8. மாரவத்து²

நிட்ட²ங்க³தோதி இமம் த⁴ம்மதே³ஸனம் ஸத்தா² ஜேதவனே விஹரந்தோ மாரம் ஆரப்³ப⁴ கதே²ஸி.

ஏகதி³வஸஞ்ஹி விகாலே ஸம்ப³ஹுலா தே²ரா ஜேதவனவிஹாரம் பவிஸித்வா ராஹுலத்தே²ரஸ்ஸ வஸனட்டா²னம் க³ந்த்வா தம் உட்டா²பேஸும். ஸோ அஞ்ஞத்த² வஸனட்டா²னம் அபஸ்ஸந்தோ ததா²க³தஸ்ஸ க³ந்த⁴குடியா பமுகே² நிபஜ்ஜி. ததா³ ஸோ ஆயஸ்மா அரஹத்தம் பத்தோ அவஸ்ஸிகோவ ஹோதி. மாரோ வஸவத்திப⁴வனே டி²தோயேவ தம் ஆயஸ்மந்தம் க³ந்த⁴குடிபமுகே² நிபன்னம் தி³ஸ்வா சிந்தேஸி – ‘‘ஸமணஸ்ஸ கோ³தமஸ்ஸ ருஜனகஅங்கு³லீ ப³ஹி நிபன்னோ, ஸயம் அந்தோக³ந்த⁴குடியம் நிபன்னோ, அங்கு³லியா பீளியமானாய ஸயம்பி பீளிதோ ப⁴விஸ்ஸதீ’’தி. ஸோ மஹந்தம் ஹத்தி²ராஜவண்ணம் அபி⁴னிம்மினித்வா ஆக³ம்ம ஸோண்டா³ய தே²ரஸ்ஸ மத்த²கம் பரிக்கி²பித்வா மஹந்தேன ஸத்³தே³ன கோஞ்சனாத³ம் ரவி. ஸத்தா² க³ந்த⁴குடியம் நிஸின்னோவ தஸ்ஸ மாரபா⁴வம் ஞத்வா, ‘‘மார, தாதி³ஸானம் ஸதஸஹஸ்ஸேனாபி மம புத்தஸ்ஸ ப⁴யம் உப்பாதே³தும் ந ஸக்கா. புத்தோ ஹி மே அஸந்தாஸீ வீததண்ஹோ மஹாவீரியோ மஹாபஞ்ஞோ’’தி வத்வா இமா கா³தா² அபா⁴ஸி –

351. ‘‘நிட்ட²ங்க³தோ அஸந்தாஸீ, வீததண்ஹோ அனங்க³ணோ;

அச்சி²ந்தி³ ப⁴வஸல்லானி, அந்திமோயம் ஸமுஸ்ஸயோ.

352. ‘‘வீததண்ஹோ அனாதா³னோ, நிருத்திபத³கோவிதோ³;

அக்க²ரானம் ஸன்னிபாதம், ஜஞ்ஞா புப்³பா³பரானி ச;

ஸ வே அந்திமஸாரீரோ,

மஹாபஞ்ஞோ மஹாபுரிஸோதி வுச்சதீ’’தி.

தத்த² நிட்ட²ங்க³தோதி இமஸ்மிம் ஸாஸனே பப்³ப³ஜிதானம் அரஹத்தம் நிட்ட²ம் நாம, தம் க³தோ பத்தோதி அத்தோ². அஸந்தாஸீதி அப்³ப⁴ந்தரே ராக³ஸந்தாஸாதீ³னம் அபா⁴வேன அஸந்தஸனகோ. அச்சி²ந்தி³ ப⁴வஸல்லானீதி ஸப்³பா³னிபி ப⁴வகா³மீனி ஸல்லானி அச்சி²ந்தி³. ஸமுஸ்ஸயோதி அயம் ஏதஸ்ஸ அந்திமோ தே³ஹோ.

அனாதா³னோதி க²ந்தா⁴தீ³ஸு நிக்³க³ஹணோ. நிருத்திபத³கோவிதோ³தி நிருத்தியஞ்ச ஸேஸபதே³ஸு சாதி சதூஸுபி படிஸம்பி⁴தா³ஸு சே²கோதி அத்தோ². அக்க²ரானம் ஸன்னிபாதம், ஜஞ்ஞா புப்³பா³பரானி சாதி அக்க²ரானம் ஸன்னிபாதஸங்கா²தம் அக்க²ரபிண்ட³ஞ்ச ஜானாதி, புப்³ப³க்க²ரேன அபரக்க²ரம், அபரக்க²ரேன புப்³ப³க்க²ரஞ்ச ஜானாதி. புப்³ப³க்க²ரேன அபரக்க²ரம் ஜானாதி நாம – ஆதி³ம்ஹி பஞ்ஞாயமானே மஜ்ஜ²பரியோஸானேஸு அபஞ்ஞாயமானேஸுபி ‘‘இமேஸம் அக்க²ரானம் இத³ம் மஜ்ஜ²ம், இத³ம் பரியோஸான’’ந்தி ஜானாதி. அபரக்க²ரேன புப்³ப³க்க²ரம் ஜானாதி நாம – அந்தே பஞ்ஞாயமானே ஆதி³மஜ்ஜே²ஸு அபஞ்ஞாயமானேஸு ‘‘இமேஸம் அக்க²ரானம் இத³ம் மஜ்ஜ²ம், அயம் ஆதீ³’’தி ஜானாதி. மஜ்ஜே² பஞ்ஞாயமானேபி ‘‘இமேஸம் அக்க²ரானம் அயம் ஆதி³, அயம் அந்தோ’’தி ஜானாதி. ஏவம் மஹாபஞ்ஞோ. ஸ வே அந்திமஸாரீரோதி ஏஸ கோடியம் டி²தஸரீரோ, மஹந்தானம் அத்த²த⁴ம்மனிருத்திபடிபா⁴னானம் ஸீலக்க²ந்தா⁴தீ³னஞ்ச பரிக்³கா³ஹிகாய பஞ்ஞாய ஸமன்னாக³தத்தா மஹாபஞ்ஞோ, ‘‘விமுத்தசித்தத்தா க்²வாஹம், ஸாரிபுத்த, மஹாபுரிஸோதி வதா³மீ’’தி (ஸம். நி. 5.377) வசனதோ விமுத்தசித்ததாய ச மஹாபுரிஸோதி வுச்சதீதி அத்தோ².

தே³ஸனாவஸானே ப³ஹூ ஸோதாபத்திப²லாதீ³னி பாபுணிம்ஸு. மாரோபி பாபிமா ‘‘ஜானாதி மம் ஸமணோ கோ³தமோ’’தி தத்தே²வந்தரதா⁴யீதி.

மாரவத்து² அட்ட²மம்.