12. நிக்³ரோத⁴கப்பஸுத்த-(வங்கீ³ஸஸுத்த)-வண்ணனா

ஏவம் மே ஸுதந்தி நிக்³ரோத⁴கப்பஸுத்தம், ‘‘வங்கீ³ஸஸுத்த’’ந்திபி வுச்சதி. கா உப்பத்தி? அயமேவ யாஸ்ஸ நிதா³னே வுத்தா. தத்த² ஏவம் மேதிஆதீ³னி வுத்தத்தா²னேவ, யதோ தானி அஞ்ஞானி ச ததா²விதா⁴னி ச²ட்³டே³த்வா அவுத்தனயமேவ வண்ணயிஸ்ஸாம. அக்³கா³ளவே சேதியேதி ஆளவியம் அக்³க³சேதியே. அனுப்பன்னே ஹி ப⁴க³வதி அக்³கா³ளவகோ³தமகாதீ³னி அனேகானி சேதியானி அஹேஸும் யக்க²னாகா³தீ³னம் ப⁴வனானி. தானி உப்பன்னே ப⁴க³வதி மனுஸ்ஸா வினாஸேத்வா விஹாரே அகம்ஸு, தேனேவ ச நாமேன வோஹரிம்ஸு. ததோ அக்³கா³ளவசேதியஸங்கா²தே விஹாரே விஹரதீதி வுத்தம் ஹோதி. ஆயஸ்மதோ வங்கீ³ஸஸ்ஸாதி ஏத்த² ஆயஸ்மாதி பியவசனம், வங்கீ³ஸோதி தஸ்ஸ தே²ரஸ்ஸ நாமம். ஸோ ஜாதிதோ பபு⁴தி ஏவம் வேதி³தப்³போ³ – ஸோ கிர பரிப்³பா³ஜகஸ்ஸ புத்தோ பரிப்³பா³ஜிகாய குச்சி²ம்ஹி ஜாதோ அஞ்ஞதரம் விஜ்ஜம் ஜானாதி, யஸ்ஸானுபா⁴வேன ச²வஸீஸம் ஆகோடேத்வா ஸத்தானம் க³திம் ஜானாதி. மனுஸ்ஸாபி ஸுத³ம் அத்தனோ ஞாதீனம் காலகதானம் ஸுஸானதோ ஸீஸானி ஆனேத்வா தம் தேஸம் க³திம் புச்ச²ந்தி. ஸோ ‘‘அஸுகனிரயே நிப்³ப³த்தோ, அஸுகமனுஸ்ஸலோகே’’தி வத³தி. தே தேன விம்ஹிதா தஸ்ஸ ப³ஹும் த⁴னம் தே³ந்தி. ஏவம் ஸோ ஸகலஜம்பு³தீ³பே பாகடோ அஹோஸி.

ஸோ ஸதஸஹஸ்ஸகப்பம் பூரிதபாரமீ அபி⁴னீஹாரஸம்பன்னோ பஞ்சஹி புரிஸஸஹஸ்ஸேஹி பரிவுதோ கா³மனிக³மஜனபத³ராஜதா⁴னீஸு விசரந்தோ ஸாவத்தி²ம் அனுப்பத்தோ. தேன ச ஸமயேன ப⁴க³வா ஸாவத்தி²யம் விஹரதி, ஸாவத்தி²வாஸினோ புரேப⁴த்தம் தா³னம் த³த்வா பச்சா²ப⁴த்தம் ஸுனிவத்தா² ஸுபாருதா புப்ப²க³ந்தா⁴தீ³னி க³ஹேத்வா த⁴ம்மஸ்ஸவனத்தா²ய ஜேதவனம் க³ச்ச²ந்தி. ஸோ தே தி³ஸ்வா ‘‘மஹாஜனகாயோ குஹிம் க³ச்ச²தீ’’தி புச்சி². அத²ஸ்ஸ தே ஆசிக்கி²ம்ஸு – ‘‘பு³த்³தோ⁴ லோகே உப்பன்னோ, ஸோ ப³ஹுஜனஹிதாய த⁴ம்மம் தே³ஸேதி, தத்த² க³ச்சா²மா’’தி. ஸோபி தேஹி ஸத்³தி⁴ம் ஸபரிவாரோ க³ந்த்வா ப⁴க³வதா ஸத்³தி⁴ம் ஸம்மோதி³த்வா ஏகமந்தம் நிஸீதி³. அத² நம் ப⁴க³வா ஆமந்தேஸி – ‘‘கிம், வங்கீ³ஸ, ஜானாஸி கிர தாதி³ஸம் விஜ்ஜம், யாய ஸத்தானம் ச²வஸீஸானி ஆகோடேத்வா க³திம் பவேதே³ஸீ’’தி? ‘‘ஏவம், போ⁴ கோ³தம, ஜானாமீ’’தி. ப⁴க³வா நிரயே நிப்³ப³த்தஸ்ஸ ஸீஸம் ஆஹராபேத்வா த³ஸ்ஸேஸி, ஸோ நகே²ன ஆகோடேத்வா ‘‘நிரயே நிப்³ப³த்தஸ்ஸ ஸீஸம் போ⁴ கோ³தமா’’தி ஆஹ. ஏவம் ஸப்³ப³க³தினிப்³ப³த்தானம் ஸீஸானி த³ஸ்ஸேஸி, ஸோபி ததே²வ ஞத்வா ஆரோசேஸி. அத²ஸ்ஸ ப⁴க³வா கீ²ணாஸவஸீஸம் த³ஸ்ஸேஸி, ஸோ புனப்புனம் ஆகோடேத்வா ந அஞ்ஞாஸி. ததோ ப⁴க³வா ‘‘அவிஸயோ தே ஏத்த² வங்கீ³ஸ, மமேவேஸோ விஸயோ, கீ²ணாஸவஸீஸ’’ந்தி வத்வா இமம் கா³த²மபா⁴ஸி –

‘‘க³தீ மிகா³னம் பவனம், ஆகாஸோ பக்கி²னம் க³தி;

விப⁴வோ க³தி த⁴ம்மானம், நிப்³பா³னம் அரஹதோ க³தீ’’தி. (பரி. 339);

வங்கீ³ஸோ கா³த²ம் ஸுத்வா ‘‘இமம் மே, போ⁴ கோ³தம, விஜ்ஜம் தே³ஹீ’’தி ஆஹ. ப⁴க³வா ‘‘நாயம் விஜ்ஜா அபப்³ப³ஜிதானம் ஸம்பஜ்ஜதீ’’தி ஆஹ. ஸோ ‘‘பப்³பா³ஜேத்வா வா மம், போ⁴ கோ³தம, யம் வா இச்ச²ஸி, தம் கத்வா இமம் விஜ்ஜம் தே³ஹீ’’தி ஆஹ. ததா³ ச ப⁴க³வதோ நிக்³ரோத⁴கப்பத்தே²ரோ ஸமீபே ஹோதி, தம் ப⁴க³வா ஆணாபேஸி – ‘‘தேன ஹி, நிக்³ரோத⁴கப்ப, இமம் பப்³பா³ஜேஹீ’’தி. ஸோ தம் பப்³பா³ஜேத்வா தசபஞ்சககம்மட்டா²னம் ஆசிக்கி². வங்கீ³ஸோ அனுபுப்³பே³ன படிஸம்பி⁴தா³ப்பத்தோ அரஹா அஹோஸி. ஏதத³க்³கே³ ச ப⁴க³வதா நித்³தி³ட்டோ² ‘‘ஏதத³க்³க³ம், பி⁴க்க²வே, மம ஸாவகானம் பி⁴க்கூ²னம் படிபா⁴னவந்தானம் யதி³த³ம் வங்கீ³ஸோ’’தி (அ. நி. 1.212).

ஏவம் ஸமுதா³க³தஸ்ஸ ஆயஸ்மதோ வங்கீ³ஸஸ்ஸ உபஜ்ஜா²யோ வஜ்ஜாவஜ்ஜாதி³உபனிஜ்ஜா²யனேன ஏவம் லத்³த⁴வோஹாரோ நிக்³ரோத⁴கப்போ நாம தே²ரோ. கப்போதி தஸ்ஸ தே²ரஸ்ஸ நாமம், நிக்³ரோத⁴மூலே பன அரஹத்தம் அதி⁴க³தத்தா ‘‘நிக்³ரோத⁴கப்போ’’தி ப⁴க³வதா வுத்தோ. ததோ நம் பி⁴க்கூ²பி ஏவம் வோஹரந்தி. ஸாஸனே தி²ரபா⁴வம் பத்தோதி தே²ரோ. அக்³கா³ளவே சேதியே அசிரபரினிப்³பு³தோ ஹோதீதி தஸ்மிம் சேதியே அசிரபரினிப்³பு³தோ ஹோதி. ரஹோக³தஸ்ஸ படிஸல்லீனஸ்ஸாதி க³ணம்ஹா வூபகட்ட²த்தா ரஹோக³தஸ்ஸ காயேன, படிஸல்லீனஸ்ஸ சித்தேன தேஹி தேஹி விஸயேஹி படினிவத்தித்வா ஸல்லீனஸ்ஸ. ஏவம் சேதஸோ பரிவிதக்கோ உத³பாதீ³தி இமினா ஆகாரேன விதக்கோ உப்பஜ்ஜி. கஸ்மா பன உத³பாதீ³தி. அஸம்முக²த்தா தி³ட்டா²ஸேவனத்தா ச. அயஞ்ஹி தஸ்ஸ பரினிப்³பா³னகாலே ந ஸம்முகா² அஹோஸி, தி³ட்ட²புப்³ப³ஞ்சானேன அஸ்ஸ ஹத்த²குக்குச்சாதி³புப்³பா³ஸேவனம், தாதி³ஸஞ்ச அகீ²ணாஸவானம்பி ஹோதி கீ²ணாஸவானம்பி புப்³ப³பரிசயேன.

ததா² ஹி பிண்டோ³லபா⁴ரத்³வாஜோ பச்சா²ப⁴த்தம் தி³வாவிஹாரத்தா²ய உதே³னஸ்ஸ உய்யானமேவ க³ச்ச²தி புப்³பே³ ராஜா ஹுத்வா தத்த² பரிசாரேஸீதி இமினா புப்³ப³பரிசயேன, க³வம்பதித்தே²ரோ தாவதிம்ஸப⁴வனே ஸுஞ்ஞம் தே³வவிமானம் க³ச்ச²தி தே³வபுத்தோ ஹுத்வா தத்த² பரிசாரேஸீதி இமினா புப்³ப³பரிசயேன. பிலிந்த³வச்சோ² பி⁴க்கூ² வஸலவாதே³ன ஸமுதா³சரதி அப்³போ³கிண்ணானி பஞ்ச ஜாதிஸதானி ப்³ராஹ்மணோ ஹுத்வா ததா² அபா⁴ஸீதி இமினா புப்³ப³பரிசயேன. தஸ்மா அஸம்முக²த்தா தி³ட்டா²ஸேவனத்தா சஸ்ஸ ஏவம் சேதஸோ பரிவிதக்கோ உத³பாதி³ ‘‘பரினிப்³பு³தோ நு கோ² மே உபஜ்ஜா²யோ, உதா³ஹு நோ பரினிப்³பு³தோ’’தி. ததோ பரம் உத்தானத்த²மேவ. ஏகம்ஸம் சீவரம் கத்வாதி ஏத்த² பன புன ஸண்டா²பனேன ஏவம் வுத்தம். ஏகம்ஸந்தி ச வாமம்ஸம் பாருபித்வா டி²தஸ்ஸேதம் அதி⁴வசனம். யதோ யதா² வாமம்ஸம் பாருபித்வா டி²தம் ஹோதி, ததா² சீவரம் கத்வாதி ஏவமஸ்ஸத்தோ² வேதி³தப்³போ³. ஸேஸம் பாகடமேவ.

346. அனோமபஞ்ஞந்தி ஓமம் வுச்சதி பரித்தம் லாமகம், ந ஓமபஞ்ஞம், அனோமபஞ்ஞம், மஹாபஞ்ஞந்தி அத்தோ². தி³ட்டே²வ த⁴ம்மேதி பச்சக்க²மேவ, இமஸ்மிம்யேவ அத்தபா⁴வேதி வா அத்தோ². விசிகிச்சா²னந்தி ஏவரூபானம் பரிவிதக்கானம். ஞாதோதி பாகடோ. யஸஸ்ஸீதி லாப⁴பரிவாரஸம்பன்னோ அபி⁴னிப்³பு³தத்தோதி கு³த்தசித்தோ அபரிட³ய்ஹமானசித்தோ வா.

347. தயா கதந்தி நிக்³ரோத⁴மூலே நிஸின்னத்தா ‘‘நிக்³ரோத⁴கப்போ’’தி வத³தா தயா கதந்தி யதா² அத்தனா உபலக்கே²தி, ததா² ப⁴ணதி. ப⁴க³வா பன ந நிஸின்னத்தா ஏவ தம் ததா² ஆலபி, அபிச கோ² தத்த² அரஹத்தம் பத்தத்தா. ப்³ராஹ்மணஸ்ஸாதி ஜாதிம் ஸந்தா⁴ய ப⁴ணதி. ஸோ கிர ப்³ராஹ்மணமஹாஸாலகுலா பப்³ப³ஜிதோ. நமஸ்ஸம் அசரீதி நமஸ்ஸமானோ விஹாஸி. முத்யபேக்கோ²தி நிப்³பா³னஸங்கா²தம் விமுத்திம் அபேக்க²மானோ, நிப்³பா³னம் பத்தே²ந்தோதி வுத்தம் ஹோதி. த³ள்ஹத⁴ம்மத³ஸ்ஸீதி ப⁴க³வந்தம் ஆலபதி. த³ள்ஹத⁴ம்மோ ஹி நிப்³பா³னம் அபி⁴ஜ்ஜனட்டே²ன, தஞ்ச ப⁴க³வா த³ஸ்ஸேதி. தஸ்மா தம் ‘‘த³ள்ஹத⁴ம்மத³ஸ்ஸீ’’தி ஆஹ.

348. ஸக்யாதிபி ப⁴க³வந்தமேவ குலனாமேன ஆலபதி. மயம்பி ஸப்³பே³தி நிரவஸேஸபரிஸம் ஸங்க³ண்ஹித்வா அத்தானம் த³ஸ்ஸேந்தோ ப⁴ணதி. ஸமந்தசக்கூ²திபி ப⁴க³வந்தமேவ ஸப்³ப³ஞ்ஞுதஞ்ஞாணேன ஆலபதி. ஸமவட்டி²தாதி ஸம்மா அவட்டி²தா ஆபோ⁴க³ம் கத்வா டி²தா. நோதி அம்ஹாகம். ஸவனாயாதி இமஸ்ஸ பஞ்ஹஸ்ஸ வேய்யாகரணஸ்ஸவனத்தா²ய. ஸோதாதி ஸோதிந்த்³ரியானி. துவம் நோ ஸத்தா² த்வமனுத்தரோஸீதி து²திவசனமத்தமேவேதம்.

349. சி²ந்தே³வ நோ விசிகிச்ச²ந்தி அகுஸலவிசிகிச்சா²ய நிப்³பி³சிகிச்சோ² ஸோ, விசிகிச்சா²பதிரூபகம் பன தம் பரிவிதக்கம் ஸந்தா⁴யேவமாஹ. ப்³ரூஹி மேதந்தி ப்³ரூஹி மே ஏதம், யம் மயா யாசிதோஸி ‘‘தம் ஸாவகம் ஸக்ய, மயம்பி ஸப்³பே³ அஞ்ஞாதுமிச்சா²மா’’தி, ப்³ரூவந்தோ ச தம் ப்³ராஹ்மணம் பரினிப்³பு³தம் வேத³ய பூ⁴ரிபஞ்ஞ மஜ்ஜே²வ நோ பா⁴ஸ, பரினிப்³பு³தம் ஞத்வா மஹாபஞ்ஞம் ப⁴க³வா மஜ்ஜே²வ அம்ஹாகம் ஸப்³பே³ஸம் பா⁴ஸ, யதா² ஸப்³பே³வ மயம் ஜானேய்யாம. ஸக்கோவ தே³வான ஸஹஸ்ஸனேத்தோதி இத³ம் பன து²திவசனமேவ. அபிசஸ்ஸ அயம் அதி⁴ப்பாயோ – யதா² ஸக்கோ ஸஹஸ்ஸனேத்தோ தே³வானம் மஜ்ஜே² தேஹி ஸக்கச்சம் ஸம்படிச்சி²தவசனோ பா⁴ஸதி, ஏவம் அம்ஹாகம் மஜ்ஜே² அம்ஹேஹி ஸம்படிச்சி²தவசனோ பா⁴ஸாதி.

350. யே கேசீதி இமம்பி கா³த²ம் ப⁴க³வந்தம் து²னந்தோயேவ வத்துகாமதம் ஜனேதும் ப⁴ணதி. தஸ்ஸத்தோ² யே கேசி அபி⁴ஜ்ஜா²த³யோ க³ந்தா² தேஸம் அப்பஹானே மோஹவிசிகிச்சா²னம் பஹானாபா⁴வதோ ‘‘மோஹமக்³கா³’’தி ச ‘‘அஞ்ஞாணபக்கா²’’தி ச ‘‘விசிகிச்ச²ட்டா²னா’’தி ச வுச்சந்தி. ஸப்³பே³ தே ததா²க³தம் பத்வா ததா²க³தஸ்ஸ தே³ஸனாப³லேன வித்³த⁴ம்ஸிதா ந ப⁴வந்தி நஸ்ஸந்தி. கிம் காரணம்? சக்கு²ஞ்ஹி ஏதம் பரமம் நரானம், யஸ்மா ததா²க³தோ ஸப்³ப³க³ந்த²வித⁴மனபஞ்ஞாசக்கு²ஜனனதோ நரானம் பரமம் சக்கு²ந்தி வுத்தம் ஹோதி.

351. நோ சே ஹி ஜாதூதி இமம்பி கா³த²ம் து²னந்தோயேவ வத்துகாமதம் ஜனேந்தோவ ப⁴ணதி. தத்த² ஜாதூதி ஏகம்ஸவசனம். புரிஸோதி ப⁴க³வந்தம் ஸந்தா⁴யாஹ. ஜோதிமந்தோதி பஞ்ஞாஜோதிஸமன்னாக³தா ஸாரிபுத்தாத³யோ. இத³ம் வுத்தம் ஹோதி – யதி³ ப⁴க³வா யதா² புரத்தி²மாதி³பே⁴தோ³ வாதோ அப்³ப⁴க⁴னம் விஹனதி, ஏவம் தே³ஸனாவேகே³ன கிலேஸே ந விஹனேய்ய. ததா² யதா² அப்³ப⁴க⁴னேன நிவுதோ லோகோ தமோவ ஹோதி ஏகந்த⁴காரோ, ஏவம் அஞ்ஞாணனிவுதோபி தமோவஸ்ஸ. யேபி இமே தா³னி ஜோதிமந்தோ கா²யந்தி ஸாரிபுத்தாத³யோ, தேபி நரா ந தபேய்யுந்தி.

352. தீ⁴ரா சாதி இமம்பி கா³த²ம் புரிமனயேனேவ ப⁴ணதி. தஸ்ஸத்தோ² தீ⁴ரா ச பண்டி³தா புரிஸா பஜ்ஜோதகரா ப⁴வந்தி, பஞ்ஞாபஜ்ஜோதம் உப்பாதே³ந்தி. தஸ்மா அஹம் தம் வீர பதா⁴னவீரியஸமன்னாக³தோ ப⁴க³வா ததே²வ மஞ்ஞே தீ⁴ரோதி ச பஜ்ஜோதகரோத்வேவ ச மஞ்ஞாமி. மயஞ்ஹி விபஸ்ஸினம் ஸப்³ப³த⁴ம்மே யதா²பூ⁴தம் பஸ்ஸந்தம் ப⁴க³வந்தம் ஜானந்தா ஏவ உபாக³மும்ஹா, தஸ்மா பரிஸாஸு நோ ஆவிகரோஹி கப்பம், நிக்³ரோத⁴கப்பம் ஆசிக்க² பகாஸேஹீதி.

353. கி²ப்பந்தி இமம்பி கா³த²ம் புரிமனயேனேவ ப⁴ணதி. தஸ்ஸத்தோ² கி²ப்பம் கி³ரம் ஏரய லஹும் அசிராயமானோ வசனம் பா⁴ஸ, வக்³கு³ம் மனோரமம் ப⁴க³வா. யதா² ஸுவண்ணஹம்ஸோ கோ³சரபடிக்கந்தோ ஜாதஸ்ஸரவனஸண்ட³ம் தி³ஸ்வா கீ³வம் பக்³க³ய்ஹ உச்சாரேத்வா ரத்ததுண்டே³ன ஸணிகம் அதரமானோ வக்³கு³ம் கி³ரம் நிகூஜதி நிச்சா²ரேதி, ஏவமேவ த்வம்பி ஸணிகம் நிகூஜ, இமினா மஹாபுரிஸலக்க²ணஞ்ஞதரேன பி³ந்து³ஸ்ஸரேன ஸுவிகப்பிதேன ஸுட்டு²விகப்பிதேன அபி⁴ஸங்க²தேன. ஏதே மயம் ஸப்³பே³வ உஜுக³தா அவிக்கி²த்தமானஸா ஹுத்வா தவ நிகூஜிதம் ஸுணோமாதி.

354. பஹீனஜாதிமரணந்தி இமம்பி கா³த²ம் புரிமனயேனேவ ப⁴ணதி. தத்த² ந ஸேஸேதீதி அஸேஸோ, தம் அஸேஸம். ஸோதாபன்னாத³யோ விய கிஞ்சி அஸேஸேத்வா பஹீனஜாதிமரணந்தி வுத்தம் ஹோதி. நிக்³க³ய்ஹாதி ஸுட்டு² யாசித்வா நிப³ந்தி⁴த்வா. தோ⁴னந்தி து⁴தஸப்³ப³பாபம். வதே³ஸ்ஸாமீதி கதா²பேஸ்ஸாமி த⁴ம்மம். ந காமகாரோ ஹி புது²ஜ்ஜனானந்தி புது²ஜ்ஜனானமேவ ஹி காமகாரோ நத்தி², யம் பத்தே²ந்தி ஞாதும் வா வத்தும் வா, தம் ந ஸக்கோந்தி. ஸங்கே²ய்யகாரோ ச ததா²க³தானந்தி ததா²க³தானம் பன வீமம்ஸகாரோ பஞ்ஞாபுப்³ப³ங்க³மா கிரியா. தே யம் பத்தே²ந்தி ஞாதும் வா வத்தும் வா, தம் ஸக்கோந்தீதி அதி⁴ப்பாயோ.

355. இதா³னி தம் ஸங்கே²ய்யகாரம் பகாஸேந்தோ ‘‘ஸம்பன்னவேய்யாகரண’’ந்தி கா³த²மாஹ. தஸ்ஸத்தோ² – ததா² ஹி தவ ப⁴க³வா இத³ம் ஸமுஜ்ஜுபஞ்ஞஸ்ஸ தத்த² தத்த² ஸமுக்³க³ஹீதம் வுத்தம் பவத்திதம் ஸம்பன்னவேய்யாகரணம், ‘‘ஸந்ததிமஹாமத்தோ ஸத்ததாலமத்தம் அப்³பு⁴க்³க³ந்த்வா பரினிப்³பா³யிஸ்ஸதி, ஸுப்பபு³த்³தோ⁴ ஸக்கோ ஸத்தமே தி³வஸே பத²விம் பவிஸிஸ்ஸதீ’’தி ஏவமாதீ³ஸு அவிபரீதம் தி³ட்ட²ம். ததோ பன ஸுட்டு²தரம் அஞ்ஜலிம் பணாமேத்வா ஆஹ – அயமஞ்ஜலீ பச்சி²மோ ஸுப்பணாமிதோ, அயமபரோபி அஞ்ஜலீ ஸுட்டு²தரம் பணாமிதோ. மா மோஹயீதி மா நோ அகத²னேன மோஹயி ஜானம் ஜானந்தோ கப்பஸ்ஸ க³திம். அனோமபஞ்ஞாதி ப⁴க³வந்தம் ஆலபதி.

356. பரோவரந்தி இமம் பன கா³த²ம் அபரேனபி பரியாயேன அமோஹனமேவ யாசந்தோ ஆஹ. தத்த² பரோவரந்தி லோகியலோகுத்தரவஸேன ஸுந்த³ராஸுந்த³ரம் தூ³ரேஸந்திகம் வா. அரியத⁴ம்மந்தி சதுஸச்சத⁴ம்மம். விதி³த்வாதி படிவிஜ்ஜி²த்வா. ஜானந்தி ஸப்³ப³ம் ஞேய்யத⁴ம்மம் ஜானந்தோ. வாசாபி⁴கங்கா²மீதி யதா² க⁴ம்மனி க⁴ம்மதத்தோ புரிஸோ கிலந்தோ தஸிதோ வாரிம், ஏவம் தே வாசம் அபி⁴கங்கா²மி. ஸுதம் பவஸ்ஸாதி ஸுதஸங்கா²தம் ஸத்³தா³யதனம் பவஸ்ஸ பக்³க⁴ர முஞ்ச பவத்தேஹி. ‘‘ஸுதஸ்ஸ வஸ்ஸா’’திபி பாடோ², வுத்தப்பகாரஸ்ஸ ஸத்³தா³யதனஸ்ஸ வுட்டி²ம் வஸ்ஸாதி அத்தோ².

357. இதா³னி யாதி³ஸம் வாசம் அபி⁴கங்க²தி, தம் பகாஸேந்தோ –

‘‘யத³த்தி²கம் ப்³ரஹ்மசரியம் அசரீ,

கப்பாயனோ கச்சிஸ்ஸ தம் அமோக⁴ம்;

நிப்³பா³யி ஸோ ஆது³ ஸஉபாதி³ஸேஸோ,

யதா² விமுத்தோ அஹு தம் ஸுணோமா’’தி. –

கா³த²மாஹ. தத்த² கப்பாயனோதி கப்பமேவ பூஜாவஸேன ப⁴ணதி. யதா² விமுத்தோதி ‘‘கிம் அனுபாதி³ஸேஸாய நிப்³பா³னதா⁴துயா யதா² அஸேக்கா², உதா³ஹு உபாதி³ஸேஸாய யதா² ஸேக்கா²’’தி புச்ச²தி. ஸேஸமேத்த² பாகடமேவ.

358. ஏவம் த்³வாத³ஸஹி கா³தா²ஹி யாசிதோ ப⁴க³வா தம் வியாகரோந்தோ –

‘‘அச்சே²ச்சி² தண்ஹம் இத⁴ நாமரூபே, (இதி ப⁴க³வா)

கண்ஹஸ்ஸ ஸோதம் தீ³க⁴ரத்தானுஸயிதம்;

அதாரி ஜாதிம் மரணம் அஸேஸம்,

இச்சப்³ரவீ ப⁴க³வா பஞ்சஸேட்டோ²’’தி. –

கா³த²மாஹ. தத்த² புரிமபத³ஸ்ஸ தாவ அத்தோ² – யாபி இமஸ்மிம் நாமரூபே காமதண்ஹாதி³பே⁴தா³ தண்ஹாதீ³க⁴ரத்தம் அப்பஹீனட்டே²ன அனுஸயிதா கண்ஹனாமகஸ்ஸ மாரஸ்ஸ ‘‘ஸோத’’ந்திபி வுச்சதி, தம் கண்ஹஸ்ஸ ஸோதபூ⁴தம் தீ³க⁴ரத்தானுஸயிதம் இத⁴ நாமரூபே தண்ஹம் கப்பாயனோ சி²ந்தீ³தி. இதி ப⁴க³வாதி இத³ம் பனேத்த² ஸங்கீ³திகாரானம் வசனம். அதாரி ஜாதிம் மரணம் அஸேஸந்தி ஸோ தம் தண்ஹம் சே²த்வா அஸேஸம் ஜாதிமரணம் அதாரி, அனுபாதி³ஸேஸாய நிப்³பா³னதா⁴துயா பரினிப்³பா³யீதி த³ஸ்ஸேதி. இச்சப்³ரவீ ப⁴க³வா பஞ்சஸேட்டோ²தி வங்கீ³ஸேன புட்டோ² ப⁴க³வா ஏதத³வோச பஞ்சன்னம் பட²மஸிஸ்ஸானம் பஞ்சவக்³கி³யானம் ஸேட்டோ², பஞ்சஹி வா ஸத்³தா⁴தீ³ஹி இந்த்³ரியேஹி, ஸீலாதீ³ஹி வா த⁴ம்மக்க²ந்தே⁴ஹி அதிவிஸிட்டே²ஹி சக்கூ²ஹி ச ஸேட்டோ²தி ஸங்கீ³திகாரானமேவித³ம் வசனம்.

359. ஏவம் வுத்தே ப⁴க³வதோ பா⁴ஸிதமபி⁴னந்த³மானஸோ வங்கீ³ஸோ ‘‘ஏஸ ஸுத்வா’’திஆதி³கா³தா²யோ ஆஹ. தத்த² பட²மகா³தா²ய இஸிஸத்தமாதி ப⁴க³வா இஸி ச ஸத்தமோ ச உத்தமட்டே²ன விபஸ்ஸீஸிகீ²வேஸ்ஸபூ⁴ககுஸந்த⁴கோணாக³மனகஸ்ஸபனாமகே ச² இஸயோ அத்தனா ஸஹ ஸத்த கரோந்தோ பாதுபூ⁴தோதிபி இஸிஸத்தமோ, தம் ஆலபந்தோ ஆஹ. ந மம் வஞ்சேஸீதி யஸ்மா பரினிப்³பு³தோ, தஸ்மா தஸ்ஸ பரினிப்³பு³தபா⁴வம் இச்ச²ந்தம் மம் ந வஞ்சேஸி, ந விஸம்வாதே³ஸீதி அத்தோ². ஸேஸமேத்த² பாகடமேவ.

360. து³தியகா³தா²ய யஸ்மா முத்யபேக்கோ² விஹாஸி, தஸ்மா தம் ஸந்தா⁴யாஹ ‘‘யதா²வாதீ³ ததா²காரீ, அஹு பு³த்³த⁴ஸ்ஸ ஸாவகோ’’தி. மச்சுனோ ஜாலம் ததந்தி தேபூ⁴மகவட்டே வித்த²தம் மாரஸ்ஸ தண்ஹாஜாலம். மாயாவினோதி ப³ஹுமாயஸ்ஸ. ‘‘ததா² மாயாவினோ’’திபி கேசி பட²ந்தி, தேஸம் யோ அனேகாஹி மாயாஹி அனேகக்க²த்தும்பி ப⁴க³வந்தம் உபஸங்கமி, தஸ்ஸ ததா² மாயாவினோதி அதி⁴ப்பாயோ.

361. ததியகா³தா²ய ஆதீ³தி காரணம். உபாதா³னஸ்ஸாதி வட்டஸ்ஸ. வட்டஞ்ஹி உபாதா³தப்³ப³ட்டே²ன இத⁴ ‘‘உபாதா³ன’’ந்தி வுத்தம், தஸ்ஸேவ உபாதா³னஸ்ஸ ஆதி³ம் அவிஜ்ஜாதண்ஹாதி³பே⁴த³ம் காரணம் அத்³த³ஸ கப்போதி ஏவம் வத்தும் வட்டதி ப⁴க³வாதி அதி⁴ப்பாயேன வத³தி. அச்சகா³ வதாதி அதிக்கந்தோ வத. மச்சுதே⁴ய்யந்தி மச்சு ஏத்த² தி⁴யதீதி மச்சுதே⁴ய்யம், தேபூ⁴மகவட்டஸ்ஸேதம் அதி⁴வசனம். தம் ஸுது³த்தரம் மச்சுதே⁴ய்யம் அச்சகா³ வதாதி வேத³ஜாதோ ப⁴ணதி. ஸேஸமேத்த² பாகடமேவாதி.

பரமத்த²ஜோதிகாய கு²த்³த³க-அட்ட²கதா²ய

ஸுத்தனிபாத-அட்ட²கதா²ய நிக்³ரோத⁴கப்பஸுத்தவண்ணனா நிட்டி²தா.