4. த⁴ம்மட்டி²திஞாணனித்³தே³ஸவண்ணனா

45. த⁴ம்மட்டி²திஞாணனித்³தே³ஸே அவிஜ்ஜாஸங்கா²ரானம் உப்பாத³ட்டி²தீதிஆதீ³ஸு திட்ட²ந்தி ஏதாய ஸங்கா²ராதி டி²தி. கா ஸா? அவிஜ்ஜா. ஸா ஹி ஸங்கா²ரானம் உப்பாதா³ய நிப்³ப³த்தியா டி²தி காரணந்தி உப்பாத³ட்டி²தி. உப்பன்னானம் பவத்தியாபி காரணந்தி பவத்தட்டி²தி. கிஞ்சாபி ஹி ஜனகபச்சயஸ்ஸ ஜனனக்க²ணேயேவ கிச்சானுபா⁴வோ ஹோதி, தேன பன ஜனிதானம்யேவ பவத்தத்தா ஸகக்க²ணே பவத்தியாபி காரணம் நாம ஹோதி, ஸந்ததிவஸேன வா பவத்தியா காரணந்தி அத்தோ². பவத்தந்தி ச நபும்ஸகே பா⁴வவசனமேதம், தஸ்மா பவத்தம் பவத்தீதி அத்த²தோ ஏகம். பவத்திஸத்³த³ஸ்ஸ பன பாகடத்தா தேன யோஜேத்வா அத்தோ² வுத்தோ. பா⁴வேபி டி²திஸத்³த³ஸ்ஸ ஸிஜ்ஜ²னதோ ந இத⁴ பா⁴வே டி²திஸத்³தோ³, காரணே டி²திஸத்³தோ³தி த³ஸ்ஸனத்தம் நிமித்தட்டி²தீதி வுத்தம், நிமித்தபூ⁴தா டி²தீதி அத்தோ², காரணபூ⁴தாதி வுத்தம் ஹோதி. ந கேவலம் நிமித்தமத்தம் ஹோதி, அத² கோ² ஸங்கா²ரஜனனே ஸப்³யாபாரா விய ஹுத்வா ஆயூஹதி வாயமதீதி பச்சயஸமத்த²தம் த³ஸ்ஸேந்தோ ஆயூஹனட்டி²தீதி ஆஹ, ஆயூஹனபூ⁴தா டி²தீதி அத்தோ². யஸ்மா அவிஜ்ஜா ஸங்கா²ரே உப்பாத³யமானா உப்பாதே³ ஸம்யோஜேதி நாம, க⁴டேதீதி அத்தோ². ஸங்கா²ரே பவத்தயமானா பவத்தியம் பலிபு³ந்த⁴தி நாம, ப³ந்த⁴தீதி அத்தோ². தஸ்மா ஸஞ்ஞோக³ட்டி²தி பலிபோ³த⁴ட்டி²தீதி வுத்தா. ஸஞ்ஞோக³பூ⁴தா டி²தி, பலிபோ³த⁴பூ⁴தா டி²தீதி அத்தோ². யஸ்மா அவிஜ்ஜாவ ஸங்கா²ரே உப்பாத³யமானா உப்பாதா³ய பவத்தியா ச மூலகாரணட்டே²ன ஸமுத³யோ நாம, ஸமுத³யபூ⁴தா டி²தீதி ஸமுத³யட்டி²தி, மூலகாரணபூ⁴தா டி²தீதி அத்தோ². அவிஜ்ஜாவ ஸங்கா²ரானம் உப்பாதே³ ஜனகபச்சயத்தா, பவத்தியம் உபத்த²ம்ப⁴கபச்சயத்தா ஹேதுட்டி²தி பச்சயட்டி²தீதி வுத்தா, ஹேதுபூ⁴தா டி²தி, பச்சயபூ⁴தா டி²தீதி அத்தோ². ஜனகபச்சயோ ஹி ஹேதூதி, உபத்த²ம்ப⁴கோ பச்சயோதி வுச்சதி. ஏவம் ஸேஸேஸுபி யோஜேதப்³ப³ம்.

ப⁴வோ ஜாதியா, ஜாதி ஜராமரணஸ்ஸாதி ஏத்த² பன உப்பாத³ட்டி²தி ஸஞ்ஞோக³ட்டி²தி ஹேதுட்டி²தீதி உப்பாத³வஸேன யோஜிதானி பதா³னி ஜாதிஜராமரணவந்தானம் க²ந்தா⁴னம் வஸேன பரியாயேன வுத்தானீதி வேதி³தப்³பா³னி. கேசி பன ‘‘உப்பாதா³ய டி²தி உப்பாத³ட்டி²தீ’’தி ஏவமாதி³னா நயேனேத்த² அத்த²ம் வண்ணயந்தி. அவிஜ்ஜா பச்சயோதி அவிஜ்ஜாய ஸங்கா²ரானம் பச்சயபா⁴வம் அபேக்கி²த்வா வுத்தம். அவிஜ்ஜாயபி பச்சயஸம்பூ⁴தத்தா தஸ்ஸா அபி பச்சயபரிக்³க³ஹணத³ஸ்ஸனத்த²ம் உபோ⁴பேதே த⁴ம்மா பச்சயஸமுப்பன்னாதி பச்சயபரிக்³க³ஹே பஞ்ஞாதி வுத்தம். ஏவம் ஸேஸேஸுபி யோஜேதப்³ப³ம். ஜாதி பச்சயோ, ஜராமரணம் பச்சயஸமுப்பன்னந்தி பன பரியாயேன வுத்தம். அதீதம்பி அத்³தா⁴னந்தி அதிக்கந்தம்பி காலம். அனாக³தம்பி அத்³தா⁴னந்தி அப்பத்தம்பி காலம். உப⁴யத்தா²பி அச்சந்தஸம்யோக³த்தே² உபயோக³வசனம்.

46. இதா³னி நவாகாரவாரானந்தரம் தே நவாகாரே விஹாய ஹேதுபடிச்சபச்சயபதே³ஹேவ யோஜேத்வா அவிஜ்ஜா ஹேது, ஸங்கா²ரா ஹேதுஸமுப்பன்னாதிஆத³யோ தயோ வாரா நித்³தி³ட்டா². நவாகாரவாரே ஜனகஉபத்த²ம்ப⁴கவஸேன பச்சயோ வுத்தோ. இத⁴ பன ஹேதுவாரஸ்ஸ பச்சயவாரஸ்ஸ ச விஸும் ஆக³தத்தா ஹேதூதி ஜனகபச்சயத்தம், பச்சயோதி உபத்த²ம்ப⁴கபச்சயத்தம் வேதி³தப்³ப³ம் ஏகேகஸ்ஸாபி அவிஜ்ஜாதி³கஸ்ஸ பச்சயஸ்ஸ உப⁴யதா² ஸம்ப⁴வதோ. படிச்சவாரே அவிஜ்ஜா படிச்சாதி அத்தனோ உப்பாதே³ ஸங்கா²ரானம் அவிஜ்ஜாபேக்க²த்தா ஸங்கா²ரேஹி அவிஜ்ஜா படிமுக²ம் ஏதப்³பா³ க³ந்தப்³பா³தி படிச்சா. ஏதேன அவிஜ்ஜாய ஸங்கா²ருப்பாத³னஸமத்த²தா வுத்தா ஹோதி. ஸங்கா²ரா படிச்சஸமுப்பன்னாதி ஸங்கா²ரா அவிஜ்ஜம் படிச்ச தத³பி⁴முக²ம் பவத்தனதோ படிமுக²ம் கத்வா ந விஹாய ஸமம் உப்பன்னா. ஏவம் ஸேஸேஸுபி லிங்கா³னுரூபேன யோஜேதப்³ப³ம். அவிஜ்ஜா படிச்சாதி உஸ்ஸுக்கவஸேன வா பாடோ², அத்தோ² பனேத்த² அவிஜ்ஜா அத்தனோ பச்சயே படிச்ச பவத்தாதி பாட²ஸேஸவஸேன யோஜேதப்³போ³. ஏவம் ஸேஸேஸுபி. சதூஸுபி ச ஏதேஸு வாரேஸு த்³வாத³ஸன்னம் படிச்சஸமுப்பாத³ங்கா³னம் பச்சயஸ்ஸேவ வஸேன த⁴ம்மட்டி²திஞாணஸ்ஸ நித்³தி³ஸிதப்³ப³த்தா அவிஜ்ஜாதீ³னம் ஏகாத³ஸன்னம்யேவ அங்கா³னம் வஸேன த⁴ம்மட்டி²திஞாணம் நித்³தி³ட்ட²ம், ஜராமரணஸ்ஸ பன அந்தே டி²தத்தா தஸ்ஸ வஸேன ந நித்³தி³ட்ட²ம். ஜராமரணஸ்ஸாபி ஸோகபரிதே³வது³க்க²தோ³மனஸ்ஸுபாயாஸானம் பச்சயத்தா ஜராமரணம் தேஸம் பச்சயம் கத்வா உபபரிக்க²மானஸ்ஸ தஸ்ஸாபி ஜராமரணஸ்ஸ வஸேன த⁴ம்மட்டி²திஞாணம் யுஜ்ஜதேவ.

47. இதா³னி தானேவ த்³வாத³ஸ படிச்சஸமுப்பாத³ங்கா³னி வீஸதிஆகாரவஸேன விப⁴ஜித்வா சதுஸங்கே²பதியத்³த⁴திஸந்தி⁴யோ த³ஸ்ஸேத்வா த⁴ம்மட்டி²திஞாணம் நித்³தி³ஸிதுகாமோ புரிமகம்மப⁴வஸ்மிந்திஆதி³மாஹ. தத்த² புரிமகம்மப⁴வஸ்மிந்தி புரிமே கம்மப⁴வே, அதீதஜாதியம் கம்மப⁴வே கரியமானேதி அத்தோ². மோஹோ அவிஜ்ஜாதி யோ ததா³ து³க்கா²தீ³ஸு மோஹோ, யேன மூள்ஹோ கம்மம் கரோதி, ஸா அவிஜ்ஜா. ஆயூஹனா ஸங்கா²ராதி தம் கம்மம் கரோந்தஸ்ஸ புரிமசேதனாயோ, யதா² ‘‘தா³னம் த³ஸ்ஸாமீ’’தி சித்தம் உப்பாதே³த்வா மாஸம்பி ஸம்வச்ச²ரம்பி தா³னூபகரணானி ஸஜ்ஜேந்தஸ்ஸ உப்பன்னா புரிமசேதனாயோ. படிக்³கா³ஹகானம் பன ஹத்தே² த³க்கி²ணம் பதிட்டா²பயதோ சேதனா ப⁴வோதி வுச்சதி. ஏகாவஜ்ஜனேஸு வா ச²ஸு ஜவனேஸு சேதனா ஆயூஹனா ஸங்கா²ரா நாம, ஸத்தமஜவனே சேதனா ப⁴வோ. யா காசி வா பன சேதனா ப⁴வோ, தம்ஸம்பயுத்தா ஆயூஹனா ஸங்கா²ரா நாம.

நிகந்தி தண்ஹாதி யா கம்மம் கரோந்தஸ்ஸ தஸ்ஸ ப²லே உபபத்திப⁴வே நிகாமனா பத்த²னா, ஸா தண்ஹா நாம. உபக³மனம் உபாதா³னந்தி யம் கம்மப⁴வஸ்ஸ பச்சயபூ⁴தம் ‘‘இமஸ்மிம் நாம கம்மே கதே காமா ஸம்பஜ்ஜந்தீ’’தி வா ‘‘இத³ம் கத்வா அஸுகஸ்மிம் நாம டா²னே காமே ஸேவிஸ்ஸாமீ’’தி வா ‘‘அத்தா உச்சி²ன்னோ ஸுஉச்சி²ன்னோ ஹோதீ’’தி வா ‘‘ஸுகீ² ஹோதிம் விக³தபரிளாஹோ’’தி வா ‘‘ஸீலப்³ப³தம் ஸுகே²ன பரிபூரதீ’’தி வா பவத்தம் உபக³மனம் த³ள்ஹக³ஹணம், இத³ம் உபாதா³னம் நாம. சேதனா ப⁴வோதி ஆயூஹனாவஸானே வுத்தா சேதனா ப⁴வோ நாம. புரிமகம்மப⁴வஸ்மிந்தி அதீதஜாதியா கம்மப⁴வே கரியமானே பவத்தா. இத⁴ படிஸந்தி⁴யா பச்சயாதி பச்சுப்பன்னபடிஸந்தி⁴யா பச்சயபூ⁴தா.

இத⁴ படிஸந்தி⁴ விஞ்ஞாணந்தி யம் பச்சுப்பன்னப⁴வஸ்ஸ ப⁴வந்தரபடிஸந்தா⁴னவஸேன உப்பன்னத்தா படிஸந்தீ⁴தி வுச்சதி, தம் விஞ்ஞாணம். ஓக்கந்தி நாமரூபந்தி யா க³ப்³பே⁴ ரூபாரூபத⁴ம்மானம் ஓக்கந்தி ஆக³ந்த்வா பவிஸனம் விய, இத³ம் நாமரூபம். பஸாதோ³ ஆயதனந்தி யோ பஸன்னபா⁴வோ, இத³ம் ஆயதனம். ஜாதிக்³க³ஹணேன ஏகவசனம் கதம். ஏதேன சக்கா²தீ³னி பஞ்சாயதனானி வுத்தானி. ‘‘பப⁴ஸ்ஸரமித³ம், பி⁴க்க²வே, சித்தம், தஞ்ச கோ² ஆக³ந்துகேஹி உபக்கிலேஸேஹி உபக்கிலிட்ட²’’ந்தி (அ. நி. 1.49) ஏத்த² ப⁴வங்க³சித்தம் அதி⁴ப்பேதந்தி வசனதோ இதா⁴பி மனாயதனஸ்ஸ விபாகபூ⁴தத்தா, தஸ்ஸ ச கிலேஸகாலுஸ்ஸியாபா⁴வேன பஸன்னத்தா பஸாத³வசனேன மனாயதனம்பி வுத்தந்தி வேதி³தப்³ப³ம். பு²ட்டோ² ப²ஸ்ஸோதி யோ ஆரம்மணம் பு²ட்டோ² பு²ஸந்தோ உப்பன்னோ, அயம் ப²ஸ்ஸோ. வேத³யிதம் வேத³னாதி யம் படிஸந்தி⁴விஞ்ஞாணேன வா ஸளாயதனபச்சயேன வா ப²ஸ்ஸேன ஸஹ உப்பன்னம் விபாகவேத³யிதம், அயம் வேத³னா. இது⁴பபத்திப⁴வஸ்மிம் புரேகதஸ்ஸ கம்மஸ்ஸ பச்சயாதி பச்சுப்பன்னே விபாகப⁴வே அதீதஜாதியம் கதஸ்ஸ கம்மஸ்ஸ பச்சயேன பவத்தந்தீதி அத்தோ².

இத⁴ பரிபக்கத்தா ஆயதனானந்தி பரிபக்காயதனஸ்ஸ கம்மகரணகாலே மோஹாத³யோ த³ஸ்ஸிதா. ஆயதிம் படிஸந்தி⁴யாதி அனாக³தே படிஸந்தி⁴யா. ஆயதிம் படிஸந்தி⁴ விஞ்ஞாணந்திஆதீ³னி வுத்தத்தா²னி.

கத²ம் பன த்³வாத³ஸஹி படிச்சஸமுப்பாத³ங்கே³ஹி இமே வீஸதி ஆகாரா க³ஹிதா ஹோந்தீதி? அவிஜ்ஜா ஸங்கா²ராதி இமே த்³வே அதீதஹேதுயோ ஸரூபதோ வுத்தா. யஸ்மா பன அவித்³வா பரிதஸ்ஸதி, பரிதஸ்ஸிதோ உபாதி³யதி, தஸ்ஸுபாதா³னபச்சயா ப⁴வோ, தஸ்மா தேஹி த்³வீஹி க³ஹிதேஹி தண்ஹுபாதா³னப⁴வாபி க³ஹிதாவ ஹோந்தி. பச்சுப்பன்னே விஞ்ஞாணனாமரூபஸளாயதனப²ஸ்ஸவேத³னா ஸரூபதோ வுத்தாயேவ. தண்ஹுபாதா³னப⁴வா பச்சுப்பன்னஹேதுயோ ஸரூபதோ வுத்தா. ப⁴வே பன க³ஹிதே தஸ்ஸ புப்³ப³பா⁴கா³ தம்ஸம்பயுத்தா வா ஸங்கா²ரா க³ஹிதாவ ஹோந்தி, தண்ஹுபாதா³னக்³க³ஹணேன ச தம்ஸம்பயுத்தா. யாய வா மூள்ஹோ கம்மம் கரோதி, ஸா அவிஜ்ஜா க³ஹிதாவ ஹோதி. அனாக³தே ஜாதி ஜராமரணந்தி த்³வே ஸரூபேன வுத்தானி, ஜாதிஜராமரணக்³க³ஹணேனேவ பன விஞ்ஞாணாதீ³னி பஞ்ச அனாக³தப²லானி க³ஹிதானேவ ஹோந்தி. தேஸம்யேவ ஹி ஜாதிஜராமரணானீதி ஏவம் த்³வாத³ஸஹி அங்கே³ஹி வீஸதி ஆகாரா க³ஹிதா ஹோந்தி.

‘‘அதீதே ஹேதவோ பஞ்ச, இதா³னி ப²லபஞ்சகம்;

இதா³னி ஹேதவோ பஞ்ச, ஆயதிம் ப²லபஞ்சக’’ந்தி. –

கா³தா²ய அயமேவத்தோ² வுத்தோ. இதிமேதி இதி இமே. இதி இமேதி வா பாடோ².

சதுஸங்கே²பேதி சதுரோ ராஸீ. அதீதே பஞ்ச ஹேதுத⁴ம்மா ஏகோ ஹேதுஸங்கே²போ, பச்சுப்பன்னே பஞ்ச ப²லத⁴ம்மா ஏகோ ப²லஸங்கே²போ, பச்சுப்பன்னே பஞ்ச ஹேதுத⁴ம்மா ஏகோ ஹேதுஸங்கே²போ, அனாக³தே பஞ்ச ப²லத⁴ம்மா ஏகோ ப²லஸங்கே²போ.

தயோ அத்³தே⁴தி தயோ காலே. பட²மபஞ்சகவஸேன அதீதகாலோ, து³தியததியபஞ்சகவஸேன பச்சுப்பன்னகாலோ, சதுத்த²பஞ்சகவஸேன அனாக³தகாலோ வேதி³தப்³போ³.

திஸந்தி⁴ந்தி தயோ ஸந்த⁴யோ அஸ்ஸாதி திஸந்தி⁴, தம் திஸந்தி⁴ம். அதீதஹேதுபச்சுப்பன்னப²லானமந்தரா ஏகோ ஹேதுப²லஸந்தி⁴, பச்சுப்பன்னப²லஅனாக³தஹேதூனமந்தரா ஏகோ ப²லஹேதுஸந்தி⁴, பச்சுப்பன்னஹேதுஅனாக³தப²லானமந்தரா ஏகோ ஹேதுப²லஸந்தி⁴.

படிச்சஸமுப்பாத³பாளியம் ஸரூபதோ ஆக³தவஸேன பன அவிஜ்ஜாஸங்கா²ரா ஏகோ ஸங்கே²போ, விஞ்ஞாணனாமரூபஸளாயதனப²ஸ்ஸவேத³னா து³தியோ, தண்ஹுபாதா³னப⁴வா ததியோ, ஜாதிஜராமரணம் சதுத்தோ². அவிஜ்ஜாஸங்கா²ராதி த்³வே அங்கா³னி அதீதகாலானி, விஞ்ஞாணாதீ³னி ப⁴வாவஸானானி அட்ட² பச்சுப்பன்னகாலானி, ஜாதிஜராமரணந்தி த்³வே அனாக³தகாலானி. ஸங்கா²ரவிஞ்ஞாணானம் அந்தரா ஏகோ ஹேதுப²லஸந்தி⁴, வேத³னாதண்ஹானமந்தரா ஏகோ ப²லஹேதுஸந்தி⁴, ப⁴வஜாதீனமந்தரா ஏகோ ஹேதுப²லஸந்தி⁴.

வீஸதியா ஆகாரேஹீதி வீஸதியா கோட்டா²ஸேஹி. சதுஸங்கே²பே ச தயோ அத்³தே⁴ ச திஸந்தி⁴ம் படிச்சஸமுப்பாத³ஞ்ச வீஸதியா ஆகாரேஹி ஜானாதீதி ஸம்ப³ந்தோ⁴.

ஜானாதீதி ஸுதானுஸாரேன பா⁴வனாரம்ப⁴ஞாணேன ஜானாதி. பஸ்ஸதீதி ஞாதமேவ சக்கு²னா தி³ட்ட²ம் விய ஹத்த²தலே ஆமலகம் விய ச பு²டம் கத்வா ஞாணேனேவ பஸ்ஸதி. அஞ்ஞாதீதி தி³ட்ட²மரியாதே³னேவ ஆஸேவனம் கரோந்தோ ஞாணேனேவ ஜானாதி. மரியாத³த்தோ² ஹி ஏத்த² ஆகாரோ. படிவிஜ்ஜ²தீதி பா⁴வனாபாரிபூரியா நிட்ட²ம் பாபேந்தோ ஞாணேனேவ படிவேத⁴ம் கரோதி. ஸலக்க²ணவஸேன வா ஜானாதி, ஸரஸவஸேன பஸ்ஸதி, பச்சுபட்டா²னவஸேன அஞ்ஞாதி, பத³ட்டா²னவஸேன படிவிஜ்ஜ²தி.

தத்த² படிச்சஸமுப்பாதோ³தி பச்சயத⁴ம்மா வேதி³தப்³பா³. படிச்சஸமுப்பன்னா த⁴ம்மாதி தேஹி தேஹி பச்சயேஹி நிப்³ப³த்தத⁴ம்மா. கத²மித³ம் ஜானிதப்³ப³ந்தி சே? ப⁴க³வதோ வசனேன. ப⁴க³வதா ஹி படிச்சஸமுப்பாத³படிச்சஸமுப்பன்னத⁴ம்மதே³ஸனாஸுத்தே –

‘‘கதமோ ச, பி⁴க்க²வே, படிச்சஸமுப்பாதோ³, ஜாதிபச்சயா, பி⁴க்க²வே, ஜராமரணம், உப்பாதா³ வா ததா²க³தானம் அனுப்பாதா³ வா ததா²க³தானம் டி²தாவ ஸா தா⁴து த⁴ம்மட்டி²ததா த⁴ம்மனியாமதா இத³ப்பச்சயதா, தம் ததா²க³தோ அபி⁴ஸம்பு³ஜ்ஜ²தி அபி⁴ஸமேதி, அபி⁴ஸம்பு³ஜ்ஜி²த்வா அபி⁴ஸமேத்வா ஆசிக்க²தி தே³ஸேதி பஞ்ஞாபேதி பட்ட²பேதி விவரதி விப⁴ஜதி உத்தானீகரோதி ‘பஸ்ஸதா²’தி சாஹ. ஜாதிபச்சயா, பி⁴க்க²வே, ஜராமரணம், ப⁴வபச்சயா, பி⁴க்க²வே, ஜாதி…பே… அவிஜ்ஜாபச்சயா, பி⁴க்க²வே, ஸங்கா²ரா. உப்பாதா³ வா ததா²க³தானம்…பே… உத்தானீகரோதி ‘பஸ்ஸதா²’தி சாஹ. அவிஜ்ஜாபச்சயா, பி⁴க்க²வே, ஸங்கா²ரா. இதி கோ², பி⁴க்க²வே, யா தத்ரத த²தா அவிதத²தா அனஞ்ஞத²தா இத³ப்பச்சயதா. அயம் வுச்சதி, பி⁴க்க²வே, படிச்சஸமுப்பாதோ³’’தி (ஸம். நி. 2.20) –

ஏவம் படிச்சஸமுப்பாத³ம் தே³ஸேந்தேன தத²தாதீ³ஹி வேவசனேஹி பச்சயத⁴ம்மாவ படிச்சஸமுப்பாதோ³தி வுத்தா. தஸ்மா ஜராமரணாதீ³னம் பச்சயலக்க²ணோ படிச்சஸமுப்பாதோ³, து³க்கா²னுப³ந்த⁴னரஸோ கும்மக்³க³பச்சுபட்டா²னோ, அயம்பி ஸபச்சயத்தா அத்தனோ விஸேஸபச்சயபத³ட்டா²னோ.

உப்பாதா³ வா அனுப்பாதா³ வாதி உப்பாதே³ வா அனுப்பாதே³ வா, ததா²க³தேஸு உப்பன்னேஸுபி அனுப்பன்னேஸுபீதி அத்தோ². டி²தாவ ஸா தா⁴தூதி டி²தோவ ஸோ பச்சயஸபா⁴வோ, ந கதா³சி ஜாதிஜராமரணஸ்ஸ பச்சயோ ந ஹோதீதி அத்தோ². த⁴ம்மட்டி²ததா த⁴ம்மனியாமதா இத³ப்பச்சயதாதி ஜாதிபச்சயோயேவ. ஜாதிபச்சயேன ஹி ஜராமரணஸங்கா²தோ பச்சயஸமுப்பன்னத⁴ம்மோ ததா³யத்ததாய திட்ட²தி, ஜாதிபச்சயோவ ஜராமரணத⁴ம்மம் நியமேதி, தஸ்மா ஜாதி ‘‘த⁴ம்மட்டி²ததா த⁴ம்மனியாமதா’’தி வுச்சதி. ஜாதியேவ இமஸ்ஸ ஜராமரணஸ்ஸ பச்சயோதி இத³ப்பச்சயோ, இத³ப்பச்சயோவ இத³ப்பச்சயதா. தந்தி தம் பச்சயம். அபி⁴ஸம்பு³ஜ்ஜ²தீதி ஞாணேன அபி⁴ஸம்பு³ஜ்ஜ²தி. அபி⁴ஸமேதீதி ஞாணேன அபி⁴ஸமாக³ச்ச²தி. ஆசிக்க²தீதி கதே²தி. தே³ஸேதீதி த³ஸ்ஸேதி. பஞ்ஞாபேதீதி ஜானாபேதி. பட்ட²பேதீதி ஞாணமுகே² ட²பேதி. விவரதீதி விவரித்வா த³ஸ்ஸேதி. விப⁴ஜதீதி விபா⁴க³தோ த³ஸ்ஸேதி. உத்தானீகரோதீதி பாகடம் கரோதி. இதி கோ²தி ஏவம் கோ². யா தத்ராதி யா தேஸு ‘‘ஜாதிபச்சயா ஜராமரண’’ந்திஆதீ³ஸு. ஸோ பனாயம் படிச்சஸமுப்பாதோ³ தேஹி தேஹி பச்சயேஹி அனூனாதி⁴கேஹேவ தஸ்ஸ தஸ்ஸ த⁴ம்மஸ்ஸ ஸம்ப⁴வதோ தத²தாதி, ஸாமக்³கி³ம் உபக³தேஸு பச்சயேஸு முஹுத்தம்பி ததோ நிப்³ப³த்தனத⁴ம்மானம் அஸம்ப⁴வாபா⁴வதோ அவிதத²தாதி, அஞ்ஞத⁴ம்மபச்சயேஹி அஞ்ஞத⁴ம்மானுப்பத்திதோ அனஞ்ஞத²தாதி, யதா²வுத்தானம் ஏதேஸம் ஜராமரணாதீ³னம் பச்சயதோ வா பச்சயஸமூஹதோ வா இத³ப்பச்சயதாதி வுத்தோ. தத்ராயம் வசனத்தோ² – இமேஸம் பச்சயா இத³ப்பச்சயா, இத³ப்பச்சயா ஏவ இத³ப்பச்சயதா, இத³ப்பச்சயானம் வா ஸமூஹோ இத³ப்பச்சயதா. லக்க²ணம் பனேத்த² ஸத்³த³ஸத்த²தோ வேதி³தப்³ப³ந்தி.

த⁴ம்மட்டி²திஞாணனித்³தே³ஸவண்ணனா நிட்டி²தா.