9. ஸிக்கா²னிஸம்ஸஸுத்தவண்ணனா

46. நவமே ஸிக்கா²னிஸம்ஸாதி ஏத்த² ஸிக்கி²தப்³பா³தி ஸிக்கா², ஸா திவிதா⁴ அதி⁴ஸீலஸிக்கா², அதி⁴சித்தஸிக்கா², அதி⁴பஞ்ஞாஸிக்கா²தி. திவிதா⁴பி சேஸா ஸிக்கா² ஆனிஸம்ஸா ஏதேஸம், ந லாப⁴ஸக்காரஸிலோகாதி ஸிக்கா²னிஸம்ஸா. விஹரதா²தி ஸிக்கா²னிஸம்ஸா ஹுத்வா விஹரத², தீஸு ஸிக்கா²ஸு ஆனிஸம்ஸத³ஸ்ஸாவினோ ஹுத்வா தாஹி ஸிக்கா²ஹி லத்³த⁴ப்³ப³ம் ஆனிஸம்ஸமேவ ஸம்பஸ்ஸந்தா விஹரதா²தி அத்தோ². பஞ்ஞுத்தராதி தாஸு ஸிக்கா²ஸு யா அதி⁴பஞ்ஞாஸிக்கா²ஸங்கா²தா பஞ்ஞா, ஸா உத்தரா பதா⁴னா விஸிட்டா² ஏதேஸந்தி பஞ்ஞுத்தரா. யே ஹி ஸிக்கா²னிஸம்ஸா விஹரந்தி, தே பஞ்ஞுத்தரா ப⁴வந்தீதி. விமுத்திஸாராதி அரஹத்தப²லஸங்கா²தா விமுத்தி ஸாரம் ஏதேஸந்தி விமுத்திஸாரா, யதா²வுத்தம் விமுத்திம்யேவ ஸாரதோ க³ஹேத்வா டி²தாதி அத்தோ². யே ஹி ஸிக்கா²னிஸம்ஸா பஞ்ஞுத்தரா ச, ந தே ப⁴வவிஸேஸம் பத்தே²ந்தி, அபிச கோ² விப⁴வம் ஆகங்க²ந்தா விமுத்திம்யேவ ஸாரதோ பச்சேந்தி. ஸதாதி⁴பதேய்யாதி ஜேட்ட²ககரணட்டே²ன ஸதி அதி⁴பதேய்யம் ஏதேஸந்தி ஸதாதி⁴பதேய்யா அதி⁴பதி ஏவ அதி⁴பதேய்யந்தி கத்வா, சதூஸு ஸதிபட்டா²னேஸு ஸுப்பதிட்டி²தசித்தா காயானுபஸ்ஸனாதி³முகே²ன ஸமத²விபஸ்ஸனாபா⁴வனானுயுத்தாதி அத்தோ².

அத² வா ஸிக்கா²னிஸம்ஸாதி பி⁴க்க²வே, ஏவரூபே து³ல்லப⁴க்க²ணபடிலாபே⁴ திவித⁴ஸிக்கா²ஸிக்க²னமேவ ஆனிஸம்ஸம் கத்வா விஹரத², ஏவம் விஹரந்தா ச பஞ்ஞுத்தரா பஞ்ஞாய உத்தரா லோகுத்தரபஞ்ஞாய ஸமன்னாக³தா ஹுத்வா விஹரத², ஏவம்பூ⁴தா ச விமுத்திஸாரா நிப்³பா³னஸாரா அனஞ்ஞஸாரா விஹரத². ததா²பா⁴வஸ்ஸ சாயம் உபாயோ, யம் ஸதாதி⁴பதேய்யா விஹரத², ஸதிபட்டா²னபா⁴வனாய யுத்தப்பயுத்தா ஹோத², ஸப்³ப³த்த² வா ஸதாரக்கே²ன சேதஸா விஹரதா²தி ஏவமேத்த² அத்தோ² வேதி³தப்³போ³. இதி ப⁴க³வா தீஸு ஸிக்கா²ஸு பி⁴க்கூ² நியோஜேந்தோ யதா² தா ஸிக்கி²தப்³பா³, யேன ச பாரிபூரிம் க³ச்ச²ந்தி, தம் ஸங்கே²பேனேவ த³ஸ்ஸேத்வா இதா³னி யதா²னுஸிட்ட²ம் படிபஜ்ஜமானானம் ப²லவிஸேஸத³ஸ்ஸனேன தஸ்ஸா படிபத்தியா அமோக⁴பா⁴வம் பகாஸேந்தோ ‘‘ஸிக்கா²னிஸம்ஸான’’ந்திஆதி³மாஹ. தம் வுத்தத்த²மேவ.

கா³தா²ஸு பரிபுண்ணஸிக்க²ந்தி அக்³க³ப²லப்பத்தியா பரிஸுத்³த⁴ஸிக்க²ம், அஸேக்க²ந்தி அத்தோ². அபஹானத⁴ம்மந்தி ஏத்த² பஹானத⁴ம்மா வுச்சந்தி குப்பா விமுத்தியோ. பஹானத⁴ம்மோதி ஹி ஹானத⁴ம்மோ குப்பத⁴ம்மோ. ந பஹானத⁴ம்மோதி அபஹானத⁴ம்மோ, அகுப்பத⁴ம்மோ. ‘‘அப்பஹானத⁴ம்மோ’’திபி பாளி, ஸோ ஏவ அத்தோ². க²யோ ஏவ அந்தோதி க²யந்தோ, ஜாதியா க²யந்தோ ஜாதிக²யந்தோ, நிப்³பா³னம். க²யோ வா மரணம், ஜாதிக²யந்தோ நிப்³பா³னமேவ, தஸ்ஸ தி³ட்ட²த்தா ஜாதிக²யந்தத³ஸ்ஸீ.

தஸ்மாதி யஸ்மா ஸிக்கா²பாரிபூரியா அயம் ஜராபாரங்க³மனபரியோஸானோ ஆனிஸம்ஸோ, தஸ்மா. ஸதா³தி ஸப்³ப³காலம். ஜா²னரதாதி லக்க²ணூபனிஜ்ஜா²னே, ஆரம்மணூபனிஜ்ஜா²னேதி து³விதே⁴பி ஜா²னே ரதா, ததோ ஏவ ஸமாஹிதா. மாரம் ஸஸேனம் அபி⁴பு⁴ய்யாதி கிலேஸஸேனாய அனட்ட²ஸேனாய ச ஸஸேனம் அனவஸிட்ட²ம் சதுப்³பி³த⁴ம்பி மாரம் அபி⁴ப⁴வித்வா. தே³வபுத்தமாரஸ்ஸபி ஹி கு³ணமாரணே ஸஹாயபா⁴வூபக³மனதோ கிலேஸா ‘‘ஸேனா’’தி வுச்சந்தி. ததா² ரோகா³த³யோ அனட்டா² மச்சுமாரஸ்ஸ. யதா²ஹ –

‘‘காமா தே பட²மா ஸேனா, து³தியா அரதி வுச்சதி;

ததியா கு²ப்பிபாஸா தே, சதுத்தீ² தண்ஹா பவுச்சதி.

‘‘பஞ்சமீ தி²னமித்³த⁴ம் தே, ச²ட்டா² பீ⁴ரூ பவுச்சதி;

ஸத்தமீ விசிகிச்சா² தே, மக்கோ² த²ம்போ⁴ ச அட்ட²மோ.

‘‘லாபோ⁴ ஸிலோகோ ஸக்காரோ, மிச்சா²லத்³தோ⁴ ச யோ யஸோ;

யோ சத்தானம் ஸமுக்கம்ஸே, பரே ச அவஜானதி.

‘‘ஏஸா நமுசி தே ஸேனா, கண்ஹஸ்ஸாபி⁴ப்பஹாரினீ;

ந நம் அஸூரோ ஜினாதி, ஜேத்வா ச லப⁴தே ஸுக²’’ந்தி. (ஸு. நி. 438-441; மஹானி. 28);

யதா² சாஹ –

‘‘அஜ்ஜேவ கிச்சமாதப்பம், கோ ஜஞ்ஞா மரணம் ஸுவே;

ந ஹி நோ ஸங்க³ரம் தேன, மஹாஸேனேன மச்சுனா’’தி. (ம. நி. 3.280; ஜா. 2.22.121);

ப⁴வத² ஜாதிமரணஸ்ஸ பாரகா³தி ஜாதியா மரணஸ்ஸ ச பாரகா³மினோ நிப்³பா³னகா³மினோ ப⁴வதா²தி.

நவமஸுத்தவண்ணனா நிட்டி²தா.