2. புக்³க³லவிஸேஸனித்³தே³ஸவண்ணனா

8. த்³வே புக்³க³லாதிஆதீ³ஹி படிஸம்பி⁴த³ப்பத்தபுக்³க³லவிஸேஸபடிபாடிம் த³ஸ்ஸேதி. தத்த² புப்³ப³யோகோ³தி அதீதஜாதீஸு படிஸம்பி⁴த³ப்பத்திஹேதுபூ⁴தோ புஞ்ஞபயோகோ³. தேனாதி தேன புப்³ப³யோக³காரணேன. ஏவம் ஸேஸேஸுபி. அதிரேகோ ஹோதீதி அதிரித்தோ ஹோதி, அதிரேகயோக³தோ வா ‘‘அதிரேகோ’’தி வுத்தோ. அதி⁴கோ ஹோதீதி அக்³கோ³ ஹோதி. விஸேஸோ ஹோதீதி விஸிட்டோ² ஹோதி, விஸேஸயோக³தோ வா விஸேஸோ. ஞாணம் பபி⁴ஜ்ஜதீதி படிஸம்பி⁴தா³ஞாணப்பபே⁴த³ம் பாபுணாதி.

ப³ஹுஸ்ஸுதோதி பு³த்³த⁴வசனவஸேன. தே³ஸனாப³ஹுலோதி த⁴ம்மதே³ஸனாவஸேன. க³ரூபனிஸ்ஸிதோதி பஞ்ஞாய அதி⁴கம் க³ரும் உபனிஸ்ஸிதோ. விஹாரப³ஹுலோதி விபஸ்ஸனாவிஹாரப³ஹுலோ, ப²லஸமாபத்திவிஹாரப³ஹுலோ வா. பச்சவேக்க²ணாப³ஹுலோதி விபஸ்ஸனாவிஹாரே ஸதி விபஸ்ஸனாபச்சவேக்க²ணாப³ஹுலோ, ப²லஸமாபத்திவிஹாரே ஸதி ப²லஸமாபத்திபச்சவேக்க²ணாப³ஹுலோ. ஸேக²படிஸம்பி⁴த³ப்பத்தோதி ஸேகோ² ஹுத்வா படிஸம்பி⁴த³ப்பத்தோ. ஏவம் அஸேக²படிஸம்பி⁴த³ப்பத்தோ. ஸாவகபாரமிப்பத்தோதி ஏத்த² மஹாபஞ்ஞானம் அக்³க³ஸ்ஸ மஹாஸாவகஸ்ஸ ஸத்தஸட்டி²யா ஸாவகஞாணானம் பாரக³மனம் பாரமீ, ஸாவகஸ்ஸ பாரமீ ஸாவகபாரமீ, தம் ஸாவகபாரமிம் பத்தோதி ஸாவகபாரமிப்பத்தோ. ஸாவகபாரமிதாப்பத்தோதி வா பாடோ². ஸத்தஸட்டி²யா ஸாவகஞாணானம் பாலகோ பூரகோ ச ஸோ மஹாஸாவகோ பரமோ, தஸ்ஸ பரமஸ்ஸ அயம் ஸத்தஸட்டி²பே⁴தா³ ஞாணகிரியா பரமஸ்ஸ பா⁴வோ, கம்மம் வாதி பாரமீ, தஸ்ஸ ஸாவகஸ்ஸ பாரமீ ஸாவகபாரமீ, தம் பத்தோதி ஸாவகபாரமிப்பத்தோ. ஸாவகபாரமிப்பத்தோதி மஹாமோக்³க³ல்லானத்தே²ராதி³கோ யோ கோசி ஸாவகோ. ஸாவகபாரமிப்பத்தஸாவகதோ அதிரேகஸ்ஸ அஞ்ஞஸ்ஸ ஸாவகஸ்ஸ அபா⁴வா ஏகோ பச்சேகஸம்பு³த்³தோ⁴தி ஆஹ. புன பஞ்ஞாபபே⁴த³குஸலோதிஆதீ³ஹி வுத்தத்த²மேவ நிக³மேத்வா த³ஸ்ஸேஸீதி. ஞாணகதா²ய யேபு⁴ய்யேன அனேகானி ஞாணானி நித்³தி³ட்டா²னி. பஞ்ஞாகதா²ய யேபு⁴ய்யேன ஏகாபி பஞ்ஞா நானாகாரவஸேன நானாகத்வா வுத்தாதி அயம் விஸேஸோ.

மஹாபஞ்ஞாகதா²வண்ணனா நிட்டி²தா.