55. ஆஸவக்க²யஞாணனித்³தே³ஸவண்ணனா

107. ஆஸவக்க²யஞாணனித்³தே³ஸே அனஞ்ஞாதஞ்ஞஸ்ஸாமீதிந்த்³ரியாதீ³னி வுத்தத்தா²னி. கதி டா²னானி க³ச்ச²தீதி ஏகேகஸ்ஸ உப்பத்திட்டா²னனியமனத்த²ம் புச்சா². ஏகம் டா²னம் க³ச்ச²தீதி ஏகஸ்மிம் டா²னே உப்பஜ்ஜதீதி வுத்தம் ஹோதி. உப்பத்திஓகாஸட்டா²னஞ்ஹி திட்ட²தி ஏத்தா²தி டா²னந்தி வுச்சதி. ச² டா²னானீதி ச² மக்³க³ப²லக்க²ணே. இந்த்³ரியானம் அனஞ்ஞாதஞ்ஞஸ்ஸாமீதிந்த்³ரியாதீ³ஸு தீஸு ஏகேகமேவ அதி⁴கம் ஹோதீதி த³ஸ்ஸனத்த²ம் ஸத்³தி⁴ந்த்³ரியம் அதி⁴மோக்க²பரிவாரம் ஹோதீதிஆதி³ வுத்தம். யதா² ‘‘ஸத்³தி⁴ந்த்³ரியஸ்ஸ அதி⁴மோக்க²ட்டோ²’’திஆதீ³ஸு (படி. ம. 1.12) அதி⁴மோக்கா²த³யோ ஸத்³தி⁴ந்த்³ரியாதீ³னம் கிச்சவஸேன வுத்தா, ஏவமிதா⁴பி ‘‘அதி⁴மோக்க²பரிவாரம் ஹோதீ’’தி ஸத்³தி⁴ந்த்³ரியம் அதி⁴மோக்க²த்தே²ன பரிவாரம் ஹோதீதி வுத்தம் ஹோதி. ஏஸ நயோ ஸேஸேஸுபி. பரிவாரந்தி ச லிங்க³விபல்லாஸோ கதோ. பஞ்ஞிந்த்³ரியந்தி அனஞ்ஞாதஞ்ஞஸ்ஸாமீதிந்த்³ரியமேவ பஜானனஸபா⁴வத³ஸ்ஸனத்த²ம் விஸும் கத்வா வுத்தம். அபி⁴த⁴ம்மேபி (விப⁴. 219) ஹி பஞ்ஞாய கிச்சவிஸேஸத³ஸ்ஸனத்த²ம் மக்³க³க்க²ணே ச ப²லக்க²ணே ச ஏகாவ பஞ்ஞா அட்ட²தா⁴ விப⁴த்தா. அபி⁴ஸந்த³னபரிவாரந்தி ந்ஹானியசுண்ணானம் உத³கம் விய சித்தசேதஸிகானம் ஸினேஹனகிச்சேன பரிவாரம் ஹோதி. இத³ம் ஸோமனஸ்ஸஸம்பயுத்தமக்³க³வஸேனேவ வுத்தம். உபேக்கா²ஸம்பயுத்தமக்³கே³ பன ஸோமனஸ்ஸிந்த்³ரியட்டா²னே உபேக்கி²ந்த்³ரியம் த³ட்ட²ப்³ப³ம். தம் பன ஸம்பயுத்தானம் நாதிஉபப்³ரூஹனபரிவாரந்தி க³ஹேதப்³ப³ம். பவத்தஸந்ததாதி⁴பதேய்யபரிவாரந்தி பவத்தா ஸந்ததி பவத்தஸந்ததி, வத்தமானஸந்தானந்தி அத்தோ². அதி⁴பதிபா⁴வோ ஆதி⁴பதேய்யம், பவத்தஸந்ததியா ஆதி⁴பதேய்யம் பவத்தஸந்ததாதி⁴பதேய்யம். வத்தமானஜீவிதிந்த்³ரியஸ்ஸ உபரிபவத்தியா ச பச்சயத்தா புப்³பா³பரவஸேன பவத்தஸந்ததியா அதி⁴பதிபா⁴வேன அனஞ்ஞாதஞ்ஞஸ்ஸாமீதிந்த்³ரியஸ்ஸ பரிவாரம் ஹோதி.

ஸோதாபத்திமக்³க³க்க²ணே ஜாதா த⁴ம்மாதிஆதி³ ஸப்³பே³ஸம் மக்³க³ஸம்பயுத்தகானம் வண்ணப⁴ணனத்த²ம் வுத்தம். தத்த² மக்³க³க்க²ணே ஜாதாதி மக்³க³ஸமுட்டி²தா ஏவ, ந அஞ்ஞே. யஸ்மா பன மக்³க³ஸமுட்டி²தம்பி ரூபம் குஸலாதி³னாமம் ந லப⁴தி, தஸ்மா தம் அபனேந்தோ ட²பேத்வா சித்தஸமுட்டா²னம் ரூபந்தி ஆஹ. ஸப்³பே³வ ஹி தே த⁴ம்மா குச்சி²தானம் ஸலனாதீ³ஹி அத்தே²ஹி குஸலா. தே ஆரம்மணம் கத்வா பவத்தமானா நத்தி² ஏதேஸம் ஆஸவாதி அனாஸவா. வட்டமூலம் சி²ந்த³ந்தா நிப்³பா³னம் ஆரம்மணம் கத்வா வட்டதோ நிய்யந்தீதி நிய்யானிகா. குஸலாகுஸலஸங்கா²தா சயா அபேதத்தா அபசயஸங்கா²தம் நிப்³பா³னம் ஆரம்மணம் கத்வா பவத்தனதோ அபசயம் க³ச்ச²ந்தீதி அபசயகா³மினோ, பவத்தம் அபசினந்தா வித்³த⁴ம்ஸேந்தா க³ச்ச²ந்தீதிபி அபசயகா³மினோ. லோகே அபரியாபன்னபா⁴வேன லோகதோ உத்தரா உத்திண்ணாதி லோகுத்தரா. நிப்³பா³னம் ஆரம்மணம் ஏதேஸந்தி நிப்³பா³னாரம்மணா.

இமானி அட்டி²ந்த்³ரியானீதிஆதி³ புப்³பே³ வுத்தபரிவாரபா⁴வஸ்ஸ ச தேன ஸஹக³தாதி³பா⁴வஸ்ஸ ச ஆதி³வுத்தஆகாரானஞ்ச தீ³பனத்த²ம் வுத்தம். தத்த² அட்டி²ந்த்³ரியானீதி புப்³பே³ வுத்தனயேன பஞ்ஞிந்த்³ரியேன ஸஹ அட்ட². ஸஹஜாதபரிவாராதி அட்ட²ஸு ஏகேகேன ஸஹ இதரே இதரே ஸத்த ஸஹஜாதா ஹுத்வா தஸ்ஸ ஸஹஜாதபரிவாரா ஹோந்தி. ததே²வ அஞ்ஞம் அஞ்ஞஸ்ஸ அஞ்ஞம் அஞ்ஞஸ்ஸாதி ஏவம் அஞ்ஞமஞ்ஞபரிவாரா ஹோந்தி. ததே²வ அஞ்ஞமஞ்ஞம் நிஸ்ஸயபரிவாரா ஸம்பயுத்தபரிவாரா ச ஹோந்தி. ஸஹக³தாதி தேன அனஞ்ஞாதஞ்ஞஸ்ஸாமீதிந்த்³ரியேன ஸஹ ஏகுப்பாதா³தி³பா⁴வம் க³தா. ஸஹஜாதாதி தேனேவ ஸஹ ஜாதா. ஸம்ஸட்டா²தி தேனேவ ஸஹ மிஸ்ஸிதா. ஸம்பயுத்தாதி தேனேவ ஸமம் ஏகுப்பாதா³தி³பகாரேஹி யுத்தா. தேவாதி தே ஏவ அட்ட² இந்த்³ரியத⁴ம்மா. தஸ்ஸாதி அனஞ்ஞாதஞ்ஞஸ்ஸாமீதிந்த்³ரியஸ்ஸ. ஆகாராதி பரிவாரகோட்டா²ஸா.

ப²லக்க²ணே ஜாதா த⁴ம்மா ஸப்³பே³வ அப்³யாகதா ஹோந்தீதி ரூபஸ்ஸபி அப்³யாகதத்தா சித்தஸமுட்டா²னரூபேன ஸஹ வுத்தா. மக்³க³ஸ்ஸேவ குஸலத்தா நிய்யானிகத்தா அபசயகா³மித்தா ச ப²லக்க²ணே ‘‘குஸலா’’தி ச ‘‘நிய்யானிகா’’தி ச ‘‘அபசயகா³மினோ’’தி ச ந வுத்தம். இதீதிஆதி³ வுத்தப்பகாரனிக³மனம். தத்த² அட்ட²ட்ட²கானீதி அட்ட²ஸு மக்³க³ப²லேஸு ஏகேகஸ்ஸ அட்ட²கஸ்ஸ வஸேன அட்ட² இந்த்³ரியஅட்ட²கானி. சதுஸட்டி² ஹோந்தீதி சதுஸட்டி² ஆகாரா ஹோந்தி. ஆஸவாதிஆதி³ ஹேட்டா² வுத்தத்த²மேவ. இத⁴ அரஹத்தமக்³க³வஜ்ஜே²யேவ ஆஸவே அவத்வா ஸேஸமக்³க³த்தயவஜ்ஜா²னம்பி வசனம் ஆஸவக்க²யவசனஸாமஞ்ஞமத்தேன வுத்தந்தி வேதி³தப்³ப³ம். அரஹத்தமக்³க³ஞாணமேவ ஹி கேசி ஆஸவே அஸேஸேத்வா ஆஸவானம் கே²பனதோ ‘‘க²யே ஞாண’’ந்தி வுச்சதி. தஸ்மாயேவ ச அரஹாயேவ கீ²ணாஸவோதி வுச்சதீதி.

ஆஸவக்க²யஞாணனித்³தே³ஸவண்ணனா நிட்டி²தா.