8. படிஸல்லானஸுத்தவண்ணனா

45. அட்ட²மே படிஸல்லானராமாதி தேஹி தேஹி ஸத்தஸங்கா²ரேஹி படினிவத்தித்வா ஸல்லானம் படிஸல்லானம், ஏகவிஹாரோ ஏகமந்தஸேவிதா, காயவிவேகோதி அத்தோ². தம் படிஸல்லானம் ரமந்தி ரோசந்தீதி படிஸல்லானராமா. ‘‘படிஸல்லானாராமா’’திபி பாடோ². யதா² வுத்தம் படிஸல்லானம் ஆரமிதப்³ப³தோ ஆராமோ ஏதேஸந்தி படிஸல்லானாராமா. விஹரதா²தி ஏவம்பூ⁴தா ஹுத்வா விஹரதா²தி அத்தோ². படிஸல்லானே ரதா நிரதா ஸம்முதி³தாதி படிஸல்லானரதா. ஏத்தாவதா ஜாக³ரியானுயோகோ³, தஸ்ஸ நிமித்தபூ⁴தா வூபகட்ட²காயதா ச த³ஸ்ஸிதா. ஜாக³ரியானுயோகோ³, ஸீலஸம்வரோ, இந்த்³ரியேஸு, கு³த்தத்³வாரதா, போ⁴ஜனே மத்தஞ்ஞுதா, ஸதிஸம்பஜஞ்ஞந்தி இமேஹி த⁴ம்மேஹி வினா ந வத்ததீதி தேபி இத⁴ அத்த²தோ வுத்தா ஏவாதி வேதி³தப்³பா³.

அஜ்ஜ²த்தம் சேதோஸமத²மனுயுத்தாதி அத்தனோ சித்தஸமதே² அனுயுத்தா. அஜ்ஜ²த்தம் அத்தனோதி ச ஏதம் ஏகத்த²ம், ப்³யஞ்ஜனமேவ நானம். பு⁴ம்மத்தே² சேதம் ஸமத²ந்தி அனுஸத்³த³யோகே³ன உபயோக³வசனம். அனிராகதஜ்ஜா²னாதி ப³ஹி அனீஹதஜ்ஜா²னா அவினாஸிதஜ்ஜா²னா வா. நீஹரணம் வினாஸோ வாதி இத³ம் நிராகதம் நாம ‘‘த²ம்ப⁴ம் நிரம்கத்வா நிவாதவுத்தீ’’திஆதீ³ஸு (ஸு. நி. 328) விய. விபஸ்ஸனாய ஸமன்னாக³தாதி ஸத்தவிதா⁴ய அனுபஸ்ஸனாய யுத்தா. ஸத்தவிதா⁴ அனுபஸ்ஸனா நாம அனிச்சானுபஸ்ஸனா, து³க்கா²னுபஸ்ஸனா, அனத்தானுபஸ்ஸனா, நிப்³பி³தா³னுபஸ்ஸனா, விராகா³னுபஸ்ஸனா, நிரோதா⁴னுபஸ்ஸனா, படினிஸ்ஸக்³கா³னுபஸ்ஸனா ச, தா விஸுத்³தி⁴மக்³கே³ வித்தா²ரிதாவ.

ப்³ரூஹேதாரோ ஸுஞ்ஞாகா³ரானந்தி வட்³டே⁴தாரோ ஸுஞ்ஞாகா³ரானம். ஏத்த² ச ‘‘ஸுஞ்ஞாகா³ரான’’ந்தி யம்கிஞ்சி விவித்தம் பா⁴வனானுயோக³ஸ்ஸ அனுச்ச²விகட்டா²னம். ஸமத²விபஸ்ஸனாவஸேன கம்மட்டா²னம் க³ஹேத்வா ரத்திந்தி³வம் ஸுஞ்ஞாகா³ரம் பவிஸித்வா பா⁴வனானுயோக³வஸேன நிஸீத³மானா பி⁴க்கூ² ‘‘ப்³ரூஹேதாரோ ஸுஞ்ஞாகா³ரான’’ந்தி வேதி³தப்³பா³. ஏகபூ⁴மிகாதி³பாஸாதே³பி பன வாஸம் குருமானா ஜா²யினோ ஸுஞ்ஞாகா³ரானம் ப்³ரூஹேதாரோத்வேவ வேதி³தப்³பா³.

ஏத்த² ச யா ‘‘படிஸல்லானராமா, பி⁴க்க²வே, விஹரத² படிஸல்லானரதா’’தி வூபகட்ட²காயதா விஹிதா, ஸா பரிஸுத்³த⁴ஸீலஸ்ஸ, ந அஸீலஸ்ஸ அவிஸுத்³த⁴ஸீலஸ்ஸ வா தஸ்ஸ ரூபாரம்மணாதி³தோ சித்தவினிவத்தனஸ்ஸேவ அபா⁴வதோதி அத்த²தோ ஸீலவிஸுத்³தி⁴ த³ஸ்ஸிதாதி வுத்தோவாயமத்தோ². ‘‘அஜ்ஜ²த்தம் சேதோஸமத²மனுயுத்தா அனிராகதஜ்ஜா²னா’’தி பத³த்³வயேன ஸமாதி⁴பா⁴வனா, ‘‘விபஸ்ஸனாய ஸமன்னாக³தா’’தி இமினா பஞ்ஞாபா⁴வனா விஹிதாதி லோகியா திஸ்ஸோ ஸிக்கா² த³ஸ்ஸிதா.

இதா³னி தாஸு பதிட்டி²தஸ்ஸ அவஸ்ஸம்பா⁴விப²லம் த³ஸ்ஸேதும் ‘‘படிஸல்லானராமான’’ந்திஆதி³ வுத்தம். தத்த² ப்³ரூஹேதானந்தி வட்³டே⁴தானம். த்³வின்னம் ப²லானந்தி ததியசதுத்த²ப²லானம். பாடிகங்க²ந்தி இச்சி²தப்³ப³ம் அவஸ்ஸம்பா⁴வீ. அஞ்ஞாதி அரஹத்தம். தஞ்ஹி ஹேட்டி²மமக்³க³ஞாணேஹி ஞாதமரியாத³ம் அனதிக்கமித்வா ஜானனதோ பரிபுண்ணஜானனத்தா உபரி ஜானனகிச்சாபா⁴வதோ ச ‘‘அஞ்ஞா’’தி வுச்சதி. ஸதி வா உபாதி³ஸேஸேதி ஸதி வா கிலேஸூபாதி³ஸேஸே, பஹாதும் அஸக்குணேய்யே ஸதி. ஞாணே ஹி அபரிபக்கே யே தேன பரிபக்கேன பஹாதப்³ப³கிலேஸா, தே ந பஹீயந்தி. தம் ஸந்தா⁴யாஹ ‘‘ஸதி வா உபாதி³ஸேஸே’’தி. ஸதி ச கிலேஸே க²ந்தா⁴பி⁴ஸங்கா²ரா திட்ட²ந்தி ஏவ. இதி இமஸ்மிம் ஸுத்தே அனாகா³மிப²லம் அரஹத்தந்தி த்³வே த⁴ம்மா த³ஸ்ஸிதா. யதா² சேத்த², ஏவம் இதோ பரேஸு த்³வீஸு ஸுத்தேஸு.

கா³தா²ஸு யே ஸந்தசித்தாதி யே யோகா³வசரா தத³ங்க³வஸேன விக்க²ம்ப⁴னவஸேவ ச ஸமிதகிலேஸதாய ஸந்தசித்தா. நேபக்கம் வுச்சதி பஞ்ஞா, தாய ஸமன்னாக³தத்தா நிபகா. இமினா தேஸம் கம்மட்டா²னபரிஹரணஞாணம் த³ஸ்ஸேதி. ஸதிமந்தோ ச ஜா²யினோதி டா²னனிஸஜ்ஜாதீ³ஸு கம்மட்டா²னாவிஜஹனஹேதுபூ⁴தாய ஸதியா ஸதிமந்தோ, ஆரம்மணூபனிஜ்ஜா²னலக்க²ணேன ஜா²னேன ஜா²யினோ. ஸம்மா த⁴ம்மம் விபஸ்ஸந்தி, காமேஸு அனபேக்கி²னோதி புப்³பே³யேவ ‘‘அட்டி²கங்கலூபமா காமா’’திஆதி³னா (ம. நி. 1.234; பாசி. 417) வத்து²காமேஸு கிலேஸகாமேஸு ச ஆதீ³னவபச்சவேக்க²ணேன அனபேக்கி²னோ அனத்தி²கா தே பஹாய அதி⁴க³தம் உபசாரஸமாதி⁴ம் அப்பனாஸமாதி⁴ம் வா பாத³கம் கத்வா நாமரூபம் தஸ்ஸ பச்சயே ச பரிக்³க³ஹேத்வா கலாபஸம்மஸனாதி³க்கமேன ஸம்மா அவிபரீதம் பஞ்சக்க²ந்த⁴த⁴ம்மம் அனிச்சாதி³தோ விபஸ்ஸந்தி.

அப்பமாத³ரதாதி வுத்தப்பகாராய ஸமத²விபஸ்ஸனாபா⁴வனாய அப்பமஜ்ஜனே ரதா அபி⁴ரதா தத்த² அப்பமாதே³னேவ ரத்திந்தி³வம் வீதினாமேந்தா. ஸந்தாதி ஸமானா. ‘‘ஸத்தா’’திபி பாடோ², புக்³க³லாதி அத்தோ². பமாதே³ ப⁴யத³ஸ்ஸினோதி நிரயூபபத்திஆதி³கம் பமாதே³ ப⁴யம் பஸ்ஸந்தா. அப⁴ப்³பா³ பரிஹானாயாதி தே ஏவரூபா ஸமத²விபஸ்ஸனாத⁴ம்மேஹி மக்³க³ப²லேஹி வா பரிஹானாய அப⁴ப்³பா³. ஸமத²விபஸ்ஸனாதோ ஹி ஸம்பத்ததோ ந பரிஹாயந்தி, இதரானி ச அப்பத்தானி பாபுணந்தி. நிப்³பா³னஸ்ஸேவ ஸந்திகேதி நிப்³பா³னஸ்ஸ ச அனுபாதா³பரினிப்³பா³னஸ்ஸ ச ஸந்திகே ஏவ, ந சிரஸ்ஸேவ நம் அதி⁴க³மிஸ்ஸந்தீதி.

அட்ட²மஸுத்தவண்ணனா நிட்டி²தா.