3. நிஸ்ஸரணியஸுத்தவண்ணனா

72. ததியே நிஸ்ஸரணியாதி நிஸ்ஸரணபடிஸம்யுத்தா. தா⁴துயோதி ஸத்தஸுஞ்ஞஸபா⁴வா. காமானந்தி கிலேஸகாமானஞ்சேவ வத்து²காமானஞ்ச. அத² வா காமானந்தி கிலேஸகாமானம். கிலேஸகாமதோ ஹி நிஸ்ஸரணா வத்து²காமேஹிபி நிஸ்ஸரணம்யேவ ஹோதி, ந அஞ்ஞதா². வுத்தஞ்ஹேதம் –

‘‘ந தே காமா யானி சித்ரானி லோகே,

ஸங்கப்பராகோ³ புரிஸஸ்ஸ காமோ;

திட்ட²ந்தி சித்ரானி ததே²வ லோகே,

அதே²த்த² தீ⁴ரா வினயந்தி ச²ந்த³’’ந்தி. (அ. நி. 6.63);

நிஸ்ஸரணந்தி அபக³மோ. நேக்க²ம்மந்தி பட²மஜ்ஜா²னம், விஸேஸதோ தம் அஸுபா⁴ரம்மணம் த³ட்ட²ப்³ப³ம். யோ பன தம் ஜா²னம் பாத³கம் கத்வா ஸங்கா²ரே ஸம்மஸித்வா ததியமக்³க³ம் பத்வா அனாகா³மிமக்³கே³ன நிப்³பா³னம் ஸச்சி²கரோதி, தஸ்ஸ சித்தம் அச்சந்தமேவ காமேஹி நிஸ்ஸடந்தி இத³ம் உக்கட்ட²தோ காமானம் நிஸ்ஸரணம் வேதி³தப்³ப³ம். ரூபானந்தி ரூபத⁴ம்மானம், விஸேஸேன ஸத்³தி⁴ம் ஆரம்மணேஹி குஸலவிபாககிரியாபே⁴த³தோ ஸப்³பே³ஸம் ரூபாவசரத⁴ம்மானம். ஆருப்பந்தி அரூபாவசரஜ்ஜா²னம். கேசி பன ‘‘காமான’’ந்தி பத³ஸ்ஸ ‘‘ஸப்³பே³ஸம் காமாவசரத⁴ம்மான’’ந்தி அத்த²ம் வத³ந்தி. ‘‘நேக்க²ம்ம’’ந்தி ச ‘‘பஞ்ச ரூபாவசரஜ்ஜா²னானீ’’தி. தம் அட்ட²கதா²ஸு நத்தி², ந யுஜ்ஜதி ச. பூ⁴தந்தி ஜாதம். ஸங்க²தந்தி ஸமேச்ச ஸம்பு⁴ய்ய பச்சயேஹி கதம். படிச்சஸமுப்பன்னந்தி காரணதோ நிப்³ப³த்தம். தீஹிபி பதே³ஹி தேபூ⁴மகே த⁴ம்மே அனவஸேஸதோ பரியாதி³யதி. நிரோதோ⁴தி நிப்³பா³னம். ஏத்த² ச பட²மாய தா⁴துயா காமபரிஞ்ஞா வுத்தா, து³தியாய ரூபபரிஞ்ஞா, ததியாய ஸப்³ப³ஸங்க²தபரிஞ்ஞா ஸப்³ப³ப⁴வஸமதிக்கமோ வுத்தோ.

கா³தா²ஸு காமனிஸ்ஸரணம் ஞத்வாதி ‘‘இத³ம் காமனிஸ்ஸரணம் – ஏவஞ்ச காமதோ நிஸ்ஸரண’’ந்தி ஜானித்வா. அதிக்கமதி ஏதேனாதி அதிக்கமோ, அதிக்கமனூபாயோ, தம் அதிக்கமம் ஆருப்பம் ஞத்வா. ஸப்³பே³ ஸங்கா²ரா ஸமந்தி வூபஸமந்தி ஏத்தா²தி ஸப்³ப³ஸங்கா²ரஸமதோ², நிப்³பா³னம், தம் பு²ஸம் பு²ஸந்தோ. ஸேஸம் ஹேட்டா² வுத்தனயமேவ.

ததியஸுத்தவண்ணனா நிட்டி²தா.