6. பட²மஸேக²ஸுத்தவண்ணனா

16. ச²ட்டே² ஸேக²ஸ்ஸாதி ஏத்த² கேனட்டே²ன ஸேகோ²? ஸேக்க²த⁴ம்மபடிலாப⁴தோ ஸேகோ². வுத்தஞ்ஹேதம் –

‘‘கித்தாவதா நு கோ², ப⁴ந்தே, ஸேகோ² ஹோதீதி? இத⁴, பி⁴க்கு², ஸேகா²ய ஸம்மாதி³ட்டி²யா ஸமன்னாக³தோ ஹோதி…பே… ஸேகே²ன ஸம்மாஸமாதி⁴னா ஸமன்னாக³தோ ஹோதி. ஏத்தாவதா கோ², பி⁴க்கு², ஸேகோ² ஹோதீ’’தி (ஸம். நி. 5.13).

அபிச ஸிக்க²தீதி ஸேகோ². வுத்தம்பி சேதம் –

‘‘ஸிக்க²தீதி கோ², பி⁴க்கு², தஸ்மா ஸேகோ²தி வுச்சதி. கிஞ்ச ஸிக்க²தி? அதி⁴ஸீலம்பி ஸிக்க²தி, அதி⁴சித்தம்பி ஸிக்க²தி, அதி⁴பஞ்ஞம்பி ஸிக்க²தி. ஸிக்க²தீதி கோ², பி⁴க்கு², தஸ்மா ஸேகோ²தி வுச்சதீ’’தி (அ. நி. 3.86).

யோபி கல்யாணபுது²ஜ்ஜனோ அனுலோமப்படிபதா³ய பரிபூரகாரீ ஸீலஸம்பன்னோ இந்த்³ரியேஸு கு³த்தத்³வாரோ போ⁴ஜனே மத்தஞ்ஞூ ஜாக³ரியானுயோக³மனுயுத்தோ புப்³ப³ரத்தாபரரத்தம் போ³தி⁴பக்கி²யானம் த⁴ம்மானம் பா⁴வனானுயோக³மனுயுத்தோ விஹரதி – ‘‘அஜ்ஜ வா ஸ்வே வா அஞ்ஞதரம் ஸாமஞ்ஞப²லம் அதி⁴க³மிஸ்ஸாமீ’’தி, ஸோபி வுச்சதி ஸிக்க²தீதி ஸேகோ²தி. இமஸ்மிம் அத்தே² ந படிவிஜ்ஜ²ந்தோவ ஸேகோ² அதி⁴ப்பேதோ, அத² கோ² கல்யாணபுது²ஜ்ஜனோபி. அப்பத்தம் மானஸம் ஏதேனாதி அப்பத்தமானஸோ. மானஸந்தி ‘‘அந்தலிக்க²சரோ பாஸோ, ய்வாயம் சரதி மானஸோ’’தி (ஸம். நி. 1.151; மஹாவ. 33) ஏத்த² ராகோ³ மானஸந்தி வுத்தோ. ‘‘சித்தம் மனோ மானஸ’’ந்தி (த⁴. ஸ. 63, 65) ஏத்த² சித்தம். ‘‘அப்பத்தமானஸோ ஸேகோ², காலம் கயிரா ஜனே ஸுதா’’தி (ஸம். நி. 1.159) ஏத்த² அரஹத்தம். இதா⁴பி அரஹத்தமேவ அதி⁴ப்பேதம். தேன அப்பத்தஅரஹத்தஸ்ஸாதி வுத்தம் ஹோதி.

அனுத்தரந்தி ஸேட்ட²ம், அஸதி³ஸந்தி அத்தோ². சதூஹி யோகே³ஹி கே²மம் அனுபத்³து³தந்தி யோக³க்கே²மம், அரஹத்தமேவ அதி⁴ப்பேதம். பத்த²யமானஸ்ஸாதி த்³வே பத்த²னா தண்ஹாபத்த²னா, குஸலச்ச²ந்த³பத்த²னா ச. ‘‘பத்த²யமானஸ்ஸ ஹி ஜப்பிதானி, பவேதி⁴தம் வாபி பகப்பிதேஸூ’’தி (ஸு. நி. 908; மஹானி. 137) ஏத்த² தண்ஹாபத்த²னா.

‘‘சி²ன்னம் பாபிமதோ ஸோதம், வித்³த⁴ஸ்தம் வினளீகதம்;

பாமோஜ்ஜப³ஹுலா ஹோத², கே²மம் பத்தே²த² பி⁴க்க²வோ’’தி. (ம. நி. 1.352);

ஏத்த² கத்துகம்யதாகுஸலச்ச²ந்த³பத்த²னா, அயமேவ இதா⁴தி⁴ப்பேதா. தேன பத்த²யமானஸ்ஸாதி தம் யோக³க்கே²மம் க³ந்துகாமஸ்ஸ தன்னின்னஸ்ஸ தப்போணஸ்ஸ தப்பப்³பா⁴ரஸ்ஸாதி அத்தோ². விஹரதோதி ஏகம் இரியாபத²து³க்க²ம் அஞ்ஞேன இரியாபதே²ன விச்சி²ந்தி³த்வா அபரிபதந்தம் அத்தபா⁴வம் ஹரதோ. அத² வா ‘‘ஸப்³பே³ ஸங்கா²ரா அனிச்சாதி அதி⁴முச்சந்தோ ஸத்³தா⁴ய விஹரதீ’’திஆதி³னா நித்³தே³ஸனயேன சேத்த² அத்தோ² த³ட்ட²ப்³போ³. அஜ்ஜ²த்திகந்தி நியகஜ்ஜ²த்தஸங்கா²தே அஜ்ஜ²த்தே ப⁴வம் அஜ்ஜ²த்திகம். அங்க³ந்தி காரணம். இதி கரித்வாதி ஏவம் கத்வா. ந அஞ்ஞம் ஏகங்க³ம்பி ஸமனுபஸ்ஸாமீதி ஏத்த² அயம் ஸங்கே²பத்தோ² – பி⁴க்க²வே, அஜ்ஜ²த்தம் அத்தனோ ஸந்தானே ஸமுட்டி²தம் காரணந்தி கத்வா அஞ்ஞம் ஏககாரணம்பி ந ஸமனுபஸ்ஸாமி யம் ஏவம் ப³ஹூபகாரம், யத²யித³ம் யோனிஸோ மனஸிகாரோதி உபாயமனஸிகாரோ, பத²மனஸிகாரோ, அனிச்சாதீ³ஸு அனிச்சாதி³னயேனேவ மனஸிகாரோ, அனிச்சானுலோமிகேன வா சித்தஸ்ஸ ஆவட்டனா அன்வாவட்டனா ஆபோ⁴கோ³ ஸமன்னாஹாரோ மனஸிகாரோ. அயம் யோனிஸோ மனஸிகாரோ.

இதா³னி யோனிஸோ மனஸிகாரஸ்ஸ ஆனுபா⁴வம் த³ஸ்ஸேதும் ‘‘யோனிஸோ, பி⁴க்க²வே, பி⁴க்கு² மனஸி கரோந்தோ அகுஸலம் பஜஹதி, குஸலம் பா⁴வேதீ’’தி வுத்தம். தத்த² யோனிஸோ மனஸி கரோந்தோதி ‘‘இத³ம் து³க்க²ம் அரியஸச்சம், அயம் து³க்க²ஸமுத³யோ அரியஸச்சம், அயம் து³க்க²னிரோதோ⁴ அரியஸச்சம், அயம் து³க்க²னிரோத⁴கா³மினீ படிபதா³ அரியஸச்ச’’ந்தி சதூஸு அரியஸச்சேஸு யோனிஸோ மனஸிகாரம் பவத்தேந்தோ.

தத்ராயம் அத்த²விபா⁴வனா – யதி³பி இத³ம் ஸுத்தம் அவிஸேஸேன ஸேக்க²புக்³க³லவஸேன ஆக³தம், சதுமக்³க³ஸாதா⁴ரணவஸேன பன ஸங்கே²பேனேவ கம்மட்டா²னம் கத²யிஸ்ஸாம. யோ சதுஸச்சகம்மட்டா²னிகோ யோகா³வசரோ ‘‘தண்ஹாவஜ்ஜா தேபூ⁴மகா க²ந்தா⁴ து³க்க²ம், தண்ஹா ஸமுத³யோ, உபி⁴ன்னம் அப்பவத்தி நிரோதோ⁴, நிரோத⁴ஸம்பாபகோ மக்³கோ³’’தி ஏவம் புப்³பே³ ஏவ ஆசரியஸந்திகே உக்³க³ஹிதசதுஸச்சகம்மட்டா²னோ. ஸோ அபரேன ஸமயேன விபஸ்ஸனாமக்³க³ம் ஸமாருள்ஹோ ஸமானோ தேபூ⁴மகே க²ந்தே⁴ ‘‘இத³ம் து³க்க²’’ந்தி யோனிஸோ மனஸி கரோதி, உபாயேன பதே²ன ஸமன்னாஹரதி சேவ விபஸ்ஸதி ச. விபஸ்ஸனா ஹி இத⁴ மனஸிகாரஸீஸேன வுத்தா. யா பனாயம் தஸ்ஸ து³க்க²ஸ்ஸ ஸமுட்டா²பிகா புரிமப⁴விகா தண்ஹா, அயம் து³க்க²ஸமுத³யோதி யோனிஸோ மனஸி கரோதி. யஸ்மா பன இத³ம் து³க்க²ம், அயஞ்ச ஸமுத³யோ இத³ம் டா²னம் பத்வா நிருஜ்ஜ²ந்தி ந பவத்தந்தி, தஸ்மா யதி³த³ம் நிப்³பா³னம் நாம, அயம் து³க்க²னிரோதோ⁴தி யோனிஸோ மனஸி கரோதி. நிரோத⁴ஸம்பாபகம் அட்ட²ங்கி³கம் மக்³க³ம், ‘‘அயம் து³க்க²னிரோத⁴கா³மினீ படிபதா³’’தி யோனிஸோ மனஸி கரோதி, உபாயேன பதே²ன ஸமன்னாஹரதி சேவ விபஸ்ஸதி ச.

தத்ராயம் உபாயோ – அபி⁴னிவேஸோ நாம க²ந்தே⁴ ஹோதி, ந விவட்டே, தஸ்மா அயமத்தோ² – ‘‘இமஸ்மிம் காயே பத²வீதா⁴து, ஆபோதா⁴தூ’’திஆதி³னா (தீ³. நி. 2.378) நயேன சத்தாரி மஹாபூ⁴தானி தத³னுஸாரேன உபாதா³ரூபானி ச பரிக்³க³ஹேத்வா ‘‘அயம் ரூபக்க²ந்தோ⁴’’தி வவத்த²பேதி. தம் வவத்தா²பயதோ உப்பன்னே ததா³ரம்மணே சித்தசேதஸிகத⁴ம்மே ‘‘இமே சத்தாரோ அரூபக்க²ந்தா⁴’’தி வவத்த²பேதி. ததோ ‘‘இமே பஞ்சக்க²ந்தா⁴ து³க்க²’’ந்தி வவத்த²பேதி. தே பன ஸங்கே²பதோ நாமஞ்ச ரூபஞ்சாதி த்³வே பா⁴கா³ ஹோந்தி. இத³ஞ்ச நாமரூபம் ஸஹேது ஸப்பச்சயம் உப்பஜ்ஜதி, தஸ்ஸ அயம் அவிஜ்ஜாப⁴வதண்ஹாதி³கோ ஹேது, அயம் ஆஹாராதி³கோ பச்சயோதி ஹேதுப்பச்சயே வவத்த²பேதி. ஸோ தேஸம் பச்சயானஞ்ச பச்சயுப்பன்னானஞ்ச யாதா²வஸரஸலக்க²ணம் வவத்த²பேத்வா ‘‘இமே த⁴ம்மா அஹுத்வா ப⁴வந்தி, ஹுத்வா நிருஜ்ஜ²ந்தி, தஸ்மா அனிச்சா’’தி அனிச்சலக்க²ணம் ஆரோபேதி, ‘‘உத³யப்³ப³யபடிபீளிதத்தா து³க்கா²’’தி து³க்க²லக்க²ணம் ஆரோபேதி, ‘‘அவஸவத்தனதோ அனத்தா’’தி அனத்தலக்க²ணம் ஆரோபேதி.

ஏவம் திலக்க²ணானி ஆரோபேத்வா விபஸ்ஸந்தோ உத³யப்³ப³யஞாணுப்பத்தியா உப்பன்னே ஓபா⁴ஸாதி³கே விபஸ்ஸனுபக்கிலேஸே ‘அமக்³கோ³’தி உத³யப்³ப³யஞாணமேவ ‘‘அரியமக்³க³ஸ்ஸ உபாயபூ⁴தோ புப்³ப³பா⁴க³மக்³கோ³’’தி மக்³கா³மக்³க³ம் வவத்த²பேத்வா புன உத³யப்³ப³யஞாணம் படிபாடியா ப⁴ங்க³ஞாணாதீ³னி ச உப்பாதே³ந்தோ ஸோதாபத்திமக்³கா³த³யோ பாபுணாதி. தஸ்மிம் க²ணே சத்தாரி ஸச்சானி ஏகப்படிவேதே⁴னேவ படிவிஜ்ஜ²தி, ஏகாபி⁴ஸமயேன அபி⁴ஸமேதி. தத்த² து³க்க²ம் பரிஞ்ஞாபடிவேதே⁴ன படிவிஜ்ஜ²ந்தோ, ஸமுத³யம் பஹானப்படிவேதே⁴ன படிவிஜ்ஜ²ந்தோ ஸப்³ப³ம் அகுஸலம் பஜஹதி, நிரோத⁴ம் ஸச்சி²கிரியாபடிவேதே⁴ன படிவிஜ்ஜ²ந்தோ மக்³க³ம் பா⁴வனாபடிவேதே⁴ன படிவிஜ்ஜ²ந்தோ ஸப்³ப³ம் குஸலம் பா⁴வேதி. அரியமக்³கோ³ ஹி நிப்பரியாயதோ குச்சி²தஸலனாதி³அத்தே²ன குஸலோ, தஸ்மிஞ்ச பா⁴விதே ஸப்³பே³பி குஸலா அனவஜ்ஜபோ³தி⁴பக்கி²யத⁴ம்மா பா⁴வனாபாரிபூரிம் க³ச்ச²ந்தீதி. ஏவம் யோனிஸோ மனஸி கரோந்தோ அகுஸலம் பஜஹதி, குஸலம் பா⁴வேதி. ததா² ஹி வுத்தம் – ‘‘இத³ம் து³க்க²ந்தி யோனிஸோ மனஸி கரோதி, அயம் து³க்க²ஸமுத³யோதி யோனிஸோ மனஸி கரோதீ’’திஆதி³ (ம. நி. 1.21). அபரம்பி வுத்தம் ‘‘யோனிஸோ மனஸிகாரஸம்பன்னஸ்ஸேதம், பி⁴க்க²வே, பி⁴க்கு²னோ பாடிகங்க²ம் – அரியம் அட்ட²ங்கி³கம் மக்³க³ம் பா⁴வேஸ்ஸதி, அரியம் அட்ட²ங்கி³கம் மக்³க³ம் ப³ஹுலீகரிஸ்ஸதீ’’தி (ஸம். நி. 5.55).

யோனிஸோ மனஸிகாரோதி கா³தா²ய அயம் ஸங்கே²பத்தோ² – ஸிக்க²தி, ஸிக்கா²பதா³னி தஸ்ஸ அத்தி², ஸிக்க²னஸீலோதி வா ஸேகோ². ஸம்ஸாரே ப⁴யம் இக்க²தீதி பி⁴க்கு². தஸ்ஸ ஸேக²ஸ்ஸ பி⁴க்கு²னோ உத்தமத்த²ஸ்ஸ அரஹத்தஸ்ஸ பத்தியா அதி⁴க³மாய யதா² யோனிஸோ மனஸிகாரோ, ஏவம் ப³ஹுகாரோ ப³ஹூபகாரோ அஞ்ஞோ கோசி த⁴ம்மோ நத்தி². கஸ்மா? யஸ்மா யோனிஸோ உபாயேன மனஸிகாரம் புரக்க²த்வா பத³ஹம் சதுப்³பி³த⁴ஸம்மப்பதா⁴னவஸேன பத³ஹந்தோ, க²யம் து³க்க²ஸ்ஸ பாபுணே ஸம்கிலேஸவட்டது³க்க²ஸ்ஸ பரிக்க²யம் பரியோஸானம் நிப்³பா³னம் பாபுணே அதி⁴க³ச்சே²ய்ய, தஸ்மா யோனிஸோ மனஸிகாரோ ப³ஹுகாரோதி.

ச²ட்ட²ஸுத்தவண்ணனா நிட்டி²தா.