4. லாலுதா³யித்தே²ரவத்து²

அஸஜ்ஜா²யமலாதி இமம் த⁴ம்மதே³ஸனம் ஸத்தா² ஜேதவனே விஹரந்தோ லாலுதா³யித்தே²ரம் ஆரப்³ப⁴ கதே²ஸி.

ஸாவத்தி²யம் கிர பஞ்சகோடிமத்தா அரியஸாவகா வஸந்தி, த்³வே கோடிமத்தா புது²ஜ்ஜனா வஸந்தி. தேஸு அரியஸாவகா புரேப⁴த்தம் தா³னம் த³த்வா பச்சா²ப⁴த்தம் ஸப்பிதேலமது⁴பா²ணிதவத்தா²தீ³னி க³ஹேத்வா விஹாரம் க³ந்த்வா த⁴ம்மகத²ம் ஸுணந்தி. த⁴ம்மம் ஸுத்வா க³மனகாலே ச ஸாரிபுத்தமோக்³க³ல்லானானம் கு³ணகத²ம் கதே²ந்தி. உதா³யித்தே²ரோ தேஸம் கத²ம் ஸுத்வா ‘‘ஏதேஸம் தாவ த⁴ம்மம் ஸுத்வா தும்ஹே ஏவம் கதே²த², மம த⁴ம்மகத²ம் ஸுத்வா கிம் நு கோ² ந கதே²ஸ்ஸதா²’’தி வத³தி. மனுஸ்ஸா தஸ்ஸ கத²ம் ஸுத்வா ‘‘அயம் ஏகோ த⁴ம்மகதி²கோ ப⁴விஸ்ஸதி, இமஸ்ஸபி அம்ஹேஹி த⁴ம்மகத²ம் ஸோதும் வட்டதீ’’தி தே ஏகதி³வஸம் தே²ரம் யாசித்வா, ‘‘ப⁴ந்தே, அஜ்ஜ அம்ஹாகம் த⁴ம்மஸ்ஸவனதி³வஸோ’’தி ஸங்க⁴ஸ்ஸ தா³னம் த³த்வா, ‘‘ப⁴ந்தே, தும்ஹே அம்ஹாகம் தி³வா த⁴ம்மகத²ம் கதே²ய்யாதா²’’தி ஆஹம்ஸு. ஸோபி தேஸம் அதி⁴வாஸேஸி.

தேஹி த⁴ம்மஸ்ஸவனவேலாய ஆக³ந்த்வா, ‘‘ப⁴ந்தே, நோ த⁴ம்மம் கதே²தா²’’தி வுத்தே லாலுதா³யித்தே²ரோ ஆஸனே நிஸீதி³த்வா சித்தபீ³ஜனிம் க³ஹேத்வா சாலேந்தோ ஏகம்பி த⁴ம்மபத³ம் அதி³ஸ்வா ‘‘அஹம் ஸரப⁴ஞ்ஞம் ப⁴ணிஸ்ஸாமி, அஞ்ஞோ த⁴ம்மகத²ம் கதே²தூ’’தி வத்வா ஓதரி. தே அஞ்ஞேன த⁴ம்மகத²ம் கதா²பேத்வா ஸரபா⁴ணத்தா²ய புன தம் ஆஸனம் ஆரோபயிம்ஸு. ஸோ புனபி கிஞ்சி அதி³ஸ்வா ‘‘அஹம் ரத்திம் கதே²ஸ்ஸாமி, அஞ்ஞோ ஸரப⁴ஞ்ஞம் ப⁴ணதூ’’தி வத்வா ஆஸனா ஓதரி. தே அஞ்ஞேன ஸரப⁴ஞ்ஞம் ப⁴ணாபேத்வா புன ரத்திம் தே²ரம் ஆனயிம்ஸு. ஸோ ரத்திம்பி கிஞ்சி அதி³ஸ்வா ‘‘அஹம் பச்சூஸகாலே கதே²ஸ்ஸாமி, ரத்திம் அஞ்ஞோ கதே²தூ’’தி வத்வா ஓதரி. தே அஞ்ஞேன ரத்திம் கதா²பேத்வா புன பச்சூஸே தம் ஆனயிம்ஸு. ஸோ புனபி கிஞ்சி நாத்³த³ஸ. மஹாஜனோ லேட்³டு³த³ண்டா³தீ³னி க³ஹேத்வா, ‘‘அந்த⁴பா³ல, த்வம் ஸாரிபுத்தமோக்³க³ல்லானானம் வண்ணே கதி²யமானே ஏவஞ்சேவஞ்ச வதே³ஸி, இதா³னி கஸ்மா ந கதே²ஸீ’’தி ஸந்தஜ்ஜேத்வா பலாயந்தம் அனுப³ந்தி⁴. ஸோ பலாயந்தோ ஏகிஸ்ஸா வச்சகுடியா பதி.

மஹாஜனோ கத²ம் ஸமுட்டா²பேஸி – ‘‘அஜ்ஜ லாலுதா³யீ ஸாரிபுத்தமோக்³க³ல்லானானம் கு³ணகதா²ய பவத்தமானாய உஸ்ஸூயந்தோ அத்தனோ த⁴ம்மகதி²கபா⁴வம் பகாஸேத்வா மனுஸ்ஸேஹி ஸக்காரம் கத்வா ‘த⁴ம்மம் ஸுணோமா’தி வுத்தே சதுக்க²த்தும் ஆஸனே நிஸீதி³த்வா கதே²தப்³ப³யுத்தகம் கிஞ்சி அபஸ்ஸந்தோ ‘த்வம் அம்ஹாகம் அய்யேஹி ஸாரிபுத்தமோக்³க³ல்லானத்தே²ரேஹி ஸத்³தி⁴ம் யுக³க்³கா³ஹம் க³ண்ஹாஸீ’தி லேட்³டு³த³ண்டா³தீ³னி க³ஹேத்வா ஸந்தஜ்ஜேத்வா பலாபியமானோ வச்சகுடியா பதிதோ’’தி. ஸத்தா² ஆக³ந்த்வா ‘‘காய நுத்த², பி⁴க்க²வே, ஏதரஹி கதா²ய ஸன்னிஸின்னா’’தி புச்சி²த்வா ‘‘இமாய நாமா’’தி வுத்தே ‘‘ந, பி⁴க்க²வே, இதா³னேவ, புப்³பே³பி ஏஸோ கூ³த²கூபே நிமுக்³கோ³யேவா’’தி வத்வா அதீதம் ஆஹரித்வா –

‘‘சதுப்பதோ³ அஹம் ஸம்ம, த்வம்பி ஸம்ம சதுப்பதோ³;

ஏஹி ஸம்ம நிவத்தஸ்ஸு, கிம் நு பீ⁴தோ பலாயஸி.

‘‘அஸுசிபூதிலோமோஸி, து³க்³க³ந்தோ⁴ வாஸி ஸூகர;

ஸசே யுஜ்ஜி²துகாமோஸி, ஜயம் ஸம்ம த³தா³மி தே’’தி. (ஜா. 1.2.5-6) –

இமம் ஜாதகம் வித்தா²ரேத்வா கதே²ஸி. ததா³ ஸீஹோ ஸாரிபுத்தோ அஹோஸி, ஸூகரோ லாலுதா³யீதி. ஸத்தா² இமம் த⁴ம்மதே³ஸனம் ஆஹரித்வா, ‘‘பி⁴க்க²வே, லாலுதா³யினா அப்பமத்தகோவ த⁴ம்மோ உக்³க³ஹிதோ, ஸஜ்ஜா²யம் பன நேவ அகாஸி, கிஞ்சி பரியத்திம் உக்³க³ஹேத்வா தஸ்ஸா அஸஜ்ஜா²யகரணம் மலமேவா’’தி வத்வா இமம் கா³த²மாஹ –

241. ‘‘அஸஜ்ஜா²யமலா மந்தா, அனுட்டா²னமலா க⁴ரா;

மலம் வண்ணஸ்ஸ கோஸஜ்ஜம், பமாதோ³ ரக்க²தோ மல’’ந்தி.

தத்த² அஸஜ்ஜா²யமலாதி யாகாசி பரியத்தி வா ஸிப்பம் வா யஸ்மா அஸஜ்ஜா²யந்தஸ்ஸ அனனுயுஞ்ஜந்தஸ்ஸ வினஸ்ஸதி வா நிரந்தரம் வா ந உபட்டா²தி, தஸ்மா ‘‘அஸஜ்ஜா²யமலா மந்தா’’தி வுத்தம். யஸ்மா பன க⁴ராவாஸம் வஸந்தஸ்ஸ உட்டா²யுட்டா²ய ஜிண்ணபடிஸங்க²ரணாதீ³னி அகரோந்தஸ்ஸ க⁴ரம் நாம வினஸ்ஸதி, தஸ்மா ‘‘அனுட்டா²னமலா க⁴ரா’’தி வுத்தம். யஸ்மா கி³ஹிஸ்ஸ வா பப்³ப³ஜிதஸ்ஸ வா கோஸஜ்ஜவஸேன ஸரீரபடிஜக்³க³னம் வா பரிக்கா²ரபடிஜக்³க³னம் வா அகரோந்தஸ்ஸ காயோ து³ப்³ப³ண்ணோ ஹோதி, தஸ்மா ‘‘மலம் வண்ணஸ்ஸ கோஸஜ்ஜ’’ந்தி வுத்தம். யஸ்மா கா³வோ ரக்க²ந்தஸ்ஸ பமாத³வஸேன நித்³தா³யந்தஸ்ஸ வா கீளந்தஸ்ஸ வா தா கா³வோ அதித்த²பக்க²ந்த³னாதி³னா வா வாளமிக³சோராதி³உபத்³த³வேன வா பரேஸம் ஸாலிகே²த்தாதீ³னி ஓதரித்வா கா²த³னவஸேன வினாஸம் ஆபஜ்ஜந்தி, ஸயம்பி த³ண்ட³ம் வா பரிபா⁴ஸம் வா பாபுணாதி, பப்³ப³ஜிதம் வா பன ச² த்³வாரானி அரக்க²ந்தம் பமாத³வஸேன கிலேஸா ஓதரித்வா ஸாஸனா சாவேந்தி, தஸ்மா ‘‘பமாதோ³ ரக்க²தோ மல’’ந்தி வுத்தம். ஸோ ஹிஸ்ஸ வினாஸாவஹனேன மலட்டா²னியத்தா மலந்தி அத்தோ².

தே³ஸனாவஸானே ப³ஹூ ஸோதாபத்திப²லாதீ³னி பாபுணிம்ஸூதி.

லாலுதா³யித்தே²ரவத்து² சதுத்த²ம்.