17. சரியானானத்தஞாணனித்³தே³ஸவண்ணனா

68. சரியானானத்தஞாணனித்³தே³ஸே விஞ்ஞாணசரியாதிஆதீ³ஸு ஆரம்மணே சரதீதி சரியா, விஞ்ஞாணமேவ சரியா விஞ்ஞாணசரியா. அஞ்ஞாணேன சரணம், அஞ்ஞாணேன வா சரதி, அஞ்ஞாதே வா சரதி, அஞ்ஞாணஸ்ஸ வா சரணந்தி அஞ்ஞாணசரியா. ஞாணமேவ சரியா, ஞாணேன வா சரியா, ஞாணேன வா சரதி, ஞாதே வா சரதி, ஞாணஸ்ஸ வா சரணந்தி ஞாணசரியா. த³ஸ்ஸனத்தா²யாதி ரூபத³ஸ்ஸனத்தா²ய பவத்தா. ஆவஜ்ஜனகிரியாப்³யாகதாதி ப⁴வங்க³ஸந்தானதோ அபனேத்வா ரூபாரம்மணே சித்தஸந்தானம் ஆவஜ்ஜேதி நாமேதீதி ஆவஜ்ஜனம், விபாகாபா⁴வதோ கரணமத்தந்தி கிரியா, குஸலாகுஸலவஸேன ந ப்³யாகதாதி அப்³யாகதா. த³ஸ்ஸனட்டோ²தி பஸ்ஸந்தி தேன, ஸயம் வா பஸ்ஸதி, த³ஸ்ஸனமத்தமேவ வா தந்தி த³ஸ்ஸனம், த³ஸ்ஸனமேவ அத்தோ² த³ஸ்ஸனட்டோ². சக்கு²விஞ்ஞாணந்தி குஸலவிபாகம் வா அகுஸலவிபாகம் வா. தி³ட்ட²த்தாதி அதி³ட்டே² ஸம்படிச்ச²னஸ்ஸ அபா⁴வதோ சக்கு²விஞ்ஞாணேன ரூபாரம்மணஸ்ஸ தி³ட்ட²த்தா. அபி⁴னிரோபனா விபாகமனோதா⁴தூதி தி³ட்டா²ரம்மணமேவ ஆரோஹதீதி அதினிரோபனா, உப⁴யவிபாகா ஸம்படிச்ச²னமனோதா⁴து. அபி⁴னிரோபிதத்தாதி ரூபாரம்மணம் அபி⁴ருள்ஹத்தா. விபாகமனோவிஞ்ஞாணதா⁴தூதி உப⁴யவிபாகா ஸந்தீரணமனோவிஞ்ஞாணதா⁴து. ஏஸ நயோ ஸோதத்³வாராதீ³ஸுபி. ஸந்தீரணானந்தரம் வோட்ட²ப்³ப³னே அவுத்தேபி அட்ட²கதா²சரியேஹி வுத்தத்தா லப்³ப⁴தீதி க³ஹேதப்³ப³ம். விஜானனத்தா²யாதி த⁴ம்மாரம்மணஸ்ஸ சேவ ரூபாதி³ஆரம்மணஸ்ஸ ச விஜானனத்தா²ய. ஆவஜ்ஜனகிரியாப்³யாகதாதி மனோத்³வாராவஜ்ஜனசித்தம். விஜானனட்டோ²தி தத³னந்தரஜவனவஸேன ஆரம்மணஸ்ஸ விஜானனமேவ அத்தோ², ந அஞ்ஞோ. உபரி அகுஸலஜவனானம் விபஸ்ஸனாமக்³க³ப²லஜவனானஞ்ச விஸும் வுத்தத்தா ஸேஸஜவனானி இத⁴ க³ஹேதப்³பா³னி ஸியும். ‘‘குஸலேஹி கம்மேஹி விப்பயுத்தா சரதீதி விஞ்ஞாணசரியா’’திஆதி³வசனதோ (படி. ம. 1.70) பன ஹஸிதுப்பாத³சித்தஜவனமேவ க³ஹேதப்³ப³ம். ச²ஸு த்³வாரேஸு அஹேதுகானம்யேவ சித்தானம் வுத்தத்தா த்³வே ஆவஜ்ஜனானி த்³வே பஞ்சவிஞ்ஞாணானி த்³வே ஸம்படிச்ச²னானி தீணி ஸந்தீரணானி ஏகம் ஹஸிதுப்பாத³சித்தந்தி அட்டா²ரஸ அஹேதுகசித்தானியேவ விஞ்ஞாணசரியாதி வேதி³தப்³பா³னி.

69. இதா³னி விஸயவிஜானனமத்தட்டே²ன விஞ்ஞாணசரியாதி த³ஸ்ஸேதும் நீராகா³ சரதீதிஆதி³மாஹ, விஞ்ஞாணஞ்ஹி ராகா³தி³ஸம்பயோகே³ ஸத்³தா⁴தி³ஸம்பயோகே³ ச அவத்த²ந்தரம் பாபுணாதி, தேஸு அஸதி ஸகாவத்தா²யமேவ திட்ட²தி. தஸ்மா நீராகா³தி³வசனேன தேஸம் வுத்தவிஞ்ஞாணானம் விஞ்ஞாணகிச்சமத்தம் த³ஸ்ஸேதி. நத்தி² ஏதிஸ்ஸா ராகோ³தி நீராகா³. நிராகா³தி ரஸ்ஸம் கத்வாபி பட²ந்தி. ஸோ பன ரஜ்ஜனவஸேன ராகோ³. இதரேஸு து³ஸ்ஸனவஸேன தோ³ஸோ. முய்ஹனவஸேன மோஹோ. மஞ்ஞனவஸேன மானோ. விபரீதத³ஸ்ஸனவஸேன தி³ட்டி². உத்³த⁴தபா⁴வோ, அவூபஸந்தபா⁴வோ வா உத்³த⁴ச்சம். விசிகிச்சா² வுத்தத்தா². அனுஸேந்தீதி அனுஸயா. ‘‘நிரனுஸயா’’தி வத்தப்³பே³ நானுஸயாதி வுத்தம், ஸோயேவத்தோ². பரியுட்டா²னப்பத்தானமேவேத்த² அபா⁴வோ வேதி³தப்³போ³. ந ஹி விஞ்ஞாணசரியா பஹீனானுஸயானம்யேவ வுத்தா. யா ச நீராகா³தி³னாமா, ஸா ராகா³தீ³ஹி விப்பயுத்தாவ நாம ஹோதீதி பரியாயந்தரத³ஸ்ஸனத்த²ம் ராக³விப்பயுத்தாதிஆதி³மாஹ. புன அஞ்ஞேஹி ச விப்பயுத்ததம் த³ஸ்ஸேதும் குஸலேஹி கம்மேஹீதிஆதி³மாஹ. குஸலானியேவ ராகா³தி³வஜ்ஜாபா⁴வா அனவஜ்ஜானி. பரிஸுத்³த⁴பா⁴வகரேஹி ஹிரிஓத்தப்பேஹி யுத்தத்தா ஸுக்கானி. பவத்திஸுக²த்தா ஸுகோ² உத³யோ உப்பத்தி ஏதேஸந்தி ஸுகு²த்³ரயானி, ஸுக²விபாகத்தா வா ஸுகோ² உத³யோ வட்³டி⁴ ஏதேஸந்தி ஸுகு²த்³ரயானி. வுத்தவிபக்கே²ன அகுஸலானி யோஜேதப்³பா³னி. விஞ்ஞாதே சரதீதி விஞ்ஞாணேன விஞ்ஞாயமானம் ஆரம்மணம் விஞ்ஞாதம் நாம, தஸ்மிம் விஞ்ஞாதே ஆரம்மணே. கிம் வுத்தம் ஹோதி? நீலவண்ணயோக³தோ நீலவத்த²ம் விய விஞ்ஞாணயோக³தோ விஞ்ஞாதம் விஞ்ஞாணம் நாம ஹோதி, தஸ்மிம் விஞ்ஞாணே சரதீதி விஞ்ஞாணசரியாதி வுத்தம் ஹோதி. விஞ்ஞாணஸ்ஸ ஏவரூபா சரியா ஹோதீதி வுத்தப்பகாரஸ்ஸ விஞ்ஞாணஸ்ஸ வுத்தப்பகாரா சரியா ஹோதீதி அத்தோ². ‘‘விஞ்ஞாணஸ்ஸ சரியா’’தி ச வோஹாரவஸேன வுச்சதி, விஞ்ஞாணதோ பன விஸும் சரியா நத்தி². பகதிபரிஸுத்³த⁴மித³ம் சித்தம் நிக்கிலேஸட்டே²னாதி இத³ம் வுத்தப்பகாரம் சித்தம் ராகா³தி³கிலேஸாபா⁴வேன பகதியா ஏவ பரிஸுத்³த⁴ம். தஸ்மா விஜானனமத்தமேவ சரியாதி விஞ்ஞாணசரியாதி வுத்தம் ஹோதி. நிக்லேஸட்டே²னாதிபி பாடோ².

அஞ்ஞாணசரியாய மனாபியேஸூதி மனஸி அப்பேந்தி பஸீத³ந்தி, மனம் வா அப்பாயந்தி வட்³டே⁴ந்தீதி மனாபானி, மனாபானியேவ மனாபியானி. தேஸு மனாபியேஸு. தானி பன இட்டா²னி வா ஹோந்து அனிட்டா²னி வா, க³ஹணவஸேன மனாபியானி. ந ஹி இட்ட²ஸ்மிம்யேவ ராகோ³ அனிட்ட²ஸ்மிம்யேவ தோ³ஸோ உப்பஜ்ஜதி. ராக³ஸ்ஸ ஜவனத்தா²யாதி ஸந்ததிவஸேன ராக³ஸ்ஸ ஜவனத்தா²ய பவத்தா. ஆவஜ்ஜனகிரியாப்³யாகதாதி சக்கு²த்³வாரே அயோனிஸோ மனஸிகாரபூ⁴தா ஆவஜ்ஜனகிரியாப்³யாகதா மனோதா⁴து. ராக³ஸ்ஸ ஜவனாதி யேபு⁴ய்யேன ஸத்தக்க²த்தும் ராக³ஸ்ஸ பவத்தி, புனப்புனம் பவத்தோ ராகோ³யேவ. அஞ்ஞாணசரியாதி அஞ்ஞாணேன ராக³ஸ்ஸ ஸம்ப⁴வதோ அஞ்ஞாணேன ராக³ஸ்ஸ சரியாதி வுத்தம் ஹோதி. ஸேஸேஸுபி ஏஸேவ நயோ. தது³ப⁴யேன அஸமபேக்க²னஸ்மிம் வத்து²ஸ்மிந்தி ராக³தோ³ஸவஸேன ஸமபேக்க²னவிரஹிதே ரூபாரம்மணஸங்கா²தே வத்து²ஸ்மிம். மோஹஸ்ஸ ஜவனத்தா²யாதி விசிகிச்சா²உத்³த⁴ச்சவஸேன மோஹஸ்ஸ ஜவனத்தா²ய. அஞ்ஞாணசரியாதி அஞ்ஞாணஸ்ஸேவ சரியா, ந அஞ்ஞஸ்ஸ. வினிப³ந்த⁴ஸ்ஸாதிஆதீ³னி மானாதீ³னம் ஸபா⁴வவசனானி. தத்த² வினிப³ந்த⁴ஸ்ஸாதி உன்னதிவஸேன வினிப³ந்தி⁴த்வா டி²தஸ்ஸ. பராமட்டா²யாதி ரூபஸ்ஸ அனிச்சபா⁴வாதி³ம் அதிக்கமித்வா பரதோ நிச்சபா⁴வாதி³ம் ஆமட்டா²ய க³ஹிதாய. விக்கே²பக³தஸ்ஸாதி ரூபாரம்மணே விக்கி²த்தபா⁴வம் க³தஸ்ஸ. அனிட்ட²ங்க³தாயாதி அஸன்னிட்டா²னபா⁴வம் க³தாய. தா²மக³தஸ்ஸாதி ப³லப்பத்தஸ்ஸ. த⁴ம்மேஸூதி ரூபாதீ³ஸு வா த⁴ம்மாரம்மணபூ⁴தேஸு வா த⁴ம்மேஸு.

70. யஸ்மா ராகா³த³யோ அஞ்ஞாணேன ஹோந்தி, தஸ்மா ராகா³தி³ஸம்பயோகே³ன அஞ்ஞாணம் விஸேஸேந்தோ ஸராகா³ சரதீதிஆதி³மாஹ. தத்த² ஸராகா³ சரதீதி மோஹமானதி³ட்டி²மானானுஸயதி³ட்டா²னுஸயஅவிஜ்ஜானுஸயஜவனவஸேன சரியா வேதி³தப்³பா³. ஸதோ³ஸா சரதீதி மோஹஅவிஜ்ஜானுஸயஜவனவஸேன. ஸமோஹா சரதீதி ராக³தோ³ஸமானதி³ட்டி²உத்³த⁴ச்சவிசிகிச்சா²னுஸயஜவனவஸேன. ஸமானா சரதீதி ராக³மோஹகாமராக³ப⁴வராகா³விஜ்ஜானுஸயஜவனவஸேன. ஸதி³ட்டி² சரதீதி ராக³மோஹகாமராகா³விஜ்ஜானுஸயஜவனவஸேன. ஸஉத்³த⁴ச்சா சரதி ஸவிசிகிச்சா² சரதீதி மோஹஅவிஜ்ஜானுஸயஜவனவஸேன. ஸானுஸயா சரதீதி ஏத்தா²பி வுத்தனயேனேவ ஏகேகம் அனுஸயம் மூலம் கத்வா தஸ்மிம் சித்தே லப்³ப⁴மானகஸேஸானுஸயவஸேன ஸானுஸயதா யோஜேதப்³பா³. ராக³ஸம்பயுத்தாதிஆதி³ ஸராகா³தி³வேவசனமேவ. ஸா ஏவ ஹி சரியா ஸம்பயோக³வஸேன ஸஹ ராகா³தீ³ஹி வத்ததீதி ஸராகா³தி³ஆதீ³னி நாமானி லப⁴தி. ராகா³தீ³ஹி ஸமம் ஏகுப்பாதே³கனிரோதே⁴கவத்தே²காரம்மணாதீ³ஹி பகாரேஹி யுத்தாதி ராக³ஸம்பயுத்தானீதிஆதீ³னி நாமானி லப⁴தி. ஸாயேவ ச யஸ்மா குஸலாதீ³ஹி கம்மேஹி விப்பயுத்தா, அகுஸலாதீ³ஹி கம்மேஹி ஸம்பயுத்தா, தஸ்மாபி அஞ்ஞாணசரியாதி த³ஸ்ஸேதும் குஸலேஹி கம்மேஹீதிஆதி³மாஹ. தத்த² அஞ்ஞாதேதி மோஹஸ்ஸ அஞ்ஞாணலக்க²ணத்தா யதா²ஸபா⁴வேன அஞ்ஞாதே ஆரம்மணே. ஸேஸம் வுத்தத்த²மேவ.

71. ஞாணசரியாயம் யஸ்மா விவட்டனானுபஸ்ஸனாதீ³னம் அனந்தரபச்சயபூ⁴தா ஆவஜ்ஜனகிரியாப்³யாகதா நத்தி², தஸ்மா தேஸம் அத்தா²ய ஆவஜ்ஜனகிரியாப்³யாகதம் அவத்வா விவட்டனானுபஸ்ஸனாத³யோவ வுத்தா. அனுலோமஞாணத்தா²ய ஏவ ஹி ஆவஜ்ஜனா ஹோதி, ததோ விவட்டனானுபஸ்ஸனாமக்³க³ப²லானி. ப²லஸமாபத்தீதி சேத்த² மக்³கா³னந்தரஜா வா ஹோது காலந்தரஜா வா, உபோ⁴பி அதி⁴ப்பேதா. நீராகா³ சரதீதிஆதீ³ஸு ராகா³தீ³னம் படிபக்க²வஸேன நீராகா³தி³தா வேதி³தப்³பா³, விஞ்ஞாணசரியாயம் ராகா³தீ³னம் அபா⁴வமத்தட்டே²ன. ஞாதேதி யதா²ஸபா⁴வதோ ஞாதே. அஞ்ஞா விஞ்ஞாணசரியாதிஆதீ³ஹி திஸ்ஸன்னம் சரியானம் அஞ்ஞமஞ்ஞமஸம்மிஸ்ஸதம் த³ஸ்ஸேதி. விஞ்ஞாணகிச்சமத்தவஸேன ஹி அஹேதுகசித்துப்பாதா³ விஞ்ஞாணசரியா, அஞ்ஞாணகிச்சவதம் த்³வாத³ஸன்னம் அகுஸலசித்துப்பாதா³னம் வஸேனேவ அஞ்ஞாணசரியா, விஸேஸேன ஞாணகிச்சகாரீனம் விபஸ்ஸனாமக்³க³ப²லானம் வஸேன ஞாணசரியா. ஏவமிமா அஞ்ஞமஞ்ஞமஸம்மிஸ்ஸா ச, விபஸ்ஸனம் ட²பேத்வா ஸஹேதுககாமாவசரகிரியாகுஸலா ச, ஸஹேதுககாமாவசரவிபாகா ச, ரூபாவசராரூபாவசரகுஸலாப்³யாகதா ச தீஹி சரியாஹி வினிமுத்தாதி வேதி³தப்³பா³. நிப்³பா³னாரம்மணாய விவட்டனானுபஸ்ஸனாய ஞாணசரியாய நித்³தி³ட்ட²த்தா நிப்³பா³னமக்³க³ப²லபச்சவேக்க²ணபூ⁴தானி ஸேக்கா²ஸேக்கா²னம் பச்சவேக்க²ணஞாணானி ஞாணசரியாய ஸங்க³ஹிதானீதி வேதி³தப்³பா³னி. தானிபி ஹி விஸேஸேன ஞாணகிச்சகரானேவாதி.

சரியானானத்தஞாணனித்³தே³ஸவண்ணனா நிட்டி²தா.