8. ஆதீ³னவஞாணனித்³தே³ஸவண்ணனா

53. ஆதீ³னவஞாணனித்³தே³ஸே உப்பாதோ³தி புரிமகம்மபச்சயா இத⁴ உப்பத்தி. பவத்தந்தி ததா²உப்பன்னஸ்ஸ பவத்தி. நிமித்தந்தி ஸப்³ப³ம்பி ஸங்கா²ரனிமித்தம். ஆயூஹனாதி ஆயதிம் படிஸந்தி⁴ஹேதுபூ⁴தம் கம்மம். படிஸந்தீ⁴தி ஆயதிம் உப்பத்தி. க³தீதி யாய க³தியா ஸா படிஸந்தி⁴ ஹோதி. நிப்³ப³த்தீதி க²ந்தா⁴னம் நிப்³ப³த்தனம். உபபத்தீதி ‘‘ஸமாபன்னஸ்ஸ வா உபபன்னஸ்ஸ வா’’தி (த⁴. ஸ. 1289) ஏவம் வுத்தா விபாகப்பவத்தி. ஜாதீதி ஜராதீ³னம் பச்சயபூ⁴தா ப⁴வபச்சயா ஜாதி. நிப்பரியாயதோ தத்த² தத்த² நிப்³ப³த்தமானானம் ஸத்தானம் யே யே க²ந்தா⁴ பாதுப⁴வந்தி, தேஸம் பட²மபாதுபா⁴வோ ஜாதி. ஜராதி க²ண்டி³ச்சாதி³ஸம்மதோ ஸந்ததியம் ஏகப⁴வபரியாபன்னக²ந்த⁴ஸந்தானஸ்ஸ புராணபா⁴வோ. ஸோகோதி ஞாதிப்³யஸனாதீ³ஹி பு²ட்ட²ஸ்ஸ சித்தஸந்தாபோ. பரிதே³வோதி ஞாதிப்³யஸனாதீ³ஹி பு²ட்ட²ஸ்ஸ வசீபலாபோ. உபாயாஸோதி பு⁴ஸோ ஆயாஸோ, ஞாதிப்³யஸனாதீ³ஹி பு²ட்ட²ஸ்ஸ அதி⁴மத்தசேதோது³க்க²ப்பபா⁴விதோ தோ³ஸோயேவ. ஏத்த² ச உப்பாதா³த³யோ பஞ்சேவ ஆதீ³னவஞாணஸ்ஸ வத்து²வஸேன வுத்தா, ஸேஸா தேஸம் வேவசனவஸேன. ‘‘நிப்³ப³த்தி ஜாதீ’’தி இத³ஞ்ஹி த்³வயம் உப்பாத³ஸ்ஸ சேவ படிஸந்தி⁴யா ச வேவசனம், ‘‘க³தி உபபத்தீ’’தி இத³ம் த்³வயம் பவத்தஸ்ஸ, ஜராத³யோ நிமித்தஸ்ஸாதி. தேனாஹ –

‘‘உப்பாத³ஞ்ச பவத்தஞ்ச, நிமித்தம் து³க்க²ந்தி பஸ்ஸதி;

ஆயூஹனம் படிஸந்தி⁴ம், ஞாணம் ஆதீ³னவே இத³’’ந்தி. ச

‘‘இத³ம் ஆதீ³னவே ஞாணம், பஞ்சடா²னேஸு ஜாயதீ’’தி. ச

ஸப்³ப³பதே³ஸு ச ப⁴யந்தி இச்சேதஸ்ஸ வசனஸ்ஸ ப⁴யம் இதீதி பத³ச்சே²தோ³. ப⁴யந்தி பீளாயோக³தோ ஸப்படிப⁴யதாய ப⁴யம். இதீதி ப⁴யதுபட்டா²னஸ்ஸ காரணனித்³தே³ஸோ.

அனுப்பாதோ³ கே²மந்தி ஸந்திபதே³ ஞாணந்திஆதி³ பன ஆதீ³னவஞாணஸ்ஸ படிபக்க²ஞாணத³ஸ்ஸனத்த²ம் வுத்தம். ப⁴யதுபட்டா²னேன வா ஆதீ³னவம் தி³ஸ்வா உப்³பி³க்³க³ஹத³யானம் அப⁴யம்பி அத்தி² கே²மம் நிராதீ³னவந்தி அஸ்ஸாஸஜனனத்த²ம்பி ஏதம் வுத்தம். யஸ்மா வா யஸ்ஸ உப்பாதா³த³யோ ப⁴யதோ ஸூபட்டி²தா ஹோந்தி, தஸ்ஸ தப்படிபக்க²னின்னம் சித்தம் ஹோதி, தஸ்மா ப⁴யதுபட்டா²னவஸேன ஸித்³த⁴ஸ்ஸ ஆதீ³னவஞாணஸ்ஸ ஆனிஸம்ஸத³ஸ்ஸனத்த²ம்பேதம் வுத்தந்தி வேதி³தப்³ப³ம். அனுப்பாதோ³ அப்பவத்தந்திஆதி³ நிப்³பா³னமேவ. ஸந்திபதே³தி ஸந்திகோட்டா²ஸே, நிப்³பா³னேதி அத்தோ². அனுஸ்ஸவவஸேனாபி ஹி ஸந்திபத³ந்தி நாமமத்தம் க³ஹேத்வா உப்பன்னம் ஞாணம்பி ‘‘ஸந்திபதே³ ஞாண’’ந்தி வுத்தம்.

உப்பாதோ³ ப⁴யம், அனுப்பாதோ³ கே²மந்திஆதி³ விபக்க²படிபக்க²வஸேன உப⁴யம் ஸமாஸேத்வா உப்பஜ்ஜமானம் ஞாணம் க³ஹேத்வா வுத்தம். ஏத்த² ச யம் ப⁴யம், தம் யஸ்மா நியமதோ து³க்க²ம். யஞ்ச து³க்க²ம், தம் வட்டாமிஸலோகாமிஸகிலேஸாமிஸேஹி அவிப்பமுத்தத்தா ஸாமிஸமேவ. யஞ்ச ஸாமிஸம், தம் ஸங்கா²ரமத்தமேவ. தஸ்மா உப்பாதோ³ து³க்க²ந்தி ப⁴யதுபட்டா²னே பஞ்ஞா ஆதீ³னவே ஞாணந்திஆதி³ வுத்தம். ஏவம் ஸந்தேபி ப⁴யாகாரேன து³க்கா²காரேன ஸாமிஸாகாரேன ஸங்கா²ராகாரேனாதி ஏவம் ஆகாரனானத்ததோ பவத்திவஸேனேத்த² நானத்தம் வேதி³தப்³ப³ம். உப்பாதோ³ ப⁴யம், து³க்க²ம், ஸாமிஸம், ஸங்கா²ரா சாதி உப்பாதா³தி³லிங்க³மனபேக்கி²த்வா ‘‘நேதம் கோ² ஸரணம் கே²மம், நேதம் ஸரணமுத்தம’’ந்திஆதீ³ஸு (த⁴. ப. 189) விய அத்தனோ லிங்கா³பேக்க²மேவ வுத்தம். ஸங்கா²ராதி ச ஏகத்தமனபேக்கி²த்வா ‘‘அப்பச்சயா த⁴ம்மா, அஸங்க²தா த⁴ம்மா’’திஆதீ³ஸு (த⁴. ஸ. து³கமாதிகா 7-8) விய ப³ஹுவசனம் கதம், உப்பாதா³தீ³னம் வா ஸங்கா²ரேகதே³ஸத்தா ‘‘உத்தரே பஞ்சாலா, த³க்கி²ணே பஞ்சாலா’’திஆதீ³ஸு விய ப³ஹுன்னம் ஏகதே³ஸேபி ப³ஹுவசனம் கதந்தி வேதி³தப்³ப³ம். கே²மம் ஸுக²ம் நிராமிஸம் நிப்³பா³னந்தி நிப்³பா³னமேவ வுத்தாகாரானம் படிபக்க²வஸேன சதுதா⁴ வுத்தம். த³ஸ ஞாணே பஜானாதீதி ஆதீ³னவே ஞாணம் பஜானந்தோ உப்பாதா³தி³வத்து²கானி பஞ்ச, அனுப்பாதா³தி³வத்து²கானி பஞ்சாதி த³ஸ ஞாணே பஜானாதி படிவிஜ்ஜ²தி ஸச்சி²கரோதி. த்³வின்னம் ஞாணானம் குஸலதாதி ஆதீ³னவஞாணஸ்ஸ சேவ ஸந்திபத³ஞாணஸ்ஸ சாதி இமேஸம் த்³வின்னம் ஞாணானம் குஸலதாய. நானாதி³ட்டீ²ஸு ந கம்பதீதி பரமதி³ட்ட²த⁴ம்மனிப்³பா³னாதி³வஸேன பவத்தாஸு தி³ட்டீ²ஸு ந வேத⁴தீதி.

ஆதீ³னவஞாணனித்³தே³ஸவண்ணனா நிட்டி²தா.

9. ஸங்கா²ருபேக்கா²ஞாணனித்³தே³ஸவண்ணனா

54. ஸங்கா²ருபேக்கா²ஞாணனித்³தே³ஸே உப்பாதா³தீ³னி வுத்தத்தா²னேவ. து³க்க²ந்தி ப⁴யந்தி ஸாமிஸந்தி ஸங்கா²ராதி உப்பாதா³தி³முஞ்சனஞாணஸ்ஸ காரணவசனானி. ஏவஞ்ச லக்க²ணதோ ஸங்கா²ருபேக்க²ம் த³ஸ்ஸேத்வா இதா³னி அத்த²தோ த³ஸ்ஸேதும் உப்பாதோ³ ஸங்கா²ரா, தே ஸங்கா²ரே அஜ்ஜு²பேக்க²தீதி ஸங்கா²ருபேக்கா²திஆதி³மாஹ. தத்த² ஸங்கா²ரே அஜ்ஜு²பேக்க²தீதி தஸ்ஸ ஆரத்³த⁴விபஸ்ஸகஸ்ஸ விபஸ்ஸனாஞாணேன லக்க²ணத்தயஸ்ஸ தி³ட்ட²த்தா லக்க²ணவிசினனே பஹீனப்³யாபாரஸ்ஸ ஆதி³த்தே விய தயோ ப⁴வே பஸ்ஸதோ ஸங்கா²ரக்³க³ஹணே மஜ்ஜ²த்தஸ்ஸ தம் விபஸ்ஸனாஞாணம் தே ஸங்கா²ரே விஸேஸேன ச இக்க²தி, க³ஹணேன வஜ்ஜிதஞ்ச ஹுத்வா இக்க²தி ஓலோகேதீதி ஸங்கா²ருபேக்கா² நாமாதி அத்தோ². யதா² லோகே விஸேஸேன ஜயந்தோ அதி⁴ஜயதீதி, அன்னேன வஜ்ஜிதோ வஸந்தோ உபவஸதீதி வுச்சதி. புன ஸங்கா²ரே அனிச்சாதி³தோ விபஸ்ஸித்வா க³ஹணே மஜ்ஜ²த்தபா⁴வஸண்டி²தம் ஸங்கா²ருபேக்க²ம்பி அனிச்சாதி³தோ விபஸ்ஸித்வா தஸ்ஸாபி ஸங்கா²ருபேக்கா²ய க³ஹணே மஜ்ஜ²த்தாகாரஸண்டி²தாய ஸங்கா²ருபேக்கா²ய ஸப்³பா⁴வதோ யே ச ஸங்கா²ரா யா ச உபேக்கா²திஆதி³ வுத்தம்.

55. இதா³னி ஸங்கா²ருபேக்கா²ய சித்தாபி⁴னீஹாரபே⁴த³ம் த³ஸ்ஸேதும் கதிஹாகாரேஹீதிஆதி³மாஹ. தத்த² ஸங்கா²ருபேக்கா²யாதி பு⁴ம்மவசனம். சித்தஸ்ஸ அபி⁴னீஹாரோதி ஸங்கா²ருபேக்கா²லாபி⁴னோ ததோ அஞ்ஞஸ்ஸ சித்தஸ்ஸ ஸங்கா²ருபேக்கா²பி⁴முக²ம் கத்வா பு⁴ஸம் ஹரணம். அபி⁴முக²த்தோ² ஹி ஏத்த² அபி⁴ஸத்³தோ³, பு⁴ஸத்தோ² நீஸத்³தோ³. கதிஹாகாரேஹீதி புச்சி²தம் புச்ச²ம் அட்ட²ஹாகாரேஹீதி விஸ்ஸஜ்ஜேத்வா து³தியபுச்சா²விஸ்ஸஜ்ஜனேனேவ தே அட்டா²காரே த³ஸ்ஸேதுகாமோ தே அத³ஸ்ஸேத்வாவ புது²ஜ்ஜனஸ்ஸ கதிஹாகாரேஹீதிஆதி³ புச்ச²ம் அகாஸி. புது²ஜ்ஜனஸ்ஸாதி ஏத்த² பன –

து³வே புது²ஜ்ஜனா வுத்தா, பு³த்³தே⁴னாதி³ச்சப³ந்து⁴னா;

அந்தோ⁴ புது²ஜ்ஜனோ ஏகோ, கல்யாணேகோ புது²ஜ்ஜனோதி.

தத்த² யஸ்ஸ க²ந்த⁴தா⁴துஆயதனாதீ³ஸு உக்³க³ஹபரிபுச்சா²ஸவனதா⁴ரணபச்சவேக்க²ணாதீ³னி நத்தி², அயம் அந்த⁴புது²ஜ்ஜனோ. யஸ்ஸ தானி அத்தி², ஸோ கல்யாணபுது²ஜ்ஜனோ. து³விதோ⁴பி பனேஸ –

புதூ²னம் ஜனனாதீ³ஹி, காரணேஹி புது²ஜ்ஜனோ;

புது²ஜ்ஜனந்தோக³த⁴த்தா, புது²வாயம் ஜனோ இதி.

ஸோ ஹி புதூ²னம் நானப்பகாரானம் கிலேஸாதீ³னம் ஜனனாதீ³ஹி காரணேஹி புது²ஜ்ஜனோ. யதா²ஹ – ‘‘புது² கிலேஸே ஜனேந்தீதி புது²ஜ்ஜனா, புது² அவிஹதஸக்காயதி³ட்டி²காதி புது²ஜ்ஜனா, புது² ஸத்தா²ரானம் முகு²ல்லோகிகாதி புது²ஜ்ஜனா, புது² ஸப்³ப³க³தீஹி அவுட்டி²தாதி புது²ஜ்ஜனா, புது² நானாபி⁴ஸங்கா²ரே அபி⁴ஸங்க²ரோந்தீதி புது²ஜ்ஜனா, புது² நானாஓகே⁴ஹி வுய்ஹந்தீதி புது²ஜ்ஜனா, புது² நானாஸந்தாபேஹி ஸந்தப்பேந்தீதி புது²ஜ்ஜனா, புது² நானாபரிளாஹேஹி பரிட³ய்ஹந்தீதி புது²ஜ்ஜனா, புது² பஞ்சஸு காமகு³ணேஸு ரத்தா கி³த்³தா⁴ க³தி⁴தா முச்சி²தா அஜ்ஜோ²ஸன்னா லக்³கா³ லக்³கி³தா பலிபு³த்³தா⁴தி புது²ஜ்ஜனா, புது² பஞ்சஹி நீவரணேஹி ஆவுதா நிவுதா ஓவுதா பிஹிதா படிச்ச²ன்னா படிகுஜ்ஜிதாதி புது²ஜ்ஜனா’’தி (மஹானி. 94). புதூ²னம் வா க³ணனபதா²தீதானம் அரியத⁴ம்மபரம்முகா²னம் நீசத⁴ம்மஸமாசாரானம் ஜனானம் அந்தோக³த⁴த்தாபி புது²ஜ்ஜனா, புது² வா அயம் விஸும்யேவ ஸங்க²ம் க³தோ, விஸம்ஸட்டோ² ஸீலஸுதாதி³கு³ணயுத்தேஹி அரியேஹி ஜனோதிபி புது²ஜ்ஜனோ. தேஸு கல்யாணபுது²ஜ்ஜனோ இதா⁴தி⁴ப்பேதோ இதரஸ்ஸ பா⁴வனாய ஏவ அபா⁴வா.

ஸேக்க²ஸ்ஸாதி ஏத்த² ஸத்த ஸேக்கா² ஸோதாபத்திமக்³க³ப²லஸகதா³கா³மிமக்³க³ப²லஅனாகா³மிமக்³க³ப²லஅரஹத்தமக்³க³ட்டா². தே ஹி திஸ்ஸோ ஸிக்கா² ஸிக்க²ந்தீதி ஸேக்கா². தேஸு ஸோதாபத்திஸகதா³கா³மிஅனாகா³மிப²லட்டா² தயோ இதா⁴தி⁴ப்பேதா மக்³க³ட்டா²னம் ஸங்கா²ருபேக்கா²ய சித்தாபி⁴னீஹாராபா⁴வா.

வீதராக³ஸ்ஸாதி ஏத்த² ஸமுச்சே²த³விக³மேன விக³தோ ராகோ³ அஸ்ஸாதி வீதராகோ³. அரஹதோ ஏதம் அதி⁴வசனம். தீஸுபி பதே³ஸு ஜாதிக்³க³ஹணேன ஏகவசனம் கதம்.

ஸங்கா²ருபேக்க²ம் அபி⁴னந்த³தீதி தஸ்மிம் உபேக்கா²விஹாரே பா²ஸுவிஹாரஸஞ்ஞம் படிலபி⁴த்வா பா²ஸுவிஹாரனிகந்தியா ஸங்கா²ருபேக்கா²பி⁴முகோ² ஹுத்வா நந்த³தி, ஸப்பீதிகம் தண்ஹம் உப்பாதே³தீதி அத்தோ². விபஸ்ஸதீதி ஸோதாபத்திமக்³க³படிலாப⁴த்த²ம் அனிச்சாதி³வஸேன விவிதா⁴ பஸ்ஸதி, ஸேக்கோ² உபரிமக்³க³த்த²ம், வீதராகோ³ தி³ட்ட²த⁴ம்மஸுக²விஹாரத்த²ம் விபஸ்ஸதி. படிஸங்கா²யாதி அனிச்சாதி³வஸேனேவ உபபரிக்கி²த்வா. யஸ்மா பன ஸோதாபன்னாத³யோ அரியா ஸகம் ஸகம் ப²லஸமாபத்திம் ஸமாபஜ்ஜமானா உத³யப்³ப³யஞாணாதீ³ஹி நவஹி விபஸ்ஸனாஞாணேஹி அவிபஸ்ஸித்வா ஸமாபஜ்ஜிதும் ந ஸக்கோந்தி, தஸ்மா படிஸங்கா²ய வா ப²லஸமாபத்திம் ஸமாபஜ்ஜதீதி வுத்தம்.

ப²லஸமாபத்தியா பவத்தித³ஸ்ஸனத்த²ம் பன தேஸம் இத³ம் பஞ்ஹகம்மம் – கா ப²லஸமாபத்தி? கே தம் ஸமாபஜ்ஜந்தி? கே ந ஸமாபஜ்ஜந்தி? கஸ்மா ஸமாபஜ்ஜந்தி? கத²ஞ்சஸ்ஸா ஸமாபஜ்ஜனம் ஹோதி? கத²ம் டா²னம்? கத²ம் வுட்டா²னம்? கிம் ப²லஸ்ஸ அனந்தரம்? கஸ்ஸ ச ப²லம் அனந்தரந்தி?

தத்த² கா ப²லஸமாபத்தீதி? யா அரியப²லஸ்ஸ நிரோதே⁴ அப்பனா.

கே தம் ஸமாபஜ்ஜந்தி? கே ந ஸமாபஜ்ஜந்தீதி? ஸப்³பே³பி புது²ஜ்ஜனா ந ஸமாபஜ்ஜந்தி. கஸ்மா? அனதி⁴க³தத்தா. அரியா பன ஸப்³பே³பி ஸமாபஜ்ஜந்தி. கஸ்மா? அதி⁴க³தத்தா. உபரிமா பன ஹேட்டி²மம் ந ஸமாபஜ்ஜந்தி புக்³க³லந்தரபா⁴வூபக³மனேன படிப்பஸ்ஸத்³த⁴த்தா, ஹேட்டி²மா ச உபரிமம் அனதி⁴க³தத்தா. அத்தனோ அத்தனோயேவ பன ப²லம் ஸப்³பே³பி ஸமாபஜ்ஜந்தீதி இத³மேத்த² ஸன்னிட்டா²னம்.

கேசி பன ‘‘ஸோதாபன்னஸகதா³கா³மினோபி ந ஸமாபஜ்ஜந்தி, உபரிமா த்³வேயேவ ஸமாபஜ்ஜந்தீ’’தி வத³ந்தி. இத³ஞ்ச நேஸம் காரணம் – ஏதே ஹி ஸமாதி⁴ஸ்மிம் பரிபூரகாரினோதி. தம் புது²ஜ்ஜனஸ்ஸாபி அத்தனா படிலத்³த⁴ம் லோகியஸமாதி⁴ம் ஸமாபஜ்ஜனதோ அகாரணமேவ. கிஞ்சேத்த² காரணாகாரணசிந்தாய. நனு இதே⁴வ பாளியம் ‘‘கதமே த³ஸ ஸங்கா²ருபேக்கா² விபஸ்ஸனாவஸேன உப்பஜ்ஜந்தி, கதமே த³ஸ கோ³த்ரபு⁴த⁴ம்மா விபஸ்ஸனாவஸேன உப்பஜ்ஜந்தீ’’தி (படி. ம. 1.60) இமேஸம் பஞ்ஹானம் விஸ்ஸஜ்ஜனே ‘‘ஸோதாபத்திப²லஸமாபத்தத்தா²ய ஸகதா³கா³மிப²லஸமாபத்தத்தா²யா’’தி (படி. ம. 1.60) விஸும் விஸும் வுத்தா. தஸ்மா ஸப்³பே³பி அரியா அத்தனோ அத்தனோ ப²லம் ஸமாபஜ்ஜந்தீதி நிட்ட²மேத்த² க³ந்தப்³ப³ம்.

கஸ்மா ஸமாபஜ்ஜந்தீதி? தி³ட்ட²த⁴ம்மஸுக²விஹாரத்த²ம். யதா² ஹி ராஜானோ ரஜ்ஜஸுக²ம், தே³வதா தி³ப்³ப³ஸுக²மனுப⁴வந்தி, ஏவம் அரியா ‘‘லோகுத்தரஸுக²ம் அனுப⁴விஸ்ஸாமா’’தி அத்³தா⁴னபரிச்சே²த³ம் கத்வா இச்சி²திச்சி²தக்க²ணே ப²லஸமாபத்திம் ஸமாபஜ்ஜந்தி.

கத²ஞ்சஸ்ஸா ஸமாபஜ்ஜனம் ஹோதி, கத²ம் டா²னம், கத²ம் வுட்டா²னந்தி? த்³வீஹி தாவ ஆகாரேஹி அஸ்ஸா ஸமாபஜ்ஜனம் ஹோதி நிப்³பா³னதோ அஞ்ஞஸ்ஸ ஆரம்மணஸ்ஸ அமனஸிகாரா, நிப்³பா³னஸ்ஸ ச மனஸிகாரா. யதா²ஹ – ‘‘த்³வே கோ², ஆவுஸோ, பச்சயா அனிமித்தாய சேதோவிமுத்தியா ஸமாபத்தியா ஸப்³ப³னிமித்தானஞ்ச அமனஸிகாரோ, அனிமித்தாய ச தா⁴துயா மனஸிகாரோ’’தி (ம. நி. 1.458). அயம் பனேத்த² ஸமாபஜ்ஜனக்கமோ – ப²லஸமாபத்தத்தி²கேன ஹி அரியஸாவகேன ரஹோக³தேன படிஸல்லீனேன உத³யப்³ப³யாதி³வஸேன ஸங்கா²ரா விபஸ்ஸிதப்³பா³. தஸ்ஸ பவத்தானுபுப்³ப³விபஸ்ஸனஸ்ஸ ஸங்கா²ராரம்மணகோ³த்ரபு⁴ஞாணானந்தரம் ப²லஸமாபத்திவஸேன நிரோதே⁴ சித்தம் அப்பேதி. ப²லஸமாபத்தினின்னதாய சேத்த² ஸேக்க²ஸ்ஸாபி ப²லமேவ உப்பஜ்ஜதி, ந மக்³கோ³. யே பன வத³ந்தி ‘‘ஸோதாபன்னோ ‘ப²லஸமாபத்திம் ஸமாபஜ்ஜிஸ்ஸாமீ’தி விபஸ்ஸனம் பட்ட²பேத்வா ஸகதா³கா³மீ ஹோதி, ஸகதா³கா³மீ ச அனாகா³மீ’’தி. தே வத்தப்³பா³ ‘‘ஏவம் ஸதி அனாகா³மீ அரஹா ப⁴விஸ்ஸதி, அரஹா பச்சேகபு³த்³தோ⁴, பச்சேகபு³த்³தோ⁴ ச பு³த்³தோ⁴’’தி.

தஸ்மா ந கிஞ்சி ஏதம், பாளிவஸேனேவ ச படிக்கி²த்தந்திபி ந க³ஹேதப்³ப³ம். இத³மேவ பன க³ஹேதப்³ப³ம். ஸேக்க²ஸ்ஸாபி ப²லமேவ உப்பஜ்ஜதி, ந மக்³கோ³. ப²லஞ்சஸ்ஸ ஸசே அனேன பட²மஜ்ஜா²னிகோ மக்³கோ³ அதி⁴க³தோ ஹோதி, பட²மஜ்ஜா²னிகமேவ உப்பஜ்ஜதி, ஸசே து³தியாதீ³ஸு அஞ்ஞதரஜ்ஜா²னிகோ, து³தியாதீ³ஸு அஞ்ஞதரஜ்ஜா²னிகமேவாதி ஏவம் தாவஸ்ஸா ஸமாபஜ்ஜனம் ஹோதி.

‘‘தயோ கோ², ஆவுஸோ, பச்சயா அனிமித்தாய சேதோவிமுத்தியா டி²தியா ஸப்³ப³னிமித்தானஞ்ச அமனஸிகாரோ, அனிமித்தாய ச தா⁴துயா மனஸிகாரோ, புப்³பே³ ச அபி⁴ஸங்கா²ரோ’’தி (ம. நி. 1.458) வசனதோ பனஸ்ஸா தீஹாகாரேஹி டா²னம் ஹோதி. தத்த² புப்³பே³ ச அபி⁴ஸங்கா²ரோதி ஸமாபத்திதோ புப்³பே³ காலபரிச்சே²தோ³. ‘‘அஸுகஸ்மிம் நாம காலே வுட்ட²ஹிஸ்ஸாமீ’’தி பரிச்சி²ன்னத்தா ஹிஸ்ஸா யாவ ஸோ காலோ நாக³ச்ச²தி, தாவ டா²னம் ஹோதி. ஏவமஸ்ஸ டா²னம் ஹோதி.

‘‘த்³வே கோ², ஆவுஸோ, பச்சயா அனிமித்தாய சேதோவிமுத்தியா வுட்டா²னாய ஸப்³ப³னிமித்தானஞ்ச மனஸிகாரோ, அனிமித்தாய ச தா⁴துயா அமனஸிகாரோ’’தி (ம. நி. 1.458) வசனதோ பனஸ்ஸா த்³வீஹாகாரேஹி வுட்டா²னம் ஹோதி. தத்த² ஸப்³ப³னிமித்தானந்தி ரூபனிமித்தவேத³னாஸஞ்ஞாஸங்கா²ரவிஞ்ஞாணனிமித்தானம். காமஞ்ச ந ஸப்³பா³னேவேதானி ஏகதோ மனஸி கரோதி, ஸப்³ப³ஸங்கா³ஹிகவஸேன பனேதம் வுத்தம். தஸ்மா யம் ப⁴வங்க³ஸ்ஸ ஆரம்மணம் ஹோதி, தம் மனஸிகரோதோ ப²லஸமாபத்திதோ வுட்டா²னம் ஹோதீதி ஏவமஸ்ஸா வுட்டா²னம் வேதி³தப்³ப³ம்.

கிம் ப²லஸ்ஸ அனந்தரம், கஸ்ஸ ச ப²லம் அனந்தரந்தி? ப²லஸ்ஸ தாவ ப²லமேவ வா அனந்தரம் ஹோதி ப⁴வங்க³ம் வா. ப²லம் பன அத்தி² மக்³கா³னந்தரம், அத்தி² ப²லானந்தரம், அத்தி² கோ³த்ரபு⁴அனந்தரம், அத்தி² நேவஸஞ்ஞானாஸஞ்ஞாயதனானந்தரந்தி. தத்த² மக்³க³வீதி²யம் மக்³கா³னந்தரம், புரிமஸ்ஸ புரிமஸ்ஸ பச்சி²மம் பச்சி²மம் ப²லானந்தரம், ப²லஸமாபத்தீஸு புரிமம் புரிமம் கோ³த்ரபு⁴அனந்தரம். கோ³த்ரபூ⁴தி சேத்த² அனுலோமம் வேதி³தப்³ப³ம். வுத்தஞ்ஹேதம் பட்டா²னே ‘‘அரஹதோ அனுலோமம் ப²லஸமாபத்தியா அனந்தரபச்சயேன பச்சயோ. ஸேக்கா²னம் அனுலோமம் ப²லஸமாபத்தியா அனந்தரபச்சயேன பச்சயோ’’தி (பட்டா². 1.1.417). யேன ப²லேன நிரோதா⁴ வுட்டா²னம் ஹோதி, தம் நேவஸஞ்ஞானாஸஞ்ஞாயதனானந்தரந்தி. தத்த² ட²பேத்வா மக்³க³வீதி²யம் உப்பன்னப²லம் அவஸேஸம் ஸப்³ப³ம் ப²லஸமாபத்திவஸேன பவத்தம் நாம. ஏவமேதம் மக்³க³வீதி²யம் வா ப²லஸமாபத்தியம் வா உப்பஜ்ஜனவஸேன –

‘‘படிப்பஸ்ஸத்³த⁴த³ரத²ம், அமதாரம்மணம் ஸுப⁴ம்;

வந்தலோகாமிஸம் ஸந்தம், ஸாமஞ்ஞப²லமுத்தம’’ந்தி.

அயமேத்த² ப²லஸமாபத்திகதா².

தத³ஜ்ஜு²பேக்கி²த்வாதி தம் ஸங்கா²ருபேக்க²ம் அஞ்ஞேன தாதி³ஸேனேவ விபஸ்ஸனாஞாணேன அஜ்ஜு²பேக்கி²த்வா. ஸுஞ்ஞதவிஹாரேன வாதிஆதீ³ஸு ப²லஸமாபத்திம் வினா விபஸ்ஸனாவிஹாரேனேவ விஹரிதுகாமஸ்ஸ அரஹதோ அத்தாபி⁴னிவேஸம் ப⁴யதோ தி³ஸ்வா ஸுஞ்ஞதாதி⁴முத்தஸ்ஸ ஸங்கா²ருபேக்கா²ய வயம் பஸ்ஸந்தஸ்ஸ விபஸ்ஸனத்தயவிஹாரோ ஸுஞ்ஞதவிஹாரோ நாம, ஸங்கா²ரனிமித்தம் ப⁴யதோ தி³ஸ்வா அனிமித்தாதி⁴முத்தஸ்ஸ ஸங்கா²ருபேக்கா²ய வயம் பஸ்ஸந்தஸ்ஸ விபஸ்ஸனத்தயவிஹாரோ அனிமித்தவிஹாரோ நாம, தண்ஹாபணிதி⁴ம் ப⁴யதோ தி³ஸ்வா அப்பணிஹிதாதி⁴முத்தஸ்ஸ ஸங்கா²ருபேக்கா²ய வயம் பஸ்ஸந்தஸ்ஸ விபஸ்ஸனத்தயவிஹாரோ அப்பணிஹிதவிஹாரோ நாம. ததா² ஹி பரதோ வுத்தம் –

‘‘அபி⁴னிவேஸம் ப⁴யதோ ஸம்பஸ்ஸமானோ ஸுஞ்ஞதே அதி⁴முத்தத்தா பு²ஸ்ஸ பு²ஸ்ஸ வயம் பஸ்ஸதி, ஸுஞ்ஞதோ விஹாரோ. நிமித்தம் ப⁴யதோ ஸம்பஸ்ஸமானோ அனிமித்தே அதி⁴முத்தத்தா பு²ஸ்ஸ பு²ஸ்ஸ வயம் பஸ்ஸதி, அனிமித்தோ விஹாரோ. பணிதி⁴ம் ப⁴யதோ ஸம்பஸ்ஸமானோ அப்பணிஹிதே அதி⁴முத்தத்தா பு²ஸ்ஸ பு²ஸ்ஸ வயம் பஸ்ஸதி, அப்பணிஹிதோ விஹாரோ’’தி (படி. ம. 1.78).

ச²ளங்கு³பேக்கா²ஸப்³பா⁴வேன ச படிகூலே அப்படிகூலஸஞ்ஞாதி³விஹாரஸப்³பா⁴வேன ச அரஹதோயேவ ஸப்³பா³காரேன சித்தம் வஸே வத்ததி, ததோ அயம் விபஸ்ஸனாவிஹாரோ அரஹதோயேவ இஜ்ஜ²தீதி வுத்தம் ஹோதி. வீதராகோ³ ஸங்கா²ருபேக்க²ம் விபஸ்ஸதி வாதி ஏத்த² பன திதா⁴ ச ப⁴யம், திதா⁴ ச அதி⁴முத்திம் அனாபஜ்ஜித்வா கேவலம் விபஸ்ஸனாதி வேதி³தப்³பா³. ஏவஞ்ஹி ஸதி புப்³பா³பரவிஸேஸோ ஹோதி.

56. இதா³னி த்³வின்னம் திண்ணம் புக்³க³லானம் வஸேன ஸங்கா²ருபேக்கா²ய ஏகத்தனானத்தபே⁴த³ம் த³ஸ்ஸேதுகாமோ கத²ம் புது²ஜ்ஜனஸ்ஸ ச ஸேக்க²ஸ்ஸ சாதிஆதி³மாஹ. தத்த² சித்தஸ்ஸ அபி⁴னீஹாரோ ஏகத்தம் ஹோதீதி ஏகோ ஹோதி, ஸகத்தே² பா⁴வவசனந்தி வேதி³தப்³ப³ம். யதா² இத³ப்பச்சயா ஏவ இத³ப்பச்சயதாதி வுத்தம், ததா² ஏகோவ ஏகத்தம். அபி⁴னீஹாரோதி ஸாமிஅத்தே² பச்சத்தவசனம் வா, அபி⁴னீஹாரஸ்ஸாதி அத்தோ². ‘‘ஸோ தே³ஸோ ஸம்மஜ்ஜித்வா’’திஆதீ³ஸு (மஹாவ. 168) விய விப⁴த்திவிபல்லாஸோ கதோதி வேதி³தப்³போ³. சித்தம் கிலிஸ்ஸதீதி விபஸ்ஸனானிகந்திஸங்கா²தேன லோப⁴கிலேஸேன சித்தம் கிலிஸ்ஸதி, தாபீயதி பா³தீ⁴யதீதி அத்தோ². பா⁴வனாய பரிபந்தோ² ஹோதீதி படிலத்³தா⁴ய விபஸ்ஸனாபா⁴வனாய உபகா⁴தோ ஹோதி. படிவேத⁴ஸ்ஸ அந்தராயோ ஹோதீதி விபஸ்ஸனாபா⁴வனாய படிலபி⁴தப்³ப³ஸ்ஸ ஸச்சப்படிவேத⁴ஸ்ஸ படிலாப⁴ந்தராயோ ஹோதி. ஆயதிம் படிஸந்தி⁴யா பச்சயோ ஹோதீதி ஸங்கா²ருபேக்கா²ஸம்பயுத்தகம்மஸ்ஸ ப³லவத்தா தேனேவ ஸுக³திபடிஸந்தி⁴யா தீ³யமானாய அதினந்த³னஸங்கா²தோ லோப⁴கிலேஸோ அனாக³தே காமாவசரஸுக³திபடிஸந்தி⁴யா பச்சயோ ஹோதி. யஸ்மா கிலேஸஸஹாயம் கம்மம் விபாகம் ஜனேதி, தஸ்மா கம்மம் ஜனகபச்சயோ ஹோதி, கிலேஸோ உபத்த²ம்ப⁴கபச்சயோ. ஸேக்க²ஸ்ஸ பன உத்தரிபடிவேத⁴ஸ்ஸாதி ஸகதா³கா³மிமக்³கா³தி³வஸேன ஸச்சப்படிவேத⁴ஸ்ஸ. ஆயதிம் படிஸந்தி⁴யா பச்சயோ ஹோதீதி ஸேக்கே²ஸு ஸோதாபன்னஸகதா³கா³மீனம் அனதி⁴க³தஜ்ஜா²னானம் ஸங்கா²ருபேக்கா²கம்மேன தீ³யமானாய காமாவசரஸுக³திபடிஸந்தி⁴யா அபி⁴னந்த³னகிலேஸோ பச்சயோ ஹோதி, ஜா²னலாபீ⁴னம் பன அனாகா³மிஸ்ஸ ச ப்³ரஹ்மலோகேயேவ படிஸந்தா⁴னதோ பச்சயோ ந ஹோதி, அனுலோமகோ³த்ரபூ⁴ஹி ச தீ³யமானாய படிஸந்தி⁴யா அயமேவ கிலேஸோ பச்சயோ ஹோதீதி வேதி³தப்³போ³.

அனிச்சதோதி ஹுத்வா அபா⁴வட்டே²ன அனிச்சந்திகதாய ஆதி³அந்தவந்ததாய ச அனிச்சதோ. து³க்க²தோதி அபி⁴ண்ஹம் படிபீளனட்டே²ன உப்பாத³வயபடிபீளனதாய து³க்க²வத்து²தாய ச து³க்க²தோ. அனத்ததோதி அவஸவத்தனட்டே²ன பச்சயாயத்தவுத்திதாய ஸாமினிவாஸீகாரகவேத³காபா⁴வேன ச அனத்ததோ. அனுபஸ்ஸனட்டே²னாதி அனு அனு அனிச்சாதி³தோ பஸ்ஸனட்டே²ன. அபி⁴னீஹாரோ நானத்தம் ஹோதீதி அபி⁴னீஹாரோ நானா ஹோதீதி வா அபி⁴னீஹாரஸ்ஸ நானாபா⁴வோ ஹோதீதி வா வேதி³தப்³ப³ம்.

குஸலாதி ஆரோக்³யட்டே²ன அனவஜ்ஜட்டே²ன கோஸல்லஸம்பூ⁴தட்டே²ன ச. அப்³யாகதாதி குஸலாகுஸலபா⁴வேன ந ப்³யாகதா. கிஞ்சிகாலே ஸுவிதி³தாதி விபஸ்ஸனாகாலே ஸுட்டு² விதி³தா. கிஞ்சிகாலே ந ஸுவிதி³தாதி அபி⁴னந்த³னகாலே ந ஸுட்டு² விதி³தா. அச்சந்தம் ஸுவிதி³தாதி அபி⁴னந்த³னாய பஹீனத்தா ஏகந்தேன ஸுவிதி³தா. விதி³தட்டே²ன ச அவிதி³தட்டே²ன சாதி ஏத்த² புது²ஜ்ஜனஸேக்கா²னம் ஸுவிதி³தட்டோ²பி வீதராக³ஸ்ஸ அச்சந்தஸுவிதி³தட்டோ²பி விதி³தட்டோ²வ ஹோதி, த்³வின்னம்பி ந ஸுவிதி³தட்டோ² அவிதி³தட்டோ²வ.

அதித்தத்தாதி விபஸ்ஸனாய கரணீயஸ்ஸ அபரியோஸிதத்தா அப்பணீதபா⁴வேன. தப்³பி³பரீதேன தித்தத்தா. திண்ணம் ஸஞ்ஞோஜனானம் பஹானாயாதி ஸக்காயதி³ட்டி²விசிகிச்சா²ஸீலப்³ப³தபராமாஸானம் பஹானத்த²ம். பச்சி²மப⁴விகாபி போ³தி⁴ஸத்தா ஏத்தே²வ ஸங்க³ஹம் க³ச்ச²ந்தி. அபச்சி²மப⁴விகா பன விபஸ்ஸனம் ஸங்கா²ருபேக்க²ம் பாபேத்வா ட²பேந்தி. ஸோதாபத்திமக்³க³ம் படிலாப⁴த்தா²யாதி அஸமாஸேத்வா பட²ந்தி, ஸமாஸேத்வா பாடோ² ஸுந்த³ரதரோ. ஸேக்கோ² திண்ணம் ஸஞ்ஞோஜனானம் பஹீனத்தாதி ஸோதாபன்னஸகதா³கா³மிஅனாகா³மீனம் ஸாமஞ்ஞேன வுத்தம். ஸகதா³கா³மிஅனாகா³மீனம்பி ஹி தானி பஹீனானேவ. உத்தரிபடிலாப⁴த்தா²யாதி உபரூபரிமக்³க³படிலாப⁴த்த²ம். தி³ட்ட²த⁴ம்மஸுக²விஹாரத்தா²யாதி தி³ட்டே²வ த⁴ம்மே பச்சக்கே² அத்தபா⁴வே யோ ஸுகோ² விஹாரோ, தத³த்தா²ய. விஹாரஸமாபத்தட்டே²னாதி ஸேக்க²ஸ்ஸ ப²லஸமாபத்தட்டே²ன, வீதராக³ஸ்ஸ விபஸ்ஸனாவிஹாரப²லஸமாபத்தட்டே²ன.

57. இதா³னி ஸங்கா²ருபேக்கா²னம் க³ணனபரிச்சே²த³ம் த³ஸ்ஸேதும் கதி ஸங்கா²ருபேக்கா²திஆதி³மாஹ. தத்த² ஸமத²வஸேனாதி ஸமாதி⁴வஸேன. அயமேவ வா பாடோ². நீவரணே படிஸங்கா²தி பஞ்ச நீவரணானி பஹாதப்³ப³பா⁴வேன பரிக்³க³ஹேத்வா. ஸந்திட்ட²னாதி நீவரணானம் பஹானாபி⁴முகீ²பூ⁴தத்தா தேஸம் பஹானேபி அப்³யாபாரபா⁴வூபக³மனேன மஜ்ஜ²த்ததாய ஸந்திட்ட²னா. ஸங்கா²ருபேக்கா²ஸூதி நீவரணப்பஹானே ப்³யாபாராகரணேன நீவரணஸங்கா²தானம் ஸங்கா²ரானம் உபேக்க²னாஸு. ஏஸ நயோ விதக்கவிசாராதீ³ஸு ச. ஸமதே² ஸங்கா²ருபேக்கா² நாம அப்பனாவீதி²யா ஆஸன்னபுப்³ப³பா⁴கே³ ப³லப்பத்தபா⁴வனாமயஞாணம். ஸோதாபத்திமக்³க³ம் படிலாப⁴த்தா²யாதிஆதீ³ஸு சதூஸு மக்³க³வாரேஸு ஸுஞ்ஞதானிமித்தஅப்பணிஹிதமக்³கா³னம் அஞ்ஞதரஞ்ஞதரோ மக்³கோ³ லப்³ப⁴தி. ஸோதாபத்திப²லஸமாபத்தத்தா²யாதிஆதீ³ஸு சதூஸு ப²லவாரேஸு பன அப்பணிஹிதா ப²லஸமாபத்தி வேதி³தப்³பா³. கஸ்மா? ‘‘ஸுஞ்ஞதவிஹாரஸமாபத்தத்தா²ய அனிமித்தவிஹாரஸமாபத்தத்தா²யா’’தி இதராஸம் த்³வின்னம் ப²லஸமாபத்தீனம் விஸும் வுத்தத்தா. அனிச்சானுபஸ்ஸனாவுட்டா²னவஸேன ஹி அனிமித்தமக்³கோ³, ததே²வ ப²லஸமாபத்திகாலே அனிமித்தப²லஸமாபத்தி, து³க்கா²னுபஸ்ஸனாவுட்டா²னவஸேன அப்பணிஹிதமக்³க³ப²லஸமாபத்தியோ, அனத்தானுபஸ்ஸனாவுட்டா²னவஸேன ஸுஞ்ஞதமக்³க³ப²லஸமாபத்தியோ ஸுத்தந்தனயேனேவ வேதி³தப்³பா³.

ஏத்த² ச சதூஸு மக்³க³வாரேஸு உப்பாத³ந்திஆதீ³னி பஞ்ச மூலபதா³னி, க³திந்திஆதீ³னி த³ஸ வேவசனபதா³னீதி பன்னரஸ பதா³னி வுத்தானி. ச²ஸு பன ப²லஸமாபத்திவாரேஸு பஞ்ச மூலபதா³னேவ வுத்தானி. தம் கஸ்மா இதி சே? ஸங்கா²ருபேக்கா²ய திக்க²பா⁴வே ஸதி கிலேஸப்பஹானே ஸமத்த²ஸ்ஸ மக்³க³ஸ்ஸ ஸம்ப⁴வதோ தஸ்ஸா திக்க²பா⁴வத³ஸ்ஸனத்த²ம் வேவசனபதே³ஹி ஸஹ த³ள்ஹம் கத்வா மூலபதா³னி வுத்தானி. ப²லஸ்ஸ நிருஸ்ஸாஹபா⁴வேன ஸந்தஸபா⁴வத்தா மக்³கா³யத்தத்தா ச மந்த³பூ⁴தாபி ஸங்கா²ருபேக்கா² ப²லஸ்ஸ பச்சயோ ஹோதீதி த³ஸ்ஸனத்த²ம் மூலபதா³னேவ வுத்தானீதி வேதி³தப்³பா³னி.

58. இதா³னி ஜாதிவஸேன புச்சி²த்வா லப்³ப⁴மானவஸேன விஸ்ஸஜ்ஜேதும் கதி ஸங்கா²ருபேக்கா² குஸலாதிஆதி³மாஹ. தத்த² பன்னரஸ ஸங்கா²ருபேக்கா²தி ஸமத²வஸேன அட்ட², சதுன்னம் மக்³கா³னம் திண்ணம் ப²லானம் வஸேன ஸத்தாதி பன்னரஸ. ஸமத²வஸேன அட்ட² ஸங்கா²ருபேக்கா² அரஹதோ நீவரணபடிஸங்கா²அபா⁴வதோ, விதக்கவிசாராதீ³னம் பஹானப்³யாபாரம் வினா ஸுகே²ன பஹானதோ ச ஸங்கா²ருபேக்கா²னாமஸ்ஸ அனனுரூபாதி கத்வா தாஸம் அப்³யாகததா ந வுத்தாதி வேதி³தப்³பா³. அரஹதா பன ப²லஸமாபத்திம் ஸமாபஜ்ஜந்தேன ஸங்கா²ருபேக்க²ம் வினா ஸமாபஜ்ஜிதும் ந ஸக்காதி திஸ்ஸோ ஸங்கா²ருபேக்கா² அப்³யாகதாதி வுத்தா. அப்பணிஹிதஸுஞ்ஞதானிமித்தவஸேன ஹி அரஹதோ திஸ்ஸோ ஸங்கா²ருபேக்கா².

இதா³னி ஸங்கா²ருபேக்கா²னம் ஸம்வண்ணனாவஸேன வுத்தாஸு தீஸு கா³தா²ஸு படிஸங்கா²ஸந்திட்ட²னா பஞ்ஞாதி ஸங்கா²ருபேக்கா². அட்ட² சித்தஸ்ஸ கோ³சராதி ஸமத²வஸேன வுத்தா அட்ட² ஸங்கா²ருபேக்கா² ஸமாதி⁴ஸ்ஸ விஸயா, பூ⁴மியோதி அத்தோ². ‘‘சித்தம் பஞ்ஞஞ்ச பா⁴வய’’ந்திஆதீ³ஸு (ஸம். நி. 1.23, 192) விய சித்தஸீஸேன ஸமாதி⁴ நித்³தி³ட்டோ², ‘‘கோ³சரே, பி⁴க்க²வே, சரத² ஸகே பேத்திகே விஸயே’’திஆதீ³ஸு (ஸம். நி. 5.372) விய கோ³சரஸத்³தே³ன விஸயோ. யஞ்ஹி யதா³யத்தம், தஸ்ஸேஸோ விஸயோதி வுச்சதி. புது²ஜ்ஜனஸ்ஸ த்³வேதி ஸமத²வஸேன விபஸ்ஸனாவஸேன ச. தயோஸேக்க²ஸ்ஸாதி ஸமத²விபஸ்ஸனாஸமாபத்திவஸேன. தயோ ச வீதராக³ஸ்ஸாதி அப்பணிஹிதஸுஞ்ஞதானிமித்தப²லஸமாபத்திவஸேன. ‘‘திஸ்ஸோ’’தி வத்தப்³பே³ ‘‘தயோ’’தி ச லிங்க³விபல்லாஸோ கதோ. தயோ ஸங்கா²ருபேக்கா² த⁴ம்மாதி வா யோஜேதப்³ப³ம். யேஹி சித்தம் விவட்டதீதி யேஹி ஸங்கா²ருபேக்கா²த⁴ம்மேஹி விதக்கவிசாராதி³தோ, உப்பாதா³தி³தோ வா சித்தம் அபக³ச்ச²தி. வீதராக³ஸ்ஸாபி ஹி ஸங்கா²ருபேக்கா²ஸப்³பா⁴வதோ ச ஸங்கா²ரதோ சித்தம் விவட்டித்வா நிப்³பா³னம் பக்க²ந்த³தீதி வுத்தம் ஹோதி. அட்ட² ஸமாதி⁴ஸ்ஸ பச்சயாதி ஸமத²வஸேன வுத்தா அட்ட² அப்பனாஸம்பாபகத்தா அப்பனாஸமாதி⁴ஸ்ஸ பச்சயா. த³ஸ ஞாணஸ்ஸ கோ³சராதி விபஸ்ஸனாவஸேன வுத்தா த³ஸ மக்³க³ஞாணஸ்ஸ ப²லஞாணஸ்ஸ ச பூ⁴மியோ. திண்ணம் விமோக்கா²ன பச்சயாதி ஸுஞ்ஞதானிமித்தஅப்பணிஹிதவிமோக்கா²னம் உபனிஸ்ஸயபச்சயா. நானாதி³ட்டீ²ஸு ந கம்பதீதி ப⁴ங்க³ம் அவிஸ்ஸஜ்ஜித்வாவ ஸங்கா²ரே அனிச்சாதி³வஸேன விபஸ்ஸந்தோ ஸஸ்ஸததி³ட்டி²ஆதீ³ஸு நானப்பகாராஸு தி³ட்டீ²ஸு ந வேத⁴தீதி.

ஸங்கா²ருபேக்கா²ஞாணனித்³தே³ஸவண்ணனா நிட்டி²தா.