9. மக்³க³கதா²

மக்³க³கதா²வண்ணனா

237. இதா³னி தேஸம் திண்ணம் விபல்லாஸானம் பஹானகரம் அரியமக்³க³ம் த³ஸ்ஸேந்தேன கதி²தாய மக்³க³கதா²ய அபுப்³ப³த்தா²னுவண்ணனா. தத்த² மக்³கோ³தி கேனட்டே²ன மக்³கோ³தி யோ பு³த்³த⁴ஸாஸனே மக்³கோ³தி வுச்சதி, ஸோ கேனட்டே²ன மக்³கோ³ நாம ஹோதீதி அத்தோ². மிச்சா²தி³ட்டி²யா பஹானாயாதிஆதீ³ஸு த³ஸஸு பரியாயேஸு பட²மோ பட²மோ தஸ்ஸ தஸ்ஸ மக்³க³ங்க³ஸ்ஸ உஜுவிபச்சனீகவஸேன வுத்தோ. மக்³கோ³ சேவ ஹேது சாதி தஸ்ஸ தஸ்ஸ கிச்சஸ்ஸ கரணாய படிபத³ட்டே²ன மக்³கோ³, ஸம்பாபகட்டே²ன ஹேது. தேன மக்³க³ஸ்ஸ படிபத³ட்டோ² ஸம்பாபகட்டோ² ச வுத்தோ ஹோதி. ‘‘அயம் மக்³கோ³ அயம் படிபதா³’’திஆதீ³ஸு (ஸம். நி. 5.5, 48) ஹி படிபதா³ மக்³கோ³, ‘‘மக்³க³ஸ்ஸ நிய்யானட்டோ² ஹேதுட்டோ²’’திஆதீ³ஸு (படி. ம. 2.8) ஸம்பாபகோ ஹேது. ஏவம் த்³வீஹி த்³வீஹி பதே³ஹி ‘‘மக்³கோ³தி கேனட்டே²ன மக்³கோ³’’தி புச்சா²ய விஸ்ஸஜ்ஜனம் கதம் ஹோதி. ஸஹஜாதானம் த⁴ம்மானம் உபத்த²ம்ப⁴னாயாதி அத்தனா ஸஹஜாதானம் அரூபத⁴ம்மானம் ஸஹஜாதஅஞ்ஞமஞ்ஞனிஸ்ஸயாதி³பா⁴வேன உபத்த²ம்ப⁴னபா⁴வாய. கிலேஸானம் பரியாதா³னாயாதி தம்தம்மக்³க³வஜ்ஜா²னம் வுத்தாவஸேஸகிலேஸானம் கே²பனாய. படிவேதா⁴தி³விஸோத⁴னாயாதி ஏத்த² யஸ்மா ‘‘கோ சாதி³ குஸலானம் த⁴ம்மானம், ஸீலஞ்ச ஸுவிஸுத்³த⁴ம் தி³ட்டி² ச உஜுகா’’தி (ஸம். நி. 5.369, 381) வசனதோ ஸீலஞ்ச தி³ட்டி² ச ஸச்சபடிவேத⁴ஸ்ஸ ஆதி³. ஸோ ச ஆதி³மக்³க³க்க²ணே விஸுஜ்ஜ²தி. தஸ்மா ‘‘படிவேதா⁴தி³விஸோத⁴னாயா’’தி வுத்தம். சித்தஸ்ஸ அதி⁴ட்டா²னாயாதி ஸம்பயுத்தசித்தஸ்ஸ ஸககிச்சே பதிட்டா²னாய. சித்தஸ்ஸ வோதா³னாயாதி சித்தஸ்ஸ பரிஸுத்³த⁴பா⁴வாய. விஸேஸாதி⁴க³மாயாதி லோகியதோ விஸேஸபடிலாபா⁴ய. உத்தரி படிவேதா⁴யாதி லோகியதோ உத்தரி படிவிஜ்ஜ²னத்தா²ய. ஸச்சாபி⁴ஸமயாயாதி சதுன்னம் ஸச்சானம் ஏகாபி⁴ஸமயாய கிச்சனிப்ப²த்திவஸேன ஏகபடிவேதா⁴ய. நிரோதே⁴ பதிட்டா²பனாயாதி சித்தஸ்ஸ வா புக்³க³லஸ்ஸ வா நிப்³பா³னே பதிட்டா²பனத்தா²ய. ஸகதா³கா³மிமக்³க³க்க²ணாதீ³ஸு அட்ட² மக்³க³ங்கா³னி ஏகதோ கத்வா தம்தம்மக்³க³வஜ்ஜ²கிலேஸப்பஹானம் வுத்தம். ஏவம் வசனே காரணம் ஹேட்டா² வுத்தமேவ. யஸ்மா உபரூபரிமக்³கே³னாபி ஸுட்டு² ஆதி³விஸோத⁴னா ஸுட்டு² சித்தவோதா³னஞ்ச ஹோதி, தஸ்மா தானிபி பதா³னி வுத்தானி.

த³ஸ்ஸனமக்³கோ³திஆதீ³ஹி யாவ பரியோஸானா தஸ்ஸ த⁴ம்மஸ்ஸ லக்க²ணவஸேன மக்³க³ட்டோ² வுத்தோ. தானி ஸப்³பா³னிபி பதா³னி அபி⁴ஞ்ஞேய்யனித்³தே³ஸே வுத்தத்தா²னேவ. ஏவமேத்த² யதா²ஸம்ப⁴வம் லோகியலோகுத்தரோ மக்³கோ³ நித்³தி³ட்டோ². ஹேதுட்டே²ன மக்³கோ³தி ச அட்ட²ங்கி³கோ மக்³கோ³ நித்³தி³ட்டோ². நிப்பரியாயமக்³க³த்தா சஸ்ஸ புன ‘‘மக்³கோ³’’தி ந வுத்தம். ஆதி⁴பதேய்யட்டே²ன இந்த்³ரியாதி ஆதீ³னி ச இந்த்³ரியாதீ³னம் அத்த²வஸேன வுத்தானி, ந மக்³க³ட்ட²வஸேன. ஸச்சானீதி சேத்த² ஸச்சஞாணானி. ஸப்³பே³பி தே த⁴ம்மா நிப்³பா³னஸ்ஸ படிபத³ட்டே²ன மக்³கோ³. அந்தே வுத்தம் நிப்³பா³னம் பன ஸம்ஸாரது³க்கா²பி⁴பூ⁴தேஹி து³க்க²னிஸ்ஸரணத்தி²கேஹி ஸப்புரிஸேஹி மக்³கீ³யதி க³வேஸீயதீதி மக்³கோ³தி வுத்தந்தி வேதி³தப்³ப³ந்தி.

மக்³க³கதா²வண்ணனா நிட்டி²தா.