7. மஹாத⁴னவாணிஜவத்து²

வாணிஜோவாதி இமம் த⁴ம்மதே³ஸனம் ஸத்தா² ஜேதவனே விஹரந்தோ மஹாத⁴னவாணிஜம் ஆரப்³ப⁴ கதே²ஸி.

தஸ்ஸ கிர வாணிஜஸ்ஸ கே³ஹே பஞ்சஸதா சோரா ஓதாரம் க³வேஸமானா ஓதாரம் ந லபி⁴ம்ஸு. அபரேன ஸமயேன வாணிஜோ பஞ்ச ஸகடஸதானி ப⁴ண்ட³ஸ்ஸ பூரேத்வா பி⁴க்கூ²னம் ஆரோசாபேஸி – ‘‘அஹம் அஸுகட்டா²னம் நாம வாணிஜ்ஜத்தா²ய க³ச்சா²மி, யே, அய்யா, தம் டா²னம் க³ந்துகாமா, தே நிக்க²மந்து, மக்³கே³ பி⁴க்கா²ய ந கிலமிஸ்ஸந்தீ’’தி. தம் ஸுத்வா பஞ்சஸதா பி⁴க்கூ² தேன ஸத்³தி⁴ம் மக்³க³ம் படிபஜ்ஜிம்ஸு. தேபி சோரா ‘‘ஸோ கிர வாணிஜோ நிக்க²ந்தோ’’தி க³ந்த்வா அடவியம் அட்ட²ம்ஸு. வாணிஜோபி க³ந்த்வா அடவிமுகே² ஏகஸ்மிம் கா³மே வாஸம் கத்வா த்³வே தயோபி தி³வஸே கோ³ணஸகடாதீ³னி ஸம்வித³ஹி, தேஸம் பன பி⁴க்கூ²னம் நிப³த்³த⁴ம் பி⁴க்க²ம் தே³தியேவ. சோரா தஸ்மிம் அதிசிராயந்தே ‘‘க³ச்ச², தஸ்ஸ நிக்க²மனதி³வஸம் ஞத்வா ஏஹீ’’தி ஏகம் புரிஸம் பஹிணிம்ஸு. ஸோ தம் கா³மம் க³ந்த்வா ஏகம் ஸஹாயகம் புச்சி² – ‘‘கதா³ வாணிஜோ நிக்க²மிஸ்ஸதீ’’தி. ஸோ ‘‘த்³வீஹதீஹச்சயேனா’’தி வத்வா ‘‘கிமத்த²ம் பன புச்ச²ஸீ’’தி ஆஹ. அத²ஸ்ஸ ஸோ ‘‘மயம் பஞ்சஸதா சோரா ஏதஸ்ஸத்தா²ய அடவியம் டி²தா’’தி ஆசிக்கி². இதரோ ‘‘தேன ஹி க³ச்ச², ஸீக⁴ம் நிக்க²மிஸ்ஸதீ’’தி தம் உய்யோஜேத்வா, ‘‘கிம் நு கோ² சோரே வாரேமி, உதா³ஹு வாணிஜ’’ந்தி சிந்தேத்வா, ‘‘கிம் மே சோரேஹி, வாணிஜம் நிஸ்ஸாய பஞ்சஸதா பி⁴க்கூ² ஜீவந்தி, வாணிஜஸ்ஸ ஸஞ்ஞம் த³ஸ்ஸாமீ’’தி ஸோ தஸ்ஸ ஸந்திகம் க³ந்த்வா ‘‘கதா³ க³மிஸ்ஸதா²’’தி புச்சி²த்வா ‘‘ததியதி³வஸே’’தி வுத்தே மய்ஹம் வசனம் கரோத², அடவியம் கிர தும்ஹாகம் அத்தா²ய பஞ்சஸதா சோரா டி²தா, மா தாவ க³மித்தா²தி. த்வம் கத²ம் ஜானாஸீதி? தேஸம் அந்தரே மம ஸஹாயோ அத்தி², தஸ்ஸ மே கதா²ய ஞாதந்தி. ‘‘தேன ஹி ‘கிம் மே ஏத்தோ க³தேனா’தி நிவத்தித்வா கே³ஹமேவ க³மிஸ்ஸாமீ’’தி ஆஹ. தஸ்மிம் சிராயந்தே புன தேஹி சோரேஹி பேஸிதோ புரிஸோ ஆக³ந்த்வா தம் ஸஹாயகம் புச்சி²த்வா தம் பவத்திம் ஸுத்வா ‘‘நிவத்தித்வா கே³ஹமேவ கிர க³மிஸ்ஸதீ’’தி க³ந்த்வா சோரானம் ஆரோசேஸி. தம் ஸுத்வா சோரா ததோ நிக்க²மித்வா இதரஸ்மிம் மக்³கே³ அட்ட²ம்ஸு, தஸ்மிம் சிரயந்தே புனபி தே சோரா தஸ்ஸ ஸந்திகம் புரிஸம் பேஸேஸும். ஸோ தேஸம் தத்த² டி²தபா⁴வம் ஞத்வா புன வாணிஜஸ்ஸ ஆரோசேஸி. வாணிஜோ ‘‘இதா⁴பி மே வேகல்லம் நத்தி², ஏவம் ஸந்தே நேவ ஏத்தோ க³மிஸ்ஸாமி, ந இதோ, இதே⁴வ ப⁴விஸ்ஸாமீ’’தி பி⁴க்கூ²னம் ஸந்திகம் க³ந்த்வா ஆஹ – ‘‘ப⁴ந்தே, சோரா கிர மம் விலும்பிதுகாமா மக்³கே³ டி²தா, ‘புன நிவத்திஸ்ஸதீ’தி ஸுத்வா இதரஸ்மிம் மக்³கே³ டி²தா, அஹம் ஏத்தோ வா இதோ வா அக³ந்த்வா தோ²கம் இதே⁴வ ப⁴விஸ்ஸாமி, ப⁴த³ந்தா இதே⁴வ வஸிதுகாமா வஸந்து, க³ந்துகாமா அத்தனோ ருசிம் கரோந்தூ’’தி. பி⁴க்கூ² ‘‘ஏவம் ஸந்தே மயம் நிவத்திஸ்ஸாமா’’தி வாணிஜம் ஆபுச்சி²த்வா புனதே³வ ஸாவத்தி²ம் க³ந்த்வா ஸத்தா²ரம் வந்தி³த்வா நிஸீதி³ம்ஸு. ஸத்தா² ‘‘கிம், பி⁴க்க²வே, மஹாத⁴னவாணிஜேன ஸத்³தி⁴ம் ந க³மித்தா²’’தி புச்சி²த்வா ‘‘ஆம, ப⁴ந்தே, மஹாத⁴னவாணிஜஸ்ஸ விலும்பனத்தா²ய த்³வீஸுபி மக்³கே³ஸு சோரா பரியுட்டி²ம்ஸு, தேன ஸோ தத்தே²வ டி²தோ, மயம் பன தம் ஆபுச்சி²த்வா ஆக³தா’’தி வுத்தே, ‘‘பி⁴க்க²வே, மஹாத⁴னவாணிஜோ சோரானம் அத்தி²தாய மக்³க³ம் பரிவஜ்ஜதி, ஜீவிதுகாமோ விய புரிஸோ ஹலாஹலம் விஸம் பரிவஜ்ஜேதி, பி⁴க்கு²னாபி ‘தயோ ப⁴வா சோரேஹி பரியுட்டி²தமக்³க³ஸதி³ஸா’தி ஞத்வா பாபம் பரிவஜ்ஜேதும் வட்டதீ’’தி வத்வா அனுஸந்தி⁴ம் க⁴டேத்வா த⁴ம்மம் தே³ஸேந்தோ இமம் கா³த²மாஹ –

123. ‘‘வாணிஜோவ ப⁴யம் மக்³க³ம், அப்பஸத்தோ² மஹத்³த⁴னோ;

விஸம் ஜீவிதுகாமோவ, பாபானி பரிவஜ்ஜயே’’தி.

தத்த² ப⁴யந்தி பா⁴யிதப்³ப³ம், சோரேஹி பரியுட்டி²தத்தா ஸப்படிப⁴யந்தி அத்தோ². இத³ம் வுத்தம் ஹோதி – யதா² மஹாத⁴னவாணிஜோ அப்பஸத்தோ² ஸப்படிப⁴யம் மக்³க³ம், யதா² ச ஜீவிதுகாமோ ஹலாஹலம் விஸம் பரிவஜ்ஜேதி, ஏவம் பண்டி³தோ பி⁴க்கு² அப்பமத்தகானிபி பாபானி பரிவஜ்ஜேய்யாதி.

தே³ஸனாவஸானே தே பி⁴க்கூ² ஸஹ படிஸம்பி⁴தா³ஹி அரஹத்தம் பாபுணிம்ஸு, ஸம்பத்தமஹாஜனஸ்ஸாபி ஸாத்தி²கா த⁴ம்மதே³ஸனா அஹோஸீதி.

மஹாத⁴னவாணிஜவத்து² ஸத்தமம்.