18. பூ⁴மினானத்தஞாணனித்³தே³ஸவண்ணனா

72. பூ⁴மினானத்தஞாணனித்³தே³ஸே பூ⁴மியோதி பா⁴கா³ பரிச்சே²தா³ வா. காமாவசராதி ஏத்த² து³விதோ⁴ காமோ கிலேஸகாமோ வத்து²காமோ ச. கிலேஸகாமோ ச²ந்த³ராகோ³, வத்து²காமோ தேபூ⁴மகவட்டம். கிலேஸகாமோ காமேதீதி காமோ, வத்து²காமோ காமீயதீதி காமோ. ஸோ து³விதோ⁴ காமோ பவத்திவஸேன யஸ்மிம் பதே³ஸே அவசரதி, ஸோ பதே³ஸோ காமோ ஏத்த² அவசரதீதி காமாவசரோ. ஸோ பன பதே³ஸோ சதுன்னம் அபாயானம், மனுஸ்ஸலோகஸ்ஸ, ச²ன்னஞ்ச தே³வலோகானம் வஸேன ஏகாத³ஸவிதோ⁴. யதா² ஹி யஸ்மிம் பதே³ஸே ஸஸத்தா² புரிஸா அவசரந்தி, ஸோ விஜ்ஜமானேஸுபி அஞ்ஞேஸு த்³விபத³சதுப்பதே³ஸு அவசரந்தேஸு தேஸம் அபி⁴லக்கி²தத்தா ‘‘ஸஸத்தா²வசரோ’’தி வுச்சதி, ஏவம் விஜ்ஜமானேஸுபி அஞ்ஞேஸு ரூபாவசராதீ³ஸு தத்த² அவசரந்தேஸு தேஸம் அபி⁴லக்கி²தத்தா அயம் பதே³ஸோ ‘‘காமாவசரோ’’த்வேவ வுச்சதி. ஸ்வாயம் யதா² ரூபப⁴வோ ரூபம், ஏவம் உத்தரபத³லோபம் கத்வா ‘‘காமோ’’த்வேவ வுச்சதி. தப்படிப³த்³தோ⁴ ஏகேகோ த⁴ம்மோ இமஸ்மிம் ஏகாத³ஸவித⁴பதே³ஸஸங்கா²தே காமே அவசரதீதி காமாவசரோ. கிஞ்சாபி ஹி ஏத்த² கேசி த⁴ம்மா ரூபாரூபப⁴வேஸுபி அவசரந்தி, யதா² பன ஸங்கா³மே அவசரணதோ ‘‘ஸங்கா³மாவசரோ’’தி லத்³த⁴னாமோ நாகோ³ நக³ரே சரந்தோபி ‘‘ஸங்கா³மாவசரோ’’த்வேவ வுச்சதி, த²லஜலசரா ச பாணினோ அத²லே அஜலே ச டி²தாபி ‘‘த²லசரா ஜலசரா’’த்வேவ வுச்சந்தி, ஏவம் தே அஞ்ஞத்த² அவசரந்தாபி காமாவசராயேவாதி வேதி³தப்³பா³. ஆரம்மணகரணவஸேன வா ஏதேஸு வுத்தப்பகாரேஸு த⁴ம்மேஸு காமோ அவசரதீதி காமாவசரா. காமஞ்சேஸ ரூபாரூபாவசரத⁴ம்மேஸுபி அவசரதி, யதா² பன ‘‘வத³தீதி வச்சோ², மஹியம் ஸேதீதி மஹிம்ஸோ’’தி வுத்தே ந யத்தகா வத³ந்தி, மஹியம் வா ஸேந்தி, ஸப்³பே³ஸம் தம் நாமம் ஹோதி. ஏவம்ஸம்பத³மித³ம் வேதி³தப்³ப³ம். ஏத்த² ஸப்³பே³ தே த⁴ம்மே ஏகராஸிம் கத்வா வுத்தபூ⁴மிஸத்³த³மபேக்கி²த்வா காமாவசராதி இத்தி²லிங்க³வசனம் கதம். ரூபாவசராதிஆதீ³ஸு ரூபப⁴வோ ரூபம், தஸ்மிம் ரூபே அவசரந்தீதி ரூபாவசரா. அரூபப⁴வோ அரூபம், தஸ்மிம் அரூபே அவசரந்தீதி அரூபாவசரா. தேபூ⁴மகவட்டே பரியாபன்னா அந்தோக³தா⁴தி பரியாபன்னா, தஸ்மிம் ந பரியாபன்னாதி அபரியாபன்னா.

காமாவசராதி³பூ⁴மினித்³தே³ஸேஸு ஹேட்ட²தோதி ஹேட்டா²பா⁴கே³ன. அவீசினிரயந்தி ஜாலானம் வா ஸத்தானம் வா வேத³னானம் வா வீசி அந்தரம் சி²த்³த³ம் ஏத்த² நத்தீ²தி அவீசி. ஸுக²ஸங்கா²தோ அயோ ஏத்த² நத்தீ²தி நிரயோ, நிரதிஅத்தே²னபி நிரயோ. பரியந்தம் கரித்வாதி தம் அவீசிஸங்கா²தம் நிரயம் அந்தம் கத்வா. உபரிதோதி உபரிபா⁴கே³ன. பரனிம்மிதவஸவத்தீ தே³வேதி பரனிம்மிதேஸு காமேஸு வஸம் வத்தனதோ ஏவம்லத்³த⁴வோஹாரே தே³வே. அந்தோ கரித்வாதி அந்தோ பக்கி²பித்வா. யம் ஏதஸ்மிம் அந்தரேதி யே ஏதஸ்மிம் ஓகாஸே. யந்தி ச லிங்க³வசனவிபல்லாஸோ கதோ. ஏத்தா²வசராதி இமினா யஸ்மா தஸ்மிம் அந்தரே அஞ்ஞேபி சரந்தி கதா³சி கத்த²சி ஸம்ப⁴வதோ, தஸ்மா தேஸம் அஸங்க³ண்ஹனத்த²ம் அவசராதி வுத்தம். தேன யே ஏகஸ்மிம் அந்தரே ஓகா³ள்ஹா ஹுத்வா சரந்தி, ஸப்³ப³த்த² ஸதா³ ச ஸம்ப⁴வதோ, அதோ⁴பா⁴கே³ ச சரந்தி அவீசினிரயஸ்ஸ ஹேட்டா² பூ⁴தூபாதா³ய பவத்திபா⁴வேன, தேஸம் ஸங்க³ஹோ கதோ ஹோதி. தே ஹி ஓகா³ள்ஹா சரந்தி, அதோ⁴பா⁴கே³ ச சரந்தீதி அவசரா. ஏத்த² பரியாபன்னாதி இமினா பன யஸ்மா ஏதே ஏத்தா²வசரா அஞ்ஞத்தா²பி அவசரந்தி, ந பன தத்த² பரியாபன்னா ஹோந்தி, தஸ்மா தேஸம் அஞ்ஞத்தா²பி அவசரந்தானம் பரிக்³க³ஹோ கதோ ஹோதி.

இதா³னி தே ஏத்த² பரியாபன்னே த⁴ம்மே ராஸிஸுஞ்ஞதாபச்சயபா⁴வதோ சேவ ஸபா⁴வதோ ச த³ஸ்ஸேந்தோ க²ந்த⁴தா⁴துஆயதனாதிஆதி³மாஹ. ப்³ரஹ்மலோகந்தி பட²மஜ்ஜா²னபூ⁴மிஸங்கா²தம் ப்³ரஹ்மட்டா²னம். அகனிட்டே²தி உத்தமட்டே²ன ந கனிட்டே². ஸமாபன்னஸ்ஸாதி ஸமாபத்திம் ஸமாபன்னஸ்ஸ. ஏதேன குஸலஜ்ஜா²னம் வுத்தம். உபபன்னஸ்ஸாதி விபாகவஸேன ப்³ரஹ்மலோகே உபபன்னஸ்ஸ. ஏதேன விபாகஜ்ஜா²னம் வுத்தம். தி³ட்ட²த⁴ம்மஸுக²விஹாரிஸ்ஸாதி தி³ட்டே²வ த⁴ம்மே பச்சக்கே² அத்தபா⁴வே ஸுகோ² விஹாரோ தி³ட்ட²த⁴ம்மஸுக²விஹாரோ, ஸோ அஸ்ஸ அத்தீ²தி தி³ட்ட²த⁴ம்மஸுக²விஹாரீ, அரஹா. தஸ்ஸ தி³ட்ட²த⁴ம்மஸுக²விஹாரிஸ்ஸ. ஏதேன கிரியஜ்ஜா²னம் வுத்தம். சேதஸிகாதி சேதஸி ப⁴வா சேதஸிகா, சித்தஸம்பயுத்தாதி அத்தோ². ஆகாஸானஞ்சாயதனூபகே³தி ஆகாஸானஞ்சாயதனஸங்கா²தம் ப⁴வம் உபக³தே. து³தியபதே³பி ஏஸேவ நயோ. மக்³கா³தி சத்தாரோ அரியமக்³கா³. மக்³க³ப²லானீதி சத்தாரி அரியமக்³க³ப²லானி. அஸங்க²தா ச தா⁴தூதி பச்சயேஹி அகதா நிப்³பா³னதா⁴து.

அபராபி சதஸ்ஸோ பூ⁴மியோதி ஏகேகசதுக்கவஸேன வேதி³தப்³பா³. சத்தாரோ ஸதிபட்டா²னாதி காயானுபஸ்ஸனாஸதிபட்டா²னம் வேத³னானுபஸ்ஸனாஸதிபட்டா²னம் சித்தானுபஸ்ஸனாஸதிபட்டா²னம் த⁴ம்மானுபஸ்ஸனாஸதிபட்டா²னம். தஸ்ஸத்தோ² – பதிட்டா²தீதி பட்டா²னம், உபட்டா²தி ஓக்கந்தி³த்வா பக்க²ந்தி³த்வா பவத்ததீதி அத்தோ². ஸதியேவ பட்டா²னம் ஸதிபட்டா²னம். அத² வா ஸரணட்டே²ன ஸதி, உபட்டா²னட்டே²ன பட்டா²னம், ஸதி ச ஸா பட்டா²னஞ்சாதிபி ஸதிபட்டா²னம். ஆரம்மணவஸேன ப³ஹுகா தா ஸதியோதி ஸதிபட்டா²னா. சத்தாரோ ஸம்மப்பதா⁴னாதி அனுப்பன்னானம் அகுஸலானம் அனுப்பாதா³ய ஸம்மப்பதா⁴னம், உப்பன்னானம் அகுஸலானம் பஹானாய ஸம்மப்பதா⁴னம், அனுப்பன்னானம் குஸலானம் உப்பாதா³ய ஸம்மப்பதா⁴னம், உப்பன்னானம் குஸலானம் டி²தியா ஸம்மப்பதா⁴னம். பத³ஹந்தி வாயமந்தி ஏதேனாதி பதா⁴னம், வீரியஸ்ஸேதம் நாமம். ஸம்மப்பதா⁴னந்தி அவிபரீதப்பதா⁴னம் காரணப்பதா⁴னம் உபாயப்பதா⁴னம் யோனிஸோபதா⁴னம். ஏகமேவ வீரியம் கிச்சவஸேன சதுதா⁴ கத்வா ஸம்மப்பதா⁴னாதி வுத்தம். சத்தாரோ இத்³தி⁴பாதா³தி ச²ந்தி³த்³தி⁴பாதோ³, சித்தித்³தி⁴பாதோ³, வீரியித்³தி⁴பாதோ³, வீமம்ஸித்³தி⁴பாதோ³. தஸ்ஸத்தோ² வுத்தோயேவ. சத்தாரி ஜா²னானீதி விதக்கவிசாரபீதிஸுக²சித்தேகக்³க³தாவஸேன பஞ்சங்கி³கம் பட²மஜ்ஜா²னம். பீதிஸுக²சித்தேகக்³க³தாவஸேன திவங்கி³கம் து³தியஜ்ஜா²னம், ஸுக²சித்தகக்³க³தாவஸேன து³வங்கி³கம் ததியஜ்ஜா²னம், உபேக்கா²சித்தேகக்³க³தாவஸேன து³வங்கி³கம் சதுத்த²ஜ்ஜா²னம். இமானி ஹி அங்கா³னி ஆரம்மணூபனிஜ்ஜா²னட்டே²ன ஜா²னந்தி வுச்சந்தி. சதஸ்ஸோ அப்பமஞ்ஞாயோதி மேத்தா, கருணா, முதி³தா, உபேக்கா². ப²ரணஅப்பமாணவஸேன அப்பமஞ்ஞாயோ. ஏதாயோ ஹி ஆரம்மணவஸேன அப்பமாணே வா ஸத்தே ப²ரந்தி, ஏகம் ஸத்தம்பி வா அனவஸேஸப²ரணவஸேன ப²ரந்தீதி ப²ரணஅப்பமாணவஸேன அப்பமஞ்ஞாயோதி வுச்சந்தி. சதஸ்ஸோ அரூபஸமாபத்தியோதி ஆகாஸானஞ்சாயதனஸமாபத்தி, விஞ்ஞாணஞ்சாயதனஸமாபத்தி, ஆகிஞ்சஞ்ஞாயதனஸமாபத்தி, நேவஸஞ்ஞானாஸஞ்ஞாயதனஸமாபத்தி. சதஸ்ஸோ படிஸம்பி⁴தா³ வுத்தத்தா² ஏவ.

சதஸ்ஸோ படிபதா³தி ‘‘து³க்கா² படிபதா³ த³ந்தா⁴பி⁴ஞ்ஞா, து³க்கா² படிபதா³ கி²ப்பாபி⁴ஞ்ஞா, ஸுகா² படிபதா³ த³ந்தா⁴பி⁴ஞ்ஞா, ஸுகா² படிபதா³ கி²ப்பாபி⁴ஞ்ஞா’’தி (தீ³. நி. 3.311) வுத்தா சதஸ்ஸோ படிபதா³. சத்தாரி ஆரம்மணானீதி பரித்தம் பரித்தாரம்மணம், பரித்தம் அப்பமாணாரம்மணம், அப்பமாணம் பரித்தாரம்மணம், அப்பமாணம் அப்பமாணாரம்மணந்தி (த⁴. ஸ. 181 ஆத³யோ) வுத்தானி சத்தாரி ஆரம்மணானி. கஸிணாதி³ஆரம்மணானம் அவவத்தா²பேதப்³ப³தோ ஆரம்மணவந்தானி ஜா²னானி வுத்தானீதி வேதி³தப்³பா³னி. சத்தாரோ அரியவம்ஸாதி அரியா வுச்சந்தி பு³த்³தா⁴ ச பச்சேகபு³த்³தா⁴ ச ததா²க³தஸாவகா ச, தேஸம் அரியானம் வம்ஸா தந்தியோ பவேணியோதி அரியவம்ஸா. கே பன தே? சீவரஸந்தோஸோ பிண்ட³பாதஸந்தோஸோ ஸேனாஸனஸந்தோஸோ பா⁴வனாராமதாதி இமே சத்தாரோ. கி³லானபச்சயஸந்தோஸோ பிண்ட³பாதஸந்தோஸே வுத்தே வுத்தோயேவ ஹோதி. யோ ஹி பிண்ட³பாதே ஸந்துட்டோ², ஸோ கத²ம் கி³லானபச்சயே அஸந்துட்டோ² ப⁴விஸ்ஸதி.

சத்தாரி ஸங்க³ஹவத்தூ²னீதி சத்தாரி ஜனஸங்க³ண்ஹனகாரணானி – தா³னஞ்ச பேய்யவஜ்ஜஞ்ச அத்த²சரியா ச ஸமானத்ததா சாதி இமானி சத்தாரி. தா³னந்தி யதா²ரஹம் தா³னம். பேய்யவஜ்ஜந்தி யதா²ரஹம் பியவசனம். அத்த²சரியாதி தத்த² தத்த² கத்தப்³ப³ஸ்ஸ கரணவஸேன கத்தப்³பா³கத்தப்³பா³னுஸாஸனவஸேன ச வுத்³தி⁴கிரியா. ஸமானத்ததாதி ஸஹ மானேன ஸமானோ, ஸபரிமாணோ ஸபரிக³ணனோதி அத்தோ². ஸமானோ பரஸ்ஸ அத்தா ஏதேனாதி ஸமானத்தோ, ஸமானத்தஸ்ஸ பா⁴வோ ஸமானத்ததா, ‘‘அயம் மயா ஹீனோ, அயம் மயா ஸதி³ஸோ, அயம் மயா அதி⁴கோ’’தி பரிக³ணேத்வா தத³னுரூபேன உபசரணம் கரணந்தி அத்தோ². ‘‘ஸமானஸுக²து³க்க²தா ஸமானத்ததா’’தி ச வத³ந்தி.

சத்தாரி சக்கானீதி ஏத்த² சக்கம் நாம தா³ருசக்கம், ரதனசக்கம், த⁴ம்மசக்கம், இரியாபத²சக்கம், ஸம்பத்திசக்கந்தி பஞ்சவித⁴ம். தத்த² ‘‘யம் பன தம், தே³வ, சக்கம் ச²ஹி மாஸேஹி நிட்டி²தம் சா²ரத்தூனேஹீ’’தி (அ. நி. 3.15) இத³ம் தா³ருசக்கம். ‘‘சக்கம் வத்தயதோ பரிக்³க³ஹேத்வா’’தி (ஜா. 1.13.68) இத³ம் ரதனசக்கம். ‘‘மயா பவத்திதம் சக்க’’ந்தி (ஸு. நி. 562) இத³ம் த⁴ம்மசக்கம். ‘‘சதுசக்கம் நவத்³வார’’ந்தி (ஸம். நி. 1.29) இத³ம் இரியாபத²சக்கம். ‘‘சத்தாரிமானி, பி⁴க்க²வே, சக்கானி, யேஹி ஸமன்னாக³தானம் தே³வமனுஸ்ஸானம் சதுசக்கம் வத்ததி. கதமானி சத்தாரி? பதிரூபதே³ஸவாஸோ, ஸப்புரிஸாவஸ்ஸயோ, அத்தஸம்மாபணிதி⁴, புப்³பே³ ச கதபுஞ்ஞதா’’தி (அ. நி. 4.31) இத³ம் ஸம்பத்திசக்கம். இதா⁴பி ஏததே³வ அதி⁴ப்பேதம். தத்த² பதிரூபதே³ஸவாஸோதி யத்த² சதஸ்ஸோ பரிஸா ஸந்தி³ஸ்ஸந்தி, ஏவரூபே அனுச்ச²விகே தே³ஸே வாஸோ. ஸப்புரிஸாவஸ்ஸயோதி பு³த்³தா⁴தீ³னம் ஸப்புரிஸானம் அவஸ்ஸயனம் ஸேவனம் ப⁴ஜனம். அத்தஸம்மாபணிதீ⁴தி அத்தனோ ஸம்மா பதிட்டா²பனம். ஸசே புப்³பே³ அஸ்ஸத்³தா⁴தீ³ஹி ஸமன்னாக³தோ ஹோதி, தானி பஹாய ஸத்³தா⁴தீ³ஸு பதிட்டா²பனம். புப்³பே³ ச கதபுஞ்ஞதாதி புப்³பே³ உபசிதகுஸலதா. இத³மேவ சேத்த² பமாணம். யேன ஹி ஞாணஸம்பயுத்தசித்தேன குஸலகம்மம் கதம் ஹோதி, ததே³வ குஸலம் தம் புரிஸம் பதிரூபதே³ஸே உபனேதி, ஸப்புரிஸே ப⁴ஜாபேதி, ஸோ ஏவ புக்³க³லோ அத்தானம் ஸம்மா ட²பேதீதி.

சத்தாரி த⁴ம்மபதா³னீதி சத்தாரோ த⁴ம்மகோட்டா²ஸா. கதமானி சத்தாரி? அனபி⁴ஜ்ஜா² த⁴ம்மபத³ம், அப்³யாபாதோ³ த⁴ம்மபத³ம், ஸம்மாஸதி த⁴ம்மபத³ம், ஸம்மாஸமாதி⁴ த⁴ம்மபத³ம். அனபி⁴ஜ்ஜா² த⁴ம்மபத³ம் நாம அலோபோ⁴ வா அனபி⁴ஜ்ஜா²வஸேன அதி⁴க³தஜ்ஜா²னவிபஸ்ஸனாமக்³க³ப²லனிப்³பா³னானி வா. அப்³யாபாதோ³ த⁴ம்மபத³ம் நாம அகோபோ வா மேத்தாஸீஸேன அதி⁴க³தஜ்ஜா²னாதீ³னி வா. ஸம்மாஸதி த⁴ம்மபத³ம் நாம ஸூபட்டி²தஸ்ஸதி வா ஸதிஸீஸேன அதி⁴க³தஜ்ஜா²னாதீ³னி வா. ஸம்மாஸமாதி⁴ த⁴ம்மபத³ம் நாம அட்ட²ஸமாபத்தி வா அட்ட²ஸமாபத்திஸீஸேன அதி⁴க³தஜ்ஜா²னாதீ³னி வா. த³ஸஅஸுப⁴வஸேன வா அதி⁴க³தஜ்ஜா²னாதீ³னி அனபி⁴ஜ்ஜா² த⁴ம்மபத³ம், சதுப்³ரஹ்மவிஹாரவஸேன அதி⁴க³தானி அப்³யாபாதோ³ த⁴ம்மபத³ம், த³ஸானுஸ்ஸதிஆஹாரேபடிகூலஸஞ்ஞாவஸேன அதி⁴க³தானி ஸம்மாஸதி த⁴ம்மபத³ம், த³ஸகஸிணஆனாபானவஸேன அதி⁴க³தானி ஸம்மாஸமாதி⁴ த⁴ம்மபத³ந்தி. இமா சதஸ்ஸோ பூ⁴மியோதி ஏகேகம் சதுக்கவஸேனேவ யோஜேதப்³ப³ம்.

பூ⁴மினானத்தஞாணனித்³தே³ஸவண்ணனா நிட்டி²தா.