3. விஜ்ஜாஸுத்தவண்ணனா

40. ததியே புப்³ப³ங்க³மாதி ஸஹஜாதவஸேன, உபனிஸ்ஸயவஸேன சாதி த்³வீஹி ஆகாரேஹி புப்³ப³ங்க³மா புரஸ்ஸரா பதா⁴னகாரணம். ந ஹி அவிஜ்ஜாய வினா அகுஸலுப்பத்தி அத்தி². ஸமாபத்தியாதி ஸமாபஜ்ஜனாய ஸபா⁴வபடிலாபா⁴ய, பவத்தியாதி அத்தோ². தத்த² அகுஸலப்பவத்தியா ஆதீ³னவப்படிச்சா²த³னேன அயோனிஸோமனஸிகாரஸ்ஸ பச்சயபா⁴வேன அப்பஹீனபா⁴வேன ச அகுஸலத⁴ம்மானம் உபனிஸ்ஸயபா⁴வோ தி³ஸ்ஸதி.

ஏவம் ப்³யாதி⁴மரணாதி³து³க்க²ஸ்ஸ அதி⁴ட்டா²னபா⁴வதோ ஸப்³பா³பி க³தியோ இத⁴ து³க்³க³தியோ. அத² வா ராகா³தி³கிலேஸேஹி தூ³ஸிதா க³தியோ காயவசீசித்தானம் பவத்தியோதி து³க்³க³தியோ, காயவசீமனோது³ச்சரிதானி. அஸ்மிம் லோகேதி இத⁴ லோகே மனுஸ்ஸக³தியம் வா. பரம்ஹி சாதி ததோ அஞ்ஞாஸு க³தீஸு. அவிஜ்ஜாமூலிகா ஸப்³பா³தி தா ஸப்³பா³பி து³ச்சரிதஸ்ஸ விபத்தியோ வுத்தனயேன அவிஜ்ஜாபுப்³ப³ங்க³மத்தா அவிஜ்ஜாமூலிகா ஏவ. இச்சா²லோப⁴ஸமுஸ்ஸயாதி அஸம்பத்தவிஸயபரியேஸனலக்க²ணாய இச்சா²ய, ஸம்பத்தவிஸயலுப்³ப⁴னலக்க²ணேன லோபே⁴ன ச ஸமுஸ்ஸிதா உபசிதாதி இச்சா²லோப⁴ஸமுஸ்ஸயா.

யதோதி யஸ்மா அவிஜ்ஜாஹேது அவிஜ்ஜாய நிவுதோ ஹுத்வா. பாபிச்சோ²தி அவிஜ்ஜாய படிச்சா²தி³தத்தா பாபிச்ச²தாய ஆதீ³னவே அபஸ்ஸந்தோ அஸந்தகு³ணஸம்பா⁴வனவஸேன கோஹஞ்ஞாதீ³னி கரோந்தோ பாபிச்சோ², லோபே⁴னேவ அத்ரிச்ச²தாபி க³ஹிதாதி த³ட்ட²ப்³பா³. அனாத³ரோதி லோகாதி⁴பதினோ ஓத்தப்பஸ்ஸ அபா⁴வேன ஸப்³ரஹ்மசாரீஸு ஆத³ரரஹிதோ. ததோதி தஸ்மா அவிஜ்ஜாபாபிச்ச²தாஅஹிரிகானோத்தப்பஹேது. பஸவதீதி காயது³ச்சரிதாதி³பே⁴த³ம் பாபம் உபசினதி. அபாயம் தேன க³ச்ச²தீதி தேன ததா² பஸுதேன பாபேன நிரயாதி³பே⁴த³ம் அபாயம் க³ச்ச²தி உபபஜ்ஜதி.

தஸ்மாதி யஸ்மா ஏதே ஏவம் ஸப்³ப³து³ச்சரிதமூலபூ⁴தா ஸப்³ப³து³க்³க³திபரிக்கிலேஸஹேதுபூ⁴தா ச அவிஜ்ஜாத³யோ, தஸ்மா இச்ச²ஞ்ச, லோப⁴ஞ்ச, அவிஜ்ஜஞ்ச, சஸத்³தே³ன அஹிரிகானோத்தப்பஞ்ச விராஜயம் ஸமுச்சே²த³வஸேன பஜஹம். கத²ம் விராஜேதீதி ஆஹ? விஜ்ஜம் உப்பாத³யந்தி, விபஸ்ஸனாபடிபாடியா ச, மக்³க³படிபாடியா ச, உஸ்ஸக்கித்வா அரஹத்தமக்³க³விஜ்ஜம் அத்தனோ ஸந்தானே உப்பாத³யந்தோ. ஸப்³பா³ து³க்³க³தியோதி ஸப்³பா³பி து³ச்சரிதஸங்கா²தா து³க்³க³தியோ, வட்டது³க்க²ஸ்ஸ வா அதி⁴ட்டா²னபா⁴வதோ து³க்கா², ஸப்³பா³ பஞ்சபி க³தியோ ஜஹே பஜஹேய்ய ஸமதிக்கமேய்ய. கிலேஸவட்டப்பஹானேனேவ ஹி கம்மவட்டம் விபாகவட்டஞ்ச பஹீனம் ஹோதீதி.

ததியஸுத்தவண்ணனா நிட்டி²தா.

பட²மபா⁴ணவாரவண்ணனா நிட்டி²தா.