10-12. ஸஞ்ஞோஜனிகாதி³தி³ட்டி²னித்³தே³ஸவண்ணனா

143. யஸ்மா ஸஞ்ஞோஜனிகா தி³ட்டி² ஸப்³ப³தி³ட்டி²ஸாதா⁴ரணா, தஸ்மா தஸ்ஸா ஸப்³ப³தி³ட்டி²ஸஞ்ஞோஜனத்தா ஸப்³ப³தி³ட்டி²ஸாதா⁴ரணோ அத்தோ² நித்³தி³ட்டோ². ஸோ ஹேட்டா² வுத்ததி³ட்டி²பரியுட்டா²னானேவ.

144. மானவினிப³ந்த⁴தி³ட்டீ²ஸு சக்கு² அஹந்தி அபி⁴னிவேஸபராமாஸோதி மானபுப்³ப³கோ அபி⁴னிவேஸபராமாஸோ. ந ஹி தி³ட்டி² மானஸம்பயுத்தா ஹோதி. தேனேவ ச மானவினிப³ந்தா⁴தி வுத்தம், மானபடிப³ந்தா⁴ மானமூலகாதி அத்தோ².

145. சக்கு² மமந்தி அபி⁴னிவேஸபராமாஸோதி ஏத்தா²பி ஏஸேவ நயோ. ஏத்த² பன ‘‘மமா’’தி வத்தப்³பே³ ‘‘மம’’ந்தி அனுனாஸிகாக³மோ வேதி³தப்³போ³. ‘‘அஹ’’ந்தி மானவினிப³ந்தா⁴ய ரூபாதீ³னிபி அஜ்ஜ²த்திகானேவ. ந ஹி கஸிணரூபம் வினா பா³ஹிரானி ‘‘அஹ’’ந்தி க³ண்ஹாதி. ‘‘மம’’ந்தி மானவினிப³ந்தா⁴ய பன பா³ஹிரானிபி லப்³ப⁴ந்தி. பா³ஹிரானிபி ஹி ‘‘மம’’ந்தி க³ண்ஹாதி. யஸ்மா பன து³க்கா² வேத³னா அனிட்ட²த்தா மானவத்து² ந ஹோதி, தஸ்மா ச² வேத³னா தாஸம் மூலபச்சயா ச² ப²ஸ்ஸா ச ந க³ஹிதா. ஸஞ்ஞாத³யோ பன இத⁴ பச்சி²ன்னத்தா ந க³ஹிதாதி வேதி³தப்³பா³.

ஸம்யோஜனிகாதி³தி³ட்டி²னித்³தே³ஸவண்ணனா நிட்டி²தா.