7. ப⁴ங்கா³னுபஸ்ஸனாஞாணனித்³தே³ஸவண்ணனா

51. ஸோ உத³யப்³ப³யானுபஸ்ஸனாயம் டி²தோ யோகா³வசரோ மக்³கா³மக்³க³வவத்தா²பனேன உபக்கிலேஸவிமுத்தம் வீதி²படிபன்னம் உத³யப்³ப³யானுபஸ்ஸனாஞாணம் ‘‘மக்³கோ³’’தி ஞத்வா திலக்க²ணஸல்லக்க²ணேன தஸ்ஸேவ மக்³க³ஸ்ஸ ஸுவிஸத³கரணத்த²ம் புன உத³யப்³ப³யானுபஸ்ஸனம் ஆரபி⁴த்வா உத³யப்³ப³யேன பரிச்சி²ன்னே ஸங்கா²ரே அனிச்சாதி³தோ விபஸ்ஸதி. ஏவம் தஸ்ஸ தம் ஞாணம் திக்க²ம் ஹுத்வா வஹதி, ஸங்கா²ரா லஹும் உபட்ட²ஹந்தி, ஞாணே திக்கே² வஹந்தே ஸங்கா²ரேஸு லஹும் உபட்ட²ஹந்தேஸு உப்பாத³ம் அதிக்கமித்வா ப⁴ங்கே³ ஏவ ஸதி ஸந்திட்ட²தி. நிரோதா⁴தி⁴முத்தத்தா வா உத³யம் பஹாய ப⁴ங்கே³யேவ ஸதிம் உபட்ட²பேதி. ஏதஸ்மிம் டா²னே ப⁴ங்கா³னுபஸ்ஸனாஞாணம் உப்பஜ்ஜதி. இதா³னி தஸ்ஸ ஞாணஸ்ஸ நித்³தே³ஸே ரூபாரம்மணதா சித்தம் உப்பஜ்ஜித்வா பி⁴ஜ்ஜதீதி ரூபாரம்மணம் சித்தம் உப்பஜ்ஜித்வா பி⁴ஜ்ஜதி. அத² வா ரூபாரம்மணபா⁴வே சித்தம் உப்பஜ்ஜித்வா பி⁴ஜ்ஜதீதி அத்தோ². தம் ஆரம்மணம் படிஸங்கா²தி தம் ரூபாரம்மணம் படிஸங்கா²ய ஜானித்வா, க²யதோ வயதோ தி³ஸ்வாதி அத்தோ². தஸ்ஸ சித்தஸ்ஸ ப⁴ங்க³ம் அனுபஸ்ஸதீதி யேன சித்தேன தம் ரூபாரம்மணம் க²யதோ வயதோ தி³ட்ட²ம், தஸ்ஸ சித்தஸ்ஸ அபரேன சித்தேன ப⁴ங்க³ம் அனுபஸ்ஸதீதி அத்தோ². தேனாஹு போராணா – ‘‘ஞாதஞ்ச ஞாணஞ்ச உபோ⁴ விபஸ்ஸதீ’’தி. சித்தந்தி சேத்த² ஸஸம்பயுத்தசித்தம் அதி⁴ப்பேதம்.

அனுபஸ்ஸதீதி அனு அனு பஸ்ஸதி, அனேகேஹி ஆகாரேஹி புனப்புனம் பஸ்ஸதீதி அத்தோ². தேனாஹ அனுபஸ்ஸதீதி கத²ம் அனுபஸ்ஸதி, அனிச்சதோ அனுபஸ்ஸதீதிஆதி³. தத்த² யஸ்மா ப⁴ங்கோ³ நாம அனிச்சதாய பரமா கோடி, தஸ்மா ப⁴ங்கா³னுபஸ்ஸகோ யோகா³வசரோ ஸப்³ப³ம் ரூபக³தம் அனிச்சதோ அனுபஸ்ஸதி, நோ நிச்சதோ. ததோ அனிச்சஸ்ஸ து³க்க²த்தா, து³க்க²ஸ்ஸ ச அனத்தத்தா, ததே³வ து³க்க²தோ அனுபஸ்ஸதி, நோ ஸுக²தோ. அனத்ததோ அனுபஸ்ஸதி, நோ அத்ததோ. யஸ்மா பன யம் அனிச்சம் து³க்க²மனத்தா, ந தம் அபி⁴னந்தி³தப்³ப³ம். யஞ்ச ந அபி⁴னந்தி³தப்³ப³ம், ந தத்த² ரஜ்ஜிதப்³ப³ம். தஸ்மா ஏஸ தஸ்மிம் ப⁴ங்கா³னுபஸ்ஸனானுஸாரேன ‘‘அனிச்சம் து³க்க²மனத்தா’’தி தி³ட்டே² ரூபக³தே நிப்³பி³ந்த³தி, நோ நந்த³தி. விரஜ்ஜதி, நோ ரஜ்ஜதி. ஸோ ஏவம் விரஜ்ஜந்தோ லோகிகேனேவ தாவ ஞாணேன ராக³ம் நிரோதே⁴தி, நோ ஸமுதே³தி, ஸமுத³யம் ந கரோதீதி அத்தோ². அத² வா ஸோ ஏவம் விரத்தோ யதா² தி³ட்ட²ம் ரூபக³தம், ததா² அதி³ட்ட²ம்பி அன்வயஞாணவஸேன நிரோதே⁴தி, நோ ஸமுதே³தி. நிரோத⁴தோவ மனஸி கரோதி, நிரோத⁴மேவஸ்ஸ பஸ்ஸதி, நோ ஸமுத³யந்தி அத்தோ². ஸோ ஏவம் படிபன்னோ படினிஸ்ஸஜ்ஜதி, நோ ஆதி³யதி. கிம் வுத்தம் ஹோதி? அயம்பி ஹி அனிச்சாதி³அனுபஸ்ஸனா தத³ங்க³வஸேன ஸத்³தி⁴ம் க²ந்தா⁴பி⁴ஸங்கா²ரேஹி கிலேஸானம் பரிச்சஜனதோ, ஸங்க²ததோ³ஸத³ஸ்ஸனேன ச தப்³பி³பரீதே நிப்³பா³னே தன்னின்னதாய பக்க²ந்த³னதோ பரிச்சாக³படினிஸ்ஸக்³கோ³ சேவ பக்க²ந்த³னபடினிஸ்ஸக்³கோ³ சாதி வுச்சதி. தஸ்மா தாய ஸமன்னாக³தோ பி⁴க்கு² யதா²வுத்தேன நயேன கிலேஸே ச பரிச்சஜதி, நிப்³பா³னே ச பக்க²ந்த³தி. நாபி நிப்³ப³த்தனவஸேன கிலேஸே ஆதி³யதி, ந அதோ³ஸத³ஸ்ஸிதாவஸேன ஸங்க²தாரம்மணம். தேன வுச்சதி படினிஸ்ஸஜ்ஜதி, நோ ஆதி³யதீதி.

52. இதா³னிஸ்ஸ தேஹி ஞாணேஹி யேஸம் த⁴ம்மானம் பஹானம் ஹோதி, தம் த³ஸ்ஸேதும் அனிச்சதோ அனுபஸ்ஸந்தோ நிச்சஸஞ்ஞம் பஜஹதீதிஆதி³ வுத்தம். தத்த² நந்தி³ந்தி ஸப்பீதிகம் தண்ஹம். ராக³ந்தி ஸேஸம் தண்ஹம். ஸமுத³யந்தி ராக³ஸ்ஸ உப்பத்திம். அத² வா ரூபக³தஸ்ஸ உத³யம். ஆதா³னந்தி நிப்³ப³த்தனவஸேன கிலேஸானம் ஆதா³னம். வேத³னாரம்மணதாதிஆதீ³னி இத⁴ ச ஹேட்டா² ச வுத்தனயேனேவ வேதி³தப்³பா³னி.

கா³தா²ஸு பன வத்து²ஸங்கமனாதி ரூபாதீ³ஸு ஏகேகஸ்ஸ ப⁴ங்க³ம் தி³ஸ்வா புன யேன சித்தேன ப⁴ங்கோ³ தி³ட்டோ², தஸ்ஸாபி ப⁴ங்க³த³ஸ்ஸனவஸேன புரிமவத்து²தோ அஞ்ஞவத்து²ஸங்கமனா. பஞ்ஞாய ச விவட்டனாதி உத³யம் பஹாய வயே ஸந்திட்ட²னா. ஆவஜ்ஜனா ப³லஞ்சேவாதி ரூபாதீ³ஸு ஏகேகஸ்ஸ ப⁴ங்க³ம் தி³ஸ்வா புன ப⁴ங்கா³ரம்மணஸ்ஸ சித்தஸ்ஸ ப⁴ங்க³த³ஸ்ஸனத்த²ம் அனந்தரமேவ ஆவஜ்ஜனஸமத்த²தா. படிஸங்கா² விபஸ்ஸனாதி ஏஸா ஆரம்மணபடிஸங்கா² ப⁴ங்கா³னுபஸ்ஸனா நாம. ஆரம்மணஅன்வயேன உபோ⁴ ஏகவவத்த²னாதி பச்சக்க²தோ தி³ட்ட²ஸ்ஸ ஆரம்மணஸ்ஸ அன்வயேன அனுக³மனேன யதா² இத³ம், ததா² அதீதேபி ஸங்கா²ரக³தம் பி⁴ஜ்ஜி, அனாக³தேபி பி⁴ஜ்ஜிஸ்ஸதீதி ஏவம் உபி⁴ன்னம் ஏகஸபா⁴வேனேவ வவத்தா²பனந்தி அத்தோ². வுத்தம்பி சேதம் போராணேஹி –

‘‘ஸம்விஜ்ஜமானம்ஹி விஸுத்³த⁴த³ஸ்ஸனோ, தத³ன்வயம் நேதி அதீதனாக³தே;

ஸப்³பே³பி ஸங்கா²ரக³தா பலோகினோ, உஸ்ஸாவபி³ந்தூ³ ஸூரியேவ உக்³க³தே’’தி.

நிரோதே⁴ அதி⁴முத்ததாதி ஏவம் உபி⁴ன்னம் ப⁴ங்க³வஸேன ஏகவவத்தா²னம் கத்வா தஸ்மிம்யேவ ப⁴ங்க³ஸங்கா²தே நிரோதே⁴ அதி⁴முத்ததா தக்³க³ருதா தன்னின்னதா தப்போணதா தப்பப்³பா⁴ரதாதி அத்தோ². வயலக்க²ணவிபஸ்ஸனாதி ஏஸா வயலக்க²ணவிபஸ்ஸனா நாமாதி வுத்தம் ஹோதி. ஆரம்மணஞ்ச படிஸங்கா²தி புரிமஞ்ச ரூபாதி³ஆரம்மணம் ஜானித்வா. ப⁴ங்க³ஞ்ச அனுபஸ்ஸதீதி தஸ்ஸாரம்மணஸ்ஸ ப⁴ங்க³ம் தி³ஸ்வா ததா³ரம்மணஸ்ஸ சித்தஸ்ஸ ச ப⁴ங்க³ம் அனுபஸ்ஸதி. ஸுஞ்ஞதோ ச உபட்டா²னந்தி தஸ்ஸேவம் ப⁴ங்க³மனுபஸ்ஸதோ ‘‘ஸங்கா²ராவ பி⁴ஜ்ஜந்தி, தேஸம் பே⁴தோ³ மரணம், ந அஞ்ஞோ கோசி அத்தீ²’’தி ஸுஞ்ஞதோ உபட்டா²னம் இஜ்ஜ²தி. தேனாஹு போராணா –

‘‘க²ந்தா⁴ நிருஜ்ஜ²ந்தி ந சத்தி² அஞ்ஞோ, க²ந்தா⁴ன பே⁴தோ³ மரணந்தி வுச்சதி;

தேஸம் க²யம் பஸ்ஸதி அப்பமத்தோ, மணிம்வ விஜ்ஜ²ம் வஜிரேன யோனிஸோ’’தி.

அதி⁴பஞ்ஞா விபஸ்ஸனாதி யா ச ஆரம்மணபடிஸங்கா², யா ச ப⁴ங்கா³னுபஸ்ஸனா, யஞ்ச ஸுஞ்ஞதோ உபட்டா²னம், அயம் அதி⁴பஞ்ஞா விபஸ்ஸனா நாமாதி வுத்தம் ஹோதி. குஸலோ தீஸு அனுபஸ்ஸனாஸூதி அனிச்சானுபஸ்ஸனாதீ³ஸு தீஸு சே²கோ பி⁴க்கு². சதஸ்ஸோ ச விபஸ்ஸனாஸூதி நிப்³பி³தா³தீ³ஸு ச சதூஸு விபஸ்ஸனாஸு. தயோ உபட்டா²னே குஸலதாதி க²யதோ வயதோ ஸுஞ்ஞதோதி இமஸ்மிஞ்ச திவிதே⁴ உபட்டா²னே குஸலதாய. நானாதி³ட்டீ²ஸு ந கம்பதீதி ஸஸ்ஸததி³ட்டி²ஆதீ³ஸு நானப்பகாராஸு தி³ட்டீ²ஸு ந வேத⁴தி. ஸோ ஏவம் அவேத⁴மானோ ‘‘அனிருத்³த⁴மேவ நிருஜ்ஜ²தி, அபி⁴ன்னமேவ பி⁴ஜ்ஜதீ’’தி பவத்தமனஸிகாரோ து³ப்³ப³லபா⁴ஜனஸ்ஸ விய பி⁴ஜ்ஜமானஸ்ஸ, ஸுகு²மரஜஸ்ஸேவ விப்பகிரியமானஸ்ஸ, திலானம் விய ப⁴ஜ்ஜியமானானம் ஸப்³ப³ஸங்கா²ரானம் உப்பாத³ட்டி²திபவத்தனிமித்தம் விஸ்ஸஜ்ஜேத்வா பே⁴த³மேவ பஸ்ஸதி. ஸோ யதா² நாம சக்கு²மா புரிஸோ போக்க²ரணீதீரே வா நதீ³தீரே வா டி²தோ தூ²லபு²ஸிதகே தே³வே வஸ்ஸந்தே உத³கபிட்டே² மஹந்தமஹந்தானி உத³கபுப்³பு³ளானி உப்பஜ்ஜித்வா உப்பஜ்ஜித்வா ஸீக⁴ம் ஸீக⁴ம் பி⁴ஜ்ஜமானானி பஸ்ஸேய்ய, ஏவமேவ ஸப்³பே³ ஸங்கா²ரா பி⁴ஜ்ஜந்தி பி⁴ஜ்ஜந்தீதி பஸ்ஸதி. ஏவரூபஞ்ஹி யோகா³வசரம் ஸந்தா⁴ய வுத்தம் ப⁴க³வதா –

‘‘யதா² புப்³பு³ளகம் பஸ்ஸே, யதா² பஸ்ஸே மரீசிகம்;

ஏவம் லோகம் அவேக்க²ந்தம், மச்சுராஜா ந பஸ்ஸதீ’’தி. (த⁴. ப. 170);

தஸ்ஸேவம் ‘‘ஸப்³பே³ ஸங்கா²ரா பி⁴ஜ்ஜந்தி பி⁴ஜ்ஜந்தீ’’தி அபி⁴ண்ஹம் பஸ்ஸதோ அட்டா²னிஸம்ஸபரிவாரம் ப⁴ங்கா³னுபஸ்ஸனாஞாணம் ப³லப்பத்தம் ஹோதி. தத்ரிமே அட்டா²னிஸம்ஸா – ப⁴வதி³ட்டி²ப்பஹானம், ஜீவிதனிகந்திபரிச்சாகோ³, ஸதா³யுத்தபயுத்ததா, விஸுத்³தா⁴ஜீவிதா, உஸ்ஸுக்கப்பஹானம், விக³தப⁴யதா, க²ந்திஸோரச்சபடிலாபோ⁴, அரதிரதிஸஹனதாதி. தேனாஹு போராணா –

‘‘இமானி அட்ட²க்³கு³ணமுத்தமானி, தி³ஸ்வா தஹிம் ஸம்மஸதீ புனப்புனம்;

ஆதி³த்தசேலஸ்ஸிரஸூபமோ முனி, ப⁴ங்கா³னுபஸ்ஸீ அமதஸ்ஸ பத்தியா’’தி.

ப⁴ங்கா³னுபஸ்ஸனாஞாணனித்³தே³ஸவண்ணனா நிட்டி²தா.