10. மண்ட³பேய்யகதா²

மண்ட³பேய்யகதா²வண்ணனா

238. இதா³னி தஸ்ஸ மக்³க³ஸ்ஸ மண்ட³பேய்யத்தம் த³ஸ்ஸேந்தேன கதி²தாய ப⁴க³வதோ வசனேகதே³ஸபுப்³ப³ங்க³மாய மண்ட³பேய்யகதா²ய அபுப்³ப³த்தா²னுவண்ணனா. தத்த² மண்ட³பேய்யந்தி யதா² ஸம்பன்னம் நிம்மலம் விப்பஸன்னம் ஸப்பி ஸப்பிமண்டோ³தி வுச்சதி, ஏவம் விப்பஸன்னட்டே²ன மண்டோ³, பாதப்³ப³ட்டே²ன பேய்யம். யஞ்ஹி பிவித்வா அந்தரவீதி²யம் பதிதா விஸஞ்ஞினோ அத்தனோ ஸாடகாதீ³னம்பி அஸ்ஸாமிகா ஹோந்தி, தம் பஸன்னம்பி ந பாதப்³ப³ம். மய்ஹம் பன இத³ம் ஸிக்க²த்தயஸங்க³ஹிதம் ஸாஸனப்³ரஹ்மசரியம் ஸம்பன்னத்தா நிம்மலத்தா விப்பஸன்னத்தா மண்ட³ஞ்ச ஹிதஸுகா²வஹத்தா பேய்யஞ்சாதி மண்ட³பேய்யந்தி தீ³பேதி. மண்டோ³ பேய்யோ ஏத்தா²தி மண்ட³பேய்யம். கிம் தம்? ஸாஸனப்³ரஹ்மசரியம். கஸ்மா ஸிக்க²த்தயம் ப்³ரஹ்மசரியம் நாம? உத்தமட்டே²ன நிப்³பா³னம் ப்³ரஹ்மம் நாம, ஸிக்க²த்தயம் நிப்³பா³னத்தா²ய பவத்தனதோ ப்³ரஹ்மத்தா²ய சரியாதி ப்³ரஹ்மசரியந்தி வுச்சதி. ஸாஸனப்³ரஹ்மசரியந்தி தம்யேவ. ஸத்தா² ஸம்முகீ²பூ⁴தோதி இத³மேத்த² காரணவசனம். யஸ்மா பன ஸத்தா² ஸம்முகீ²பூ⁴தோ, தஸ்மா வீரியபயோக³ம் கத்வா பிவதே²தம் மண்ட³ம். பா³ஹிரகஞ்ஹி பே⁴ஸஜ்ஜமண்ட³ம் வேஜ்ஜஸ்ஸ அஸம்முகா² பிவந்தானம் பமாணம் வா உக்³க³மனனிக்³க³மனம் வா ந ஜானாமாதி ஆஸங்கா ஹோதி. வேஜ்ஜஸ்ஸ ஸம்முகா² பன வேஜ்ஜோ ஜானிஸ்ஸதீதி நிராஸங்கா பிவந்தி. ஏவமேவம் அம்ஹாகஞ்ச த⁴ம்மஸ்ஸாமீ ஸத்தா² ஸம்முகீ²பூ⁴தோதி வீரியம் கத்வா பிவதா²தி மண்ட³பானே ஸன்னியோஜேதி. தி³ட்ட²த⁴ம்மிகஸம்பராயிகபரமத்தே²ஹி யதா²ரஹம் அனுஸாஸதீதி ஸத்தா². அபிச ‘‘ஸத்தா² ப⁴க³வா ஸத்த²வாஹோ’’திஆதி³னா (மஹானி. 190) நித்³தே³ஸனயேனபேத்த² அத்தோ² வேதி³தப்³போ³. ஸந்தி³ஸ்ஸமானோ முகோ² பூ⁴தோதி ஸம்முகீ²பூ⁴தோ.

மண்ட³பேய்யனித்³தே³ஸே தித⁴த்தமண்டோ³தி திதா⁴பா⁴வோ தித⁴த்தம். தித⁴த்தேன மண்டோ³ தித⁴த்தமண்டோ³, திவிதே⁴ன மண்டோ³தி அத்தோ². ஸத்த²ரி ஸம்முகீ²பூ⁴தேதி இத³ம் ஸப்³பா³காரபரிபுண்ணமண்ட³த்தயத³ஸ்ஸனத்த²ம் வுத்தம். பரினிப்³பு³தேபி பன ஸத்த²ரி ஏகதே³ஸேன மண்ட³த்தயம் பவத்ததியேவ. தேனேவ சஸ்ஸ நித்³தே³ஸே ‘‘ஸத்த²ரி ஸம்முகீ²பூ⁴தே’’தி அவத்வா கதமோ தே³ஸனாமண்டோ³திஆதி³ வுத்தந்தி வேதி³தப்³ப³ம்.

தே³ஸனாமண்டோ³தி த⁴ம்மதே³ஸனா ஏவ மண்டோ³. படிக்³க³ஹமண்டோ³தி தே³ஸனாபடிக்³கா³ஹகோ ஏவ மண்டோ³. ப்³ரஹ்மசரியமண்டோ³தி மக்³க³ப்³ரஹ்மசரியமேவ மண்டோ³.

ஆசிக்க²னாதி தே³ஸேதப்³பா³னம் ஸச்சாதீ³னம் இமானி நாமானீதி நாமவஸேன கத²னா. தே³ஸனாதி த³ஸ்ஸனா. பஞ்ஞாபனாதி ஜானாபனா, ஞாணமுகே² ட²பனா வா. ஆஸனம் ட²பேந்தோ ஹி ‘‘ஆஸனம் பஞ்ஞாபேதீ’’தி வுச்சதி. பட்ட²பனாதி பஞ்ஞாபனா, பவத்தனாதி அத்தோ², ஞாணமுகே² ட²பனா வா. விவரணாதி விவடகரணம், விவரித்வா த³ஸ்ஸனாதி அத்தோ². விப⁴ஜனாதி விபா⁴க³கிரியா, விபா⁴க³தோ த³ஸ்ஸனாதி அத்தோ². உத்தானீகம்மந்தி பாகடபா⁴வகரணம். அத² வா ஆசிக்க²னாதி தே³ஸனாதீ³னம் ச²ன்னம் பதா³னம் மூலபத³ம். தே³ஸனாதீ³னி ச² பதா³னி தஸ்ஸ அத்த²விவரணத்த²ம் வுத்தானி. தத்த² தே³ஸனாதி உக்³க⁴டிதஞ்ஞூனம் வஸேன ஸங்கே²பதோ பட²மம் உத்³தே³ஸவஸேன தே³ஸனா. உக்³க⁴டிதஞ்ஞூ ஹி ஸங்கே²பேன வுத்தம் பட²மம் வுத்தஞ்ச படிவிஜ்ஜ²ந்தி. பஞ்ஞாபனாதி விபஞ்சிதஞ்ஞூனம் வஸேன தேஸம் சித்ததோஸனேன பு³த்³தி⁴னிஸானேன ச பட²மம் ஸங்கி²த்தஸ்ஸ வித்தா²ரதோ நித்³தே³ஸவஸேன பஞ்ஞாபனா. பட்ட²பனாதி தேஸம்யேவ நித்³தி³ட்ட²ஸ்ஸ நித்³தே³ஸஸ்ஸ படினித்³தே³ஸவஸேன வித்தா²ரதரவசனேன பஞ்ஞாபனா. விவரணாதி நித்³தி³ட்ட²ஸ்ஸாபி புனப்புனம் வசனேன விவரணா. விப⁴ஜனாதி புனப்புனம் வுத்தஸ்ஸாபி விபா⁴க³கரணேன விப⁴ஜனா. உத்தானீகம்மந்தி விவடஸ்ஸ வித்தா²ரதரவசனேன, விப⁴த்தஸ்ஸ ச நித³ஸ்ஸனவசனேன உத்தானீகரணம். அயம் தே³ஸனா நேய்யானம்பி படிவேதா⁴ய ஹோதி. யேவாபனஞ்ஞேபி கேசீதி பியங்கரமாதாதி³கா வினிபாதிகா க³ஹிதா. விஞ்ஞாதாரோதி படிவேத⁴வஸேன லோகுத்தரத⁴ம்மம் விஞ்ஞாதாரோ. ஏதே ஹி பி⁴க்கு²ஆத³யோ படிவேத⁴வஸேன த⁴ம்மதே³ஸனம் படிக்³க³ண்ஹந்தீதி படிக்³க³ஹா. அயமேவாதிஆதீ³னி பட²மஞாணனித்³தே³ஸே வுத்தத்தா²னி. அரியமக்³கோ³ நிப்³பா³னேன ஸம்ஸந்த³னதோ ப்³ரஹ்மத்தா²ய சரியாதி ப்³ரஹ்மசரியந்தி வுச்சதி.

239. இதா³னி அதி⁴மோக்க²மண்டோ³திஆதீ³ஹி தஸ்மிம் மக்³க³க்க²ணே விஜ்ஜமானானி இந்த்³ரியப³லபோ³ஜ்ஜ²ங்க³மக்³க³ங்கா³னி மண்ட³பேய்யவிதா⁴னே யோஜேத்வா த³ஸ்ஸேதி. தத்த² அதி⁴மோக்க²மண்டோ³தி அதி⁴மோக்க²ஸங்கா²தோ மண்டோ³. கஸடோதி பஸாத³விரஹிதோ ஆவிலோ. ச²ட்³டே³த்வாதி ஸமுச்சே²த³வஸேன பஹாய. ஸத்³தி⁴ந்த்³ரியஸ்ஸ அதி⁴மோக்க²மண்ட³ம் பிவதீதி மண்ட³பேய்யந்தி ஸத்³தி⁴ந்த்³ரியதோ அதி⁴மோக்க²மண்ட³ஸ்ஸ அனஞ்ஞத்தேபி ஸதி அஞ்ஞம் விய கத்வா வோஹாரவஸேன வுச்சதி, யதா² லோகே நிஸத³போதகோ நிஸத³போதஸரீரஸ்ஸ அனஞ்ஞத்தேபி ஸதி நிஸத³போதஸ்ஸ ஸரீரந்தி வுச்சதி, யதா² ச பாளியம் ‘‘பு²ஸிதத்த’’ந்திஆதீ³ஸு த⁴ம்மதோ அனஞ்ஞோபி பா⁴வோ அஞ்ஞோ விய வுத்தோ, யதா² ச அட்ட²கதா²யம் ‘‘பு²ஸனலக்க²ணோ ப²ஸ்ஸோ’’திஆதீ³ஸு (த⁴. ஸ. அட்ட². 1 த⁴ம்முத்³தே³ஸவார ப²ஸ்ஸபஞ்சமகராஸிவண்ணனா) த⁴ம்மதோ அனஞ்ஞம்பி லக்க²ணம் அஞ்ஞம் விய வுத்தம், ஏவமித³ந்தி வேதி³தப்³ப³ம். பிவதீதி சேத்த² தம்ஸமங்கி³புக்³க³லோதி வுத்தம் ஹோதி. தம்ஸமங்கி³புக்³க³லோ தம் மண்ட³ம் பிவதீதி கத்வா தேன புக்³க³லேன ஸோ மண்டோ³ பாதப்³ப³தோ மண்ட³பேய்யம் நாம ஹோதீதி வுத்தம் ஹோதி. ‘‘மண்ட³பேய்யோ’’தி ச வத்தப்³பே³ ‘‘மண்ட³பேய்ய’’ந்தி லிங்க³விபல்லாஸோ கதோ. ஸேஸானம்பி இமினா நயேன அத்தோ² வேதி³தப்³போ³. அபுப்³பே³ஸு பன பரிளாஹோதி பீணனலக்க²ணாய பீதியா படிபக்கோ² கிலேஸஸந்தாபோ. து³ட்டு²ல்லந்தி உபஸமபடிபக்கோ² கிலேஸவஸேன ஓளாரிகபா⁴வோ அஸந்தபா⁴வோ. அப்படிஸங்கா²தி படிஸங்கா²னபடிபக்கோ² கிலேஸவஸேன அஸமவாஹிதபா⁴வோ.

240. புன அஞ்ஞேன பரியாயேன மண்ட³பேய்யவிதி⁴ம் நித்³தி³ஸிதுகாமோ அத்தி² மண்டோ³திஆதி³மாஹ. தத்த² தத்தா²தி தஸ்மிம் ஸத்³தி⁴ந்த்³ரியே. அத்த²ரஸோதிஆதீ³ஸு ஸத்³தி⁴ந்த்³ரியஸ்ஸ அதி⁴முச்சனம் அத்தோ², ஸத்³தி⁴ந்த்³ரியம் த⁴ம்மோ, ததே³வ நானாகிலேஸேஹி விமுத்தத்தா விமுத்தி, தஸ்ஸ அத்த²ஸ்ஸ ஸம்பத்தி அத்த²ரஸோ. தஸ்ஸ த⁴ம்மஸ்ஸ ஸம்பத்தி த⁴ம்மரஸோ. தஸ்ஸா விமுத்தியா ஸம்பத்தி விமுத்திரஸோ. அத² வா அத்த²படிலாப⁴ரதி அத்த²ரஸோ, த⁴ம்மபடிலாப⁴ரதி த⁴ம்மரஸோ, விமுத்திபடிலாப⁴ரதி விமுத்திரஸோ. ரதீதி ச தம்ஸம்பயுத்தா, ததா³ரம்மணா வா பீதி. இமினா நயேன ஸேஸபதே³ஸுபி அத்தோ² வேதி³தப்³போ³. இமஸ்மிம் பரியாயே மண்ட³ஸ்ஸ பேய்யம் மண்ட³பேய்யந்தி அத்தோ² வுத்தோ ஹோதி.

ஏவம் இந்த்³ரியாதி³போ³தி⁴பக்கி²யத⁴ம்மபடிபாடியா இந்த்³ரியப³லபோ³ஜ்ஜ²ங்க³மக்³க³ங்கா³னம் வஸேன மண்ட³பேய்யம் த³ஸ்ஸேத்வா புன அந்தே டி²தம் ப்³ரஹ்மசரியமண்ட³ம் த³ஸ்ஸேந்தோ மக்³க³ஸ்ஸ பதா⁴னத்தா மக்³க³ம் புப்³ப³ங்க³மம் கத்வா உப்படிபாடிவஸேன மக்³க³ங்க³போ³ஜ்ஜ²ங்க³ப³லஇந்த்³ரியானி த³ஸ்ஸேஸி. ஆதி⁴பதேய்யட்டே²ன இந்த்³ரியா மண்டோ³திஆத³யோ யதா²யோக³ம் லோகியலோகுத்தரா மண்டா³. தம் ஹேட்டா² வுத்தனயேன வேதி³தப்³ப³ம். தத²ட்டே²ன ஸச்சா மண்டோ³தி ஏத்த² பன து³க்க²ஸமுத³யானம் மண்ட³த்தாபா⁴வா மஹாஹத்தி²பத³ஸுத்தே (ம. நி. 1.300) விய ஸச்சஞாணானி ஸச்சாதி வுத்தந்தி வேதி³தப்³ப³ம்.

ஸத்³த⁴ம்மப்பகாஸினியா படிஸம்பி⁴தா³மக்³க³-அட்ட²கதா²ய

மண்ட³பேய்யகதா²வண்ணனா நிட்டி²தா.

நிட்டி²தா ச மஹாவக்³க³வண்ணனா.