10. மாரதே⁴ய்யஸுத்தவண்ணனா

59. த³ஸமஸ்ஸ கா உப்பத்தி? ஏகதி³வஸம் கிர ஸத்தா² ஸேக்க²ப³ஹுலாய பரிஸாய பரிவுதோ நிஸின்னோ தேஸம் அஜ்ஜா²ஸயம் ஓலோகேத்வா உபரி விஸேஸாதி⁴க³மாய உஸ்ஸாஹம் ஜனேதும் அஸேக்க²பூ⁴மிம் தோ²மேந்தோ இத³ம் ஸுத்தம் அபா⁴ஸி. தத்த² அதிக்கம்மாதிஆதீ³ஸு அயம் ஸங்கே²பத்தோ² – அதிக்கம்ம அதிக்கமித்வா அபி⁴ப⁴வித்வா. மாரதே⁴ய்யம் மாரஸ்ஸ விஸயம் இஸ்ஸரியட்டா²னம். ஆதி³ச்சோவ யதா² ஆதி³ச்சோ அப்³பா⁴தி³உபக்கிலேஸவிமுத்தோ அத்தனோ இத்³தி⁴யா ஆனுபா⁴வேன தேஜஸாதி தீஹி கு³ணேஹி ஸமன்னாக³தோ நப⁴ம் அப்³பு⁴ஸ்ஸக்கமானோ ஸப்³ப³ம் ஆகாஸக³தம் தமம் அதிக்கம்ம அதிக்கமித்வா அபி⁴ப⁴வித்வா வித⁴மித்வா விரோசதி, ஓபா⁴ஸதி, தபதி; ஏவமேவ கீ²ணாஸவோ பி⁴க்கு² தீஹி த⁴ம்மேஹி ஸமன்னாக³தோ ஸப்³பு³பக்கிலேஸவிமுத்தோ மாரதே⁴ய்யஸங்கா²தம் தேபூ⁴மகத⁴ம்மப்பவத்தம் அபி⁴ப⁴வித்வா விரோசதீதி.

அஸேக்கே²னாதி ஏத்த² ஸிக்கா²ஸு ஜாதாதி ஸேக்கா², ஸத்தன்னம் ஸேக்கா²னம் ஏதேதி வா ஸேக்கா², அபரியோஸிதஸிக்க²த்தா ஸயமேவ ஸிக்க²ந்தீதி வா ஸேக்கா² மக்³க³த⁴ம்மா ஹேட்டி²மப²லத்தயத⁴ம்மா ச. அக்³க³ப²லத⁴ம்மா பன உபரி ஸிக்கி²தப்³பா³பா⁴வேன ந ஸேக்கா²தி அஸேக்கா². யத்த² ஹி ஸேக்க²பா⁴வாஸங்கா அத்தி², தத்தா²யம் படிஸேதோ⁴தி லோகியத⁴ம்மேஸு நிப்³பா³னே ச அஸேக்க²பா⁴வானாபத்தி த³ட்ட²ப்³பா³. ஸீலஸமாதி⁴பஞ்ஞாஸங்கா²தா ஹி ஸிக்கா² அத்தனோ படிபக்க²கிலேஸேஹி விப்பயுத்தா பரிஸுத்³தா⁴ உபக்கிலேஸானம் ஆரம்மணபா⁴வம்பி அனுபக³மனதோ ஸாதிஸயம் ஸிக்கா²தி வத்தும் யுத்தா, அட்ட²ஸுபி மக்³க³ப²லேஸு விஜ்ஜந்தி; தஸ்மா சதுமக்³க³ஹேட்டி²மப²லத்தயத⁴ம்மா விய அரஹத்தப²லத⁴ம்மாபி ‘‘தாஸு ஸிக்கா²ஸு ஜாதா’’தி ச, தம்ஸிக்கா²ஸமங்கி³னோ அரஹதோ இதரேஸம் விய ஸேக்க²த்தே ஸதி ‘‘ஸேக்க²ஸ்ஸ ஏதே’’தி ச ‘‘ஸிக்கா² ஸீலம் ஏதேஸ’’ந்தி ச ஸேக்கா²தி ஆஸங்கா ஸியுந்தி ததா³ஸங்கானிவத்தனத்த²ம் அஸேக்கா²தி யதா²வுத்தஸேக்க²பா⁴வப்படிஸேத⁴ம் கத்வா வுத்தம். அரஹத்தப²லே பவத்தமானா ஹி ஸிக்கா² பரினிட்டி²தகிச்சத்தா ந ஸிக்கா²கிச்சம் கரோந்தி, கேவலம் ஸிக்கா²ப²லபா⁴வேன பவத்தந்தி. தஸ்மா தா ந ஸிக்கா²வசனம் அரஹந்தி, நாபி தம்ஸமங்கி³னோ ஸேக்க²வசனம், ந ச தம்ஸம்பயுத்தத⁴ம்மா ஸிக்க²னஸீலா. ‘‘ஸிக்கா²ஸு ஜாதா’’தி ஏவமாதி³அத்தே²ஹி அக்³க³ப²லத⁴ம்மா ஸேக்கா² ந ஹோந்தி. ஹேட்டி²மப²லேஸு பன ஸிக்கா² ஸகதா³கா³மிமக்³க³விபஸ்ஸனாதீ³னம் உபனிஸ்ஸயபா⁴வதோ ஸிக்கா²கிச்சம் கரோந்தீதி ஸிக்கா²வசனம் அரஹந்தி, தம்ஸமங்கி³னோ ச ஸேக்க²வசனம், தம்ஸம்பயுத்தா த⁴ம்மா ச ஸிக்க²னஸீலா. ஸேக்க²த⁴ம்மா யதா²வுத்தேஹி அத்தே²ஹி ஸேக்கா² ஹோந்தியேவ.

அத² வா ஸேக்கா²தி அபரியோஸிதஸிக்கா²னம் வசனந்தி, அஸேக்கா²தி பத³ம் பரியோஸிதஸிக்கா²னம் த³ஸ்ஸனந்தி ந லோகியத⁴ம்மனிப்³பா³னானம் அஸேக்க²பா⁴வாபத்தி. வுட்³டி⁴ப்பத்தா ஸேக்கா² அஸேக்கா² ச ஸேக்க²த⁴ம்மேஸு ஏவ கேஸஞ்சி வுட்³டி⁴ப்பத்தானம் அஸேக்க²தா ஆபஜ்ஜதீதி அரஹத்தமக்³க³த⁴ம்மா வுட்³டி⁴ப்பத்தா. யதா²வுத்தேஹி ச அத்தே²ஹி ஸேக்கா²தி கத்வா அஸேக்கா² ஆபன்னாதி சே? தம் ந, ஸதி³ஸேஸு தப்³போ³ஹாரதோ. அரஹத்தமக்³க³தோ ஹி நின்னானாகரணம் அரஹத்தப²லம் ட²பேத்வா பரிஞ்ஞாதி³கிச்சகரணம் விபாகபா⁴வஞ்ச, தஸ்மா தே ஏவ ஸேக்கா² த⁴ம்மா அரஹத்தப²லபா⁴வம் ஆபன்னாதி ஸக்கா வத்தும். குஸலஸுக²தோ ச விபாகஸுக²ம் ஸந்ததரதாய பணீததரந்தி வுட்³டி⁴ப்பத்தாவ தே த⁴ம்மா ஹோந்தீதி ‘‘அஸேக்கா²’’தி வுச்சந்தி.

தே பன அஸேக்க²த⁴ம்மே க²ந்த⁴வஸேன இத⁴ திதா⁴ விப⁴ஜித்வா தேஹி ஸமன்னாக³மேன கீ²ணாஸவஸ்ஸ ஆனுபா⁴வம் விபா⁴வேந்தோ ப⁴க³வா ‘‘அஸேக்கே²ன ஸீலக்க²ந்தே⁴னா’’திஆதி³மாஹ. தத்த² ஸீலஸத்³த³ஸ்ஸ அத்தோ² ஹேட்டா² வுத்தோ. க²ந்த⁴ஸத்³தோ³ பன ராஸிம்ஹி பஞ்ஞத்தியம் ருள்ஹியம் கு³ணேதி ப³ஹூஸு அத்தே²ஸு தி³ட்ட²ப்பயோகோ³. ததா² ஹி ‘‘அஸங்கே²ய்யோ அப்பமேய்யோ மஹாஉத³கக்க²ந்தோ⁴த்வேவ ஸங்க்²யம் க³ச்ச²தீ’’திஆதீ³ஸு (அ. நி. 4.51; 6.37) ராஸிம்ஹி ஆக³தோ. ‘‘அத்³த³ஸா கோ² ப⁴க³வா மஹந்தம் தா³ருக்க²ந்த⁴ம் க³ங்கா³ய நதி³யா ஸோதேன வுய்ஹமான’’ந்திஆதீ³ஸு (ஸம். நி. 4.241) பஞ்ஞத்தியம். ‘‘சித்தம் மனோ மானஸம் ஹத³யம் பண்ட³ரம் மனோ மனாயதனம் விஞ்ஞாணம் விஞ்ஞாணக்க²ந்தோ⁴’’திஆதீ³ஸு (த⁴. ஸ. 63, 65) ருள்ஹியம். ‘‘ந கோ², ஆவுஸோ விஸாக², அரியேன அட்ட²ங்கி³கேன மக்³கே³ன தயோ க²ந்தா⁴ ஸங்க³ஹிதா, தீஹி ச கோ², ஆவுஸோ விஸாக², க²ந்தே⁴ஹி அரியோ அட்ட²ங்கி³கோ மக்³கோ³ ஸங்க³ஹிதோ’’திஆதீ³ஸு (ம. நி. 1.462) கு³ணே. இதா⁴பி கு³ணேயேவ த³ட்ட²ப்³போ³. தஸ்மா அஸேக்கே²ன ஸீலஸங்கா²தேன கு³ணேனாதி அத்தோ². ஸமன்னாக³தோதி ஸம்பயுத்தோ ஸமங்கீ³பூ⁴தோ. ஸமாத³ஹதி ஏதேன, ஸயம் வா ஸமாத³ஹதி, ஸமாதா⁴னமேவ வாதி ஸமாதி⁴. பகாரேஹி ஜானாதி யதா²ஸபா⁴வம் படிவிஜ்ஜ²தீதி பஞ்ஞா. ஸீலமேவ க²ந்தோ⁴ ஸீலக்க²ந்தோ⁴. ஸேஸேஸுபி ஏஸேவ நயோ.

தத்த² அக்³க³ப²லபூ⁴தா ஸம்மாவாசா, ஸம்மாகம்மந்தோ, ஸம்மாஆஜீவோ ச ஸபா⁴வேனேவ அஸேக்கோ² ஸீலக்க²ந்தோ⁴ நாம, ததா² ஸம்மாஸமாதி⁴ அஸேக்கோ² ஸமாதி⁴க்க²ந்தோ⁴. தது³பகாரகதோ பன ஸம்மாவாயாமஸம்மாஸதியோ ஸமாதி⁴க்க²ந்தே⁴ ஸங்க³ஹம் க³ச்ச²ந்தி. ததா² ஸம்மாதி³ட்டி² அஸேக்கோ² பஞ்ஞாக்க²ந்தோ⁴. தது³பகாரகதோ ஸம்மாஸங்கப்போ பஞ்ஞாக்க²ந்தே⁴ ஸங்க³ஹம் க³ச்ச²தீதி ஏவமேத்த² அட்ட²பி அரஹத்தப²லத⁴ம்மா தீஹி க²ந்தே⁴ஹி ஸங்க³ஹேத்வா த³ஸ்ஸிதாதி வேதி³தப்³ப³ம்.

யஸ்ஸ ஏதே ஸுபா⁴விதாதி யேன அரஹதா ஏதே ஸீலாத³யோ அஸேக்க²த⁴ம்மக்க²ந்தா⁴ ஸுபா⁴விதா ஸுட்டு² வட்³டி⁴தா, ஸோ ஆதி³ச்சோவ விரோசதீதி ஸம்ப³ந்தோ⁴. ‘‘யஸ்ஸ சேதே’’திபி பட²ந்தி. தேஸஞ்ச ஸத்³தோ³ நிபாதமத்தம். ஏவமேதஸ்மிம் வக்³கே³ பட²மஸுத்தே வட்டம், பரியோஸானஸுத்தே விவட்டம், இதரேஸு வட்டவிவட்டம் கதி²தம்.

த³ஸமஸுத்தவண்ணனா நிட்டி²தா.

பட²மவக்³க³வண்ணனா நிட்டி²தா.