37. ஸல்லேக²ட்ட²ஞாணனித்³தே³ஸவண்ணனா

88. ஸல்லேக²ட்ட²ஞாணனித்³தே³ஸே ராகோ³ புதூ²தி ராகோ³ விஸும், லோகுத்தரேஹி அஸம்மிஸ்ஸோதி அத்தோ². ஏஸ நயோ ஸேஸேஸு. ராகோ³தி ரஞ்ஜனட்டே²ன. தோ³ஸோதி து³ஸ்ஸனட்டே²ன. மோஹோதி முய்ஹனட்டே²ன. ரஞ்ஜனலக்க²ணோ ராகோ³, து³ஸ்ஸனலக்க²ணோ தோ³ஸோ, முய்ஹனலக்க²ணோ மோஹோதி இமே தயோ ஸீஸகிலேஸே வத்வா இதா³னி பபே⁴த³தோ த³ஸ்ஸேந்தோ கோதோ⁴திஆதி³மாஹ. தத்த² குஜ்ஜ²னலக்க²ணோ கோதோ⁴தி இத⁴ ஸத்தவத்து²கோ அதி⁴ப்பேதோ. உபனந்த⁴னலக்க²ணோ உபனாஹோ, த³ள்ஹபா⁴வப்பத்தோ கோதோ⁴யேவ. பரகு³ணமக்க²னலக்க²ணோ மக்கோ², பரகு³ணபுஞ்ச²னந்தி அத்தோ². யுக³க்³கா³ஹலக்க²ணோ பளாஸோ, யுக³க்³கா³ஹவஸேன பரகு³ணத³ஸ்ஸனந்தி அத்தோ². பரஸம்பத்திகீ²யனலக்க²ணா இஸ்ஸா, உஸூயனாதி அத்தோ². அத்தஸம்பத்தினிகூ³ஹனலக்க²ணம் மச்ச²ரியம், ‘‘மய்ஹம் அச்ச²ரியம் மா பரஸ்ஸ ஹோதூ’’தி அத்தோ². அத்தனா கதபாபபடிச்சா²த³னலக்க²ணா மாயா, படிச்சா²த³னட்டே²ன மாயா வியாதி அத்தோ². அத்தனோ அவிஜ்ஜமானகு³ணப்பகாஸனலக்க²ணம் ஸாடே²ய்யம், ஸட²பா⁴வோதி அத்தோ². சித்தஸ்ஸ உத்³து⁴மாதபா⁴வலக்க²ணோ த²ம்போ⁴, த²த்³த⁴பா⁴வோதி அத்தோ². கரணுத்தரியலக்க²ணோ ஸாரம்போ⁴. உன்னதிலக்க²ணோ மானோ. அப்³பு⁴ன்னதிலக்க²ணோ அதிமானோ. மத்தபா⁴வலக்க²ணோ மதோ³. பஞ்சஸு காமகு³ணேஸு சித்தவோஸக்³க³லக்க²ணோ பமாதோ³.

ஏவம் விஸும் விஸும் கிலேஸவஸேன புதூ² த³ஸ்ஸேத்வா வுத்தகிலேஸே ச அவுத்தே ச அஞ்ஞே ஸப்³ப³ஸங்கா³ஹிகவஸேன த³ஸ்ஸேதும் ஸப்³பே³ கிலேஸாதிஆதி³மாஹ. தத்த² தி³ட்ட²த⁴ம்மஸம்பராயேஸு ஸத்தே கிலேஸேந்தி உபதாபேந்தி விபா³தே⁴ந்தீதி கிலேஸா. அகுஸலகம்மபத²ஸங்க³ஹிதா ச அஸங்க³ஹிதா ச. து³ட்டு² சரிதா, து³ட்டா² வா சரிதாதி து³ச்சரிதா. தே பன காயது³ச்சரிதம் வசீது³ச்சரிதம் மனோது³ச்சரிதந்தி திப்பகாரா. விபாகம் அபி⁴ஸங்க²ரோந்தீதி அபி⁴ஸங்கா²ரா. தேபி புஞ்ஞாபி⁴ஸங்கா²ரோ அபுஞ்ஞாபி⁴ஸங்கா²ரோ ஆனேஞ்ஜாபி⁴ஸங்கா²ரோதி திப்பகாரா. விபாகவஸேன ப⁴வம் க³ச்ச²ந்தீதிப⁴வகா³மினோ, ப⁴வகா³மினோ கம்மா ப⁴வகா³மிகம்மா. இமினா அபி⁴ஸங்கா²ரபா⁴வேபி ஸதி அவேத³னீயானி கம்மானி படிக்கி²த்தானி ஹோந்தீதி அயம் விஸேஸோ. ‘‘து³ச்சரிதா’’தி ச ‘‘கம்மா’’தி ச லிங்க³விபல்லாஸோ கதோ. நானத்தேகத்தந்தி ஏத்த² உத்³தே³ஸே ஏகத்தஸத்³த³ஸ்ஸ அபா⁴வேபி நானத்தேகத்தானம் அஞ்ஞமஞ்ஞாபேக்க²த்தா ஏகத்தம்பி நித்³தி³ஸிதுகாமேன ‘‘நானத்தேகத்த’’ந்தி உத்³தே³ஸோ கதோ. நானத்தஸல்லேக²கே ஏகத்தே த³ஸ்ஸிதே ஸல்லேக²ஞாணம் ஸுகே²ன த³ஸ்ஸீயதீதி. நானத்தந்தி அனவட்டி²தத்தா ஸபரிப்ப²ந்த³த்தா ச நானாஸபா⁴வோ. ஏகத்தந்தி அவட்டி²தத்தா அபரிப்ப²ந்த³த்தா ச ஏகஸபா⁴வோ.

சரணதேஜோதி சரந்தி தேன அக³தம் தி³ஸம் நிப்³பா³னம் க³ச்ச²ந்தீதி சரணம். கிம் தம்? ஸீலம். ததே³வ படிபக்க²தாபனட்டே²ன தேஜோ. கு³ணதேஜோதி ஸீலேன லத்³த⁴பதிட்டோ² ஸமாதி⁴தேஜோ. பஞ்ஞாதேஜோதி ஸமாதி⁴னா லத்³த⁴பதிட்டோ² விபஸ்ஸனாதேஜோ. புஞ்ஞதேஜோதி விபஸ்ஸனாஹி லத்³த⁴பதிட்டோ² அரியமக்³க³குஸலதேஜோ. த⁴ம்மதேஜோதி சதுன்னம் தேஜானம் பதிட்டா²பூ⁴தோ பு³த்³த⁴வசனதேஜோ. சரணதேஜேன தேஜிதத்தாதி ஸீலதேஜேன திகி²ணீகதத்தா. து³ஸ்ஸீல்யதேஜந்தி து³ஸ்ஸீலபா⁴வஸங்கா²தம் தேஜம். தம்பி ஹி ஸந்தானம் தாபனதோ தேஜோ நாம. பரியாதி³யதீதி கே²பேதி. அகு³ணதேஜந்தி ஸமாதி⁴ஸ்ஸ படிபக்க²ம் விக்கே²பதேஜம். து³ப்பஞ்ஞதேஜந்தி விபஸ்ஸனாஞாணபடிபக்க²ம் மோஹதேஜம். அபுஞ்ஞதேஜந்தி தம்தம்மக்³க³வஜ்ஜ²கிலேஸப்பஹானேன கிலேஸஸஹாயம் அகுஸலகம்மதேஜம். ந கேவலஞ்ஹேதம் அபுஞ்ஞமேவ கே²பேதி, ‘‘அத்தி², பி⁴க்க²வே, கம்மம் அகண்ஹம் அஸுக்கம் அகண்ஹஅஸுக்கவிபாகம் கம்மம் கம்மக்க²யாய ஸம்வத்ததீ’’தி (அ. நி. 4.233; தீ³. நி. 3.312; ம. நி. 2.18) வசனதோ குஸலகம்மம்பி கே²பேதியேவ. புஞ்ஞதேஜபடிபக்க²வஸேன அபுஞ்ஞதேஜமேவ வுத்தம். அத⁴ம்மதேஜந்தி நானாதித்தி²யானம் ஸமயவசனதேஜம். இமஸ்ஸ ஞாணஸ்ஸ உத்³தே³ஸவண்ணனாயம் வுத்தே து³தியே அத்த²விகப்பே ராகா³த³யோ ஏகூனவீஸதி புது² து³ஸ்ஸீல்யதேஜா ஹோந்தி. ‘‘அபி⁴ஸங்கா²ரா, ப⁴வகா³மிகம்மா’’தி ஏத்த² அபுஞ்ஞாபி⁴ஸங்கா²ரா அகுஸலகம்மஞ்ச அபுஞ்ஞதேஜா ஹோந்தி, ஆனேஞ்ஜாபி⁴ஸங்கா²ரானி லோகியகுஸலகம்மானி புஞ்ஞதேஜேனேவ கே²பனீயதோ அபுஞ்ஞதேஜபக்கி²காவ ஹோந்தி. காமச்ச²ந்தா³த³யோ பஞ்சத³ஸ நானத்தா அகு³ணதேஜா ஹோந்தி, நிச்சஸஞ்ஞாத³யோ அட்டா²ரஸ நானத்தா து³ப்பஞ்ஞதேஜா ஹோந்தி, சதுமக்³க³வஜ்ஜா² சத்தாரோ நானத்தா அபுஞ்ஞதேஜா ஹோந்தி. ஸோதாபத்திமக்³க³வஜ்ஜ²னானத்தேன அத⁴ம்மதேஜோ ஸங்க³ஹேதப்³போ³.

நித்³தே³ஸே ஸல்லேக²படிபக்கே²ன அஸல்லேகே²ன ஸல்லேக²ம் த³ஸ்ஸேதுகாமேன அஸல்லேக²புப்³ப³கோ ஸல்லேகோ² நித்³தி³ட்டோ². நேக்க²ம்மாத³யோ ஸத்ததிம்ஸ ஏகத்தத⁴ம்மாவ பச்சனீகானம் ஸல்லிக²னதோ ‘‘ஸல்லேகோ²’’தி வுத்தா. தஸ்மிம் நேக்க²ம்மாதி³கே ஸத்ததிம்ஸபபே⁴தே³ ஸல்லேகே² ஞாணம் ஸல்லேக²ட்டே² ஞாணந்தி.

ஸல்லேக²ட்ட²ஞாணனித்³தே³ஸவண்ணனா நிட்டி²தா.