5. அஞ்ஞதரகுலபுத்தவத்து²

மலித்தி²யா து³ச்சரிதந்தி இமம் த⁴ம்மதே³ஸனம் ஸத்தா² வேளுவனே விஹரந்தோ அஞ்ஞதரம் குலபுத்தம் ஆரப்³ப⁴ கதே²ஸி.

தஸ்ஸ கிர ஸமானஜாதிகம் குலகுமாரிகம் ஆனேஸும். ஸா ஆனீததி³வஸதோ பட்டா²ய அதிசாரினீ அஹோஸி. ஸோ குலபுத்தோ தஸ்ஸா அதிசாரேன லஜ்ஜிதோ கஸ்ஸசி ஸம்முகீ²பா⁴வம் உபக³ந்தும் அஸக்கோந்தோ பு³த்³து⁴பட்டா²னாதீ³னி பச்சி²ந்தி³த்வா கதிபாஹச்சயேன ஸத்தா²ரம் உபஸங்கமித்வா வந்தி³த்வா ஏகமந்தம் நிஸின்னோ ‘‘கிம், உபாஸக, ந தி³ஸ்ஸஸீ’’தி வுத்தே தமத்த²ம் ஆரோசேஸி. அத² நம் ஸத்தா², ‘‘உபாஸக, புப்³பே³பி மயா ‘இத்தி²யோ நாம நதீ³ஆதி³ஸதி³ஸா, தாஸு பண்டி³தேன கோதோ⁴ ந காதப்³போ³’தி வுத்தம், த்வம் பன ப⁴வபடிச்ச²ன்னத்தா ந ஸல்லக்கே²ஸீ’’தி வத்வா தேன யாசிதோ –

‘‘யதா² நதீ³ ச பந்தோ² ச, பானாகா³ரம் ஸபா⁴ பபா;

ஏவம் லோகித்தி²யோ நாம, வேலா தாஸம் ந விஜ்ஜதீ’’தி. (ஜா. 1.1.65; 1.12.9) –

ஜாதகம் வித்தா²ரேத்வா, ‘‘உபாஸக, இத்தி²யா ஹி அதிசாரினிபா⁴வோ மலம், தா³னம் தே³ந்தஸ்ஸ மச்சே²ரம் மலம், இத⁴லோகபரலோகேஸு ஸத்தானம் அகுஸலகம்மம் வினாஸனத்தே²ன மலம், அவிஜ்ஜா பன ஸப்³ப³மலானம் உத்தமமல’’ந்தி வத்வா இமா கா³தா² அபா⁴ஸி –

242. ‘‘மலித்தி²யா து³ச்சரிதம், மச்சே²ரம் த³த³தோ மலம்;

மலா வே பாபகா த⁴ம்மா, அஸ்மிம் லோகே பரம்ஹி ச.

243. ‘‘ததோ மலா மலதரம், அவிஜ்ஜா பரமம் மலம்;

ஏதம் மலம் பஹந்த்வான, நிம்மலா ஹோத² பி⁴க்க²வோ’’தி.

தத்த² து³ச்சரிதந்தி அதிசாரோ. அதிசாரினிஞ்ஹி இத்தி²ம் ஸாமிகோபி கே³ஹா நீஹரதி, மாதாபிதூனம் ஸந்திகம் க³தம்பி ‘‘த்வம் குலஸ்ஸ அகா³ரவபூ⁴தா, அக்கீ²ஹிபி ந த³ட்ட²ப்³பா³’’தி தம் நீஹரந்தி. ஸா அனாதா² விசரந்தீ மஹாது³க்க²ம் பாபுணாதி. தேனஸ்ஸா து³ச்சரிதம் ‘‘மல’’ந்தி வுத்தம். த³த³தோதி தா³யகஸ்ஸ. யஸ்ஸ ஹி கே²த்தகஸனகாலே ‘‘இமஸ்மிம் கே²த்தே ஸம்பன்னே ஸலாகப⁴த்தாதீ³னி த³ஸ்ஸாமீ’’தி சிந்தேத்வா நிப்ப²ன்னே ஸஸ்ஸேபி மச்சே²ரம் உப்பஜ்ஜித்வா சாக³சித்தம் நிவாரேதி, ஸோ மச்சே²ரவஸேன சாக³சித்தே அவிரூஹந்தே மனுஸ்ஸஸம்பத்திம் தி³ப்³ப³ஸம்பத்திம் நிப்³பா³னஸம்பத்திந்தி திஸ்ஸோ ஸம்பத்தியோ ந லப⁴தி. தேன வுத்தம் – ‘‘மச்சே²ரம் த³த³தோ மல’’ந்தி. ஸேஸேஸுபி ஏஸேவ நயோ. பாபகா த⁴ம்மாதி அகுஸலத⁴ம்மா பன இத⁴லோகே ச பரலோகே ச மலமேவ.

ததோதி ஹேட்டா² வுத்தமலதோ. மலதரந்தி அதிரேகமலம் வோ கதே²மீதி அத்தோ². அவிஜ்ஜாதி அட்ட²வத்து²கம் அஞ்ஞாணமேவ பரமம் மலம். பஹந்த்வானாதி ஏதம் மலம் ஜஹித்வா, பி⁴க்க²வே, தும்ஹே நிம்மலா ஹோதா²தி அத்தோ².

தே³ஸனாவஸானே ப³ஹூ ஸோதாபத்திப²லாதீ³னி பாபுணிம்ஸூதி.

அஞ்ஞதரகுலபுத்தவத்து² பஞ்சமம்.