12. ப²லஞாணனித்³தே³ஸவண்ணனா

63. ப²லஞாணனித்³தே³ஸே தம்பயோக³ப்படிப்பஸ்ஸத்³த⁴த்தாதி தஸ்ஸ அஜ்ஜ²த்தப³ஹித்³தா⁴ வுட்டா²னபயோக³ஸ்ஸ படிப்பஸ்ஸத்³த⁴த்தா. மக்³கோ³ ஹி ஸகக்க²ணே கிலேஸப்பஹானேன உப⁴தோ வுட்டா²னபயோக³ம் கரோதி நாம, ப²லக்க²ணே கிலேஸானம் பஹீனத்தா மக்³க³ஸ்ஸ உப⁴தோ வுட்டா²னபயோகோ³ படிப்பஸ்ஸத்³தோ⁴ வூபஸந்தோ நாம ஹோதி. உப்பஜ்ஜதீதி மக்³கா³னந்தரம் ஸகிம் வா த்³விக்க²த்தும் வா உப்பஜ்ஜதி, ப²லஸமாபத்திகாலே பன ப³ஹுக்க²த்தும், நிரோதா⁴ வுட்ட²ஹந்தஸ்ஸ த்³விக்க²த்தும் உப்பஜ்ஜதி, ஸப்³ப³ம்பி ஹி தம் பயோக³ப்படிப்பஸ்ஸத்³த⁴த்தா உப்பஜ்ஜதி. மக்³க³ஸ்ஸேதம் ப²லந்தி ப²லம் அபேக்கி²த்வா நபும்ஸகவசனம் கதம். ஸகதா³கா³மிமக்³க³க்க²ணாதீ³ஸுபி ஏகேகமக்³க³ங்க³வஸேனேவ வுட்டா²னயோஜனா வேதி³தப்³பா³.

ப²லஞாணனித்³தே³ஸவண்ணனா நிட்டி²தா.