10. மாதிகாகதா²

மாதிகாகதா²வண்ணனா

40. இதா³னி மஹாதே²ரோ விபஸ்ஸனாகதா²னந்தரம் ஸகலே படிஸம்பி⁴தா³மக்³கே³ நித்³தி³ட்டே² ஸமத²விபஸ்ஸனாமக்³க³னிப்³பா³னத⁴ம்மே ஆகாரனானத்தவஸேன நானாபரியாயேஹி தோ²மேதுகாமோ நிச்சா²தோதிஆதீ³னி ஏகூனவீஸதி மாதிகாபதா³னி உத்³தி³ஸித்வா தேஸம் நித்³தே³ஸவஸேன மாதிகாகத²ம் நாம கதே²ஸி. தஸ்ஸா அயம் அபுப்³ப³த்தா²னுவண்ணனா. மாதிகாய தாவ நிச்சா²தோதி அமிலாதோ. ஸப்³பே³பி ஹி கிலேஸா பீளாயோக³தோ மிலாதா, ராகோ³பி தாவ நிரந்தரப்பவத்தோ ஸரீரம் த³ஹதி, கிம் பனஞ்ஞே கிலேஸா. ‘‘தயோமே, பி⁴க்க²வே, அக்³கீ³ ராக³க்³கி³ தோ³ஸக்³கி³ மோஹக்³கீ³’’தி (இதிவு. 93; தீ³. நி. 3.305) பன கிலேஸனாயகா தயோ ஏவ கிலேஸா வுத்தா, தம்ஸம்பயுத்தாபி பன த³ஹந்தியேவ. ஏவம் சா²தகிலேஸாபா⁴வதோ நிச்சா²தோ. கோ ஸோ? விமோக்க²ஸம்ப³ந்தே⁴ன விமோக்கோ²தி த³ட்ட²ப்³போ³. முச்சதீதி மோக்கோ². விமுச்சதீதி விமோக்கோ²தி அத்தோ². இத³மேகம் மாதிகாபத³ம். விஜ்ஜாவிமுத்தீதி விஜ்ஜாயேவ விமுத்தி. இத³மேகம் மாதிகாபத³ம். ஜா²னவிமோக்கோ²தி ஜா²னமேவ விமோக்கோ². இத³மேகம் மாதிகாபத³ம். ஸேஸானி ஏகேகானேவாதி ஏவம் ஏகூனவீஸதி மாதிகாபதா³னி.

41. நேக்க²ம்மேன காமச்ச²ந்த³தோ நிச்சா²தோதி நேக்க²ம்மேன காமச்ச²ந்த³தோ அபேதத்தா காமச்ச²ந்த³தோ நிக்கிலேஸோ யோகீ³. தேன படிலத்³த⁴ம் நேக்க²ம்மம்பி நிச்சா²தோ நிக்கிலேஸோ விமோக்கோ². ஏவம் ஸேஸேஸுபி. நேக்க²ம்மேன காமச்ச²ந்த³தோ முச்சதீதி விமோக்கோ²தி நேக்க²ம்மேன காமச்ச²ந்த³தோ யோகீ³ முச்சதீதி தம் நேக்க²ம்மம் விமோக்கோ²தி அத்தோ². ஏவம் ஸேஸேஸுபி. விஜ்ஜதீதி விஜ்ஜாதி ஸபா⁴வதோ விஜ்ஜதி அத்தி² உபலப்³ப⁴தீதி விஜ்ஜா நாமாதி அத்தோ². அத² வா ஸபா⁴வஜானனத்த²ம் படிபன்னேஹி யோகீ³ஹி ஸபா⁴வம் வேதீ³யதி ஜானீயதீதி விஜ்ஜா நாமாதி அத்தோ². அத² வா விஸேஸலாப⁴த்த²ம் படிபன்னேஹி யோகீ³ஹி வேதீ³யதி படிலாபீ⁴யதீதி விஜ்ஜா நாமாதி அத்தோ². அத² வா அத்தனா விந்தி³தப்³ப³ம் பூ⁴மிம் விந்த³தி லப⁴தீதி விஜ்ஜா நாமாதி அத்தோ². அத² வா ஸபா⁴வத³ஸ்ஸனஹேதுத்தா ஸபா⁴வம் விதி³தம் கரோதீதி விஜ்ஜா நாமாதி அத்தோ². விஜ்ஜந்தோ முச்சதி, முச்சந்தோ விஜ்ஜதீதி யதா²வுத்தோ த⁴ம்மோ யதா²வுத்தேனத்தே²ன விஜ்ஜமானோ யதா²வுத்ததோ முச்சதி, யதா²வுத்ததோ முச்சமானோ யதா²வுத்தேனத்தே²ன விஜ்ஜதீதி விஜ்ஜாவிமுத்தி நாமாதி அத்தோ².

காமச்ச²ந்த³ம் ஸம்வரட்டே²னாதி காமச்ச²ந்த³னிவாரணட்டே²ன தம் நேக்க²ம்மம் ஸீலவிஸுத்³தி⁴ நாமாதி அத்தோ². தம்யேவ அவிக்கே²பஹேதுத்தா அவிக்கே²பட்டே²ன சித்தவிஸுத்³தி⁴. த³ஸ்ஸனஹேதுத்தா த³ஸ்ஸனட்டே²ன தி³ட்டி²விஸுத்³தி⁴. ஸேஸேஸுபி ஏஸேவ நயோ. படிப்பஸ்ஸம்பே⁴தீதி நேக்க²ம்மாதி³னா காமச்ச²ந்தா³தி³கம் யோகா³வசரோ படிப்பஸ்ஸம்பே⁴தீதி நேக்க²ம்மாதி³கோ த⁴ம்மோ பஸ்ஸத்³தி⁴ நாமாதி அத்தோ². பஹீனத்தாதி தேன தேன பஹானேன பஹீனத்தா. ஞாதட்டே²ன ஞாணந்தி ஜா²னபச்சவேக்க²ணாவஸேன விபஸ்ஸனாவஸேன மக்³க³பச்சவேக்க²ணாவஸேன ஞாதட்டே²ன நேக்க²ம்மாதி³கம் ஞாணம் நாமாதி அத்தோ². தி³ட்ட²த்தா த³ஸ்ஸனந்தி ஏத்தா²பி ஏஸேவ நயோ. விஸுஜ்ஜ²தீதி யோகீ³, நேக்க²ம்மாதி³கா விஸுத்³தி⁴.

நேக்க²ம்மனித்³தே³ஸே நேக்க²ம்மம் அலோப⁴த்தா காமராக³தோ நிஸ்ஸடந்தி நிஸ்ஸரணம். ததோ நிக்க²ந்தந்தி நேக்க²ம்மம். ‘‘ரூபானமேதம் நிஸ்ஸரணம் யதி³த³ம் நேக்க²ம்ம’’ந்தி வுச்சமானே ஆருப்பவிஸேஸஸ்ஸ அதி³ஸ்ஸனதோ விஸேஸஸ்ஸ த³ஸ்ஸனத்த²ம் அஞ்ஞத்த² வுத்தபாட²க்கமேனேவ யதி³த³ம் ஆருப்பந்தி வுத்தம். தஞ்ச ஆருப்பம் ரூபதோ நிக்க²ந்தத்தா நேக்க²ம்மம் நாமாதி அதி⁴காரவஸேனேவ வுத்தம் ஹோதி. பூ⁴தந்தி உப்பாத³ஸமாயோக³தீ³பனம். ஸங்க²தந்தி பச்சயப³லவிஸேஸத³ஸ்ஸனம். படிச்சஸமுப்பன்னந்தி பச்சயஸமாயோகே³பி பச்சயானம் அப்³யாபாரபா⁴வத³ஸ்ஸனம். நிரோதோ⁴ தஸ்ஸ நேக்க²ம்மந்தி நிப்³பா³னம் ததோ ஸங்க²ததோ நிக்க²ந்தத்தா தஸ்ஸ ஸங்க²தஸ்ஸ நேக்க²ம்மம் நாம. ஆருப்பஸ்ஸ ச நிரோத⁴ஸ்ஸ ச க³ஹணம் அஞ்ஞத்த² பாடே² வுத்தக்கமேனேவ கதம். ‘‘காமச்ச²ந்த³ஸ்ஸ நேக்க²ம்மம் நேக்க²ம்ம’’ந்தி வுச்சமானே புனருத்தம் ஹோதி. நேக்க²ம்மவசனேனேவ ச தஸ்ஸ நேக்க²ம்மஸித்³தீ⁴தி தம் அவத்வா ஸேஸனேக்க²ம்மமேவ வுத்தம். தம் உஜுகமேவ. நிஸ்ஸரணனித்³தே³ஸேபி இமினாவ நயேன அத்தோ² வேதி³தப்³போ³. நிஸ்ஸரணீயா தா⁴துயோ பனேத்த² உஜுகமேவ நேக்க²ம்மந்தி வுத்தம். பவிவேகோதி பவிவித்தபா⁴வோ நேக்க²ம்மாதி³கோயேவ. வோஸஜ்ஜதீதி யோகீ³, நேக்க²ம்மாத³யோ வோஸக்³கோ³. நேக்க²ம்மம் பவத்தேந்தோ யோகீ³ நேக்க²ம்மேன சரதீதி வுச்சதி. தம் பன நேக்க²ம்மம் சரியா. ஏஸ நயோ ஸேஸேஸுபி. ஜா²னவிமோக்க²னித்³தே³ஸே வத்தப்³ப³ம் விமோக்க²கதா²யம் வுத்தம். கேவலம் தத்த² ‘‘ஜானாதீதி ஜா²னவிமோக்கோ²’’தி (படி. ம. 1.217) வுத்தம், இத⁴ பன ‘‘ஜானாதீதி, ஜா²யதீ’’தி புக்³க³லாதி⁴ட்டா²னாவ தே³ஸனா கதாதி அயம் விஸேஸோ.

42. பா⁴வனாதி⁴ட்டா²னஜீவிதனித்³தே³ஸே ச புக்³க³லாதி⁴ட்டா²னா தே³ஸனா கதா. த⁴ம்மதோ பன பா⁴வனா நாம நேக்க²ம்மாத³யோவ. அதி⁴ட்டா²னம் நாம நேக்க²ம்மாதி³வஸேன பதிட்டா²பிதசித்தமேவ. ஜீவிதம் நாம நேக்க²ம்மாதி³வஸேன பதிட்டா²பிதசித்தஸ்ஸ ஸம்மாஆஜீவோ நாம. கோ ஸோ ஸம்மாஆஜீவோ நாம? மிச்சா²ஜீவா விரதி, த⁴ம்மேன ஸமேன பச்சயபரியேஸனவாயாமோ ச. தத்த² ஸமம் ஜீவதீதி ஸமம் ஜீவிதம் ஜீவதி, பா⁴வனபும்ஸகவசனம் வா, ஸமேன ஜீவதீதி வுத்தம் ஹோதி. நோ விஸமந்தி ‘‘ஸமம் ஜீவதீ’’தி வுத்தஸ்ஸேவ அத்த²ஸ்ஸ படிஸேத⁴வஸேன அவதா⁴ரணம் கதம். ஸம்மா ஜீவதீதி ஆகாரனித³ஸ்ஸனம். நோ மிச்சா²தி தஸ்ஸேவ நியமனம். விஸுத்³த⁴ம் ஜீவதீதி ஸபா⁴வவிஸுத்³தி⁴யா விஸுத்³த⁴ம் ஜீவிதம் ஜீவதி. நோ கிலிட்ட²ந்தி தஸ்ஸேவ நியமனம். யஞ்ஞதே³வாதிஆதீ³ஹி யதா²வுத்தானம் திஸ்ஸன்னம் ஸம்பதா³னம் ஆனிஸம்ஸம் த³ஸ்ஸேதி. தத்த² யஞ்ஞதே³வாதி யம் யம் ஏவ. க²த்தியபரிஸந்தி க²த்தியானம் ஸன்னிபாதம். ஸோ ஹி ஸமந்ததோ ஸீத³ந்தி ஏத்த² அகதபு³த்³தி⁴னோதி பரிஸாதி வுச்சதி. ஏஸேவ நயோ இதரத்தயே. க²த்தியாதீ³னம்யேவ ஆக³மனஸம்பத்தியா ஞாணஸம்பத்தியா ச ஸமன்னாக³தத்தா தாஸம்யேவ சதஸ்ஸன்னம் க³ஹணம், ந ஸுத்³த³பரிஸாய. விஸாரதோ³தி தீஹி ஸம்பதா³ஹி ஸம்பன்னோ விக³தஸாரஜ்ஜோ, நிப்³ப⁴யோதி அத்தோ². அமங்குபூ⁴தோதி அஸங்குசிதோ ந நித்தேஜபூ⁴தோ. தம் கிஸ்ஸ ஹேதூதி தம் விஸாரத³த்தம் கேன ஹேதுனா கேன காரணேன ஹோதீதி சேதி அத்தோ². இதா³னி ததா² ஹீதி தஸ்ஸ காரணவசனம். யஸ்மா ஏவம் திஸம்பதா³ஸம்பன்னோ, தஸ்மா ‘‘விஸாரதோ³ ஹோதீ’’தி விஸாரத³பா⁴வஸ்ஸ காரணம் த³ஸ்ஸேத்வா நிட்ட²பேஸீதி.

ஸத்³த⁴ம்மப்பகாஸினியா படிஸம்பி⁴தா³மக்³க³-அட்ட²கதா²ய

மாதிகாகதா²வண்ணனா நிட்டி²தா.

பஞ்ஞாவக்³க³வண்ணனா நிட்டி²தா.

நிட்டி²தா சூளவக்³க³ஸ்ஸ அபுப்³ப³த்தா²னுவண்ணனா.

ஏத்தாவதா ச திவக்³க³ஸங்க³ஹிதஸ்ஸ

ஸமதிம்ஸகதா²படிமண்டி³தஸ்ஸ படிஸம்பி⁴தா³மக்³க³ஸ்ஸ அத்த²வண்ணனா நிட்டி²தா ஹோதீதி.

நிக³மனகதா²

மஹாவக்³கோ³ மஜ்ஜி²மோ ச, சூளவக்³கோ³ ச நாமதோ;

தயோ வக்³கா³ இத⁴ வுத்தா, பமாணபடிபாடியா.

வக்³கே³ வக்³கே³ த³ஸ த³ஸ, கதா² யா தா உதீ³ரிதா;

உத்³தா³னகா³தா² ஸப்³பா³ஸம், இமா தாஸம் யதா²க்கமம்.

ஞாணம் தி³ட்டி² ஆனாபானம், இந்த்³ரியம் விமோக்க²பஞ்சமம்;

க³தி கம்மம் விபல்லாஸோ, மக்³கோ³ மண்டோ³தி தா த³ஸ.

யுக³னத்³த⁴ஸச்சபோ³ஜ்ஜ²ங்கா³, மேத்தா விராக³பஞ்சமா;

படிஸம்பி⁴தா³ த⁴ம்மசக்கம், லோகுத்தரப³லஸுஞ்ஞதா.

பஞ்ஞா இத்³தி⁴ அபி⁴ஸமயோ, விவேகோ சரியபஞ்சமோ;

பாடிஹீரம் ஸமஸீஸ-ஸதி விபஸ்ஸனமாதிகா.

யோ ஸோ ஸுக³தஸுதானம், அதி⁴பதிபூ⁴தேன பூ⁴தஹிதரதினா;

தே²ரேன தி²ரகு³ணவதா, வுத்தோ படிஸம்பி⁴தா³மக்³கோ³.

தஸ்ஸத்த²வண்ணனா யா, புப்³ப³ட்ட²கதா²னயம் ததா² யுத்திம்;

நிஸ்ஸாய மயாரத்³தா⁴, நிட்டா²னமுபாக³தா ஏஸா.

யம் தம் உத்தரமந்தீ, மந்திகு³ணயுதோ யுதோ ச ஸத்³தா⁴ய;

காரயி மஹாவிஹாரே, பரிவேணமனேகஸாது⁴கு³ணம்.

தே²ரேனேத்த² நிவஸதா, ஸமாபிதாயம் மஹாபி⁴தா⁴னேன;

ததியே வஸ்ஸே சுதிதோ, மோக்³க³ல்லானஸ்ஸ பூ⁴பதினோ.

ஸமயம் அனுலோமேந்தீ, தே²ரானம் தே²ரவாத³தீ³பானம்;

நிட்ட²ம் க³தா யதா²யம், அட்ட²கதா² லோகஹிதஜனனீ.

த⁴ம்மம் அனுலோமேந்தா, அத்தஹிதம் பரஹிதஞ்ச ஸாதே⁴ந்தா;

நிட்ட²ம் க³ச்ச²ந்து ததா², மனோரதா² ஸப்³ப³ஸத்தானம்.

ஸத்³த⁴ம்மபகாஸினியா, அட்ட²கதா²யேத்த² க³ணிதகுஸலேஹி;

க³ணிதா து பா⁴ணவாரா, விஞ்ஞேய்யா அட்ட²பஞ்ஞாஸ.

ஆனுட்டு²பே⁴ன அஸ்ஸா, ச²ந்தோ³ப³ந்தே⁴ன க³ணியமானா து;

சுத்³த³ஸஸஹஸ்ஸஸங்கா², கா³தா²யோ பஞ்ச ச ஸதானி.

ஸாஸனசிரட்டி²தத்த²ம், லோகஹிதத்த²ஞ்ச ஸாத³ரேன மயா;

புஞ்ஞம் இமம் ரசயதா, யம் பத்தமனப்பகம் விபுலம்.

புஞ்ஞேன தேன லோகோ, ஸத்³த⁴ம்மரஸாயனம் த³ஸப³லஸ்ஸ;

உபபு⁴ஞ்ஜித்வா விமலம், பப்போது ஸுக²ம் ஸுகே²னேவாதி.

ஸத்³த⁴ம்மப்பகாஸினீ நாம

படிஸம்பி⁴தா³மக்³க³ப்பகரணஸ்ஸ அட்ட²கதா² நிட்டி²தா.