5. ஸம்மஜ்ஜனத்தே²ரவத்து²

யோ ச புப்³பே³தி இமம் த⁴ம்மதே³ஸனம் ஸத்தா² ஜேதவனே விஹரந்தோ ஸம்மஜ்ஜனத்தே²ரம் ஆரப்³ப⁴ கதே²ஸி.

ஸோ கிர பாதோ வா ஸாயம் வாதி வேலம் பமாணம் அகத்வா அபி⁴க்க²ணம் ஸம்மஜ்ஜந்தோவ விசரதி. ஸோ ஏகதி³வஸம் ஸம்மஜ்ஜனிம் க³ஹேத்வா தி³வாட்டா²னே நிஸின்னஸ்ஸ ரேவதத்தே²ரஸ்ஸ ஸந்திகம் க³ந்த்வா ‘‘அயம் மஹாகுஸீதோ ஜனஸ்ஸ ஸத்³தா⁴தே³ய்யம் பு⁴ஞ்ஜித்வா ஆக³ந்த்வா நிஸீத³தி, கிம் நாமேதஸ்ஸ ஸம்மஜ்ஜனிம் க³ஹேத்வா ஏகம் டா²னம் ஸம்மஜ்ஜிதும் ந வட்டதீ’’தி ஆஹ. தே²ரோ ‘‘ஓவாத³மஸ்ஸ த³ஸ்ஸாமீ’’தி சிந்தேத்வா ஏஹாவுஸோதி. கிம், ப⁴ந்தேதி? க³ச்ச² ந்ஹத்வா ஏஹீதி. ஸோ ததா² அகாஸி. அத² நம் தே²ரோ ஏகமந்தம் நிஸீதா³பேத்வா ஓவத³ந்தோ ஆஹ – ‘‘ஆவுஸோ, பி⁴க்கு²னா நாம ந ஸப்³ப³காலம் ஸம்மஜ்ஜந்தேன விசரிதும் வட்டதி, பாதோ ஏவ பன ஸம்மஜ்ஜித்வா பிண்டா³ய சரித்வா பிண்ட³பாதபடிக்கந்தேன ஆக³ந்த்வா ரத்திட்டா²னே வா தி³வாட்டா²னே வா நிஸின்னேன த்³வத்திம்ஸாகாரம் ஸஜ்ஜா²யித்வா அத்தபா⁴வே க²யவயம் பட்ட²பேத்வா ஸாயன்ஹே உட்டா²ய ஸம்மஜ்ஜிதும் வட்டதி, நிச்சகாலம் அஸம்மஜ்ஜித்வா அத்தனோபி நாம ஓகாஸோ காதப்³போ³’’தி. ஸோ தே²ரஸ்ஸ ஓவாதே³ ட²த்வா ந சிரஸ்ஸேவ அரஹத்தம் பாபுணி. தம் தம் டா²னம் உக்லாபம் அஹோஸி. அத² நம் பி⁴க்கூ² ஆஹம்ஸு – ‘‘ஆவுஸோ ஸம்மஜ்ஜனத்தே²ர, தம் தம் டா²னம் உக்லாபம் கஸ்மா ந ஸம்மஜ்ஜஸீ’’தி? ‘‘ப⁴ந்தே, மயா பமாத³காலே ஏவம் கதம், இதா³னாம்ஹி அப்பமத்தோ’’தி. பி⁴க்கூ² ‘‘அயம் தே²ரோ அஞ்ஞம் ப்³யாகரோதீ’’தி ஸத்து² ஆரோசேஸும். ஸத்தா² ‘‘ஆம, பி⁴க்க²வே, மம புத்தோ புப்³பே³ பமாத³காலே ஸம்மஜ்ஜந்தோ விசரி, இதா³னி பன மக்³க³ப²லஸுகே²ன வீதினாமேந்தோ ந ஸம்மஜ்ஜதீ’’தி வத்வா இமம் கா³த²மாஹ –

172. ‘‘யோ ச புப்³பே³ பமஜ்ஜித்வா, பச்சா² ஸோ நப்பமஜ்ஜதி;

ஸோமம் லோகம் பபா⁴ஸேதி, அப்³பா⁴ முத்தோவ சந்தி³மா’’தி.

தஸ்ஸத்தோ² – யோ புக்³க³லோ புப்³பே³ வத்தபடிவத்தகரணேன வா ஸஜ்ஜா²யாதீ³ஹி வா பமஜ்ஜித்வா பச்சா² மக்³க³ப²லஸுகே²ன வீதினாமேந்தோ நப்பமஜ்ஜதி, ஸோ அப்³பா⁴தீ³ஹி முத்தோ சந்தோ³வ ஓகாஸலோகம் மக்³க³ஞாணேன இமம் க²ந்தா⁴தி³லோகம் ஓபா⁴ஸேதி, ஏகாலோகம் கரோதீதி.

தே³ஸனாவஸானே ப³ஹூ ஸோதாபத்திப²லாதீ³னி பாபுணிம்ஸூதி.

ஸம்மஜ்ஜனத்தே²ரவத்து² பஞ்சமம்.