69. ஆஸயானுஸயஞாணனித்³தே³ஸவண்ணனா

113. ஆஸயானுஸயஞாணனித்³தே³ஸே இத⁴ ததா²க³தோதிஆதி³ பஞ்சதா⁴ ட²பிதோ நித்³தே³ஸோ. தத்த² ஆஸயானுஸயா வுத்தத்தா² ஏவ. சரிதந்தி புப்³பே³ கதம் குஸலாகுஸலம் கம்மம். அதி⁴முத்திந்தி ஸம்பதி குஸலே அகுஸலே வா சித்தவோஸக்³கோ³. ப⁴ப்³பா³ப⁴ப்³பே³தி ப⁴ப்³பே³ ச அப⁴ப்³பே³ ச. அரியாய ஜாதியா ஸம்ப⁴வந்தி ஜாயந்தீதி ப⁴ப்³பா³. வத்தமானஸமீபே வத்தமானவசனம். ப⁴விஸ்ஸந்தி ஜாயிஸ்ஸந்தீதி வா ப⁴ப்³பா³, பா⁴ஜனபூ⁴தாதி அத்தோ². யே அரியமக்³க³படிவேத⁴ஸ்ஸ அனுச்ச²விகா உபனிஸ்ஸயஸம்பன்னா, தே ப⁴ப்³பா³. வுத்தபடிபக்கா² அப⁴ப்³பா³.

கதமோ ஸத்தானம் ஆஸயோதிஆதி³ நித்³தே³ஸஸ்ஸ படினித்³தே³ஸோ. தத்த² ஸஸ்ஸதோதி நிச்சோ. லோகோதி அத்தா. இத⁴ ஸரீரம்யேவ நஸ்ஸதி, அத்தா பன இத⁴ பரத்த² ச ஸோயேவாதி மஞ்ஞந்தி. ஸோ ஹி ஸயம்யேவ ஆலோகேதீதி கத்வா ‘‘லோகோ’’தி மஞ்ஞந்தி. அஸஸ்ஸதோதி அனிச்சோ. அத்தா ஸரீரேனேவ ஸஹ நஸ்ஸதீதி மஞ்ஞந்தி. அந்தவாதி பரித்தே கஸிணே ஜா²னம் உப்பாதே³த்வா தம்பரித்தகஸிணாரம்மணம் சித்தம் ஸபரியந்தோ அத்தாதி மஞ்ஞந்தி. அனந்தவாதி ந அந்தவா அப்பமாணே கஸிணே ஜா²னம் உப்பாதே³த்வா தம்அப்பமாணகஸிணாரம்மணம் சித்தம் அபரியந்தோ அத்தாதி மஞ்ஞந்தி. தம் ஜீவம் தம் ஸரீரந்தி ஜீவோ ச ஸரீரஞ்ச தம்யேவ. ஜீவோதி அத்தா, லிங்க³விபல்லாஸேன நபும்ஸகவசனம் கதம். ஸரீரந்தி ராஸட்டே²ன க²ந்த⁴பஞ்சகம். அஞ்ஞம் ஜீவம் அஞ்ஞம் ஸரீரந்தி அஞ்ஞோ ஜீவோ அஞ்ஞம் க²ந்த⁴பஞ்சகம். ஹோதி ததா²க³தோ பரம் மரணாதி க²ந்தா⁴ இதே⁴வ வினஸ்ஸந்தி, ஸத்தோ மரணதோ பரம் ஹோதி விஜ்ஜதி ந நஸ்ஸதி. ‘‘ததா²க³தோ’’தி சேத்த² ஸத்தாதி⁴வசனந்தி வத³ந்தி. கேசி பன ‘‘ததா²க³தோதி அரஹா’’தி வத³ந்தி. இமே ‘‘ந ஹோதீ’’தி பக்கே² தோ³ஸம் தி³ஸ்வா ஏவம் க³ண்ஹந்தி. ந ஹோதி ததா²க³தோ பரம் மரணாதி க²ந்தா⁴பி இதே⁴வ நஸ்ஸந்தி, ததா²க³தோ ச மரணதோ பரம் ந ஹோதி உச்சி²ஜ்ஜதி வினஸ்ஸதி. இமே ‘‘ஹோதீ’’தி பக்கே² தோ³ஸம் தி³ஸ்வா ஏவம் க³ண்ஹந்தி. ஹோதி ச ந ச ஹோதீதி இமே ஏகேகபக்க²பரிக்³க³ஹே தோ³ஸம் தி³ஸ்வா உப⁴யபக்க²ம் க³ண்ஹந்தி. நேவ ஹோதி ந ந ஹோதீதி இமே உப⁴யபக்க²பரிக்³க³ஹே உப⁴யதோ³ஸாபத்திம் தி³ஸ்வா ‘‘ஹோதீதி ச ந ஹோதி, நேவ ஹோதீதி ச ந ஹோதீ’’தி அமராவிக்கே²பபக்க²ம் க³ண்ஹந்தி.

அயம் பனேத்த² அட்ட²கதா²னயோ – ‘‘ஸஸ்ஸதோ லோகோதி வா’’திஆதீ³ஹி த³ஸஹாகாரேஹி தி³ட்டி²பபே⁴தோ³வ வுத்தோ. தத்த² ஸஸ்ஸதோ லோகோதி ச க²ந்த⁴பஞ்சகம் லோகோதி க³ஹேத்வா ‘‘அயம் லோகோ நிச்சோ து⁴வோ ஸப்³ப³காலிகோ’’தி க³ண்ஹந்தஸ்ஸ ஸஸ்ஸதந்தி க³ஹணாகாரப்பவத்தா தி³ட்டி². அஸஸ்ஸதோதி தமேவ லோகம் ‘‘உச்சி²ஜ்ஜதி வினஸ்ஸதீ’’தி க³ண்ஹந்தஸ்ஸ உச்சே²த³க்³க³ஹணாகாரப்பவத்தா தி³ட்டி². அந்தவாதி பரித்தகஸிணலாபி⁴னோ ஸுப்பமத்தே வா ஸராவமத்தே வா கஸிணே ஸமாபன்னஸ்ஸ அந்தோஸமாபத்தியம் பவத்திதரூபாரூபத⁴ம்மே ‘‘லோகோ’’தி ச கஸிணபரிச்சே²த³ந்தேன ‘‘அந்தவா’’தி ச க³ண்ஹந்தஸ்ஸ ‘‘அந்தவா லோகோ’’தி க³ஹணாகாரப்பவத்தா தி³ட்டி². ஸா ஸஸ்ஸததி³ட்டி²பி ஹோதி உச்சே²த³தி³ட்டி²பி. விபுலகஸிணலாபி⁴னோ பன தஸ்மிம் கஸிணே ஸமாபன்னஸ்ஸ அந்தோஸமாபத்தியம் பவத்திதரூபாரூபத⁴ம்மே ‘‘லோகோ’’தி ச கஸிணபரிச்சே²த³ந்தேன ‘‘ந அந்தவா’’தி ச க³ண்ஹந்தஸ்ஸ ‘‘அனந்தவா லோகோ’’தி க³ஹணாகாரப்பவத்தா தி³ட்டி². ஸா ஸஸ்ஸததி³ட்டி²பி ஹோதி உச்சே²த³தி³ட்டி²பி. தம் ஜீவம் தம் ஸரீரந்தி பே⁴த³னத⁴ம்மஸ்ஸ ஸரீரஸ்ஸேவ ‘‘ஜீவ’’ந்தி க³ஹிதத்தா ‘‘ஸரீரே உச்சி²ஜ்ஜமானே ஜீவம்பி உச்சி²ஜ்ஜதீ’’தி உச்சே²த³க்³க³ஹணாகாரப்பவத்தா தி³ட்டி². து³தியபதே³ ஸரீரதோ அஞ்ஞஸ்ஸ ஜீவஸ்ஸ க³ஹிதத்தா ‘‘ஸரீரே உச்சி²ஜ்ஜமானேபி ஜீவம் ந உச்சி²ஜ்ஜதீ’’தி ஸஸ்ஸதக்³க³ஹணாகாரப்பவத்தா தி³ட்டி². ஹோதி ததா²க³தோதிஆதீ³ஸு ‘‘ஸத்தோ ததா²க³தோ நாம, ஸோ பரம் மரணா ஹோதீ’’தி க³ண்ஹதோ பட²மா ஸஸ்ஸததி³ட்டி². ‘‘ந ஹோதீ’’தி க³ண்ஹதோ து³தியா உச்சே²த³தி³ட்டி². ‘‘ஹோதி ச ந ச ஹோதீ’’தி க³ண்ஹதோ ததியா ஏகச்சஸஸ்ஸததி³ட்டி². ‘‘நேவ ஹோதி ந ந ஹோதீ’’தி க³ண்ஹதோ சதுத்தா² அமராவிக்கே²பதி³ட்டீ²தி.

இதீதி வுத்தப்பகாரதி³ட்டி²னிஸ்ஸயனித³ஸ்ஸனம். ப⁴வதி³ட்டி²ஸன்னிஸ்ஸிதா வா ஸத்தா ஹோந்தி விப⁴வதி³ட்டி²ஸன்னிஸ்ஸிதா வாதி ப⁴வோ வுச்சதி ஸஸ்ஸதோ, ஸஸ்ஸதவஸேன உப்பஜ்ஜமானதி³ட்டி² ப⁴வதி³ட்டி², ப⁴வோதி தி³ட்டீ²தி வுத்தம் ஹோதி. விப⁴வோ வுச்சதி உச்சே²தோ³, உச்சே²த³வஸேன உப்பஜ்ஜமானதி³ட்டி² விப⁴வதி³ட்டி², விப⁴வோதி தி³ட்டீ²தி வுத்தம் ஹோதி. வுத்தப்பகாரா த³ஸவிதா⁴ தி³ட்டி² ப⁴வதி³ட்டி² ச விப⁴வதி³ட்டி² சாதி த்³விதா⁴வ ஹோதி. தாஸு த்³வீஸு ஏகேகம் ஸன்னிஸ்ஸிதா அபஸ்ஸிதா அல்லீனா ஸத்தா ஹோந்தி.

ஏதே வா பன உபோ⁴ அந்தே அனுபக³ம்மாதி ஏத்த² ‘‘அக்³கி³தோ வா உத³கதோ வா மிது²பே⁴தா³ வா’’திஆதீ³ஸு (தீ³. நி. 2.152) விய வா-ஸத்³தோ³ ஸமுச்சயத்தோ². ஏதே வுத்தப்பகாரே ஸஸ்ஸதுச்சே²த³வஸேன த்³வே பக்கே² ச ந உபக³ந்த்வா அனல்லீயித்வா பஹாயாதி அத்தோ². ‘‘அனுலோமிகா வா க²ந்தீ’’தி விகப்பத்தோ²வ. இத³ப்பச்சயதாபடிச்சஸமுப்பன்னேஸூதி இமேஸம் ஜராமரணாதீ³னம் பச்சயா இத³ப்பச்சயா, இத³ப்பச்சயா ஏவ இத³ப்பச்சயதா, இத³ப்பச்சயானம் வா ஸமூஹோ இத³ப்பச்சயதா. லக்க²ணம் பனேத்த² ஸத்³த³ஸத்த²தோ பரியேஸிதப்³ப³ம். தே தே பச்சயே படிச்ச ஸஹ ஸம்மா ச உப்பன்னா படிச்சஸமுப்பன்னா. தஸ்ஸா இத³ப்பச்சயதாய ச தேஸு படிச்சஸமுப்பன்னேஸு ச த⁴ம்மேஸு. அனுலோமிகாதி லோகுத்தரத⁴ம்மானம் அனுலோமதோ அனுலோமிகா. க²ந்தீதி ஞாணம். ஞாணஞ்ஹி க²மனதோ க²ந்தி. படிலத்³தா⁴ ஹோதீதி ஸத்தேஹி அதி⁴க³தா ஹோதி. இத³ப்பச்சயதாய க²ந்தியா உச்சே²த³த்தானுபக³மோ ஹோதி பச்சயுப்பன்னத⁴ம்மானம் பச்சயஸாமக்³கி³யம் ஆயத்தவுத்தித்தா பச்சயானுபரமத³ஸ்ஸனேன ப²லானுபரமத³ஸ்ஸனதோ. படிச்சஸமுப்பன்னேஸு த⁴ம்மேஸு க²ந்தியா ஸஸ்ஸதத்தானுபக³மோ ஹோதி பச்சயஸாமக்³கி³யம் நவனவானம் பச்சயுப்பன்னத⁴ம்மானம் உப்பாத³த³ஸ்ஸனதோ. ஏவமேதே உபோ⁴ அந்தே அனுபக³ம்ம படிச்சஸமுப்பாத³படிச்சஸமுப்பன்னத⁴ம்மத³ஸ்ஸனேன ந உச்சே²தோ³ ந ஸஸ்ஸதோதி பவத்தம் ஸம்மாத³ஸ்ஸனம் ‘‘அனுலோமிகா க²ந்தீ’’தி வேதி³தப்³ப³ம். ஏவஞ்ஹி தது³ப⁴யதி³ட்டி²படிபக்க²பூ⁴தா ஸம்மாதி³ட்டி² வுத்தா ஹோதி. யதா²பூ⁴தம் வா ஞாணந்தி யதா²பூ⁴தம் யதா²ஸபா⁴வம் நேய்யம். தத்த² பவத்தஞாணம்பி விஸயவோஹாரேன ‘‘யதா²பூ⁴தஞாண’’ந்தி வுத்தம். தம் பன ஸங்கா²ருபேக்கா²பரியந்தம் விபஸ்ஸனாஞாணம் இதா⁴தி⁴ப்பேதம். ஹேட்டா² பன ‘‘யதா²பூ⁴தஞாணத³ஸ்ஸன’’ந்தி ப⁴யதூபட்டா²னஞாணம் வுத்தம். யதா²பூ⁴தம் வா ஞாணம் ஸத்தேஹி படிலத்³த⁴ம் ஹோதீதி ஸம்ப³ந்தோ⁴.

இதா³னி ‘‘ஸஸ்ஸதோ லோகோ’’திஆதீ³ஹி மிச்சா²தி³ட்டி²பரிபா⁴விதம் ‘‘ஏதே வா பனா’’திஆதீ³ஹி ஸம்மாதி³ட்டி²பரிபா⁴விதம் ஸத்தஸந்தானம் த³ஸ்ஸேத்வா ‘‘காமம் ஸேவந்தஞ்ஞேவா’’திஆதீ³ஹி ஸேஸாகுஸலேஹி ஸேஸகுஸலேஹி ச பரிபா⁴விதம் ஸத்தஸந்தானம் த³ஸ்ஸேதி. தத்த² காமம் ஸேவந்தம்யேவ புக்³க³லம் ததா²க³தோ ஜானாதீதி யோஜனா காதப்³பா³. ஸேவந்தந்தி ச அபி⁴ண்ஹஸமுதா³சாரவஸேன ஸேவமானம். புப்³பே³ ஆஸேவிதவஸேன கிலேஸகாமோ க³ரு அஸ்ஸாதி காமக³ருகோ. ததே²வ காமோ ஆஸயே ஸந்தானே அஸ்ஸாதி காமாஸயோ. ஸந்தானவஸேனேவ காமே அதி⁴முத்தோ லக்³கோ³தி காமாதி⁴முத்தோ. ஸேஸேஸுபி ஏஸேவ நயோ. நேக்க²ம்மாதீ³னி வுத்தத்தா²னேவ. காமாதீ³ஹி ச தீஹி ஸேஸாகுஸலா, நேக்க²ம்மாதீ³ஹி தீஹி ஸேஸகுஸலா க³ஹிதாவ ஹோந்தீதி வேதி³தப்³பா³. ‘‘அயம் ஸத்தானம் ஆஸயோ’’தி திதா⁴ வுத்தம் ஸந்தானமேவ த³ஸ்ஸேதி.

அயம் பனேத்த² அட்ட²கதா²னயோ – ‘‘இதி ப⁴வதி³ட்டி²ஸன்னிஸ்ஸிதா வா’’தி ஏவம் ஸஸ்ஸததி³ட்டி²ம் வா ஸன்னிஸ்ஸிதா. ஸஸ்ஸததி³ட்டி² ஹி ஏத்த² ப⁴வதி³ட்டீ²தி வுத்தா, உச்சே²த³தி³ட்டி² ச விப⁴வதி³ட்டீ²தி. ஸப்³ப³தி³ட்டீ²னஞ்ஹி ஸஸ்ஸதுச்சே²த³தி³ட்டீ²ஹி ஸங்க³ஹிதத்தா ஸப்³பே³பிமே தி³ட்டி²க³திகா ஸத்தா இமாவ த்³வே தி³ட்டி²யோ ஸன்னிஸ்ஸிதா ஹோந்தி. வுத்தம்பி சேதம் ‘‘த்³வயனிஸ்ஸிதோ க்²வாயம், கச்சான, லோகோ யேபு⁴ய்யேன அத்தி²தஞ்சேவ நத்தி²தஞ்சா’’தி (ஸம். நி. 2.15). ஏத்த² ஹி அத்தி²தாதி ஸஸ்ஸதம். நத்தி²தாதி உச்சே²தோ³. அயம் தாவ வட்டனிஸ்ஸிதானம் புது²ஜ்ஜனானம் ஸத்தானம் ஆஸயோ. இதா³னி விவட்டனிஸ்ஸிதானம் ஸுத்³த⁴ஸத்தானம் ஆஸயம் த³ஸ்ஸேதும் ‘‘ஏதே வா பன உபோ⁴ அந்தே அனுபக³ம்மா’’திஆதி³ வுத்தம். தத்த² ‘‘ஏதே வா பனா’’தி ஏதேயேவ. ‘‘உபோ⁴ அந்தே’’தி ஸஸ்ஸதுச்சே²த³ஸங்கா²தே த்³வே அந்தே. ‘‘அனுபக³ம்மா’’தி ந அல்லீயித்வா. ‘‘இத³ப்பச்சயதாபடிச்சஸமுப்பன்னேஸு த⁴ம்மேஸூ’’தி இத³ப்பச்சயதாய சேவ படிச்சஸமுப்பன்னத⁴ம்மேஸு ச. ‘‘அனுலோமிகா க²ந்தீ’’தி விபஸ்ஸனாஞாணம். ‘‘யதா²பூ⁴தம் ஞாண’’ந்தி மக்³க³ஞாணம். இத³ம் வுத்தம் ஹோதி – யா படிச்சஸமுப்பாதே³ சேவ படிச்சஸமுப்பன்னத⁴ம்மேஸு ச ஏதே உபோ⁴ ஸஸ்ஸதுச்சே²த³அந்தே அனுபக³ந்த்வா விபஸ்ஸனா படிலத்³தா⁴, யஞ்ச ததோ உத்தரி மக்³க³ஞாணம், அயம் ஸத்தானம் ஆஸயோ. அயம் வட்டனிஸ்ஸிதானஞ்ச விவட்டனிஸ்ஸிதானஞ்ச ஸப்³பே³ஸம்பி ஸத்தானம் ஆஸயோ இத³ம் வஸனட்டா²னந்தி. அயம் ஆசரியானம் ஸமானட்ட²கதா².

விதண்ட³வாதீ³ பனாஹ ‘‘மக்³கோ³ நாம வாஸம் வித்³த⁴ம்ஸேந்தோ க³ச்ச²தி, த்வம் மக்³கோ³ வாஸோதி வதே³ஸீ’’தி? ஸோ வத்தப்³போ³ ‘‘த்வம் அரியவாஸபா⁴ணகோ ஹோஸி ந ஹோஸீ’’தி? ஸசே ‘‘ந ஹோமீ’’தி வத³தி, ‘‘த்வம் அபா⁴ணகதாய ந ஜானாஸீ’’தி வத்தப்³போ³. ஸசே ‘‘பா⁴ணகோஸ்மீ’’தி வத³தி, ‘‘ஸுத்தம் ஆஹரா’’தி வத்தப்³போ³. ஸசே ஆஹரதி, இச்சேதம் குஸலம். நோ சே ஆஹரதி, ஸயம் ஆஹரிதப்³ப³ம் ‘‘த³ஸயிமே, பி⁴க்க²வே, அரியாவாஸா, யத³ரியா ஆவஸிம்ஸு வா ஆவஸந்தி வா ஆவஸிஸ்ஸந்தி வா’’தி (அ. நி. 10.19). ஏதஞ்ஹி ஸுத்தம் மக்³க³ஸ்ஸ வாஸபா⁴வம் தீ³பேதி. தஸ்மா ஸுகதி²தமேவேதந்தி. இமம் பன ப⁴க³வா ஸத்தானம் ஆஸயம் ஜானந்தோ இமேஸஞ்ச தி³ட்டி²க³தானம் இமேஸஞ்ச விபஸ்ஸனாஞாணமக்³க³ஞாணானம் அப்பவத்திக்க²ணேபி ஜானாதி ஏவ. தஸ்மாயேவ ச ‘‘காமம் ஸேவந்தம்யேவ ஜானாதீ’’திஆதி³ வுத்தந்தி.

அனுஸயனித்³தே³ஸே அனுஸயாதி கேனட்டே²ன அனுஸயா? அனுஸயனட்டே²ன. கோ ஏஸ அனுஸயனட்டோ² நாமாதி? அப்பஹீனட்டோ². ஏதே ஹி அப்பஹீனட்டே²ன தஸ்ஸ தஸ்ஸ ஸந்தானே அனுஸேந்தி நாம. தஸ்மா ‘‘அனுஸயா’’தி வுச்சந்தி. அனுஸேந்தீதி அனுரூபம் காரணம் லபி⁴த்வா உப்பஜ்ஜந்தீதி அத்தோ². அதா²பி ஸியா – அனுஸயனட்டோ² நாம அப்பஹீனாகாரோ, ஸோ ச உப்பஜ்ஜதீதி வத்தும் ந யுஜ்ஜதி, தஸ்மா ந அனுஸயா உப்பஜ்ஜந்தீதி. தத்ரித³ம் படிவசனம் – ந அப்பஹீனாகாரோ, அனுஸயோதி பன அப்பஹீனட்டே²ன தா²மக³தகிலேஸோ வுச்சதி. ஸோ சித்தஸம்பயுத்தோ ஸாரம்மணோ ஸப்பச்சயட்டே²ன ஸஹேதுகோ ஏகந்தாகுஸலோ அதீதோபி ஹோதி அனாக³தோபி பச்சுப்பன்னோபி, தஸ்மா உப்பஜ்ஜதீதி வத்தும் யுஜ்ஜதீதி. தத்ரித³ம் பமாணம் – இதே⁴வ தாவ அபி⁴ஸமயகதா²ய (படி. ம. 3.21) ‘‘பச்சுப்பன்னே கிலேஸே பஜஹதீ’’தி புச்ச²ம் கத்வா அனுஸயானம் பச்சுப்பன்னபா⁴வஸ்ஸ அத்தி²தாய ‘‘தா²மக³தோ அனுஸயம் பஜஹதீ’’தி வுத்தம். த⁴ம்மஸங்க³ணியம் மோஹஸ்ஸ பத³பா⁴ஜனே ‘‘அவிஜ்ஜானுஸயோ அவிஜ்ஜாபரியுட்டா²னம் அவிஜ்ஜாலங்கீ³ மோஹோ அகுஸலமூலம், அயம் தஸ்மிம் ஸமயே மோஹோ ஹோதீ’’தி (த⁴. ஸ. 390) அகுஸலசித்தேன ஸத்³தி⁴ம் மோஹஸ்ஸ உப்பன்னபா⁴வோ வுத்தோ. கதா²வத்து²ஸ்மிம் ‘‘அனுஸயா அப்³யாகதா அனுஸயா அஹேதுகா அனுஸயா சித்தவிப்பயுத்தா’’தி ஸப்³பே³ வாதா³ படிஸேதி⁴தா. அனுஸயயமகே ஸத்தன்னம் மஹாவாரானம் அஞ்ஞதரஸ்மிம் உப்பஜ்ஜனவாரே ‘‘யஸ்ஸ காமராகா³னுஸயோ உப்பஜ்ஜதி, தஸ்ஸ படிகா⁴னுஸயோ உப்பஜ்ஜதீ’’திஆதி³ (யம. 2.அனுஸயயமக.300) வுத்தம். தஸ்மா ‘‘அனுஸேந்தீதி அனுரூபம் காரணம் லபி⁴த்வா உப்பஜ்ஜந்தீ’’தி யம் வுத்தம், தம் இமினா தந்திப்பமாணேன யுத்தந்தி வேதி³தப்³ப³ம். யம்பி ‘‘சித்தஸம்பயுத்தோ ஸாரம்மணோ’’திஆதி³ வுத்தம், தம்பி ஸுவுத்தமேவ. அனுஸயோ ஹி நாமேஸ பரினிப்ப²ன்னோ சித்தஸம்பயுத்தோ அகுஸலத⁴ம்மோதி நிட்ட²மேத்த² க³ந்தப்³ப³ம்.

காமராகா³னுஸயோதிஆதீ³ஸு காமராகோ³ ச ஸோ அப்பஹீனட்டே²ன அனுஸயோ சாதி காமராகா³னுஸயோ. ஸேஸபதே³ஸுபி ஏஸேவ நயோ. காமராகா³னுஸயோ சேத்த² லோப⁴ஸஹக³தசித்தேஸு ஸஹஜாதவஸேன ஆரம்மணவஸேன ச மனாபேஸு அவஸேஸகாமாவசரத⁴ம்மேஸு ஆரம்மணவஸேனேவ உப்பஜ்ஜமானோ லோபோ⁴. படிகா⁴னுஸயோ ச தோ³மனஸ்ஸஸஹக³தசித்தேஸு ஸஹஜாதவஸேன ஆரம்மணவஸேன ச அமனாபேஸு அவஸேஸகாமாவசரத⁴ம்மேஸு ஆரம்மணவஸேனேவ உப்பஜ்ஜமானோ தோ³ஸோ. மானானுஸயோ தி³ட்டி²க³தவிப்பயுத்தலோப⁴ஸஹக³தசித்தேஸு ஸஹஜாதவஸேன ஆரம்மணவஸேன ச து³க்க²வேத³னாவஜ்ஜேஸு அவஸேஸகாமாவசரத⁴ம்மேஸு ரூபாரூபாவசரத⁴ம்மேஸு ச ஆரம்மணவஸேனேவ உப்பஜ்ஜமானோ மானோ. தி³ட்டா²னுஸயோ சதூஸு தி³ட்டி²க³தஸம்பயுத்தேஸு. விசிகிச்சா²னுஸயோ விசிகிச்சா²ஸஹக³தே. அவிஜ்ஜானுஸயோ த்³வாத³ஸஸு அகுஸலசித்தேஸு ஸஹஜாதவஸேன ஆரம்மணவஸேன ச. தயோபி அவஸேஸதேபூ⁴மகத⁴ம்மேஸு ஆரம்மணவஸேனேவ உப்பஜ்ஜமானா தி³ட்டி²விசிகிச்சா²மோஹா. ப⁴வராகா³னுஸயோ சதூஸு தி³ட்டி²க³தவிப்பயுத்தேஸு உப்பஜ்ஜமானோபி ஸஹஜாதவஸேன ந வுத்தோ, ஆரம்மணவஸேனேவ பன ரூபாரூபாவசரத⁴ம்மேஸு உப்பஜ்ஜமானோ லோபோ⁴ வுத்தோ.

114. இதா³னி யதா²வுத்தானம் அனுஸயானம் அனுஸயனட்டா²னம் த³ஸ்ஸேந்தோ யம் லோகேதிஆதி³மாஹ. தத்த² யம் லோகே பியரூபந்தி யம் இமஸ்மிம் லோகே பியஜாதிகம் பியஸபா⁴வம். ஸாதரூபந்தி ஸாதஜாதிகம் அஸ்ஸாத³பத³ட்டா²னம் இட்டா²ரம்மணம். ஏத்த² ஸத்தானம் காமராகா³னுஸயோ அனுஸேதீதி ஏதஸ்மிம் இட்டா²ரம்மணே ஸத்தானம் அப்பஹீனட்டே²ன காமராகா³னுஸயோ அனுஸேதி. ‘‘பியரூபம் ஸாதரூப’’ந்தி ச இத⁴ காமாவசரத⁴ம்மோயேவ அதி⁴ப்பேதோ. யதா² நாம உத³கே நிமுக்³க³ஸ்ஸ ஹேட்டா² ச உபரி ச ஸமந்தா ச உத³கமேவ ஹோதி, ஏவமேவ இட்டா²ரம்மணே ராகு³ப்பத்தி நாம ஸத்தானம் ஆசிண்ணஸமாசிண்ணா. ததா² அனிட்டா²ரம்மணே படிகு⁴ப்பத்தி. இதி இமேஸு த்³வீஸு த⁴ம்மேஸூதி ஏவம் இமேஸு த்³வீஸு இட்டா²னிட்டா²ரம்மணத⁴ம்மேஸு. அவிஜ்ஜானுபதிதாதி காமராக³படிக⁴ஸம்பயுத்தா ஹுத்வா ஆரம்மணகரணவஸேன அவிஜ்ஜா அனுபதிதா அனுக³தா. விச்சே²த³ம் கத்வாபி பாடோ². ததே³கட்டோ²தி தாய அவிஜ்ஜாய ஸஹஜேகட்ட²வஸேன ஏகதோ டி²தோ. மானோ ச தி³ட்டி² ச விசிகிச்சா² சாதி நவவித⁴மானோ, த்³வாஸட்டி²விதா⁴ தி³ட்டி², அட்ட²வத்து²கா விசிகிச்சா², ததே³கட்டோ² மானோ ச ததே³கட்டா² தி³ட்டி² ச ததே³கட்டா² விசிகிச்சா² சாதி யோஜனா. த³ட்ட²ப்³பா³தி பஸ்ஸிதப்³பா³ அவக³ந்தப்³பா³. தயோ ஏகதோ கத்வா ப³ஹுவசனம் கதம். ப⁴வராகா³னுஸயோ பனேத்த² காமராகா³னுஸயேனேவ ஸங்க³ஹிதோதி வேதி³தப்³போ³.

சரிதனித்³தே³ஸே தேரஸ சேதனா புஞ்ஞாபி⁴ஸங்கா²ரோ. த்³வாத³ஸ அபுஞ்ஞாபி⁴ஸங்கா²ரோ. சதஸ்ஸோ ஆனேஞ்ஜாபி⁴ஸங்கா²ரோ. தத்த² காமாவசரோ பரித்தபூ⁴மகோ. இதரோ மஹாபூ⁴மகோ. தீஸுபி வா ஏதேஸு யோ கோசி அப்பவிபாகோ பரித்தபூ⁴மகோ, மஹாவிபாகோ மஹாபூ⁴மகோதி வேதி³தப்³போ³.

115. அதி⁴முத்தினித்³தே³ஸே ஸந்தீதி ஸம்விஜ்ஜந்தி. ஹீனாதி⁴முத்திகாதி லாமகஜ்ஜா²ஸயா. பணீதாதி⁴முத்திகாதி கல்யாணஜ்ஜா²ஸயா. ஸேவந்தீதி நிஸ்ஸயந்தி அல்லீயந்தி. ப⁴ஜந்தீதி உபஸங்கமந்தி. பயிருபாஸந்தீதி புனப்புனம் உபஸங்கமந்தி. ஸசே ஹி ஆசரியுபஜ்ஜா²யா ந ஸீலவந்தோ ஹோந்தி, அந்தேவாஸிகஸத்³தி⁴விஹாரிகா ஸீலவந்தோ, தே அத்தனோ ஆசரியுபஜ்ஜா²யேபி ந உபஸங்கமந்தி, அத்தனோ ஸதி³ஸே ஸாருப்பே பி⁴க்கூ²யேவ உபஸங்கமந்தி. ஸசேபி ஆசரியுபஜ்ஜா²யா ஸாருப்பா பி⁴க்கூ², இதரே அஸாருப்பா, தேபி ந ஆசரியுபஜ்ஜா²யே உபஸங்கமந்தி, அத்தனோ ஸதி³ஸே ஹீனாதி⁴முத்திகேயேவ உபஸங்கமந்தி. ஏவம் உபஸங்கமனம் பன ந கேவலம் ஏதரஹியேவ, அதீதானாக³தேபீதி த³ஸ்ஸேதும் அதீதம்பி அத்³தா⁴னந்திஆதி³மாஹ. தத்த² அதீதம்பி அத்³தா⁴னந்தி அதீதஸ்மிம் காலே, அச்சந்தஸம்யோக³த்தே² வா உபயோக³வசனம். ஸேஸம் உத்தானத்த²மேவ. இத³ம் பன து³ஸ்ஸீலானம் து³ஸ்ஸீலஸேவனமேவ, ஸீலவந்தானம் ஸீலவந்தஸேவனமேவ, து³ப்பஞ்ஞானம் து³ப்பஞ்ஞஸேவனமேவ, பஞ்ஞவந்தானம் பஞ்ஞவந்தஸேவனமேவ கோ நியமேதீதி? அஜ்ஜா²ஸயதா⁴து நியமேதீதி.

ப⁴ப்³பா³ப⁴ப்³ப³னித்³தே³ஸே ச²ட்³டே³தப்³பே³ பட²மம் நித்³தி³ஸித்வா க³ஹேதப்³பே³ பச்சா² நித்³தி³ஸிதும் உத்³தே³ஸஸ்ஸ உப்படிபாடியா பட²மம் அப⁴ப்³பா³ நித்³தி³ட்டா². உத்³தே³ஸே பன த்³வந்த³ஸமாஸே அச்சிதஸ்ஸ ச மந்த³க்க²ரஸ்ஸ ச பத³ஸ்ஸ புப்³ப³னிபாதலக்க²ணவஸேன ப⁴ப்³ப³ஸத்³தோ³ புப்³ப³ம் பயுத்தோ. கம்மாவரணேனாதி பஞ்சவிதே⁴ன ஆனந்தரியகம்மேன. ஸமன்னாக³தாதி ஸமங்கீ³பூ⁴தா. கிலேஸாவரணேனாதி நியதமிச்சா²தி³ட்டி²யா. இமானி த்³வே ஸக்³க³மக்³கா³னம் ஆவரணதோ ஆவரணானி. பி⁴க்கு²னீதூ³ஸகாதீ³னி கம்மானிபி கம்மாவரணேனேவ ஸங்க³ஹிதானி. விபாகாவரணேனாதி அஹேதுகபடிஸந்தி⁴யா. யஸ்மா பன து³ஹேதுகானம்பி அரியமக்³க³படிவேதோ⁴ நத்தி², தஸ்மா து³ஹேதுகா படிஸந்தி⁴பி விபாகாவரணமேவாதி வேதி³தப்³பா³, அஸ்ஸத்³தா⁴தி பு³த்³தா⁴தீ³ஸு ஸத்³தா⁴ரஹிதா. அச்ச²ந்தி³காதி கத்துகம்யதாகுஸலச்ச²ந்த³ரஹிதா. உத்தரகுருகா மனுஸ்ஸா அச்ச²ந்தி³கட்டா²னம் பவிட்டா². து³ப்பஞ்ஞாதி ப⁴வங்க³பஞ்ஞாய பரிஹீனா. ப⁴வங்க³பஞ்ஞாய பன பரிபுண்ணாயபி யஸ்ஸ ப⁴வங்க³ம் லோகுத்தரஸ்ஸ பாத³கம் ந ஹோதி, ஸோபி து³ப்பஞ்ஞோயேவ நாம. அப⁴ப்³பா³ நியாமம் ஓக்கமிதும் குஸலேஸு த⁴ம்மேஸு ஸம்மத்தந்தி குஸலேஸு த⁴ம்மேஸு ஸம்மத்தனியாமஸங்கா²தம் அரியமக்³க³ம் ஓக்கமிதும் அப⁴ப்³பா³. அரியமக்³கோ³ ஹி ஸம்மா ஸபா⁴வோதி ஸம்மத்தம், ஸோயேவ அனந்தரப²லதா³னே, ஸயமேவ வா அசலபா⁴வதோ நியாமோ, தம் ஓக்கமிதும் பவிஸிதும் அப⁴ப்³பா³. ந கம்மாவரணேனாதிஆதீ³னி வுத்தவிபரியாயேனேவ வேதி³தப்³பா³னீதி.

ஆஸயானுஸயஞாணனித்³தே³ஸவண்ணனா நிட்டி²தா.