³த்வா ததா²பா⁴வம் பத்தே²த்வா ததோ பபு⁴தி பத்த²னாஸம்பன்னோ அபி⁴னீஹாரஸம்பன்னோ ஸதஸஹஸ்ஸகப்பே பாரமியோ பூரேத்வா அந்திமப⁴வம் உபபன்னோ. ஏவம் நேக்க²ம்மாதி⁴முத்ததஞ்சஸ்ஸ ப⁴க³வா ஜானாதி. ததா²க³தப³லஞ்ஞதரஞ்ஹி ஏதம் ஞாணம். தஸ்மா ஆஹ – ‘‘ஸத்³தா⁴ய க⁴ரா நிக்க²ம்மா’’தி. அத² வா தீ³க⁴ரத்தம் ஸத்³தா⁴யேவ க⁴ரா நிக்க²ம்ம இதா³னி து³க்க²ஸ்ஸந்தகரோ ப⁴வாதி அயமேத்த² அதி⁴ப்பாயோ.

341. இதா³னிஸ்ஸ ஆதி³தோ பபு⁴தி வட்டது³க்க²ஸ்ஸ அந்தகிரியாய படிபத்திம் த³ஸ்ஸேதும் ‘‘மித்தே ப⁴ஜஸ்ஸு கல்யாணே’’திஆதி³மாஹ. தத்த² ஸீலாதீ³ஹி அதி⁴கா கல்யாணமித்தா நாம, தே ப⁴ஜந்தோ ஹிமவந்தம் நிஸ்ஸாய மஹாஸாலா மூலாதீ³ஹி விய ஸீலாதீ³ஹி வட்³ட⁴தி. தேனாஹ – ‘‘மித்தே ப⁴ஜஸ்ஸு கல்யாணே’’தி. பந்தஞ்ச ஸயனாஸனம், விவித்தம் அப்பனிக்³கோ⁴ஸந்தி யஞ்ச ஸயனாஸனம் பந்தம் தூ³ரம் விவித்தம் அப்பாகிண்ணம் அப்பனிக்³கோ⁴ஸம், யத்த² மிக³ஸூகராதி³ஸத்³தே³ன அரஞ்ஞஸஞ்ஞா உப்பஜ்ஜதி, ததா²ரூபம் ஸயனாஸனஞ்ச ப⁴ஜஸ்ஸு. மத்தஞ்ஞூ ஹோஹி போ⁴ஜனேதி பமாணஞ்ஞூ ஹோஹி, படிக்³க³ஹணமத்தம் பரிபோ⁴க³மத்தஞ்ச ஜானாஹீதி அத்தோ². தத்த² படிக்³க³ஹணமத்தஞ்ஞுனா தே³ய்யத⁴ம்மேபி அப்பே தா³யகேபி அப்பம் தா³துகாமே அப்பமேவ க³ஹேதப்³ப³ம், தே³ய்யத⁴ம்மே அப்பே தா³யகே பன ப³ஹும் தா³துகாமேபி அப்பமேவ க³ஹேதப்³ப³ம், தே³ய்யத⁴ம்மே பன ப³ஹுதரே தா³யகேபி அப்பம் தா³துகாமே அப்பமேவ க³ஹேதப்³ப³ம், தே³ய்யத⁴ம்மேபி ப³ஹுதரே தா³யகேபி ப³ஹும் தா³துகாமே அத்தனோ ப³லம் ஜானித்வா க³ஹேதப்³ப³ம். அபிச மத்தாயேவ வண்ணிதா ப⁴க³வதாதி பரிபோ⁴க³மத்தஞ்ஞுனா புத்தமம்ஸம் விய அக்க²ப்³ப⁴ஞ்ஜனமிவ ச யோனிஸோ மனஸி கரித்வா போ⁴ஜனம் பரிபு⁴ஞ்ஜிதப்³ப³ந்தி.

342. ஏவமிமாய கா³தா²ய ப்³ரஹ்மசரியஸ்ஸ உபகாரபூ⁴தாய கல்யாணமித்தஸேவனாய நியோஜேத்வா ஸேனாஸனபோ⁴ஜனமுகே²ன ச பச்சயபரிபோ⁴க³பாரிஸுத்³தி⁴ஸீலே ஸமாத³பேத்வா இதா³னி யஸ்மா சீவராதீ³ஸு தண்ஹாய மிச்சா²ஆஜீவோ ஹோதி, தஸ்மா தம் படிஸேதே⁴த்வா ஆஜீவபாரிஸுத்³தி⁴ஸீலே ஸமாத³பேந்தோ ‘‘சீவரே பிண்ட³பாதே சா’’தி இமம் கா³த²மாஹ. தத்த² பச்சயேதி கி³லானப்பச்சயே. ஏதேஸூதி ஏதேஸு சதூஸு சீவராதீ³ஸு பி⁴க்கூ²னம் தண்ஹுப்பாத³வத்தூ²ஸு. தண்ஹம் மாகாஸீதி ‘‘ஹிரிகோபீனபடிச்சா²த³னாதி³அத்த²மேவ தே சத்தாரோ பச்சயா நிச்சாதுரானம் புரிஸானம் படிகாரபூ⁴தா ஜஜ்ஜரக⁴ரஸ்ஸேவிமஸ்ஸ அதிது³ப்³ப³லஸ்ஸ காயஸ்ஸ உபத்த²ம்ப⁴பூ⁴தா’’திஆதி³னா நயேன ஆதீ³னவம் பஸ்ஸந்தோ தண்ஹம் மா ஜனேஸி, அஜனேந்தோ அனுப்பாதே³ந்தோ விஹராஹீதி வுத்தம் ஹோதி. கிம் காரணம்? மா லோகம் புனராக³மி. ஏதேஸு ஹி தண்ஹம் கரோந்தோ தண்ஹாய ஆகட்³டி⁴யமானோ புனபி இமம் லோகம் ஆக³ச்ச²தி. ஸோ த்வம் ஏதேஸு தண்ஹம் மாகாஸி, ஏவம் ஸந்தே ந புன இமம் லோகம் ஆக³மிஸ்ஸஸீதி.

ஏவம் வுத்தே ஆயஸ்மா ராஹுலோ ‘‘சீவரே தண்ஹம் மாகாஸீதி மம் ப⁴க³வா ஆஹா’’தி சீவரபடிஸம்யுத்தானி த்³வே து⁴தங்கா³னி ஸமாதி³யி பம்ஸுகூலிகங்க³ஞ்ச, தேசீவரிகங்க³ஞ்ச. ‘‘பிண்ட³பாதே தண்ஹம் மாகாஸீதி மம் ப⁴க³வா ஆஹா’’தி பிண்ட³பாதபடிஸம்யுத்தானி பஞ்ச து⁴தங்கா³னி ஸமாதி³யி – பிண்ட³பாதிகங்க³ம், ஸபதா³னசாரிகங்க³ம், ஏகாஸனிகங்க³ம், பத்தபிண்டி³கங்க³ம், க²லுபச்சா²ப⁴த்திகங்க³ந்தி. ‘‘ஸேனாஸனே தண்ஹம் மாகாஸீதி மம் ப⁴க³வா ஆஹா’’தி ஸேனாஸனபடிஸம்யுத்தானி ச² து⁴தங்கா³னி ஸமாதி³யி – ஆரஞ்ஞிகங்க³ம், அப்³போ⁴காஸிகங்க³ம், ருக்க²மூலிகங்க³ம், யதா²ஸந்த²திகங்க³ம், ஸோஸானிகங்க³ம், நேஸஜ்ஜிகங்க³ந்தி. ‘‘கி³லானப்பச்சயே தண்ஹம் மாகாஸீதி மம் ப⁴க³வா ஆஹா’’தி ஸப்³ப³ப்பச்சயேஸு யதா²லாப⁴ம் யதா²ப³லம் யதா²ஸாருப்பந்தி தீஹி ஸந்தோஸேஹி ஸந்துட்டோ² அஹோஸி, யதா² தம் ஸுப்³ப³சோ குலபுத்தோ பத³க்கி²ணக்³கா³ஹீ அனுஸாஸனிந்தி.

343. ஏவம் ப⁴க³வா ஆயஸ்மந்தம் ராஹுலம் ஆஜீவபாரிஸுத்³தி⁴ஸீலே ஸமாத³பேத்வா இதா³னி அவஸேஸஸீலே ஸமத²விபஸ்ஸனாஸு ச ஸமாத³பேதும் ‘‘ஸம்வுதோ பாதிமோக்க²ஸ்மி’’ந்திஆதி³மாஹ. தத்த² ஸம்வுதோ பாதிமோக்க²ஸ்மிந்தி ஏத்த² ப⁴வஸ்ஸூதி பாட²ஸேஸோ. ப⁴வாதி அந்திமபதே³ன வா ஸம்ப³ந்தோ⁴ வேதி³தப்³போ³, ததா² து³தியபதே³. ஏவமேதேஹி த்³வீஹி வசனேஹி பாதிமோக்க²ஸம்வரஸீலே, இந்த்³ரியஸம்வரஸீலே ச ஸமாத³பேஸி. பாகடவஸேன சேத்த² பஞ்சிந்த்³ரியானி வுத்தானி. லக்க²ணதோ பன ச²ட்ட²ம்பி வுத்தம்யேவ ஹோதீதி வேதி³தப்³ப³ம். ஸதி காயக³தா த்யத்தூ²தி ஏவம் சதுபாரிஸுத்³தி⁴ஸீலே பதிட்டி²தஸ்ஸ துய்ஹம் சதுதா⁴துவவத்தா²னசதுப்³பி³த⁴ஸம்பஜஞ்ஞானாபானஸ்ஸதிஆஹாரேபடிகூலஸஞ்ஞாபா⁴வனாதி³பே⁴தா³ காயக³தா ஸதி அத்து² ப⁴வது, பா⁴வேஹி நந்தி அத்தோ². நிப்³பி³தா³ப³ஹுலோ ப⁴வாதி ஸம்ஸாரவட்டே உக்கண்ட²னப³ஹுலோ ஸப்³ப³லோகே அனபி⁴ரதஸஞ்ஞீ ஹோஹீதி அத்தோ².

344. ஏத்தாவதா நிப்³பே³த⁴பா⁴கி³யம் உபசாரபூ⁴மிம் த³ஸ்ஸேத்வா இதா³னி அப்பனாபூ⁴மிம் த³ஸ்ஸேந்தோ ‘‘நிமித்தம் பரிவஜ்ஜேஹீ’’திஆதி³மாஹ. தத்த² நிமித்தந்தி ராக³ட்டா²னியம் ஸுப⁴னிமித்தம். தேனேவ நம் பரதோ விஸேஸேந்தோ ஆஹ – ‘‘ஸுப⁴ம் ராகூ³பஸஞ்ஹித’’ந்தி. பரிவஜ்ஜேஹீதி அமனஸிகாரேன பரிச்சஜாஹி. அஸுபா⁴ய சித்தம் பா⁴வேஹீதி யதா² ஸவிஞ்ஞாணகே அவிஞ்ஞாணகே வா காயே அஸுப⁴பா⁴வனா ஸம்பஜ்ஜதி, ஏவம் சித்தம் பா⁴வேஹி. ஏகக்³க³ம் ஸுஸமாஹிதந்தி உபசாரஸமாதி⁴னா ஏகக்³க³ம், அப்பனாஸமாதி⁴னா ஸுஸமாஹிதம். யதா² தே ஈதி³ஸம் சித்தம் ஹோதி, ததா² நம் பா⁴வேஹீதி அத்தோ².

345. ஏவமஸ்ஸ அப்பனாபூ⁴மிம் த³ஸ்ஸேத்வா விபஸ்ஸனம் த³ஸ்ஸேந்தோ ‘‘அனிமித்த’’ந்திஆதி³மாஹ. தத்த² அனிமித்தஞ்ச பா⁴வேஹீதி ஏவம் நிப்³பே³த⁴பா⁴கி³யேன ஸமாதி⁴னா ஸமாஹிதசித்தோ விபஸ்ஸனம் பா⁴வேஹீதி வுத்தம் ஹோதி. விபஸ்ஸனா ஹி ‘‘அனிச்சானுபஸ்ஸனாஞாணம் நிச்சனிமித்ததோ விமுச்சதீதி அனிமித்தோ விமோக்கோ²’’திஆதி³னா நயேன ராக³னிமித்தாதீ³னம் வா அக்³க³ஹணேன அனிமித்தவோஹாரம் லப⁴தி. யதா²ஹ –

‘‘ஸோ க்²வாஹம், ஆவுஸோ, ஸப்³ப³னிமித்தானம் அமனஸிகாரா அனிமித்தம் சேதோஸமாதி⁴ம் உபஸம்பஜ்ஜ விஹராமி. தஸ்ஸ மய்ஹம், ஆவுஸோ, இமினா விஹாரேன விஹரதோ நிமித்தானுஸாரி விஞ்ஞாணம் ஹோதீ’’தி (ஸம். நி. 4.340).

மானானுஸயமுஜ்ஜஹாதி இமாய அனிமித்தபா⁴வனாய அனிச்சஸஞ்ஞம் படிலபி⁴த்வா ‘‘அனிச்சஸஞ்ஞினோ, மேகி⁴ய, அனத்தஸஞ்ஞா ஸண்டா²தி, அனத்தஸஞ்ஞீ அஸ்மிமானஸமுக்³கா⁴தம் பாபுணாதீ’’தி ஏவமாதி³னா (அ. நி. 9.3; உதா³. 31) அனுக்கமேன மானானுஸயம் உஜ்ஜஹ பஜஹ பரிச்சஜாஹீதி அத்தோ². ததோ மானாபி⁴ஸமயா, உபஸந்தோ சரிஸ்ஸஸீதி அதே²வம் அரியமக்³கே³ன மானஸ்ஸ அபி⁴ஸமயா க²யா வயா பஹானா படினிஸ்ஸக்³கா³ உபஸந்தோ நிப்³பு³தோ ஸீதிபூ⁴தோ ஸப்³ப³த³ரத²பரிளாஹவிரஹிதோ யாவ அனுபாதி³ஸேஸாய நிப்³பா³னதா⁴துயா பரினிப்³பா³ஸி, தாவ ஸுஞ்ஞதானிமித்தாப்பணிஹிதானம் அஞ்ஞதரஞ்ஞதரேன ப²லஸமாபத்திவிஹாரேன சரிஸ்ஸஸி விஹரிஸ்ஸஸீதி அரஹத்தனிகூடேன தே³ஸனம் நிட்டா²பேஸி.

ததோ பரம் ‘‘இத்த²ம் ஸுத³ம் ப⁴க³வா’’திஆதி³ ஸங்கீ³திகாரகானம் வசனம். தத்த² இத்த²ம் ஸுத³ந்தி இத்த²ம் ஸு இத³ம், ஏவமேவாதி வுத்தம் ஹோதி. ஸேஸமேத்த² உத்தானத்த²மேவ. ஏவம் ஓவதி³யமானோ சாயஸ்மா ராஹுலோ பரிபாகக³தேஸு விமுத்திபரிபாசனியேஸு த⁴ம்மேஸு சூளராஹுலோவாத³ஸுத்தபரியோஸானே அனேகேஹி தே³வதாஸஹஸ்ஸேஹி ஸத்³தி⁴ம் அரஹத்தே பதிட்டா²ஸீதி.

பரமத்த²ஜோதிகாய கு²த்³த³க-அட்ட²கதா²ய

ஸுத்தனிபாத-அட்ட²கதா²ய ராஹுலஸுத்தவண்ணனா நிட்டி²தா.