70. யமகபாடிஹீரஞாணனித்³தே³ஸவண்ணனா

116. யமகபாடிஹீரஞாணனித்³தே³ஸே அஸாதா⁴ரணம் ஸாவகேஹீதி ஸேஸாஸாதா⁴ரணஞாணனித்³தே³ஸே அஞ்ஞவசனேஹி ஓகாஸாபா⁴வதோ ந வுத்தம், இத⁴ பன அஞ்ஞவசனாபா⁴வதோ வுத்தந்தி வேதி³தப்³ப³ம். உபரிமகாயதோதி நாபி⁴யா உத்³த⁴ம் ஸரீரதோ. அக்³கி³க்க²ந்தோ⁴ பவத்ததீதி தேஜோகஸிணாரம்மணம் பாத³கஜ்ஜா²னம் ஸமாபஜ்ஜித்வா வுட்டா²ய ‘‘உபரிமகாயதோ அக்³கி³ஜாலா வுட்டா²தூ’’தி ஆவஜ்ஜித்வா பரிகம்மம் கத்வா அனந்தரம் அபி⁴ஞ்ஞாஞாணேன ‘‘உபரிமகாயதோ அக்³கி³ஜாலா வுட்டா²தூ’’தி அதி⁴ட்டி²தே ஸஹ அதி⁴ட்டா²னா உபரிமகாயதோ அக்³கி³ஜாலா வுட்டா²தி. ஸா ஹி இத⁴ ராஸட்டே²ன க²ந்தோ⁴தி வுத்தா. ஹேட்டி²மகாயதோதி நாபி⁴தோ ஹேட்டா² ஸரீரதோ. உத³கதா⁴ரா பவத்ததீதி ஆபோகஸிணாரம்மணம் பாத³கஜ்ஜா²னம் ஸமாபஜ்ஜித்வா வுட்டா²ய ‘‘ஹேட்டி²மகாயதோ உத³கதா⁴ரா வுட்டா²தூ’’தி ஆவஜ்ஜித்வா பரிகம்மம் கத்வா அனந்தரம் அபி⁴ஞ்ஞாஞாணேன ‘‘ஹேட்டி²மகாயதோ உத³கதா⁴ரா வுட்டா²தூ’’தி அதி⁴ட்டி²தே ஸஹ அதி⁴ட்டா²னா ஹேட்டி²மகாயதோ உத³கதா⁴ரா வுட்டா²தி. உப⁴யத்தா²பி அப்³போ³ச்சே²த³வஸேன பவத்ததீதி வுத்தம். அதி⁴ட்டா²னஸ்ஸ ஆவஜ்ஜனஸ்ஸ ச அந்தரே த்³வே ப⁴வங்க³சித்தானி வத்தந்தி. தஸ்மாயேவ யுக³லா ஹுத்வா அக்³கி³க்க²ந்த⁴உத³கதா⁴ரா பவத்தந்தி, அந்தரம் ந பஞ்ஞாயதி. அஞ்ஞேஸம் பன ப⁴வங்க³பரிச்சே²தோ³ நத்தி². புரத்தி²மகாயதோதி அபி⁴முக²பஸ்ஸதோ. பச்சி²மகாயதோதி பிட்டி²பஸ்ஸதோ. த³க்கி²ணஅக்கி²தோ வாமஅக்கி²தோதிஆதி³ ஸமாஸபாடோ²யேவ, ந அஞ்ஞோ. த³க்கி²ணனாஸிகாஸோததோ வாமனாஸிகாஸோததோதி பாடோ² ஸுந்த³ரோ. ரஸ்ஸம் கத்வாபி பட²ந்தி. அம்ஸகூடதோதி ஏத்த² அப்³பு⁴க்³க³தட்டே²ன கூடோ வியாதி கூடோ, அம்ஸோயேவ கூடோ அம்ஸகூடோ. அங்கு³லங்கு³லேஹீதி அங்கு³லீஹி அங்கு³லீஹி. அங்கு³லந்தரிகாஹீதி அங்கு³லீனம் அந்தரிகாஹி. ஏகேகலோமதோ அக்³கி³க்க²ந்தோ⁴ பவத்ததி, ஏகேகலோமதோ உத³கதா⁴ரா பவத்ததீதி உப⁴யத்தா²பி ஆமேடி³தவசனேன ஸப்³ப³லோமானம் பரியாதி³ன்னத்தா ஏகேகலோமதோவ அக்³கி³க்க²ந்த⁴உத³கதா⁴ரா யுக³லா யுக³லா ஹுத்வா பவத்தந்தீதி வுத்தம் ஹோதி. லோமகூபதோ லோமகூபதோ அக்³கி³க்க²ந்தோ⁴ பவத்ததி, லோமகூபதோ லோமகூபதோ உத³கதா⁴ரா பவத்ததீதி ஏத்தா²பி ஏஸேவ நயோ. கேஸுசி போத்த²கேஸு ‘‘ஏகேகலோமதோ அக்³கி³க்க²ந்தோ⁴ பவத்ததி. லோமகூபதோ லோமகூபதோ உத³கதா⁴ரா பவத்ததி, லோமகூபதோ லோமகூபதோ அக்³கி³க்க²ந்தோ⁴ பவத்ததி, ஏகேகலோமதோ உத³கதா⁴ரா பவத்ததீ’’தி லிகி²தம். தம்பி யுஜ்ஜதியேவ. பாடிஹீரஸ்ஸ அதிஸுகு²மத்ததீ³பனதோ பன புரிமபாடோ²யேவ ஸுந்த³ரதரோ.

இதா³னி ச²ன்னம் வண்ணானந்தி கோ ஸம்ப³ந்தோ⁴? ஹேட்டா² ‘‘உபரிமகாயதோ’’திஆதீ³ஹி அனேகேஹி ஸரீராவயவா வுத்தா. தேன ஸரீராவயவஸம்ப³ந்தோ⁴ பவத்ததீதி வசனஸம்ப³ந்தே⁴ன ச யமகபாடிஹீராதி⁴காரேன ச ச²ன்னம் வண்ணானம் ஸரீராவயவபூ⁴தானம் ரஸ்மியோ யமகா ஹுத்வா பவத்தந்தீதி வுத்தம் ஹோதி. ஸாமிவசனஸம்ப³ந்தே⁴ன ச அவஸ்ஸம் ‘‘ரஸ்மியோ’’தி பாட²ஸேஸோ இச்சி²தப்³போ³யேவ. நீலானந்தி உமாபுப்ப²வண்ணானம். பீதகானந்தி கணிகாரபுப்ப²வண்ணானம். லோஹிதகானந்தி இந்த³கோ³பகவண்ணானம். ஓதா³தானந்தி ஓஸதி⁴தாரகவண்ணானம். மஞ்ஜிட்டா²னந்தி மந்த³ரத்தவண்ணானம். பப⁴ஸ்ஸரானந்தி பபா⁴ஸனபகதிகானம் பப⁴ஸ்ஸரவண்ணானம். பப⁴ஸ்ஸரவண்ணே விஸும் அவிஜ்ஜமானேபி வுத்தேஸு பஞ்சஸு வண்ணேஸு யே யே பபா⁴ ஸமுஜ்ஜலா, தே தே பப⁴ஸ்ஸரா. ததா² ஹி ததா²க³தஸ்ஸ யமகபாடிஹீரம் கரோந்தஸ்ஸ யமகபாடிஹீரஞாணப³லேனேவ கேஸமஸ்ஸூனஞ்சேவ அக்கீ²னஞ்ச நீலட்டா²னேஹி நீலரஸ்மியோ நிக்க²மந்தி, யாஸம் வஸேன க³க³னதலம் அஞ்ஜனசுண்ணஸமோகிண்ணம் விய உமாபுப்ப²னீலுப்பலத³லஸஞ்ச²ன்னம் விய வீதிபதந்தமணிதாலவண்டம் விய பஸாரிதமேசகபடம் விய ச ஹோதி. ச²விதோ சேவ அக்கீ²னஞ்ச பீதகட்டா²னேஹி பீதரஸ்மியோ நிக்க²மந்தி, யாஸம் வஸேன தி³ஸாபா⁴கா³ ஸுவண்ணரஸனிஸிஞ்சமானா விய ஸுவண்ணபடபஸாரிதா விய குங்குமசுண்ணகணிகாரபுப்ப²ஸம்பரிகிண்ணா விய ச விரோசந்தி. மம்ஸலோஹிதேஹி சேவ அக்கீ²னஞ்ச ரத்தட்டா²னேஹி லோஹிதரஸ்மியோ நிக்க²மந்தி, யாஸம் வஸேன தி³ஸாபா⁴கா³ சினபிட்ட²சுண்ணரஞ்ஜிதா விய ஸுபக்கலாகா²ரஸனிஸிஞ்சமானா விய ரத்தகம்ப³லபரிக்கி²த்தா விய ஜயஸுமனபாலிப⁴த்³த³கப³ந்து⁴ஜீவககுஸுமஸம்பரிகிண்ணா விய ச விரோசந்தி. அட்டீ²ஹி சேவ த³ந்தேஹி ச அக்கீ²னஞ்ச ஸேதட்டா²னேஹி ஓதா³தரஸ்மியோ நிக்க²மந்தி, யாஸம் வஸேன தி³ஸாபா⁴கா³ ரஜதகுடேஹி ஆஸிஞ்சமானகீ²ரதா⁴ராஸம்பரிகிண்ணா விய பஸாரிதரஜதபட்டவிதானா விய வீதிபதந்தரஜததாலவண்டா விய குந்த³குமுத³ஸிந்து³வாரஸுமனமல்லிகாதி³குஸுமஸஞ்ச²ன்னா விய ச விரோசந்தி. ஹத்த²தலபாத³தலாதீ³ஹி மந்த³ரத்தட்டா²னேஹி மஞ்ஜிட்ட²ரஸ்மியோ நிக்க²மந்தி, யாஸம் வஸேன தி³ஸாபா⁴கா³ பவாளஜாலபரிக்கி²த்தா விய ரத்தகுரவககுஸுமஸமோகிண்ணா விய ச விரோசந்தி. உண்ணானகா²தீ³ஹி பப⁴ஸ்ஸரட்டா²னேஹி பப⁴ஸ்ஸரரஸ்மியோ நிக்க²மந்தி, யாஸம் வஸேன தி³ஸாபா⁴கா³ ஓஸதி⁴தாரகபுஞ்ஜபுண்ணா விய விஜ்ஜுபடலாதி³பரிபுண்ணா விய ச விரோசந்தி.

ப⁴க³வா சங்கமதீதிஆதி³ ‘‘ப⁴க³வதோ ச நிம்மிதானஞ்ச நானாஇரியாபத²கரணம் யமகபாடிஹீரேனேவ ஹோதீ’’தி த³ஸ்ஸனத்த²ம் வுத்தம். தேஸஞ்ஹி நிம்மிதானம் இரியாபதா² யுக³லாவ ஹுத்வா வத்தந்தி. யதி³ நிம்மிதா ப³ஹுகா ஹோந்தி, ‘‘நிம்மிதோ’’திஆதி³ கஸ்மா ஏகவசனம் கதந்தி சே? நிம்மிதேஸுபி ஏகேகஸ்ஸ நானாஇரியாபத²பா⁴வத³ஸ்ஸனத்த²ம். ப³ஹுவசனேன ஹி வுத்தே ஸப்³பே³பி நிம்மிதா ஸகிம் ஏகேகஇரியாபதி²கா விய ஹோந்தி. ஏகவசனேன பன வுத்தே நிம்மிதேஸு ஏகேகோ நானாஇரியாபதி²கோதி ஞாயதி. தஸ்மா ஏகவசனனித்³தே³ஸோ கதோ. சூளபந்த²கத்தே²ரோபி தாவ நானாஇரியாபதி²கபி⁴க்கூ²னம் ஸஹஸ்ஸம் மாபேஸி, கிம் பன ப⁴க³வா யமகபாடிஹீரே ப³ஹூ நிம்மிதே ந கரிஸ்ஸதி. சூளபந்த²கத்தே²ரம் முஞ்சித்வா அஞ்ஞேஸம் ஸாவகானம் ஏகாவஜ்ஜனேன நானாஇரியபதி²கானம் நானாரூபானஞ்ச நிம்மானம் ந இஜ்ஜ²தி. அனியமேத்வா ஹி நிம்மிதா இத்³தி⁴மதா ஸதி³ஸாவ ஹோந்தி. டா²னனிஸஜ்ஜாதீ³ஸு வா பா⁴ஸிததுண்ஹீபா⁴வாதீ³ஸு வா யம் யம் இத்³தி⁴மா கரோதி, தம் ததே³வ கரோந்தி, விஸதி³ஸகரணம் நானாகிரியாகரணஞ்ச ‘‘ஏத்தகா ஈதி³ஸா ஹோந்து, ஏத்தகா இமம் நாம கரோந்தூ’’தி விஸும் விஸும் ஆவஜ்ஜித்வா அதி⁴ட்டா²னேன இஜ்ஜ²தி. ததா²க³தஸ்ஸ பன ஏகாவஜ்ஜனாதி⁴ட்டா²னேனேவ நானப்பகாரனிம்மானம் இஜ்ஜ²தி. ஏவமேவ அக்³கி³க்க²ந்த⁴உத³கதா⁴ரானிம்மானே ச நானாவண்ணனிம்மானே ச வேதி³தப்³ப³ம். தத்த² ப⁴க³வா சங்கமதீதி ஆகாஸே வா பத²வியம் வா சங்கமதி. நிம்மிதோதி இத்³தி⁴யா மாபிதபு³த்³த⁴ரூபம். திட்ட²தி வாதிஆதீ³னிபி ஆகாஸே வா பத²வியம் வா. கப்பேதீதி கரோதி. ப⁴க³வா திட்ட²தீதிஆதீ³ஸுபி ஏஸேவ நயோதி.

யமகபாடிஹீரஞாணனித்³தே³ஸவண்ணனா நிட்டி²தா.