38. வீரியாரம்ப⁴ஞாணனித்³தே³ஸவண்ணனா

89. வீரியாரம்ப⁴ஞாணனித்³தே³ஸே அனுப்பன்னானந்தி ஏகஸ்மிம் அத்தபா⁴வே, ஏகஸ்மிம் வா ஆரம்மணே அனிப்³ப³த்தானம். அனமதக்³கே³ ஹி ஸம்ஸாரே அனுப்பன்னா அகுஸலா நாம நத்தி², குஸலா பன அத்தி². பாபகானந்தி லாமகானம். அகுஸலானம் த⁴ம்மானந்தி அகோஸல்லஸம்பூ⁴தானம் த⁴ம்மானம். அனுப்பாதா³யாதி ந உப்பாத³னத்தா²ய. உப்பன்னானந்தி இமஸ்மிம் அத்தபா⁴வே நிப்³ப³த்தானம். பஹானாயாதி பஜஹனத்தா²ய. அனுப்பன்னானம் குஸலானம் த⁴ம்மானந்தி இமஸ்மிம் அத்தபா⁴வே அனிப்³ப³த்தபுப்³பா³னம் கோஸல்லஸம்பூ⁴தானம் த⁴ம்மானம். உப்பாதா³யாதி உப்பாத³னத்தா²ய. உப்பன்னானந்தி இமஸ்மிம் அத்தபா⁴வே நிப்³ப³த்தானம். டி²தியாதி டி²தத்தா²ய. அஸம்மோஸாயாதி அவினாஸத்தா²ய. பி⁴ய்யோபா⁴வாயாதி புனப்புனபா⁴வாய. வேபுல்லாயாதி விபுலபா⁴வாய. பா⁴வனாயாதி வட்³டி⁴யா. பாரிபூரியாதி பரிபூரணத்தா²ய.

இதா³னி அகுஸலேஸு காமச்ச²ந்த³ம், குஸலேஸு நேக்க²ம்மம் விஸேஸேத்வா த³ஸ்ஸேதும் அனுப்பன்னஸ்ஸ காமச்ச²ந்த³ஸ்ஸாதிஆதி³மாஹ. தத்த² காமச்ச²ந்தோ³தி ஸமாதி⁴படிபக்கோ² காமராகோ³. நேக்க²ம்மந்தி பட²மஜ்ஜா²னஸமாதி⁴, பட²மஜ்ஜா²னம் வா, ஸப்³பே³ ஏவ வா குஸலா த⁴ம்மா நேக்க²ம்மம்.

இதா³னி ஸப்³ப³கிலேஸானம் ஸப்³ப³கிலேஸபடிபக்க²ஸ்ஸ அரஹத்தமக்³க³ஸ்ஸ ச வஸேன யோஜேத்வா த³ஸ்ஸேதும் அனுப்பன்னானம் ஸப்³ப³கிலேஸானந்திஆதி³மாஹ. தத்த² உப்பன்னஸ்ஸ அரஹத்தமக்³க³ஸ்ஸ டி²தியாதிஆதீ³ஸு உப்பாத³க்க²ணே உப்பன்னஸ்ஸ அரஹத்தமக்³க³ஸ்ஸ டி²திக்க²ணப⁴ங்க³க்க²ணவஸேன ‘‘டி²தியா’’திஆதி³யோஜனா வேதி³தப்³பா³. விப⁴ங்க³ட்ட²கதா²யம்பி ‘‘யா சஸ்ஸ பவத்தி, அயமேவ டி²தி நாமா’’தி (விப⁴. அட்ட². 406) வுத்தம். கேசி பன ‘‘அரஹத்தமக்³க³ஸ்ஸ புப்³ப³பா⁴க³மக்³கோ³ த³ட்ட²ப்³போ³’’தி வத³ந்தி.

வீரியாரம்ப⁴ஞாணனித்³தே³ஸவண்ணனா நிட்டி²தா.