12. அத்தவக்³கோ³

1. போ³தி⁴ராஜகுமாரவத்து²

அத்தானஞ்சேதி இமம் த⁴ம்மதே³ஸனம் ஸத்தா² பே⁴ஸகளாவனே விஹரந்தோ போ³தி⁴ராஜகுமாரம் ஆரப்³ப⁴ கதே²ஸி.

ஸோ கிர பத²வீதலே அஞ்ஞேஹி பாஸாதே³ஹி அஸதி³ஸரூபம் ஆகாஸே உப்பதமானம் விய கோகனுத³ம் நாம பாஸாத³ம் காரேத்வா வட்³ட⁴கிம் புச்சி² – ‘‘கிம் தயா அஞ்ஞத்தா²பி ஏவரூபோ பாஸாதோ³ கதபுப்³போ³, உதா³ஹு பட²மஸிப்பமேவ தே இத³’’ந்தி. ‘‘பட²மஸிப்பமேவ, தே³வா’’தி ச வுத்தே சிந்தேஸி – ‘‘ஸசே அயம் அஞ்ஞஸ்ஸபி ஏவரூபம் பாஸாத³ம் கரிஸ்ஸதி, அயம் பாஸாதோ³ அனச்ச²ரியோ ப⁴விஸ்ஸதி. இமம் மயா மாரேதும் வா ஹத்த²பாதே³ வாஸ்ஸ சி²ந்தி³தும் அக்கீ²னி வா உப்பாடேதும் வட்டதி, ஏவம் அஞ்ஞஸ்ஸ பாஸாத³ம் ந கரிஸ்ஸதீ’’தி. ஸோ தமத்த²ம் அத்தனோ பியஸஹாயகஸ்ஸ ஸஞ்ஜீவகபுத்தஸ்ஸ நாம மாணவகஸ்ஸ கதே²ஸி. ஸோ சிந்தேஸி – ‘‘நிஸ்ஸம்ஸயம் ஏஸ வட்³ட⁴கிம் நாஸேஸ்ஸதி, அனக்³கோ⁴ ஸிப்பீ, ஸோ மயி பஸ்ஸந்தே மா நஸ்ஸது, ஸஞ்ஞமஸ்ஸ த³ஸ்ஸாமீ’’தி. ஸோ தம் உபஸங்கமித்வா ‘‘பாஸாதே³ தே கம்மம் நிட்டி²தம், நோ’’தி புச்சி²த்வா ‘‘நிட்டி²த’’ந்தி வுத்தே ‘‘ராஜகுமாரோ தம் நாஸேதுகாமோ அத்தானம் ரக்கே²ய்யாஸீ’’தி ஆஹ. வட்³ட⁴கீபி ‘‘ப⁴த்³த³கம் தே, ஸாமி, கதம் மம ஆரோசேந்தேன, அஹமேத்த² கத்தப்³ப³ம் ஜானிஸ்ஸாமீ’’தி வத்வா ‘‘கிம், ஸம்ம, அம்ஹாகம் பாஸாதே³ கம்மம் நிட்டி²த’’ந்தி ராஜகுமாரேன புட்டோ² ‘‘ந தாவ, தே³வ, நிட்டி²தம், ப³ஹு அவஸிட்ட²’’ந்தி ஆஹ. கிம் கம்மம் நாம அவஸிட்ட²ந்தி? பச்சா², தே³வ, ஆசிக்கி²ஸ்ஸாமி, தா³ரூனி தாவ ஆஹராபேதா²தி. கிம் தா³ரூனி நாமாதி? நிஸ்ஸாரானி ஸுக்க²தா³ரூனி, தே³வாதி. ஸோ ஆஹராபேத்வா அதா³ஸி. அத² நம் ஆஹ – ‘‘தே³வ, தே இதோ பட்டா²ய மம ஸந்திகம் நாக³ந்தப்³ப³ம். கிம் காரணா? ஸுகு²மகம்மம் கரோந்தஸ்ஸ ஹி அஞ்ஞேஹி ஸத்³தி⁴ம் ஸல்லபந்தஸ்ஸ மே கம்மவிக்கே²போ ஹோதி, ஆஹாரவேலாயம் பன மே ப⁴ரியாவ ஆஹாரம் ஆஹரிஸ்ஸதீ’’தி. ராஜகுமாரோபி ‘‘ஸாதூ⁴’’தி படிஸ்ஸுணி. ஸோபி ஏகஸ்மிம் க³ப்³பே⁴ நிஸீதி³த்வா தானி தா³ரூனி தச்சே²த்வா அத்தனோ புத்ததா³ரஸ்ஸ அந்தோ நிஸீத³னயோக்³க³ம் க³ருளஸகுணம் கத்வா ஆஹாரவேலாய பன ப⁴ரியம் ஆஹ – ‘‘கே³ஹே விஜ்ஜமானகம் ஸப்³ப³ம் விக்கிணித்வா ஹிரஞ்ஞஸுவண்ணம் க³ண்ஹாஹீ’’தி. ராஜகுமாரோபி வட்³ட⁴கிஸ்ஸ அனிக்க²மனத்தா²ய கே³ஹம் பரிக்கி²பித்வா ஆரக்க²ம் ட²பேஸி. வட்³ட⁴கீபி ஸகுணஸ்ஸ நிட்டி²தகாலே ‘‘அஜ்ஜ ஸப்³பே³பி தா³ரகே க³ஹேத்வா ஆக³ச்சே²ய்யாஸீ’’தி ப⁴ரியம் வத்வா பு⁴த்தபாதராஸோ புத்ததா³ரம் ஸகுணஸ்ஸ குச்சி²யம் நிஸீதா³பேத்வா வாதபானேன நிக்க²மித்வா பலாயி. ஸோ தேஸம், ‘‘தே³வ, வட்³ட⁴கீ பலாயதீ’’தி கந்த³ந்தானம்யேவ க³ந்த்வா ஹிமவந்தே ஓதரித்வா ஏகம் நக³ரம் மாபேத்வா கட்ட²வாஹனராஜா நாம ஜாதோ.

ராஜகுமாரோபி ‘‘பாஸாத³மஹம் கரிஸ்ஸாமீ’’தி ஸத்தா²ரம் நிமந்தேத்வா பாஸாதே³ சதுஜ்ஜாதியக³ந்தே⁴ஹி பரிப⁴ண்டி³கம் கத்வா பட²மஉம்மாரதோ பட்டா²ய சேலபடிகம் பத்த²ரி. ஸோ கிர அபுத்தகோ, தஸ்மா ‘‘ஸசாஹம் புத்தம் வா தீ⁴தரம் வா லச்சா²மி, ஸத்தா² இமம் அக்கமிஸ்ஸதீ’’தி சிந்தேத்வா பத்த²ரி. ஸோ ஸத்த²ரி ஆக³தே ஸத்தா²ரம் பஞ்சபதிட்டி²தேன வந்தி³த்வா பத்தம் க³ஹேத்வா ‘‘பவிஸத², ப⁴ந்தே’’தி ஆஹ. ஸத்தா² ந பாவிஸி, ஸோ து³தியம்பி ததியம்பி யாசி. ஸத்தா² அபவிஸித்வாவ ஆனந்த³த்தே²ரம் ஓலோகேஸி. தே²ரோ ஓலோகிதஸஞ்ஞாயேவ வத்தா²னம் அனக்கமனபா⁴வம் ஞத்வா தம் ‘‘ஸம்ஹரது, ராஜகுமார, து³ஸ்ஸானி, ந ப⁴க³வா சேலபடிகம் அக்கமிஸ்ஸதி, பச்சி²மஜனதம் ததா²க³தோ ஓலோகேதீ’’தி து³ஸ்ஸானி ஸம்ஹராபேஸி. ஸோ து³ஸ்ஸானி ஸம்ஹரித்வா ஸத்தா²ரம் அந்தோனிவேஸனம் பவேஸத்வா யாகு³க²ஜ்ஜகேன ஸம்மானேத்வா ஏகமந்தம் நிஸின்னோ வந்தி³த்வா ஆஹ – ‘‘ப⁴ந்தே, அஹம் தும்ஹாகம் உபகாரகோ திக்க²த்தும் ஸரணம் க³தோ, குச்சி²க³தோ ச கிரம்ஹி ஏகவாரம் ஸரணம் க³தோ, து³தியம் தருணதா³ரககாலே, ததியம் விஞ்ஞுபா⁴வம் பத்தகாலே. தஸ்ஸ மே கஸ்மா சேலபடிகம் ந அக்கமித்தா²’’தி? ‘‘கிம் பன த்வம், குமார, சிந்தேத்வா சேலானி அத்த²ரீ’’தி? ‘‘ஸசே புத்தம் வா தீ⁴தரம் வா லச்சா²மி, ஸத்தா² மே சேலபடிகம் அக்கமிஸ்ஸதீ’’தி இத³ம் சிந்தேத்வா, ப⁴ந்தேதி. தேனேவாஹம் தம் ந அக்கமிந்தி. ‘‘கிம் பனாஹம், ப⁴ந்தே, புத்தம் வா தீ⁴தரம் வா நேவ லச்சா²மீ’’தி? ‘‘ஆம, குமாரா’’தி. ‘‘கிம் காரணா’’தி? ‘‘புரிமகஅத்தபா⁴வே ஜாயாய ஸத்³தி⁴ம் பமாத³ம் ஆபன்னத்தா’’தி. ‘‘கஸ்மிம் காலே, ப⁴ந்தே’’தி? அத²ஸ்ஸ ஸத்தா² அதீதம் ஆஹரித்வா த³ஸ்ஸேஸி –

அதீதே கிர அனேகஸதா மனுஸ்ஸா மஹதியா நாவாய ஸமுத்³த³ம் பக்க²ந்தி³ம்ஸு. நாவா ஸமுத்³த³மஜ்ஜே² பி⁴ஜ்ஜி. த்³வே ஜயம்பதிகா ஏகம் ப²லகம் க³ஹேத்வா அந்தரதீ³பகம் பவிஸிம்ஸு, ஸேஸா ஸப்³பே³ தத்தே²வ மரிம்ஸு. தஸ்மிம் கோ² பன தீ³பகே மஹாஸகுணஸங்கோ⁴ வஸதி. தே அஞ்ஞம் கா²தி³தப்³ப³கம் அதி³ஸ்வா சா²தஜ்ஜ²த்தா ஸகுணஅண்டா³னி அங்கா³ரேஸு பசித்வா கா²தி³ம்ஸு, தேஸு அப்பஹோந்தேஸு ஸகுணச்சா²பே க³ஹேத்வா கா²தி³ம்ஸு. ஏவம் பட²மவயேபி மஜ்ஜி²மவயேபி பச்சி²மவயேபி கா²தி³ம்ஸுயேவ. ஏகஸ்மிம்பி வயே அப்பமாத³ம் நாபஜ்ஜிம்ஸு, ஏகோபி ச நேஸம் அப்பமாத³ம் நாபஜ்ஜி.

ஸத்தா² இத³ம் தஸ்ஸ புப்³ப³கம்மம் த³ஸ்ஸேத்வா ‘‘ஸசே ஹி த்வம், குமார, ததா³ ஏகஸ்மிம்பி வயே ப⁴ரியாய ஸத்³தி⁴ம் அப்பமாத³ம் ஆபஜ்ஜிஸ்ஸ, ஏகஸ்மிம்பி வயே புத்தோ வா தீ⁴தா வா உப்பஜ்ஜேய்ய. ஸசே பன வோ ஏகோபி அப்பமத்தோ அப⁴விஸ்ஸ, தம் படிச்ச புத்தோ வா தீ⁴தா வா உப்பஜ்ஜிஸ்ஸ. குமார, அத்தானஞ்ஹி பியம் மஞ்ஞமானேன தீஸுபி வயேஸு அப்பமத்தேன அத்தா ரக்கி²தப்³போ³, ஏவம் அஸக்கோந்தேன ஏகவயேபி ரக்கி²தப்³போ³யேவா’’தி வத்வா இமம் கா³த²மாஹ –

157. ‘‘அத்தானஞ்சே பியம் ஜஞ்ஞா, ரக்கே²ய்ய நம் ஸுரக்கி²தம்;

திண்ணம் அஞ்ஞதரம் யாமம், படிஜக்³கே³ய்ய பண்டி³தோ’’தி.

தத்த² யாமந்தி ஸத்தா² அத்தனோ த⁴ம்மிஸ்ஸரதாய தே³ஸனாகுஸலதாய ச இத⁴ திண்ணம் வயானம் அஞ்ஞதரம் வயம் யாமந்தி கத்வா தே³ஸேஸி, தஸ்மா ஏவமேத்த² அத்தோ² வேதி³தப்³போ³. ஸசே அத்தானம் பியம் ஜானேய்ய, ரக்கே²ய்ய நம் ஸுரக்கி²தந்தி யதா² ஸோ ஸுரக்கி²தோ ஹோதி, ஏவம் நம் ரக்கே²ய்ய. தத்த² ஸசே கீ³ஹீ ஸமானோ ‘‘அத்தானம் ரக்கி²ஸ்ஸாமீ’’தி உபரிபாஸாத³தலே ஸுஸம்வுதம் க³ப்³ப⁴ம் பவிஸித்வா ஸம்பன்னாரக்கோ² ஹுத்வா வஸந்தோபி, பப்³ப³ஜிதோ ஹுத்வா ஸுஸம்வுதே பிஹிதத்³வாரவாதபானே லேணே விஹரந்தோபி அத்தானம் ந ரக்க²தியேவ. கி³ஹீ பன ஸமானோ யதா²ப³லம் தா³னஸீலாதீ³னி புஞ்ஞானி கரோந்தோ, பப்³ப³ஜிதோ வா பன வத்தபடிவத்தபரியத்திமனஸிகாரேஸு உஸ்ஸுக்கம் ஆபஜ்ஜந்தோ அத்தானம் ரக்க²தி நாம. ஏவம் தீஸு வயேஸு அஸக்கோந்தோ அஞ்ஞதரஸ்மிம்பி வயே பண்டி³தபுரிஸோ அத்தானம் படிஜக்³க³தியேவ. ஸசே ஹி கி³ஹிபூ⁴தோ பட²மவயே கி²ட்³டா³பஸுததாய குஸலம் காதும் ந ஸக்கோதி, மஜ்ஜி²மவயே அப்பமத்தேன ஹுத்வா குஸலம் காதப்³ப³ம். ஸசே மஜ்ஜி²மவயே புத்ததா³ரம் போஸேந்தோ குஸலம் காதும் ந ஸக்கோதி, பச்சி²மவயே காதப்³ப³மேவ. ஏவம்பி கரோந்தேன அத்தா படிஜக்³கி³தோவ ஹோதி. ஏவம் அகரோந்தஸ்ஸ பன அத்தா பியோ நாம ந ஹோதி, அபாயபராயணமேவ நம் கரோதி. ஸசே பன பப்³ப³ஜிதோ பட²மவயே ஸஜ்ஜா²யம் கரோந்தோ தா⁴ரேந்தோ வாசேந்தோ வத்தபடிவத்தம் கரோந்தோ பமாத³ம் ஆபஜ்ஜதி, மஜ்ஜி²மவயே அப்பமத்தேன ஸமணத⁴ம்மோ காதப்³போ³. ஸசே பட²மவயே உக்³க³ஹிதபரியத்தியா அட்ட²கத²ம் வினிச்ச²யம் காரணாகாரணஞ்ச புச்ச²ந்தோ மஜ்ஜி²மவயே பமாத³ம் ஆபஜ்ஜதி, பச்சி²மவயே அப்பமத்தேன ஸமணத⁴ம்மோ காதப்³போ³யேவ. ஏவம்பி கரோந்தேன அத்தா படிஜக்³கி³தோவ ஹோதி. ஏவம் அகரோந்தஸ்ஸ பன அத்தா பியோ நாம ந ஹோதி, பச்சா²னுதாபேனேவ நம் தாபேதீதி.

தே³ஸனாவஸானே போ³தி⁴ராஜகுமாரோ ஸோதாபத்திப²லே பதிட்ட²ஹி, ஸம்பத்தபரிஸாயபி ஸாத்தி²கா த⁴ம்மதே³ஸனா அஹோஸீதி.

போ³தி⁴ராஜகுமாரவத்து² பட²மம்.

2. உபனந்த³ஸக்யபுத்தத்தே²ரவத்து²

அத்தானமேவ பட²மந்தி இமம் த⁴ம்மதே³ஸனம் ஸத்தா² ஜேதவனே விஹரந்தோ உபனந்த³ம் ஸக்யபுத்தம் ஆரப்³ப⁴ கதே²ஸி.

ஸோ கிர தே²ரோ த⁴ம்மகத²ம் கதே²தும் சே²கோ. தஸ்ஸ அப்பிச்ச²தாதி³படிஸம்யுத்தம் த⁴ம்மகத²ம் ஸுத்வா ப³ஹூ பி⁴க்கு² தம் திசீவரேஹி பூஜேத்வா து⁴தங்கா³னி ஸமாதி³யிம்ஸு. தேஹி விஸ்ஸட்ட²பரிக்கா²ரே ஸோயேவ க³ண்ஹி. ஸோ ஏகஸ்மிம் அந்தோவஸ்ஸே உபகட்டே² ஜனபத³ம் அக³மாஸி. அத² நம் ஏகஸ்மிம் விஹாரே த³ஹரஸாமணேரா த⁴ம்மகதி²கபேமேன, ‘‘ப⁴ந்தே, இத⁴ வஸ்ஸம் உபேதா²’’தி வதி³ம்ஸு. ‘‘இத⁴ கித்தகம் வஸ்ஸாவாஸிகம் லப்³ப⁴தீ’’தி புச்சி²த்வா தேஹி ‘‘ஏகேகோ ஸாடகோ’’தி வுத்தே தத்த² உபாஹனா ட²பேத்வா அஞ்ஞம் விஹாரம் அக³மாஸி. து³தியம் விஹாரம் க³ந்த்வா ‘‘இத⁴ கிம் லப்³ப⁴தீ’’தி புச்சி²த்வா ‘‘த்³வே ஸாடகா’’தி வுத்தே கத்தரயட்டி²ம் ட²பேஸி. ததியம் விஹாரம் க³ந்த்வா ‘‘இத⁴ கிம் லப்³ப⁴தீ’’தி புச்சி²த்வா ‘‘தயோ ஸாடகா’’தி வுத்தே தத்த² உத³கதும்ப³ம் ட²பேஸி. சதுத்த²ம் விஹாரம் க³ந்த்வா ‘‘இத⁴ கிம் லப்³ப⁴தீ’’தி புச்சி²த்வா ‘‘சத்தாரோ ஸாடகா’’தி வுத்தே ‘‘ஸாது⁴ இத⁴ வஸிஸ்ஸாமீ’’தி தத்த² வஸ்ஸம் உபக³ந்த்வா க³ஹட்டா²னஞ்சேவ பி⁴க்கூ²னஞ்ச த⁴ம்மகத²ம் கதே²ஸி. தே நம் ப³ஹூஹி வத்தே²ஹி சேவ சீவரேஹி ச பூஜேஸும். ஸோ வுட்ட²வஸ்ஸோ இதரேஸுபி விஹாரேஸு ஸாஸனம் பேஸேத்வா ‘‘மயா பரிக்கா²ரஸ்ஸ ட²பிதத்தா வஸ்ஸாவாஸிகம் லத்³த⁴ப்³ப³ம், தம் மே பஹிணந்தூ’’தி ஸப்³ப³ம் ஆஹராபேத்வா யானகம் பூரேத்வா பாயாஸி.

அதே²கஸ்மிம் விஹாரே த்³வே த³ஹரபி⁴க்கூ² த்³வே ஸாடகே ஏகஞ்ச கம்ப³லம் லபி⁴த்வா ‘‘துய்ஹம் ஸாடகா ஹோந்து, மய்ஹம் கம்ப³லோ’’தி பா⁴ஜேதும் அஸக்கோந்தா மக்³க³ஸமீபே நிஸீதி³த்வா விவத³ந்தி. தே தம் தே²ரம் ஆக³ச்ச²ந்தம் தி³ஸ்வா, ‘‘ப⁴ந்தே, தும்ஹே நோ பா⁴ஜேத்வா தே³தா²’’தி வதி³ம்ஸு. தும்ஹேயேவ பா⁴ஜேதா²தி. ந ஸக்கோம, ப⁴ந்தே, தும்ஹேயேவ நோ பா⁴ஜேத்வா தே³தா²தி. தேன ஹி மம வசனே ட²ஸ்ஸதா²தி. ஆம, ட²ஸ்ஸாமாதி. ‘‘தேன ஹி ஸாதூ⁴’’தி தேஸம் த்³வே ஸாடகே த³த்வா ‘‘அயம் த⁴ம்மகத²ம் கதே²ந்தானம் அம்ஹாகம் பாருபனாரஹோ’’தி மஹக்³க⁴ம் கம்ப³லம் ஆதா³ய பக்காமி. த³ஹரபி⁴க்கூ² விப்படிஸாரினோ ஹுத்வா ஸத்து² ஸந்திகம் க³ந்த்வா தமத்த²ம் ஆரோசேஸும். ஸத்தா² ‘‘ந, பி⁴க்க²வே, இதா³னேவ தும்ஹாகம் ஸந்தகம் க³ஹேத்வா தும்ஹே விப்படிஸாரினோ கரோதி, புப்³பே³பி அகாஸியேவா’’தி வத்வா அதீதம் ஆஹரி –

அதீதஸ்மிம் அனுதீரசாரீ ச க³ம்பீ⁴ரசாரீ சாதி த்³வே உத்³தா³ மஹந்தம் ரோஹிதமச்ச²ம் லபி⁴த்வா ‘‘மய்ஹம் ஸீஸம் ஹோது, தவ நங்கு³ட்ட²’’ந்தி விவாதா³பன்னா பா⁴ஜேதும் அஸக்கோந்தா ஏகம் ஸிங்கா³லம் தி³ஸ்வா ஆஹம்ஸு – ‘‘மாதுல, இமம் நோ பா⁴ஜேத்வா தே³ஹீ’’தி. அஹம் ரஞ்ஞா வினிச்ச²யட்டா²னே ட²பிதோ, தத்த² சிரம் நிஸீதி³த்வா ஜங்க⁴விஹாரத்தா²ய ஆக³தோம்ஹி, இதா³னி மே ஓகாஸோ நத்தீ²தி. மாதுல, மா ஏவம் கரோத², பா⁴ஜேத்வா ஏவ நோ தே³தா²தி. மம வசனே ட²ஸ்ஸதா²தி. ட²ஸ்ஸாம, மாதுலாதி. ‘‘தேன ஹி ஸாதூ⁴’’தி ஸோ ஸீஸம் சி²ந்தி³த்வா ஏகமந்தே அகாஸி, நங்கு³ட்ட²ம் ஏகமந்தே. கத்வா ச பன, ‘‘தாதா, யேன வோ அனுதீரே சரிதம், ஸோ நங்கு³ட்ட²ம் க³ண்ஹாது. யேன க³ம்பீ⁴ரே சரிதம், தஸ்ஸ ஸீஸம் ஹோது. அயம் பன மஜ்ஜி²மோ க²ண்டோ³ மம வினிச்ச²யத⁴ம்மே டி²தஸ்ஸ ப⁴விஸ்ஸதீ’’தி தே ஸஞ்ஞாபேந்தோ –

‘‘அனுதீரசாரி நங்கு³ட்ட²ம், ஸீஸம் க³ம்பீ⁴ரசாரினோ;

அச்சாயம் மஜ்ஜி²மோ க²ண்டோ³, த⁴ம்மட்ட²ஸ்ஸ ப⁴விஸ்ஸதீ’’தி. (ஜா. 1.7.33) –

இமம் கா³த²ம் வத்வா மஜ்ஜி²மக²ண்ட³ம் ஆதா³ய பக்காமி. தேபி விப்படிஸாரினோ தம் ஓலோகேத்வா அட்ட²ம்ஸு.

ஸத்தா² இமம் அதீதம் த³ஸ்ஸேத்வா ‘‘ஏவமேஸ அதீதேபி தும்ஹே விப்படிஸாரினோ அகாஸியேவா’’தி தே பி⁴க்கூ² ஸஞ்ஞாபேத்வா உபனந்த³ம் க³ரஹந்தோ, ‘‘பி⁴க்க²வே, பரம் ஓவத³ந்தேன நாம பட²மமேவ அத்தா பதிரூபே பதிட்டா²பேதப்³போ³’’தி வத்வா இமம் கா³த²மாஹ –

158. ‘‘அத்தானமேவ பட²மம், பதிரூபே நிவேஸயே;

அத²ஞ்ஞமனுஸாஸேய்ய, ந கிலிஸ்ஸேய்ய பண்டி³தோ’’தி.

தத்த² பதிரூபே நிவேஸயேதி அனுச்ச²விகே கு³ணே பதிட்டா²பேய்ய. இத³ம் வுத்தம் ஹோதி – யோ அப்பிச்ச²தாதி³கு³ணேஹி வா அரியவம்ஸபடிபதா³தீ³ஹி வா பரம் அனுஸாஸிதுகாமோ, ஸோ அத்தானமேவ பட²மம் தஸ்மிம் கு³ணே பதிட்டா²பேய்ய. ஏவம் பதிட்டா²பேத்வா அத²ஞ்ஞம் தேஹி கு³ணேஹி அனுஸாஸேய்ய. அத்தானஞ்ஹி தத்த² அனிவேஸேத்வா கேவலம் பரமேவ அனுஸாஸமானோ பரதோ நிந்த³ம் லபி⁴த்வா கிலிஸ்ஸதி நாம, தத்த² அத்தானம் நிவேஸேத்வா அனுஸாஸமானோ பரதோ பஸம்ஸம் லப⁴தி, தஸ்மா ந கிலிஸ்ஸதி நாம. ஏவம் கரோந்தோ பண்டி³தோ ந கிலிஸ்ஸேய்யாதி.

தே³ஸனாவஸானே தே பி⁴க்கூ² ஸோதாபத்திப²லே பதிட்ட²ஹிம்ஸு, மஹாஜனஸ்ஸாபி ஸாத்தி²கா த⁴ம்மதே³ஸனா அஹோஸீதி.

உபனந்த³ஸக்யபுத்தத்தே²ரவத்து² து³தியம்.

3. பதா⁴னிகதிஸ்ஸத்தே²ரவத்து²

அத்தானஞ்சேதி இமம் த⁴ம்மதே³ஸனம் ஸத்தா² ஜேதவனே விஹரந்தோ பதா⁴னிகதிஸ்ஸத்தே²ரம் ஆரப்³ப⁴ கதே²ஸி.

ஸோ கிர ஸத்து² ஸந்திகே கம்மட்டா²னம் க³ஹேத்வா பஞ்சஸதே பி⁴க்கூ² ஆதா³ய அரஞ்ஞே வஸ்ஸம் உபக³ந்த்வா, ‘‘ஆவுஸோ, த⁴ரமானகஸ்ஸ பு³த்³த⁴ஸ்ஸ ஸந்திகே வோ கம்மட்டா²னம் க³ஹிதம், அப்பமத்தாவ ஸமணத⁴ம்மம் கரோதா²’’தி ஓவதி³த்வா ஸயம் க³ந்த்வா நிபஜ்ஜித்வா ஸுபதி. தே பி⁴க்கூ² பட²மயாமே சங்கமித்வா மஜ்ஜி²மயாமே விஹாரம் பவிஸந்தி. ஸோ நித்³தா³யித்வா பபு³த்³த⁴காலே தேஸம் ஸந்திகம் க³ந்த்வா ‘‘கிம் தும்ஹே ‘நிபஜ்ஜித்வா நித்³தா³யிஸ்ஸாமா’தி ஆக³தா, ஸீக⁴ம் நிக்க²மித்வா ஸமணத⁴ம்மம் கரோதா²’’தி வத்வா ஸயம் க³ந்த்வா ததே²வ ஸுபதி. இதரே மஜ்ஜி²மயாமே ப³ஹி சங்கமித்வா பச்சி²மயாமே விஹாரம் பவிஸந்தி. ஸோ புனபி பபு³ஜ்ஜி²த்வா தேஸம் ஸந்திகம் க³ந்த்வா தே விஹாரா நீஹரித்வா ஸயம் புன க³ந்த்வா ததே²வ ஸுபதி. தஸ்மிம் நிச்சகாலம் ஏவம் கரோந்தே தே பி⁴க்கூ² ஸஜ்ஜா²யம் வா கம்மட்டா²னம் வா மனஸிகாதும் நாஸக்கி²ம்ஸு, சித்தம் அஞ்ஞத²த்தம் அக³மாஸி. தே ‘‘அம்ஹாகம் ஆசரியோ அதிவிய ஆரத்³த⁴வீரியோ, பரிக்³க³ண்ஹிஸ்ஸாம ந’’ந்தி பரிக்³க³ண்ஹந்தா தஸ்ஸ கிரியம் தி³ஸ்வா ‘‘நட்ட²ம்ஹா, ஆவுஸோ, ஆசரியோ நோ துச்ச²ரவம் ரவதீ’’தி வதி³ம்ஸு. தேஸம் அதிவிய நித்³தா³ய கிலமந்தானம் ஏகபி⁴க்கு²பி விஸேஸம் நிப்³ப³த்தேதும் நாஸக்கி². தே வுட்ட²வஸ்ஸா ஸத்து² ஸந்திகம் க³ந்த்வா ஸத்தா²ரா கதபடிஸந்தா²ரா ‘‘கிம், பி⁴க்க²வே, அப்பமத்தா ஹுத்வா ஸமணத⁴ம்மம் கரித்தா²’’தி புச்சி²தா தமத்த²ம் ஆரோசேஸும். ஸத்தா² ‘‘ந, பி⁴க்க²வே, இதா³னேவ, புப்³பே³பேஸ தும்ஹாகம் அந்தராயமகாஸியேவா’’தி வத்வா தேஹி யாசிதோ –

‘‘அமாதாபிதரஸம்வட்³டோ⁴, அனாசேரகுலே வஸம்;

நாயம் காலம் அகாலம் வா, அபி⁴ஜானாதி குக்குடோ’’தி. (ஜா. 1.1.119) –

இமம் அகாலராவிகுக்குடஜாதகம் வித்தா²ரேத்வா கதே²ஸி. ‘‘ததா³ ஹி ஸோ குக்குடோ அயம் பதா⁴னிகதிஸ்ஸத்தே²ரோ அஹோஸி, இமே பஞ்ச ஸதா பி⁴க்கூ² தே மாணவா அஹேஸும், தி³ஸாபாமோக்கோ² ஆசரியோ அஹமேவா’’தி ஸத்தா² இமம் ஜாதகம் வித்தா²ரேத்வா, ‘‘பி⁴க்க²வே, பரம் ஓவத³ந்தேன நாம அத்தா ஸுத³ந்தோ காதப்³போ³. ஏவம் ஓவத³ந்தோ ஹி ஸுத³ந்தோ ஹுத்வா த³மேதி நாமா’’தி வத்வா இமம் கா³த²மாஹ –

159. ‘‘அத்தானஞ்சே ததா² கயிரா, யதா²ஞ்ஞமனுஸாஸதி;

ஸுத³ந்தோ வத த³மேத², அத்தா ஹி கிர து³த்³த³மோ’’தி.

தஸ்ஸத்தோ² – யோ ஹி பி⁴க்கு² ‘‘பட²மயாமாதீ³ஸு சங்கமிதப்³ப³’’ந்தி வத்வா பரம் ஓவத³தி, ஸயம் சங்கமனாதீ³னி அதி⁴ட்ட²ஹந்தோ அத்தானஞ்சே ததா² கயிரா, யதா²ஞ்ஞமனுஸாஸதி, ஏவம் ஸந்தே ஸுத³ந்தோ வத த³மேதா²தி யேன கு³ணேன பரம் அனுஸாஸதி, தேன அத்தனா ஸுத³ந்தோ ஹுத்வா த³மேய்ய. அத்தா ஹி கிர து³த்³த³மோதி அயஞ்ஹி அத்தா நாம து³த்³த³மோ. தஸ்மா யதா² ஸோ ஸுத³ந்தோ ஹோதி, ததா² த³மேதப்³போ³தி.

தே³ஸனாவஸானே பஞ்ச ஸதாபி தே பி⁴க்கூ² அரஹத்தம் பாபுணிம்ஸூதி.

பதா⁴னிகதிஸ்ஸத்தே²ரவத்து² ததியம்.

4. குமாரகஸ்ஸபமாதுதே²ரீவத்து²

அத்தா ஹி அத்தனோ நாதோ²தி இமம் த⁴ம்மதே³ஸனம் ஸத்தா² ஜேதவனே விஹரந்தோ குமாரகஸ்ஸபத்தே²ரஸ்ஸ மாதரம் ஆரப்³ப⁴ கதே²ஸி.

ஸா கிர ராஜக³ஹனக³ரே ஸேட்டி²தீ⁴தா விஞ்ஞுதம் பத்தகாலதோ பட்டா²ய பப்³ப³ஜ்ஜம் யாசி. அத² ஸா புனப்புனம் யாசமானாபி மாதாபிதூனம் ஸந்திகா பப்³ப³ஜ்ஜம் அலபி⁴த்வா வயப்பத்தா பதிகுலம் க³ந்த்வா பதிதே³வதா ஹுத்வா அகா³ரம் அஜ்ஜா²வஸி. அத²ஸ்ஸா ந சிரஸ்ஸேவ குச்சி²ஸ்மிம் க³ப்³போ⁴ பதிட்ட²ஹி. ஸா க³ப்³ப⁴ஸ்ஸ பதிட்டி²தபா⁴வம் அஜானித்வாவ ஸாமிகம் ஆராதே⁴த்வா பப்³ப³ஜ்ஜம் யாசி. அத² நம் ஸோ மஹந்தேன ஸக்காரேன பி⁴க்கு²னுபஸ்ஸயம் நேத்வா அஜானந்தோ தே³வத³த்தபக்கி²கானம் பி⁴க்கு²னீனம் ஸந்திகே பப்³பா³ஜேஸி. அபரேன ஸமயேன பி⁴க்கு²னியோ தஸ்ஸா க³ப்³பி⁴னிபா⁴வம் ஞத்வா தாஹி ‘‘கிம் இத³’’ந்தி வுத்தா நாஹம், அய்யே, ஜானாமி ‘‘கிமேதம்’’, ஸீலம் வத மே அரோக³மேவாதி. பி⁴க்கு²னியோ தம் தே³வத³த்தஸ்ஸ ஸந்திகம் நேத்வா ‘‘அயம் பி⁴க்கு²னீ ஸத்³தா⁴பப்³ப³ஜிதா, இமிஸ்ஸா மயம் க³ப்³ப⁴ஸ்ஸ பதிட்டி²தபா⁴வம் ஜானாம, காலம் ந ஜானாம, கிம் தா³னி கரோமா’’தி புச்சி²ம்ஸு. தே³வத³த்தோ ‘‘மா மய்ஹம் ஓவாத³காரிகானம் பி⁴க்கு²னீனம் அயஸோ உப்பஜ்ஜதூ’’தி ஏத்தகமேவ சிந்தேத்வா ‘‘உப்பப்³பா³ஜேத² ந’’ந்தி ஆஹ. தம் ஸுத்வா ஸா த³ஹரா மா மம், அய்யே, நாஸேத², நாஹம் தே³வத³த்தம் உத்³தி³ஸ்ஸ பப்³ப³ஜிதா, ஏத², மம் ஸத்து² ஸந்திகம் ஜேதவனம் நேதா²தி. தா தம் ஆதா³ய ஜேதவனம் க³ந்த்வா ஸத்து² ஆரோசேஸும். ஸத்தா² ‘‘தஸ்ஸா கி³ஹிகாலே க³ப்³போ⁴ பதிட்டி²தோ’’தி ஜானந்தோபி பரவாத³மோசனத்த²ம் ராஜானம் பஸேனதி³கோஸலம் மஹாஅனாத²பிண்டி³கம் சூளஅனாத²பிண்டி³கம் விஸாகா²உபாஸிகம் அஞ்ஞானி ச மஹாகுலானி பக்கோஸாபேத்வா உபாலித்தே²ரம் ஆணாபேஸி – ‘‘க³ச்ச², இமிஸ்ஸா த³ஹராய பி⁴க்கு²னியா சதுபரிஸமஜ்ஜே² கம்மம் பரிஸோதே⁴ஹீ’’தி. தே²ரோ ரஞ்ஞோ புரதோ விஸாக²ம் பக்கோஸாபேத்வா தம் அதி⁴கரணம் படிச்சா²பேஸி. ஸா ஸாணிபாகாரம் பரிக்கி²பாபேத்வா அந்தோஸாணியம் தஸ்ஸா ஹத்த²பாத³னாபி⁴உத³ரபரியோஸானானி ஓலோகேத்வா மாஸதி³வஸே ஸமானேத்வா ‘‘கி³ஹிபா⁴வே இமாய க³ப்³போ⁴ லத்³தோ⁴’’தி ஞத்வா தே²ரஸ்ஸ தமத்த²ம் ஆரோசேஸி. அத²ஸ்ஸா தே²ரோ பரிஸமஜ்ஜே² பரிஸுத்³த⁴பா⁴வம் பதிட்டா²பேஸி. ஸா அபரேன ஸமயேன பது³முத்தரபு³த்³த⁴ஸ்ஸ பாத³மூலே பத்தி²தபத்த²னம் மஹானுபா⁴வம் புத்தம் விஜாயி.

அதே²கதி³வஸம் ராஜா பி⁴க்கு²னுபஸ்ஸயஸமீபேன க³ச்ச²ந்தோ தா³ரகஸத்³த³ம் ஸுத்வா ‘‘கிம் இத³’’ந்தி புச்சி²த்வா, ‘‘தே³வ, ஏகிஸ்ஸா பி⁴க்கு²னியா புத்தோ ஜாதோ, தஸ்ஸேஸ ஸத்³தோ³’’தி வுத்தே தம் குமாரம் அத்தனோ க⁴ரம் நேத்வா தா⁴தீனம் அதா³ஸி. நாமக்³க³ஹணதி³வஸே சஸ்ஸ கஸ்ஸபோதி நாமம் கத்வா குமாரபரிஹாரேன வட்³டி⁴தத்தா குமாரகஸ்ஸபோதி ஸஞ்ஜானிம்ஸு. ஸோ கீளாமண்ட³லே தா³ரகே பஹரித்வா ‘‘நிம்மாதாபிதிகேனம்ஹா பஹடா’’தி வுத்தே ராஜானம் உபஸங்கமித்வா, ‘‘தே³வ, மம் ‘நிம்மாதாபிதிகோ’தி வத³ந்தி, மாதரம் மே ஆசிக்க²தா²’’தி புச்சி²த்வா ரஞ்ஞா தா⁴தியோ த³ஸ்ஸேத்வா ‘‘இமா தே மாதரோ’’தி வுத்தே ‘‘ந ஏத்திகா மே மாதரோ, ஏகாய மே மாதரா ப⁴விதப்³ப³ம், தம் மே ஆசிக்க²தா²’’தி ஆஹ. ராஜா ‘‘ந ஸக்கா இமம் வஞ்சேது’’ந்தி சிந்தேத்வா, தாத, தவ மாதா பி⁴க்கு²னீ, த்வம் மயா பி⁴க்கு²னுபஸ்ஸயா ஆனீதோதி. ஸோ தாவதகேனேவ ஸமுப்பன்னஸம்வேகோ³ ஹுத்வா, ‘‘தாத, பப்³பா³ஜேத² ம’’ந்தி ஆஹ. ராஜா ‘‘ஸாது⁴, தாதா’’தி தம் மஹந்தேன ஸக்காரேன ஸத்து² ஸந்திகே பப்³பா³ஜேஸி. ஸோ லத்³தூ⁴பஸம்பதோ³ குமாரகஸ்ஸபத்தே²ரோதி பஞ்ஞாயி. ஸோ ஸத்து² ஸந்திகே கம்மட்டா²னம் க³ஹேத்வா அரஞ்ஞம் பவிஸித்வா வாயமித்வா விஸேஸம் நிப்³ப³த்தேதும் அஸக்கோந்தோ ‘‘புன கம்மட்டா²னம் விஸேஸேத்வா க³ஹேஸ்ஸாமீ’’தி ஸத்து² ஸந்திகம் க³ந்த்வா அந்த⁴வனே விஹாஸி.

அத² நம் கஸ்ஸபபு³த்³த⁴காலே ஏகதோ ஸமணத⁴ம்மம் கத்வா அனாகா³மிப²லம் பத்வா ப்³ரஹ்மலோகே நிப்³ப³த்தபி⁴க்கு² ப்³ரஹ்மலோகதோ ஆக³ந்த்வா பன்னரஸ பஞ்ஹே புச்சி²த்வா ‘‘இமே பஞ்ஹே ட²பேத்வா ஸத்தா²ரம் அஞ்ஞோ ப்³யாகாதும் ஸமத்தோ² நாம நத்தி², க³ச்ச², ஸத்து² ஸந்திகே இமேஸம் அத்த²ம் உக்³க³ண்ஹா’’தி உய்யோஜேஸி. ஸோ ததா² கத்வா பஞ்ஹவிஸ்ஸஜ்ஜனாவஸானே அரஹத்தம் பாபுணி. தஸ்ஸ பன நிக்க²ந்ததி³வஸதோ பட்டா²ய த்³வாத³ஸ வஸ்ஸானி மாதுபி⁴க்கு²னியா அக்கீ²ஹி அஸ்ஸூனி பவத்திம்ஸு. ஸா புத்தவியோக³து³க்கி²தா அஸ்ஸுதிந்தேனேவ முகே²ன பி⁴க்கா²ய சரமானா அந்தரவீதி²யம் தே²ரம் தி³ஸ்வாவ, ‘‘புத்த, புத்தா’’தி விரவந்தீ தம் க³ண்ஹிதும் உபதா⁴வமானா பரிவத்தித்வா பதி. ஸா த²னேஹி கீ²ரம் முஞ்சந்தேஹி உட்ட²ஹித்வா அல்லசீவரா க³ந்த்வா தே²ரம் க³ண்ஹி. ஸோ சிந்தேஸி – ‘‘ஸசாயம் மம ஸந்திகா மது⁴ரவசனம் லபி⁴ஸ்ஸதி, வினஸ்ஸிஸ்ஸதி. த²த்³த⁴மேவ கத்வா இமாய ஸத்³தி⁴ம் ஸல்லபிஸ்ஸாமீ’’தி. அத² நம் ஆஹ – ‘‘கிம் கரோந்தீ விசரஸி, ஸினேஹமத்தம்பி சி²ந்தி³தும் ந ஸக்கோஸீ’’தி. ஸா ‘‘அஹோ கக்க²ளா தே²ரஸ்ஸ கதா²’’தி சிந்தேத்வா ‘‘கிம் வதே³ஸி, தாதா’’தி வத்வா புனபி தேன ததே²வ வுத்தா சிந்தேஸி – ‘‘அஹம் இமஸ்ஸ காரணா த்³வாத³ஸ வஸ்ஸானி அஸ்ஸூனி ஸந்தா⁴ரேதும் ந ஸக்கோமி, அயம் பனேவம் த²த்³த⁴ஹத³யோ, கிம் மே இமினா’’தி புத்தஸினேஹம் சி²ந்தி³த்வா தம்தி³வஸமேவ அரஹத்தம் பாபுணி.

அபரேன ஸமயேன த⁴ம்மஸபா⁴யம் கத²ம் ஸமுட்டா²பேஸும் – ‘‘ஆவுஸோ, தே³வத³த்தேன ஏவம் உபனிஸ்ஸயஸம்பன்னோ குமாரகஸ்ஸபோ ச தே²ரீ ச நாஸிதா, ஸத்தா² பன தேஸம் பதிட்டா² ஜாதோ, அஹோ பு³த்³தா⁴ நாம லோகானுகம்பகா’’தி. ஸத்தா² ஆக³ந்த்வா ‘‘காய நுத்த², பி⁴க்க²வே, ஏதரஹி கதா²ய ஸன்னிஸின்னா’’தி புச்சி²த்வா ‘‘இமாய நாமா’’தி வுத்தே ‘‘ந, பி⁴க்க²வே, இதா³னேவ அஹம் இமேஸம் பச்சயோ பதிட்டா² ஜாதோ, புப்³பே³பி நேஸம் அஹம் பதிட்டா² அஹோஸிம்யேவா’’தி வத்வா –

‘‘நிக்³ரோத⁴மேவ ஸேவேய்ய, ந ஸாக²முபஸம்வஸே;

நிக்³ரோத⁴ஸ்மிம் மதம் ஸேய்யோ, யஞ்சே ஸாக²ஸ்மி ஜீவித’’ந்தி. (ஜா. 1.1.12; 1.10.81) –

இமம் நிக்³ரோத⁴ஜாதகம் வித்தா²ரேன கதே²த்வா ‘‘ததா³ ஸாக²மிகோ³ தே³வத³த்தோ அஹோஸி, பரிஸாபிஸ்ஸ தே³வத³த்தபரிஸா, வாரப்பத்தா மிக³தே⁴னு தே²ரீ அஹோஸி, புத்தோ குமாரகஸ்ஸபோ, க³ப்³பி⁴னீமிகி³யா ஜீவிதம் பரிச்சஜித்வா க³தோ நிக்³ரோத⁴மிக³ராஜா பன அஹமேவா’’தி ஜாதகம் ஸமோதா⁴னேத்வா புத்தஸினேஹம் சி²ந்தி³த்வா தே²ரியா அத்தனாவ அத்தனோ பதிட்டா²னகதபா⁴வம் பகாஸேந்தோ, ‘‘பி⁴க்க²வே, யஸ்மா பரஸ்ஸ அத்தனி டி²தேன ஸக்³க³பராயணேன வா மக்³க³பராயணேன வா ப⁴விதும் ந ஸக்கா, தஸ்மா அத்தாவ அத்தனோ நாதோ², பரோ கிம் கரிஸ்ஸதீ’’தி வத்வா இமம் கா³த²மாஹ –

160. ‘‘அத்தா ஹி அத்தனோ நாதோ², கோ ஹி நாதோ² பரோ ஸியா;

அத்தனா ஹி ஸுத³ந்தேன, நாத²ம் லப⁴தி து³ல்லப⁴’’ந்தி.

தத்த² நாதோ²தி பதிட்டா². இத³ம் வுத்தம் ஹோதி – யஸ்மா அத்தனி டி²தேன அத்தஸம்பன்னேன குஸலம் கத்வா ஸக்³க³ம் வா பாபுணிதும், மக்³க³ம் வா பா⁴வேதும், ப²லம் வா ஸச்சி²காதும் ஸக்கா. தஸ்மா ஹி அத்தாவ அத்தனோ பதிட்டா² ஹோதி, பரோ கோ நாம கஸ்ஸ பதிட்டா² ஸியா. அத்தனா ஏவ ஹி ஸுத³ந்தேன நிப்³பி³ஸேவனேன அரஹத்தப²லஸங்கா²தம் து³ல்லப⁴ம் நாத²ம் லப⁴தி. அரஹத்தஞ்ஹி ஸந்தா⁴ய இத⁴ ‘‘நாத²ம் லப⁴தி து³ல்லப⁴’’ந்தி வுத்தம்.

தே³ஸனாவஸானே ப³ஹூ ஸோதாபத்திப²லாதீ³னி பாபுணிம்ஸூதி.

குமாரகஸ்ஸபமாதுதே²ரீவத்து² சதுத்த²ம்.

5. மஹாகாலஉபாஸகவத்து²

அத்தனா ஹி கதம் பாபந்தி இமம் த⁴ம்மதே³ஸனம் ஸத்தா² ஜேதவனே விஹரந்தோ ஏகம் மஹாகாலம் நாம ஸோதாபன்னஉபாஸகம் ஆரப்³ப⁴ கதே²ஸி.

ஸோ கிர மாஸஸ்ஸ அட்ட²தி³வஸேஸு உபோஸதி²கோ ஹுத்வா விஹாரே ஸப்³ப³ரத்திம் த⁴ம்மகத²ம் ஸுணாதி. அத² ரத்திம் சோரா ஏகஸ்மிம் கே³ஹே ஸந்தி⁴ம் சி²ந்தி³த்வா ப⁴ண்ட³கம் க³ஹேத்வா லோஹபா⁴ஜனஸத்³தே³ன பபு³த்³தே⁴ஹி ஸாமிகேஹி அனுப³த்³தா⁴ க³ஹிதப⁴ண்ட³ம் ச²ட்³டே³த்வா பலாயிம்ஸு. ஸாமிகாபி தே அனுப³ந்தி⁴ம்ஸுயேவ, தே தி³ஸா பக்க²ந்தி³ம்ஸு. ஏகோ பன விஹாரமக்³க³ம் க³ஹேத்வா மஹாகாலஸ்ஸ ரத்திம் த⁴ம்மகத²ம் ஸுத்வா பாதோவ போக்க²ரணிதீரே முக²ம் தோ⁴வந்தஸ்ஸ புரதோ ப⁴ண்டி³கம் ச²ட்³டே³த்வா பலாயி. சோரே அனுப³ந்தி⁴த்வா ஆக³தமனுஸ்ஸா ப⁴ண்டி³கம் தி³ஸ்வா ‘‘த்வம் நோ கே³ஹஸந்தி⁴ம் சி²ந்தி³த்வா ப⁴ண்டி³கம் ஹரித்வா த⁴ம்மம் ஸுணந்தோ விய விசரஸீ’’தி தம் க³ஹேத்வா போதே²த்வா மாரேத்வா ச²ட்³டே³த்வா அக³மிம்ஸு. அத² நம் பாதோவ பானீயக⁴டம் ஆதா³ய க³தா த³ஹரஸாமணேரா தி³ஸ்வா ‘‘விஹாரே த⁴ம்மகத²ம் ஸுத்வா ஸயிதஉபாஸகோ அயுத்தம் மரணம் லப⁴தீ’’தி வத்வா ஸத்து² ஆரோசேஸும். ஸத்தா² ‘‘ஆம, பி⁴க்க²வே, இமஸ்மிம் அத்தபா⁴வே காலேன அப்பதிரூபம் மரணம் லத்³த⁴ம், புப்³பே³ கதகம்மஸ்ஸ பன தேன யுத்தமேவ லத்³த⁴’’ந்தி வத்வா தேஹி யாசிதோ தஸ்ஸ புப்³ப³கம்மம் கதே²ஸி –

அதீதே கிர பா³ராணஸிரஞ்ஞோ விஜிதே ஏகஸ்ஸ பச்சந்தகா³மஸ்ஸ அடவிமுகே² சோரா பஹரந்தி. ராஜா அடவிமுகே² ஏகம் ராஜப⁴டம் ட²பேஸி, ஸோ ப⁴திம் க³ஹேத்வா மனுஸ்ஸே ஓரதோ பாரம் நேதி, பாரதோ ஓரம் ஆனேதி. அதே²கோ மனுஸ்ஸோ அபி⁴ரூபம் அத்தனோ ப⁴ரியம் சூளயானகம் ஆரோபேத்வா தம் டா²னம் அக³மாஸி. ராஜப⁴டோ தம் இத்தி²ம் தி³ஸ்வாவ ஸஞ்ஜாதஸினேஹோ தேன ‘‘அடவிம் நோ, ஸாமி, அதிக்காமேஹீ’’தி வுத்தேபி ‘‘இதா³னி விகாலோ, பாதோவ அதிக்காமேஸ்ஸாமீ’’தி ஆஹ. ஸோ ஸகாலோ, ஸாமி, இதா³னேவ நோ நேஹீதி. நிவத்த, போ⁴, அம்ஹாகம்யேவ கே³ஹே ஆஹாரோ ச நிவாஸோ ச ப⁴விஸ்ஸதீதி. ஸோ நேவ நிவத்திதும் இச்சி². இதரோ புரிஸானம் ஸஞ்ஞம் த³த்வா யானகம் நிவத்தாபேத்வா அனிச்ச²ந்தஸ்ஸேவ த்³வாரகோட்ட²கே நிவாஸம் த³த்வா ஆஹாரம் படியாதா³பேஸி. தஸ்ஸ பன கே³ஹே ஏகம் மணிரதனம் அத்தி². ஸோ தம் தஸ்ஸ யானகந்தரே பக்கி²பாபேத்வா பச்சூஸகாலே சோரானம் பவிட்ட²ஸத்³த³ம் காரேஸி. அத²ஸ்ஸ புரிஸா ‘‘மணிரதனம், ஸாமி, சோரேஹி ஹட’’ந்தி ஆரோசேஸும். ஸோ கா³மத்³வாரேஸு ஆரக்க²ம் ட²பேத்வா ‘‘அந்தோகா³மதோ நிக்க²மந்தே விசினதா²’’தி ஆஹ. இதரோபி பாதோவ யானகம் யோஜேத்வா பாயாஸி. அத²ஸ்ஸ யானகம் ஸோதே⁴ந்தா அத்தனா ட²பிதம் மணிரதனம் தி³ஸ்வா ஸந்தஜ்ஜேத்வா ‘‘த்வம் மணிம் க³ஹேத்வா பலாயஸீ’’தி போதே²த்வா ‘‘க³ஹிதோ நோ, ஸாமி, சோரோ’’தி கா³மபோ⁴ஜகஸ்ஸ த³ஸ்ஸேஸும். ஸோ ‘‘ப⁴தகஸ்ஸ வத மே கே³ஹே நிவாஸம் த³த்வா ப⁴த்தம் தி³ன்னம், மணிம் க³ஹேத்வா க³தோ, க³ண்ஹத² நம் பாபபுரிஸ’’ந்தி போதா²பேத்வா மாரேத்வா ச²ட்³டா³பேஸி. இத³ம் தஸ்ஸ புப்³ப³கம்மம். ஸோ ததோ சுதோ அவீசிம்ஹி நிப்³ப³த்தித்வா தத்த² தீ³க⁴ரத்தம் பச்சித்வா விபாகாவஸேஸேன அத்தபா⁴வஸதே ததே²வ போதி²தோ மரணம் பாபுணி.

ஏவம் ஸத்தா² மஹாகாலஸ்ஸ புப்³ப³கம்மம் த³ஸ்ஸேத்வா, ‘‘பி⁴க்க²வே, ஏவம் இமே ஸத்தே அத்தனா கதபாபகம்மமேவ சதூஸு அபாயேஸு அபி⁴மத்த²தீ’’தி வத்வா இமம் கா³த²மாஹ –

161. ‘‘அத்தனா ஹி கதம் பாபம், அத்தஜம் அத்தஸம்ப⁴வம்;

அபி⁴மத்த²தி து³ம்மேத⁴ம், வஜிரம்வஸ்மமயம் மணி’’ந்தி.

தத்த² வஜிரம்வஸ்மமயம் மணிந்தி வஜிரம்வ அஸ்மமயம் மணிம். இத³ம் வுத்தம் ஹோதி – யதா² பாஸாணமயம் பாஸாணஸம்ப⁴வம் வஜிரம் தமேவ அஸ்மமயம் மணிம் அத்தனோ உட்டா²னட்டா²னஸங்கா²தம் பாஸாணமணிம் கா²தி³த்வா சி²த்³த³ம் சி²த்³த³ம் க²ண்ட³ம் க²ண்ட³ம் கத்வா அபரிபோ⁴க³ம் கரோதி, ஏவமேவ அத்தனா கதம் அத்தனி ஜாதம் அத்தஸம்ப⁴வம் பாபம் து³ம்மேத⁴ம் நிப்பஞ்ஞம் புக்³க³லம் சதூஸு அபாயேஸு அபி⁴மத்த²தி கந்ததி வித்³த⁴ம்ஸேதீதி.

தே³ஸனாவஸானே ஸம்பத்தபி⁴க்கூ² ஸோதாபத்திப²லாதீ³னி பாபுணிம்ஸூதி.

மஹாகாலஉபாஸகவத்து² பஞ்சமம்.

6. தே³வத³த்தவத்து²

யஸ்ஸ அச்சந்தது³ஸ்ஸீல்யந்தி இமம் த⁴ம்மதே³ஸனம் ஸத்தா² வேளுவனே விஹரந்தோ தே³வத³த்தம் ஆரப்³ப⁴ கதே²ஸி.

ஏகஸ்மிஞ்ஹி தி³வஸே பி⁴க்கூ² த⁴ம்மஸபா⁴யம் கத²ம் ஸமுட்டா²பேஸும் – ‘‘ஆவுஸோ, தே³வத³த்தோ து³ஸ்ஸீலோ பாபத⁴ம்மோ து³ஸ்ஸீல்யகாரணேன வட்³டி⁴தாய தண்ஹாய அஜாதஸத்தும் ஸங்க³ண்ஹித்வா மஹந்தம் லாப⁴ஸக்காரம் நிப்³ப³த்தேத்வா அஜாதஸத்தும் பிதுவதே⁴ ஸமாத³பேத்வா தேன ஸத்³தி⁴ம் ஏகதோ ஹுத்வா நானப்பகாரேன ததா²க³தஸ்ஸ வதா⁴ய பரிஸக்கதீ’’தி. ஸத்தா² ஆக³ந்த்வா ‘‘காய நுத்த², பி⁴க்க²வே, ஏதரஹி கதா²ய ஸன்னிஸின்னா’’தி புச்சி²த்வா ‘‘இமாய நாமா’’தி வுத்தே ‘‘ந, பி⁴க்க²வே, இதா³னேவ, புப்³பே³பி தே³வத³த்தோ நானப்பகாரேன மய்ஹம் வதா⁴ய பரிஸக்கதீ’’தி வத்வா குருங்க³மிக³ஜாதகாதீ³னி (ஜா. 1.2.111-2) கதே²த்வா, ‘‘பி⁴க்க²வே, அச்சந்தது³ஸ்ஸீலபுக்³க³லம் நாம து³ஸ்ஸீல்யகாரணா உப்பன்னா தண்ஹா மாலுவா விய ஸாலம் பரியோனந்தி⁴த்வா ஸம்ப⁴ஞ்ஜமானா நிரயாதீ³ஸு பக்கி²பதீ’’தி வத்வா இமம் கா³தா²மாஹ –

162. ‘‘யஸ்ஸ அச்சந்தது³ஸ்ஸீல்யம், மாலுவா ஸாலமிவோத்த²தம்;

கரோதி ஸோ தத²த்தானம், யதா² நம் இச்ச²தீ தி³ஸோ’’தி.

தத்த² அச்சந்தது³ஸ்ஸீல்யந்தி ஏகந்தது³ஸ்ஸீலபா⁴வோ. கி³ஹீ வா ஜாதிதோ பட்டா²ய த³ஸ அகுஸலகம்மபதே² கரோந்தோ, பப்³ப³ஜிதோ வா உபஸம்பன்னதி³வஸதோ பட்டா²ய க³ருகாபத்திம் ஆபஜ்ஜமானோ அச்சந்தது³ஸ்ஸீலோ நாம. இத⁴ பன யோ த்³வீஸு தீஸு அத்தபா⁴வேஸு து³ஸ்ஸீலோ, ஏதஸ்ஸ க³தியா ஆக³தம் து³ஸ்ஸீலபா⁴வம் ஸந்தா⁴யேதம் வுத்தம். து³ஸ்ஸீலபா⁴வோதி சேத்த² து³ஸ்ஸீலஸ்ஸ ச² த்³வாரானி நிஸ்ஸாய உப்பன்னா தண்ஹா வேதி³தப்³பா³. மாலுவா ஸாலமிவோத்த²தந்தி யஸ்ஸ புக்³க³லஸ்ஸ தம் தண்ஹாஸங்கா²தம் து³ஸ்ஸீல்யம் யதா² நாம மாலுவா ஸாலம் ஓத்த²ரந்தீ தே³வே வஸ்ஸந்தே பத்தேஹி உத³கம் ஸம்படிச்சி²த்வா ஸம்ப⁴ஞ்ஜனவஸேன ஸப்³ப³த்த²கமேவ பரியோனந்த⁴தி, ஏவம் அத்தபா⁴வம் ஓத்த²தம் பரியோனந்தி⁴த்வா டி²தம். ஸோ மாலுவாய ஸம்ப⁴ஞ்ஜித்வா பூ⁴மியம் பாதியமானோ ருக்கோ² விய தாய து³ஸ்ஸீல்யஸங்கா²தாய தண்ஹாய ஸம்ப⁴ஞ்ஜித்வா அபாயேஸு பாதியமானோ, யதா² நம் அனத்த²காமோ தி³ஸோ இச்ச²தி, ததா² அத்தானம் கரோதி நாமாதி அத்தோ².

தே³ஸனாவஸானே ப³ஹூ ஸோதாபத்திப²லாதீ³னி பாபுணிம்ஸூதி.

தே³வத³த்தவத்து² ச²ட்ட²ம்.

7. ஸங்க⁴பே⁴த³பரிஸக்கனவத்து²

ஸுகரானீதி இமம் த⁴ம்மதே³ஸனம் ஸத்தா² வேளுவனே விஹரந்தோ ஸங்க⁴பே⁴த³பரிஸக்கனம் ஆரப்³ப⁴ கதே²ஸி.

ஏகதி³வஸஞ்ஹி தே³வத³த்தோ ஸங்க⁴பே⁴தா³ய பரிஸக்கந்தோ ஆயஸ்மந்தம் ஆனந்த³ம் பிண்டா³ய சரந்தம் தி³ஸ்வா அத்தனோ அதி⁴ப்பாயம் ஆரோசேஸி. தம் ஸுத்வா தே²ரோ ஸத்து² ஸந்திகம் க³ந்த்வா ப⁴க³வந்தம் ஏதத³வோச – ‘‘இதா⁴ஹம், ப⁴ந்தே, புப்³ப³ண்ஹஸமயம் நிவாஸேத்வா பத்தசீவரமாதா³ய ராஜக³ஹம் பிண்டா³ய பாவிஸிம். அத்³த³ஸா கோ² மம், ப⁴ந்தே, தே³வத³த்தோ ராஜக³ஹே பிண்டா³ய சரந்தம். தி³ஸ்வா யேனாஹம் தேனுபஸங்கமி, உபஸங்கமித்வா மம் ஏதத³வோச – ‘அஜ்ஜதக்³கே³ தா³னாஹம், ஆவுஸோ ஆனந்த³, அஞ்ஞத்ரேவ ப⁴க³வதா அஞ்ஞத்ர பி⁴க்கு²ஸங்கே⁴ன உபோஸத²ம் கரிஸ்ஸாமி ஸங்க⁴கம்மஞ்சா’தி. அஜ்ஜ ப⁴க³வா தே³வத³த்தோ ஸங்க⁴ம் பி⁴ந்தி³ஸ்ஸதி, உபோஸத²ஞ்ச கரிஸ்ஸதி ஸங்க⁴கம்மானி சா’’தி. ஏவம் வுத்தே ஸத்தா² –

‘‘ஸுகரம் ஸாது⁴னா ஸாது⁴, ஸாது⁴ பாபேன து³க்கரம்;

பாபம் பாபேன ஸுகரம், பாபமரியேஹி து³க்கர’’ந்தி. (உதா³. 48) –

இமம் உதா³னம் உதா³னேத்வா, ‘‘ஆனந்த³, அத்தனோ அஹிதகம்மம் நாம ஸுகரம், ஹிதகம்மமேவ து³க்கர’’ந்தி வத்வா இமம் கா³த²மாஹ –

163. ‘‘ஸுகரானி அஸாதூ⁴னி, அத்தனோ அஹிதானி ச;

யம் வே ஹிதஞ்ச ஸாது⁴ஞ்ச, தம் வே பரமது³க்கர’’ந்தி.

தஸ்ஸத்தோ² – யானி கம்மானி அஸாதூ⁴னி ஸாவஜ்ஜானி அபாயஸம்வத்தனிகத்தாயேவ அத்தனோ அஹிதானி ச ஹோந்தி, தானி ஸுகரானி. யம் பன ஸுக³திஸம்வத்தனிகத்தா அத்தனோ ஹிதஞ்ச அனவஜ்ஜத்தே²ன ஸாது⁴ஞ்ச ஸுக³திஸம்வத்தனிகஞ்சேவ நிப்³பா³னஸம்வத்தனிகஞ்ச கம்மம், தம் பாசீனனின்னாய க³ங்கா³ய உப்³ப³த்தேத்வா பச்சா²முக²கரணம் விய அதிது³க்கரந்தி.

தே³ஸனாவஸானே ப³ஹூ ஸோதாபத்திப²லாதீ³னி பாபுணிம்ஸூதி.

ஸங்க⁴பே⁴த³பரிஸக்கனவத்து² ஸத்தமம்.

8. காலத்தே²ரவத்து²

யோ ஸாஸனந்தி இமம் த⁴ம்மதே³ஸனம் ஸத்தா² ஜேதவனே விஹரந்தோ காலத்தே²ரம் ஆரப்³ப⁴ கதே²ஸி.

ஸாவத்தி²யம் கிரேகா இத்தீ² மாதுட்டா²னே ட²த்வா தம் தே²ரம் உபட்ட²ஹி. தஸ்ஸா படிவிஸ்ஸககே³ஹே மனுஸ்ஸா ஸத்து² ஸந்திகே த⁴ம்மம் ஸுத்வா ஆக³ந்த்வா ‘‘அஹோ பு³த்³தா⁴ நாம அச்ச²ரியா, அஹோ த⁴ம்மதே³ஸனா மது⁴ரா’’தி பஸம்ஸந்தி. ஸா இத்தீ² தேஸம் கத²ம் ஸுத்வா, ‘‘ப⁴ந்தே, அஹம்பி ஸத்து² த⁴ம்மதே³ஸனம் ஸோதுகாமா’’தி தஸ்ஸ ஆரோசேஸி. ஸோ ‘‘தத்த² மா க³மீ’’தி தம் நிவாரேஸி. ஸா புனதி³வஸே புனதி³வஸேபீதி யாவததியம் தேன நிவாரியமானாபி ஸோதுகாமாவ அஹோஸி. கஸ்மா ஸோ பனேதம் நிவாரேஸீதி? ஏவம் கிரஸ்ஸ அஹோஸி – ‘‘ஸத்து² ஸந்திகே த⁴ம்மம் ஸுத்வா மயி பி⁴ஜ்ஜிஸ்ஸதீ’’தி. ஸா ஏகதி³வஸம் பாதோவ பு⁴த்தபாதராஸா உபோஸத²ம் ஸமாதி³யித்வா, ‘‘அம்ம, ஸாது⁴கம் அய்யம் பரிவிஸேய்யாஸீ’’தி தீ⁴தரம் ஆணாபேத்வா விஹாரம் அக³மாஸி. தீ⁴தாபிஸ்ஸா தம் பி⁴க்கு²ம் ஆக³தகாலே பரிவிஸித்வா ‘‘குஹிம் மஹாஉபாஸிகா’’தி வுத்தா ‘‘த⁴ம்மஸ்ஸவனாய விஹாரம் க³தா’’தி ஆஹ. ஸோ தம் ஸுத்வாவ குச்சி²யம் உட்டி²தேன டா³ஹேன ஸந்தப்பமானோ ‘‘இதா³னி ஸா மயி பி⁴ன்னா’’தி வேகே³ன க³ந்த்வா ஸத்து² ஸந்திகே த⁴ம்மம் ஸுணமானம் தி³ஸ்வா ஸத்தா²ரம் ஆஹ, ‘‘ப⁴ந்தே, அயம் இத்தீ² த³ந்தா⁴ ஸுகு²மம் த⁴ம்மகத²ம் ந ஜானாதி, இமிஸ்ஸா க²ந்தா⁴தி³படிஸம்யுத்தம் ஸுகு²மம் த⁴ம்மகத²ம் அகதே²த்வா தா³னகத²ம் வா ஸீலகத²ம் வா கதே²தும் வட்டதீ’’தி. ஸத்தா² தஸ்ஸஜ்ஜா²ஸயம் விதி³த்வா ‘‘த்வம் து³ப்பஞ்ஞோ பாபிகம் தி³ட்டி²ம் நிஸ்ஸாய பு³த்³தா⁴னம் ஸாஸனம் படிக்கோஸஸி. அத்தகா⁴தாயேவ வாயமஸீ’’தி வத்வா இமம் கா³த²மாஹ –

164. ‘‘யோ ஸாஸனம் அரஹதம், அரியானம் த⁴ம்மஜீவினம்;

படிக்கோஸதி து³ம்மேதோ⁴, தி³ட்டி²ம் நிஸ்ஸாய பாபிகம்;

ப²லானி கட்ட²கஸ்ஸேவ, அத்தகா⁴தாய ப²ல்லதீ’’தி.

தஸ்ஸத்தோ² – யோ து³ம்மேதோ⁴ புக்³க³லோ அத்தனோ ஸக்காரஹானிப⁴யேன பாபிகம் தி³ட்டி²ம் நிஸ்ஸாய ‘‘த⁴ம்மம் வா ஸோஸ்ஸாம, தா³னம் வா த³ஸ்ஸாமா’’தி வத³ந்தே படிக்கோஸந்தோ அரஹதம் அரியானம் த⁴ம்மஜீவினம் பு³த்³தா⁴னம் ஸாஸனம் படிக்கோஸதி, தஸ்ஸ தம் படிக்கோஸனம் ஸா ச பாபிகா தி³ட்டி² வேளுஸங்கா²தஸ்ஸ கட்ட²கஸ்ஸ ப²லானி விய ஹோதி. தஸ்மா யதா² கட்ட²கோ ப²லானி க³ண்ஹந்தோ அத்தகா⁴தாய ப²ல்லதி, அத்தனோ கா⁴தத்த²மேவ ப²லதி, ஏவம் ஸோபி அத்தகா⁴தாய ப²ல்லதீதி. வுத்தம்பி சேதம் –

‘‘ப²லம் வே கத³லிம் ஹந்தி, ப²லம் வேளும் ப²லம் நளம்;

ஸக்காரோ காபுரிஸம் ஹந்தி, க³ப்³போ⁴ அஸ்ஸதரிம் யதா²’’தி. (சூளவ. 335; அ. நி. 4.68);

தே³ஸனாவஸானே உபாஸிகா ஸோதாபத்திப²லே பதிட்ட²ஹி, ஸம்பத்தபரிஸாயபி ஸாத்தி²கா த⁴ம்மதே³ஸனா அஹோஸீதி.

காலத்தே²ரவத்து² அட்ட²மம்.

9. சூளகாலஉபாஸகவத்து²

அத்தனா ஹி கதந்தி இமம் த⁴ம்மதே³ஸனம் ஸத்தா² ஜேதவனே விஹரந்தோ சூளகாலம் உபாஸகம் ஆரப்³ப⁴ கதே²ஸி.

ஏகதி³வஸஞ்ஹி மஹாகாலவத்து²ஸ்மிம் வுத்தனயேனேவ உமங்க³சோரா ஸாமிகேஹி அனுப³த்³தா⁴ ரத்திம் விஹாரே த⁴ம்மகத²ம் ஸுத்வா பாதோவ விஹாரா நிக்க²மித்வா ஸாவத்தி²ம் ஆக³ச்ச²ந்தஸ்ஸ தஸ்ஸ உபாஸகஸ்ஸ புரதோ ப⁴ண்டி³கம் ச²ட்³டே³த்வா பலாயிம்ஸு. மனுஸ்ஸா தம் தி³ஸ்வா ‘‘அயம் ரத்திம் சோரகம்மம் கத்வா த⁴ம்மம் ஸுணந்தோ விய சரதி, க³ண்ஹத² ந’’ந்தி தம் போத²யிம்ஸு. கும்ப⁴தா³ஸியோ உத³கதித்த²ம் க³ச்ச²மானா தம் தி³ஸ்வா ‘‘அபேத², ஸாமி, நாயம் ஏவரூபம் கரோதீ’’தி தம் மோசேஸும். ஸோ விஹாரம் க³ந்த்வா, ‘‘ப⁴ந்தே, அஹம்ஹி மனுஸ்ஸேஹி நாஸிதோ, கும்ப⁴தா³ஸியோ மே நிஸ்ஸாய ஜீவிதம் லத்³த⁴’’ந்தி பி⁴க்கூ²னம் ஆரோசேஸி. பி⁴க்கூ² ததா²க³தஸ்ஸ தமத்த²ம் ஆரோசேஸும். ஸத்தா² தேஸம் கத²ம் ஸுத்வா, ‘‘பி⁴க்க²வே, சூளகாலஉபாஸகோ கும்ப⁴தா³ஸியோ சேவ நிஸ்ஸாய, அத்தனோ ச அகரணபா⁴வேன ஜீவிதம் லபி⁴. இமே ஹி நாம ஸத்தா அத்தனா பாபகம்மம் கத்வா நிரயாதீ³ஸு அத்தனாவ கிலிஸ்ஸந்தி, குஸலம் கத்வா பன ஸுக³திஞ்சேவ நிப்³பா³னஞ்ச க³ச்ச²ந்தா அத்தனாவ விஸுஜ்ஜ²ந்தீ’’தி வத்வா இமம் கா³த²மாஹ –

165. ‘‘அத்தனா ஹி கதம் பாபம், அத்தனா ஸம்கிலிஸ்ஸதி;

அத்தனா அகதம் பாபம், அத்தனாவ விஸுஜ்ஜ²தி;

ஸுத்³தீ⁴ அஸுத்³தி⁴ பச்சத்தம், நாஞ்ஞோ அஞ்ஞம் விஸோத⁴யே’’தி.

தஸ்ஸத்தோ² – யேன அத்தனா அகுஸலகம்மம் கதம் ஹோதி, ஸோ சதூஸு அபாயேஸு து³க்க²ம் அனுப⁴வந்தோ அத்தனாவ ஸம்கிலிஸ்ஸதி. யேன பன அத்தனா அகதம் பாபம், ஸோ ஸுக³திஞ்சேவ நிப்³பா³னஞ்ச க³ச்ச²ந்தோ அத்தனாவ விஸுஜ்ஜ²தி. குஸலகம்மஸங்கா²தா ஸுத்³தி⁴ அகுஸலகம்மஸங்கா²தா ச அஸுத்³தி⁴ பச்சத்தம் காரகஸத்தானம் அத்தனியேவ விபச்சதி. அஞ்ஞோ புக்³க³லோ அஞ்ஞம் புக்³க³லம் ந விஸோத⁴யே நேவ விஸோதே⁴தி, ந கிலேஸேதீதி வுத்தம் ஹோதி.

தே³ஸனாவஸானே சூளகாலோ ஸோதாபத்திப²லே பதிட்ட²ஹி, ஸம்பத்தபரிஸாயபி ஸாத்தி²கா த⁴ம்மதே³ஸனா அஹோஸீதி.

சூளகாலஉபாஸகவத்து² நவமம்.

10. அத்தத³த்த²த்தே²ரவத்து²

அத்தத³த்த²ந்தி இமம் த⁴ம்மதே³ஸனம் ஸத்தா² ஜேதவனே விஹரந்தோ அத்தத³த்த²த்தே²ரம் ஆரப்³ப⁴ கதே²ஸி.

ஸத்தா²ரா ஹி பரினிப்³பா³னகாலே, ‘‘பி⁴க்க²வே, அஹம் இதோ சதுமாஸச்சயேன பரினிப்³பா³யிஸ்ஸாமீ’’தி வுத்தே உப்பன்னஸம்வேகா³ ஸத்தஸதா புது²ஜ்ஜனா பி⁴க்கூ² ஸத்து² ஸந்திகம் அவிஜஹித்வா ‘‘கிம் நு கோ², ஆவுஸோ, கரிஸ்ஸாமா’’தி ஸம்மந்தயமானா விசரந்தி. அத்தத³த்த²த்தே²ரோ பன சிந்தேஸி – ‘‘ஸத்தா² கிர சதுமாஸச்சயேன பரினிப்³பா³யிஸ்ஸதி, அஹஞ்சம்ஹி அவீதராகோ³, ஸத்த²ரி த⁴ரமானேயேவ அரஹத்தத்தா²ய வாயமிஸ்ஸாமீ’’தி. ஸோ பி⁴க்கூ²னம் ஸந்திகம் ந க³ச்ச²தி. அத² நம் பி⁴க்கூ² ‘‘கஸ்மா, ஆவுஸோ, த்வம் நேவ அம்ஹாகம் ஸந்திகம் ஆக³ச்ச²ஸி, ந கிஞ்சி மந்தேஸீ’’தி வத்வா ஸத்து² ஸந்திகம் நேத்வா ‘‘அயம், ப⁴ந்தே, ஏவம் நாம கரோதீ’’தி ஆரோசயிம்ஸு. ஸோ ஸத்தா²ராபி ‘‘கஸ்மா ஏவம் கரோஸீ’’தி வுத்தே ‘‘தும்ஹே கிர, ப⁴ந்தே, சதுமாஸச்சயேன பரினிப்³பா³யிஸ்ஸத², அஹம் தும்ஹேஸு த⁴ரந்தேஸுயேவ அரஹத்தப்பத்தியா வாயமிஸ்ஸாமீ’’தி. ஸத்தா² தஸ்ஸ ஸாது⁴காரம் த³த்வா, ‘‘பி⁴க்க²வே, யஸ்ஸ மயி ஸினேஹோ அத்தி², தேன அத்தத³த்தே²ன விய ப⁴விதும் வட்டதி. ந ஹி க³ந்தா⁴தீ³ஹி பூஜேந்தா மம் பூஜேந்தி, த⁴ம்மானுத⁴ம்மபடிபத்தியா பன மம் பூஜேந்தி. தஸ்மா அஞ்ஞேனபி அத்தத³த்த²ஸதி³ஸேனேவ ப⁴விதப்³ப³’’ந்தி வத்வா இமம் கா³த²மாஹ –

166. ‘‘அத்தத³த்த²ம் பரத்தே²ன, ப³ஹுனாபி ந ஹாபயே;

அத்தத³த்த²மபி⁴ஞ்ஞாய, ஸத³த்த²பஸுதோ ஸியா’’தி.

தஸ்ஸத்தோ² – கி³ஹிபூ⁴தா தாவ காகணிகமத்தம்பி அத்தனோ அத்த²ம் ஸஹஸ்ஸமத்தேனாபி பரஸ்ஸ அத்தே²ன ந ஹாபயே. காகணிகமத்தேனாபி ஹிஸ்ஸ அத்தத³த்தோ²வ கா²த³னீயம் வா போ⁴ஜனீயம் வா நிப்பா²தே³ய்ய, ந பரத்தோ². இத³ம் பன ஏவம் அகதே²த்வா கம்மட்டா²னஸீஸேன கதி²தம், தஸ்மா ‘‘அத்தத³த்த²ம் ந ஹாபேமீ’’தி பி⁴க்கு²னா நாம ஸங்க⁴ஸ்ஸ உப்பன்னம் சேதியபடிஸங்க²ரணாதி³கிச்சம் வா உபஜ்ஜா²யாதி³வத்தம் வா ந ஹாபேதப்³ப³ம். ஆபி⁴ஸமாசாரிகவத்தஞ்ஹி பூரேந்தோயேவ அரியப²லாதீ³னி ஸச்சி²கரோதி, தஸ்மா அயம்பி அத்தத³த்தோ²வ. யோ பன அச்சாரத்³த⁴விபஸ்ஸகோ ‘‘அஜ்ஜ வா ஸுவே வா’’தி படிவேத⁴ம் பத்த²யமானோ விசரதி, தேன உபஜ்ஜா²யவத்தாதீ³னிபி ஹாபேத்வா அத்தனோ கிச்சமேவ காதப்³ப³ம். ஏவரூபஞ்ஹி அத்தத³த்த²மபி⁴ஞ்ஞாய ‘‘அயம் மே அத்தனோ அத்தோ²’’தி ஸல்லக்கே²த்வா, ஸத³த்த²பஸுதோ ஸியாதி தஸ்மிம் ஸகே அத்தே² உய்யுத்தபயுத்தோ ப⁴வேய்யாதி.

தே³ஸனாவஸானே ஸோ தே²ரோ அரஹத்தே பதிட்ட²ஹி, ஸம்பத்தபி⁴க்கூ²னம்பி ஸாத்தி²கா த⁴ம்மதே³ஸனா அஹோஸீதி.

அத்தத³த்த²த்தே²ரவத்து² த³ஸமம்.

அத்தவக்³க³வண்ணனா நிட்டி²தா.

த்³வாத³ஸமோ வக்³கோ³.