5. ஸுக்கத⁴ம்மஸுத்தவண்ணனா

42. பஞ்சமே ஸுக்காதி ந வண்ணஸுக்கதாய ஸுக்கா, ஸுக்கபா⁴வாய பன பரமவோதா³னாய ஸம்வத்தந்தீதி நிப்ப²த்திஸுக்கதாய ஸுக்கா. ஸரஸேனபி ஸப்³பே³ குஸலா த⁴ம்மா ஸுக்கா ஏவ கண்ஹபா⁴வபடிபக்க²தோ. தேஸஞ்ஹி உப்பத்தியா சித்தம் பப⁴ஸ்ஸரம் ஹோதி பரிஸுத்³த⁴ம். த⁴ம்மாதி குஸலா த⁴ம்மா. லோகந்தி ஸத்தலோகம். பாலேந்தீதி ஆதா⁴ரஸந்தா⁴ரணேன மரியாத³ம் ட²பேந்தா ரக்க²ந்தி. ஹிரீ ச ஓத்தப்பஞ்சாதி ஏத்த² ஹிரியதி ஹிரியிதப்³பே³ன, ஹிரியந்தி ஏதேனாதி வா ஹிரீ. வுத்தம்பி சேதம் ‘‘யம் ஹிரியதி ஹிரியிதப்³பே³ன, ஹிரியதி பாபகானம் அகுஸலானம் த⁴ம்மானம் ஸமாபத்தியா, அயம் வுச்சதி ஹிரீ’’தி (த⁴. ஸ. 30). ஓத்தப்பதி ஓத்தப்பிதப்³பே³ன, ஓத்தப்பந்தி ஏதேனாதி வா ஓத்தப்பம். வுத்தம்பிசேதம் ‘‘யம் ஓத்தப்பதி ஓத்தப்பிதப்³பே³ன, ஓத்தப்பதி பாபகானம் அகுஸலானம் த⁴ம்மானம் ஸமாபத்தியா, இத³ம் வுச்சதி ஓத்தப்ப’’ந்தி (த⁴. ஸ. 31).

தத்த² அஜ்ஜ²த்தஸமுட்டா²னா ஹிரீ, ப³ஹித்³தா⁴ஸமுட்டா²னம் ஓத்தப்பம். அத்தாதி⁴பதேய்யா ஹிரீ, லோகாதி⁴பதேய்யம் ஓத்தப்பம். லஜ்ஜாஸபா⁴வஸண்டி²தா ஹிரீ, ப⁴யஸபா⁴வஸண்டி²தம் ஓத்தப்பம். ஸப்பதிஸ்ஸவலக்க²ணா ஹிரீ, வஜ்ஜபீ⁴ருகப⁴யத³ஸ்ஸாவிலக்க²ணம் ஓத்தப்பம்.

தத்த² அஜ்ஜ²த்தஸமுட்டா²னம் ஹிரிம் சதூஹி காரணேஹி ஸமுட்டா²பேதி – ஜாதிம் பச்சவேக்கி²த்வா, வயம் பச்சவேக்கி²த்வா, ஸூரபா⁴வம் பச்சவேக்கி²த்வா, பா³ஹுஸச்சம் பச்சவேக்கி²த்வா. கத²ம்? ‘‘பாபகரணம் நாமேதம் ந ஜாதிஸம்பன்னானம் கம்மம், ஹீனஜச்சானம் கேவட்டாதீ³னம் கம்மம், மாதி³ஸஸ்ஸ ஜாதிஸம்பன்னஸ்ஸ இத³ம் கம்மம் காதும் ந யுத்த’’ந்தி ஏவம் தாவ ஜாதிம் பச்சவேக்கி²த்வா பாணாதிபாதாதி³பாபகம்மம் அகரோந்தோ ஹிரிம் ஸமுட்டா²பேதி. ததா² ‘‘பாபகரணம் நாமேதம் த³ஹரேஹி கத்தப்³ப³கம்மம், மாதி³ஸஸ்ஸ வயே டி²தஸ்ஸ இத³ம் கம்மம் காதும் ந யுத்த’’ந்தி ஏவம் வயம் பச்சவேக்கி²த்வா பாணாதிபாதாதி³பாபகம்மம் அகரோந்தோ ஹிரிம் ஸமுட்டா²பேதி. ததா² ‘‘பாபகரணம் நாமேதம் து³ப்³ப³லஜாதிகானம் கம்மம், மாதி³ஸஸ்ஸ ஸூரபா⁴வஸம்பன்னஸ்ஸ இத³ம் கம்மம் காதும் ந யுத்த’’ந்தி ஏவம் ஸூரபா⁴வம் பச்சவேக்கி²த்வா பாணாதிபாதாதி³பாபகம்மம் அகரோந்தோ ஹிரிம் ஸமுட்டா²பேதி. ததா² ‘‘பாபகரணம் நாமேதம் அந்த⁴பா³லானம் கம்மம், ந பண்டி³தானம், மாதி³ஸஸ்ஸ பண்டி³தஸ்ஸ ப³ஹுஸ்ஸுதஸ்ஸ இத³ம் கம்மம் காதும் ந யுத்த’’ந்தி ஏவம் பா³ஹுஸச்சம் பச்சவேக்கி²த்வா பாணாதிபாதாதி³பாபகம்மம் அகரோந்தோ ஹிரிம் ஸமுட்டா²பேதி. ஏவம் அஜ்ஜ²த்தஸமுட்டா²னம் ஹிரிம் சதூஹி காரணேஹி ஸமுட்டா²பேதி. ஸமுட்டா²பேத்வா ச பன அத்தனோ சித்தே ஹிரிம் பவேஸேத்வா பாபகம்மம் ந கரோதி. ஏவம் ஹிரீ அஜ்ஜ²த்தஸமுட்டா²னா நாம ஹோதி.

கத²ம் ஓத்தப்பம் ப³ஹித்³தா⁴ஸமுட்டா²னம் நாம? ‘‘ஸசே த்வம் பாபகம்மம் கரிஸ்ஸஸி, சதூஸு பரிஸாஸு க³ரஹப்பத்தோ ப⁴விஸ்ஸஸி.

‘‘க³ரஹிஸ்ஸந்தி தம் விஞ்ஞூ, அஸுசிம் நாக³ரிகோ யதா²;

வஜ்ஜிதோ ஸீலவந்தேஹி, கத²ம் பி⁴க்கு² கரிஸ்ஸஸீ’’தி. –

பச்சவேக்க²ந்தோ ஹி ப³ஹித்³தா⁴ஸமுட்டி²தேன ஓத்தப்பேன பாபகம்மம் ந கரோதி. ஏவம் ஓத்தப்பம் ப³ஹித்³தா⁴ஸமுட்டா²னம் நாம ஹோதி.

கத²ம் ஹிரீ அத்தாதி⁴பதேய்யா நாம? இதே⁴கச்சோ குலபுத்தோ அத்தானம் அதி⁴பதிம் ஜேட்ட²கம் கத்வா ‘‘மாதி³ஸஸ்ஸ ஸத்³தா⁴பப்³ப³ஜிதஸ்ஸ ப³ஹுஸ்ஸுதஸ்ஸ து⁴தவாதி³ஸ்ஸ ந யுத்தம் பாபகம்மம் காது’’ந்தி பாபகம்மம் ந கரோதி. ஏவம் ஹிரீ அத்தாதி⁴பதேய்யா நாம ஹோதி. தேனாஹ ப⁴க³வா –

‘‘ஸோ அத்தானம்யேவ அதி⁴பதிம் கரித்வா அகுஸலம் பஜஹதி, குஸலம் பா⁴வேதி, ஸாவஜ்ஜம் பஜஹதி, அனவஜ்ஜம் பா⁴வேதி, ஸுத்³த⁴மத்தானம் பரிஹரதீ’’தி (அ. நி. 3.40).

கத²ம் ஓத்தப்பம் லோகாதி⁴பதேய்யம் நாம? இதே⁴கச்சோ குலபுத்தோ லோகம் அதி⁴பதிம் ஜேட்ட²கம் கத்வா பாபகம்மம் ந கரோதி. யதா²ஹ –

‘‘மஹா கோ² பனாயம் லோகஸன்னிவாஸோ. மஹந்தஸ்மிம் கோ² பன லோகஸன்னிவாஸே ஸந்தி ஸமணப்³ராஹ்மணா இத்³தி⁴மந்தோ தி³ப்³ப³சக்கு²கா பரசித்தவிது³னோ, தே தூ³ரதோபி பஸ்ஸந்தி, ஆஸன்னாபி ந தி³ஸ்ஸந்தி, சேதஸாபி சித்தம் பஜானந்தி, தேபி மம் ஏவம் ஜானிஸ்ஸந்தி ‘பஸ்ஸத² போ⁴ இமம் குலபுத்தம், ஸத்³தா⁴ அகா³ரஸ்மா அனகா³ரியம் பப்³ப³ஜிதோ ஸமானோ வோகிண்ணோ விஹரதி பாபகேஹி அகுஸலேஹி த⁴ம்மேஹீ’தி. ஸந்தி தே³வதா இத்³தி⁴மந்தினியோ தி³ப்³ப³சக்கு²கா பரசித்தவிது³னியோ, தா தூ³ரதோபி பஸ்ஸந்தி, ஆஸன்னாபி ந தி³ஸ்ஸந்தி, சேதஸாபி சித்தம் பஜானந்தி, தாபி மம் ஏவம் ஜானிஸ்ஸந்தி ‘பஸ்ஸத² போ⁴ இமம், குலபுத்தம், ஸத்³தா⁴ அகா³ரஸ்மா அனகா³ரியம் பப்³ப³ஜிதோ ஸமானோ வோகிண்ணோ விஹரதி பாபகேஹி அகுஸலேஹி த⁴ம்மேஹீ’தி. ஸோ லோகம்யேவ அதி⁴பதிம் கத்வா அகுஸலம் பஜஹதீ’’தி (அ. நி. 3.40).

ஏவம் லோகாதி⁴பதேய்யம் ஓத்தப்பம்.

லஜ்ஜாஸபா⁴வஸண்டி²தாதி ஏத்த² லஜ்ஜாதி லஜ்ஜனாகாரோ, தேன ஸபா⁴வேன ஸண்டி²தா ஹிரீ. ப⁴யந்தி அபாயப⁴யம், தேன ஸபா⁴வேன ஸண்டி²தம் ஓத்தப்பம். தது³ப⁴யம் பாபபரிவஜ்ஜனே பாகடம் ஹோதி. தத்த² யதா² த்³வீஸு அயோகு³ளேஸு ஏகோ ஸீதலோ ப⁴வேய்ய கூ³த²மக்கி²தோ, ஏகோ உண்ஹோ ஆதி³த்தோ. தேஸு யதா² ஸீதலம் கூ³த²மக்கி²தத்தா ஜிகு³ச்ச²ந்தோ விஞ்ஞுஜாதிகோ ந க³ண்ஹாதி, இதரம் தா³ஹப⁴யேன, ஏவம் பண்டி³தோ லஜ்ஜாய ஜிகு³ச்ச²ந்தோ பாபம் ந கரோதி, ஓத்தப்பேன அபாயபீ⁴தோ பாபம் ந கரோதி. ஏவம் லஜ்ஜாஸபா⁴வஸண்டி²தா ஹிரீ, ப⁴யஸபா⁴வஸண்டி²தம் ஓத்தப்பம்.

கத²ம் ஸப்பதிஸ்ஸவலக்க²ணா ஹிரீ, வஜ்ஜபீ⁴ருகப⁴யத³ஸ்ஸாவிலக்க²ணம் ஓத்தப்பம்? ஏகச்சோ ஹி ஜாதிமஹத்தபச்சவேக்க²ணா, ஸத்து²மஹத்தபச்சவேக்க²ணா, தா³யஜ்ஜமஹத்தபச்சவேக்க²ணா, ஸப்³ரஹ்மசாரிமஹத்தபச்சவேக்க²ணாதி சதூஹி காரணேஹி தத்த² கா³ரவேன ஸப்பதிஸ்ஸவலக்க²ணம் ஹிரிம் ஸமுட்டா²பேத்வா பாபம் ந கரோதி, ஏகச்சோ அத்தானுவாத³ப⁴யம், பரானுவாத³ப⁴யம், த³ண்ட³ப⁴யம், து³க்³க³திப⁴யந்தி சதூஹி காரணேஹி வஜ்ஜதோ பா⁴யந்தோ வஜ்ஜபீ⁴ருகப⁴யத³ஸ்ஸாவிலக்க²ணம் ஓத்தப்பம் ஸமுட்டா²பேத்வா பாபம் ந கரோதி. ஏத்த² ச அஜ்ஜ²த்தஸமுட்டா²னாதி³தா ஹிரோத்தப்பானம் தத்த² தத்த² பாகடபா⁴வேன வுத்தா, ந பன நேஸம் கதா³சி அஞ்ஞமஞ்ஞவிப்பயோகோ³. ந ஹி லஜ்ஜனம் நிப்³ப⁴யம், பாபப⁴யம் வா அலஜ்ஜனம் அத்தீ²தி.

இமே சே, பி⁴க்க²வே, த்³வே ஸுக்கா த⁴ம்மா லோகம் ந பாலேய்யுந்தி பி⁴க்க²வே, இமே த்³வே அனவஜ்ஜத⁴ம்மா யதி³ லோகம் ந ரக்கே²ய்யும், லோகபாலகா யதி³ ந ப⁴வேய்யும். நயித⁴ பஞ்ஞாயேத² மாதாதி இத⁴ இமஸ்மிம் லோகே ஜனிகா மாதா ‘‘அயம் மே மாதா’’தி க³ருசித்தீகாரவஸேன ந பஞ்ஞாயேத², ‘‘அயம் மாதா’’தி ந லப்³பே⁴ய்ய. ஸேஸபதே³ஸுபி ஏஸேவ நயோ. மாதுச்சா²தி மாதுப⁴கி³னீ. மாதுலானீதி மாதுலப⁴ரியா. க³ரூனந்தி மஹாபிதுசூளபிதுஜேட்ட²பா⁴துஆதீ³னம் க³ருட்டா²னியானம். ஸம்பே⁴த³ந்தி ஸங்கரம், மரியாத³பே⁴த³ம் வா. யதா² அஜேளகாதிஆதீ³ஹி உபமம் த³ஸ்ஸேதி. ஏதே ஹி ஸத்தா ‘‘அயம் மே மாதா’’தி வா ‘‘மாதுச்சா²’’தி வா க³ருசித்தீகாரவஸேன ந ஜானந்தி, யம் வத்து²ம் நிஸ்ஸாய உப்பன்னா, தத்த²பி விப்படிபஜ்ஜந்தி. தஸ்மா உபமம் ஆஹரந்தோ அஜேளகாத³யோ ஆஹரி. அயஞ்ஹேத்த² ஸங்கே²பத்தோ² – யதா² அஜேளகாத³யோ திரச்சா²னா ஹிரோத்தப்பரஹிதா மாதாதி³ஸஞ்ஞம் அகத்வா பி⁴ன்னமரியாதா³ ஸப்³ப³த்த² ஸம்பே⁴தே³ன வத்தந்தி, ஏவமயம் மனுஸ்ஸலோகோ யதி³ லோகபாலகத⁴ம்மா ந ப⁴வேய்யும், ஸப்³ப³த்த² ஸம்பே⁴தே³ன வத்தேய்ய. யஸ்மா பனிமே லோகபாலகத⁴ம்மா லோகம் பாலேந்தி, தஸ்மா நத்தி² ஸம்பே⁴தோ³தி.

கா³தா²ஸு யேஸம் சே ஹிரிஓத்தப்பந்தி சேதி நிபாதமத்தம். யேஸம் ஸத்தானம் ஹிரீ ச ஓத்தப்பஞ்ச ஸப்³ப³தா³வ ஸப்³ப³காலமேவ ந விஜ்ஜதி ந உபலப்³ப⁴தி. வோக்கந்தா ஸுக்கமூலா தேதி தே ஸத்தா குஸலமூலபச்சே²தா³வஹஸ்ஸாபி கம்மஸ்ஸ கரணதோ குஸலகம்மானம் பதிட்டா²னபூ⁴தானம் ஹிரோத்தப்பானமேவ வா அபா⁴வதோ குஸலதோ வோக்கமித்வா, அபஸக்கித்வா, டி²தத்தா வோக்கந்தா ஸுக்கமூலா, புனப்புனம் ஜாயனமீயனஸபா⁴வத்தா ஜாதிமரணகா³மினோ ஸம்ஸாரம் நாதிவத்தந்தீதி அத்தோ².

யேஸஞ்ச ஹிரிஓத்தப்பந்தி யேஸம் பன பரிஸுத்³த⁴மதீனம் ஸத்தானம் ஹிரீ ச ஓத்தப்பஞ்சாதி இமே த⁴ம்மா ஸதா³ ஸப்³ப³காலம் ரத்திந்தி³வம் நவமஜ்ஜி²மத்தே²ரகாலேஸு ஸம்மா உபக³ம்ம டி²தா பாபா ஜிகு³ச்ச²ந்தா பா⁴யந்தா தத³ங்கா³தி³வஸேன பாபம் பஜஹந்தா. விரூள்ஹப்³ரஹ்மசரியாதி ஸாஸனப்³ரஹ்மசரியே மக்³க³ப்³ரஹ்மசரியே ச விரூள்ஹம் ஆபன்னா, அக்³க³மக்³கா³தி⁴க³மேன ஸப்³ப³ஸோ ஸந்தகிலேஸதாய ஸந்தகு³ணதாய வா ஸந்தோ, புனப்³ப⁴வஸ்ஸ கே²பிதத்தா கீ²ணபுனப்³ப⁴வா ஹோந்தீதி.

பஞ்சமஸுத்தவண்ணனா நிட்டி²தா.