56-63. ஸச்சஞாணசதுக்கத்³வயனித்³தே³ஸவண்ணனா

108-9. ஸச்சஞாணசதுக்கத்³வயனித்³தே³ஸே து³க்க²ஸ்ஸ பீளனட்டோ²திஆதீ³னி வுத்தத்தா²னேவ. மக்³க³ஸமங்கி³ஸ்ஸ ஞாணம் து³க்கே²பேதம் ஞாணந்திஆதி³ அனந்தரசதுக்கே விய ஏகாபி⁴ஸமயவஸேன வுத்தம். து³வித⁴ஞ்ஹி ஸச்சஞாணம் லோகியம் லோகுத்தரஞ்ச. லோகிகம் து³வித⁴ம் அனுபோ³த⁴ஞாணம் பச்சவேக்க²ணஞாணஞ்ச. அனுபோ³த⁴ஞாணம் ஆதி³கம்மிகஸ்ஸ அனுஸ்ஸவாதி³வஸேன நிரோதே⁴ மக்³கே³ ச பவத்ததி, து³க்கே² ஸமுத³யே ச ஆரம்மணகரணவஸேன. பச்சவேக்க²ணஞாணம் படிவித்³த⁴ஸச்சஸ்ஸ சதூஸுபி ஸச்சேஸு ஆரம்மணகரணவஸேன. லோகுத்தரம் படிவேத⁴ஞாணம் நிரோத⁴மாரம்மணம் கத்வா கிச்சதோ சத்தாரி ஸச்சானி படிவிஜ்ஜ²தி. யதா²ஹ – ‘‘யோ, பி⁴க்க²வே, து³க்க²ம் பஸ்ஸதி, து³க்க²ஸமுத³யம்பி ஸோ பஸ்ஸதி, து³க்க²னிரோத⁴ம்பி பஸ்ஸதி, து³க்க²னிரோத⁴கா³மினிம் படிபத³ம்பி பஸ்ஸதீ’’தி (ஸம். நி. 5.1100) ஸப்³ப³ம் வத்தப்³ப³ம். இதா⁴பி இமினா வாரேன இத³மேவ வுத்தம். தம் பன லோகுத்தரம்பி ‘‘து³க்கே² ஞாண’’ந்திஆதீ³னி நாமானி லப⁴தீதி த³ஸ்ஸனத்த²ம் வுத்தம். இத⁴ பன லோகிகஞாணமேவ அதி⁴ப்பேதம். தஸ்மாயேவ ச தத்த² கதமம் து³க்கே² ஞாணந்திஆதி³மாஹ.

தத்த² து³க்க²ம் ஆரப்³பா⁴தி து³க்க²ஸச்சம் ஆலம்பி³த்வா, ஆரம்மணம் கத்வாதி அத்தோ². பஞ்ஞாதிஆதீ³ஸு தஸ்ஸ தஸ்ஸ அத்த²ஸ்ஸ பாகடகரணஸங்கா²தேன பஞ்ஞாபனட்டே²ன பஞ்ஞா, தேன தேன வா அனிச்சாதி³னா பகாரேன த⁴ம்மே ஜானாதீதிபி பஞ்ஞா. இத³மஸ்ஸா ஸபா⁴வபத³ம். பஜானனாகாரோ பஜானனா. அனிச்சாதீ³னி விசினாதீதி விசயோ. பவிசயோதி உபஸக்³கே³ன பத³ம் வட்³டி⁴தம், பகாரேன விசயோதி அத்தோ². சதுஸச்சத⁴ம்மம் விசினாதீதி த⁴ம்மவிசயோ. அனிச்சாதீ³னம் ஸம்மா லக்க²ணவஸேன ஸல்லக்க²ணா. ஸா ஏவ உபஸக்³க³னானத்தேன உபலக்க²ணா பச்சுபலக்க²ணாதி வுத்தா. பு⁴ஸம் லக்க²ணா தே தே அனிச்சாதி³த⁴ம்மே படிச்ச உபலக்க²ணாதி அத்தோ². பண்டி³தபா⁴வோ பண்டி³ச்சம். குஸலபா⁴வோ கோஸல்லம். நிபுணபா⁴வோ நேபுஞ்ஞம். அனிச்சாதீ³னம் விபா⁴வனவஸேன வேப⁴ப்³யா. அனிச்சாதீ³னம் சிந்தனகவஸேன சிந்தா, யஸ்ஸ உப்பஜ்ஜதி, தம் அனிச்சாதீ³னி சிந்தாபேதீதிபி சிந்தா. அனிச்சாதீ³னி உபபரிக்க²தீதி உபபரிக்கா². பூ⁴ரீதி பத²வீ. அயம்பி ஸண்ஹட்டே²ன வித்த²தட்டே²ன ச பூ⁴ரீ வியாதி பூ⁴ரீ. அத² வா பஞ்ஞாயேவ பூ⁴தே அத்தே² ரமதீதி பூ⁴ரீதி வுச்சதி. அஸனி விய ஸிலுச்சயே கிலேஸே மேத⁴தி ஹிம்ஸதீதி மேதா⁴, கி²ப்பம் க³ஹணதா⁴ரணட்டே²ன வா மேதா⁴. யஸ்ஸ உப்பஜ்ஜதி, தம் அத்தஹிதபடிபத்தியம் ஸம்பயுத்தத⁴ம்மே ச யாதா²வலக்க²ணபடிவேதே⁴ பரினேதீதி பரிணாயிகா. த⁴ம்மே அனிச்சாதி³வஸேன விவிதா⁴ பஸ்ஸதீதி விபஸ்ஸனா. ஸம்மா பகாரேஹி அனிச்சாதீ³னி ஜானாதீதி ஸம்பஜானோ, தஸ்ஸ பா⁴வோ ஸம்பஜஞ்ஞம். உப்பத²படிபன்னே ஸிந்த⁴வே வீதி²ஆரோபனத்த²ம் பதோதோ³ விய உப்பதே² தா⁴வனகம் கூடசித்தம் வீதி²ஆரோபனத்த²ம் விஜ்ஜ²தீதி பதோதோ³ விய பதோதோ³.

த³ஸ்ஸனலக்க²ணே இந்த³ட்ட²ம் கரோதீதி இந்த்³ரியம், பஞ்ஞாஸங்கா²தம் இந்த்³ரியம் பஞ்ஞிந்த்³ரியம். கிம் வுத்தம் ஹோதி? நயித³ம் ‘‘புரிஸஸ்ஸ இந்த்³ரியம் புரிஸிந்த்³ரிய’’ந்திஆதி³ விய பஞ்ஞாய இந்த்³ரியம் பஞ்ஞிந்த்³ரியம். அத² கோ² பஞ்ஞா ஏவ இந்த்³ரியம் பஞ்ஞிந்த்³ரியந்தி வுத்தம் ஹோதி. அவிஜ்ஜாய ந கம்பதீதி பஞ்ஞாப³லம். கிலேஸச்சே²த³னட்டே²ன பஞ்ஞாவ ஸத்த²ம் பஞ்ஞாஸத்த²ம். அச்சுக்³க³தட்டே²ன பஞ்ஞாவ பாஸாதோ³ பஞ்ஞாபாஸாதோ³. ஆலோகனட்டே²ன பஞ்ஞாவ ஆலோகோ பஞ்ஞாஆலோகோ. ஓபா⁴ஸனட்டே²ன பஞ்ஞாவ ஓபா⁴ஸோ பஞ்ஞாஓபா⁴ஸோ. பஜ்ஜோதனட்டே²ன பஞ்ஞாவ பஜ்ஜோதோ பஞ்ஞாபஜ்ஜோதோ. பஞ்ஞவதோ ஹி ஏகபல்லங்கேன நிஸின்னஸ்ஸ த³ஸஸஹஸ்ஸிலோகதா⁴து ஏகாலோகா ஏகோபா⁴ஸா ஏகபஜ்ஜோதா ஹோதி. தேனேதம் வுத்தம். இமேஸு பன தீஸு பதே³ஸு ஏகபதே³னாபி ஏதஸ்மிம் அத்தே² ஸித்³தே⁴ யானி பனேதானி ப⁴க³வதா ‘‘சத்தாரோமே, பி⁴க்க²வே, ஆலோகா. கதமே சத்தாரோ? சந்தா³லோகோ, ஸூரியாலோகோ, அக்³கா³லோகோ, பஞ்ஞாலோகோ. இமே கோ², பி⁴க்க²வே, சத்தாரோ ஆலோகா. ஏதத³க்³க³ம், பி⁴க்க²வே, இமேஸம் சதுன்னம் ஆலோகானம் யதி³த³ம் பஞ்ஞாலோகோ’’. ததா² ‘‘சத்தாரோமே, பி⁴க்க²வே, ஓபா⁴ஸா. சத்தாரோமே, பி⁴க்க²வே, பஜ்ஜோதா’’தி (அ. நி. 4.144-145) ஸத்தானம் அஜ்ஜா²ஸயவஸேன ஸுத்தானி தே³ஸிதானி. தத³னுரூபேனேவ இதா⁴பி தே²ரேன தே³ஸனா கதா. அத்தோ² ஹி அனேகேஹி ஆகாரேஹி விப⁴ஜ்ஜமானோ ஸுவிப⁴த்தோ ஹோதி, அஞ்ஞதா² ச அஞ்ஞோ பு³ஜ்ஜ²தி, அஞ்ஞதா² அஞ்ஞோதி. ரதிகரணட்டே²ன பன ரதிதா³யகட்டே²ன ரதிஜனகட்டே²ன சித்தீகதட்டே²ன து³ல்லப⁴பாதுபா⁴வட்டே²ன அதுலட்டே²ன அனோமஸத்தபரிபோ⁴க³ட்டே²ன ச பஞ்ஞாவ ரதனம் பஞ்ஞாரதனம்.

ந தேன ஸத்தா முய்ஹந்தி, ஸயம் வா ஆரம்மணே ந முய்ஹதீதி அமோஹோ. த⁴ம்மவிசயபத³ம் வுத்தத்த²மேவ. கஸ்மா பனேதம் புன வுத்தந்தி? அமோஹஸ்ஸ மோஹபடிபக்க²பா⁴வதீ³பனத்த²ம். தேனேதம் தீ³பேதி ‘‘ய்வாயம் அமோஹோ, ஸோ ந கேவலம் மோஹதோ அஞ்ஞோ த⁴ம்மோ, மோஹஸ்ஸ பன படிபக்கோ² த⁴ம்மவிசயஸங்கா²தோ அமோஹோ நாம இத⁴ அதி⁴ப்பேதோ’’தி. ஸம்மாதி³ட்டீ²தி யாதா²வனிய்யானிககுஸலதி³ட்டி². ‘‘தத்த² கதமம் து³க்க²ஸமுத³யே ஞாணம், தத்த² கதமம் து³க்க²னிரோதே⁴ ஞாணம், தத்த² கதமம் து³க்க²னிரோத⁴கா³மினியா படிபதா³ய ஞாண’’ந்தி புச்சா²வசனானி ஸங்கே²பவஸேன வுத்தானீதி.

ஸச்சஞாணசதுக்கத்³வயனித்³தே³ஸவண்ணனா நிட்டி²தா.