13. விமுத்திஞாணனித்³தே³ஸவண்ணனா

64. விமுத்திஞாணனித்³தே³ஸே ஸக்காயதி³ட்டீ²தி விஜ்ஜமானட்டே²ன ஸதி க²ந்த⁴பஞ்சகஸங்கா²தே காயே, ஸயம் வா ஸதீ தஸ்மிம் காயே தி³ட்டீ²தி ஸக்காயதி³ட்டி². விசிகிச்சா²தி விக³தா சிகிச்சா², ஸபா⁴வம் வா விசினந்தோ ஏதாய கிச்ச²தி கிலமதீதி விசிகிச்சா². ஸீலப்³ப³தபராமாஸோதி ஸீலேன ஸுத்³தி⁴ வதேன ஸுத்³தி⁴ ஸீலப்³ப³தேன ஸுத்³தீ⁴தி க³ஹிதஅபி⁴னிவேஸோ. ஸோ ஹி ஸபா⁴வம் அதிக்கமித்வா பரதோ ஆமஸதீதி ஸீலப்³ப³தபராமாஸோ. உபி⁴ன்னம் ஸமானேபி தி³ட்டி²பா⁴வே தக்கஞ்ச பரூபதே³ஸஞ்ச வினா பகதியா ஏவ ஸக்காயதி³ட்டி²க³ஹணதோ பகதிபூ⁴தாய வீஸதிவத்து²காய ஸக்காயதி³ட்டி²யா பஹானேனேவ ஸப்³ப³தி³ட்டி²ப்பஹானத³ஸ்ஸனத்த²ம் ஸக்காயதி³ட்டி² வுத்தா. ஸீலப்³ப³தபராமாஸோ பன ‘‘ஸுத்³தி⁴படிபத³ம் படிபஜ்ஜாமா’’தி படிபன்னானம் படிபதா³ய மிச்சா²பா⁴வத³ஸ்ஸனத்த²ம் விஸும் வுத்தோதி வேதி³தப்³போ³. திண்ணம்பி அனுஸயப்பஹானேனேவ பஹானம் த³ஸ்ஸேதும் தி³ட்டா²னுஸயோ விசிகிச்சா²னுஸயோதி வுத்தம், ந விஸும் கிலேஸத்தா. உபக்கிலேஸாதி கிலேஸேந்தி உபதாபேந்தி விபா³தே⁴ந்தீதி கிலேஸா, தா²மக³தட்டே²ன பு⁴ஸா கிலேஸாதி உபக்கிலேஸா. ஸம்மா ஸமுச்சி²ன்னா ஹோந்தீதி ஸமுச்சே²த³ப்பஹானேன அனுப்பாத³னிரோதே⁴ன ஸம்மா ஸமுச்சி²ன்னா ஹோந்தி. ஸபரியுட்டா²னேஹீதி சித்தம் பரியோனந்த⁴ந்தானி உட்டே²ந்தி உப்பஜ்ஜந்தீதி பரியுட்டா²னானி, ஸமுதா³சாரப்பத்தானம் கிலேஸானமேதம் அதி⁴வசனம். ஸஹ பரியுட்டா²னேஹீதி ஸபரியுட்டா²னானி. தேஹி ஸபரியுட்டா²னேஹி அனுஸயிதஉபக்கிலேஸேஹி. சித்தம் விமுத்தம் ஹோதீதி தேஸம் அப⁴ப்³பு³ப்பத்திகபூ⁴தத்தா ஸந்ததிவஸேன பவத்தமானம் சித்தம் ததோ விமுத்தம் நாம ஹோதி. ததே³வ ஸுட்டு² விமுத்தத்தா ஸுவிமுத்தம். தம்விமுத்திஞாதட்டே²னாதி தஸ்ஸா விமுத்தியா ஜானனட்டே²ன.

விமுத்திஞாணனித்³தே³ஸவண்ணனா நிட்டி²தா.