4. ஸந்ததரஸுத்தவண்ணனா

73. சதுத்தே² ரூபேஹீதி ரூபாவசரத⁴ம்மேஹி. ஸந்ததராதி அதிஸயேன ஸந்தா. ரூபாவசரத⁴ம்மா ஹி கிலேஸவிக்க²ம்ப⁴னதோ விதக்காதி³ஓளாரிகங்க³ப்பஹானதோ ஸமாதி⁴பூ⁴மிபா⁴வதோ ச ஸந்தா நாம, ஆருப்பா பன தேஹிபி அங்க³ஸந்ததாய சேவ ஆரம்மணஸந்ததாய ச அதிஸயேன ஸந்தவுத்திகா, தேன ஸந்ததராதி வுத்தா. நிரோதோ⁴தி நிப்³பா³னம். ஸங்கா²ராவஸேஸஸுகு²மபா⁴வப்பத்திதோபி ஹி சதுத்தா²ருப்பதோ ப²லஸமாபத்தியோவ ஸந்ததரா கிலேஸத³ரத²படிபஸ்ஸத்³தி⁴தோ நிப்³பா³னாரம்மணதோ ச, கிமங்க³ம் பன ஸப்³ப³ஸங்கா²ரஸமதோ² நிப்³பா³னம். தேன வுத்தம் ‘‘ஆருப்பேஹி நிரோதோ⁴ ஸந்ததரோ’’தி.

கா³தா²ஸு ரூபூபகா³தி ரூபப⁴வூபகா³. ரூபப⁴வோ ஹி இத⁴ ரூபந்தி வுத்தோ, ‘‘ரூபூபபத்தியா மக்³க³ம் பா⁴வேதீ’’திஆதீ³ஸு விய. அரூபட்டா²யினோதி அரூபாவசரா. நிரோத⁴ம் அப்பஜானந்தா, ஆக³ந்தாரோ புனப்³ப⁴வந்தி ஏதேன ரூபாரூபாவசரத⁴ம்மேஹி நிரோத⁴ஸ்ஸ ஸந்தபா⁴வமேவ த³ஸ்ஸேதி. அரூபேஸு அஸண்டி²தாதி அரூபராகே³ன அரூபப⁴வேஸு அப்பதிட்ட²ஹந்தா, தேபி பரிஜானந்தாதி அத்தோ². நிரோதே⁴ யே விமுச்சந்தீதி ஏத்த² யேதி நிபாதமத்தம். ஸேஸம் ஹேட்டா² வுத்தனயமேவ.

சதுத்த²ஸுத்தவண்ணனா நிட்டி²தா.